<a href="https://kyzylorda-news.kz/">Kyzylorda-news.kz.</a> Қызылорда облысында коронавирустық инфекцияның таралуына жол бермеу, алдын алу мақсатында аймақтық штаб құрылғаны белгілі.
Бүгінде санитариялық-профилактикалық шаралар кешенді жоспарға енгізілді. Аудан әкімдіктері және аудандық медициналық ұйым басшыларымен селекторлық жиындар өткізілуде.
Облыстағы медицина қызметкерлеріне талдаулар алу, науқастарды оқшаулау және оларға көмек көрсету бойынша нұсқаулықтар таратылған.
Қорқыт Ата әуежайында және облыстың барлық медицина ұйымдарында оқу-жаттығулар өткізіліп, коронавирустық инфекциямен ауыратын және күдікті науқасты анықтау кезіндегі іс-қимыл алгоритмі пысықталды. Облыстың барлық емдеу мекемелері бірінші типтегі костюмдермен, қорғаныс құралдарымен, сонымен қатар қажетті дәрі-дәрмектермен қамтылды.
<blockquote>
 «Қазіргі таңда облыстағы бір реттік қорғаныш костюм саны – 4243, көп реттік қорғаныш костюм саны – 1283. Бір рет қолданылатын маскалар саны – 39 717. №95 респираторлар саны – 6472. Бір реттік қолғаптар саны – 90 521. Қолды өңдеуге арналған антисептиктер саны – 1177. Аса қауіпті аурумен ауыратын науқастарды тасымалдауға арналған «капсула» камерасы – 1 дана, облыстық жұқпалы аурулар ауруханасының базасында биологиялық қорғаныш костюмі 1 дананы құрап отыр», – деп мәлімдеді облыс әкімдігінің <a href="https://www.facebook.com/570130433090030/posts/2292608804175509/">баспасөз қызметі</a>.
</blockquote>
Сондай-ақ, коронавирустық инфекцияның алдын алу мақсатында облысқа 2 млн 901 мың теңгеге дәрі-дәрмек сатып алынды.
Ал, жұқпалы ауруларға 538 төсек орын дайындалған.

Коронавирус: Қызылорда облысындағы емдеу мекемелері қорғаныс құралдарымен толық қамтылған

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаев елде жарияланған төтенше жағдайға байланысты қала аумағындағы халық көп шоғырланатын нысандарда атқарылып жатқан жұмыстармен танысты.
Коронавирус індеті Қазақстан аумағына енгеннен бастап ел ішінде тиісті шаралар қолға алынды. Мемлекет басшысы Қасым-Жомарт Тоқаев 16 наурыз бен 15 сәуір аралығында елде төтенше жағдай жариялады. Осыған орай өңірлерде қатаң тәртіпте жұмыстар ұйымдастырылуда.
Қызылорда қаласында да сақтық шаралары жоғары деңгейде жүргізіліп келеді. Бұған қала әкімі Нұрлыбек Нәлібаевтың облыс орталығындағы нысандарды аралау барысында көз жеткіздік.
Шаһар басшысы ең алдымен қаланың бас қақпасы Қызылорда теміржол вокзалына барды. Ғимараттың күту залын аралаған қала әкімі мұнда бір-екі антисептик аздық ететін айтып, оның санын көбейту және халықтың оны пайдалануын қадағалау қажеттігін ескертті.
Қызылорда қаласы бойынша теміржол вокзалының аумағына жауапты Ибраким Басықараевтың айтуынша, күніне мұнда 4-5 мың адам келіп-кетеді. Сондықтан мұндағы бар жоғы 2 антисептик мұнша халыққа жетпейтіні анық.
<blockquote>
 «Қазіргі жағдайға байланысты халықтың денсаулығын сақтау мақсатында ғимарат ішінде антисептиктердің санын көбейту керек. Сонымен қатар ғимарат ішін әр сағат сайын жуып, тазалық жұмыстарын ұдайы жүргізіп отыру керек. Ғимарат ішінде сағат сайын дезинфекция жұмыстары жүргізілсін. Есік-терезелерді ашып қойып, халықтың сыртта жүргені абзал. Қазір күн жылы сондықтан вокзалға келушілердің сыртта күткені, кассада бір адамнан артық тұрмағаны жөн. Ғимарат сыртында да халыққа жағдай жасалу қажет», – деді қала әкімі Нұрлыбек Нәлібаев.
</blockquote>
Бас қақпаның келбеті қаланың тыныс-тіршілігінен хабар беретіні белгілі. Көбіне теміржол вокзалына қарап баға беріледі. Мұны айтқан қала әкімі ғимаратты жөндеу жұмыстары қашан жүргізілетінін сұрады. Жөндеу жұмыстарының нақты уақыты шешілмегендіктен ғимаратты әктеу, сырлау жұмыстары 3 күн ішінде аяқталуы қажет екендігі ескертілді.
<blockquote>
 «Жөндеу жұмыстары тез арада басталуын қадағалау қажет. Бірақ ол уақытқа дейін ғимарат әктеліп, сырлансын. Ол үшін көп қаражаттың қажеті жоқ. Вокзалға келушілер сіздерді жазғырмайды, олар «әкімдік қайда қарап отыр» деп бізді сынайды. Сондықтан вокзал маңайындағы жаяу жүргіншілер жолағын, ғимарат сыртын, сондай-ақ Шиелі ауданымен шектесетін маңайына дейін теміржол айналасына тазалық жұмыстарын жүргізу қажет», – деді қала әкімі.
</blockquote>
Шаһар басшысы мұнан әрі қаладағы құрылыс монтаж жұмыстары жүргізіліп келетін кәріз насостық станцияларының жұмысымен <a href="https://kyzylorda-news.kz/kogam/qyzylorda-qalasy-zhaghymsyz-iisten-arylatyn-kuen-alys-emes-foto-50967/">танысты</a>.
Қала әкімінің келесі бағыты автовокзал бекеті болды. Мұнда да елдегі төтенше жағдайға қатысты мәселе пысықталды. Үнемі халық ығы-жығы болып жататын бекет бұл жолы тым-тырыс секілді. Адамдар арлы-берлі жүруден тыйылған дерсіз. Қала әкімін қарсы алған автовокзал басшысы ең алдымен автобус жүргізушілерінің демалыс орнын көрсетті. Мұнан соң ғимарат ішіндегі дезинфекциялық жұмыстардың жүргізілу тәртібіне тоқталып, қала әкімінің тапсырмасын мүлтіксіз орындалатынын айтты.
<blockquote>
 «Дәл қазіргі уақытта Нұр-Сұлтан және Алматы қаласынан келіп жатқан адамдардың тізімін алу қажет. Біз міндетті түрде оларды бақылауға алуымыз керек. Сондықтан осы 2 қаладан келетін адамдардың тізімін берсеңіздер. Сонымен қатар жақын күндері Алматы мен Нұр-Сұлтанға барған немесе сол жақтан келген адамдардың тізімін билет бойынша іздеп, хабарласу қажет. Әлеуметтік желілерде де іздестіріп, тиісті орталықтарға немесе емханаға жолығуды ескерту керек», – деді шаһар басшысы.
</blockquote>
Мұнда да ғимарат ішінде халықтың көп болмауы, ыңғай келсе жолаушылардың сыртта тұруын талап ету қажеттігі де айтылды. Ең бастысы халықтың қауіпсіздігі екендігі ескертілді.
Теміржол және автовокзалдардың жайымен танысып, елдегі төтенше жағдайға байланысты жүргізіліп жатқан жұмыс барысын көрген қала әкімі енді «Қорқыт ата» атындағы әуежайды бетке алды.
«Қорқыт ата» әуежайы АҚ директоры Константин Нидың айтуынша, 22 наурыздан бастап әуежайда барлық әуе рейстері тоқтайды. Тек әскери, төтенше жағдай және санитарлық қызмет рейстеріне ғана рұқсат беріледі.
<blockquote>
 «21 наурызға дейін үздіксіз жұмыс жасаймыз. Ал 22 наурыздан бастап әуежайда қызметкер санын азайтатын боламын. Олар тек әскери, төтенше жағдай және санитар қызметкерлерге ғана жұмыс жасайды», – дейді Константин Ни.
</blockquote>
Әуежайдың алаңына келген шаһар басшысы мұнда әлеуметтік желіде қызу талқыға түскен мәселені де қозғады. Яғни, әуежайдың алдындағы ағаштардың қырқылу себебін сұрады.
Директор Ни бұл мәселеге толық дайындалғанын дәлелдеп, әуежай маңындағы талдардың қырқылуы қажет екенін, ағаш бұталарына құстар ұя салып, олардың ұшақтарға кері әсер тигізу қаупі бар екендігі жөніндегі заңды қағаз жүзінде назарға ұсынды. Оның айтуынша, заң талаптарына сәйкес, бұл талдар түбінен шабылуы қажет екен.
Қала әкімі бұл мәселе әлі де толық зерттелетінін айтып, қабылданған шешімнің дұрыс-бұрыстығы тексерілетінін жеткізді. Сондай-ақ қалада әр мекеме басшысы өз бетімен ағаштарды кесуіне жол берілмейтіні, керісінше әрқайсысы қаланың көгалдануына атсалысу қажет екені ескертілді.
Қала әкімінің нысандарды аралаудағы келесі аялдамасы «Наурыз» саяжайында орналасқан ауыз су жинау қоймасының құрылысы болды. Қала басшысы елді мекендерді ауыз сумен қамтамасыз ету мақсатында Ақсуат ауылдық округі мен «Наурыз» саяжайында атқарылып жатқан жұмыстармен танысып көрді.
«Өңірлерді дамыту – 2020» бағдарламасымен елді мекендерді ауыз сумен қамтамасыз ету мақсатында сумен жабдықтау бағытымен барлығы 2 млрд 492 млн мың теңге, қоса қаржыландырумен облыстық бюджеттен 89,3 млн теңге қаржы қаралған. Бұл жоба аясында «Наурыз» саяжайында да ауыз су жинау қоймасының құрылысы жүргізілді. Құрылыстың бас мердігері – «Мелиоратор» ЖШС. Бұл құрылыс 2018 жылы бастау алған. Өткен жылдың желтоқсан айында аяқталып, пайдалануға берілген.
<blockquote>
 «Елді мекендегі 6 мыңға жуық тұрғын үй толығымен ауыз су жүйесіне қосылу қажет. Әр үйге су есептегіш құралдары орнатылып, жобаға енбей қалған үйлерге де ауыз су жеткізілсін. Халықтың алғысынан асқан баға жоқ», – деді &nbsp;Н. Нәлібаев.
</blockquote>
Осы орайда қала әкімі Қызылорда қалалық құрылыс бөлімінің басшысына қалаға қарасты басқа елді мекендердегі ауыз су жинау қоймасының құрылыстары алдағы мамыр айына дейін аяқталуы керектігін ескертті.
Динара МАХАНОВА
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-2.jpeg" alt="" />
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-3.jpeg" alt="" />
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-4.jpg" alt="" />
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-5.jpeg" alt="" />
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-6.jpeg" alt="" />
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-7.jpg" alt="" />
<img src="https://kyzylorda-news.kz/wp-content/uploads/2020/03/koronaviwrs-kyzylorda-kaz-8.jpg" alt="" />

Коронавирус: Қызылорда қаласы қауіпті індеттің алдын алуға дайын ба?

<a href="https://kyzylorda-news.kz/">Kyzylorda-news.kz.</a> ҚР Денсаулық сақтау министрі Елжан Біртановтың қазақстандықтар коронавирусты жұқтырғаны расталған жағдайлары туралы мәлімдемесінен кейін халық арасында алаңдаушылық айтарлықтай өсті. Бұрын Әлеуметтік медициналық сақтандыру қорының Бірыңғай байланыс орталығына күніне шамамен 1500-2000 қоңырау келіп түсетін болса, ал қазір олардың саны 3 есеге артқан.
Қазақстандық дәрігерлер осындай маңызды кезеңде ағзаны мүмкін болып қалатын инфекция жұқтырудан сақтану және алдын-алу үшін барлық шараларды қабылдау қажеттігін ескертеді.
1406 байланыс орталығының операторлары халыққа денсаулығын нығайту және өзінің ағзасын қорғау, күдікті симптомдар байқалғанда әрекеттер жасау бойынша кеңес беру дайндығынан өтті.
<blockquote>
 «Байланыс орталығы қажетті алдын-алу шаралары және вирустан қорғану бойынша кеңес беру үшін жұмыс істейді. Операторлар сонымен бірге сырқатталып қалған кезде қайда бару керектігін, қандай белгілерге назар аудару керектігін, қайда талдауларды (анализдерді) тапсыруға болатындығын түсіндіреді. Үкімет пен уәкілетті органдар қабылдап жатқан шаралар халықты қорғауға бағытталған. Алайда, қоғамдық орындарға бару денсаулыққа қауіп төндіреді екенін саналы азаматтар түсінуі керек», – деді Әлеуметтік медициналық сақтандыру қорының баспасөз қызметі.
</blockquote>
Естеріңізге сала кетейік, коронавирусқа байланысты кез келген сұрақтарды 1406 операторларына Qoldau 24/7 мобильді қосымшасы арқылы да жолдауға болады.
Өтінішке тіркеу нөмірі беріледі, содан кейін сіз өзіңіздің жеке кабинетіңізде оның мәртебесін тексере аласыз.

Коронавирус: Барлық сұрақтарды Qoldau 24/7  мобильді қосымшасы арқылы жолдауға болады

<a href="https://kyzylorda-news.kz/wp-admin/">Kyzylorda-news.kz.</a> Қызылорда облысында коронавирус инфекциясының алдын алу мақсатында тиісті қаржылар бөлініп, жұмыс жасалуда. Сондай-ақ, қаржыны жоспарлау басты назарда. Бұл туралы Өңірлік коммуникациялар қызметінің ақпарат алаңында өткен баспасөз конференциясында облыстық Қаржы басқармасының басшысы Талғат Жақыпбаев және Экономика және бюджеттік жоспарлау басқармасының басшысы Нұрғали Қордабай мәлімдеді.
Талғат Жақыпбаевтың айтуынша, өңірімізге наурыз айына қаралған 19,9 млрд теңге субвенция толық түсіп, тиісті орындарға аударылған. Сондай-ақ, облыс бойынша жергілікті бюджеттің бірінші тоқсандағы кірістер жоспары 115,5 пайызға орындалды.
Еліміздегі төтенше жағдайға байланысты облыс әкімі Қ. Ысқақовтың өкімімен жедел әрекет етудің өңірлік штабы құрылды. Облыста қоғамдық-саяси ахуал тұрақты, баға мәселесі бақылауда.
<blockquote>
 “Әлеуметтік маңыздағы 19 түрлі азық-түлік тауарларын сатып алу тізбесі бекітілді. Азық-түлік тауарларының өңірлік тұрақтандыру қорын толықтыруға, облыс әкімінің резервінен шұғыл шығындар бойынша 1107 тонна көлемінде әлеуметтік маңызы бар азық-түлікті сатып алуға 105,8 млн. теңге қаржы бөлу жоспарлануда”, – деп атап өтті Нұрғали Қордабай брифингте.
</blockquote>
Мұнан өзге, облыста жанар-жағар май қоры да жеткілікті. 2020 жылдың 16 наурызындағы жағдай бойынша АИ-92 маркалы бензин қоры – 3106,9 тонна, дизель отын қоры – 2984,5 тоннаны құрап отыр.
Сонымен қатар, коронавирустық инфекцияның пайда болуын және таралуына жол бермеу мақсатында облысқа дәрілік заттарды, тест-жүйкелерді, зертханалық жабдықтарды сатып алуға 4309 млн. теңге бөлінген.
<img src="https://kyzylorda-news.kz/wp-content/uploads/2020/03/img-20200317-wa0034.jpg" alt="" />
<img src="https://kyzylorda-news.kz/wp-content/uploads/2020/03/img-20200317-wa0033.jpg" alt="" />

Коронавирус: Қызылорда облысында инфекцияның алдын алу мақсатында 4309 млн теңге бөлінді

<a href="https://kyzylorda-news.kz/">Kyzylorda-news.kz.</a> Бұл туралы Өңірлік коммуникациялар қызметінің ақпарат алаңында өткен баспасөз конференциясында Облыстық индустриялық-инновациялық даму басқармасының басшысы Ринат Сұлтангереев мәлімдеді.
<blockquote>
 «Елімізде азаматтардың өмірі мен денсаулығының қауіпсіздігін қамтамасыз ету мақсатында, төтенше жағдайдың алдын алу бойынша шектеу шаралары енгізілгендігі белгілі. Осыған орай, өңірімізде өндірісті ынталандыру үшін «Қарапайым заттар экономикасы» бағдарламасы аясында отандық кәсіпкерлерді қолдау және жаңа жұмыс орындарын ашу мақсатында қосымша 300 млрд теңге бөлінеді. Сондай-ақ, елдегі жағдайды түзеу мақсатында күнделікті тұтынатын және өзге де сервистік қызмет көрсететін орындардың жұмысына жергілікті кәсіпкерлердің күшін жұмылдыру қолға алынбақ», – деді Ринат Қалдыбекұлы.
</blockquote>
Сонымен қатар, сатып алу заңдылықтарына қарамастан жергілікті тауар өндірушілерден тікелей сатып алу мүмкіндігі қарастырылды.
Мұнан өзге, Төтенше жағдайға байланысты мұнай-газ кен орындарында өндірістің тоқтауына жол бермеу мақсатында вахталық ауысымда жұмыс жасаушылардың мерзімін 28 күнге ұлғайту шаралары қабылдануда. Бұл жұмыс істейтін азаматтардың арасында вирустың таралмауына жол бермеу үшін жүргізілуде.
<img src="https://kyzylorda-news.kz/wp-content/uploads/2020/03/kyzylorda-investicija-swltangereeva-kaz.jpeg" alt="" />

Коронавирус: Қызылордада вахталық ауысымда жұмыс жасайтындардың мерзімі 28 күнге ұзартылды

<a href="https://kyzylorda-news.kz/">Kyzylorda-news.kz.</a> Қандай да бір жұқпалы ауруды жасырғандар немес сол аурумен ауырған адамдар байланыста болған тұлғаларды жасырғандар тек айыппұлмен құтылмайды. Бұл туралы өңірлік коммуникациялар қызметінің ақпарат алаңында өткен баспасөз конференциясында облыстық Полиция департаменті бастығының орынбасары Байкелді Байжан мәлімдеді.
<blockquote>
 «Қазақстан Республикасы Қылмыстық Кодексінің 304 бабына сәйкес, яғни санитарлық қағидаларды немесе гигиеналық нормативтерді бұзу қылмыстық жауапкершілік болып табылады», – деді Байжан Есенбекұлы.
</blockquote>
Оның айтуынша, санитарлық қағидаларды немесе гигиеналық нормативтерді абайсызда адамдардың жаппай сырқаттануына, ауру жұқтыруына, сәулеленуіне немесе улануына әкеп соққан жағдайда – белгілі бір лауазымдарды атқару немесе қызметпен айналысу құқығын 3 жылға айыру, 2 мың айлық есептік көрсеткіште айыппұл салу, 600 сағатқа дейін қоғамдық жұмысқа тарту не 2 жылға дейін бас бостандығын шектеу немес айыру жазасы тағайындалған.
Сондай-ақ, абайсызда адам өліміне әкеп соққан дәл сол іс-әрекетте 5 жылға дейін бас бостандығын шектеу немес айырылу жазасы бар.
<blockquote>
 «Абайсызда екі немесе оданда көп адамның өліміне әкеп соққан іс-әрекеттер – белгілі бір лауазымдарды атқару немесе қызметпен айналысу құқығын 3 жылға айыру, 5 жылдан 10 жылға дейін бас бостандығын шектеу немес айыру жазасы көзделген», – деді брифингте Б. Байжан.
</blockquote>
Қызылорда облыстық Полиция департаменті бастығының орынбасары атап өткендей, айналасындағылар үшін қауіп төндіретін аурулармен ауыратын адамдардың емделуден жалтарғаны үшін еліміздің Әкімшілік-құқық бұзушылық туралы кодексіне сәйкес, 5 айлық есептік көрсеткіш мөлшерінде айыппұл салынады.
Сонымен қатар, қауіп төндіретін аурулармен ауыратын кәмелетке толмаған балаларын емдетуден жалтарғандарға 10 айлық есептік көрсеткіш мөлшерінде айыппұл салынса, жұқпалы аурулармен ауыратын адамдарды жұқтыру көзін және өздерімен қатынаста болған адамдарды жасыру 5 айлық есептік көрсеткіш мөлшерінде айыппұл төлейді.
<img src="https://kyzylorda-news.kz/wp-content/uploads/2020/03/01-53.jpg" alt="" />

Коронавирус: Ауруды жасырғандар тек айыппұлмен құтылмайды

<a href="https://kyzylorda-news.kz/">Kyzylorda-news.kz.</a> Ірі сауда орталықтары, кинотеатрлар, театрлар мен көрмелер, спорт нысандары бір жылға дейін мүлік салығынан босатылады.
Сондай-ақ бір тоқсанға дейін өсімпұл есептелмейді. Ал 7 мыңға жуық&nbsp; ауыл шаруашылығы тауарларын өндірушілер жерге салынатын салықтан босатылды. Бүгінгі Үкімет отырысында осы мәселелер жан-жақты талқыланды. Шағын және орта бизнесті қолдау және еңбек нарығындағы тұрақтылықты қамтамасыз ету үшін Үкімет 7 бағыттан тұратын дағдарысқа қарсы жедел шаралар топтамасын бекітті.
«Бизнестің жол картасы-2025» бағдарламасы мен «Қарапайым заттар экономикасы» бағдарламаларын синхрондау арқылы саланы несиелендіру 1 трлн теңгеге дейін ұлғаяды. Бұл ақша импортқа тәуелділікті азайтып, азық-түлік қауіпсіздігін қамтамасыз етуге жұмсалады. Қаржы алдымен отандық тауар өндірушілерге беріледі.
Несие бойынша түпкілікті сыйақы мөлшерлемесі 6 процент болады. Төтенше жағдайға байланысты кәсіпкерлердің көбі жұмысын тоқтатуға мәжбүр болып отыр. Оның ішінде, туристік агенттіктер шығынға батуы мүмкін. 6000 агенттікте 80 мың адам еңбек етсе, олардың 90 проценті – әйел адам. Төтенше жағдайға байланысты. сәуірдің аяғына дейін жоспарланған саяхаттар тоқтатылды. 13 мың шетелдік турист келмейтін болды.

Коронавирус: Қазақстанда кімдер салықтан 1 жылға босатылды?

<a href="https://kyzylorda-news.kz/">Kyzylorda-news.kz.</a> Коронавирус инфекциясына байланысты Қызылорда облысына 109 шетелдік маманның кіруіне рұқсат етілмеген. Бұл туралы Өңірлік коммуникациялар қызметінің ақпарат алаңында өткен баспасөз конференциясында Облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Гаухар Калмакова мәлімдеді.
Оның айтуынша, аймақта шетелдік жұмыс күшін тартатын 22 кәсіпорын бар. Қазіргі таңда берілген 196 рұқсаттың ішінен 87 шетелдік маман жұмыс істейді. Қалған 109 шетел азаматы облысқа кіргізілмеді.
<blockquote>
 «Өңірімізде қазақ-қытай ынтымақтастығы аясында 2 инвестициялық жоба жүзеге асырылуда. Бұлар – шыны және цемент зауыттары. Сондай-ақ, зауыттарға шетелдік жұмыс күшін тарту-инвестициялық келісім-шарт аясында жүргізіледі»,- деді Гаухар Амангелдіқызы.
</blockquote>
Сонымен қатар, зауытта 214 адам жұмыспен қамтылған. Оның ішінде, инвестициялық жоба аясында рұқсат алған – 35 қытай азаматы. Бұған қоса, өткен жылдың желтоқсан айында 32-і қытай азаматы еңбек демалысына шығып, елдеріне оралды. Қазіргі уақытта 3 шетел азаматы зауытта жұмыс істеуде. 
Айта кетейік, еңбек демалысына шыққан қытай азаматтарына елге кіруге рұқсат берілмеді.
Мұнан өзге, инвестор жұмысын қазақстандық компанияларға беруді жоспарлауда. Берген жағдайда кадр қажеттілігі жергілікті еңбек нарығы есебінен жабылатын болады.
Қазіргі таңда Қазақстан-Қытай шекарасындағы жағдайға байланысты қытай мамандарының келе алмауына сәйкес зауыттың іске қосылуы шілде айына жылжытылды.
Айта кетейік, өңірімізде жұмыс жасап жатқан 87 шетелдік маманның 85 – Қытай елінің азаматтары болса, АҚШ және Сербиядан 2 маман еңбек етуде.
<img src="https://kyzylorda-news.kz/wp-content/uploads/2020/03/qyzylorda-oblysyna-zhumys-kueshin-tartw.jpg" alt="" />

Коронавирус: Қызылорда облысына 109 шетел азаматы кіргізілмеді

<a href="https://kyzylorda-news.kz/">Kyzylorda-news.kz.</a> 2020 жылдың 20 ақпанынан бері облыс бойынша 151 адам бақылауға алынып, оның 47-сі карантиннен өткізілді. 10 азаматты облыстық жұқпалы аурулар аурханасына жатқызып, сынама тесттің қортындысының теріс болуына байланысты ауруханадан шығарылды. Қазіргі таңда Сербия елінің азаматы ауруханада бақылауда. Бұл туралы Өңірлік коммуникациялар қызметінің ақпарат алаңында өткен баспасөз конференциясында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Коронавирустан сақтану, алдын алу шараларын күшейту мақсатында облыстағы 2 мыңнан аса дәрігер, 9 мыңнан аса орта буын қызметкер тәжірибелік машықтарын жетілдірді. Дәрі-дәрмектер мен қорғаныш заттар қоры жеткілікті. Көп ретті қолданылатын жеке бас қорғаныш бетпердесі 10 мыңға дейінгі данамен дәріханаларға жеткізіліп жатыр», – деді Облыстың бас дәрігері Жақсылық Әбілқасымұлы.
 «Президент Жарлығынан туындаған заң талаптарына сәйкес, ірі сауда орындарының жұмыстары штаттық кестеге көшірілді. Облыс бойынша 2 мың шаршы метрден асатын 35 сауда орыны жұмыс уақыттарын таңғы 10.00-18.00 дейін қысқартты. Ал базарлар мен кіші сауда орталықтары жұмыстарын жалғастыра береді. Облыста 300-ге тарта тойхана мен кафеге де жұмыс уақыты кешкі 22.00 -ге дейін белгіленіп, 50 адамнан асатын ортаны қалыптастырмау туралы ескертілді. Дегенмен шет мемлекеттерден келетін жүк тасымалдарына шектеу қойылған жоқ. Мұндай шекара өткізу бекеттері санитарлық қатаң шараларды жүргізетін болады», – деді Облыстық кәсіпкерлік және туризм басқармасы басшысы Фердауси Қожабергенов.
</blockquote>
Түрлі мәдени, спорттық шараларды, музейлер мен кітапханалардың жабылғандығы, гастрольдік сапарлардың тоқталғандығы да айтылды.
<blockquote>
 «Бүгіннен бастап колледж, жоғарғы оқу орындарының студенттері онлайн жүйеде оқуға көшті. Облыстағы 627 балабақша меншік түріне қарамастан жұмыстарын жалғастыра береді. Егер балалар белгілі себептерге байланысты балабақшаларға баруды тоқтатқан жағдайда төлемдері де шегерілетін болады»,- деді Облыстық білім басқармасы басшысының міндетін атқарушы Бағдат Бердаулетов.
</blockquote>
Мәдениет және білім саласының жауапты басшылары өз сөздерінде қызметкерлердің жұмыс режимдері белгіленгенін де айтты. Бірінші категорияға жататын қызметкерлер, яғни әкімшілік және техникалық қызметкер жұмыстан босатылмайды. Екінші, ұстаздар мен өзге де қызметкерлер онлайн дәрежеде жұмыс істеулеріне жағдай жасалады. Үшінші, қызметкерлердің өз сұраныстарына қарай еңбек демалысын, ақылы-ақысыз еңбек күндерін алуына болады.

Коронавирус: Қызылорда өңірінде жағдай тұрақты

<a href="https://kyzylorda-news.kz/">Kyzylorda-news.kz.</a> «Атамекен» ортақ мәселелерді анықтап, ұсыныстарды шоғырландыру мақсатында бизнес-қоғамдастық арасында сауалнаманы іске қосты. Бұл Ұлттық кәсіпкерлер палатасына ҚР Үкіметі алдында&nbsp;қазақстандық бизнеске келтірілетін залалды мейлінше азайтуға бағытталған тиімді шараларды ұсынуға көмектеседі.
12 наурыздан бастап отандық телеарналардан жүргізілген сауалнамаға және колл-орталық, әлеуметтік желілерде 3 мыңнан астам кәсіпкер сауал жолдаған. Өтінім жасағандардың басым бөлігі (86%) шағын және орта бизнес өкілдері. Қатысушылардың 69%-ы қызмет көрсету саласында жұмыс істейді. Атап айтқанда 25%-ы туризм саласы болып отыр.
<img src="https://kyzylorda-news.kz/wp-content/uploads/2020/03/001.png" alt="" />
<img src="https://kyzylorda-news.kz/wp-content/uploads/2020/03/002-2.jpg" alt="" />
Өкінішке қарай, сауалнамаға қатысушылардың 52%-дан астамы коронавирустың таралуы салдарынан оларға келісімшарттық міндеттемелерді бұзуға тура келгенін айтты. Кәсіпкерлер міндеттемелерді орындамау себепті айыппұлдық санкцияларды төлеуге мәжбүр болғандарын айтуда.
Барлық кәсіпкерлерде дерлік сұраныс төмендеп жатыр, сәйкесінше, компания айналымы да төмендеген. Алайда тұрақты шығындар көп. &nbsp;Сауалнамаға қатысушылардың 34%-ы «орынжайды жалға алуды» ағымдағы жағдайда компанияларына қаржылық ауыртпалық ретінде көрсеткен. Еңбекақыны төлеу қоры (30%) – бизнеске анағұрлым әсер ететін екінші жағдай. Коммуналдық қызметтерді төлеуді респонденттердің 13%-ы таңдаған.
<img src="https://kyzylorda-news.kz/wp-content/uploads/2020/03/003-2.jpg" alt="" />
Кәсіпкерлердің көбі кадрларға қатысты сұрақтар қойып жатыр.
Еске салсақ, қызметкерлерді қашықтықтан жұмыс істеу режиміне ауыстыру ұсынылуда. Ал егер бұл мүмкін болмаса, онда өндірістің тұрып қалуына байланысты мерзімсіз демалыс жариялау ұйымдастыруға болады. Өндірістің тұрып қалу кезеңінде еңбекақыны төлеу тәртібі қызметкер және жұмыс беруші арасындағы келісім бойынша&nbsp; реттеледі. Төлем мөлшері ең төменгі еңбеакқы көлемінен төмен болмауы керек.
Сауалнамаға қатысушылардың 34%-дан астамы қызметкерлерді мерзімсіз демалысқа жібереміз деп жауап берді. Ал 19%-ы – толық емес жұмыс күніне ауысатындарын белгіледі.
<img src="https://kyzylorda-news.kz/wp-content/uploads/2020/03/004-2.jpg" alt="" />
Кәсіпкерлер зардапты төмендету бойынша қандай шараларды күтеді?
Респонденттердің 30%-ы салықтық жеңілдіктер айтарлықтай қолдау болады деп санайды. Ал 27%-ы – несиелік міндеттемелер бойынша шегерімді, 23%-ы – ситуацияны форс-мажорлық деп тануды, 20%-ы – компанияның еңбек ресурстарын қолдау қажет деп санайды.
<img src="https://kyzylorda-news.kz/wp-content/uploads/2020/03/005-1.jpg" alt="" />
Орын алған ситуацияда «Атамекен» ҰКП бизнеске түсетін залалды азайту үшін келесі шараларды қабылдайды:
<ul>
<li>біріншіден, Ұлттық палата бүгіннен бастап (16 наурыз) Қазақстан қаржыгерлері қауымдастығы және екінші деңгейлі банктермен несиелік міндеттемелер бойынша төлемдерді кейінге қалдыру немесе басқа да жеңілдіктерді қарастыру бойынша кеңесуді бастайды;</li>
<li>екіншіден, аталған зерттеулер Ұлттық экономика министрлігіне жіберіледі, онда пандемия экономикалық салдары туралы ақпарат жинақталуда. Ұлттық палата өндірістің мәжбүрлі тұрып қалуы кезеңінде жеке компаниялардың қызметкерлеріне өтемақы төлеу шарасын ұсынатын болады;</li>
<li>сондай-ақ, шағын және микро бизнеске салықтық демалыс енгізілгендіктен, ҰКП салықтық демалысты орта бизнеске енгізу мүмкіндігін талқылауда.</li>
</ul>
Айта кетелік, «Атамекен» ҰКП&nbsp;ҚР Үкіметімен бірлесіп, қазақстандық бизнеске келтірілетін залалды мейлінше азайтуға бағытталған тиімді шараларды қолға алу үшін ақпаратты жинау және талдау бойынша жұмысты жалғастырып жатыр. Ертең, Үкімет отырысында алғашқы шешімдер айтылады деп күтілуде.
Ұлттық палата жанынан көмек берудің жедел штабы жұмыс істейді. Коронавирус салдарынан кәсібіне залал көрген кез келген отандық кәсіпкер 1432 Сall-орталығына хабарласа алады.

Коронавирус: Кәсіпкерлер несие төлемін кейінге қалдыруға мұқтаж

Денсаулық сақтау министрі Елжан Біртанов қазіргі уақытта ел аумағында 1400-ден астам азамат стационарлық карантинде, ал 545 азамат үй карантинінде жатқанын мәлім етті, деп хабарлайды <a href="http://lenta.inform.kz/kz/koronavirus-kazakstanda-stacionarlyk-karantinde-zhatkandardyn-sany-1400-den-asty_a3625132">ҚазАқпарат.</a>
<blockquote>
 «Жалпы ел бойынша қазіргі таңда 1400-ден астам азамат стационарлық карантинде, ал 545 азамат үй карантинінде жатыр. Тағы басқа мемлекеттен келіп жатқан азаматтар үш санат бойынша бақылауда немесе жалпы есепте тұрады. Осы жағдайға байланысты қажетті іс-шаралар мемлекеттік деңгейде ведомствоаралық комиссияның шешімімен қабылдануда. Өздеріңізге мәлім, жалпы үлкен шараларға тыйым салынып, олар тоқтатылды. Қазір қажетті санитарлық-эпидемиологиялық шаралар енгізілуде. Әрине, біздің негізгі мақсатымыз – осы коронавирус инфекциясының таратылуын тоқтату. Бұл бағытта санитарлық-эпидемиологиялық қызмет қажетті барлық шараны қабылдауда», – деді Елжан Біртанов «Хабар 24» арнасынан тікелей эфирде.
</blockquote>
Оның айтуынша халық көп жиналатын орындарда арнайы шаралар күшейтілген. Алматы және Нұр-Сұлтан қалаларында тіркелген азаматтарға байланысты барлық бақылау шарасы енгізілді.
Айта кетсек бірер минут бұрын ғана Елжан Біртанов Қазақстанда коронавирус жұқтырғандардың саны&nbsp;<a href="https://kyzylorda-news.kz/kogam/qazaqstanda-taghy-eki-adamnan-koronavirws-tabyldy-49674/">8-ге жеткенін</a>,&nbsp;жаңадан жұқтырғандардың бірі&nbsp;Сеулден ұшып келгенін&nbsp;хабарлаған еді.

Коронавирус: Қазақстанда стационарлық карантинде жатқандардың саны 1400-ден асты

<a href="https://kyzylorda-news.kz/">Kyzylorda-news.kz.</a> Нұр-Сұлтан қаласы қоғамдық денсаулық сақтау басқармасының басшысы Сәуле Қисықова коронавирус жұқтырған науқастарды емдеу қағидалары жөнінде айтып берді.
<blockquote>
 «Бұл стационар қаланың сыртында, бөлек ғимаратта ашылған. Сондықтан, өзге нозологиялық формадағы науқастар бөлек стационарда қаралады. Медқызметкерлер қауіпсіздік шараларын сақтау бойынша арнайы оқытудан өткен», – деді басқарма басшысы Орталық коммуникациялар қызметінде өткен баспасөз мәслихатында.
</blockquote>
Оның айтуынша, аурудың басты белгілері – жоғары температура мен жөтел байқалса, үйде отырған жөн.
<blockquote>
 «Мұндай белгілермен медициналық мекемелерге бармауларыңызды сұраймыз. Оның орнына колл-орталыққа немесе жедел жәрдем қызметіне хабарласып, кеңес алыңыз. Кореяда жаңа инфекцияны жұқтырған науқастар емханаға келіп, тұтас клиникаларды қызметкерлерімен, кезек күткен адамдармен бірге карантинге жапқан оқиғалар болды. Бұл тәжірибе біздің де медициналық ұйымдарда қолданылады. Сондықтан, біздің кеңестерді қатаң ұстануды сұраймыз», – деді С. Қисықова.
</blockquote>

Қазақстан және Қызылорда облысының жаңалықтары: COVID-19