<a href="https://kyzylorda-news.kz/">Kyzylorda-news.kz.</a> Еліміздегі Төтенше жағдай кезінде Арал ауданында бетперде тапшылығын болдырмау үшін жеке кәсіпкер Мейрамбек Жұмашевтің қолдауымен 5000 дана бетперде жергілікті тігін шеберханаларында тігілуде.
Дайын болған бетперделердің барлығы тұрғындардың қажеттілігіне қарай тегін таратылатын болады.
Бүгін аудандағы ерікті жастар орталық базар маңы мен халық көп жүретін аймақтарды аралап, дайын болған 500 бетпердені тұрғындарға тарту етті.
Сондай-ақ, еріктілер тұрғындарға індеттен қорғану жолдары жазылған арнайы таратпа қағаздарын ұсынып, көшеге ретсіз шықпау және адамдар көп жиналатын жерлерге бармау қажеттігі жөнінде түсіндірме жұмыстарын жүргізді.
Сонымен қатар, көше тазалықшыларына 260 бетперде тегін таратылды.
Атап өтейік, Жаңа ауыл мөлтек ауданындағы «Аружан» тігін шеберханасында тұрмыс жағдайы төмен және мүмкіндігі шектеулі жандарға бетперделер тегін берілуде.
<img src="https://kyzylorda-news.kz/wp-content/uploads/2020/04/02-2.jpg" alt="" />
<img src="https://kyzylorda-news.kz/wp-content/uploads/2020/04/03-2.jpg" alt="" />

Арал ауданында бетперделер тегін таратылуда

Бүгінгі таңда әлемді жаулаған коронавирус індеті дүниежүзі елдерінің экономикасы мен адамдардың өміріне өте үлкен қауіп төндіруі әбден мүмкін. Нақты айтқанда, біздің елдігіміз нағыз сынға түсетін кезең.
Дегенмен, осындай қиын кезеңде елімізде атқарылып жатқан жаңа жобаларды, індетке қарсы жасалған жұмыстарды көріп көңілге сенім ұялады. Әлем елдерін дүрліктіріп отырған пандемияның жылдам таралуына орай Мемлекет басшысы Қасым-Жомарт Тоқаев халық алдына шығып, екінші мәрте өз мәлімдемесін жасады.
Осы орайда мемлекетімізде төтенше жағдай жарияланып, Қазақстанға вирустың жаппай таралып кетуіне жол бермегендігімізді нақты жеткізді. Сондай-ақ, алдағы уақытта ахуалды бақылауда ұстайтындығын атап өтті. Президентіміздің қиын шақта жасаған мәлімдемесі ел еңсесін бір серпілткені жасырын емес. Осындай ауыр кезеңде бірнеше келелі істерге келісті тұжырымдама жасады. Атап айтқанда, пандемияға қарсы күресте алдыңғы шепте жүргендерге қосымша қолдау көрсетілетін болды. Соның ішінде, дәрігерлер мен медицина қызметкерлеріне 3 ай бойы қосымша үстемақы төленетіндігі баршамызға аса зор жігер беріп, жауапкершілік жүктеді. Сонымен қатар, медицина қызметкерлерінің өмірін сақтандыру мәселесінің оң шешім тапқандығы дәрігерлер қауымының қоғамдағы өзіндік орнын тағы бір айқындап берді деуге болады.
Атап өту қажет, әлемге таралған бұл індетпен күресу бағытында Арал ауданаралық ауруханасында да ауқымды шаралар қабылданып, қажетті шаралар жүргізілуде. Қазіргі таңда «Арал ауданаралық ауруханасы» ШЖҚ-ы КМК-ы бойынша Covid-2019 инфекциясын жұқтырып алудың алдын алу іс-шаралары бойынша ҚР Денсаулық сақтау министрінің 2020 жылғы 3 ақпанда бекіткен «Жаңа короновирусты инфекцияға күдікті науқастар анықталған кезде жүргізілетін санитариялық-эпидемияға қарсы және санитариялық-профилактикалық іс-шаралар алгоритміне» сәйкес аудандық тауарлар мен көрсетілетін қызметтердің сапасы мен қауіпсіздігін бақылау басқармасымен бірлескен бұйрықтары шығарылып, арнайы жұмысшы топ құрылды.
Аудан көлеміндегі емдеу-сауықтыру мекемелерінде, аудан тұрғындары арасында короновирус инфекциясының алдын алу шаралары туралы халыққа арналған жаднамалардың дайындалуы, жеке қорғаныш құралдарының дезинфекциялау заттарының, дәрілік препараттардың қорын жасау, медицина қызметкерлері үшін жедел әрекет ету, профилактика, дезинфекциялау режимін сақтау шараларының дайындығы тексерілді. Бұдан бөлек, ауданаралық аурухананың жұқпалы аурулар бөлімшесінен 45 төсек провизорлық стационар және қосымша жүйке аурулар диспансерінің 3-ші қабатында 7 төсек орындары дайындалды.
Казіргі таңда Арал ауданаралық ауруханасында: суға төзімді бір реттік костюм, көп суға төзімді коп реттік костюм, бір мәртелік бетперде, респиратор 95, балаларға арналған бір мәртелік бетперде, төрт қабатты бетперде сынды медициналық бұйымдардың қоры жеткілікті деңгейде жасақталып отыр.
Сонымен қатар, аудан көлемінде халық арасында коронавирус инфекциясының алдын-алу шаралары жөнінде санитарлық ағарту жұмыстары кең көлемде жүргізіліп келеді. Арал ауданына шет елден және республикамыздың өзге қалаларынан келген студентер мен тұрғындардың және уақытша келген тұрғындар туралы мәліметтер алынып, күнделікті бақылау жүргізілуде.
Осындай сәтте халықтың «бір жағадан бас, бір жеңнен қол шығарып», бірлікте болуы аса маңызды деп санаймын. Көпшілікті қорқыныш пен үрей мазалайтыны сөзсіз. Ол орынды. Соның өзінде даурықпай, сабырлық сақтау керек. Біз бірге екенімізді естен шығармайық.
Лаура ӘДІЛБАЕВА,
Арал ауданаралық ауруханасы Бас дәрігерінің бастапқы санитарлық медициналық көмек жөніндегі орынбасары

Лаура Әділбаева: «Президенттің ақ халаттыларға деген ерекше қамқорлығы қуантты»

<a href="https://kyzylorda-news.kz/">Kyzylorda-news.kz.</a> Кез келген мемлекетте ер азаматтар – ел басына күн туған жағдайда жүгінер халықтың үлкен күші. Елдің, отбасының, ата-анасының, жарының, іні-қарындас, бауырларының тірегі.
Бүгінгі таңда әлемді дүрліктірген қауіпті індет біздің елге де жетті. Өкінішке орай, Сыр елінде де жерлестеріміз бұл науқасқа шалдыққаны анықталды.
Қазіргі таңда еліміз осы қауіпті дертпен күресуде. Мемлекет басшысынан бастап, ақ халатты абзал жан – дәрігерлер, полицейлер, әскери қызметкерлер жан алысып, жан берісіп жатыр. Күн сайын қаншама өмірлерді аман сақтап қалу үшін қолдарын келгендерін жасауда.
Кеше, яғни, 2 сәуірде Қазақстан Республикасының Президенті Қасым-Жомарт Тоқаевтың «Әскери міндеттілерді арнаулы жиындарға шақыру туралы» №296 Жарлыққа қол қойды.
Президент Қасым-Жомарт Кемелұлы бұл шара, ең алдымен, еліміздегі қиын-қыстау кезеңде, карантин жағдайында қоғамның қауіпсіздігін қамтамасыз ету және Төтенше жағдай режимін ұстап тұруда мемлекетке жәрдемдесу үшін қажеттігін мәлімдеді.
Мен, нәзік жанды азаматша болсам да, Мемлекет басшысының бұл жарлығын қуана қабылдадым. Себебі, осындай қиын-қыстау кезеңде елімізге ауызбіршілік, бірлік, сосын бәріміз бір бағытқа жұмылуымыз керек.
Міне, осы бағытты Қасым-Жомарт Кемелұлы айқындап берді.
Еліміздегі әскери міндетті азаматтар дезинфекциялау жұмыстарын атқаруға, елді мекендерде және бекеттерде құқықтық тәртіпті күзетуге шақырылып отыр.
Бұл – Алтайдан Атырауға дейінгі ұлан-байтақ жерімізді сан ғасырлар бойы жаудан қорғаған батыр бабаларымыздың бүгінгі ұрпақтарына беріліп отырған зор мүмкіндік.
Анығын айтқанда, олар бейбіт өмірде, бірақ, еліміздегі Төтенше жағдай кезінде онымен күресіп жатқан адамдармен бір сапта болып, Қазақстан үшін бәріне дайын екендігін көрсетуі керек!
Дәл осы сәт – ерлеріміздің азаматтық қасиеттері, жігіттігі сыналар сәт!
Егемендіктің арқасында аяғымызды алшаң басып, тыныш өмірге үйренгенбіз. Тіпті менің замандастарым елдің қысылтаяң жағдайын көрген де емес. Ержеткен әрбір азаматтың міндеті – әскери борышын өтеу.
Бірақ әскерге бармаудың сан сылтауын іздеп жүрген замандастарым да баршылық. Жоғарыда айтқанымдай, ата-бабаларымыз әскерден емес жаудың алдынан да тайсалмады. Әкелеріміз шетел асып, жылдап әскерге барды.
Құрметті Сыр елінің жігіттері!
Мемлекет сіздердің көмектеріңізге арқа сүйеуге шақырды. Ендеше бейбіт күнде, қарусыз, барлық жағдайларыңызды қамтыған үйден қатынап жүріп мемлекет алдындағы борыштарыңызды өтеңіздер!
«Мемлекет маған не береді деп емес, мен еліме не беремін!» деген сөз құр ҰРАН болып қалмайды деп сенемін!
Баршаңызды «Әскери міндеттілерді арнаулы жиындарға шақыру туралы» Жарлыққа құлақ асып, елімізге қамқор болуға шақырамын!
Бибінұр ӨТКЕЛБАЙ,
«Чемпион» шахмат клубының жетекшісі.

Бибінұр Өткелбай: «Сыр елінің жігіттерін азаматтық қасиеттерінің сыналар сәті – арнаулы жиындарға қатысуға шақырамын!»

<a href="https://kyzylorda-news.kz/">Kyzylorda-news.kz.</a>&nbsp; Қазақстанда тағы жеті адамнан коронавирус табылды, оның біреуі Қостанай облысында тіркелді, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-3-sauirdin-18-10-uakytyndagy-epidemiologiyalyk-zhagday_a3633462">coronavirus2020.kz.</a>
<blockquote>
 “3 сəуір сағат 18:10-дағы жағдай бойынша коронавирус инфекциясын жұқтырған тағы 7 адам тіркелді, олардың ішінде Шығыс Қазақстан облысы – 1, Жамбыл облысы – 2, Түркістан облысы – 3, Қостанай облысы – 1”, – делінген хабарламада.
</blockquote>
Осылайша, Қазақстанда осы уақытқа дейін коронавирус инфекциясын жұқтырған адам тіркелмеген жалғыз өңір – Қостанай облысында да бұл қауіпті індет анықталып отыр.

Коронавирус Қазақстанның барлық облысына жетті

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында 3 сәуір күнгі жағдай бойынша коронавирустық инфекцияны жұқтырған 28 науқас анықталды. Олармен барлығы 662 адам байланыста болған. Бұл туралы облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте мәлімдеді.
<blockquote>
 «Қазіргі таңда Қызылорда облысында коронавирустық инфекцияны жұқтырған 28 науқас анықталды. Бүгін Қармақшы ауданында бір жағдай тіркелді. Ол – 1988 жылы туған әйел адам. Екінші жағдай Шиелі ауданында анықталды. Ол – 1994 жылғы әйел адам. Бүгінгі күні екеуі де аудандық жұқпалы аурулар ауруханасына ем қабылдау үшін ауыстырылды. Екі азаматша да осы аудандарда қауіпті індетті бұрын жұқтырғандармен байланыста болған. Жағдайлары қанағаттанарлық. Олармен байланыста болғандардың саны – 662. Жақын қарым-қатынаста болғандар саны – 237, потенциалды байланыста болғандар 425 адамды құрап отыр. Бүгінгі таңда осы байланыста болғандардан 25 адам правизорлық стационарға, 216 адам карантинге оқушауланды», – деді Жақсылық Абдусаметов.
</blockquote>
Басқарма басшысының айтуынша, Қызылорда облысына қауіптілік деңгейі 1 (А) елдерінен барлығы 20 адам келген. Оның алтауы – стационарға, 14 – үй карантиніне жатқызылған.
Сондай-ақ, өңірге қауіптілік деңгейі 1 (Б) елдерінен барлығы 159 адам келген. Оның алтауы – стационарға оқшауланса, 153 – үй карантиніне алынған.
<blockquote>
 «Бүгінгі таңда облыста анықталған коронавирустық инфекцияның барлық ошақтары толық залалсыздандырылды. Қауіпті індет анықталған 28 науқастың жағдайы нашарлаусыз, қанағаттанарлық күйде. Жаңадан анықталған ошақтар түгел залалсыздандырылды. Облыс тұрғындары арасында алдын алу жұмыстары жүргізілуде», – деді басқарма басшысы брифингте.
</blockquote>
Айта кетейік, бұған дейін Қызылорда облысында Covid-2019 инфекциясын жұқтырғандар саны <a href="https://kyzylorda-news.kz/kogam/qyzylordada-koronavirws-zhuqtyrghandar-sany-28-adamgha-zhetti-53893/">28 адамға жеткенін</a> хабарлаған болатынбыз.

Коронавирус: Қармақшы және Шиеліде анықталған науқастар туралы мән-жай белгілі болды

<a href="https://kyzylorda-news.kz/">Kyzylorda-news.kz.</a> Америкалық&nbsp;дәрігерлер&nbsp;SARS-CoV-2 коронавирусының жаңа түріне қарсы классикалық вакцинаның клиникаға дейінгі сынақтарының алғашқы нәтижелерін жариялады,&nbsp;деп хабарлайды&nbsp;<a href="https://stan.kz/koronaviruska-karsi-vakcina-sinaktarinin-algashki-natiz-329303/">Stan.kz</a>.
Олар нәтижені&nbsp;EBioMedicine ғылыми журналында жариялаған.
Ғалымдар сынаққа SARS атипті пневмониясы және MERS Таяу Шығыс безгегі вирусымен күресу тәжірибесін басшылыққа алғанын және осылайша, бастапқыда қалай әрекет ету керектігін білгенін атап өтті.
Зерттеу авторларының бірі Питтсбург университетінің доценті Андреа Гамботтоның айтуынша, ғалымдар вирустың РНК бөліктері негізінде емес, вирустың S-ақуызының фрагменттері негізінде вакцина жасаған. Себебі, дәл сол арқылы SARS-CoV-2 денеге өтеді.
Сонымен қатар, америкалық мамандар вакцинаның ағзаға енуінің өзіндік жүйесін әзірледі, ол&nbsp;– нано инелермен қапталған&nbsp;пластырь. Оның көмегімен препарат қажетті тереңдікке еніп, иммунитеттің өзімен өзара әрекеттесуіне көмектеседі.&nbsp;
Зертханалық тышқандарда жүргізілген&nbsp;тәжірибелер вакцинациядан кейін екі апта өткен соң кеміргіштердің иммунитеті коронавирусқа қарсы антиденелерді белсенді түрде өңдей бастағанын көрсетті. Алайда, жануарлардың өздері бастапқыда сау болған.
Дегенмен, ғалымдар ұқсас схема MERS вирусына қарсы вакцинада да байқалғанын атап өтті.&nbsp;Сау жануарларға енгізілген вакцина оларды жыл бойы аурудан сақтады.

Коронавирусқа қарсы вакцина сынақтарының алғашқы нәтижелері жарияланды

<a href="https://kyzylorda-news.kz/">Kyzylorda-news.kz.</a> Медициналық мақсаттағы бұйымдарды сату лицензияланған қызмет түрі болып табылады, сондықтан Интернеттегі жарнамаларда коронавирус инфекциясына арналған тесттерді сату заңсыз. Бұл туралы Денсаулық сақтау министрі Елжан Біртанов&nbsp;мәлімдеді, деп хабарлайды <a href="https://kaz.zakon.kz/5014957-b-rtanov-ekspress-testten-tu-sharttaryn.html">zakon.kz</a>.
<blockquote>
 «Медициналық мақсаттағы бұйымдарды сату лицензияланған қызмет түрі болып табылады. Бұл – заңсыз. Бұл тестті жүргізу медициналық жағдайды қажет етеді. Тазалықты, стирильділікті талап етеді. Сондықтан бұл заңсыз», – деді Біртанов.
</blockquote>
Ол тек лицензияланған медициналық ұйымдар, меншік түріне қарамастан коронавирусты тексеруге болатындығын айтты.
Алайда, министрдің айтуынша, бұл мәселедегі ең бастысы – егер тест оң нәтиже берсе, адам медициналық мекемеге бұл туралы хабарлауы керек.
<blockquote>
 «Біздің қатаң талабымыз бар. Барлық қызметкерлер мен тесттен өтуші адамдар алдын-ала онлайн режиміне тіркеліп, нәтижелерін осы жүйеге енгізіп, тестілеудің оң нәтижелері туралы медициналық ұйымды хабардар етуі керек. Адам тікелей үйіне барып, өзін-өзі оқшаулауы тиіс. Немесе медициналық ұйымға хабарлассын», – деп сөзін түйіндеді Біртанов.
</blockquote>

Коронавирус инфекциясына арналған тесттерді сату – заңсыз

<a href="https://kyzylorda-news.kz/">Kyzylorda-news.kz.</a> Қазақстан Президенті әскери міндеттілерді арнаулы жиынға шақыру туралы жарлық шығарды. Оның басты мақсаты – халқымыздың қауіпсіздігі мен денсаулығын қорғау.
Шақыруды жергілікті атқарушы органдар жергілікті әскери комиссариаттар арқылы жүргізіледі. Ол үшін тұрғылықты жері бойынша әскери есепте тұрған азаматтарға шақыру қағаздары мен СМС хабарламалар таратылады.
Бұл әскери жиын біздің өңірде мүлде өтпеуі де мүмкін. Төтенше жағдай және карантин кезінде жеткіліксіз ресурстардың орнын толтыру үшін қолға алынған шара.
Сондықтан бұл қабылданған құжаттан саяси астар іздеп, қорқудың қажеті жоқ. «Бір жағадан бас, бір жеңнен қол шығарып» азаматтардың атқарып жатқан қызметтеріне жәрдемдесейік, ағайын.
Тәубә, Қазақстан халқы соғыс-тартыссыз, бейбіт өмір сүруде.
Алайда әлемді шарпыған жұқпалы індет біздің елді де айналып өтпеді. Қайтсек бетін қайтарамыз, ел амандығын сақтап, мамыражай өмірімізді жалғастырамыз деп жан алысып жатқан азаматтарға жәрдем беру – кез келген Қазақстан азаматының бойына сіңген елжандылық қасиет болуы керек.
Тарихтың көптеген сынағынан өткен ата-абаларымыз болашақ ұрпағы үшін алауы лаулап тұрған Ұлы Отан соғысында да кері шегінбеді.
Қолға қару алған соғыс болмағанымен қауіпті аурумен бетпе бет келіп тұрмыз.
Бұл індетті жою жолында біздің алдымызда тұрған міндеттер немқұрайлық пен алаңсыздықты кешірмейді.
Мемлекетімізді қауіпті кеселден сақтап қалу жолында бір отбасының балаларындай біріккендеріңізді қалаймын, құрметті азаматтар!
Қайраддин БАЙМАХАНОВ,
Қызылорда облыстық «Ауғанстан соғысының ардагерлері ұйымы» қоғамдық бірлестігінің төрағасы

Қайраддин Баймаханов: «Осынау қысылтаяң кезеңде бәріміз біз үшін күресіп жатқан азаматтарға жәрдем беруіміз керек»

<a href="https://kyzylorda-news.kz/">Kyzylorda-news.kz.</a> Жаңақорған ауданындағы Шалқия ауылының тұрғындары коронавирус жұқтырғандармен байланыста болған 40 адамды ауылдағы туберкулезбен ауырғандарға арналған шипажайға жатқызуға қарсылық білдірді. Олар осыны айтып 31 арнаның «<a href="https://www.youtube.com/watch?v=OzTIZ6fGv8U">Информбюро</a>» жаңалықтар бағдарламасына жүгінген.
Шалқиялық тұрғындардың сөзінше, ауданда карантинге оқшауланғандар Жаңақорғанның орталығындағы жұмыс істемей тұрған шипажайға жеткізілген.
Әкімдіктегілер науқастармен байланысқа түскендердің саны әлі де анықталып жатқанын айтады. Қазір облыста ең көп індет жұқтырған тұрғындар – осы Жаңақорған ауданынан тіркеліп отыр. Бүгінгі таңда ауданда COVID-19 инфекциясынан 16 науқас емделіп жатыр.
Осыған байланысты, құзырлы орган өкілдеріне Шалқи ауылының тұрғындары жаппай наразылықтарын жеткізген.
Аудандық станционарда оқшаулануы керек болған 87 тұрғынның 40-ы осы ауылдағы туберкулез шипажайына жатқызылмақ болған.
Өйткені 47 адам оқшауланған аудандағы колледж ғимаратына барлығын сыйғызу мүмкін болмапты.
Ал қарсылық танытып, жиналғандар болса:&nbsp;«Карантинге алынғандарды ауылға әкелетінін неге ескертпейді?» деп шулап жатқан көрінеді.
Шағымданғандардың барлығы бір ауыздан билік өкілдерінің бұл әрекеті ауылға қауіпті індетті әкеледі ме деп қорқып отырған сыңайлы.
Дегенмен ауылдықтардың жаппай қарсылықтарынан кейін мамандар коронавирус жұқтырғандармен байланыста болғандардың 87 адамның барлығын аудан орталығындағы шипажайға жатқызыпты.
Бұдан бөлек ауданда 42 тұрғын үй карантиніне оқшауланыпты.

Коронавирус: Жаңақорғандағы ауыл тұрғындары не үшін дүрлікті?

<a href="https://kyzylorda-news.kz/">Kyzylorda-news.kz</a>. Қызылордада азық-түлік қауіпсіздігін сақтау мақсатында бюджеттен 776 миллион теңге бөлінді.
Қызылорда облысы әкімі Гүлшара Әбдіқалықованың төрағалығымен Қазақстан Республикасы Президенті Қасым-Жомарт Кемелұлы Тоқаевтың еліміздегі төтенше жағдайға және дағдарысқа қарсы іс-шараларына қатысты берген тапсырмаларын орындау жөнінде отырыс өтті.
Жиында сәуір айынан бастап аймақ тұрғындарына қосымша қандай көмектердің көрсетілетіндігі талқыланып, нақты міндеттер жүктелді.
<blockquote>
 «Мемлекет тарапынан мұндай халықты қолдау шаралары бұрын соңды болмаған. Сондықтан осындай қиын-қыстау кезеңде мемлекет тарапынан көрсетіліп жатқан көмекті өңір тұрғындарына уақытылы әрі сапалы жеткізу біздің міндетіміз екенін ұмытпаңыздар. Мемлекет басшысы берген тапсырмаларды орындау үшін бюджетті тиімді жоспарлап, қала, аудан әкімдері мен басқарма басшылары тиісті талаптарды тиімді әрі жылдам орындаулары керек», – деді облыс әкімі Гүлшара Әбдіқалықова.
</blockquote>
Сонымен қатар, аймақ басшысы қала, аудан және ауылдық округ әкімдеріне бюджет кірістерін есептеп, шығындарды оңтайлындыруды да тапсырды.
<blockquote>
 «Шағын және орта бизнес субъектілеріне жасалған жеңілдікті ескере отырып, Қызылорда қаласы мен барлық аудан, ауылдық округ әкімдері бюджеттің кірістері мен түсімдерін анықтап, соған сәйкес жылдық жоспарды орындауы қажет», – деді өңір басшысы.
</blockquote>
Сондай-ақ, отырыс барысында бірінші кезекте әлеуметтік осал топ өкілдеріне баса көңіл бөлу керектігі айтылды. Оның ішінде табысынан айырылған азаматтарды ең төменгі жалақы мөлшеріндегі қаржымен, мұқтаж азаматтарды тұрмысқа қажетті заттар және азық-түлікпен қамтамасыз ету жөнінде нақты тапсырмалар берілді.
<blockquote>
 «Жауапты сала мамандары халықтың жекелеген санаттарын азық-түлік және тұрмыстық жиынтықпен қамтамасыз ету жұмыстарын бүгінгі күннен бастап уақытылы қамтамасыз етсін және «Жұмыспен қамтудың 2020 – 2021 жылдарға арналған жол картасын» іске асыру аясында жаңа жұмыс орындарын құруға қатысты кешенді шаралар қабылдасын», – деді аймақ басшысы.
</blockquote>
Облыс әкімі электронды үкімет порталының жұмысын да сынға алды.
<blockquote>
 «Халыққа қызмет көрсету саласындағы жұмыстарды уақытылы орындалуы қажет», – деді ол.
</blockquote>
Сонымен қатар, жұмыссыз ретінде тіркелген және өзін-өзі жұмыспен қамтыған азаматтарға 42 500 теңге көлеміндегі төлемдердің уақытылы төленуін қамтамасыз ету міндеттелді. Ал медицина қызметкерлеріне мемлекет тарапынан қаралған үстемақыға уақытылы қол жеткізу тапсырылды.
Өңірде азық-түлік қауіпсіздігін сақтау тұрғысында облыстық бюджеттен 776 млн теңге бөлінді. Бұл ретте, тауар ең алдымен отандық өндірушілерден сатып алынуы тиіс.
<blockquote>
 «Облыстық ауыл шаруашылығы басқармасы «Байқоңыр» әлеуметтік кәсіпкерлік корпорациясы» АҚ бірлесіп, азық-түлік тауарларын отандық ауылшаруашылығы және өңдеу кәсіпорындарынан кем дегенде 6 айға кепілдендірілген сатып алу механизмі бойынша іске асыру жұмыстарын ұйымдастырсын. Облыстық кәсіпкерлік және туризм басқармасы «Бизнестің жол картасы 2025» мемлекеттік бағдарламасы аясында облысқа қосымша қаржы тарту мәселесін Қазақстан Республикасы Ұлттық экономика министрлігімен пысықтасын», – деді облыс әкімі.
</blockquote>
Жиын соңында аймақ басшысы, қала және аудан әкімдеріне, жауапты сала басшыларына нысандарды жалға алушы кәсіпкерлерді жалдау ақысынан босату, шағын және орта кәсіпкерлік субъектілерінің коммуналдық төлемдерін кейінге шегеру, ауыл кәсіпкерлерін несиемен қамтамасыз ету, қайтарымсыз гранттар беру сынды мәселелерді шешуді тапсырды. Тиісті мекеме басшыларына көктемгі дала жұмыстарын тиісті деңгейде жүргізу міндеті жүктелді.
Мәжілісте облыстық экономика және бюджетті жоспарлау, жұмыспен қамтуды үйлестіру және әлеуметтік бағдарламалар, денсаулық сақтау, кәсіпкерлік және туризм басқармаларының басшылары және облыстық ауыл шаруашылығы басқармасы басшысының міндетін атқарушы, «Азаматтарға арналған үкімет» мемлекеттік корпорациясы» АҚ-ның Қызылорда облысы бойынша филиалының басшысы баяндама жасады.
Қала және аудан әкімдері бейне-байланыс арқылы әлеуметтік-экономикалық жағдай жөнінде есеп беріп, коронавируспен күрес шараларына тоқталды.
<img src="https://kyzylorda-news.kz/wp-content/uploads/2020/04/kyzylorda-776-mln-kaz-1.jpeg" alt="" />
<img src="https://kyzylorda-news.kz/wp-content/uploads/2020/04/kyzylorda-776-mln-kaz-2.jpeg" alt="" />
<img src="https://kyzylorda-news.kz/wp-content/uploads/2020/04/kyzylorda-776-mln-kaz-3.jpeg" alt="" />

Қызылордада тұрғындарды азық-түлікпен қамтамасыз ету үшін 776 миллион теңге бөлінді

<a href="https://kyzylorda-news.kz/">Kyzylorda-news.kz.</a> Кеше, яғни, 2 сәуірде Қазақстан Республикасының Президенті Қасым-Жомарт Тоқаевтың «Әскери міндеттілерді арнаулы жиындарға шақыру туралы» №296 Жарлыққа қол қойды.
Бұл шара, ең алдымен, еліміздегі қиын-қыстау кезеңде, карантин жағдайында қоғамның қауіпсіздігін қамтамасыз ету және Төтенше жағдай режимін ұстап тұруда мемлекетке жәрдемдесу үшін қажеттігін баса айтқым келеді.
Мемлекет басшысының аталған Жарлығын еліміздің әрбір тұрғыны салмақтап, терең түсініп, байыппен қарауы керек. Себебі, бұл – бәріміздің, отбасымыздың, жақындарымыздың қауіпсіздігі үшін жасалып оытрған қадам.
Бұдан қорқудың, үрейге бой алдыру, босқа дүрлігудің қажеті жоқ.
Өйткені, заңға сәйкес, арнаулы жиындарға шақырылғандарға әскери қызметшілердің барлық жеңілдіктері қолданылады. Атап айтқанда, тамақтану, медициналық қамтамасыз ету, киім-кешек, жеке инвентармен жабдықтау, тасымалдау мәселелері түбегейлі шешілген.
Ерекше атап өтерлігі – арнаулы жиындарға шақырылғандар тек тұрғылықты жері бойынша қызмет өткеретін болады. Жиындарға тартылған азаматтар басқа өңірлерге мүлдем жіберілмейді.
Бүгін Қорғаныс министрі Нұрлан Ермекбаев атап өткендей, жиынға шақырылғандар күндіз қызмет орындарында болып, кешке үйлеріне қайтатын болады.
Ең бастысы – жиынға қатысушылар жалақы алатын болады.
Бұл жиындарға шақырылған барлық жұмыс істейтін азаматарға олардың жұмыс орны бойынша орташа айлық жалақы төленетін болады. Аталған жұмыс орындары жиындарға қатысудың барлық мерзімінде сақталады.
Ал, жиынға қатысушы жұмыс істемейтін азаматтарға да ең төменгі жалақы төленетін болады.
Бұл да – жұмыссыз азаматтарға беріліп отырған үлкен мүмкіндік.
Шақыру әр өңірдің қажеттілігіне қарай ғана шағын топтармен өтетінін ескерсек, еліміздің қауіпсіздігі үшін барлық азаматтар бұған жұдырықтай жұмылып атсалысуы қажет.
Ғалымжан ТАСЖАНОВ,
Қызылорда облысы әкімінің әскери қауіпсіздік және қорғаныс мәселелері жөніндегі көмекшісі

Ғалымжан Тасжанов: «Әскери міндеттілерді арнаулы жиындарға шақыру – жақындарымыздың қауіпсіздігі үшін қажет»

<a href="https://kyzylorda-news.kz/">Kyzylorda-news.kz.</a> Қазақстан Республикасының Қорғаныс министрі Нұрлан Ермекбаев әкімдерге әскери міндеттілерді арнайы жиындарға шақырудың тәртібін түсіндіріп берді.
<blockquote>
 «Бұл жарлықтың негізгі мазмұны – әкімдерге әскери міндеттілерді арнайы жиындарға шақыруға құқық және мүмкіндік беру. Басты мақсат – халқымыздың қауіпсіздігі мен денсаулығын қорғау. Аталған жарлық әкімдерді аумақтық әскерді толығымен жинауды міндеттемейді. Жиын заңға сәйкес үш айға дейін созылуы мүмкін. Әйтсе де жиынның мерзімін өз қажеттілігіне қарай жергілікті атқарушы орган белгілейді. Олар өз қаулысымен жиындарды ұйымдастырып, өңірдегі қажеттілік пен барлық шараның орындалуына қарай ертерек аяқтауына мүмкіндік болады», – деді Нұрлан Ермекбаев ОКҚ-да өткен баспасөз мәслихатында.
</blockquote>
Министрдің айтуынша жекелеген аймақтардың әкімдері 10 күндік, кейбірі одан да ұзақ әскери жиынды ұйымдастыра алады. Нұрлан Ермекбаев, сонымен қатар, мұндай жиын заң бойынша 3 айға созылуы мүмкін екенін айтып өтті.
<blockquote>
 «Кейбір аймақта әскери міндеті бар азаматтарды шақырудың мүлде қажеттігі болмайды. Әскери бөлім орналасқан аймақтарда әскери қызметшілердің біршама бөлігі қазірдің өзінде жұмысқа тартылып, бекітілген шаралар бойынша жұмыстарды атқаруда. Әскери қызметшілердің бір бөлігі басқа аймақтарға жөнелтілген. Бәрі де елдің жоғарғы әскери басшылығы мемлекеттің қорғанысқа қабілеттігін де, Қарулы күштердің жауынгерлік дайындығын да есепке алып отырғанын түсіну керек», – деді ол.
</blockquote>
Қорғаныс министрі брифингте бұл әскери жиыннан кімдердің босатылатынын да айтып берді. Оған бірнеше санаттағы тұрғындар кіреді.
<blockquote>
 «Бізде жасы үлкен азаматтар, отбасылық жағдайына және денсаулығына байланысты әскери жиынға шақырылмайтындар бар. Заңға сәйкес әскери жиындардан азаматтардың мына санаттары босатылады: қорғаныс, тәртіпті қамтамасыз етумен байланысты мемлекеттік органдарда қызмет ететіндер, авиациялық персонал, егін науқаны кезінде ауыл шаруашылығында жұмыс істейтіндер, педагогикалық қызметкерлер, күндізгі оқуда білім алатындар, әйелдер, 18 жасқа дейін үштен көп баласы бар азаматтар және тергеу және процессуалдық әрекеттер жүргізіліп жатқан тұлғалар, жергілікті атқару органдарының депутаттары», – деді министр.
</blockquote>
Еске сала кетсек, кеше Қазақстан Президенті <a href="https://kyzylorda-news.kz/kogam/qazaqstanda-aeskeri-mindettiler-arnawly-zhiyndargha-shaqyrylatyn-boldy-53761/">әскери міндеттілерді арнаулы жиынға шақыру</a> туралы&nbsp;жарлық шығарған еді.
Атап айтқанда қазақстандықтар жекелеген өңірлерде медициналық қызмет, тасқынмен күрес және дезинфекция жұмыстарына&nbsp;шақырылады.
<blockquote>
 «Біздің Қарулы күштер шоғырланған өңірлерде күш бар. Ал олар жоқ жерге медициналық даярлығы бар, қазір денсаулық сақтау саласына тартылған азаматтар шақырылады. Сонымен бірге қызметте тәжірибесі бар мамандар блокпостарда, елдімекендерді патрульдеуге және ол жерлерді санитарлық тұрғыда тазартуға жұмылдырылады. Бәлкім, кейбір аймақта көктемгі су тасқынының салдарын жою процесіне көмектеседі», – деген болатын Руслан Шпекбаев ҚазАқпарат тілшісіне <a href="https://www.inform.kz/kz/kazakstandyktar-zhekelegen-onirlerde-medicinalyk-kyzmet-taskynmen-kures-zhane-dezinfekciya-zhumystaryna-shakyrylady_a3633085">телефон арқылы айтқан</a> сөзінде.
</blockquote>
Сонымен қатар, ол мұндай тәжірибе бүкіл аймақта жүргізілетінін жеткізді. «Аймақтарда әскердің жұмысқа тартылғанын білесіздер. Бірақ олар жетіспейді. Әскери бөлімдер дислокациясы жоқ орындарға бәлкім адамдарды тартамыз. Алайда бұл ретте адам саны, міндеті мен мерзімі бойынша шешімді Бас штабтың келісімімен әкімдік қабылдайды», – деді ол.
ҚР Бас штабы бастығының орынбасары сондай-ақ бұл жұмысқа тартылу кезіндегі төлем жайлы да айтып өтті.
<blockquote>
 «Жұмыссыз қалған азаматтар минималды айлық төлемақыны алады. Жұмысынан тартылған азаматтар айлық жалақысына ие болады. Ең бірінші кезекте нақты аймақтарға керекті мамандарды іске тартамыз. Әр өңірде жағдай әртүрлі. Яғни, адамдар таңертең өз міндетін орындау үшін жұмысқа келгендей тәртіпте жүреді. Тұрғылықты мекені бойынша барады. Кешке үйлеріне қайтады», – деді Руслан Шпекбаев
</blockquote>

Қазақстан және Қызылорда облысының жаңалықтары: COVID-19