<a href="https://kyzylorda-news.kz/">Kyzylorda-news.kz.</a> Сыр өңірі кәсіпкерлікті дамытуға қолайлы аймақ. Бұған аймақта түрлі кәсіптің бастау алғаны айқын дәлел.&nbsp;Жаңақорған ауданының тұрғыны Шолпан Сүлейменова ерекше кәсіпті қолға алды. Кәсіпкер өзінің алғашқы кәсібін «Ауыл аманаты» ұлттық жобасы арқылы өткен жылдан бастап әжетхана қағазын өндіруді қолға алған.Әрине, дәретхана қағазын шығару аса бір жаңалық болмағанымен, жергілікті жерде бұл кәсіп түрі дамымағаны белгілі. Күнделікті өмірде есепсіз пайдаланатын тұрмыстық заттардың қай-қайсысы да сырттан тасымалданатыны бесенеден белгілі. Целлофан қалта, салфетка, дәретхана қағазы бәрі-бәрі. «Өзімізде қашан өндіреміз?» деген сауал жиі-жиі көтерілгенімен, іс жүзіне аса алмай келеді. Міне, енді бұл сауалдың да жауабы табылғандай.&nbsp; «Жаңақорған» деп аталатын бұл әжетхана қағаздарын Шолпан Жігерқызы аудандағы шағын және ірі сауда үйлеріне таратып отыр. Сұраныстың жоғары болуына сай цехта күніне 10 мыңнан аса қағаз өндіріліп, айына 1 млн теңгеден астам табыс табуда.<blockquote>&nbsp;Басты мақсатымыз нарық сұранысына жауап беру. Жәймендеп алға&nbsp;жылжу бар. Сан емес сапаға жұмыс жасаймыз. Мәселен, бізде шикізатты алар кезде қағаздың қатты немесе жұмсақтығына мән береміз. Сапасы бірінші кезекте, біздің өнім 2-ші класты өнім. Сапасы жақсы, жұмсақ, түсі ақ, ең бастысы тез жыртылмайды. Ал, бірінші класты түрі тек салфетка, үй жағдайындағы қағаздарға арналады. Алла қаласа, бұл өнімді де өнідіреміз, екінші мақсатымыз, макулатура шығару, − дейді кәсіпкер.</blockquote>Бүгінде кәсіпкердің кәсібі мемлекет тарапынан да қолдау табуда. Өндіріс аясын кеңейтуді көздеген ол қарамағына адам алып жұмыспен қамтуда.<blockquote>«Ауыл аманаты» жобасы аясында өткен жылдың қараша айында 2,5&nbsp;пайыздық несие арқылы 4 млн қаржы алып, әжетхана қағазын өндіру кәсібін аштым. Қағаз шикізаты Шымкенттен келетін болса, сыртқы қабатын Алматыдан алдыртамыз, дизайны өзімізден. Қазір қарамағымда 3 жұмысшы бар. Бүгінде өзіме қолғанат болып, бұл кәсіпті балаларым табысты жүргізуде, – деді кәсіп иесі.</blockquote>Жаны нәзік болса да, кез келген кәсіпке тәуекел жасап, істі бастай алатын Шолпан Сүлейменованың тірлігі көпке үлгі. Бір емес, төрт кәсіпті серік етіп, нәпақа тауып отырған жанның ісіне сүйсіндік. Берекелі бизнестің басын біріктірген Шолпан апайдың тауарына сұранысты артпаса кемімейді деп сенеміз. &nbsp;

Жаңақорған ауданының тұрғыны ерекше кәсіпті қолға алды

<a href="https://kyzylorda-news.kz/">Kyzylorda-news.kz.</a> Бүгінде тапсырыспен жиһаз жасау трендке айналды. Жаңа технологиялардың дамуы жиһаз жөндеуге де жаңашылдықпен келді. Бұрынғыдай ресейлік, беларусьтік жиһаз деп ешкімді таңғалдыра алмайсыз. Керісінше тапсырыспен жиһаз жасататын шеберлердің есімі таныла бастады. Соның бірі – Әбутәліп Пірімжанов.Ол «Даму» кәсіпкерлікті дамыту қоры» арқылы мемлекеттен 6 пайыз жеңілдікпен субсидия алып, «Адал» шеберханасын ашты. Мұнда есіктің түр-түрі жасалады. Кәсіпкер 20 адамды тұрақты жұмыспен қамтып отыр. Жұмысшылар 150-250 мың теңге аралығында айлық алады. Шаруашылығына қажетті ағаш станогін Қытайдан арнайы әкелген. Өнімге қажетті материалдардың басым бөлігін Астана, Алматы, Шымкент қалаларынан тасиды. Бояудың да итальяндық, түркиялық түрі пайдаланылады. Ал ағаш есікке қажетті өнімдер жергілікті жерден қолданылады. Өндіріс жұмыстарының басым бөлігі автоматтандырылған. Дайын өнім жасалып, сырланып, тұтынушының үйіне жеткізіледі.Кейіпкеріміз кез келген жұмысқа тәртіп пен талап қажет екенін жақсы түсінеді. Оның ұстаханасының өнімдері облыс аумағынан бөлек, өзге де өңірлерге сатылымға шығуда.<blockquote>Мұндай іспен айналысу бала күнгі қызығушылығымнан басталған. Үлкендердің ер шауып, қамшы өріп отырғанына талай мәрте куә болғанмын. Сол көзбен көрген дүние бүгінде өміріме арқау болып отыр. Тапсырысты тұтынушы талғамына сай жасап беруде бар мүмкіндігімізді пайдаланамыз. Қажетті материалдарды көбіне Алматы, Шымкент қаласынан алдыртып жатамыз. Сыр өңірінің өнімін брендке айналдыру ойым бар. Қазір бұрынғыдай бір сипаттағы жиһаздар сән емес. Сондықтан ұдайы ізденіс үстінде болып, тәжірибемізді жетілдіріп отырамыз. Өйтпеске болмайды. Оның ішінде қолөнер ісі аса шыдамдылық пен терең талғампаздықты қажет етеді. Қазір қоғамда екі қолға бір күрек таппай, ата-анасының табысына таңылып отырған жастар жеткілікті. Оларға айтар кеңесім, мемлекет пен отбасына қарап отырмай қолдан келер іспен шұғылдану керек. Мемлекет кәсіппен айналысуға &nbsp;мүмкіндікті жасап, қолдау танытуда. Сондықтан өз мүмкіндігіңді молынан пайдалана білген ләзім, – дейді цех директоры.</blockquote>Қазір инновацияның дамыған дәуірі, жастар әртүрлі ғылыми жаңалықтар ашып қолданысқа енгізуде. Дегенмен атаның тегімен, ананың сүтімен келген ұлттық қасиеттерімізге мән беруіміз қажет. Жаңқаға жан, темірге тіл бітірген шеберлер кім-кімді болса да тәнті етеді. Халқымызда «Қолынан келген құмға кеме жүргізеді» деген сөз бар. Бұл ұшқыр ойы мен шеберлігін ұштастырған ұсталарға айтылса керек-ті.Мұнда жұмыс істейтін шебердің бірі – Талғат Әшірбеков. Өзінің сөзінше, жұмысқа кіріскелі көп уақыт бола қоймаған.<blockquote>Келген тапсырыстарды дер уақытында аяқтаймыз. Мәселен, бір күнде 10-15 есік жасап шығарамыз. Қалада осындай орталықтар көп болса, жастар жұмыссыз жүрмейді деп ойлаймын, – дейді ол.</blockquote>Кәсіпкер жасаған бұйымдарымен облыс орталығынан бөлек аудандарды да қамтып отыр. Арнайы тапсырыс беретіндер де табылады. Бағасы көлемі мен пайдаланылған материалға қарай қойылады. Бұл – өлшеусіз еңбек пен төккен тердің жемісі мен жеңісі. Қазір Әбутәліп жасаған жиһаз көп тұрғынның үйінде тұр.&nbsp;&nbsp;

«Даму»: Жиһаз өндірісіндегі оң өзгерістер

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp; Қазалы қаласының тұрғыны Жұпар Жақсылық он саусағынан өнер тамған шебердің нақ өзі. Ұршық иіріп, тоқыма тоқудан бөлек, киіз басуға дейін меңгерген. Текемет, алаша тоқу да бойжеткен күнінен бергі кәсібі. Бүгінде шөбере сүйіп отырған асыл әже балаларына шұлық, жемпірді өзі тоқып береді.&nbsp; Жұпар апа жүзі күлімдеп, бізді жылы қарсы алды. Дастарханға шақырып дәм ұсынған анаға келген мақсатымызды айтып, сөзге тарттық. «Иә, қазір ұршық иіретіндер аз ғой. Біздің уақытымызда бұл іске бейімділер қатары көп болатын», – деп әңгімесін бастады.&nbsp; Айтуынша, ең алғашқы тігін машинасын анасы 6-сыныпта оқып жүргенінде алып беріпті.&nbsp; – Әкем Жақсылық Құлниязов ауыл советінде хатшы, анам Зейнеп Құлниязова мұғалім, дүкенші, наубайшы болды. Екеуі де жұмысбасты, үйде көп бола бермейтін. Үйдің үлкені ретінде үй шаруасына ерте араластым. Өзімнен кейінгі бес бауырыма қарайласып, барлық жұмысты істей беретін едім. Қолөнерге деген құштарлығым бала кезден бар. Ешкім маған үйреткен жоқ. Барлығы мектептегі «Еңбек» пәнінен басталды. Мұғалім көрсетіп берген өнерді әрі қарай үйде жалғастыратын едік. Солай тоқыма тоқуға деген қызығушылығым артты, – дейді Жұпар апа.&nbsp; Мектеп бітірген соң екі жыл Қызылқұм совхозында тәлімгер болған кейіпкеріміз тұрмысқа шыққан соң енесінің қасында көмекші сауыншы болғанын айтты.&nbsp; – Енем Алтыншаш Қазанғапова атақты сауыншы болды. Сол кездері 12 съезд депутаты атанды. Сол кісінің қасында көмекші болдым. Одан кейін күріш ектік. Майдакөл совхозында қырман штабында аспазшы да болдым. Енем өмірден өткен соң соғыс ардагері атам Өтеген Сарымбетовтің денсаулығына қарайласып, үй шаруасында болдым. Атам да өмір бойы еңбек еткен жан. Жолдасым Шират Өтегенов автобазда жүргізіуші болды, – дейді.&nbsp; Шират аға мен Жұпар апа өмірге бір, ұл екі қыз әкеліп, құтты орнына қондырған. Ұлы Қайрат орман шаруашылығы мекемесінде жұмыс істейді. Келіні Жанат мұғалім Қыздары Нұргүл отбасымен Қарағандыда тұрады, мұғалім. Кенжелері Жанат әскери салада еңбек етеді. Ол отбасымен Шымкентте. Немересі Қанат пен оның келіншегі Ақмарал жолсерік болып қызмет етеді. Нұрай туризм саласы бойынша жоғары білім алған. Шымбұлақта жұмыс істейді әрі сән саласында да модель. Ернар 8-сынып оқушысы. Шөбересі Қайсар 2-сыныпта, Аслан балабақшада.&nbsp; – Таңертең барлығын жұмысына, мектепке, балабақшаға шығарып саламын. Тамақтарын дайындап, күтіп аламын. Атасы екеуміздің қызығымыз – балдай тәтті немере-шөберелеріміз. Солардың қылығын қызықтап, сүйсініп отырамыз. Адамға одан артық қандай бақыт керек дейді , – Жұпар әже.&nbsp; Әжесі балаларына тоқыма, шұлық тоқығанда қазіргі заманға сай етіп әдемі ою-өрнектермен безендіруді ұмытпайды.&nbsp; – Енем ісмер жан болатын. Бірге киіз басып, ою ойдық. Алаша да тоқыдық. Шілтер, кесте, шарқат дайындайтын едік. Заманның талабы солай болды. Біз уақытында диірмен тартып, келі түйдік, – деген Жұпар апаның келіні Жанат та «Келін қайын ененің топырағынан» деген сөзді дәлелдегендей. Оның да қолынан келмейтін дүние жоқ.&nbsp; Жанат Нұрыллақызы Қ.Нұрмаханов атындағы 95 орта мектепте Қосымша білім беру педагогы, география пәні мұғалімі. Жұмысымен қоса бала күнінен меңгерген қолөнерді де қатар алып жүр.&nbsp; – Мен тоқыма тоқып, тігін тігуді анамнан үйрендім. Бала кезімде апам Жанар екеуімізге жүн түткізетін. Тоқу өнерін сол жас күнімнен ақ игердім. Ең алғаш тоқығаным мойынорағыштар еді. Оң, теріс тоқудан бастап түрлі жіппен сәндейтінмін. Үйдегілерге қой жүнінен шұлық тоқып беретінмін. Кейін келе өзіме қалпақ тоқыдым. Әлі есімде 9 сынып оқып жүргенде анам әдемі қара қойдың жүнін иіріп берді. Тоқу тоқығанды өзім қатты ұнататынмын. Сол әдемі қара жіптен анама жемпір тоқып бердім. Менің қолымнан шыққан қара жемпірді анам шынтағы тозғанша тастамай кигені бар. Балаларға күртеше шұлықтарды қызыға сәндеп, өрнектеп тоқимын, – дейді Жанат Нұрекешова. Ол тоқыған терме алашалар әлі күнге дейін төсеніш ретінде сақтаулы. Әңгіме барысында өзі тоқыған шарқатты көрсетті. Әдемі, аппақ, өрнектеліп тоқылған, жып-жылы шарқаттың жұмсақтығы жібектей. Отыз жылға жуық уақыт енесімен бір шаңырақ астына тұратын Жанат Нұрыллақызы «Екінші анамнан да, үйренгенім аз болмады», – дейді.&nbsp; – Бұрындары мектеп формасының жағасына шілтерді тігіп, тағып алатын едік. Сондай әдемі көрінетін. Қолғап, шұлық тоқуды қызым Нұрайға да үйреттім. Аздап біледі. Тоқуда қателік етпеуі керек. Салған өрнегіңіз әдемі түсуі үшін қателеспей, есеппен тоқу маңызды, – дейді Жанат Нұрыллақызы.&nbsp; Ене мен келіннің қызығушылығы бір, талғамы да сай келеді екен. Кей кездері ойға-ой қосып, бір-біріне «мына жерін былай өрнектеп келтірсек қалай болады?» деген секілді пікірлесіп отырады.&nbsp; – Әуелі таза, жуылған жүнді түтіп, оны шүйкелейді. Шүйке деген түткен жүнді қолға жинау. Содан кейін біртіндеп оңға қарай иіресің. Бір домалақ істеп алып, оңға қарай тағы солай иіріп, екінші домалақ істеп алып, екеуін біріктіріп қосып, екі тін қылып, иіріу керек. Содан кейін барып, оны қандай нәрсеге болса да пайдалана бересің. Үйренемін деген жан болса, үйретуден жалықпаймын. Қазақ төрт түлікті баптап, оның жүніне дейін кәдеге асырған халық. Қазақы ою-өрнек, ұлттық нақышпен безендірілген, жып-жылы киімді киіп жүрсе, керемет емес пе? Қолөнерді үйрену, білу, күнделікті тұрмыста жүзеге асыру тіпті несібе көзі де бола алады. Ең бастысы, ниет болса, болғаны, – дейді Жұпар Жақсылыққызы.&nbsp; &nbsp; &nbsp;

Қазалыда қолөнерге сұраныс жоғары

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp; &nbsp;Бүгінде облыс бойынша жұмыс істеп тұрған шағын және орта кәсіпкерлік субъектілерінің 49,2 проценті Қызылорда қаласының үлесінде. Нақтыласақ, Қызылорда қаласы мен қалаға қарасты кент және ауылдық округтерде барлығы 32 064 кәсіпкерлік субъекті жұмыс жасауда. Бұл кәсіпкерлік субъектілерде 68 047 адам тұрақты жұмыспен қамтылған.&nbsp;Қазір мемлекеттің экономикасын алға қарай дамытып отырған саланың бірі кәсіпкерлік екені жасырын емес. Себебі қандай да бір адам өз ісін ашып, кәсіпкер атанып жатса ол біріншіден, мемлекетке салық төлейді, екіншіден, бірнеше адамды жұмыспен қамтиды. Бұл дегенің тағы бір қырынан қарағанда жұмыссыздық мәселесін азайтудың ең тиімді жолы десе де болғандай.Мемлекеттік бағдарламалар аясында да кәсіпкерлік бастамаларды қолдау мақсатында жүйелі жұмыстар жүргізілуде. Өткен жылдың өзінде қала бойынша 24,45 миллиард. теңгені құрайтын 1 415 жоба қаржылай қолдау тапты, - дейді қалалық кәсіпкерлік, өнеркәсіп және туризм бөлімі басшысының міндетін атқарушы Бауыржан Серікұлы.Өнеркәсіп өнімдерінің өндірісі бойынша қаланың Қызылорда облысындағы үлесі 62,1процентті құрайды. Өткен жылы осы салада 636,3 миллиард. теңгенің өнімі өндіріліп, құны 1.9 миллиард. теңгені құрайтын 4 жаңа жоба жүзеге асты, соның нәтижесінде 130 жаңа жұмыс орны ашылды.&nbsp;Ал, сауда саласының бағыты бойынша, қалада 2791 сауда объектілері жұмыс жүргізуде. Оның ішінде, әр түрлі бағыттағы өткізілетін тауарлар бойынша 11 базар, 110 сауда үйі, 2669 дүкен жұмыс жасайды.&nbsp;Сауда базарларын жаңғырту мен заманауи форматқа көшіру бағытында қала орталығында орналасқан «Сыбаға», «Сұлтан», «Асбол» базарлары басшылары және қала әкімдігі арасында жол картасы әзірленді. Соның негізінде өткен жылы «Сұлтан» базарының ашық азық-түлік сататын аумағы 1064,7 шаршы метр жерге брусчатка төселіп, жоғарғы бөлігіндегі ескі жабындылар алынды. Сондай-ақ, 1802 шаршы метрді құрайтын аумағы металлочерепица жабындысымен қапталды. «Сұлтан» базарына жапсарлас орналасқан «Саяжай» әлеуметтік сауда қатары толық жөндеуден өткізіліп, жалпы көлемі 182,1 шаршы метрді құрайтын жоғарғы аумағына профнастильмен қапталып, суағарлар жаңартылды.Шағын және орта кәсіпкерлік – елдегі жұмыссыздықты азайтудың, саланың елді мекендерде кең қанат жаюының, жеке тұлғалардың күнкөріс деңгейін арттырып, табысын молайтудың бірден-бір жолы. Мұнымен қоса, дамушы мемлекет үшін кәсіпкерлікті өрістету өркениетті елдермен иық тіресуге де мүмкіндік беретін сала. Сол себепті қазіргі таңда шағын және орта кәсіпкерлік саласына көмек те, қолдау да аз емес. Біз сөз еткен 2,5 пайыздық несие – көп қолдаудың бірі ғана.&nbsp;

Кәсіпкерлікті дамыту жаңа жұмыс орындарын ашуға мүмкіндік береді

&nbsp;<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp; &nbsp;Ағаштан, темірден, түйін түйген, жүннен көз жауын алатындай бұйым жасаған, асыл тастардан сән бұйымдарын соққан, сүйек пен мүйізді, шиді қиынынан қиыстырған халық шеберлерінің ісі – мақтауға тұратын өнер туындысы. «Шебердің қолы алтын» дейді қазақ. Сөзге де шебер, іске де ұстаз халқымыздың зор мәдениеті мен өнерін паш ететін құндылықтардың бірі – қолөнер.Сұлу өнер кісісінен шыдам мен сабырлықты, әдемілікке құштарлықты талап етеді. Назерке Сәбитованың қолынан шыққан бисермен өрілген өнер туындыларын көрген адам еріксіз тәнті болып, тамсанатыны сөзсіз.Шығармашылыққа жаны жақын жандар негізгі кәсібі тағдыр салған жолмен басқаша өрілгенімен шығармашыл жұмысты біржола ысыра алмайды. Күнделікті күйбең тіршіліктен қолы қалт еткенде жаны сүйген ісімен айналысып, жан дүниесі тыныштық табады. Бұндайды әдетте «хобби» деп атап жатамыз.Кейіпкеріміздің негізгі мамандығы – тәрбиеші, мұғалім. Қазіргі таңда аудандағы «Мансұр» спорт шығармашылық клубында үйлестіруші қызметін атқарып жүрген Назеркенің бисерден жасаған ерекше картинкаларын көргенде кәнігі шебердің жұмысын тамашалағандай боласың. Сұлу өнерге құштарлығы кіші мектеп сыныбында-ақ басталған екен.– Бастауыш сыныпта оқып жүргенде оқушылар үйінен ұстаздар келіп түрлі бағыттағы үйірмелер бар екенін және мектептерді аралап, оқушы жинап жүргенін айтты. Жалпы кесте тіге білу әр қыз баласына керек нәрсе ғой, мен де осы бағытқа өзімді бұрғым келді. Тоқыма тоқу, тігу өнеріне қатты қызығатынмын. Анам бұл қалауымды қолдап, үйірмеге қатысуымның дұрыс екенін айтты. Мен тоқыма және бисермен өру үйірмелеріне қатысып, Аққыз және Нәзира апайлардан көп нәрсе үйрендім. Жұмыстың негізгі қыр-сырын осы кісілерден игерген соң ғаламтордан немесе көрмелерден әдемі дүние көрсем, соны оңай тоқып кете беретін болдым, – дейді кейіпкеріміз.Шындығында, кісінің жаны сүйген шығармашылығымен айналысуы жан-дүниесін тыныштандыратын бірден-бір жол. Кейіпкеріміз де күнделікті күйбең тіршіліктен бой жазу үшін бисерлерін алдына жайып, шетсіз, шексіз сұлулыққа еніп кеткендей әсер алады екен. Бастапқыда бисерден қолға тағатын білезік, кілтке тағатын бұйым секілді кішігірім сәнді дүниелер тоқыса, қазір ауқымды дүниелер жасап шығарып жүр. Әсіресе, түрлі-түсті майда тас, моншақтардан ағаш бейнесін жасағанда, ол керемет сұлу болып шығады екен. Жалт-жұлт етіп жанып тұрғандай әсер қалдыратын ағаш бейнесін тырнақтың ұшындай бисерлерден құрастырып шығу қандай өнер, қаншалықты еңбекті талап ететінін бағамдай беріңіз.Сонымен қатар Назерке қазіргі кезде сәнге айналып, сұлулардың сұранысына ие болған моншақтан жасалған сәнді қолсөмкелерді де оңай жасайды. Бірақ онысын пұлдап, сатуды ойламаған. «Жан рахатым үшін жасаймын, сатып көрмеппін, көбіне сыйға тартамын» дейді кейіпкеріміз. Бұған дейін сөмке, түрлі сәнді бұйымды құрбыларына, туыстарын үлестіріпті. Бірақ сәті түссе, сұлу өнерді кәсіпке айналдырудың ойында бар екенін де айтып қалды. Шебердің қолынан шыққан бұйымдар талай көрмеге қатысып, көрерменін тамсантқанын да айта кету орынды.– Негізі шығармашылық өнер міндеттілік үшін емес, жан қалауыңмен жасалғанда жұмырлана түседі. Сондықтан көбіне көрме немесе байқау үшін атүсті, асығыс жұмыс жасағым келмейді. Бірақ ондай кездер де болған. Ойланып, асықпай, жүрек қалауына салып жұмыс істесең, қай іс те өнімді болмақ, – дейді ол.Көне дәстүрлерді көздің карашығындай сақтап және байыта отырып, халықтық қөркем қолөнер кәсібі қазіргі мәдениеттің айқын құбылысы болып, үй тұрмысының маңызды және бөлінбес құрамына айналды. Қолөнер туындылары қайталанбас және алуан түрлі: әсем әшекейлерден және шағын ойыншықтардан бастап күрделі кестеленген композицияларға дейін және көлемді кілемдерді, тоқыма матадан жасалған көп заттық жиынтықтарды, шыны, ағаш және металл бұйымдардарын қамтиды. Пішіндердің ықшам да мәнді үйлесімі, түстердің жоғары талғамы, өрнектердің әсемдігі, композициялық шешімі, көздің мүлтіксіздігін, колдың дәлдігін және қиял ұшқырлығын ұштастырып, шебердің өзіне тән тәсілдермен орындауына жеткізеді.Халқымыздың қолөнері – ұрпақтан-ұрпаққа мұра болып келе жатқан ұлттық мәдениетіміздің ажырамас маңызды бөлігі саналады. Қолөнер түрлерінің өн бойында халықтың материалдық және рухани болмысы көрініс тапқан. Бұлай деуімізге басты себеп: халықтық қолөнер еліміздің тұрмыс жағдайынан, материалдық жай-күйінен ғана хабар бермей, эстетикалық талғамынан, тарихы мен таным-түсінігінен де мол мәліметке қанықтырады. Осындай ұлттық мәдениет үлгілерінің дәстүрлерін оқып-үйрену – кейінгі ұрпаққа мұра етіп сақтауға, сонымен қатар, бүгінгі тұрмыс-тіршілік, әлеуметтік жағдайларға сай қолдана білуге үлкен мүмкіндіктер береді. Қолөнер – халық өмірімен, тұрмысымен бірге жетіліп, біте қайнасқан өміршең өнер. Ел тұрмысына сән берген қолөнерді халық өмірінен бөліп алып қарау мүмкін емес. Сұлу бұйымдарды көріп, көз ақысын бергенде ұлттық өнерді ұлықтауға өзінше ат салысып жүрген шеберлеріміздің қолы алтын деп тамсанбасқа болмайды.

Сырдариялық қолөнер шеберінің ерекше туындысы сұранысқа ие 

<a href="https://kyzylorda-news.kz/">Kyzylorda-news.kz.</a> Кәсіп бастағанның өрісі кеңейеді. Өйткені мемлекет тарапынан шағын және орта бизнеске қолайлы жағдай жасалуда. Бұл сөзімізге «Белкөл» кентінің тұрғыны Майра Ізбасқанованың жұмысы дәлел.Жеке кәсіпкер «Өңірлік инвестиция орталығы» арқылы 4 млн теңге қаражатқа қол жеткізіп, жұмысты сәтті жүзеге асыруда.Өнім «Белкөл» сауда белгісімен сатылымға шықты. Бағасы – 120-160 теңге. Шығыны да айтарлықтай аз. Өйткені кір сабын жасау үшін тоң май мен сода пайдаланады. Негізгі тұтынушылары – Сырдария, Жалағаш ауданының тұрғындары. Сұраныс артып жатса, өзге өңірлерге да жібермек ниетте. Осылайша өндіріс орнын үлкейтіп, қосымша жұмыс көзін арттырмақ.<blockquote>&nbsp;Кәсіпті 2022 жылы қолға алып, бизнес жоспарымды сәтті қорғап шықтым. Қаражатыма қажетті станок пен шикізат сатып алдым. Қазір сабынның екі түрін шығарып жатырмыз. Кір сабын шығаратын құрылғыны Алматыдан алдырдым. Аппарат сағатына 500 дана сабын шығаруға қауқарлы. Сапасы жақсы. Өндіріске қажетті шикізатты Тараз, Шымкент қалаларынан әкелеміз. Алдағы уақытта өндіріс орнын ұлғайтсақ деген жоспар бар, – дейді кәсіпкер.</blockquote>Көтерме бағамен сатып алушылар табылып жатса, кәсіпкер бағасын түсіруге әзір. Өндіріс орнында бұдан бөлек сусабын, ыдыс жуатын сұйықтықтар шығарылуда.

Майра Ізбасқанова: Өндіріс орнын ұлғайтқым келеді

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp;«РЗА» акционерлік қоғамы – аудандағы іргелі кәсіпорынның бірі. Аты Қазақстаннан бөлек шет елдерге де мәлім кәсіпорынның инвестициялық жобасы, 2010 жылдан бері жүзеге асырылып келеді. Экспортқа бағытталған сүт және ет өнімдерін өндіру бойынша типтік жобада салынған, тауарлы сүт фермасы және ауысымына 30 тонна сүт өңдейтін сүт зауытының тірлігі таңмен таласа басталады.&nbsp;Бұл жерде адал тер төгіп, бір тәулік бойы тікесінен тік тұрып, қызмет атқаратын қыз-келіншектер қатары көп. Асыл тұқымды сиырларға жем-шөбі беріліп, бапталғаннан кейін сауын бөлмесінде арнайы аппарат кигізіліп, сүт сауылады. Осында тынымсыз еңбек ететін Мейрамкүл Ұзақова сауыншы болып, тәжірибе жинағанына 18 жылдың жүзі болды. Бұл аралықта сенім артылған кәсіптің барлық жай-жапсарына толыққанды қаныққан. Осы күні өз ісін тиянақты орындайды.&nbsp;Оның айтуынша, сүт фермасында жұмыс істейтін әрбір еңбеккерді үйді-үйінен арнайы бөлінген автобус арқылы тасиды. Есік алдынан әкетіп, уақытында аман-есен отбасына жеткізеді. Мұнда, үш мезгіл тамақ беріліп, жылына екі мәрте қыстық және жаздық жұмыс киімі таратылады екен. Бір ауысымда төрт адам бір күн жұмыс істеп, екі күн демалады. Олар 700-ге жуық сиырды, үш мезгіл сағат 8:00 мен 16:00 және түнгі 00:00-де сауып алады. Әр сиырдан күніге майлылығы 3,2 және 6 проценттік 60 литр сүт өндіріледі. Сүт саууға арналған апаратты пайдаланбас бұрын, санитарлық-тазалыққа ерекше мән беріледі. Әуелі ірі қараның желіндері әзірленген салфеткамен сүртіп алынады. Сүт сауылып болған соң, йодталған ерітінді жағылады.&nbsp;«Қашанда мал бағып, оны қарау оңай шаруа емес. Бірақ бейнеттен қашпай еңбек етсең, одан тапқан табысың берекелі болары сөзсіз. Өзіме қазіргі ісім ұнайды. Жалақысы да көңілден шығады. Жұмыста бар жағдай жасалған. Сауын арасында асханадан ауқаттанып, жатын бөлмесінде тынығып аламыз. Еңбек демалысына шығарып, мейрам сайын мерекелік сыйымызды табыстайды. Көмек пен қолдау қажет кезде жан-жақты демеушілік көрсетілді. Сондықтан кәсібім өзіме ерекше ұнайды. Менің атқаратын жұмысым сауын секциясына кіргізілген сиырлардың денсаулығын бақылап, жағдайы ветеринарларға ескертіледі», – дейді сауыншы.&nbsp;Ал, дүйім жұртқа мәшһүр сүт зауытындағы сүт өнімдерін қайта өңдеу, сақтау және тасымалдауды ұйымдастыру жұмыстарына зауыт меңгерушісі Замира Лепесқызы жауап береді. Оның қарамағында жиырмадан аса жұмысшы еңбек етеді. Ол күніге таңертең 8:00-ден бастап, фермадан келген сүтті танкерлерге құйып алады. Бұл үшін зауытта екі зертхана іске қосылған. Онда сүттің жалпы көрсеткіштері мен қышқылдығы тексеріледі. Мұнда барлығы арнайы залалсыздандыру аппаратынан өтеді. Өңдеу цехындағы пастерилизатор сүт зауытының жүрегі саналады. Әкелінген сүт өнімі барлық тексеру процесінен өткеннен кейін 92 градуста пісіріліп, 2 градуста суытылады.&nbsp;Сонымен қатар, қышқыл сүттен өңдеу бөлімінде айран, сметана, йогурт ұйытылса, сыр бөлімінде брынза, сүзбе дайындалады. Бұлар фирмалық пластикалық ыдыстарға құйылып, автоматтандырылған құрылғымен бастырылып шығарылады.&nbsp;Сонымен бірге, тәулігіне 30 тонна сүт өңдейтін зауыт Еуропаның озық технологиялық құрал жабдықтарымен қамтылған. «Дәмді» сауда маркасымен пастерленген, ультрапастерленген сүт, айран, қаймақ, ірімшік, сары май, сыр өнімдері де өндіріледі. Бұл күні зауытта 10 түрлі өнім шығарылады.&nbsp;– Бізден шығарылатын сүт қаптамаларының дизайны Италияда жасалған. Тапсырыспен тікелей сол жақтан алдыртамыз. «Rossi&amp;Catelli» италиялық стерилизаторында 140-145 градуста 6 айға сақталатын сүт дайындалады. Ал, «IPI» (Айпиай) жабдығымен сүт қорабы бастырылып шығарылады. Сүт өнімдерінің барлығы табиғи таза тауардан жасалады. Қабылданған сүттердің барлық химиялық көрсеткіші тексеріледі. Басқа өнімдермен салыстырғанда табиғи таза өнімдер ешқандай қоспасыз. Сондықтан да болар біздің өнімге сұраныс жоғары, – дейді Замира Әуесбаева.&nbsp;Барлық өнім облыс аумағында қолайлы бағамен сатылады және жергілікті нарықта айтарлықтай үлесі бар. Сондай-ақ, Астанаға әзірленген өнімдерді жеткізу сәтті жолға қойылған.&nbsp;Аудандағы агроөнеркәсіп саласына белсене араласып, елідегі азық-түлік қауіпсіздігінің сақталып, өсіп-өркендеуіне қомақты үлесін қосқан қыз-келіншектердің қызметіне ерекше сүйсіндік.

Қазалыда сүт өнімдеріне сұраныс жоғары

<a href="https://kyzylorda-news.kz/">Kyzylorda-news.kz</a>. Сабина Темірболат есімді бойжеткен әр ұлттың қуыршақтарына киім тігеді.&nbsp;Бүгінде қызығушылығы кәсіпке айналған. Себебі оның қолынан шыққан дүниелерге сұраныс артуда. Үйренгісі келетіндер де жетерлік. Бір қызығы Сабинаның мамандығы&nbsp;–&nbsp;информатик. Бұл салада жұмыс істемейді, себебі бүгінгі күні сүйікті ісіне басымдық берген. Өзге ұлттың киімдері қашанда көзге әдемі көрінеді, ал қуыршаққа арнайылап, ұқыппен кәсіби маманның тіккені ерекше үйлесім береді. Ол түрлі-түсті ою-өрнек пайдаланып, әр ұлттың ұстанымына мән беруде.<blockquote>– Ұлт­тық өнер мен халқымыздың қолданбалы өнерін технологиямен ұштастыра отырып, кәсіп бастаудың орны ерекше. Жоба төңірегінде қолөнер бұйымдары сан түрлі шығарылатын болады. Ерекшелігі – қолөнер бұйымдардың ұлттық нақышта, сапасы сын көтеретін деңгейде болуы. Ең сұранысқа ие – ұлттық нақыштағы қуыршақтар коллекциясы. Осы коллекция жайлы толығырақ айтсам. Әрбір қуыршақ қолмен кестеленіп, әшекей бұйымдар арнайы тігіледі. 1 қуыршақ жасау үшін арнайы материалдарға тапсырыс беремін. Көбісі сумоншақпен, мақпал, велюр, жібек матасымен тігіледі. Бір қуыршақты жасау үшін шамамен 1 ай уақыт кетеді. Сатып алам деушілер саны көп.</blockquote>Қазіргі таңда коллекцияда 30 шақты қуыршақ бар. Мысалы, түрлі ұлыс өкілдері бейнелеген топтамада 12 қуыршақ бар. Ұлттық киім – халықтың мәдениеті мен дәстүрінің айқын көрінісі. Әрбір ұлттың киіміндегі кез келген ою-өр­нек­тен қолөнердің озық үлгісін көруге болады. Одан тұрмыс, табиғатпен байланысын, тұтас дүниені бөлшектеп суреттеген бейнені көруге болады. Яғни, әрбір киімі аталған ұлттың дәстүрлеріне сәйкес жасалады. Тігілген әрбір дүниенің өзіндік мәні бар, оны киюдің, жас ерекшелігі, мерекелерге, мезгілге сай болуы ескерілді, – дейді Сабина.<blockquote>Ісмер қыздың өнімдері әлеуметтік желі арқылы сатылуда. Қызығушылық білдіргендердің көбісі сыйлық үшін алады екен. Бастапқы тіккен 10 қуыршақ демде са­ты­лып кеткен. – Ал­­ғашқы қуырша­ғымның киімі, тігісі де қарапайым болды. Көз тартар дүние шығу үшін шыңдалу қажеттігін түсіндім. Тігін әдістерінің, өю-өрнек салудың түрлерін ғаламтордан іздей бастадым. Шетелдік мамандардан матаға жаңа рең берудің алуан түрін меңгердім. Өз жұмысымның нәтижесін көріп, қолымнан келетініне көз жеткізген соң бұл іспен табыс табуға болатынын түсіндім. Алғашқы коллекциямда ұлттық киімдегі 10 қуыршақ болды. Жартысы бірден сатылып кетті. Алайда мен тек сатып, пайда табу үшін жасамаймын. Уақытымды өзіме ұнайтын жұмысқа арнау үшін тігінмен айналысамын. Қазір тек әйелдер костюмін тігемін, бірақ болашақта ерлер костюмін де тігуді де ойла ймын. Алдағы уақытта осы кәсіп түрін үйренемін деушілерге курс ашу жоспарлануда, – деді ол бізбен әңгімесінде.</blockquote> Кейіпкеріміз Ресейдің «Московская правда» ұйымдастырған қолданбалы өнер байқауына қатысқан. Қолөнер бұйымдары, соның ішінде орыстың ұлттық киіміндегі қуыршақ «Народное творчество» номинациясын иеленген. «Ерекше атап өтерім, менің жұмыстарымды бірнеше шетелдік маман бағалады. Қуыршақтар мен жасалу үлгісін голливуд жұлдыздарына киім тігумен айналысатын американдық танымал дизайнер, модельер Ник Верреос жоғары бағалады. Жұмыстарым әлеуметтік желіде жақсы танымал. Қуыршақтардың қазақи киімде бейнеленгенін көрген шетелдік дизайнерлер сұлулығына тамсанады», – деді ол.Мөлдір САБЫРЖАН&nbsp;

Қызылордалық тігіншінің коллекциясында 30 шақты қуыршақ бар

<a href="https://kyzylorda-news.kz/">Kyzylorda-news.kz.</a> Кәсіпті біреу бастауға көп ойланып жүрсе, біреу қалай бастарын білмей бас қатырады. Електен өткізіп жүргенде уақыт ұттырады. Енді біреу шешім қабылдай алмай, «бірдеңе істеу керек еді?» деген сауалдың төңірегінде айналшықтай береді. Ал енді біреулердің ішінде арманы болады. Соған талпынып әрекет қылады. Істің көзін іздейді. Сол ізденіс пен талпыныстың бір күні жеміс берері анық.&nbsp;Дүр Оңғар ауылының тумасы Нұрғазы Өтепов те студент кезінен армандаған &nbsp;кәсібіне бүгінде қол жеткізген. Ол «Қызылорда» Өңірлік Инвестициялық орталығы» арқылы 3 млн теңге көлемінде жеңілдетілген 2,5 пайызбен несие алып, өзінің көлік жуатын және &nbsp;автокөліктердің дөңгелегін ауыстыру, жамау, желін тексеру, тағы басқа қызмет көрсету бойынша жеке кәсібін бастады.&nbsp;Жалпы жыл шеңберінде жаңадан кәсіп ашушылардың саны өткен жылмен салыстарғанда біршама өсім беріп отыр. Мұның бір сыры – аудандық кәсіпкерлік, өнеркәсіп және туризм бөлімінің кәсіп ашқысы келетін немесе кәсібін кеңейткісі келетін ниет білдірушілерге қызмет көрсетіп, ақыл-кеңес беруде есігі қашан да айқара ашық.&nbsp;Бөлімнің мәліметінше, ауданда тіркелген шағын және орта кәсіпкерлік субьекті саны осы жылдың 1 қарашасына 4323 бірлікті құраса, өткен жылдың сәйкестілік кезеңімен салыстырғанда 7,2 пайызға өскен. Оның ішінде жұмыс істеп тұрған шағын және орта кәсіпкерлік субьекті саны 4000 бірлікті құрап, 7,7 пайызға артқан екен. Тіркелген кәсіпкерлік нысанының жұмыс істеп тұғандарының үлес салмағы 92,5 пайызды құрайды. Биылдың қаңтар-маусым айы аралығында шағын және орта кәсіпкерлік саласында 6211 адам жұмыспен қамтылса, өткен жылдың осы кезеңімен салыстырғанда 23,6 пайызға өсіп отыр.&nbsp;<blockquote>– Мемлекеттік бағдарламалармен бизнес жобаларды қаржыландыруда &nbsp;жыл басынан бері жалпы құны 2 млрд теңгеден асатын 165 жоба несиелендірілді. Оның ішінде «2021-2025 жылдарға арналған кәсіпкерлікті дамыту жөніндегі ұлттық жоба» негізінде несие сыйақысының бір бөлігін субсидиялау бойынша 42 жоба екінші деңгейлі банктермен, «Аграрлық несие корпорациясы» арқылы 69, «Қызылорда» Өңірлік Инвестициялық орталығы» арқылы 41, «Ауыл аманаты» бағдарламасымен 13 жоба несиелендірілді, – дейді бөлім басшысы Біржан Өмірзақов.&nbsp;</blockquote>Мемлекеттік бағдарламаның шарапатын көріп отырған Нұрғазы Қуанышұлы кәсіп ашумен қатар қасына інісі Мәдиді жұмысқа тартқан. Яғни 1 адамды жұмыспен қамтып отыр. Көлік техникаларымен жұмыс істеу – ерге лайықты қызмет дейміз. Кәсіпкерлікке ден қоя бастаған азаматтың бұл саладағы тәжірибесі 10 жылдың шамасын құрайды. &nbsp;Жастайынан техникаға жақын болған. Шаруашылықта жүргізушілік еткен. «Ортақ өгізден оңаша баспақ артық» дегендей, нарық заманында кәсіп ашып, бақ сынау да ер жігітке үлкен сын деп білетін оның ауыл тұрғындары іскерлігіне шек келтірмейді.&nbsp; «Орта арнаулы архитектор-құрылысшы мамандығын бітіргенмін. Бірақ бала күннен көлік жүргізіп, техникаға жақын болып өстім. Ауылда шаруашылықта 9 жыл көлік жүргіздім. Биыл кәсібімді ашуға бел будым» дейді жас кәсіпкер сөзін әрі қарай сабақтап. &nbsp;<blockquote>– Жалпы колледжде оқып жүргенде алдыма мақсат қойдым. Ауылдың қаладан қай жері кем. Көлік жууда өз-өзіне қызмет ететін нүкте &nbsp;қалалық жерде жетіп-артылады. Өзім осындай стансада 2 жыл жұмыс істедім. Қолымнан келетін шаруа. Неге ауылдан осындай орталық ашпасқа, деген идея сол кезде келген. 50, 100 теңгеге көлік иелері өз-өзіне қызмет етіп, көлігін тазалап жуып алмасқа. Қаржы көп кетпейді. Қолжетімді баға. Жұмысы бірер минут. Қолмен жуған көбіктетіп шашып жуғандай болмайды. Әр нәрсенің өз уақыты болады дейді ғой. Идеяны іске асыратын уақыт осы шығар деп, мемлекеттік бағдарламаны пайдаланып, кәсіп ашуға шешім қабылдадым. «Аграрлық несие корпорациясы» арқылы 2,5 пайызбен 3 млн теңге несие алып, ісімді бастадым. Құжат дайындауда маған ауыл әкімшілігінің қызметкерлері көмегін аяған жоқ. Бірлескен жұмыстың нәтижесінде кәсіп ашып, өзімізбен қоса, сырттан келетіндерге де қызмет көрсетудеміз. Кәсіптің өзін ақтайтынына сенемін және алда басқа да жоспарларымыз бар, – дейді мемлекеттік бағдарламаның шарапатын көруші жас.&nbsp;</blockquote>Нұрғазы секілді Дүр Оңғар ауылында кәсібін бастаған бірнеше азамат бар. Олардың бірқатары қайтарымсыз грант бойынша жеңімпаз атанса, бірқатары жеңілдетілген несиеге іліккендер.&nbsp;<blockquote>– Ауыл тұрғындарын қолдау мақсатында жүргізіліп жатқан «Ауыл аманаты» бағдарламасымен 2,5 пайыздық жеңілдетілген несие алуда 1 азаматымыз жүк тасымалына 4 млн теңге қаражат алса, 1 азаматымыз кондитер өнімін шығаруға 6,7 млн теңге және тағы бір тұрғын жобасын сәтті қорғап, 3 млн теңге қаржысын күтуде. 19-35 жас аралығындағы жастарды қолдауда жеңілдетілген несиемен қаржыландырылған ауыл тұрғындары Мұхтар Сәндібеков мал өсіру бойынша кәсібін бастаса, Нұрғазы Өтепов көлік жуу орталығын ашты. Сонымен қатар 2 азаматымыз 3-3,7 млн теңге көлемінде қаржысын күтуде. 1380 мың теңге көлеміндегі қайтарымсыз грант бойынша 8 үміткердің бизнес жобасы қолдау тапса, олардың алды жұмысын бастады. Биылға кәсіпкерлікпен айналысуға тілек білдірген 18 ауыл азаматының 10-ы жеңілдетілген несие алса, қалған &nbsp;8-інің 1380 мың теңге көлеміндегі қайтарымсыз грант бойынша қорғаған бизнес жобасы қолдау тауып, кәсіпке ден қойды. «Қызылорда» Өңірлік Инвестициялық орталығы» арқылы Ғани Ұзақбаев пен Мұрат Ешниязов жылқы малын және Рахметолла Тілесов мүйізді ірі қара басын көбейтуге несие алып, жұмыстарын жасап жатыр дейді, – дейді Әбимүсілім Қоқанов.</blockquote>

Жеңілдетілген несиенің көмегімен кәсібін дөңгеленткен дүроңғарлық азамат

<a href="https://kyzylorda-news.kz/">Kyzylorda-news.kz</a>. Қазіргі таңда кәсіп бастап өз нәпақасын табамын деген ниетті адамға мемлекет тарапынан қолдау көп. Кәсіпкерлердің бастамаларын қолдау үшін түрлі жеңілдетілген несие, қайтарымсыз грант қаражаттары беріліп отырады. Соның ішінде биылғы жылы жастарға арналған 2,5 пайыздық жеңілдетілген несие мен ауыл және шағын қала халқының әлеуетін көтеруге бағытталған «Ауыл аманаты » жобалары қолға алынды. Қала тұрғыны, кәсіпкер Жұлдыз Күшжанова «Ауыл аманаты» жобасы аясында 2,5 пайыздық жеңілдікпен несие алып, кәсібін дамытқан жандардың бірі. Жұлдыздың тың бастамасы жайлы мақалада толық айтатын боламыз.Бүгінгідей қарбалас тіршілікте кейде үй ханымдары ас дайындауға уақыт таппай жатады. Ондайда дәмханалардың дайын өнімдеріне тапсырыс бере салып, аш қарынды тойдыру ең оңтайлы шешім. Бірақ, ата дәстүрі мен ана жолын ұстанға қазақы отбасы үшін «қазан қайнау керек» деген ұғым тағы бар. Міне, осыны ескерген Жұлдыз Күшжанова өгізді де өлтірмей, арбаны да сындырмайтын жаңа кәсіпті қолға алды. Анығын айтсақ, ол жартылай дайын өнімдер шығаратын цехты іске қосты.&nbsp;<blockquote>– &nbsp;Арал аудандық жастар ресурстық орталғында жұмыс істедім. 2015 жылдан бастап кәсіпкерлікті қоса атқарып жүрмін. Кейін бала көтіміне байланысты декреттік демалысқа шыққан соң, мемлекеттік мекемедегі қызметімді біржола тоқтатып, кәсіпке ден қойдым. Бастапқыда жартылай дайын өнім шығару туралы ұсынысты ағам айтқан болатын. Ол кезде маған бұл мүмкін емес сияқты көрінді. Осы жылдың наурыз айында кенеттен, неге жасап көрмеске деген ой келді. Осылай үйден манты, тұшпара, самса, тоқаш сияқты біршама тамақты жартылай дайын күйінде жасап, әлеуметтік желі арқылы жарнамалап көрдім. Сол кезден бастап бұл кәсіп маған пайда әкеле бастады, - деп бастады Жұлдыз әңгімесін.&nbsp;</blockquote>Аз уақытта істің көзін тапқан келіншек, бұл кәсіп түрінің мол табысқа бастайтындығын түсінеді. Осылай кәсібіне бар жан тәніммен кіріседі. Ендігі мақсат кәсібін одан әрі кеңейту болады. Осыны ойлаған ол «Атамекен» кәсіпкерлер палатасының Аралдағы бөлімшесінің қызметіне жүгінгенге ұқсайдын.<blockquote>– Өзім қай кезде де, бір істі қолға алсам, соны шыңына шығарғанды жақсы көремін. Кәсіпте жетістікке жету үшін айналымда ақша болуы керектігі тағы бар. Тапсырыс көбейді. Енді уақытылы орындау үшін заманауи құрал-жабдықтар алу қажет болды. Осы сәтте «Ауыл аманат» жобасына құжаттар қабылданып жатқандығын естіп мен де бағымды сынап көрейін дедім. Сәтін салып комиссия менің жобамды мақұлдап, 2,5 пайыздық несие алдым. Бұл қаражатқа цехқа қажетті қондырғылар сатып алдым, - деді кәсіпкер.&nbsp;</blockquote>Қазіргі таңда Жұлдыз Күшжанованың «Адал ас» деп аталатын 12 түрлі жартылай дайын өнім шығаратын, цехы барлық талаптарға сай жұмыс істеп тұр. Жұлдыз екі адамды тұрақты жұмыспен қамтып отыр.&nbsp;<blockquote>– Өнімдер сақтауға ыңғайлы, санитарлық талаптарға сай етіліп арнайы қаптамалармен нарыққа шығарылып отыр. Тапсырыс берушілер де баршылық. Дүкендермен қоса, жеке адамдар да алып кетіп отырады. Өнімді табиғи таза еттен дайындаймыз. Құрамы үй жағдайындағы мәзірмен бірдей болғандықтан, дәмі де ерекше, - деді ол.&nbsp;</blockquote>Міне, істің көзін тапқан келіншек отбасындағы келіндік, аналы, жар ретіндегі міндеттерімен қоса, мемлекет қолдауының арқасында, кәсібін кеңейтіп, іскер әйелге айналып отыр. Әрекет еткен адамның берекелі тұрмыс кешетіндігін дәлелдей түскен Жұлдыздың алға қойған мақсат, жоспарлары да көп.

«Ауыл аманаты» жобасының арқасында кәсібін кеңейткен келіншек

<a href="https://kyzylorda-news.kz/">Kyzylorda-news.kz.</a> ҚР Тұңғыш Президенті – Елбасы Н.Назарбаев «Қазақстандықтардың әл-ауқатының&nbsp; өсуі:&nbsp; табыс&nbsp; пен тұрмыс сапасын арттыру» тақырыбындағы Жолдауында және мемлекет басшысы Қ.Тоқаев «Cындарлы қоғамдық диалог – Қазақстанның тұрақтылығы мен өркендеуінің негізі» атты халыққа арнаған Жолдауында біршама бағыттардың маңыздылығын атап өткен болатын. Солардың бірі – «Қарапайым заттар экономикасын» жеңілдікпен несиелендіру бағдарламасы. Бұл бағдарлама Елбасы Нұрсұлтан Назарбаевтың бастамасымен құрылған және мемлекет басшысы Қасым-Жомарт Тоқаевтың ерекше бақылауына алынғанын атап өткен&nbsp; жөн.Қазіргі таңда еңбекқор жандарға елімізде көп мүмкіндіктер жасалған. Тек әрекет қана әлденені өзгерте алады. Қиял-ғажайыпқа ерік беріп, қол қусырып экраннан көз жанарын алмай отырғандарды көргенде қарның&nbsp; ашады. Десек те өз кәсібін дөңгелетіп, көпке&nbsp; үлгі&nbsp; болып жүргендер&nbsp; қаншама.«Қарапайым заттар экономикасы» бағдарламасы шағын және орта кәсіп өкілдеріне көмек беруде. Біршама тетіктері бар бағдарламаны зейін қойып ұғынған жөн. Терминнің түпкі мағынасын түсінбей дал болып отырғандарға айтарымыз, ол – күнделікті халық тұтынатын тауарлар. Оған азық-түлік, киім, жиһаз, тұрмыстық техника да жатады. Қысқасы, әрбір қазақ қолданатын заттар. Аталмыш жоба аясында әлеуетті кәсіпкерлерді сүйемелдеу бойынша өңірімізде белсенді жұмыстар жүргізілуде.Қызылордалық кәсіпкер Гүлсара Прназарова – жастайынан мал шаруашылығына бейім болып, ерлермен қатар иық тіресе еңбек етіп жүрген нәзік жан. Оның ісі – көпке өнеге. Алғашында шағын кәсібін ашып, көп қиындықты көрген. Үлпілдек қар жамылып, қылышын сүйреп қыс келгенде шаруа қожалығында мехнатты күндер өткені сөзсіз. Дей тұрғанмен, өз ісіне мығым шаруаның адамына жаңбырдың шелектеп төпеп тұрғаны да, қараңғы түн қабырғасын қақырата сөгіп аспанда жасын ойнағаны да тосқауыл болмағаны анық.Шаруа қожалықтарына мемлекеттен көрсетілетін көмек көлемі де ауқымды. Гүлсара Прназарова өткен жылы 30 млн теңге қаржы алып, бір жыл болар-болмастан ісі ілгеріліп, 100-ден аса жылқы, 80 бас сиыр, 300-ден аса қой мен ешкіні құрап отыр. Олардың қатары күннен-күнге артуда. Асыл тұқымды мал шаруашылығына ерекше көңіл бөлген кәсіпкердің&nbsp; мақсаты – мал&nbsp; санын&nbsp; көбейту.– Қазір кәсібімнің барлық жағдайын жасадым. Бұрын төрт түлікті асырау едәуір қиынға соққан болатын. Ұзақ жылдар бойы жоспарлаған жұмысымның нәтижесін бағдарлама арқылы көрудемін. Сол себепті осы бағдарлама аясында қызмет етіп жүрген азаматтарға алғысымды білдіремін! Күндіз-түні жұмыс істеп, еліміздің дамуына барымызды саламыз, – деді мал&nbsp; шаруашылығының&nbsp; шебері.Ел қазынасын байытуға бағытталған жоба жеңілдетілген несие беруді көздейді. Мемлекеттік&nbsp; субсидиялардың&nbsp; көлемі&nbsp; жыл өткен сайын артып келеді. «Тәуекел түбі – желқайық» демекші бір іске жүрегі дауаламай тұрған азаматты қайрау мақсатында құрылған бұл жоба импортқа тәуелділікті азайтуды шешпек. «Қарапайым заттар экономикасын» дамыту – бұл ішкі нарықты отандық тауарлармен молықтыру, өндеу өнеркәсібінің бәсекеге қабілеттілігін ынталандыру. Ең бастысы, халық тұтынатын&nbsp; тауарлардың&nbsp; кең&nbsp; номенклатурасын&nbsp; шығару.«Қазақ жұрты мал бағуға жалпы шебер» деп Әлихан Бөкейханов айтып кеткен екен. Сырдың еркесі Гүлсара кәсіпкер&nbsp; де қазақтың төрт түлік малын асылдандыру керектігіне ерекше назар&nbsp; аударған. Ол – төрт түлікті бағып-қаққан теңдессіз тәжірибесі бар жан. Жүйелі жұмыс келешекте көрсеткіштері елеулі өсіп, оң&nbsp; нәтижесін&nbsp; беретініне&nbsp; сенеміз.

«Қарапайым заттар экономикасы» бағдарламасы арқылы кәсіп ашқан

&nbsp; Осыдан алты мың жыл бұрын сақар мен майдың қосындысынан сабын жасалған. Оны ғалымдар дәлелдеген. Тіпті сабын туралы Рим кезіндегі дәрігер Галенның шығармаларында да жазылған көрінеді. Кесекке ұқсас қатты көрінгенмен суға салғанда ери түсетін сабын өндірісі XIX ғасырда сода түрі табылып, сабынды көп мөлшерде өндіре бастаған. Өзге елдің емес, отандық өнімді қолдану үшін сабын шығаруды қолға алған, оның ішінде &nbsp;Қызылорда да сабын шығарып отырған кәсіпкерлер бар. Соның бірі – кәсіпкер Дәулет Ізбасарұлы. Отыздан енді асқан жігіт кәсіпке қалай келгенін айтып берді.&nbsp; &nbsp; &nbsp; &nbsp; – Он жылдың ішінде мемлекеттік қызмет пен бюджеттік мекемеде жұмыс істедім. Кейін кәсіпкер болуды шештім. Себебі өзімнің «бір қызметте 3-4 жылдан артық жұмыс істеуге болмайды» деген қағидам бар. Осы қағиданы ұстанып, кәсіпкер жолын таңдадым. Жалпы адам баласы жан-жақты ізденіп, барлық саланың қыр сырын білуі тиіс. Бірақ барлық салада жұмыс істеп көру &nbsp;тұрақсыздыққа айналып кетпеуі керек, – дейді кәсіпкер.&nbsp; &nbsp; &nbsp; &nbsp; &nbsp;Кейіпкеріміз 2019 жылы &nbsp;кәсіп бастар алдында той ұйымдастыру орталығында қызмет көрсету бағытында жүрген. Бір жылдан кейін өндірістік «Әділет» дара кәсіпкерлігін құрып цех ашқан.&nbsp; &nbsp; &nbsp; &nbsp; – 2020 жылы барлығымызға белгілі әлемде падемия басталды. Артынша барлық елдердің шекарасы жабылып, блок бекеттер қойылып сырттан тауарлар келмеді. Келген күннің өзінде де қиындықтар орын алып жатты. Сол кезде қандай өндіріс жасаймыз деп&nbsp;ойлана келе өндірістік өнімді өзіміз жасап шығаруды қолға алдық. Осылайша алғашқылардың бірі болып, адамның гигиеналық тұрғыда қажет ететін сабын өнімін шығаруды бастадым, – дейді Дәулет Ізбасарұлы.&nbsp; &nbsp; &nbsp; &nbsp; 2021 жылы «Бизнестің жол картасы – 2025» мемлекеттік бағдарламасы аясындағы грантқа қатысқан жас кәсіпкер 4,5 млн теңге қаржыға ие болып, «Ақниет» атты кір жуғыш ұнтағын шығарған.&nbsp;Бұған дейін «Таза» сабын атауына сәйкес «Таза ұнтақ» атауымен шығаруды жоспарлаған кәсіпкер не себепті «Ақниет» деп өзгерткенін де мәлім етті.&nbsp; &nbsp; &nbsp; &nbsp; – Алғашында «Таза ұнтақ» атты кір жуғыш болатын. Кейін қызымыз дүниеге келгеннен кейін «Таза ұнтақты» сол қызымыздың атына «Ақниет» деп өзгерттік. Қазіргі таңда осы «Таза» сабыны мен «Ақниет» атты кір жуғыш ұнтағын шығарудамыз. Мұнда сегізге жуық адам жұмыс істейді,&nbsp;– дейді кейіпкеріміз.&nbsp; &nbsp; &nbsp; &nbsp; Сабын цехын бізге таныстырған кәсіпкер сабынды шығару барысы қарапайым болғанымен, жұмыстың күрделі жағы да бар екенін жеткізді.&nbsp; &nbsp; &nbsp; &nbsp; Жас кәсіпкер сабынның шикі затын шығару үшін жергілікті өнімдерді қолданады. Оның ішінде сиырдың іш майы мен күнбағыс майы, яғни табиғи өнім. Ал кір жуғыш ұнтаққа қолданатын шикі заттың басым көпшілігін Ресей мен Қытайдан алдырады. Осылайша күніне сабынның грамына қарай үш түрін 1000 данадан жасаса, кір жуғыш ұнтақтан 80 келі шығарады.&nbsp; &nbsp; &nbsp; &nbsp; Жалпы «Әділет» дара кәсіпкерлігі қала көлемінде өткізілетін жәрмеңкеге қатысып, өзінің өнімдерін ұсынып келеді. Содан бері отандық өнімге деген сұраныс артып келеді.&nbsp; &nbsp; &nbsp; &nbsp; Одан бөлек &nbsp;Ұлытау, Қарағанды Астана қалаларына да жібереді. Себебі &nbsp;онда өнімдердің өзіндік тұтынушылары бар. Осындай мәлемтке қанық болған біз жас та болса, бас болып, үлкен істі қолға алған Дәулеттің ісіне сүйсіндік, тіпті тәнті болдық.<img src="https://knadmin.beoblood.kz/uploads/0ab1d46f_e791_4bd3_ae41_499674f82e0a_ea42fc21d2.jpg" alt="0ab1d46f-e791-4bd3-ae41-499674f82e0a.jpg">

Қазақстан және Қызылорда облысының жаңалықтары: Кәсіпкерлік