<a href="https://kyzylorda-news.kz/">Kyzylorda-news.kz.</a> Қызылордағы Назарбаев Зияткерлік мектебінде «Туған елге тағзым» өлкетану-зерттеу экспедициясы мәресіне жетті. Алты күн бойы мектептің 9-сынып оқушылары Сыр өлкесіне саяхаттап, туған жердің ғажайыптарымен танысты.
Сырдария өзенінің бойында орналасқан үш көне мемлекет – Қыпшақ хандығының астанасы – Сығанақ, Оғыздардың мекені – Янгикент және Қоқан ханы салғызған Ақмешіт бекінісінің қалыптасу кезеңдерін көзбен көру үшін қатысушылар экспедицияның әрбір күнінде жүздеген шақырым жерді жүріп өтті.
Бағдарлама бойынша Қызылорда облысының Қазалы, Қармақшы, Шиелі және Сырдария аудандарына саяхаттар ұйымдастырылып, сол жердегі тарихи нысандармен және киелі орындармен таныстырылды. Жас зерттеушілер құнды деректерден сыр шертетін аймақтарды аралап, болашақ зерттеу жұмыстарына қажетті тың мәліметтерді жинақтады.
Экпедицияның алғашқы күні – Қазалы ауданының тарихи-өлкетану музейінен басталды. Оқушылар аудан тарихын бейнелейтін залдарда болып, көне жәдігерлерді тамашалады. Қоқандарға қарсы тұрып, ұлт-азаттық көтерілісінің қолбасшысы болған Жанқожа батырға арналған кесенесіне барып, тұлғаның өмірі туралы құнды деректерден танымдық-тәрбиелік білім алды. Содан соң елдік мұрат жолында ерлігімен танылған Ғани Мұратбаевтың мемориалдық музейіне экскурсия жасады. Жарты ғасырға жуық тарихы бар орталықта оқушылар қоғам қайраткерінің балалық шағынан бастап, оның білім алған кезеңдері, қоғамдық істерге атсалысу жолындағы атқарған жұмыстары жайлы тың мәліметтер жинақтады.
<blockquote>
 «23 жыл ғана өмір сүрген Ғани Мұратбаевтың жастардың болашағы үшін жасаған ерен еңбегіне тәнті болдым. Әсіресе ата-анасыз қалған балалардың білім алуы үшін интернат үйіне жатқызып, қоғамдық істерге араласуына дейін қолдау жасаған еңбегімен елдің ерекше құрметіне ие болған. Бүкіл қазақ жастарының басын қосып, қоғамдық-саяси істерге араласуына себепкер болған тұлға Ғани ағамыздың Сыр өңірінен шыққаны мақтаныш сезімін оятты», – дейді жас экспедицияшы Айхан Орынбай.
</blockquote>
«Рухани жаңғыру» жолымен жас өрендер кезінде Хиуа мен Қоқан саудагерлері қоныстанған Ғанибайдың керуен сарайында, одан кейін кітапханаға айналған мәдени ескерткіште болып, атақты саяхатшы Семенов-Тян-Шанский сыйға тартқан кітаптармен танысты.
VII ғасырда өмір сүрген тұтас түркі халқының ардақ тұтар абызы – Қорқыт бабаның кешені де экспедициялық топтың ерекше назарына ілікті. Дала данагөйінің өмірі мен тіршілігін бейнелейтін қасиетті ескерткішті аралап, сан ғасырлық тарихқа көз жүгіртті. Оқушылар 12 метрлік қобыз тәрізді ерекше құрылысты тамашалап, соққан желге үн қосатын қобызда орындалатын әдемі әуенді тыңдап, мәңгілік өмір өнерде ғана болады деген философияны әкелген Қорқыт жайлы қызықты деректермен танысты.
<blockquote>
 «Бұл сиқырлы әуенді естігенде, өзінің сүйікті аспабы – қобызда Қорқыттың ойнап тұрған сәті көз алдымызға шығады және бұл сазды дыбыс келушілерге ерекше әсер қалдырады», – дейді 9-сынып оқушысы Сырсұңқар Базарбайұлы.
</blockquote>
Мемориалдық кешенде орналасқан мұражайдағы экспонаттар арқылы жас зерттеушілер Қорқыт бабаның дәуіріне қайта оралды.
ТЕТ маршруты бойынша жас зерттеушілер бірнеше ғасырлар бұрын тасқа салынған таңбалы суреттер сақталған Сауысқандық шатқалында болды. Мұндағы тас дәуірінен қалған «сурет галлереясы» Қазақстан жерінде табылған ең көне тарихи ескерткіш. Оқушылар тау жоталарының түзілістері мен топырағына зерттеу жүргізіп, ежелгі адамдардың мәдениетін бейнелейтін ескерткіштердің сырына қанықты.
<blockquote>
 «Антропогенді, техногенді және табиғи факторлар петроглифтердің жойлуына әсер етуде. Сондай-ақ шатқалының қасында орналасқан ванадий өндіру процесі де кері әсерін тигіуде. Сондықтан тез арада жойылудан қорғау кешенді шараларын қолдану қажет» , – дейді экспедицияның қатысушысы Уәлихан Ибадулла.
</blockquote>
Әрі қарай топ мүшелері көне тарихтың теңдессіз ескерткіші, ортағасырлық Сауран қалашығына табан тіреді. Ақ орданың астанасы болған Ұлы жібек жолындағы ірі сауда орталығы ретінде тарихта сақталған. Жас экпедицияшылар қалашық орында қираған қамалдан қалған үйінділерді зерттеп, шахардың архитектурасымен танысты.
Сонымен бірге оқушылар Қазақстанның ең көрікті әрі абаттандырылған ауыл – Нағи Ілясов елді-мекенінде болып, өркендеген ауыл халқының әлеуметтік-экономикалық жағдайымен танысып, ауыл орталығындағы су бұрқақтарды тамашалады. Ал Қызылорда облысының орталығында оқушылар әртүрлі салалардағы зауыттарға барып, өңірдің өндірістік-экономикалық дамуы жайлы деректер жинады.
Облыстық тарихи-өлкетану мұражайы, «Ақмешіт» музейі, «Көркем сурет галлереясы», «Рухани жаңғыру» орталықтарында орналасқан тарихи жәдігерлер қатысушылардың білімдерін толықтырып, туған жеріне деген құрмет сезімдерін оятты.
<blockquote>
 «Ежелден Сыр өлкесі тарихи мекен екенін дәлелдейтін бұл жобада оқушылар Отанға деген сүйіспеншіліктерін арттырып қана қоймай, ғылымға бет бұрып, зерттеушілік дағдыларын дамытты», – дейді экспедициялық топ жетекшісі, қазақ тілі мен әдебиеті пәнінің мұғалімі Гаухар Мананбай.
</blockquote>
<img src="https://kyzylorda-news.kz/wp-content/uploads/2022/06/290613687_3127354184261161_8255069535397541632_n.jpg" alt="" />
<img src="https://kyzylorda-news.kz/wp-content/uploads/2022/06/290905830_3127354090927837_6687324184742456900_n.jpg" alt="" />

«Туған елге тағзым» өлкетану-зерттеу экспедициясы мәресіне жетті

<a href="https://kyzylorda-news.kz/">Kyzylorda-news.kz.</a>&nbsp;Қорқыт ата атындағы Қызылорда университетінде Ахмет Байтұрсынұлының 150 жылдығына арналған «Алаш қайраткерлерінің Қызылорда кезеңі және А.Байтұрсынұлы» атты халықаралық ғылыми- тәжірибелік конференция өтті.
Жиынға шетелдік және отандық ғалымдар, университеттің профессор-оқытушылар құрамы мен қызметкерлері қатысты. Сонымен қатар, Zoom платформасы арқылы да баяндамалар оқылып, тікелей эфирде ел назарына ұсынылды.
Конференцияны Қорқыт ата атындағы Қызылорда университетінің Басқарма Төрағасы – Ректоры Бейбіткүл Кәрімова жүргізіп, қазақ елінің жарқын болашағы үшін күрескен Алаш арыстарының еңбегі туралы кеңінен атап өтті.
<blockquote>
 «Алаш арыстары өз халқының алдында перзенттік парызын адал атқарған тұлғалар. Алаштық ұстаным қашанда елдің өсуі мен өркендеуінің қайнар бұлағы. Әрдайым солай болып қала береді. 
 1918 -1920 жылдары егеменді сыртқы саясатын жүзеге асырған Алаш Орда үкіметі қызмет еткені белгілі. Жақында көрнекті Алаш қайраткері Райымжан Мәрсековтің 1919 жылғы қаңтарда Алаш Орда үкіметінің атынан Жапон үкіметіне «егеменді Алаш республикасын мойындау, екіжақты қарым-қатынас орнату және жас Қазақ мемлекетіне көмек беруді» өтінген хаты табылды. Хатта сонымен қатар, Алаш Орданың Ұлттар лигасының жарғысы талқыланатын Париждегі бейбіт конференцияға өз өкілін жолдамақ жоспары айтылған. Тұңғыш мәжілісі 1920 жылдың қаңтарында өткізілген Париж конференциясына Алаш Орданың өкілі ретінде Мұстафа Шоқай қатысқан», – деді Бейбіткүл Сәрсемханқызы.
</blockquote>
Жиында ұлт ұстазы, қазақ тіл білімі мен әдебиеттану ғылымының негізін салушы ғалым, ұлттық жазудың реформаторы, түркітанушы, публицист, аудармашы, ақын, қоғам және мемлекет қайраткері, ағартушы, Алаш арысы Ахмет Байтұрсынұлының өмір жолы мен еңбектері туралы кеңінен айтылды. Ғалымдар «Ахмет Байтұрсынұлы және Алаш мұрасы», «Алаш қайраткерлерінің Қызылорда кезеңі», «Ахмет Байтұрсынұлының түркологияға қосқан үлесі», «Ахмет Байтұрсынұлының әдебиеттану ғылымындағы орны», «Ахмет Байтұрсынұлының тіл білімі ғылымындағы орны» бағыттары бойынша баяндамалар жасады.
Конференцияда тіл білімінің мамандары қазақ тілінің қолданылуы аясы, әліпби туралы да сөз қозғады. Айталық, Қорқыт ата атындағы Қызылорда университетінің Қазақ тілі мен әдебиеті және журналистика кафедрасының доценті Болат Боранбай «Жазу мен сөйлеу тек тілші әдебиетшіге ғана емес барлық адамдарға керек. Оқушыны сол дұрыс сөйлеу мен жазуға үйрететін пән – Қазақ тілі. Сондықтан қазақ тілінің сағат саны әдебиеттен көп болу керек» деген пікірін білдірді.
Айта кету керек, жиынға ҚР ҰҒА академигі, филология ғылымдарының докторы, Л.Гумилев атындағы Евразия ұлттық университетінің профессоры Шерубай Құрманбайұлы, филология ғылымдарының докторы, профессор, М.Әуезов атындағы Әдебиет және өнер институтының бөлім меңгерушісі Айгүл Ісмақова, филология ғылымдарының докторы, Қажы Байрам университетінің профессоры Хулия Касапоглу, тарих ғылымдарының докторы, Қ.А.Ясауи атындағы Халықаралық қазақ-түрік университетінің профессоры Тұрсұн Хазіретәлі, филология ғылымдарының докторы, тарих ғылымдарының кандидаты, профессор, Қорқыт ата атындағы Қызылорда университетінің Гуманитарлық-педагогикалық институтының директоры Сағат Тайман қатысты.
Шара барысында Алаш қайраткерлерінің Қызылорда кезеңі және Ахмет Байтұрсынұлы туралы зерттеу еңбектері жинақталған кітап көрмесі таныстырылды.
<img src="https://kyzylorda-news.kz/wp-content/uploads/2022/06/p1922341-scaled.jpg" alt="" />

Ахмет Байтұрсынұлының 150 жылдығына арналған халықаралық конференция өтті

<a href="https://kyzylorda-news.kz/">Kyzylorda-news.kz.</a> Мектеп мұғалімдеріне еңбек демалысының ақысы мен денсаулықты сауықтыру жәрдемақысын уақтылы төлемеу мәселесі «AMANAT» партиясы жанындағы Білім беру және денсаулық сақтау мәселелері жөніндегі республикалық қоғамдық кеңестің кезектен тыс отырысында қаралды.
«AMANAT» партиясының Хатшысы Жігер Қалиевтің айтуынша, орын алып отырған жағдай мемлекеттің педагогтарды қолдау үшін жұмсаған бар күш-жігерін зая кетіреді.
<blockquote>
 «Мәжіліс депутаттары мен партияның аймақтардағы қоғамдық қабылдау бөлмелеріне мектеп мұғалімдерінен еңбек демалысының ақысы мен сауықтыру жәрдемақысының толық және уақтылы төленбеу фактілері бойынша көптеген шағым келіп түсті. Партия мүшелерінің 30%-дан астамы – білім беру саласының өкілдері. Сондықтан бүгін біз партия алаңына өкілетті министрліктердің өкілдерін шақырдық және бейнеконференця байланысы арқылы барлық өңір қосылып отыр», – деді Жігер Қалиев.
</blockquote>
Бейнеконференця байланысы арқылы өткен жиынға өңірден партияның облыстық филиалының Атқарушы хатшысы Ләйлә Төрешова, партияның облыстық филиалы жанындағы «Білім беру және денсаулық сақтау» мәселелері жөніндегі қоғамдық кеңес төрағасының орынбасары Гүлнар Есқалиева және облыстық білім басқармасының басшысы Ділда Момбек қатысты.
Алқалы жиында мәселенің түп-тамырына үңіліп, оны жүйелі түрде шешу жолдары жан –жақты талқыланды.
<img src="https://kyzylorda-news.kz/wp-content/uploads/2022/06/2a785b7d-67b0-4b87-b272-75de29dafe22.jpg" alt="" />
<img src="https://kyzylorda-news.kz/wp-content/uploads/2022/06/3a8761a7-5499-4e55-91e7-d477c070ce6c.jpg" alt="" />

Мұғалімдерге еңбек демалысының ақысы уақытылы төленуі тиіс

<a href="https://kyzylorda-news.kz/">Kyzylorda-news.kz.</a>&nbsp;Оқушылардың бос уақытын тиімді ұйымдастыру және түрлі деңгейдегі сайыстар мен ҰБТ-ге дайындығын пысықтау мақсатында жазғы лагерьлер маусымдық кезде ғана емес, жыл бойы жұмыс істеуі керек.
Аймақ басшысы бұған дейін Шиелі ауданына жасаған жұмыс сапары барысында осы мәселені назардан тыс қалдырмауды тапсырып, тынығу лагерлерінің материалдық-техникалық базасын жаңартуға, оқушыларға жасалатын жағдайды оңалтуға қолдау көрсетілетінін айтқан еді.
Арал ауданына жұмыс сапары аясында облыс әкімі «Қамбаш» олимпиадалар және қосымша білім беру орталығының жұмысымен танысып, лагерьде тынығушы балалармен пікірлесті.
Мұнан соң, орталықтағы конференц зал, жаттығу бөлмесі, бассейн, жатын бөлмелерді көріп, жауапты сала басшысына балалар үшін барынша қолайлы орта қалыптастыру керектігін тағы бір қаперге салды.
«Қамбаш» олимпиадалар және қосымша білім беру орталығы 2014 жылы пайдалануға берілген. 1 ауысымда 130 бала қамтылады. Орталық балалардың жазғы демалысын қамтамасыз етумен қатар, мектеп бітіруші түлектерді ҰБТ-ге дайындайды.
<img src="https://kyzylorda-news.kz/wp-content/uploads/2022/06/289315488_1382962792206922_7211317644211613602_n.jpg" alt="" />
<img src="https://kyzylorda-news.kz/wp-content/uploads/2022/06/288287955_1382962935540241_3792954194210375283_n.jpg" alt="" />
<img src="https://kyzylorda-news.kz/wp-content/uploads/2022/06/288194241_1382962882206913_371566576529676542_n.jpg" alt="" />
<img src="https://kyzylorda-news.kz/wp-content/uploads/2022/06/289566924_1382962805540254_731181212092568449_n.jpg" alt="" />

Нұрлыбек Нәлібаев: Тынығу лагерьлері жыл бойы жұмыс істеуі керек

<a href="https://kyzylorda-news.kz/">Kyzylorda-news.kz.</a>&nbsp; Облыс әкімі Арал ауданына сапары барысында Жіңішкеқұм ауылында орналасқан №248 орта мектебіне барды.
Ғимарат облыстық құрылыс, сәулет және қала құрылысы басқармасының тапсырысымен салынып, 2015 жылы пайдалануға берілген. Дегенмен, 140 орындық мектеп екі жыл бұрын «NTDK Group» ЖШС-ның техникалық қорытындысына сәйкес техникалық жай-күйі апаттық жағдайда деп танылған. Мектептің спорт залы жарамсыз күйге еніп, бірнеше бөлмелердің қабырғалары жарылған.
Апатты деп танылған білім ошағының жағдайымен танысқан аймақ басшысы мердігерге құрылысты сапалы әрі жыл аяғына дейін аяқтауды тапсырды.
<blockquote>
 «Мектеп құрылысының салынғанына небәрі 6 жыл болғанына қарамастан, қазіргі күйі балалардың білім алуына қауіп төндіріп тұр. Бұл мәселені жеке инвестор арқылы шештік, жаңа мектеп құрылысын бастаймыз», – деді облыс әкімі.
</blockquote>

Арал ауданы: Жіңішкеқұм ауылындағы апатты мектептің мәселесі шешілді

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткелік мектебінің оқушылары үшін «Туған елге тағзым» өлкетану-зерттеу экспедициясы Қазалы ауданынан бастау алды.
Экпедицияның алғашқы күні – Қазалы ауданының тарихи-өлкетану музейінен басталды. Оқушылар аудан тарихын бейнелейтін залдарды аралап, көне жәдігерлерді тамашалады.
Қоқандарға қарсы тұрып, ұлт-азаттық көтерілісінің қолбасшысы болған Жанқожа батырға арналған кесенесіне барып, ата-бабаның рухына құран бағыштады. Қазақ халқының жадында өшпес із қалдырған тарихи тұлғаның өмірі туралы құнды деректермен танысып, жасаған ерліктері жайында танымдық-тәрбиелік білім алды.
Содан соң елдік мұрат жолында ерлігімен танылған Ғани Мұратбаевтың мемориалдық музейіне экскурсия жасады. Жарты ғасырға жуық тарихы бар орталықта оқушылар қоғам қайраткерінің балалық шағынан бастап, оның білім алған кезеңдері, қоғамдық істерге атсалысу жолындағы атқарған жұмыстары жайлы экпозициялық залдарда болып, теңдесі жоқ құжаттар, хаттар мен фотосуреттерден зерттеуге қажет тың мәліметтер жинады.
<blockquote>
 Жас экспедицияшы Орынбай Айхан: «23 жыл ғана өмір сүрген Ғани Мұратбаевтың жастардың болашағы үшін жасаған ерен еңбегіне тәнті болдым. Әсіресе ата-анасыз қалған балалардың білім алуы үшін интернат үйіне жатқызып, қоғамдық істерге араласуына дейін қолдау жасағанынан елдің ерекше құрметке ие болуының себебін түсіндім. Бүкіл қазақ жастарының басын қосып, қоғамдық-саяси істерге араласуына себепкер болған тұлға Ғани ағамыздың Сыр өңірінен шыққаны мақтаныш сезімін оятты», – дейді.
</blockquote>
«Рухани жаңғыру» жолымен жас экспедицияшылар кезінде Хиуа мен Қоқан саудагерлері қоныстанған Ғанибайдың керуен сарайында, одан кейін кітапханаға айналған мәдени ескерткіште болып, атақты саяхатшы Семенов-Тян-Шанский сыйға тартқан кітаптарымен танысты. Сыр өңіріндегі мәдени-рухани мұралардың тарихымен танысты.
<blockquote>
 «Маған ерекше әсер қалдырған ең құнды ақпарат – ол өңіріміздегі ең алғашқы кітапхана. Бұл жерде кітаптардың алтын қоры сақталған. Ең алғашқы кітап 1914 жылы славян тілінде жазылған. Өзге ұлттардың өзі біздің тарихымызды зерттеген, сондықтан біз туған еліміздің тарихын терең білуіміз қажет»,– дейді экспедицияға қатысушы Жауhар Бекберген.
</blockquote>
<img src="https://kyzylorda-news.kz/wp-content/uploads/2022/06/9484ced1-b677-4717-85cf-01baf80a6555.jpg" alt="" />
<img src="https://kyzylorda-news.kz/wp-content/uploads/2022/06/6c7f272b-b229-4719-9dd8-345b1f723896.jpg" alt="" />

ТЕТ-2022: Сыр өңіріндегі алғашқы кітапхана

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде шетелдік ғалымдардың қазақстандық жас ғалымдарға арналған дәрісі басталды.
Осыдан бірнеше ай бұрын университет АҚШ елшілігі қаржыландырған «Қазақстан аумағындағы жоғарғы оқу орындарында экология және қоршаған орта ғылымдар саласында негізгі оқу бағдарламаларын дамыту» жобасының грант иегері атанған еді.
Жоба АҚШ – Қазақстан университеттерінің ынтымақтастығы бағдарламасы аясында жүзеге асырылуда. Жоба үйлестірушісі – Мичиган мемлекеттік университетінің (АҚШ) профессоры Джихуан Чен.
Жобаның мақсаты – қазақстандық жоғары оқу орындарында экология және қоршаған орта саласындағы білім беру бағдарламасының мазмұнын жетілдіру. Сондай-ақ, педагогикалық шеберлікті арттыру, экология және қоршаған орта саласындағы сараптамалық білімді дамыту. 
Қазіргі уақытта отандық және шетелдік жоғары оқу орындарының ғалымдары профессор Чен бастаған он күндік танымдық семинарға, сонымен қатар Қызылорда облысының аумағындағы далалық жұмыстарға қатысуда.
Жас ғалымдарға 10 күн бойы Мичиган мемлекеттік университеті, Джорд Вашингтон, Оңтүстік Дакота, Майн және Нью-Йорк қаласындағы Пэйс университетерінің профессорлары, ҚазҰАЗУ тұрақты егіншілік орталығының мамандары офлайн және онлайн форматта дәріс оқиды.
Сондай-ақ, жас зерттеушілердің НАСА ғарыштық агенттігінің Қазақстандағы және Орталық Азиядағы қазіргі және келешектегі жобаларына қатысуға мүмкіндіктері бар.
Айта кетейік, жобаға Қорқыт ата атындағы Қызылорда университетімен қатар Қазақ ұлттық аграрлық зерттеу университеті, І.Жансүгіров атындағы Жетісу университеті, Қ.А.Яссауи атындағы Қазақ-Түрік университеті, М.Әуезов атындағы Оңтүстік-Қазақстан университеті, С.Сейфуллин атындағы Қазақ агротехникалық университеті, М.Х.Дулати атындағы Тараз университеті және Қ.Жұбанов атындағы Ақтөбе өңірлік университеті, А.Бараев атындағы астық шаруашылығы ғылыми-өндірістік орталығының жас ғалымдары қатысуда.
<img src="https://kyzylorda-news.kz/wp-content/uploads/2022/06/289403064_2594850187319058_9204151682561538988_n.jpg" alt="" />

Америкалық ғалымдар Қызылордада дәріс беріп жатыр

<a href="https://kyzylorda-news.kz/">Kyzylorda-news.kz.</a>&nbsp;Арал ауданының әкімі Серік Сермағамбетов бірқатар нысандарды аралап, атқарылып жатқан жұмыс барысымен танысты.
Алдымен Арал қаласындағы №1 мөлтек ауданындағы насосты су айдау стансасында болды. Аталған нысан арқылы осы шағын ауданға су жеткізіліп, жаңа ауыл, автобаз мөлтек аудандарына берілетін ауыз су қысымы арттырылуда. Мұнда 2 дана 300 кубтық су сақтайтын резервуар, кезекпен сағатына 160 куб су айдайтын 3 насос орнатылған.
Аудан басшысы жауапты мамандарға мұндағы әрбір жұмысқа мұқият болу қажеттігін айтып, насосты станса арқылы су қысымы арттырылған мөлтек аудандардағы тұрғын үйлерді аралап, қазіргі өзгешелікті білуді тапсырды.
Мұнан Сексеуіл кентіндегі «Ауыл – Ел бесігі» бағдарламасы аясында орталық көшеге жүргізіліп жатқан орташа жөндеу жұмыстарының барысын көрді. Кенттегі темір жол өткелінен бастап № 231 орта мектебіне дейінгі аралықтағы 3,4 шақырым автокөлік жолы жөнделуде. Қазіргі таңда 2 шақырым жолға асфальт жабындысы төселіп, мердігер мекеме тарапынан тиісті жұмыстар жалғасуда.
Жол жөндеу жұмыстарына куә болған аудан әкімі мердігер мекеме өкіліне бірқатар кемшіліктерді көрсетіп, толықтай жөнге келтіру керектігін айтты. Сонымен бірге барлық жұмыстардың сапалы жүргізіліп, уақытылы аяқталуын тапсырды.
Ал кент әкіміне көшені жарықтандыру мен жаяу жүргіншілер жолын салу үшін жоба әзірлеуді жүктеді.
Одан соң Жіңішкеқұм ауылдық округіне қарасты Тоқабай елді мекеніндегі №248 мектеп ауласында ауыл ардагерлерімен кездесті. Елді мекендегі өзекті мәселе мектеп ғимараты апатты жағдайда деп танылғандықтан пайдаланылмай тұрған еді.
Соған сәйкес облыстық басқармалар арқылы толық зерделеу жұмыстары жүргізіліп, нәтижесімен ғимарат бұзылып орнына жаңа нысан салынатыны жөнінде шешім қабылданған болатын. Қазіргі таңда демеушілік есебінен анықталған мердігер мекеме мектеп ғимаратын бастап бұзуда. Аудан басшысы мердігер мекеме өкіліне барлық техникалық қауіпсіздік шараларын қатаң сақтап, тиянақты түрде жұмыс жүргізу қажеттігін айтты. Ауыл ардагерлері балалар игілігі үшін жаңа мектеп салынатындығына қуанышты екендіктерін білдіріп, ризашылықтарын жеткізді.
<img src="https://kyzylorda-news.kz/wp-content/uploads/2022/06/288973102_3293468684314828_8099263769367711487_n.jpg" alt="" />
<img src="https://kyzylorda-news.kz/wp-content/uploads/2022/06/288943354_3293468327648197_2466442086915744197_n.jpg" alt="" />

Аралдағы Тоқабай елді мекенінде жаңа мектеп салынатын болды

Kyzylorda-news.kz. Бүгін Қызылорда қаласы Жәлел Қизатов атындағы №23 мектеп-лицейінің түлектеріне облыстық білім басқармасы басшысының міндетін атқарушы Бағдат Бердаулетов аттестат табыстады.
Аталған білім ошағы 1984 жылы құрылып, 2009-2010 оқу жылынан бастап мектеп-лицей мәртебесіне ие болған. Бүгінде 40 жылға жуық тарихы бар бұл білім ордасында 91 түлек жаңа өмірге қанат қағуда. Мемлекеттік аттестаттаудың қорытындысы бойынша оның 9-ы «Алтын белгі» және тағы да 9-ы «Үздік аттестат» иегері атануда.
Мерекелік шараға қатысқан Бағдат Камбозұлы мектеп бітіруші түлектерді құттықтап, 18 оқушыға «Алтын белгі» және «Үздік аттестат» табыстады.
<blockquote>
 «Құрметті түлектер, сіздерді 11 жыл алған білімдеріңізді куәландыратын құжат Аттестат алуларыңызбен шын жүректен құттықтаймын. Бүгінгі жас түлектеріміздің әрқайсысы осы алтын ұя мектептерінде 11 жыл оқып, сапалы білім мен саналы тәрбие алып, «Өмір» атты үлкен теңізге аяқ басуда. Әрине, бұл өмірдің талай кедір-бұдырлары болатыны сөзсіз. Бұл ретте мектеп қабырғасында алған білімдеріңіз осы жолда сенімді серік болады деп сенемін. Баршаңыз Ұлттық бірыңғай тестілеуде жақсы нәтиже көрсетіп, өздеріңіз таңдаған мамандықтарыңыз арқылы білім алып, осы дүниенің бір кірпіші болып орындарыңызды табуларыңызға тілектеспін. Бар білімдеріңізді Жаңа Қазақстанның, туған жерлеріңіз Сыр өңірінің өсіп-өркендеуіне жұмсап, үлкен жетістікке жете беріңіздер», – деді Бағдат Камбозұлы.
</blockquote>
Айта кетейік, биыл Қызылорда облысы бойынша мектепті 7505 оқушы бітіріп, 6404 түлек Ұлттық бірыңғай тестілеуде бағын сынауда. Сондай-ақ, негізгі орта білім туралы аттестатты алатын, яғни 9 – сыныпты бітірушілер саны – 14 543 оқушы. Оның ішінде «Үздік аттестат» иегерлер саны – 1 765. Ал, 11 сыныпты бітіруші түлектер саны – 7 506 болса, оның 415-і «Алтын белгі», 804 оқушы «Үздік аттестат» иегерлері атануда.
<img src="https://kyzylorda-news.kz/wp-content/uploads/2022/06/img-20220616-wa0009.jpg" alt="" />
<img src="https://kyzylorda-news.kz/wp-content/uploads/2022/06/img-20220616-wa0017.jpg" alt="" />
<img src="https://kyzylorda-news.kz/wp-content/uploads/2022/06/img-20220616-wa0018.jpg" alt="" />

Қызылордалық түлектерге аттестат табысталды

Kyzylorda-news.kz. Тігін өнеркәсібі – елімізде табысы мол кәсіптердің бірі. Сол себептен де қазіргі таңда сұранысқа ие мамандықтардың көшін бастап тұр. Бүгінгі «Үздік түлек» айдарындағы кейіпкеріміз де осы текті өнерге бала кезінен қызығып, тігінші мамандығы бойынша білім алуда.
Ұлбике Дауылбаева – Арал индустриалды- техникалық колледжінің «Арнайы тігінші» мамандығының 4 курс студенті. Ұлбикенің анасы мен әпкесі де осы колледжден білім алып, бүгінде тігіншілікті тұрақты тіршілігі еткен. Шығармашылық отбасында туып өскен ол биыл өзінің сүйікті мамандығы бойынша оқуын аяқтайды.
Ұлбике бүгінде колледж қабырғасында теориялық білімін тәжірибеге ұштастырып, өндірістік оқу шеберінің нұсқауымен жаңа үлгідегі заманауи тігін машиналарымен жұмыс жасап, тігіншіліктің қыр-сырын үйренді. Қазіргі таңда ол Арал қаласындағы «Келжанова» тігін шеберханасында өндірістік тәжірибеден өтіп, мамандығына машықтануда. Соның арқасында Ұлбике ақылы тапсырыстар алып, отбасына қолғабыс етіп келеді.
«Тігіншілік – қол мен қиялдың еңбегі» дегендей, болашақта өзімді жұмыспен қамтамасыз етіп, кәсібімді ашуға мақсат қойып отырмын дейді ол.

Тігіншілік – қол мен қиялдың еңбегі

<a href="https://kyzylorda-news.kz/">Kyzylorda-news.kz.</a>&nbsp; 16 маусым күні облыстағы барлық білім беру ұйымдарында аттестат тапсыру рәсімі өткізіледі. Осыған байланысты мектеп бітіру кешін мейрамханаларда немесе ойын-сауықтық орталықтарда өткізуге қатаң тыйым салынады.
Тиісінше, мектеп бітіру кеші білім ордаларының ауласында қарапайым түрде ұйымдастырылады. Бұл туралы Өңірлік коммуникациялар қызметінде өткен брифингте облыстық білім басқармасының бөлім басшысы Нұрлан Дәулетәлиев мәлімдеді.
Өңірде негізгі орта білім туралы аттестатты алатын, яғни 9 сыныпты бітірушілер саны – 14 543 құраса, оның 1 765-і «Үздік аттестат» иегері. Ал 11 сыныпты бітіруші түлектер саны – 7506 оқушы. Оның 415-і «Алтын белгіге» үміткер болса, 804 оқушы «Үздік аттестат» иегері.
<blockquote>
 «Мектеп бітіруші түлектердің қауіпсіздігін қамтамасыз етуге және құқық бұзушылыққа жол бермеу үшін барлық өткізілетін іс шаралар мектеп ауласында өтеді. Бұл шараға барлық оқушылар мектеп формасымен қатысуға міндетті. Сонымен қатар, мектеп бітіруші түлектердің табиғат аясына немесе су айдындарына баруына болмайтынын ескертеміз. Балалардың қауіпсіздігін қамтамасыз ету үшін медицина қызметкерлері, өрт сөндіру мамандары және ішкі істер органдары жұмылдырылды. Адамдар көп шоғырланатын демалыс орындары мен ойын-сауық орталықтарына мектеп әкімшілігінен құралған кезекшілік топ рейд жұмыстарын жүргізеді. Тағы бір ескертетін жәйт, ата-аналар тарапынан ақша немесе сыйлықтар берілуіне тыйым салынады», – деді облыстық білім басқармасының бөлім басшысы Нұрлан Дәулетәлиев.
</blockquote>
Қоғамдық тәртіпті сақтау мақсатында әрбір білім беру ордаларында 2 полиция департаментінің қызметкері бекітілген. Олар күшейтілген режимде жұмыс істейтін болады.
<blockquote>
 «Ертеңгі болатын аттестат тапсыру рәсімі кезінде қауіпсіздікті барынша сақтауға полиция департаментінің қызметкерлері дайын. Қала ішінде көліктермен автошеру өткізуге болмайтынын ескертеміз. Әсіресе таңды қарсы алу үшін су жағалауларына баруға болмайды. Егер де ескертуге қарамастан құқық бұзушылық орын алған жағдайда мектеп бітіруші түлектердің заңды өкілдеріне әкімшілік шара қаралады», – деді облыстық полиция департаментінің Жергілікті полиция қызметi басқармасы бастығының орынбасары Бақыт Молдабеков.
</blockquote>

Ертең барлық мектептерде аттестат тапсыру рәсімі өтеді

&nbsp;<a href="https://kyzylorda-news.kz/">Kyzylorda-news.kz.</a> Асхат Аймағамбетов бастап кеткен сапасыз білім беретін жоғары оқу орындарынан тазалау жұмысы жалғасады. Бұл туралы ҚР Ғылым және жоғары білім министрі Саясат Нұрбек айтты, деп хабарлайды ҚазАқпарат.
<blockquote>
 «Осыған дейін Асхат Аймағамбетов сапасыз білім беретін жоғары оқу орындарын жауып, қаншама лицензия кері қайтарылды. Бұл мәселе әлі де аяқталмай қалған сияқты, сіз осы жұмысты жалғастырасыз ба?», – деп сұрақ қойды тілшілер министрге Үкімет отырысынан кейін.
 «Иә, Асхат Қанатұлы үлкен жұмыс атқарды, ол қоғам тарапынан да, Президент тарапынан да жоғары бағаланды. Біз осы принципиалды позициямызды ұстанып, жоғарғы оқу деңгейінде ең бірінші сапаны қамтамасыз етуге бүкіл күш-жігерімізді саламыз, министрліктің басты бағыты осы болады. Сондықтан Асхат Қанатұлы бастаған жұмысты жалғастыратынымыз анық», – деп жауап берді Саясат Нұрбек.
</blockquote>

Қазақстан және Қызылорда облысының жаңалықтары: Білім