Kyzylorda-news.kz. Ауыл шаруашылығы – ел экономикасының маңызды саласы. Алпыс жылдан астам тарихы бар Шиелі индустриалды-аграрлық колледжі аймағымыздағы ауыл шаруашылығы мамандарын даярлайтын іргелі білім ордасы.
Құрылған уақыттан бері бұл оқу орнын 10000-ға жуық маман бітірген. Бүгінде колледж түлектері облыста ғана емес, республикамызда табысты еңбек етуде. Соның бірі – «Үздік түлек» айдарының кейіпкері Елдос Есжанов.
Елдос Аятжанұлы – Шиелі индустриалды-аграрлық колледжін 2016 жылы бітірген. Әке жолын жалғастырған ол аталған оқу ордасын «Ауыл шаруашылығы өндірісінің тракторшы-машинисі» мамандығы бойынша тәмамдаған. 
Колледж қабырғасында теориялық білімін тәжірибемен ұштастыра білген Елдос көптеген аудандық, облыстық, байқауларға қатысып, жүлделі орындарға ие болды.
Елдос бүгінде «Байсын» шаруа қожалығында бас инженер болып жұмыс жасайды. Біздің кейіпкеріміз жастарды ерінбей еңбек етуге, ауыр жұмыстан қашпауға, мамандықты терең білуге шақырады.
<blockquote>
 «Өз ісінің білгірі һәм шебері болу табысты болудың кілті» – дейді ол. 
 ​
</blockquote>

Еңбекқорлық формуласы (ВИДЕО)

<a href="https://kyzylorda-news.kz/">Kyzylorda-news.kz.</a> Назарбаев Зияткерлік мектептерінің «Ата-ана жұмысындағы 1 күн» және «Ата-ананың жұмыс орнында 10 күн» әлеуметтік жобалары бойынша қызылордалық зияткерлер білім, медицина және өндіріс салаларында жазғы тәжірибеден өтуде.
7-сынып оқушысы Бикелді Нұрманов бүгін өзі түлеп ұшқан балабақшада болып, мектепалды даярлық топта педагогтің қызметін атқарды. Балалармен тез тіл табысып, ағылшын тілі сабағын өткізді. Шахмат ойнауды үйретіп, спорттық сайыстарда көңілдерін көтерді:
<blockquote>
 «Балабақшаның жұмысы оңай көрінгенімен, өте жауапты іс. Қаншама бүлдіршіннің қауіпсіздігіне жауап береді. Анам жетекшілік ететін «Жеті қазына» мектепке дейінгі білім мекемесінде өткен тәжірибемде бойымда жауапкершілік, ұйымдастырушылық, коммуникативтілік секілді қасиеттердің маңыздылығын түсіндім», – дейді Бикелді Нұрманов.
</blockquote>
«Ата-ана жұмысында бір күн» жобасы бойынша Дидар Алтынбеков адам үшін маңызды сала – стоматологиялық қызметпен етене танысты. Науқастың тістерін тазарту, зақымданған жерлерге ем-дом жасау сынды қызметтерді орындады.
<blockquote>
 «Алдымен анам маған теориялық білім беріп, тістің құрылысы мен гигиенасы туралы түсіндірме жұмыстарын жүргізді. Анамның жасап жатқан ісі көптеген адамдарға денсаулық және сұлулық сыйлайтыны мені қуантады», – дейді Дидар Алтынбеков.
</blockquote>
9-сыныптың білім алушылары Нұрмұхамед Мнуарбек пен Айдар Абай бүгінде өңірдегі ірі кәсіпорындарда 10 күн тәжірибеден өтуде. Алғашқысы 55 адамды жұмыспен қамтып отырған «Dalatex» фабрикасында тігін өндірісімен танысса, екіншісі «Абай-Дәулет» ЖШС-де күрішті ақтау процесіне араласып көрді. Жас өрендер күн тәртібі бойынша бекітілген тиесілі істі уақытылы орындап, нарыққа сапалы өнімнің шығуына атсалысуда.
<blockquote>
 «Бүгін күріш салысы зауытқа түскеннен кейін қандай өндеу процесінен өтетінін көріп, үлкен тәжірибе жинақтадым. Ақталған күріштің сапасын зертханадан бақылап, көлеміне қарай ажыратып алу көп уақытты қажет ететін өте күрделі жұмыс екенін көрдім. 10 күндік тәжірибе мен үшін өте қызық әрі пайдалы өтіп жатыр», – дейді Айдар Абай.
</blockquote>
<img src="https://kyzylorda-news.kz/wp-content/uploads/2022/06/stom.jpg" alt="" />
<img src="https://kyzylorda-news.kz/wp-content/uploads/2022/06/sadik.jpg" alt="" />
<img src="https://kyzylorda-news.kz/wp-content/uploads/2022/06/dalateks.jpg" alt="" />

NIS оқушылары әртүрлі салада тәжірибеден өтіп жатыр

Kyzylorda-news.kz. ҚР Білім және ғылым министрлігі екіге бөлініп, ҚР Оқу-ағарту министрлігі және ҚР Ғылым және жоғары білім министрлігі құрылды. Тиісті Жарлыққа Мемлекет басшысы қол қойды.
***
Қазақстан Республикасының мемлекеттік басқару жүйесін одан әрі жетілдіру жөніндегі шаралар туралы Қазақстан Республикасы Конституциясының 44-бабының 3) тармақшасына сәйкес мемлекеттік басқару жүйесін жаңғырту және тиімділігін арттыру мақсатында ҚАУЛЫ ЕТЕМІН:
1. Қазақстан Республикасының Білім және ғылым министрлігі:
Қазақстан Республикасы Білім және ғылым министрлігінің мектепке дейінгі, орта, техникалық және кәсіптік, орта білімнен кейінгі білім беру, қосымша білім беру, балалардың құқықтарын қорғау, мектепке дейінгі, орта, техникалық және кәсіптік, орта білімнен кейінгі білім беру саласындағы сапаны қамтамасыз ету, мектепке дейінгі, орта, техникалық және кәсіптік білім беруді цифрландыру саласындағы функциялары мен өкілеттіктері беріле отырып, Қазақстан Республикасының Оқу-ағарту министрлігіне;
Қазақстан Республикасы Білім және ғылым министрлігінің жоғары және жоғары оқу орнынан кейінгі білім беру, тіл саясаты, ғылым, жоғары және жоғары оқу орнынан кейінгі білім беру мен ғылым саласындағы сапаны қамтамасыз ету, жоғары және жоғары оқу орнынан кейінгі білім беруді цифрландыру саласындағы функциялары мен өкілеттіктері беріле отырып, Қазақстан Республикасының Ғылым және жоғары білім министрлігіне бөлу арқылы қайта ұйымдастырылсын.
2. Мемлекеттік органдар берілетін функциялар мен өкілеттіктерге сәйкес қайта ұйымдастырылатын мемлекеттік органның құқықтары мен міндеттемелерінің құқықтық мирасқорлары болып белгіленсін.
3. Қазақстан Республикасының Үкіметі:
1) қайта ұйымдастырылатын мемлекеттік органның штат санын Қазақстан Республикасы Президентінің Әкімшілігімен келісім бойынша қайта бөлуді;
2) осы Жарлықты іске асыру жөнінде өзге де шаралар қабылдауды қамтамасыз етсін.
4. «Қазақстан Республикасы Үкіметінің құрылымы туралы» Қазақстан Республикасы Президентінің 1999 жылғы 22 қаңтардағы № 6 Жарлығына мынадай өзгеріс пен толықтырулар енгізілсін:
1-тармақ мынадай мазмұндағы жолдармен толықтырылсын:
«Қазақстан Республикасының Оқу-ағарту министрлігі;
Қазақстан Республикасының Ғылым және жоғары білім министрлігі;»;
«Қазақстан Республикасының Білім және ғылым министрлігі;» деген жол алып тасталсын.
5. Осы Жарлықтың орындалуын бақылау Қазақстан Республикасы Президентінің Әкімшілігіне жүктелсін.
6. Осы Жарлық қол қойылған күнінен бастап қолданысқа енгізіледі.

ҚР Білім және ғылым министрлігі екіге бөлінді

Kyzylorda-news.kz. Ақтау қаласындағы Зияткерлік мектепте «Caspian Startup-2022» халықаралық байқауы өз мәресіне жетті. Дәстүрлі сайысқа Қазақстан, Әзірбайжан, Өзбекстан, Түркменстаннан 120-дан астам жоба келіп түсті. Қатысушылар «Болашақтың мектебі», «Әлеуметтік мәселелерді шешу», «Туризм» номинациялары бойынша табысты өмір сүруді қамтамасыз ететін IT-стартаптарын ұсынды.
<blockquote>
 – Жыл сайын жобалардың саны артып келеді, олардың атаулары авторлардың азаматтық ұстанымы мен жаһандық жауапкершілігін растайды, сондықтан біз «Caspian Startup-2022» байқауын әлеуметтік тақырыпқа арнадық, – деп атап өтті Ақтаудағы Зияткерлік мектеп директоры Әсел Бейсембинова.
</blockquote>
Алғаш рет «Caspian Startup-2022» байқауымен қатар Зияткерлік мектептер мен Халықаралық IT-стартаптар технопаркі ұйымдастырған жаңа жобаның қатысушыларын біріктіретін «Demo Day» шарасы өтті. Үш ай бойы NIS оқушылары Astana HUB-та онлайн оқудан өтіп, тәлімгерлермен бірлесіп өз жобаларын әзірледі. Сонымен қатар тың идея авторлары өз жұмыстарын Ақтау қаласында таныстырды.
Demo Day алаңында қызылордалық зияткерлер Ильяс Кенбай, Ғазиза Аушенова, Тоқтар Қорғанбеков, Арман Жалғасбаев пен Нұрсұлтан Талғатұлы «Жаңа тыныс» және «Алтын орда» атты Қазақстанның ішкі және сыртқы туризімін дамытуға бағытталған жобаларын көрсетті. Бірі әуе шарымен ұшуды танымал ету арқылы туристерді тартуға, ал екінші топ Қазақстанның өзіндік көркем табиғи зоналардың потенциалын тиімді пайдалану арқылы қазақ мәдениетін шетелге таныстыруға болатындығын дәлелдеді.
<blockquote>
 «Шығыс Қазақстан облысында Марқақөл жағасында орналасқан табиғаты ерекше Ұранқай ауылын жандандыру арқылы еліміздегі эко және этно туризм саласын дамытуға болады. Инфрақұрылымының төмен болуы салдарынан бүгінде ауыл халқы көшіп кетіп жатыр. Ал егер бұл жерге өмір сүруге қажетті барлық жағдай жасалынса, сыртқы және ішкі туристерді қызықтыратын керемет орынға айналар еді. Осында келген конақтар небәрі бір апта ішінде қазақ мәдениетімен таныса алады», – дейді 11-сынып оқушысы Нұрсұлтан Талғатұлы.
</blockquote>
Astana HUB және Ұлттық зияткерлік меншік институтының қолдауымен Ақтауда өткен «Caspian Startup-2022» байқауында финалистерге арналған ауқымды оқыту ұйымдастырылды. Интерактивті сессиялар мен шеберлік сағаттар, бизнес-коммуникациялар STEM-білім, бағдарламалау, авторлық құқық, биотехнология, фармакология, баламалы энергия көздері сынды басты басымдықтарға арналды. Криминалистикадағы заманауи химиялық талдау әдістерін қамтыған «Шерлок Холмстың ұрпақтары» шеберлік алаңы оқушылардың үлкен қызығушылығын тудырды.
«Caspian Startup-2022» байқауының қатысушылары үшін Маңғыстау өңірінің киелі жерлеріне экскурсия жасау, психологиялық тренингтер, шығармашылық және спорттық іс-шаралар ұйымдастырылды. Дода жұлдыздары арнайы өткізілген бауырсақ-патиге қатысып, шабыттана еңбектенуге ынталана түсті.
<img src="https://kyzylorda-news.kz/wp-content/uploads/2022/06/fb_img_1654849887162.jpg" alt="" />

Қызылордалық зияткерлер халықаралық байқауда жобаларын таныстырды

Kyzylorda-news.kz. Бүгін облыс әкімі Байқоңыр қаласына жұмыс сапары аясында №277 мектеп-лицейіне барып, қазақстандық білім беру ұйымдарының басшылары, жас педагогтар кездесіп, білім саласындағы ортақ мәселелерді талқылады. Сондай-ақ, өнертапқыш балалардың жобаларымен танысып, олардың қолөнер бұйымдарын көрді.
Облыстық білім басқармасы басшысының міндетін атқарушы Бағдат Бердәулетов Байқоңыр қаласының білім беру жүйесіндегі негізгі мәселелерге тоқталды. Сондай-ақ, қазақстандық РФ қарасты мектептердегі оқушыларға «Қазақстан тарихы», «Қазақ тілі мен әдебиеті» пәндерін оқыту мәселесі екіжақты Үкіметаралық комиссиямен пысықталып жатқанын тілге тиек етті.
Басқосуда аймақ басшысы мектептердегі орын жетіспеушілігін болдырмау, жеке инвесторлар арқылы балабақшалар салу мәселесін қарап, ұсыныс беруді тапсырды. Сондай-ақ, Байқоңырда балабақша салуға ынталы кәсіпкерлерді қолдау қажеттігін баса айтты.
<img src="https://kyzylorda-news.kz/wp-content/uploads/2022/06/fb_img_1654826772425.jpg" alt="" />
<img src="https://kyzylorda-news.kz/wp-content/uploads/2022/06/fb_img_1654826785797.jpg" alt="" />

Облыс әкімі Байқоңырда өнертапқыш балалармен кездесті

<a href="https://kyzylorda-news.kz/">Kyzylorda-news.kz.</a>&nbsp;Білім және ғылым министрлігі мектепке дейінгі және орта білім комитетінің төрағасы Гүлмира Каримова мектеп формасына қатысты пікір білдірді.
<blockquote>
 “Қазақстан – ол зайырлы мемлекет. Сол себепті мектептер де зайырлы мекемелер болып саналады. Мектеп формасы туралы 2016 жылғы бұйрық бар, ол күшін жойған жоқ. Біз біліммен қамтылмауы мүмкін қыздарды оқу процесіне қосу туралы айтып отырмыз. Сондықтан бұл мәселені шешудің жолдары мен тетіктен іздестіріп жатырмыз. Бұл жерде әңгіме хиджаб туралы болып отырған жоқ”, –&nbsp;деді Гүлмира Каримова.&nbsp;
</blockquote>
Комитет төрағасының сөзінше, қазір түрлі ұсыныстар түскен. Соның ішінде оларды отандық мектептерде онлайн оқыту мүмкіндігі және оларды оқу үдерісіне тарту бойынша басқа да ұсыныстар бар екен.
<blockquote>
 “Ең бастысы, барлығын орта біліммен қамту. Бұл балалардың осы бөлігін мектепте білім алуы үшін жасалып отыр. Тағы бір айтарым, қазіргі уақытта мектеп формасына қатысты бұйрық өз күшінде, ешқандай өзгеріс енгізілген жоқ. Біз барлық баланы біліммен қамтамасыз етудің түрлі мүмкіндіктерін талқылаймыз. Бұл эмоцияға беріліп шешілетін мәселе емес, қоғамда әртүрлі пікірлер бар екені рас. Ең алдымен балалардың мүдделері мен заңнамадағы нормаларды негізге алуымыз керек”, –&nbsp;деді ол.
</blockquote>

Білім және ғылым министрлігі орамалға қатысты мәлімдеме жасады

<a href="https://kyzylorda-news.kz/">Kyzylorda-news.kz.</a>&nbsp;ҚР білім министрлігінің басшысы Асхат Аймағамбетов еліміздегі мектептерде ата-аналар жиналысының форматы өзгеріп жатқанын айтты. Оның ойынша, барлық ата-аналарды бір сыныпқа жинап, балалардың үлгерімін талқылаудың қажеті жоқ.
<blockquote>
 «Мектептерде ата-аналар жиналысын өткізу мәселесі бірнеше рет көтерілді. Өткен жылы ата-аналар жиналысын өткізудің жаңа форматына көшу тапсырылды. Бұрынғыдай барлық ата-аналарды сыныпқа жинап, баланың үлгерімі мен мінез-құлқын талқылаудың өажеті жоқ.&nbsp;Басқа ата-ананың көзінше басқа біреудің баласын талқылауға болмайды. Әрбір ата-анаға баласының үлгерімі мен мінез-құлқы туралы ақпарат берілуі керек. Әрине, сіздің көзіңізше баласының үлгерімін талқылайтындықтан оның ата-анасы&nbsp;мектеп жиналыстарына келгісі келмейді», – деді министр.
</blockquote>
Аймағамбетов мұғалімдердің ата-аналарға балаларының қай пәнге көбірек қызығатыны және одан әрі нені оқуы керектігі туралы бөлек хабарлауы керектігін айтты.

Қазақстан мектептерінде бұдан былай ата-аналар жиналысы өткізілмейді

<a href="https://kyzylorda-news.kz/">Kyzylorda-news.kz.</a> Елімізде оқушылардың міндетті мектеп формасына қойылатын талаптарға өзгерістер енгізіліп, бұйрық жобасы дайындалды. ҚР Білім және ғылым министрлігі мектепке дейінгі және орта білім комитетінің төрағасы Гүлмира Кәрімова ата-ана өзі қалаған мектеп формасын еркін таңдай алатынын мәлімдеді.
Бірақ Қызылорда қаласындағы Абай атындағы дарынды балаларға арналған мамандандырылған мектептің ата-аналарға қоятын талабы басқа. Кезекті оқу жылын аяқтап жазғы каникулға шыққан балалардың ата-аналары жаңа оқу жылында киетін оқу формасымен бас қатырып жүр. <a href="https://kyzylorda-news.kz/">Kyzylorda-news.kz.</a> ақпарат агенттігінің редакциясына хабарласқан қала тұрғыны Гүлмира Асанованың мектеп формасына қатысты уәжін ұсынамыз.
<blockquote>
 «Міне, тағы бір оқу жылы аяқталды. Жазғы демалыс зымырап өтіп, ата-аналардың уайымы енді басталды. Бір қуантарлығы, мектептерде қазірдің өзінде оқушылар формасына мән беріліп жатыр. Міне, бірнеше аптадан бері Абай атындағы дарынды балаларға арналған мамандандырылған мектептің жалпы мектепішілік жиындарында, ата-аналардың топтық чаттарында бұл тақырып қызу талқыланып жатыр. Неге екені белгісіз біз соңғы жиналысқа ғана шақырылдық.
 Жаңа мектеп формасын енгізуге ата-аналардың ешқайсысы қарсы емес. Мектеп формасы балаларды тәртіпке келтіретінін бәріміз жақсы түсінеміз. Ата-аналар мектеп формасын таңдауға құқылы, ең бастысы форманың сапасын қадағалауымыз керек. Бар мәселе директордың мектеп формасының бір ғана үлгісін ұсынғанында болып тұр. Бұл бір ғана түрік кәсіпкерінің өнімі. Ол кәсіпкер бұл қалада емес. Бала болғаннан кейін ойнайды, құлайды, жыртылады. Ал біз оны басқасына ауыстыруға мүмкіндік болмайды», – дейді ата-ана.
</blockquote>
Ата-аналар мектеп формасын WhatsApp желісі арқылы суретін ғана көрген. &nbsp;Сапасына қатысты ешкім ешнәрсе айта алмайды. Сонымен қатар біздің аймақтың климатын ескерсек қалың трикотаж матасынан тігілген форманы балаларымыз киіп те үлгермейді. Ал ақысына сатып алынған дүниені кие алмаса неге сатып алуымыз керек дейді ата-аналар.
<blockquote>
 «Төрт заттан тұратын жиынтықты (жейде, юбка, шалбар, жилет, жемпір) 28 000 теңгеге сатып алуға тура келеді. Әрбір зат жеке сатылмайды. Мектептің барлық оқушыларынан форма құнының 50 пайызын жедел түрде жинап беріңдер деді. Мектепте бала саны 4000-нан асады. Бір отбасының 3-4 оқушысына мұндай бағаға бірден мектеп формасын сатып ала алмаймыз деп ата-аналар наразы бола бастағанда, жеткізушілер көп балалы және аз қамтылған отбасыларға жеңілдіктер жасауға келіскен. 25-50 пайыз. Ата-аналар әлі келісімін берген жоқ. Бірақ кейбір сыныптар осы 50 пайыз – 14 000 теңгені жинай бастады. Осы 14 000 теңгені тапсырып үлгергендер де мектеп формасының үлгісін көрген соңғы кездесуден кейін сатып алудан бас тартқан. Жақында мектеп формасына қатысты заңға өзгерістер еніп жатқанын естіп жатырмыз. Осыдан кейін бәрі қалыпқа келеді деп сенейік», – дейді Гүлмира Асанова.
</blockquote>
Неліктен мектеп директоры ата-аналардың осы мектеп формасын және осы кәсіпкерден ғана сатып алуын талап етіп отыр? Мәселенің мән-жайын білмекке мектепке хабарластық.
<blockquote>
 «Карантиннен кейін оқушыларға еркін, классикалық үлгідегі киіммен сабаққа қатысуға рұқсат етілді. Жаңа оқу жылынан бастап бірыңғай мектеп формасын қалыптастырып, ата-аналарға бірнеше киім үлгісін ұсындық. Ата-аналар арасында форма үлгісіне, ақысына қатысты түрлі пікір болды. Біз мектеп формасын тігетін және жеткізетін кәсіпкердің әлеуметтік жағдайы әр түрлі отбасына жеңілдік жасайтынын басты назарға алдық. Алайда ҚР Білім және ғылым министрлігінен жаңа оқу жылында еліміз бойынша бірыңғай мектеп формасы енгізілетіні хабарланды. Сондықтан бұған дейін ата-аналардың талқылауына ұсынған форма үлгісінен бас тарттық. Жаңа оқу жылындағы мектеп формасының үлгісі министрліктің шешімінен кейін қосымша хабарланады», – деді Абай атындағы дарынды балаларға арналған мамандандырылған мектептің директоры Жанат Садуақасова.
</blockquote>

Қызылордалық ата-аналар мектеп формасына  неге қарсы?

<a href="https://kyzylorda-news.kz/">Kyzylorda-news.kz.</a> Білім және ғылым министрі Асхат Аймағамбетов министрлікті екі ведомствоға бөлу туралы ұсынысқа қатысты пікір білдірді.
<blockquote>
 «Қазір бұл шешімді өте тиімді жүзеге асыру міндеті тұр, өйткені білім мен ғылым жүйесінің тиімділігі ең басты дүние. Біз қажетті жұмыстарды атқарамыз», деді министр.
</blockquote>
Оның айтуынша, министрлікті бөлу туралы шешім қазірдің өзінде қабылданған.
<blockquote>
 «Шешімді бәріңіз естідіңіздер. Шешім бар, айтылды, тиісті түрде қабылданды. Енді осы шешімнің орындалуын ойластыру керек. Білім беру жүйесі осыдан пайда көруі керек. Сондықтан қазір жұмыс істейміз және жұмыс істеп жатырмыз.
 Тиісті шешімді кім қабылдайтынын нақты реттейтін заңнама бар. Бұл ретте Үкімет деңгейінде және ел басшылығы деңгейінде министрліктерді құрудың құрылымы, нақты жобасы туралы шешім қабылданады. Сондықтан тиісті деңгейде шешім қабылданып, мұның бәрі одан әрі жұртшылық назарына жеткізіледі деп ойлаймын», деді А.Аймағамбетов.
</blockquote>
Айта кетейік, Президент 1 маусым күні Алматыдағы Ұлттық ғылым академиясының 75 жылдығына арналған сессияда Білім және ғылым министрлігін екі ведомствоға бөлуді ұсынған болатын.

Асхат Аймағамбетов министрлікті бөлуге қатысты пікір білдірді

<a href="https://kyzylorda-news.kz/">Kyzylorda-news.kz.</a>&nbsp; Құрылыс жобаларын уақытылы әрі сапалы орындау басты міндет. Бұл ретте әлеуметтік нысандарға бөлінген қаржыны мақсатты әрі тиімділігіне қарай бағыттау қатаң қаралады. Облыс әкімі мектеп құрылыстарына қатысты мердігерлерге осындай талап қойған еді. Жаңақорған ауданына барған жұмыс сапарында аймақ басшысы кентте салынып жатқан 300 орындық мектеп құрылысымен танысты. Мердігерлермен сөйлесіп, құрылыс саласына қатысты өзекті мәселелерді талқылады.
Мектеп құрылысын «Авангард» ЖШС мердігер мекемесі жүзеге асырады. 
Жұмыс барысымен жіті танысқан Нұрлыбек Нәлібаев мектеп салу ісінде нақты қажеттілік ескерілу керектігін қаперге салды.
<blockquote>
 «Демографиялық өсімнің нәтижесінде мектепке баратын балалар саны артып келеді. Соған сәйкес, біз мектептерге талдау жасап, нақты қажеттілікті шығаруымыз қажет. Қаладағы бірқатар мектептерді аралап шыққанда байқағаным, бала саны өте көп мектептердің аумағында бос жерлер бар. Ал, керісінше бала саны аз аймақтарға тым көп сыйымдылықтағы мектептерді салып қоямыз. Бұл дұрыс есептіліктің жоқтығынан туындайды,-деді»,-деді Нұрлыбек Нәлібаев.
</blockquote>
Айта кетейік, алдағы 3 жылда Қызылорда облысында 32 мемлекеттік және 9 жекеменшік мектеп салынатын болады. Оның ішінде 2 білім ордасы апатты мектептердің орнына салынбақ.
<img src="https://kyzylorda-news.kz/wp-content/uploads/2022/06/287000776_1549658378763002_4533002588835525400_n.jpg" alt="" />

Жаңақорғанда 300 орындық мектеп салынып жатыр

<a href="https://kyzylorda-news.kz/">Kyzylorda-news.kz.</a> Жазғы уақытта балалардың тынығу лагерьлерінің жұмысын күшейту тек маусымдық уақытта ғана емес, жыл бойы жүзеге асуы қажет. Облыс әкімі Нұрлыбек Нәлібаев кеңейтілген жиындарда өңірдегі бірқатар лагерь жұмысын сынға алып, олардың тек маусымдық кезде ғана жұмыс істеп, қалған уақытта бос тұратынын айтып сала басшыларына нақты тапсырма берді.
Бүгін аймақ басшысы Жаңақорған ауданына барған сапарында «Талдысу» балалар тынығу лагерінің жұмыс барысымен танысты.
300 орындық демалыс орны 2 қабаттық типтік жобадағы 4 корпустан тұрады. Мұнда балалар жазғы демалыста тынығу, сауықтыру қызметтерімен қамтылып, қосымша білім алуға және бос уақытын көңілді өткізуге арналған түрлі іс-шаралармен айналысады.
Аймақ басшысы лагерьдің асханасы мен оқушылар сарайын аралап, балалармен тілдесіп, олардың танымдық шаралармен қамту жұмыстарын бақылап көрді.
Айту керек, Талдысу лагерінде қазан-сәуір аралығында балаларды 7 ауысымда олимпиадалар мен ғылыми жобаларға, пәндік жарыстарға дайындайды. Облыстық білім басқармасы басшысының міндетін атқарушы Бағдат Бердаулетов “Талдысу” балалардың тынығу лагері, “Қамбаш” қосымша білім беру және олимпиадалар орталығының қысқы уақытта жұмысын жандандыру үшін бюджеттен қосымша қаржы қарауды сұрады.
<blockquote>
 «Егер де осы лагерьлер арқылы балалардың біліміне оң әсер етіп, олардың түрлі деңгейдегі олимпиадалар мен жарыстарда жеңімпаз атануына септігін тигізе алсақ, міндетті түрде оған қаржы бағыттауымыз қажет. Бірақ, қаржы бөлінгеннен кейін осы орталықтардың жыл бойы үздіксіз жұмыс істеуін қадағалауымыз қажет»,-деді Нұрлыбек Нәлібаев.
</blockquote>

Облыс әкімі «Талдысу» балалар тынығу лагерінің жұмыс барысымен танысты

<a href="https://kyzylorda-news.kz/">Kyzylorda-news.kz.</a>&nbsp;Елімізде оқушылардың міндетті мектеп формасына қойылатын талаптарға өзгерістер енгізіліп, бұйрық жобасы дайындалды. Бұл туралы ҚР Білім және ғылым министрлігі мектепке дейінгі және орта білім комитетінің төрағасы Гүлмира Кәрімова мәлім етті, деп хабарлайды ҚазАқпарат.
<blockquote>
 «Жаңа оқу жылына дайындық жаздыгүні басталады. Баланы мектепте дайындауда ата-ананы ойландыратын жайттың бірі — мектеп формасы. Көптеген ата-ана мектеп формасын сапалы әрі қолжетімді бағамен сатып алғысы келеді. Бүгінгі таңда міндетті мектеп формасына қойылатын талаптарға өзгерістер енгізіліп, бұйрық жобасы дайындалды. Ата-ана өзі қалаған мектеп формасын еркін таңдай алады. Барлық өңірдегі білім басқармалары мен бөлімдері ата-аналарға мектеп формасын таңдауда бірыңғай түсті ұсынады», – деді Гүлмира Кәрімова ҚР Білім және ғылым министрлігінің аппараттық жиналысында.
</blockquote>
Оның айтуынша, мектеп формасының бала тәрбиесіне әсері бар.
<blockquote>
 «Мектеп формасына эмблема басқа да мектеп белгілерін жапсыруға болады. Сапалы әрі қолжетімді мектеп формасымен қамтамасыз етудегі жаңа тәсіл оқушылар арасындағы әлеуметтік, мүліктік және өзге де айырмашылықтарды жояды деп есептейміз», – дейді ол.
</blockquote>

Қазақстан және Қызылорда облысының жаңалықтары: Білім