<a href="https://kyzylorda-news.kz/">Kyzylorda-news.kz.</a> Қазақстандағы алғашқы лоукостер – «FlyArystan» әуе компаниясы Қызылордада жақын арада билет сатылымын бастайды. Бұл туралы Қызылорда облыстық жолаушылар көлігі және автомобиль жолдары басқармасы хабарлады.
Осы орайда «Қорқыт Ата» әуежайы» АҚ аталған компаниямен өзара келісімшарт жасады. Соған сәйкес ұшақтар 16 наурыздан бастап Алматы-Қызылорда-Алматы бағыты бойынша күнделікті, ал 20 наурыздан бастап Нұр-Сұлтан-Қызылорда–Нұр-Сұлтан бағыты бойынша аптасына 4 рет қатынайды.
Еске салсақ, бюджеттік әуе компаниясы Елбасы Нұрсұлтан Назарбаевтың тапсырмасына сәйкес құрылды. Мұндай шешім ішкі нарықты толыққанды зерттеу мен бизнесті жоспарлау нәтижесінде, тез ауыспалы жергілікті және аймақтық әуе тасымалы нарығының салдарынан қабылданды.

Қызылордада «FlyArystan» билеттері сатыла бастайды

<a href="https://kyzylorda-news.kz/">Kyzylorda-news.kz.</a> Бүгін Ә.Тәжібаев атындағы Қызылорда облыстық әмбебап ғылыми кітапханасында Елбасының «Ұлы даланың жеті қыры» мақаласы аясында«Ұлы даланың ежелгі дәуір әдебиеті» атты әдеби кеші ұйымдастырылды.
Шараның мақсаты – ежелгі дәуір әдебиетінің қазақ әдебиетінде алатын орнын түсіндіру және шығармаларын насихаттау.
Кеш барысында оқырмандар ежелгі әдебиет деп аталатын жеті ғасырды қамтыған әдебиетіміздің, ұзақ тарихына қатысты ескерткіштермен, шығармалармен танысты. Олардың алғашқылары деп түркі ру-тайпаларына ортақ Орхон ескерткіштерін, Қорқыт және Оғыз-наманы атаймыз.
Жастар ежелгі дәуір әдебиетінің өкілдері Мұхаммед Хорезми, Әбу Насыр әл-Фараби, Әбу Райхан әл-Бируни, Махмұд Қашқари, Қожа Ахмет Йасауи, Сүлеймен Бақырғани, Жүсіп Баласағұн тәрізді түркі халықтарының біразы ортақ ойшылдар, ғалымдар, ақындар, ғұламалар түркі халықтарынан шыға тұра кезінде араб әдебиетін, араб ғылымын, сонымен бірге дүние жүзі ғылымын дамытуға үлкен үлес қосқаны туралы пікір білдірді.
Шараға «Болашақ» университетінің&nbsp; оқытушысы, филология ғылымдарының кандидаты, доцент Сара Тайманова шәкірттерімен, «Құрылыс және бизнес» колледжінің студенттері және «Кездесу»&nbsp; клубының мүшелері&nbsp; қатысты. Оқырмандар шара кезінде кітап көрмесін тамашалап,библиографиялық шолу жасады.&nbsp;
<img src="https://kyzylorda-news.kz/wp-content/uploads/2020/02/5biblioteka2.jpg" alt="" />
<img src="https://kyzylorda-news.kz/wp-content/uploads/2020/02/5biblioteka3.jpg" alt="" />

Қызылордада ежелгі дәуір әдебиеті насихатталды

<a href="https://kyzylorda-news.kz/">Kyzylorda-news.kz.</a> Қызылорда қаласында «Қауіпсіз жол» іс-шарасы барысында 2 күнде&nbsp; 800-ге жуық&nbsp; құқық бұзушылық анықталды, деп хабарлайды <a href="https://polisia.kz/eki-kunde-800-ge-zhuyq-quqyq-buzushylyq-anyqtaldy/">Polisia.kz</a>. &nbsp;
Жол қозғалысы қауіпсіздігін қамтамасыз ету, жол-көлік оқиғаларын болдырмау, жол қозғалысы ережелерін өрескел бұзу деректерінің алдын алу мақсатында Қызылорда облысы көлемінде «Қауіпсіз жол» жедел-профилактикалық іс-шарасы өтуде.
«Қауіпсіз жол» жедел алдын алу шарасы аясында жол-көлік оқиғаларының артуына септігін тигізетін жол қозғалысы ережелерін өрескел бұзу жағдайларын анықтау, автокөлік жүргізушілерінің жаяу жүргіншілерге жол бермеу деректерінің алдын алу, профилактикалық бағыттағы жұмыстарды барынша жандандыруға және жолын кесуге бағытталған бірқатар рейдтік және алдын алу шаралары өткізілуде.
Іс-шараның екі күнінде барлығы &nbsp;759 жол қозғалысы ережесін бұзушылықтар анықталды. Оның ішінде ҚР Әкімшілік құқық бұзушылық туралы кодексте белгіленген жылдамдық мөлшерін арттыру бойынша 85, жалған немесе кернеу нөмір тағып көлік құралын басқару – 15, рұқсатсыз қайта жабдықталған көлік құралын басқару – 30, қозғалыстың қарсы жолағына шығу – 1, бағдаршамның тыйым салатын сигналына немесе реттеушінің тыйым салатын қимылына қарамай өту – 33, жаяу жүргіншіге басымдық бермеу – 48, жол көлік апаты жағдайын туындату – 14, көлік құралын мас күйде басқару – 9 және жаяу жүргіншілердің жол қозғалысы ережесін бұзуы бойынша 124 дерек анықталды.

Қызылордада екі күнде 800-ге жуық құқық бұзушылық анықталды

<a href="https://kyzylorda-news.kz/">Kyzylorda-news.kz.</a> ҚР Премьер-Министрі Асқар Мамин «One Web» британ компаниясының бас атқарушы директоры А.Штекельді қабылдады. Бұл туралы <a href="https://primeminister.kz/kz/news/glava-pravitel-stva-obsudil-s-rukovodstvom-one-web-razvitie-sputnikovogo-interneta-v-rk">primeminister.kz</a> сайты хабарлады.
А.Штекель осы жылдың 7 ақпанында Байқоңыр ғарыш айлағынан «One Web» әзірлеген жаһандық жерсерік желісі аясында 34 жерсерікті ұшыру дайындығы туралы баяндады. Биыл барлығы Байқоңыр ғарыш айлағынан 8 ұшыруды жүзеге асыру көзделген. Жаһандық жерсеріктік желі 1200 шақырым биіктікте 12 орбита жазықтығында 504 спутниктен тұратын болады. Жерсеріктік желіні толық пайдалануға беру және ҚР аумағында қызмет көрсетуі 2021 жылдың соңына болжанған.
Тараптар Қазақстан аумағын, соның ішінде шалғайдағы және жетуге жолы қиын аудандарды байланыс спутниктері арқылы жоғары жылдамдықты кеңжолақты интернетпен қамту жөніндегі жобаны іске асыру перспективаларын талқылады.
Нұр-Сұлтан қаласындағы Ұлттық ғарыш орталығының жанындағы Ғарыш аппараттарының құрастыру-сынау кешенінің базасында «One Web» үшін жерсеріктер құрастыру жобасын іске асыру мүмкіндіктері, сондай-ақ одан кейін Орталық Азия, Кавказ, Иран, Ауғанстан елдеріне «One Web» жерсеріктік интернетін эксклюзивті дистрибуциялаумен ҚР аумағында шлюз станциясын орналастыру бойынша бірлескен кәсіпорын құру мәселесі қаралды.&nbsp; «One Web» компаниясы Интернет және жылдамдығы жоғары деректерді жеткізу (қолданушы терминалына 5-50 Мбит/с) желісіне қолжетімділік бойынша қызметтерді ұсыну үшін ғаламдық төмен орбиталы жерсерік желісін жасайды.

Үкімет басшысы «One Web» басшылығымен ҚР-да жерсеріктік интернетті дамыту мәселесін талқылады

<a href="https://kyzylorda-news.kz/">Kyzylorda-news.kz.</a> Байқоңыр ғарыш айлағынан «Фрегат-М» үдемелі блогы және OneWeb британдық байланыс спутнигі бар «Союз 2.1б» зымыран-тасығышын ұшыруға үш тәулік қалды, деп хабарлайды <a href="https://www.inform.kz/kz/baykonyrdagy-start-keshenine-oneweb-sputnigi-bar-zymyran-ornatyldy_a3610911">ҚазАқпарат</a>.
«Союз 2.1б» зымыранын Байқоңыр ғарыш айлағының № 31 алаңындағы старт кешеніне орнату және шығару мемлекеттік комиссия шешіміне сәйкес жүзеге асырылды. Стартқа дейін бірнеше күн бойы жүйелер мен пайдалы жүк агрегаттары, ракета-тасығыш пен старт кешені автономды сынақтан өткізіледі», деп хабарлайды Роскосмостың баспасөз қызметі.
«Фрегат-М» үдемелі блогы және OneWeb британдық байланыс спутнигі бар «Союз 2.1б» зымыран-тасығышын 2020 жылдың 7 ақпаны күні, Нұр-Сұлтан уақытымен 02:42:41 ұшыру жоспарланған.
Үдемелі блок старттан кейін 10 минуттан соң үшінші сатыдан ажырайды деп есептелген. Одан кейінгі 3,5 сағат ішінде ұшу циклограммасына сәйкес, ғарыш аппараттары «Фрегат-М» үдемелі блогынан бөлінеді.
Айта кетерлігі, бұл Байқоңыр ғарыш айлағынан 2020 жылы ұшырылатын алғашқы зымыран.

Байқоңырдағы старт кешеніне OneWeb спутнигі бар зымыран орнатылды

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебі аймақтағы 9 жетекші мектеппен ынтымақтастық жөніндегі меморандумға отырды. Ресми түрде құрылған мектептер қоғамдастығы алдағы уақытта өзара тәжірибе алмасып, білім беру үдерісіне иновацияларды енгізу және дамыту бағытында бірлескен жұмыстар атқаратын болады.
Өңірімізде алғаш рет құрылған мектептер қоғамдастығы құрамына облыстық дарынды балаларға арналған білім беру ұйымдары, жетекші мектептері және «Ауылдық мектептер» жобасының пилоттық мектептері енді. Бүгін осы білім ордаларының басшылары мен олардың орынбасарлары NIS жұмысымен танысып, тәжірибе алмасты.
Алдымен мектептің ішіне экскурсия жасап, оқу үдерісінің ерекшеліктерін бақылауға мүмкіндік алған конақтар нанотехнология кабинетінде өрт сөндіру, криминалистика, медицина салаларына қатысты оқушылардың жасаған қызықты тәжірибелерін көрді. Сондай-ақ ДНҚ, микробиологиялық синтездер және генетикалық инженерия бағытында зерттеулерді жүргізуге арналған биотехнология кабинетінің жұмысымен танысты.
Содан соң қонақтар Назарбаев Зияткерлік мектебінің жетістіктері, кәсіби бағдар беру жұмысын ұйымдастыру жүйесі, оқушыларға қолайлы моральды-психологиялық жағдай жасау қызметі, тәрбие беру моделі, сыртқы жиынтық бағалау үдерісі, білім алушылардың жобалау іс-әрекетін ұйымдастыру, CIS Халықаралық аккредиттеуі мен «Action Research» және «Lesson Study» зерттеушілік жұмыстары бойынша жан-жақты ақпарат алды.
Дөңгелек үстел басында білім саласының мамандары мектеп қоғамдастығының негізгі жұмыс бағыттарына талқылау жүргізіп, өзара ынтымақтастық туралы меморандумға отырды. Бұл меморандум жетекші мектептер арасындағы байланысты нығайтып, оқытудың инновациялық әдістерін енгізу және оларды дамыту мақсатын көздейді.
<blockquote>
 «Осы мектептермен алдағы уақытта тәжірибе алмасу бойынша көптеген жұмыстар жүргізу жоспарланған. Бір-біріміздің үздік тәжірибемізді тарататын боламыз. Оқу-тәрбиелік, ғылыми-шығармашылық, мәдени-спорттық бағыттағы бірлескен жобаларды жүзеге асыру арқылы мектептердің дамуына ықпал етуге болады», – деді Қызылорда қаласындағы Назарбаев Зияткерлік мектебінің директоры Бахыт Жұматай.
</blockquote>
<img src="https://kyzylorda-news.kz/wp-content/uploads/2020/02/4nis2.jpg" alt="" />

Қызылордадағы Назарбаев Зияткерлік мектебі өңір мектептерімен қоғамдастық құрды

<a href="https://kyzylorda-news.kz/">Kyzylorda-news.kz.</a> Қазақстанда 180 мың адам түрлі ісік ауруларына шалдыққан. Елдегі әрбір жүзінші адам обыр дертімен күресіп келеді.
Осыдан екі жыл бұрын Үкімет&nbsp;Қаулысымен 2018-2022 жылдарға арналған онкологиялық аурулармен күрес жөніндегі кешенді жоспар қабылданды.
1. Тәуекел факторларын басқару және алдын алу
2. Жоғары тиімді ерте диагностика
3. Онкологиялық көмек көрсетудің интеграцияланған моделін енгізу
4. Кадрлық әлеуетті және ғылымды дамыту
Онкологиялық аурулардың ішінде 1 орында – сүт безі қатерлі ісігі, 2 орында – жатыр мойыны қатерлі ісігі, 3 орында – тері қатерлі ісігі тұр. Сонымен қатар асқазан, бауыр, тоқішек қатерлі ісігі де асқынған.&nbsp; Дәрігерлер жыл сайын кесел белгілері бар 35 мың адамды тіркейді екен. Өкінішке қарай, ауруды жеңіп, құлан-таза айығып кететіндердің қарасы аз. Жыл сайын шамамен 15 мың адам жаман аурудың құрбаны болады. Ал мемлекеттен тегін ем-дом мен скрининг жүргізу үшін 40 млрд теңге бөлінеді. Денсаулық сақтау министрлігінің хабарлауынша, 1800-ге тарта шығысқазақстандық, 1600-ден аса алматылық тұрғын ісік ауруына шалдыққан. Дерт дендеген өлкелердің бірі – Қарағанды облысы. Мұндағы халықтың 1200-ден астамы обырдан емделіп жатыр.

4 ақпан – Қатерлі ісікке қарсы дүниежүзілік күрес күні

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов қоғам қайраткері Нәжмадин Мұсабаевты қабылдап, 70 жас мерейтойымен құттықтады. Шараға Қызылорда облыстық мәслихат хатшысы Қылышбай Бисенов, «Nur Otan» партиясы Қызылорда облыстық филиалы төрағасының бірінші орынбасары Ақмарал Әлназарова, облыстық ардагерлер кеңесінің төрағасы Серік Дүйсенбаев қатысты.
Нәжмадин Түркбенұлы 1950 жылы Қызылорда облысы Арал ауданында дүниеге келген. Қазақ химия-технологиялық институтын «инженер, құрылысшы-технолог», Қазақстан менеджмент, экономика және жоспарлау институтын «саясаттанушы» мамандықтары бойынша бітірген. Еңбек жолын 1971 жылы Қазақ химия-технология институтының кіші ғылыми қызметкері ретінде бастаған. 1979-1983 жылдары «Облремстрой» тресінің Жаңақазалы шаруашылық есептегі құрылыс жөндеу учаскесінің бастығы, «Кызылордаремводстрой» тресінің №64 Қазалы жылжымалы механикаландырылған колоннасының бастығы, 1983-1992 жылдары Қазалы аудандық партия комитетінің екінші хатшысы, аудандық халық депутаттары атқару Кеңесінің төрағасы, Қызылорда облыстық халық депутаттары атқару Кеңесі төрағасының орынбасары, 1992-2004 жылдары Қызылорда облысы әкімінің орынбасары, Қызылорда қаласы әкімінің орынбасары, облыстық экономика басқармасының бастығы, Қазалы және Жаңақорған аудандарының әкімі, 2004-2013 жылдары Арал ауданының әкімі қызметін атқарды. Сонымен қатар, бүгінде «Шалқия Цинк ЛТД» АҚ басқарма төрағасының кеңесшісі, басқарма мүшесі қызметінде жұмыс істеп келеді.
Аймақ басшысы мерейтой иесіне облыстың ең жоғарғы наградасы “Құрмет грамотасын” табыстап, сый-сыяпатын көрсетті.
<blockquote>
 «Қазақ әдебиетінің абызы, Қазақстанның халық жазушысы, мемлекет және қоғам қайраткері Әбіш Кекілбаевтың: “Оңай көзде ойсырата іс тындыруға әркім де құштар. Қиын көзде бел бууға тек ел қамын жейтін ер жүректілер ғана тәуекел ете алады” – деген керемет сөзі бар еді. Міне, Нәжмадин ағамыз да еліміздің қиын-қыстау заманында елдің сөзін сөйлеп, кісілігімен қатар кішілігін де танытып, үлкен істерге үлес қосты. Сіздердің тәжірибелеріңіз, ақыл-кеңестеріңіз қазіргі жастар үшін аса қымбат»,- деді облыс әкімі Қуанышбек Ысқақов.
</blockquote>
Шараға Нәжмадин Түркбенұлын мерейтойымен құттықтап, ыстық ықыласын білдіру үшін замандас достары мен зиялы қауым өкілдері де арнайы келді. Олардың қатарында «Құрмет» орденінің иегері, Ауыл шаруашылық ғылымдарының кандидаты, “Сырдария ауданының құрметті азаматы”, Қоғам қайраткері Әбдіғаппар Әмірғалиев, Қазақстан Республикасына еңбек сіңірген экономисті, «Қызылорда қаласының және Жаңақорған ауданының құрметті азаматы», Қоғам қайраткері Қалқазбек Әжібеков пен “Шалқия ЦИНК” АҚ Бас директоры Дамир Кәрімов те болды.

Қоғам қайраткері Нәжмадин Мұсабаев 70 жаста

<a href="https://kyzylorda-news.kz/">Kyzylorda-news.kz.</a> 2019 жылы педагогикалық мамандықтарға түсу балы 50-ден 60-қа көтерілсе, биыл 70-ке жоғарылату жоспарланып отыр.
Педагогикалық ЖОО студенттерімен кездесуде Білім және ғылым министрі Асхат Аймағамбетов педагогикалық мамандықтарға талапкерлерді тарту үшін нақты шараларды қабылдау қажеттігіне тоқталды.
<blockquote>
 “Бүгінде ең үздік мектеп түлектерінің арасында мұғалім мамандығы айтарлықтай сұранысқа ие болмай отыр. Білім беру гранттарын тағайындау конкурсына қатысуға өтініш бергенде талапкерлер&nbsp;педагогика бағытын үшінші не төртінші кезекте таңдайды. Бұл педагогикалық мамандықтарға мектепті үздік не жақсы бітірмеген түлектер көбірек түсетінін көрсетеді”, – деді Асхат Аймағамбетов.
</blockquote>
Министр 2021 жылдан бастап жоғары оқу орындарының мемлекеттік емес, жеке өзіндік үлгідегі диплом беруі туралы норма күшіне енетінін айтты. Бұл норманың әскери және арнайы оқу орындарына қатысы жоқ. Мұндай өзгеріс жоғары оқу орындары арасындағы бәсекелестікті арттырып, ұсынылатын білім беру қызметтерінің сапасына қатысты жауапкершіліктің өсуін қамтамасыз етпек.
Асхат Аймағамбетов мектеп түлектері мен олардың ата-аналарын жоғары оқу орнын таңдауда мұқият болуға шақырды. Ендігі кезекте жұмысқа орналастыру кезінде жоғары оқу орнының беделі мен имиджіне мән беріледі.
Еске сала кетейік, білім және ғылым вице-министрі Бибігүл Асылова енді кез келген мұғалім өз жалақысын өзі есептей алатының <a href="https://kyzylorda-news.kz/bilim/qazaqstandyq-mughalimder-endi-zhalaqysyn-oezderi-eseptej-alady-43000/">мәлімдеді</a>.

Педагогикалық мамандықтарға түсу үшін енді ҰБТ-да 70 балл жинау қажет

<a href="https://kyzylorda-news.kz/">Kyzylorda-news.kz.</a> Қызылордада «Евразия» спорт кешенінде футболшы, шеберлер командасының ойыншысы Әбіл Қалымбетовты еске алуға арналған футзалдан ардагерлер арасында облыстық ашық турнир өткізілді.
Биыл жетінші мәрте ұйымдастырылған турнирге 12 команда қатысып, үздіктері анықталды.
Екі күнге созылған жарыстың қорытындысы бойынша «Қайсар» командасы бірінші орынды жеңіп алды.
Олар финалда «Петро Қазақстан» командасын ұтты. Ойынның негізгі уақыты тең аяқталғандықтан жеңімпаз тек айып добын орындау барысында анықталып, есеп 2:0 болды.
Жаңақорғандық «Сығанақ» командасы ІІІ орынды иеленсе, «Ардагер» командасы 
ІV орынды қанағат тұтты.
«Үздік қақпашы» номинациясы бойынша Жаңабек Әлназаров («Қайсар» командасы), 
«Үздік қорғаушы» – Берік Жаппасбаев («Ардагер» командасы), 
«Үздік шабуылшы» – Шамсиддин Иристаев («Сығанақ» командасы), «Мерген ойыншы» – Бахадир Турсынкулов («Сығанақ» командасы), «Үздік ойыншы» – Əкімжан Əбішев («Петро Қазақстан» командасы) марапатталды.
Жеңімпаз және жүлдегер командаларға кубок, диплом, ақшалай сыйақы, үздік ойыншыларға естелік сыйлықтар берілді.
<img src="https://kyzylorda-news.kz/wp-content/uploads/2020/02/3kaisar2.jpg" alt="" />
<img src="https://kyzylorda-news.kz/wp-content/uploads/2020/02/3kaisar3.jpg" alt="" />

Қызылордадағы футболдан ардагерлер арасында өткен турнир: «Қайсар» командасы – жеңімпаз

<a href="https://kyzylorda-news.kz/">Kyzylorda-news.kz.</a> Қызылорда қаласының №1 орталық ХҚО-да мүмкіндігі шектеулі жандарға арналған кабинет ашылды.
Мұнда олар мемлекеттік қызметтер, әлеуметтік төлемдер және құқықтық сұрақтары бойынша тегін кеңес алумен қатар, цифрлық дағдыларын арттырып, шығармашылығын шыңдамақ.
Жоба Еріктілер жылы аясында және «Қолжетімді Қазақстан» бағдарламасын жүзеге асыру бойынша іске асуда.
«Азаматтарға арналған үкімет» мемлекеттік корпорациясы» КЕ АҚ Қызылорда облысы бойынша филиалы «Қазақстан Коммунистік Халық партиясы» Қызылорда облыстық филиалымен және «Волонтеры Кызылорда», «Pro Bono», «Инклюзивті шығармашылық» қоғамдық қорлары, «Бітім» медиация орталығымен алты жақты меморандумға қол қойып, алдағы уақытта өтетін біріккен шаралар талданды.
<img src="https://kyzylorda-news.kz/wp-content/uploads/2020/02/3son2.jpg" alt="" />

Қызылорда ХҚО-да мүмкіндігі шектеулі жандарға арнайы кабинет ашылды

<a href="https://kyzylorda-news.kz/">Kyzylorda-news.kz.</a>&nbsp; 2020 жылдың 2 ақпанында Қазақстан Республикасы азаматтарының денсаулық қауіпсіздігін қамтамасыз ету мақсатында ҚР ДСМ Ұлттық шұғыл медицина үйлестіру орталығы елімізге ҚХР Ухань қаласында жүрген 83 қазақстандықты, оның ішінде 80 студентті жеткізді, хабарлайды премьер-министрдің баспасөз қызметі.
Ұшу барысында біздің азаматтарымызды барлық қорғау&nbsp;құралдарымен қамтамасыз етілген қазақстандық дәрігерлер сүйемелдеді.
Денсаулық жағдайы тексерілгеннен кейін елге оралған азаматтар қаладан 7 шақырым жерде орналасқан елорданың көпбейінді ауруханасы жанындағы инфекцияға қарсы арнайы бөлінген корпуста 14 күндік карантинге жатқызылды.
Клиника инфекциялық қауіпсіздіктің қажетті технологияларымен, заманауи диагностикалық, емдік және реанимациялық құралдармен&nbsp;жабдықталған, тиісті медициналық қызметкерлері бар.
Медициналық мекемеде эвакуацияланған азаматтар қосымша тексеруден, бірінші кезекте, коронавирустық инфекцияға тестілеуден өтеді.
Карантин кезеңі кезінде елге келген адамдармен тек аса қауіпті инфекциялармен жұмыс істеу тәжірибесі бар медициналық персонал ғана байланыста болады.
Елге жеткізілген азаматтардың туған-туыстары мен жақындары хабардар етілді және олар карантиндік кезеңнің регламентімен таныстырылды.
Мемлекет басшысының тапсырмасы бойынша ҚХР-ға 13,6 тонна көлемінде медициналық бұйымдар түрінде гуманитарлық көмек жеткізілді.
Қырғызстан Республикасы, Беларусь Республикасы және Армения Республикасы биліктерінің өтініші бойынша осы елдердің де азаматтары ҚХР Ухань қаласынан эвакуацияланды.
Еске сала кетейік, барлық қажетті ақпаратты ұсыну үшін тәулік бойы 1406 <a href="https://kyzylorda-news.kz/kogam/elimizde-koronavirwsqa-bajlanysty-zhedel-zheli-iske-qosyldy-42034/">сall-орталығы</a> жұмыс істейді.
ҚР Үкіметі жанындағы ҚР аумағында коронавирустық инфекцияның пайда болуы мен таралуына жол бермеу жөніндегі ведомствоаралық комиссиясы&nbsp; азаматтарды жалған&nbsp;ақпаратты таратпауға, ақпараттарды ресми дерек көздерінен алып, сенуге шақырады.

Қазақстан және Қызылорда облысының жаңалықтары: Басты жаңалықтар old