<a href="https://kyzylorda-news.kz/">Kyzylorda-news.kz.</a> Алматы қалалық Тауарлар мен қызметтердің сапасы мен қауіпсіздігін бақылау департаменті басшысы Айзат Молдағасымованың Денсаулық сақтау министрлігі мақұлдаған алгоритм Коронавирустан қайтыс болған адамды жерлеу жерлеу тәртібі бар екенін алға тартты. Бұл туралы <a href="https://azattyq-ruhy.kz/society/5970-krematorii-zhok-koronavirus-ku-rbandary-arnaiy-poligonda-zherlenedi/amp">azattyq-ruhy.kz</a> жазды.
Коронавирустан қайтыс болған адамды жерлеу алгоритмі қалалық Коронавируспен күресті үйлестіру штабына ұсынылып, бекітілгенін Алматының бас санитар дәрігері алға тартты. Оның тәртібі бойынша марқұмның жерлеуге қатысатын туыстарына, жалпы жамағатқа жұқтырмау басты назарда болады.
<blockquote>
 “Бізде алгоритм бекітілген. Ол қолымызда бар. Аса қауіпті инфекциямен ауырып қайтыс болғандарға қатысты кремация жасалуы керек. Бірақ ол біздің елде жоқ. Өлікті сою процедурасы жасалмайды. Дезинфекциядан соң, жерлейтін арнайы полигонға апарып жерлеу жағдайлары жазылған алгоритм қолымызда тұр.
 Адамның жаназасы зираттың басында шығарылады, жерлейтін арнайы топ құрылып, оларға арнайы қорғау киімдері беріліп, белгілі жұқпалы аурудың алдын алу ережелерін сақтай отырып, іске асырылады. Жерлеу рәсіміне эпидемиолог дәрігерлер қатысып, басқарады. Жерлеу біткесін жерлеу тобы медициналық бақылауға алынып, тексеріледі”, &nbsp;– деді Алматының бас санитар дәрігері.
</blockquote>

Коронавирус: қайтыс болғандар қайда жерленеді?

<a href="https://kyzylorda-news.kz/">Kyzylorda-news.kz</a>. Қызылорда облыс әкімінің өкімімен Сәрсенбаев Қайратбек Әубәкірұлы Қызылорда облысының жұмылдыру дайындығы басқармасының басшысы лауазымына тағайындалды.
Қайратбек Әубәкірұлы 1961 жылы дүниеге келген. Жамбыл гидромелиоративтік-құрылыс институтын «инженер-гидротехник» және Қорқыт Ата атындағы Қызылорда мемлекеттік университетін «экономист-бухгалтер» мамандықтары бойынша бітірген.
Еңбек жолын 1983 жылы Сырдария суару жүйелері басқармасының инженері ретінде бастаған.
&nbsp;1999-2012 жылдары Сырдария аудандық экономика және қаржы бөлімінің меңгерушісі, Сырдария аудандық қаржы бөлімінің меңгерушісі, Сырдария ауданы әкімінің орынбасары қызметтерін атқарған.
2012-2017 жылдары – Қызылорда облысының қаржы басқармасының басшысы, Шиелі ауданының әкімі.
2017 жылдың қазан айынан бастап осы кезге дейін Жалағаш ауданының әкімі қызметін атқарып келді.
<img src="https://kyzylorda-news.kz/wp-content/uploads/2020/03/akimat-tagajyndaw.jpg" alt="" />

Қызылорда облысының жұмылдыру дайындығы басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда қаласында Желтоқсан және Ергешбаев көшелерінің тұрғындары жарықсыз қалды.
Мемлекеттік нөмірі NB 7919 AQ «Subaru» автокөлігі кернеуі 10/0,4 кВ әуе желісінің №6 темір-бетон тірегіне соққан. Салдарынан 622 жеке және 146 заңды тұлға электр энергиясынан ажыратылды.&nbsp;
<blockquote>
 «Үзілген тіректен сымдар алынып, бұл ретте ТП-10/0,4 кВ трансформаторлық қосалқы станциялардың жүктемелері осы желіден басқа желілерге ауыстырылды. “Қызылорда ЭТТК” АҚ электр желілерінің иесі электр энергиясын тұтынушылардың құқықтарын, бостандықтары мен заңды мүдделерін, олардың денсаулығы мен санитарлық-эпидемиологиялық салауаттылығын қорғау, өз меншігі мен қауіпсіздігін қорғау мақсатында Атомдық және энергетикалық қадағалау мен бақылау комитетінің Қызылорда облысы бойынша департаментіне әкімшілік жауапкершілікке тарту үшін электр желілерін қорғау ережелерін бұзу жөніндегі материалдарды тапсырды», – делінген департаменттің таратқан хабарламасында.
</blockquote>

Қызылордадағы орталық көшелер жарықсыз қалды

<a href="https://kyzylorda-news.kz/">Kyzylorda-news.kz.</a> Қорқыт Ата атындағы&nbsp;Қызылорда мемлекеттік университетінің ғалымдары вирустар мен бактерияларға қарсы әсері жоғары антисептик ойлап тапты.
Бұл сұйықтықтың артықшылығы қолданылғаннан кейін ұзақ уақыт бойы күшін жоймайды. Химия ғылымдарының кандидаты, профессор, Нұрбол Аппазов өнертабысын жақын күндері патенттеп, өндіріске ұсынуды жоспарлап отыр. Әзірге ол өз шәкірттерімен бірге университет зертханасында залалсыздандыру сұйықтығының күніне 20 литрін әзірлеп, оқу орны қызметкерлерін қамтамасыз етуде.
<blockquote>
 «Дәріханаларда антисептиктердің жетіспеушілігі және кейбірінің сапасының төмендігін анықтағаннан кейін химиялық білімімізді пайдалы іске жаратуға ниеттендік», – дейді ғалым.
</blockquote>
Осылайша олар коронавируспен күрес шараларына үлес қосуды көздеген.
<blockquote>
 “Біз әзірлеп шыққан сұйықтық сол мезетте микроағзаларды жойып, әрі қарай оның күші бірнеше сағатқа дейін созылады. Бірақ біз ең кемі бір сағатқа дейін созылатын қасиетін айтып отырмыз. Сондай-ақ қолды құрғатпай, ылғалдандырып, терінің қасиеттерін де сақтайтын мүмкіндіктері бар”, – дейді Қорқыт ата атындағы ҚМУ химиялық зерттеу және технологиялар институтының директоры Нұрбол Аппазов.
</blockquote>

Қызылорда ғалымдары әсері жоғары антисептик ойлап тапты

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Қуанышбек Ысқақов облыс халқын әз-Наурыз мерекесімен құттықтады.
Құрметті жерлестер!
Табиғат-Ана жаңаратын, тіршілік атаулыға жан бітіп, жаңғыратын, жер-дүние бусанып, күн мен түн теңелетін Ұлыстың ұлы күні – Наурыз мейрамы баршаңызға құтты болсын!
Бес мыңжылдық тарихы бар әз-Наурыз қай кезде де еңсесі биік елдіктің, болаттай берік бірліктің, ырыс пен ынтымақтың мерекесі болып келген.
Бұл күні қыстан аман шықтық деп қуанған жұрт ағайын арасында болған өкпе-ренішті ұмытып, бір дастархан басында табысып, бір-біріне ізгі тілектерін білдіреді. Жаңа жылға жақсылықпен жеткеніне шүкіршілік етіп, келер жылдан кемелдік тілеп, ақ пейілдерін арнайды.
Халқымыз бұл кезеңді береке-бірлік, ырыс-құт мезгілі санаса, мейрамды кешірім мен мейірімнің, үміт пен сенімнің, ізгілік пен түсіністіктің мерекесіне балаған.
Қазіргі уақытта Наурыз жаңа сипатқа ие болды, ұлтына, діни сеніміне қарамастан Қазақстанды мекендейтін барлық этностың ортақ мерекесіне айналды. Этносаралық, бауырластық қарым-қатынастардың нығаюына, ұлттық салт-дәстүрлердің қайта жаңғыруына үлес қосты.
Осы ретте, Тұңғыш Президентіміз – Елбасы Нұрсұлтан Әбішұлы Назарбаевтың бастамасымен жасалған «Болашаққа бағдар: рухани жаңғыру» және «Ұлы даланың жеті қыры» бағдарламаларына сәйкес «Ұлыстың ұлы күні Наурыз мейрамын тойлаудың мәні жоғары.
Өйткені, Наурыз – ұлттық бірегейлік пен үйлесімнің, береке мен бірліктің мерекесі.
Қадірлі жерлестер!
Биыл Наурызды мерекелеудің жаңашылдығы енгізілген еді.
Алайда, бүкіл әлемді жайлаған қатерлі індетке байланысты, өкінішке қарай, Наурыз мейрамын бұқаралық сипатта атап өтуге мүмкіндік болмай отыр.
Дегенмен, төл Жаңа жылымызды отбасылық мерекеге айналдырып, мерекені жақын-жуықтың арасында қарсы алудың да мәні зор.
Қазіргідей күрделі кезеңде денсаулығымыздың қауіпсіздігі үшін сақтық шараларын орындауымыз қажет.
«Тәртіпке бас иген құл болмайды» – дейді дана халқымыз.
Президентіміз Қасым-Жомарт Кемелұлы Тоқаевтың тапсырмасына сәйкес, қазіргі таңда, облыс көлемінде коронавирус инфекциясының алдын алу үшін нақты шаралар қабылданды.
Күнделікті арнайы штаб жұмыс істеуде.
Облыста барлық медициналық ұйымдар үздіксіз қызмет көрсетуде. Сауда орындары мен базарларда азық-түлік тауарларының қоры жеткілікті.
Барлық әлеуметтік міндеттемелерді орындау тоқтатылмайды.
Ардақты ағайын!
Ұлтымыздың мерейін өсіріп, бар болмысымызды айшықтайтын Ұлыстың ұлы күні – Наурыз мейрамы елімізге, әрбір отбасына ауызбіршілік пен қуаныш, құт-береке, бақыт пен молшылық әкелсін!
Ұлыс оң болсын, ақ мол болсын!
Ұлыстың ұлы күні құтты болсын!

Қызылорда облысының әкімі сырбойылықтарды әз-Наурыз мейрамымен құттықтады

<a href="https://kyzylorda-news.kz/">Kyzylorda-news.kz.</a> Нұр-Сұлтан, Алматы қалаларына коронавирус инфекциясы анықталып, шет мемлекеттерден келген азаматтардың тіркелуіне байланысты карантин жарияланып, соған сәйкес, еліміздің барлық облыстарында инфекцияның алдын алу бағытындағы шаралар күшейтілген болатын.
Қызылорда облысы бойынша коронавирус инфекциясы тіркелген жоқ. Дегенмен, коронавирус инфекциясының алдын алу бағытында аймағымызда да бірқатар жоспарлы жұмыстар жүргізілуде.
Нұр-Сұлтан және Алматы қалаларында COVID-19 инфекциясының тіркелуіне байланысты 2020 жылдың 19 наурызы сағат 00:00-ден бастап екі мегаполисте карантин режимі енгізілді және 22 наурыздан бастап толығымен жабылды.
<blockquote>
 «Осыған орай, біздің облысқа да азаматтар келе бастады. Коронавирус инфекциясының аймақта таралуының алдын алу мақсатында сақтық шаралары күшейтілуде. Яғни барлық қала, аудан кесіміндегі тауарлар мен көрсетілетін қызметтердің сапасы мен қауіпсіздігін бақылау және денсаулық сақтау саласы мамандары жергілікті аймақтар бойынша үй аралау жұмыстарын бастап, аталған қалалардан келген азаматтарды 14 күнге қоңырау шалу арқылы медициналық бақылауға алады. Қазіргі таңда сырттан келген азаматтарды Қызылорда облысы аумағына, яғни Жезқазған жолы, Арал, Жаңақорған аудандары жолдарына кемінде 4 бақылау өткізу бекетін (блокпост) қою бойынша жұмыстар жүргізілуде», – деп атап өтті облыстық Денсаулық сақтау басқармасы.
</blockquote>
Сондай-ақ, медицина қызметкерлері облыс шекараларына келушілердің тізімін анықтап, денсаулықтарын бақылауға алатын болады.
Осыған орай, облыстық Денсаулық сақтау басқармасы барша азаматтардан карантин жарияланған қалалардан келгенде және инфекцияның белгілерін байқаған жағдайда жедел жақын орналасқан емханаларға көрінуін, 103 жедел жәрдем қызметіне және 40-00-01 сенім телефонына хабарласуларын сұрайды.

Коронавирус: Қызылорда облысының аумағында 4 блокпост қойылады

<a href="https://kyzylorda-news.kz/">Kyzylorda-news.kz.</a> Азаматтардың қауіпсіздігін қамтамасыз ету және короновирустың таралуымен күресу мақсатында Қызылорда облысының кәсіпкерлер палатасы қызметкерлердің бір бөлігін қашықтықтан жұмыс режиміне ауыстырды. Палата кеңсесінен, сондай-ақ Кәсіпкерлерге қызмет көрсету орталығынан кәсіпкерлер бұрынғынша кеңес ала алады.
Қызылорда облысы кәсіпкерлер палатасының сенім телефоны +7 (7242) 40-09-81, call-орталық +7 777 764 33 11.
Қызылорда облысы кәсіпкерлер палатасының орталық офисінде (Қызылорда қ-сы, Желтоқсан к-сі 12, «Бастау» бизнес-орталығының 11-қабаты) әр бөлім бойынша бір кезекші қызметкер жұмыс істейді.
Палатаның 7 аудандық филиалы штаттық режимде жұмыс жасауда. Кеңес беру қызметі онлайн форматқа көшірілді.
Коронавирустың өршуінен бизнестері зардап шеккендер үшін «Атамекен» Ұлттық Кәсіпкерлер Палатасы базасында, қазақстандық бизнес үшін жағымсыз салдарды нивелирлеу жөніндегі жедел штаб жұмысын жалғастыруда. Қазіргі уақытта штаб кәсіпкерлердің мәселелерімен тәуекелдері туралы ақпаратты, сондай-ақ бизнеске зиянды азайту жөніндегі ұсыныстарды жинаумен және талдаумен айналысуда.
Орыс тіліндегі сауалнамаға мына <a href="https://docs.google.com/forms/d/e/1FAIpQLSdi2fEgi7WEbkEbnHqJdkchBe-GsOyJYMLaaIixN-7dOCH2LQ/viewform?fbclid=IwAR2N1mEfkeHCq0wkEwSBQ2Gd2pUlGHsdCYSoF_HdYcCcHRV5BEYBpOBnuPw">сілтеме</a> бойынша өтуге болады.
Қазақ тіліндегі сауалнамаға мына <a href="https://docs.google.com/forms/d/e/1FAIpQLSeFthA-kKhUgqk2C1E1lFrS6m37UzuS7zqtfSr9ln6IS-alrw/viewform?fbclid=IwAR0gfEHaty2PEp8qcOOAYQQwMXLYwBYVAB12kySeLap3eX8p01guRg2ZPz8">сілтеме</a> бойынша өтуге болады.
Сонымен қатар, штаб күнделікті негізде бизнеске қатысты ағымдағы жағдай бойынша ақпараттандыратын болады. Ақпаратты Ұлттық кәсіпкерлер палатасының <a href="https://atameken.kz/kk/?fbclid=IwAR16OhmrJotnsaRoil1irBFFWsGuDM_ZxndtWFOeZxpoEJCNqOzD2rWjUfI">atameken.kz</a> ресми сайтынан немесе әлеуметтік желілердегі <a href="https://web.facebook.com/atamekenkz/">Facebook</a> және <a href="https://www.instagram.com/atamekenkz/?hl=ru&fbclid=IwAR0dQERtG0_CSC38FAs6YS6faOW6jdby6wZdc9Cd4RTcTVTw5bQDosSFVnw">Instagram,</a> сондай-ақ штаб жетекшісінің орынбасары – Шыңғыс Темірдің <a href="https://web.facebook.com/groups/AtamekenZashita/?ref=group_header">парақшасынан</a> табуға болады. Барлық кәсіпкерлерден сілтеме бойынша сауалнаманы толтырып, таратуларыңызды, сондай-ақ «Атамекен» ҰКП call-орталығына 1432 хабарласуды сұраймыз.
Бизнес тарапынан жиі қойылатын сұрақтардың жауаптары осы сілтемеде: <a href="https://atameken.kz/kk/news/category/pomosh-biznesu?fbclid=IwAR0ak7ghLVuFmE7AtaXiTlenzeIEq_NSVepl_ymelDDlL4N0zw892bgR8sc">#ТӨТЕНШЕЖАҒДАЙДАҒЫБИЗНЕС</a>

Төтенше жағдай: Қызылордалық кәсіпкерлер қайда хабарласа алады?

<a href="https://kyzylorda-news.kz/">Kyzylorda-news.kz.</a> Елбасы, «Nur Otan» партиясының Төрағасы Н.Ә.Назарбаевтың тапсырмасына орай, карантин жарияланған Нұр-Сұлтан және Алматы қалаларындағы әлеуметтік әлсіз топтарға қолдау көрсетуге бағытталған «BIZBIRGEMIZ» акциясын қызылордалық нұротандықтар қуаттап, өңірдегі әлеуметтік әлсіз топтарға қолдау көрсетті.
Акцияға «Jas Otan» жастар қанатының еріктілерінен жасақталған шағын топтар, кәсіперлер өз үлестерін қосты.
Байланыссыз тарату жолымен жүргізіліп басталған акция аясында өңірдегі 1150-ге жуық әлеуметтік әлсіз топ өкілдеріне қолдау көрсетілмек.
Айта кетейік, Партия Төрағасының тапсырмасына орай, партияның «Ардагерлерді ардақтайық», «Кедергісіз келешек», «Бақытты отбасы» жобалары аясында жоғарыда аталған қалалардағы ағайынға атаулы көмек көрсету үшін 150 млн тг бағытталды, Сонымен қатар партияның Орталық аппараты мен барлық филиалдарының қызметкерлері қосымша көмек ретінде өздерінің бір күндік жалақыларын аударды.
Коронавирустың таралуына жол бермеуге бағытталған шектеу шараларын енгізуге байланысты облыс бойынша барлық филиалдардың қоғамдық қабылдау бөлмелері азаматтарды жеке қабылдау жұмыстарын уақытша тоқтатты. Бүгінде азаматтарды қабылдау жұмыстары Сall-орталықтар мен партияның онлайн-сервистері қызметі арқылы жүргізілуде.
<img src="https://kyzylorda-news.kz/wp-content/uploads/2020/03/02-48.jpg" alt="" />
<img src="https://kyzylorda-news.kz/wp-content/uploads/2020/03/03-28.jpg" alt="" />

Сырбойылық нұротандықтар «BIZBIRGEMIZ» акциясына үлес қосуда (ФОТО)

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаевтың облыс орталығындағы нысандарды аралау жұмысы жалғасын тауып келеді. Бұл жолы шаһар басшысы өзі уәде еткендей, қаладағы кәріз насостық станцияларында болып, онда жүргізіліп жатқан жұмыс барысымен танысты.
Айта кетейік, бұған дейін қала әкімінің жергілікті <a href="https://kyzylorda-news.kz/kogam/qyzylorda-qalasynyng-aekimi-nurlybek-naelibaev-zhwrnalistermen-kezdesti-48678/">БАҚ өкілдерімен өткен кездесуінде</a> қаладағы өзекті мәселелердің бірі кәріз жүйесі проблемасы қозғалған болатын. Журналистермен өткен басқосуда бұл мәселе бойынша қала тұрғындарынан көп шағымдар түсетіні айтылған еді. Қолқаны қапқан қолаңса иіс қысы-жазы кетпей, кәріз насостық станцияларына жақын орналасқан көпқабатты үй тұрғындарының базынасы шаһар басшысына жетті. Бұл мәселе үнемі көтеріліп және одан хабары бар екенін айтқан қала әкімі алдағы уақытта тілшілер қауымымен бірге аталған станцияларды аралап, мәселені түбегейлі шешуге бар мүмкіндікті пайдаланатынын жеткізген болатын.
Аталған кездесуден кейін қаладағы кәріз жүйесі станцияларын аралау, ондағы жұмыс барысымен танысу сәті де түсті. Шаһар басшысы қала орталығында орналасқан №19 кәріз насостық станциясында болды.
«Қызылордада су жүйесі» мекемесіне қарасты барлығы 62 дана кәріз насостық станциялары бар. Солардың бірі қаланың ортасында орналасқан №19 кәріз насостық станциясы. Қазіргі таңда бұл нысанда күрделі жөндеу жұмыстары жүргізіліп келеді.
Жалпы «Өңірлерді дамыту – 2020» бағдарламасы арқылы қаладағы 23 дана кәріз насостық станциясын қайта жаңғырту жұмыстарына республикалық бюджеттен 2,9 млрд теңге қаржы бөлінген. Нысандарды жөндеу жұмыстарын елордалық «Vic LTD» ЖШС жүргізуде.
<blockquote>
 «Бұл жобаның ерекшеліктерін атап өтер болсақ, енді қаладағы кәріз насостық станцияларына Швеция елінде жасалынған, энергоүнемдегіш «Флюгт» маркалы насос қондырғылары орнатылады. Станциялардың қабылдау камераларына қатты қалдықтарды ұнтайтын автоматты қондырғылар қарастырылған. Вентиляция жүйелерінде газоанализаторлары автоматты түрде қосылып, филтрлері көміртек тотығы газдарын атмосфераға тазартып шығарып отырады», – дейді «Қызылордада су жүйесі» КММ директоры Марат Жәмиев.
</blockquote>
Елу жылдан соң қайта жаңарған кәріз насостық станциялардың құрылыс монтаж жұмыстары аяқталғаннан кейін автоматты түрде жұмыс жасайтын болады. Жарты ғасыр қызмет етіп келген станция кезекші машинист жұмысшыларды қажет етпейді. Сондай-ақ жұмыс жасау режимі «Скада» жүйесі арқылы орталық диспетчер бөліміне жіберіліп отыратын болады. Айта кетейік, қаладағы кәріз насостық станциялар 1968-70 жылдары іске қосылған.
<blockquote>
 «Қызылорда қаласында қазіргі таңда 62 кәріз насостық станция бар. Оның 8-і соңғы жылдары жаңадан салынды. Қалған кәріз насостық станциялар өте ескі, олар Кеңес үкіметі кезінде салынған. Сондықтан 2016 жылы жоба жасалып, «Өңірлерді дамыту – 2020» бағдарламасы арқылы 2017 жылдан бастап қаржы бөліне бастады. 2017 жылы республикалық бюджеттен 200 млн теңге қаржы бөлінді. 2018 жылы 500 млн теңге қаржы қаралса, өткен жылы қалған қаражаты бөлінген болатын. Қазіргі таңда 2 млрд теңге қаржы бөлініп отыр. Енді жуырда облыстық бюджеттен 300 млн теңге қаржы бөлінетін болады. Ағымдағы жылдың мамыр айында бұл жоба толығымен аяқталып, іске қосылады. Қалада осы кәріз насостық станцияларынан жағымсыз иістер шығатыны белгілі. Тұрғындар тарапынан реніштер айтылып келеді. Енді жоба нәтижесінде сол жағымсыз иістерден арылатын боламыз. Сонымен қатар шығын да азаяды», -деді қала әкімі.
</blockquote>
Шаһар басшысы өз сөзінде бұған дейін қалада кәріз насостық станцияларының жөндеу жұмысын жүргізу кезінде қаза болған жұмысшылардың бар екенін де айтып өтті.
<blockquote>
 «Бізге ең алдымен адам өмірі қымбат. Сондықтан осы жоба аясында біз мұндай қауіп-қатердің алдын алатын боламыз. Енді қаладағы кәріз насостық станцияларындағы жұмыстар Еуропалық стандарттарға сай болады. Негізі мердігер компания жұмысты алдағы маусым айында аяқтауы қажет. Дегенмен жұмыс барысы біздің қатаң бақылауымызда болғандықтан 1 мамырға дейін толық аяқталуы керек. Сол уақытта қаладағы 23 кәріз насостық станцияны іске қосатын боламыз», – деді Нұрлыбек Нәлібаев.
</blockquote>
Бұл жоба алдағы уақытта да өз жалғасын табатын болады. Өйткені қалған 31 кәріз насостық станцияларды да күрделі жөндеуден өткізу жоспарланған. Осы жұмыстардың барлығы аяқталған соң тұрғындардың мазасын қашырған жағымсыз иіс түгелімен жойылады. Яғни, 2021 жылдан бастап қала тұрғындары таза ауада кең тыныстайды.
<blockquote>
 «Жалпы құрылыс монтаж жұмыстары 2 кезең бойынша жүзеге асады. Бірінші кезеңі аяқталуға жақын. Ал екінші кезеңде 31 кәріз насостық станция жөндеуден өтіп, келер жылы толығымен аяқталатын болады. Оған 4 млрд теңгеге жуық қаржы қажет», – деді қала әкімі.
</blockquote>
Қала әкімінің ат басын бұрған келесі нысаны Қорқыт ата көшесі мен Торайғыров көшесінің қиылысында орналасқан №18 кәріз насостық станция болды. Мұнда да жөндеу жұмыстары жоспарға сәйкес жүргізіліп келеді. Бұл нысан да алдағы уақытта толығымен іске қосылады.
Динара МАХАНОВА
<img src="https://kyzylorda-news.kz/wp-content/uploads/2020/03/zhagymsyz-iis-kaz-1.jpg" alt="" />
<img src="https://kyzylorda-news.kz/wp-content/uploads/2020/03/zhagymsyz-iis-kaz-2.jpg" alt="" />
<img src="https://kyzylorda-news.kz/wp-content/uploads/2020/03/zhagymsyz-iis-kaz-4.jpg" alt="" />
<img src="https://kyzylorda-news.kz/wp-content/uploads/2020/03/zhagymsyz-iis-kaz-5.jpeg" alt="" />
<img src="https://kyzylorda-news.kz/wp-content/uploads/2020/03/zhagymsyz-iis-kaz-6.jpeg" alt="" />

Қызылорда қаласы жағымсыз иістен арылатын күн алыс емес (ФОТО)

<a href="https://kyzylorda-news.kz/">Kyzylorda-news.kz.</a> Қазақстанда коронавирус туралы жаңа сайт іске қосылды. Бұл туралы ҚР Ақпарат және қоғамдық даму министрі Дәурен Абаев мәлімдеді.
<blockquote>
 «Құрметті достар! Қазір азаматтарды коронавирусқа қатысты жедел әрі сенімді мәліметтермен ақпараттандыру – ең маңызды мәселе. Кей уақытта қоғамды ақпараттандыру мен қарым-қатынастың жеткілікті дәрежеде тиімді болмай жатқанын мойындау керек. Түрлі ақпарат құралдары, әсіресе мессенджерлер арқылы жалған ақпараттың таралуы көптеген қиындықтар туындатуда. Осы орайда&nbsp;<a href="https://l.facebook.com/l.php?u=http%3A%2F%2Fwww.coronavirus2020.kz%2F%3Ffbclid%3DIwAR0Eowp51hxwYEpT7nacxO6eNTmCjhUt56FCP4l71yGn1wiqov9OWOuuYLo&h=AT0ipzpvbJzR3WLvgvbgXw7kYDwid5hJTsgJjy5jZ1he4DS6KsFw1OiZW2WXbG03M29W6r2tlcU7kaT1aCZ-ub7Ac2c40nNUe5B_a6JWTO6F-2TgYiF1h1zKLkUEiiZCzSQXUwtuuhAoIKVx7C9DpXN208wSxzN8_Q">coronavirus2020.kz</a>&nbsp;сайтының іске қосылғанын хабарлаймын. Бұл ресурста төтенше жағдай бойынша, карантин кезіндегі тәртіп пен мемлекеттің коронавирусқа қарсы жасап жатқан шаралары жөнінде, сондай-ақ, желіде тараған жалған мәліметтерді теріске шығару және басқа да барлық өзекті ақпараттар жинақталады», – деп жазды министр&nbsp;<a href="https://www.facebook.com/story.php?story_fbid=950617102023682&id=100012262025729">Facebook</a>&nbsp;парақшасында.
</blockquote>
Сайтта сонымен бірге аурудың алдын алу, белгілері, аурудың алғашқы белгілері байқалғанда жасалатын әрекеттердің ережелері жарияланған және бұл мәліметтер халық пайдаланып, тарату үшін инфографика, нұсқаулық түрінде берілген.
<blockquote>
 «Азаматтар үшін сайтта арнайы сұрақ-жауап айдары болады, ол жерде әрбір пайдаланушы өзіне қажетті сауалына жауап ала алады. Сіздерден осы мәліметті таратуды және сенімді ақпарат көздеріне ғана жүгінуді сұраймын», – дейді Дәурен Абаев.
</blockquote>

Қазақстанда коронавирус туралы сайт іске қосылды

<a href="https://kyzylorda-news.kz/">Kyzylorda-news.kz.</a> Қызылорда облыстық білім және ғылым қызметкерлерінің кәсіподақ ұйымы өздерінің аз қамтылған 362 отбасына 5&nbsp;430&nbsp;000 теңге тұратын азық-түлікпен көмек көрсетті.
Аталған ұйым әлемді алаңдатқан коронавирус кезінде бастауыш кәсіподақ ұйым төрағаларымен жедел түрде тікелей байланысып, аз қамтылған 362 отбасының әрқайсысына 15000 теңге көлемінде азық-түлікпен қамтамасыз ету жөнінде шешім қабылдаған.
<blockquote>
 «Әлемді шарпыған кесел біздің елімізді де айналып өтпеді. Бүгінгі таңда мұнай бағасының төмендеуі және короновирустық пандемияның таралуы әлем мемлекеттерінің ішкі жағдайына кері әсерін тигізуде. Қазақ халқы көптеген қиын-қыстау кезеңді бастан өткерді. Қиындықты еңсеруде еліміздің бірлігі, жомарттығы себеп болған. Дәл осы шақта да біздің бірлігіміз бекем болуы қажет. Қоғамның ең үлкен бөлігі ретінде білім және ғылым қызметкерлерінің Қызылорда облыстық кәсіподақ комитеті ұйымның қамқорлықты қажет ететін мүшелеріне қолдау көрсетуді назардан тыс қалдырмады. Біздің қоғамдық ұйым әлемді әурелеген COVID-19 пандемиясы тұсында қалалық, аудандық кәсіподақ комитеттерінің және әрбір бастауыш кәсіподақ ұйым төрағаларымен жедел түрде тікелей байланысып, аз қамтылған 362 отбасының әрқайсысына 15000 теңге көлемінде азық-түлікпен қамтамасыз етті. Еліміз қиын жағдайдан аман өтіп шығу үшін бізге ынтымақ керек. Өзімізге артылған жауапкершілікті сезініп, көмек керек жандарға қол ұшын созуға әрдайым дайынбыз», – деп мәлімдеді біздің ақпарат агенттігіне Қызылорда облыстық білім және ғылым қызметкерлері кәсіподақ комитетінің төрайымы Гүлнар Есқалиева.
</blockquote>
Айта кетейік, ұйым мүшелері осыған дейін облыстағы барлық орта білім беру ұйымдарындағы &nbsp;<a href="https://kyzylorda-news.kz/bilim/qyzylorda-oblysyndaghy-barlyq-mektepte-kishi-qyzmetkerlerge-zhaerdem-berw-akcijasy-oetkizildi-foto-47448/">кіші қызметкерлерге жәрдем беру акциясын</a> өткізген болатын.
<img src="https://kyzylorda-news.kz/wp-content/uploads/2020/03/biz-birgemiz-kaz-2.jpg" alt="" />
<img src="https://kyzylorda-news.kz/wp-content/uploads/2020/03/biz-birgemiz-kaz-3.jpg" alt="" />
<img src="https://kyzylorda-news.kz/wp-content/uploads/2020/03/biz-birgemiz-kaz-4.jpg" alt="" />
<img src="https://kyzylorda-news.kz/wp-content/uploads/2020/03/biz-birgemiz-kaz-5.jpg" alt="" />

Қызылордада білім және ғылым қызметкерлерінің кәсіподақ ұйымы 5,5 млн теңге қайырылымдылық жасады (ФОТО)

<a href="https://kyzylorda-news.kz/">Kyzylorda-news.kz.</a> Нұр-Сұлтан қаласында тағы 7 адам коронавирус жұқтырды.
<blockquote>
 «Коронавирус індетін жұқтырған тағы 7 адам Нұр-Сұлтан қаласында тіркелді. Осы сағатта Алматы қаласында – 19 адам, Нұр-Сұлтан қаласы бойынша 25 адам, жалпы 44 науқас тіркелді» делінген Денсаулық сақтау министрлігі таратқан ақпаратта.
</blockquote>

Қазақстан және Қызылорда облысының жаңалықтары: Басты жаңалықтар old