<a href="https://kyzylorda-news.kz/">Kyzylorda-news.kz.</a> Қазақстан Республикасының Тұңғыш Президенті – Елбасы Нұрсұлтан Назарбаевтың қазақстандықтарды 1 мамыр – Қазақстан халқының бірлігі күнімен құттықтады.
***
Құрметті отандастар!
Баршаңызды Қазақстан халқының бірлігі күнімен шын жүректен құттықтаймын!
Бұл мейрам ұлттық болмысымызды айқындайтын асыл қасиеттеріміз – достықты, сенімді және патриотизмді дәріптейді.
Мен ширек ғасыр бұрын осы мерекені белгілеу туралы шешім қабылдаған едім. Өткен жылдар ішінде біз еліміздің көпұлтты және көпконфессиялы құрылымын стратегиялық артықшылығымызға айналдыра алдық.
Қазақстан береке-бірліктің арқасында түрлі қиындықты еңсеріп, бүкіл әлемнің құрметіне бөленді және мемлекет құру ісінде зор жетістікке жетті.
Бейбітшілік пен қоғамдық келісім әрдайым елдігімізді бекемдейтін қастерлі құндылығымыз болып қала береді.
Біз биыл Қазақстан халқы ассамблеясының 25 жылдығын атап өтеміз. Бұл – барлық этнос өкілдерін мемлекет құрушы ұлттың төңірегіне топтастыратын және тәуелсіздігімізді нығайтуға ықпал ететін бірегей институт.
Халқымыздың ырыс-ынтымағы тарих пен тағдыр сыйы ғана емес, әрқайсымыздың ерен еңбегіміз бен зор жауапкершілігіміздің нәтижесі.
Бірлік күні биыл әдеттен тыс жағдайға тұспа-тұс келіп отыр. Бүкіл әлемді жайлаған індет біздің елімізді де әбігерге салды.
Бұл сынақтан да сүрінбей өтіп, күш-қуатымызды одан әрі арттыра түсеміз деп сенемін. Осы жолда достық, бірлік, келісім және өзара қолдау қағидаттарын берік ұстанғанымыз абзал.
Баршаңызға мықты денсаулық пен бақ-береке, елімізге татулық пен толағай табыс тілеймін!

Елбасы қазақстандықтарды 1 мамыр күнімен құттықтады

<a href="https://kyzylorda-news.kz/">Kyzylorda-news.kz.</a> Қазақстандықтар карантин басталғалы бері ХҚО-ның бірыңғай терезесінен 76 мыңнан астам дайын құжатын алып кеткен. Бұл құжаттардың басым бөлігі карантин барысында онлайн рәсімделген, қалған бөлігі – ХҚО жабылғанға дейін.
Естеріңізге салайық, 26 наурыздан бастап барлық халыққа қызмет көрсету орталықтарының жұмысы тоқтатылған болатын. «Азаматтарға арналған үкімет» мемлекеттік корпорациясы қазақстандықтар үшін бұдан бұрын өтініш берілген, сондай-ақ электронды форматта тапсырыс берілген қызметтер бойынша дайын құжаттарды алып кетуге болатын бірыңғай терезені іске қосты. Бұл үшін әр қала мен аудандарда бір-бір ХҚО белгіленген болатын.
Дайын құжаттарды көбіне Түркістан, Шығыс Қазақстан, Алматы облыстарының тұрғындары алған. Ал, Қызылорда облысында төтенше жағдай кезеңінде 9741 қызылордалық ХҚО арқылы дайын құжаттар алған.
Бірыңғай терезеде берілген құжаттардың дені – АХАТ құжаттары, жүргізуші куәліктері, көліктің техникалық паспорты мен тіркеу нөмірлері, жылжымайтын мүлік пен жер учаскелерінің құжаттары, сондай-ақ жеке куәлік пен паспорт.
Бұл ретте, ТЖ басталғалы бері қазақстандықтар egov.kz электронды үкімет порталы мен eGovKzBot2.0 телеграм-боты және eGovMobile қосымшасы арқылы 10,5 млн жуық қызметті онлайн түрде алған.
Дайын құжаттарды беру терезелерінің жұмыс кестесі: дүйсенбі-жұма 9.00-ден 17.00-ге дейін. Сенбі – сағат 9.00-14.00 аралығы.
Дайын құжаттарды беруге арналған қалалық және аудандық бөлімдердің тізімін мына жерден көруге болады: <a href="https://gov4c.kz/ru/zhanalyktar/2020/03/27/daiyn-kuzhattardy-beru-terezesi-r-kalanyn-tek-bir-khko-da-zhumys-isteidi/?edit_off">gov4c.kz</a>

Қызылордалықтар төтенше жағдай кезінде ХҚО-ның бірыңғай терезесінен 9741 дайын құжат алған

<a href="https://kyzylorda-news.kz/">Kyzylorda-news.kz.</a> 29 сәуірде Ішкі істер министрлігінде бейнебайланыс режимінде төтенше жағдай кезінде көзге түскен ІІО-ның 47 қызметкері мен әскери қызметшілерін ведомстволық наградалармен марапаттау рәсімі өтті.
Министрдің бұйрығымен «Өртте көрсеткен қайсарлығы үшін» медальдарымен Қызылорда облысы Полиция департаментінің 3 қызметкері марапатталды.
Олар – Қызылорда қалалық Полиция басқармасының криминалды полиция бөлімінің жедел уәкілдері, полиция капитандары Әлімжан Әлімбетов, Бейбарыс Қалымбетов және Қызылорда қалалық Полиция басқармасының Жедел басқару орталығының инспекторы, полиция лейтенанты Нұрлан Қарлыбаев.
1 сәуір күніҚызылорда қалалық Полиция басқармасының криминалдық полиция бөлімінің қызметкерлері қызмет атқару барысында облыс орталығындағы үйлердің бірінен терезеден балалардың беттерін тұмшалап алып, далаға қарап тұрғандарын байқап қалады.
Жедел уәкілдер, полиция капитаны Әлімжан Әлімбетов мен полиция аға лейтенанты Бейбарыс Қалымбетов ойланбастан дереу үйге қарай ұмтылып, темір қасықпен тіреп кеткен есікті ашады. Сосын ішіне кіріп, үйдің іші түтінге оранып, жерде жатқан көрпе-төсек, кілемдер өртеніп жатқанын көріп, 4 баланы сыртқа алып шығады. Балаларды көрші үйдің иесіне тапсырып, өздері өртті сөндіреді.
Ал, екінші оқиға 19 сәуір күні орын алған. Қызылорда қалалық Полиция басқармасының Жедел басқару орталығының инспекторы, полиция лейтенанты Нұрлан Қарлыбаев және ҚР ІІМ-нің №5547 Ұлттық ұлан сарбаздары қатардағы Кирилл Лосицкий мен Дәулет Нияз қызмет атқару барысында Тәуелсіздік даңғылындағы көпқабатты тұрғын үйдің 2 қабатындағы балконнан қалың түтінді байқайды. Олар шұғыл қызметке хабарлап, дереу пәтерге кіріп, тұрғындарды балаларымен бірге қауіпсіз жерге шығарады. Өрт сөндірушілер келгенге дейін өртті сөндіреді. Полиция қызметкерлері мен сарбаздардың жедел шешім қабылдауының арқасында өрт салдарынан зардап шеккендер болған жоқ.
<blockquote>
 «Мемлекет басшысы ІІМ қызметкерлерінің төтенше жағдай кезінде құқықтық тәртіпті қамтамасыз етудегі қосқан үлесін жоғары бағалады. Оның тапсырмасы бойынша карантиндік іс-шараларға атсалысқан барлық қызметкерлер мен әскери қызметшілерге лауазымдық жалақы мөлшерінде сыйақы берілді. Бүгінде адамдардың өмірі мен денсаулығын сақтау үшін дәрігерлермен бірге полицейлербір сапта жүр. Өз уақытымен санаспай, отбасынан алыс болса да, Отан алдындағы борышын, ел алдындағы міндетін адал атқаруда. Күндіз-түні қызмет жасап, қарапайым азаматтарға кез-келген жағдайда, қол ұшын созып, көмек көрсетуде. Өздерінің қызметтік және азаматтық борышын адал орындаған барлық қызметкерлер алғыс пен марапаттауға лайық», – деп атап өтті Ішкі істер министрі, полиция генерал-лейтенанты Ерлан Тұрғымбаев.
</blockquote>
<img src="https://kyzylorda-news.kz/wp-content/uploads/2020/04/02-46.jpg" alt="" />

Ішкі істер министрі қызылордалық 3 полиция қызметкерін марапаттады

<a href="https://kyzylorda-news.kz/">Kyzylorda-news.kz.</a> Қызылордада төтенше жағдай кезінде ауызашар ұйымдастырғандар жауапкершілікке тартылды.
26 сәуірде Қызылорда тұрғыны үйінде ауызашар беріп, қаланың әр түпкірінде тұратын достарын шақырған. Олар кешкі астан кейін кездесуді моншада жалғастырады.
<blockquote>
 «Қазақстан Республикасы әкімшілік құқықбұзушылықтар туралы кодексінің 476-бабына сәйкес (төтенше жағдай режимiн бұзу), тәртіп бұзған 5 азаматқа қатысты әкімшілік хаттама толтырылды. Іс құжаттары сотқа жолданды. Сот шешімімен тәртіп бұзушыларға айыппұл салынды», – делінген облыстық Полиция департаментінің баспасөз қызметі таратқан ақпаратта.
</blockquote>
Сонымен қатар, тәртіп сақшылары қоғамдық тәртіп пен азаматтардың қауіпсіздігін қамтамасыз ету мақсатында қолға алынған шараларға қарамастан төтенше жағдай режимін бұзушылардың азаймай отырғанын айтты.

Карантин: Қызылордада ауызашар беріп, артынан моншада демалған 5 тұрғын жазаланды

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 118 адамға жетті. Індеттен айыққандардың қатарына соңғы қосылған науқастар – Сырдария, Шиелі және Жаңақорған ауданының тұрғындары.
30 сәуір 11:45-тегі&nbsp;ақпарат бойынша Қызылорда облысында тағы 3 адам қауіпті індеттен жазылып шыққан.
Осылайша коронавирустық инфекциядан жазылғандар саны өңірде 118 адамға жетіп отыр.
Аталған науқастардан 2 реттен сынама тест алынып, бәрі теріс мәнді нәтиже көрсеткен.
Олар алдағы 14 күнде дәрігерлердің бақылауында болады.

Қызылорда облысында 118 науқас қауіпті індеттен жазылып шықты

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекция жұқтырған тағы 11 науқас тіркелді.
30 сәуір 08:40-тағы&nbsp;мәлімет бойынша қауіпті індетке шалдыққан 11 науқастың барлығы – Қызылорда қаласынан.
Айта кетейік, осымен облыс бойынша коронавирустық инфекция жұқтырған науқастардың жалпы саны 198 адамға жетті.

Қызылорда облысында қауіпті індет жұқтырғандар саны 198 болды

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің 2020 жылдың 29 сәуірдегі өкімімен төтенше жағдай кезеңі аяқталғанға дейін уақытша Қызылорда облысының білім басқармасының басшысы лауазымына Қасымова Ақзира Бақтыбайқызы тағайындалды.
Ақзира Бақтыбайқызы 1979 жылы дүниеге келген.
2000 жылы Қорқыт Ата атындағы Қызылорда мемлекеттік университетін физика, қосымша математика пәндерінің мұғалімі, 
2018 жылы Қаржы академиясын Экономика және бизнес магистрі мамандығы бойынша бітірген.
Еңбек жолын 2000 жылы №15 Қызылорда қалалық гимназияның физика пәнінің мұғалімі ретінде бастаған.
2000-2008 жылдары – Қазалы ауданының білім бөлімінің басшысы, 
2017-2019 жылдары – Қызылорда облысының білім басқармасының басшысының орынбасары басшы лауазымында жауапты қызметтерін атқарған.
&nbsp;2019 жылдың сәуір айына дейін Қызылорда қалалық білім бөлімінің басшысы қызметін атқарған.
<img src="https://kyzylorda-news.kz/wp-content/uploads/2020/04/bek_0712-1-scaled.jpg" alt="" />

Қызылорда облыстық білім басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің 2020 жылғы 28 сәуірдегі өкімімен Жанұзақов Қуаныш Қуантқанұлы Қызылорда облысының жастар саясаты мәселелері басқармасының басшысы лауазымына тағайындалды.
Қуаныш Қуантқанұлы 1982 жылы дүниеге келген.
2005 жылы Қорқыт Ата атындағы Қызылорда мемлекеттік университетін қазақ тілі мен әдебиеті пәнінің мұғалімі мамандығы бойынша бітірген.
Еңбек жолын 2005 жылы Қызылорда облыстық соттар әкімшісінің іс тіркеушісі ретінде бастаған.
2007-2013 жылдары – Қызылорда облыстық ішкі саясат басқармасының бас маманы, бөлім басшысы, 2013-2014 жылдары – Қызылорда облысы әкімі аппаратының ұйымдастыру-инспекторлық жұмыс және аймақтық даму бөлімінің бас инспекторы, 2014-2016 жылдары – Арал ауданы әкімінің орынбасары, Қызылорда облыстық ішкі саясат басқармасы басшысының орынбасары.
2016-2018 жылдары – Қызылорда қалалық ішкі саясат бөлімінің басшысы, 2018-2020 жылдары – Қызылорда облысының жастар саясаты мәселелері басқармасының басшысы болып жауапты қызметтерін атқарған.
2020 жылдың наурыз айынан осы кезге дейін Қызылорда облыстық ішкі саясат басқармасы басшысының орынбасары қызметін атқарып келді.
<img src="https://kyzylorda-news.kz/wp-content/uploads/2020/04/zhanwzakov.jpg" alt="" />

Қызылорда облыстық жастар саясаты мәселелері басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің 2020 жылғы 28 сәуірдегі өкімімен Тлеумбетов Мұрат Жолкелдіұлы Қызылорда облысының жолаушылар көлігі және автомобиль жолдары басқармасының басшысы лауазымына тағайындалды.
Мұрат Жолкелдіұлы 1963 жылы дүниеге келген.
1985 жылы Жамбыл гидромелиоративтік құрылыс институтын инженер-құрылысшы, 2004 жылы Қорқыт Ата атындағы Қызылорда мемлекеттік университетін экономика мамандықтары бойынша бітірген.
Еңбек жолын 1985 жылы «Қызылордақұрылыс» трестінің жұмысшысы ретінде бастаған.
1988-1993 жылдары – Қызылорда қалалық «Қызылордақұрылыс» тресті ЛКСМ комитетінің хатшысы, Қызылордақұрылыс трестінің «Мақсат» шағын кәсіпорнының инженер жабдықтаушысы, 1993-1995 жылдары – Қызылордақұрылыс трестінің «Айбек» шағын кәсіпорнының директоры, 1997-1999 жылдары – Ақмаржан» АҚ филиалының «Реалбазасы» директоры, 1999-2010 жылдары – «Жабдықтау» ЖШС бас директоры.
2010-2013 жылдары – Оңтүстік өңіраралық мемлекеттік мүлік және жекешелендіру департаментінің Қызылорда облысы бойынша филиалының бас маманы, 2013-2015 жылдары – Қызылорда қаласы әкімінің орынбасары, 2015-2017 жылдары – Қызылорда облысының құрылыс, сәулет және қала құрылысы және мемлекеттік сәулет-құрылыс бақылау басқармаларының басшысы болып жауапты қызметтерін атқарған.
2019 жылдан осы кезге дейін Қылылорда облысының жолаушылар көлігі және автомобиль жолдары басқармасы басшысының орынбасары қызметін атқарып келді.
<img src="https://kyzylorda-news.kz/wp-content/uploads/2020/04/tlewmbetov.jpg" alt="" />

Қызылорда облыстық жолаушылар көлігі және автомобиль жолдары басқармасының басшысы тағайындалды

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 114 адамға жетті. Індеттен айыққандардың қатарына соңғы қосылған науқастар – Арал және Шиелі ауданының тұрғындары.
29 сәуір 16:35-тегі&nbsp;ақпарат бойынша Қызылорда облысында тағы 3 адам қауіпті індеттен жазылып шыққан. Оның ішінде, Аралда – 2, Шиеліде – 1 науқас қауіпті індеттен айыққан.
Ерекше атап өтерлігі – Арал ауданында осы індетке шалдыққан 4 науқастың барлығы жазылды.
Осылайша коронавирустық инфекциядан жазылғандар саны өңірде 114 адамға жетіп отыр.
Аталған науқастардан 2 реттен сынама тест алынып, бәрі теріс мәнді нәтиже көрсеткен.
Олар алдағы 14 күнде дәрігерлердің бақылауында болады.

COVID-19: Аралда барлық науқас айықты, облыста жазылғандар саны 114-ке жетті

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Гүлшара Әбдіқалықова «ПетроҚазақстан Құмкөл Ресорсиз» АҚ, «Қазгермұнай» БК, «Қазатомөнеркәсіп «ҰАК» АҚ және өзге де ірі мұнай және уран өндіруші компания басшыларымен кездесті. Кездесуде тау-кен саласының бүгінгі жағдайы мен өзекті мәселелері талқыланды.
Облыстың барлық өнеркәсіп өндірісінің 70% астамы тау-кен саласының үлесінде. 2020 жылдың бірінші тоқсанында 1,2 млн. тонна мұнай өндірілді. Өткен жылмен салыстырғанда 253 мың тоннаға аз. Бұл – жоспарлы қысқарту. Объективті себептердің салдарынан жыл сайын мұнай өндіру төмендейді. Сол себепті мұнай өндіруші компаниялардың алдында өндіру көлемінің жоспарлы көрсеткіштерін ұстап тұру және жылдың соңына қарай көрсеткішті кемінде 4,4 млн.тоннаға жеткізу межесі тұр. Бұл өз кезегінде облыс тұрғындарының әлеуметтік жағдайына да әсер етеді.
Өңір басшысы мұнай өндіруші компаниялардың басшыларын жұмыс орындарын сақтау және төтенше жағдай кезінде санитарлық шараларды ескеру қажеттігін айтты.
<blockquote>
 «Бүгінгі күні бүкіл әлемде коронавирус пандемиясының таралуына байланысты энергия тасымалдаушыларға деген сұраныс пен жаһандық экономикалық рецессия аясында көмірсутегі бағасы да едәуір төмендеген. Сондай-ақ, инвестициялар көлемінің де күрт төмендеуі байқалады. Құрылыс және барлау жұмыстары салаларына қаржы қысқартылды. Мұның бәрі сервистік компанияларға кері әсерін тигізіп отыр. Сондықтан мұнай бағасы тұрақтанған кезде және карантин уақыты аяқталғаннан кейін сервистік қызмет көрсететін мекемелердің жұмыс ауқымын, оның ішінде геологиялық барлау жұмыстарының көлемін ұлғайту мүмкіндігін қарастыру қажет. Сақтық шараларын ескермеу инфекцияның жаңа ошақтарының пайда болуына әкелуі мүмкін», – деді облыс әкімі Г. Әбдіқалықова.
</blockquote>
Мұнай-газ саласындағы күрделі жағдайды ескере отырып, осы саладағы компаниялардың қаржылық жағдайына кешенді талдау жүргізілді. Соның нәтижесінде облыс әкімдігі тарапынан Блиновское және Қоныс кен орындарын рентабельділігі төмен санатқа қосу үшін Ұлттық экономика, энергетика, қаржы министрліктеріне ұсыныстар жолданды.
Сондай-ақ, кездесуде отандық тауар өндірушілерді қолдау және бизнестің әлеуметтік жауапкершілігі мәселелері де айтылды.
<blockquote>
 «Бүгінгі таңда мұнай-газ операторлары тарапынан өңірдің әлеуметтік-экономикалық дамуына бағытталған аударымдардың бюджеттің кіріс бөлігіне түспей қалу қауіпі бар. Осы орайда әлеуметтік міндеттемелерді уақтылы төлеу қажеттілігін ескерткім келеді. Өңірдің тау-кен өндіру саласындағы барлық қойылған мәселелерді шешуде күш-жігерімізді біріктіруге шақырамын», – деп атап өтті аймақ басшысы.
</blockquote>
Кездесу барысында «Қуатамлонмұнай» «БК» ЖШС, «СНПС «Айдан Мұнай» АҚ, «Саутс Ойл» ЖШС, «Қазатомөнеркәсіп «ҰАК» АҚ басшылары атқарылып жатқан жұмыстар мен алдағы жоспарлары туралы айтты.
Атап өту керек, төтенше жағдай кезінде мұнай, уран және басқа да бірқатар компаниялар жұмысты тоқтатпай, вахталық ауысымын 28 күнге дейін ұзартып, 16 мыңнан астам жұмыс орны мен жалақысын сақтап қалды. Сонымен қатар, жұмыс орындарында залалсыздандыру және медициналық қорғау шаралары күшейтілді.
Кездесу қорытындысымен облыс әкімі Г.Әбдіқалықова мемлекеттік орган басшыларына нақты тапсырмалар жүктеді.
<img src="https://kyzylorda-news.kz/wp-content/uploads/2020/04/02-44.jpg" alt="" />
<img src="https://kyzylorda-news.kz/wp-content/uploads/2020/04/03-40.jpg" alt="" />

Гүлшара Әбдіқалықова мұнай және уран өндіруші компаниялардың басшыларымен кездесті

<a href="https://kyzylorda-news.kz/">Kyzylorda-news.kz.</a> Қызылорда облысында карантин режимі жеңілдетілді. Осыған орай, көп қабатты үйлердің тұрғындарына аулаға серуендеуге, ал балаларға ересектермен бірге ойын алаңдарына шығуға рұқсат етілді.
Бұл ретте бетперде тағып, кемінде 1,5 метр қашықтықты сақтау керек. Балалар алаңында сағат 06:00-ден 18:00-ге дейін ойнауға рұқсат етіледі.
Қызылорда облысының Бас мемлекеттік санитарлық дәрігерінің жаңа қаулысымен (№11) шектеу шараларының кезең-кезеңімен жеңілдетілуі енгізіледі: бірінші кезең – 29 сәуірден, екіншісі – 2020 жылдың 4 мамырынан басталады.
29 сәуірден бастап облыс орталығында қоғамдық көліктер қызметін бастайды Олардың таңертең сағат 06:00-ден 09:00-ге дейін, кешке сағат 18:00-ден 20:00-ге дейін жүруіне рұқсат етілді.
Азық-түлік дүкендері жұмыс режимін 20:00-ге дейін ұзартты.
Ал дәмханалардан тағамдарды жеткізу қызметі бойынша 22:00 дейін тапсырыс беруге болады.
Саяжай егелеріне демалыс және мереке күндері сағат 06:00-ден 18:00-ге дейін өз жер телімдеріне баруға рұқсат берілді. Өзімен бірге жеке басын куәландыратын және саяжай учаскесіне меншік құқығын растайтын құжаттар болу керек. Көшеттер мен егуге арналған тұқымдарды қала және аудан әкімдіктері белгілеген жерлерде сатып алуға болады.
Карантиндік режимді кезең-кезеңмен жеңілдету бірінші кезекте өнеркәсіпке, шағын және орта бизнеске, құрылысқа, ТКШ мен көлікке қатысты болды.
Бірінші кезеңде 29 сәуірден бастап ШОБ келесі түрлерінің қызметі жаңартылады:
– сақтандыру және нотарильных кеңселер;
– жеке медициналық қызметтер (ЛОР, стоматологиялық кабинеттер, офтальмология, ультрадыбыстық зерттеулер, МРТ, КТ, зертханалар, гинекология, урология), оптика дүкендері;
– ТЖО, Автожуу, Вулканизация;
– &nbsp;шаштараз;
– аяқ киім шеберханалары;
– электроника және тұрмыстық техника саудасы «тұтынушыға дейін жеткізу қағидаты бойынша», сондай-ақ жөндеу қызметтері;
–&nbsp; курьерлік қызметтер.
Екінші кезеңде 4 мамырдан бастап ашылады:
– Автобөлшектер, құрылыс материалдары және сантехника сату бойынша ауданы 500 ш. м. астам сауда нүктелері;
– Автосалондар;
– баспахана қызметтері;
– өртке қарсы және күзет құрылғыларына сервистік қызмет көрсету;
– тігін шеберханалары;
Қызметті қайта бастауға рұқсат етілетін объектілердің басшылары санитарлық-дезинфекциялық режимді күшейте отырып, эпидемияға қарсы шаралардың сақталуын қамтамасыз етуі тиіс.
Қызылорда облысының Бас мемлекеттік санитарлық дәрігерінің №11 Қаулысымен алдыңғы, 2020 жылғы 18 сәуірдегі №10 Қаулысының күші жойылады.
№11 қаулының толық мәтінімен&nbsp;<a href="https://kyzylorda-news.kz/covid-19-news/qyzylorda-oblysynyng-bas-memlekettik-sanitarijalyq-daerigerining-11-qawlysy-59212/">мына жерден</a>&nbsp;танысуға болады.

Қазақстан және Қызылорда облысының жаңалықтары: Басты жаңалықтар old