<a href="https://kyzylorda-news.kz/">Kyzylorda-news.kz.</a> Бүгін өңірлік коммуникациялар қызметінде білім саласында сапаны қамтамасыз ету департаментінің басшысы Ғалия Дәулетованың қатысуымен баспасөз мәлихаты өтті.
Елімізде енгізілген төтенше жағдай кезінде облыстағы 30 техникалық және кәсіптік білім беру ұйымдары ағымдағы жылғы 16 наурыздан бастап қашықтан оқуға көшкені белгілі. Бірақ 15 наурыз күні өткізілген алдын ала бақылау барысында Қызылордадағы 11 жеке және 1 мемлекеттік колледж қашықтан оқуға дайын болмаған.&nbsp;
<blockquote>
 «Облыстық білім басқармасымен бірілесіп жұмыс жасау нәтижесінде 18 наурызға дейін ақпараттық жүйе орналастыруға өтінімдер жинақталып, Ұлттық білім беру деректер қорынан мәліметтер алынып, “CollegeSmart Nation» платформасына оқу жылының аяғына дейін тегін пайдалануға байланысты жұмыстар ұйымдастырылды»,-дейді Ғалия Ноғайқызы.
</blockquote>
Сонымен қатар, ай сайын жалақының және кезекті еңбек демалыс ақысының уақытылы төленуіне аудандар бөлінісінде мониторинг жүргізілуде. Қазіргі уақытта еңбек демалысына кететін педагогтардың еңбек ақысының уақытында төленуі бақылауға алынған.
<img src="https://kyzylorda-news.kz/wp-content/uploads/2020/05/bilim-sapasy-brifing-2.jpg" alt="" />

Төтенше жағдай: Қызылордада 11 жеке, 1 мемлекеттік колледж қашықтан оқытуға дайын болмаған

<a href="https://kyzylorda-news.kz/">Kyzylorda-news.kz.</a> Қызылорда облысында 230 ауылдың ішінен, даму әлеуеті жоғары деген 103 ауылдық елді мекен іріктелген. Оның 53-і тіректі, 50-і спутник ауылдық елді мекендер. Бұл туралы Қызылорда облыстық экономика және бюджеттік жоспарлау басқармасы басшысының орынбасары Алмагүл Нұрасылова мәлімдеді.
Алғашқы қадам, ауылдағы әлеуметтік ортаны жақсарту, әлеуметтік және инженерлік инфрақұрылымдарды дамыту бағытында, 2019 жылдың 27 ақпанындағы «Нұр Отан» партиясының кезекті съезінде Елбасының бастамасымен айтылды. Үкіметке «Ауыл – Ел бесігі» жобасын дайындап, 2019-2021 жылдарда жобаны іске асыруға 90,0 млрд теңге бөлді. Қазір аталған жоба, Өңірлерді дамытудың 2020-2025 жылдарға арналған мемлекеттік бағдарламасына біріктірілген.
Басқарма басшысы орынбасарының айтуынша, өткен жылы осы бағытта 1 917 млн теңге қаржы қаралып, Жосалы кентінде 3 мектеп, 1 мәдениет үйі, 1 емхана, 13 көше, Жалағаш кентінде 1 мектеп, мәдениет саласында 4 жоба, 8 көшеге жөндеу жүргізілген.
Ауылдың сумен қамту, электр қуатымен қамту секілді инфрақұрылымдарына тек қалпына келтіру және күрделі жөндеу жұмыстарын жүргізуге, жалпы білім беру мекемелеріне қосымша құрылыс салу, дене шынықтыру және сауықтыру, сонымен қатар спорттық комплекстер, ауыл көшелерін қалпына келтіру, күрделі жөндеу, жаңадан салу және де орташа жөндеу жұмыстар қарастырылған.
<blockquote>
 «2020 жылға «Ауыл Ел-бесігі» арнайы жобасына 5,1 млрд теңге бөлінген. Облыс бойынша 52 жобаны іске асыру қарастырылған. Жалағаш кенті, Жаңақорған кенті, «Жақсықылыш», «Шалқия» елді мекендері, «Бекарыстан би», «Ақмая», «Ақжарма», «Маханбетов» ауылдарының инфрақұрылымдары бір жаңарып қалады. Егер ауылыңызды 2021 жылы жобаға енгізігіңіз келсе, қазірден бастап жұмыстар жүргізілуде», – дейді Алмагүл Нұрасылова.
</blockquote>
Айта кетерлігі, жобаны жүзеге асыру барысында сол ауылдардың 68 мың тұрғыны жұмысқа тартылады.
<img src="https://kyzylorda-news.kz/wp-content/uploads/2020/05/brifing1-1.jpg" alt="" />

«Ауыл ел бесігі» жобасы: Қызылордада  5,1 млрд теңге бөлінді

<a href="https://kyzylorda-news.kz/">Kyzylorda-news.kz.</a> Қызылорда облысында жол-көлік оқиғасы болып, салдарынан бір адам қайтыс болды.
27 мамыр сағат 15:30 шамасында Самара-Шымкент тас жолының Жалағаш ауданы Аққұм ауылының тұсында шетелдік нөмірлі жеңіл көлік пен «Камаз» жүк көлігі соқтығысты. Жол-көлік оқиғасы салдарынан бір жолаушы қайтыс болып, сегіз адам медициналық мекемеге жеткізілді.
Болған жол-көлік оқиғасы бойынша ҚР Қылмыстық Кодексінің 345-бабының 3-бөлігімен (автомобильдi басқаратын адамның жол жүрісі қағидаларын бұзып, абайсызда адам өлiмiне әкеп соғу) сотқа дейінгі тергеу басталды. Қылмыстық іс бойынша барлық қажетті сот сараптамалары тағайындалды.
Мән-жайы анықталып жатыр.

Қызылорда облысында жол апатынан бір адам көз жұмды

<a href="https://kyzylorda-news.kz/">Kyzylorda-news.kz.</a> Биыл өңірдегі эпидемиологиялық ахуалға және коронавирус пандемиясына байланысты саяси қуғын-сүргін және ашаршылық құрбандарын еске алу күні онлайн форматта өтеді. Бұл туралы Өңірлік коммуникациялар қызметінің ақпараттық алаңында өткен баспасөз конференциясында Қызылорда облыстық ішкі саясат басқармасының басшысы Мира Қазбекова мәлімдеді.
«Саяси қуғын-сүргін және ашаршылық құрбандарын еске алу күніне орай облыстық іс-шаралар жоспары бекітіліп, жоспарға енген барлық шаралар жергілікті телеарналар мен әлеуметтік желілерде онлайн форматта ұйымдастырылады. Атап айтқанда, облыстық кітапханаларда «Тарихтан тағылым – өткенге тағзым» атты кітап көрмелері ұйымдастырылып, «Қазақ зиялылары және зұлмат жылдар» атты зиялы қауым өкілдері мен тарихшылардың онлайн форматтағы кездесуі өтеді.
<blockquote>
 «Нәубет жылдар – халық қасіреті» атты виртуалды тарихи-құжаттық көрме ұйымдастырылып, «Сыр Шаңырағы» youtube каналында драматург Рахымжан Отарбаевтың «Нарком Жүргенов» спектаклі қойылады. Сонымен қатар, жастарды отансүйгіштікке тәрбиелеп, халықтың рухани санасын қалыптастыруға бағытталған «Байтұрсынов оқулары» онлайн шарасы өтеді. 31 мамыр – қуғын-сүргін және ашаршылық құрбандарын еске алу күніне арналған барлық шаралар Қызылорда қаласы әкімдігінің «Қызылорда арнасы» және «Мәдениет мәйегі ҚЫЗЫЛОРДА» атты YouTube каналында көрсетілетін болады. Сондай-ақ, «Сыр Шаңырағы» Youtube каналында «Елім-ай», «Тәуелсіздік мұраттары» атты облыстық жыршы-термешілердің концерті, «Сыр Бірлігі» Youtube каналында «Трагедия народа и уроки истории» атты өңірдегі тарихшылардың, этномәдени бірлестік өкілдерінің тарихи танымдық ой-пікірлері түсірілген бейнероликтердің көрсетілімі ұйымдастырылады», – деді Мира Жомартқызы.
</blockquote>
Айта кетейік, саяси қуғын-сүргін және ашаршылық құрбандарының ескерткіштеріне гүл шоқтарын қою рәсімдері карантиндік және санитарлық талаптарды сақтай отырып, тиісті мекемелердің рұқсатымен ғана жүргізіледі. Бұл рәсімге саяси қуғын-сүргін және ашаршылық құрбандарының туыстары ғана қатыса алады.

Биыл саяси қуғын-сүргін және ашаршылық құрбандарын еске алу күні онлайн форматта өтеді

<a href="https://kyzylorda-news.kz/">Kyzylorda-news.kz.</a> «Евразия» СК карантин талаптарын сақтай отырып, өз жұмысын бастады.
Əзірге мұнда&nbsp;<a href="https://www.facebook.com/hashtag/4%D0%BE%D1%80%D0%BC%D0%B1%D0%B6%D0%BC?source=feed_text&epa=HASHTAG">#4ОРМБЖМ</a>&nbsp;-нің жүзу жəне триатлон (3 спорт түрінің жиынтығы: жүзу, жүгіру, велоспорт) бөлімшесінің спортшылары жаттығуда.
Тұрғындарға қай кезден бастап қызмет көрсететіні қосымша хабарланады.
<blockquote>
 «50 метр қашықтықты 38,9 секундта жүздім. Карантинге байланысты демалыс болмағанда 33 секундта келетін едім. Енді жаттығу процесін үзбей жасап, өз қалпыма келемін. Аллағы мақсатым – турнирлерде орын алуға тырысамын», – деді жүзуден облыстық қалалық жарыстардың жеңімпазы Ғанибет Нұрқожа.
 «Карантинге байланысты үйде жаттығып жүрдік. Ол бізге аздық етті. Қазір спорт залда жаттығуымызды күшейтіп, жарыстарға тыңғылықты дайындалып жатырмыз. Алдағы уақытта жақсы нəтижелер болады деп ойлаймын», – деді триатлон бөлімшесінің спортшысы Нұрай Зиятқызы.
</blockquote>
<img src="https://kyzylorda-news.kz/wp-content/uploads/2020/05/zhwzw1.jpg" alt="" />

Қызылордада жүзу жəне триатлон спортшылары жаттығуды бастады

<a href="https://kyzylorda-news.kz/">Kyzylorda-news.kz</a>. Қызылорда облысында коронавирус инфекциясын жұқтырғандар саны 325-ға жетті. Ал сауығып шыққандар саны – 232. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
«Соңғы тәулікте 7 дерек тіркелді. Оның 4-еуі Тенгиз Шевройл компаниясының қызметкері болса, 3-еуі медицина қызметкерін скринингтеу барысында анықталды. Қазіргі таңда науқастардың жағдайы бірқалыпты, емдерін хаттамаға сәйкес алуда»,-деді бас дәрігер.
Сондай-ақ, індет жұқтырғандармен байланыста болған- 4133 азамат анықталды. Оның ішінде, 2303-і жақын қарым-қатынаста, 1830-ы жанама байланыста болған. Бұдан бөлек, инфекциялық стационарда 72 адам ем алуда. Оның 22-сі карантиндік госпитальда , 27-сі провизорлық стационарда, ал 257 азамат карантиндік бақылауда.
Құрметті облыс тұрғындары, статистикаға қарағанда вирустың жұғу мүмкіндігі қарым-қатынас арқылы болып отыр. Вирус ауа тамшылары арқылы жұғатын болғандықтан, ол көбіне сулы ауада көп сақталады. Сондықтанда сақтық шараларын қатаң сақтап және бетперде киюді жалғастыра беруге шақырамыз.

COVID-19: Соңғы тәулікте 7 жағдай тіркелді

<a href="https://kyzylorda-news.kz/">Kyzylorda-news.kz</a>. Қазақстан Республикасы Президенті Әкімшілігінің келісімі бойынша облыс әкімінің міндетін атқарушысының өкімімен Қазбекова Мира Жомартқызы облыстық ішкі саясат басқармасының басшысы лауазымына тағайындалды.
Мира Қазбекова 1984 жылы туған. Қорқыт Ата атындағы Қызылорда мемлекеттік университетін «Қазақ тілі мен әдебиеті пәнінің мұғалімі», Қызылорда қаласындағы «Болашақ» университетін «Заңгер» мамандықтары бойынша бітірген.
Еңбек жолын 2005 жылы Мемлекеттік қызметшілерді және бюджеттік сала қызметкерлерін қайта даярлау және олардың біліктілігін арттыру өңірлік орталығы Қызылорда облыстық баспасөз клубының маманы ретінде бастаған.
2005-2008 жылдары Қызылорда қаласы әкімі аппаратының жетекші маманы-баспасөз хатшысы, Қызылорда облыстық ішкі саясат департаментінің бас маманы жауапты қызметтерін атқарған.
2008-2017 жылдары Қызылорда қаласы әкімінің бас инспекторы-баспасөз хатшысы, Қызылорда қаласы әкімі аппаратының бөлім басшысы, Қызылорда облысының мұрағаттар мен құжаттама басқармасы басшысының орынбасары.
2017-2019 жылдары Қызылорда қалалық мәдениет және тілдерді дамыту бөлімінің басшысы, Қызылорда қаласы әкімі аппаратының басшысы басшылық лауазымын атқарған.
2019 жылдан осы кезге дейін Қызылорда қаласы әкімінің орынбасары лауазымында қызмет атқарып келді.
<img src="https://kyzylorda-news.kz/wp-content/uploads/2020/05/whatsapp-image-2020-05-27-at-19.17.33.jpeg" alt="" />

Қызылорда облыстық ішкі саясат басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Қызылорда облысы көлемінде мемлекеттік орман қоры жерлері 6,5 млн га құрайды, оның ішінде орманмен қамтылғаны 3,1 млн га, осы аумақтың 89 пайызын сексеуіл ормандары алып жатыр. Бұл туралы Облыстық орман және жануарлар дүниесі аумақтық инспекциясының басшысы Ғалымжан Орақбаев баяндады.
<blockquote>
 “Биыл 26 наурыздан бастап облыстың мемлекеттік орман қоры өрт қауіпі бар маусым белгіленді. Осы уақытқа дейін 199,31 га құрайтын 35 өрт оқиғасы тіркелді. Оның 80,96 гектары орманды жерлерді, 117,31 га ормансыз жерлерді қамтыды.
 Сонымен қатар, аймақта балық шаруашылығының маңызы зор. Облыста Кіші Арал теңізі мен жергілікті маңызы бар көлдерден кәсіпшілік балықтың 14 түрі аулануда. Кіші Арал теңізінің 18 учаскесі толықтай және жергілікті маңызы бар 207 көлдің 87 пайызы аудан (қала) әкімдіктерімен конкурс негізінде табиғат пайдаланушыларға бекітіліп берілген. Қалған 27 көл резервтiк қорда”,-деді Ғалымжан Жәдігерұлы.
</blockquote>
Сондай-ақ, облыс көлемінде табиғат қорғау мекемелерімен және құқық қорғау органдарымен бірлескен іс-шаралар аясында 16 қылмыстық іс анықталып, 4-уі сот органдарына жолданды. Оның 3-уі секесеуіл ағашына, 5 ісі – балыққа, 7 ісі – тораңғыл ағашына, 1 ісі –қарақұйрық, 5 ісі – киік аңына қатысты.
<img src="https://kyzylorda-news.kz/wp-content/uploads/2020/05/brifing-orman.jpg" alt="" />

Қызылорда облысында орман қоры 6,5 млн гектарды құрайды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова жұмыс сапарымен Шиелі ауданында болды. Сапар барысында елді мекендердің тыныс-тіршілігімен танысып,&nbsp; «Жұмыспен қамту жол картасы» мемлекеттік бағдарламасы (әрі қарай – Мемлекеттік бағдарлама) аясында атқарылып жатқан жұмыстарды тексерді.
&nbsp;Мемлекеттік бағдарлама аясында Шиелі ауданына 3 млрд.астам қаржы бөлініп, инженерлік-көліктік инфрақұрылым, әлеуметтік-мәдени, тұрғын-үй коммуналдық, абаттандыру бағытында 21 жоба жүзеге асырылуда. Сонымен қатар, 681 жаңа жұмыс орны ашылатын болады.
&nbsp;Өңір басшысы алдымен Сұлутөбе ауылдық округінің 1 Мамыр елді мекеніндегі «Жұмыспен қамту жол картасы» мемлекеттік бағдарламасы аясында жүргізіліп жатқан абаттандыру жұмыстары және ауыз су жүйесінің жағдайын көрді. Бұл ауылға абаттандыру жұмыстарын жүргізуге 58 млн.теңге бөлініп, 14 тұрғын жұмыспен қамтылуда. Сондай-ақ, аталған бағдарлама шеңберінде «Самара-Шымкент-Тартоғай» жолының орташа жөндеу жұмысын тексерді. Гүлшара Әбдіқалықова жұмыстарды сапалы жүргізіп, белгіленген уақытта бітіруді тапсырды.
Мұнан соң облыс әкімі Жөлек елді мекеніне кіре берістегі көпірге күрделі жөндеу және Шиелі кентінде жол жөндеу жұмыстарының барысын көрді. Облыс әкімі аудан әкіміне бөлінген қаржыны мақсатты жұмсап, сапалы жұмыс жүргізуде тапсырды.
&nbsp;Аймақ басшысы екі мәрте социалистік еңбек Ері Ы.Жақаев атындағы күріш өсіру тарихы музейінде болып, кесенесінде баба рухына тағзым етті.
&nbsp;Шиелі кентіндегі Ә.Қоңыратбаев атындағы №48 мектеп лицейіне мемлекеттік бағдарламасы аясында күрделі жөндеу жұмыстары жүргізілуде. Облыс әкімі жөндеу жұмыстарының барысын тексеріп, жаңа оқу жылына дейін аяқтауды тапсырды.
&nbsp;Өңір басшысы Гүлшара Әбдіқалықованың төрағалығымен ауданның әлеуметтік-экономикалық дамуы жөніндегі мәжіліс өтті. Жиында аудан әкімі Қ.Мүбараков атқарылған жұмыстар мен алдағы жоспарлар туралы баяндап, аймақ басшысы әлеуметтік-экономикалық саладағы көрсеткіштерді арттыру бойынша бірқатар нақты тапсырмалар берді.
<blockquote>
 &nbsp;«Алдымен, аудан экономикасы дамуының үстіміздегі жылдың 4 айының қорытындысына қысқаша тоқталып өтейін. Шиелі ауданында негізгі макрокөрсеткіштердің 4-уі, атап айтсақ, ауыл шаруашылығы 0,2%, инвестиция 74%, құрылыс жұмысы көлемі мен тұрғын үй құрылысы 15,3% төмендеп, меже орындалмаған. Әлеуметтік сала, оның ішінде денсаулық сақтау саласында да кемшіліктер бар. Шиелі ауданының әлеуметтік-экономикалық дамуы бойынша бірқатар мәселелер көтерілді. Аталған кемшіліктерді жою бағытында ауқымды жұмыс атқару қажет. Біздің басты бағытымыз тұрғындардың әл-аухатын көтеру», – деді облыс әкімі Гүлшара Әбдіқалықова.
</blockquote>
Мәжілістен&nbsp; кейін аймақ басшысы Шиелі кентіндегі жылыжайдың, «РУ-6» кен басқармасының «Қарамұрын» цехының, «Ару ана» шұбат цехының, «Кемикал қазақстандық мұнай-химия компаниясы» ЖШС-нің пластмасса құбырларын шығару зауытының, «Компания Гежуба Шиелі Цемент» ЖШС-нің цемент зауытының жұмысымен танысты. Аймақ басшысы аудан әкіміне: «Біз кәсіпкерлікті дамытуға барынша жағдай жасап келеміз. Мәселен, биылға «Бизнестің жол картасы 2025» мемлекеттік бағдарламасын аймақта іске асыруға 3,4 млрд. теңге қаражат бөлінді. Яғни, жылдан жылға бөлінетін қаржы еселеп артып келеді. Кәсіпкерлік саласын дамытуға мүмкіндік берілуде, тек жұмыс жасау керек. Мұнымен қоса, «Қарапайым заттар экономикасы» бағдарламасының жүзеге асырылуын қолға алыңыздар. Бұл бағдарлама ішкі нарықты отандық тауарлармен толықтыру және өңдеу өнеркәсібінің бәсекеге қабілеттілігін арттыру мақсатында іске асырылуда. Халықты күнделікті тұтынатын тауарлармен және қызметтермен қамтамасыз етуге бағытталған. Мемлекеттік бағдарламалардың дұрыс жүзеге асуын қадағалаңыздар», – деп тапсырды.
Сондай-ақ, облыс әкімі Гүлшара Әбдіқалықова Шиелі кентіндегі үш қабатты 18 пәтерлі тұрғын үй құрылысының және Ақмая ауылындағы егіс алқабында ауданның дала жұмыстарының барысымен танысты. Бұл егіс алқапта 370 гектар жерге күздік бидай егілген және жаңа цифрлық технологиялар пайдалануда.
<img src="https://kyzylorda-news.kz/wp-content/uploads/2020/05/obl.akim-1-1.jpg" alt="" />
<img src="https://kyzylorda-news.kz/wp-content/uploads/2020/05/obl.akim-2-1.jpg" alt="" />
<img src="https://kyzylorda-news.kz/wp-content/uploads/2020/05/obl.akim-3-1.jpg" alt="" />
<img src="https://kyzylorda-news.kz/wp-content/uploads/2020/05/obl.akim-4-1.jpg" alt="" />

Гүлшара Әбдіқалықова: «Аудандағы әлеуметтік-экономикалық дамудағы мәселелерге баса назар аудару қажет»

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова «Невада-Семей» қоғамдық бірлестігінің төрағасы Сәбит Әбішті қабылдады.
Кездесуде «Невада-Семей» қозғалысының мүшелеріне берілетін әлеуметтік төлем және қоғамдық бірлестіктердің жұмысы туралы мәселелер талқыланды.
«Невада-Семей» қоғамдық бірлестігінің облыс бойынша өкілділігі 2009 жылдан бастап жұмыс жасайды. Бүгінгі күні облыс көлемінде «Невада-Семей» қозғалысының 1043 мүшесі бар. Оның ішінде тікелей қатысқан 507 азаматқа әлеуметтік төлем беріледі. Қалған 536 қатысушыға төлем тағайындалмаған.
Өңір басшысы облыстық жұмыспен қамту және әлеуметтік бағдарламалар басқармасы басшысына қозғалыстың қалған мүшелеріне әлеуметтік көмек тағайындауға қатысты ұсыныстар беруін тапсырды.
<blockquote>
 «Облыс көлеміндегі «Невада-Семей» қозғалысы мүшелерінің тізімін қайта қарап, қызмет еткен жылына қарай санатқа бөліп дайындаңыздар. Әлеуметтік көмек тағайындау үшін Қорғаныс министрлігіне осы санаттар бойынша ұсыныстар жолдауымыз керек. Жалпы, «Невада-Семей» қозғалысымен бірлескен іс-шаралар өткізуді қайта қарап, оларды 29 тамыз – Халықаралық ядролық сынақтарға қарсы күрес күніне дейін біріктіру керек. Мемлекетіміз ядролық жарылыстар салдарынан жәбірленушілер үшін үнемі әлеуметтік сауықтыру шараларын жүргізіп келеді», – деді Гүлшара Әбдіқалықова.
</blockquote>
Жиын соңында «Невада-Семей» қоғамдық бірлестігінің Қызылорда облысы бойынша төрағасы Сәбит Әбіш облыс әкімі Гүлшара Әбдіқалықоваға кездесу мен көтерілген мәселелерге қолдау көрсеткені үшін алғысын білдірді.

Гүлшара Әбдіқалықова «Невада-Семей» қозғалысы мүшелеріне әлеуметтік көмек тағайындауды тапсырды

<a href="https://kyzylorda-news.kz/">Kyzylorda-news.kz.</a> Жалағаш ауданында 17 жастағы жасөспірім суға батып кетті. Бұл туралы Қызылорда облыстық төтенше жағдайлар департаменті өрт сөндіру және апаттық-құтқару жұмыстары қызметінің баспасөз қызметі хабарлады.
Оқыс оқиға кеше сағат 17.00 шамасында болған. Жасөспірім Сырдария өзенінің рұқсат етілмеген аумағында суға түскен.
<blockquote>
 «Оқиға орнына 5 құтқарушы 1 автокөлік және 1 қайық барды. Құтқарушылар жедел әрекетке кірісті. Жасөспірімнің жансыз денесі сағат 18.49 шамасында жағаға шығарылды», – деп мәлім етті Қызылорда облыстық төтенше жағдайлар департаменті өрт сөндіру және апаттық-құтқару жұмыстары қызметінің баспасөз хатшысы Әлия Ережепова.
</blockquote>
Қызылорда облысында жыл басынан бері барлығы 8 адам суға кетіп қайтыс болды. Оның біреуі – жасөспрім, екеуі – бала, қалғаны – ересек азаматтар. Сондықтан мамандар суға түсу барысында қауіпсіздік шараларын қатаң сақтауды сұрайды. Былтыр бұл жағдайдан 26 адам қаза тапса, оның 10-ы бала.
<a href="https://kyzylorda-news.kz/kogam/qyzylordada-10-zhasar-bala-swgha-aghyp-ketti-63668/">Айта кетейік</a>, бұған дейін қалада 10 жасар баланың суға кеткенін хабарлаған болатынбыз.
<img src="https://kyzylorda-news.kz/wp-content/uploads/2020/05/01-37.jpg" alt="" />

Қызылордада 17 жастағы жасөспірім Сырдарияға батып кетті

<a href="https://kyzylorda-news.kz/">Kyzylorda-news.kz.</a> 25 мамырда өткен қалалық жедел штабтың отырысында Байқоңыр аумағында коронавирус инфекциясы бойынша карантинді 2020 жылдың 15 маусымына дейін ұзарту шешімі қабылданды, деп хабарлайды.
Бұған дейін шектеу шараларын 1 маусымда алып тастау жоспарланған еді.
Штаб отырысында Ресейдің Федералды медико-биологиялық агенттігі «Байқоңыр» кешенінің өңірлік басқармасының басшысы Андрей Попов коронавирус инфекциясын жұқтырған жаңа жағдайлар туралы хабарлады.
Жалпы алғанда Байқоңырда жағдай тұрақты: 241 адам өз үйлерінде оқшауландырылды. Инфекцияға 287 тест тапсырылды. Оның 7-еуі оң нәтиже көрсетті (16-24 мамыр).
Қызылорда облысындағы санитарлық-эпидемиологиялық жағдайды ескере отырып, штаб мүшелері COVID-19 індетінің таралуын алдын алу бойынша шектеу шараларын 2020 жылдың 15 маусымы сағат 00:00-ге дейін ұзартуды шешті.
Осы күнге дейін бақылау-өткізу пунктерінде шектеулер сақталады. Байқоңыр қаласы, Торетам кенті және Ақай ауылдық округінің тұрғындары бақылау-өткізу пунктері арқылы арнайы рұқсат қағаздары бойынша өтетін болады.
Сонымен қатар, жедел штабтың шешімімен күшейтілген санитарлық-дезинфекциялық режим мен әлеуметтік қашықтықты сақтай отырып, көрмелер мен мұражайлардың, меншік түріне қарамастан жабық түрдегі спорт нысандарының, фитнес-клубтардың және спорт залдарының қызметіне рұқсат етілді.

Қазақстан және Қызылорда облысының жаңалықтары: Басты жаңалықтар old