<a href="https://kyzylorda-news.kz/">Kyzylorda-news.kz.</a> Ауыр атлетикадан әлемнің 4 дүркін чемпионы Илья Ильин «Қорқыт Ата атындағы&nbsp; Алтын медальмен» марапатталды.
Бүгін Қорқыт Ата атындағы Қызылорда мемлекеттік университетінің ректоры Бейбіткүл Каримованың қатысуымен «Мемлекеттік рәміздер –&nbsp; мақтаныштарымыз!» атты&nbsp; мерекелік шара өтті. Шарада университет ректоры қатысушыларды айтулы мерекемен құттықтап, еліміздің көк туын әлемдік аренада желбіретіп, көкке көтеріп жүрген бірқатар спортшыларды марапаттады.
Шараның басты қонағы университет түлегі, ауыр атлетикадан Қазақстанның еңбек сіңірген спорт шебері, зілтемірден әлемнің төрт дүркін чемпионы Илья Ильин «Қорқыт Ата атындағы&nbsp; Алтын медальмен» марапатталды.
Сонымен қатар ФКС-18-1 оқу тобының студенті, шахматтан 3 дүркін әлем чемпионы, 7 дүркін Азия чемпионы Әсел Серікбай, ФКС-18-5 оқу тобының студенті, каратэ-до киокушинкай-каннан әлем және Азия чемпионы Айбек Шаукилов,&nbsp; ФКС-18-5 оқу тобының студенті, парадзюдодан әлем чемпионы – Олжас Оразалыұлы, ФКС-18-3 оқу тобының студенті, таеквондодан Қазақстан Республикасының бірнеше дүркін чемпионы, Х-жазғы Универсиаданың жеңімпазы Жандос Орынбек, ФКС-17-3 оқу тобының студенті, дзюдодан Азия чемпионы, Х-жазғы Универсиаданың қола жүлдегері – Нұрлыхан Шархан Қорқыт Ата атындағы Қызылорда мемлекеттік университеті ректорының алғыс хатымен және естелік сыйлықтармен марапатталды.
Шара барысында ҚР Мемлекеттік рәміздер күніне арнап марапат иелері университет ректорымен бірге еліміздің Гимнін орындады. Марапат иесі Илья Ильин және «Нұр Отан» партиясы «Тұран» филиалы төрағасының бірінші орынбасары Есенжол Назаров шараға қатысушыларды мерекемен құттықтап, ыстық лебіздерін жеткізді.
<img src="https://kyzylorda-news.kz/wp-content/uploads/2020/06/ilja-1.jpg" alt="" />
<img src="https://kyzylorda-news.kz/wp-content/uploads/2020/06/ilja-2.jpg" alt="" />
<img src="https://kyzylorda-news.kz/wp-content/uploads/2020/06/ilja-5-1-scaled.jpg" alt="" />
<img src="https://kyzylorda-news.kz/wp-content/uploads/2020/06/ilja-6-1-scaled.jpg" alt="" />
<img src="https://kyzylorda-news.kz/wp-content/uploads/2020/06/6.jpg" alt="" />

Илья Ильин алтын медальға ие болды (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова мемлекеттік рәміздер күнінде кезекте тұрған 180 отбасыға пәтер кілтін табыстады.
Оның ішінде әлеуметтік осал топтағы және көпбалалы отбасылар бар. Сырдария өзенінің сол жағалауында орналасқан 4 жаңа тұрғын үй «Нұрлы-Жер» бағдарламасы аясында берілді.
<blockquote>
 «Тәуелсіз еліміздің елдігін, мемлекетіміздің мәртебесін айқындайтын басты құндылықтарымыз Мемлекеттік рәміздер күні мерекесінде Сіздердің қуаныштарыңызды бөліскелі тұрмыз. Соңғы 3 жылда «Нұрлы жер» тұрғын үй құрылысы мемлекеттік бағдарламасы аясында облыс бойынша тұрғын үйлердің құрылысына 45,4 млрд. теңге бөлінді. Нәтижесінде 398 мың шаршы метрді құрайтын 141 көпқабатты тұрғын үй пайдалануға берілді. Демек, соңғы 3 жылда 5 мыңға жуық отбасы жаңа пәтерге ие болды. 20 мыңнан астам тұрғын баспанамен қамтамасыз етілді. Биылдың өзінде өңірімізде 1 186 пәтерді құрайтын 81 тұрғын үйдің құрылысы жүргізілуде. Бүгін міне, сол жағалауда жаңа тұрғын үйді пайдалануға береміз. Қоныстарыңыз құтты болсын», – деді Гүлшара Әбдіқалықова.
</blockquote>
Облыс әкімі қоныс тойын тойлап жатқан Өтеповтер әулетінің шаңырағында болды. «Алтын алқа» иегері Алмагүл Өтепова Гүлшара Әбдіқалықоваға тұрғындар атынан алғыс білдірді.
<blockquote>
 «Бүгін жаңа пәтеріміздің кілтін алып қуанышқа бөленудеміз. Мемлекет тарапынан көпбалалы отбасыларға көрсетіліп жатқан қолдауға алғыс айтқым келеді. Аймақ басшыларына ризашылығымды жеткіземін. Қуанышты күндеріміз көп болсын», – деді Алмагүл Өтепова.
</blockquote>
Шара соңында Қызылорда қаласының құрметті азаматы, еңбек ардагері Жарылқасын Шәріпов жиылған жұртқа батасын берді.
Соңғы 3 жылда пайдалануға берілген 141 көпқабатты тұрғын үйдің жаңа қаладағы үлесі 620 пәтерлік 13 көпқабатты арендалық баспана. Сондай-ақ, несие бағдарламасы бойынша 240 пәтері бар 4 көпқабатты тұрғын үй тапсырылған. Ал, жеке құрылыс компанияларының есебінен 604 пәтерлі 14 көпқабатты тұрғын үй ел игілігіне пайдалануға берілді.
Жыл соңына дейін 680 пәтерлік арендалық 14 көпқабатты үйдің және несие бағдарламасы бойынша 590 пәтері бар 13 тұрғын үйдің құрылысы аяқталады деп жоспарланып отыр. Жеке инвесторлардың қаражатына 86 пәтерлік 2 көпқабатты тұрғын үйдің құрылысы жүргізілуде.
<img src="https://kyzylorda-news.kz/wp-content/uploads/2020/06/wj.jpg" alt="" />
<img src="https://kyzylorda-news.kz/wp-content/uploads/2020/06/wj2.jpg" alt="" />
<img src="https://kyzylorda-news.kz/wp-content/uploads/2020/06/wj3.jpg" alt="" />

Қызылордада көпбалалы отбасыларға пәтер кілті табысталды (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясын жұқтырғандар саны 465-ке жетті. Ал сауығып шыққандар саны – 270. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Соңғы тәулікте 17 дерек тіркелді. Оның 10-ы індет жұқтырғандармен байланыста болған, ал 4 – өздері ақылы тапсырған азаматтардан, 3 – жағдай емхананың скринингінен анықталған»,- деді бас&nbsp;дәрігер.
</blockquote>
Сондай-ақ, вирус жұқтырғандармен байланыста болған- 5121 азамат анықталды. Оның ішінде, 2923- тікелей қарым-қатынаста, 2198- жанама байланыста болған. Бұдан бөлек, инфекциялық стационарда 147 адам ем алуда. Оның 26- карантиндік госпитальда, 36-провизорлық стационарда, ал 244 азамат карантиндік бақылауда.
Құрметті облыс тұрғындары, статистикаға қарағанда вирустың жұғу мүмкіндігі қарым-қатынас арқылы болып отыр. Вирус ауа тамшылары арқылы жұғатын болғандықтан, ол көбіне сулы ауада көп сақталады. Сондықтанда сақтық шараларын қатаң сақтап және бетперде киюді жалғастыра беруге шақырамыз.

COVID-19: Жаңадан 17 жағдай тіркелді

<a href="https://kyzylorda-news.kz/">Kyzylorda-news.kz.</a> Қызылорда облысында коммуналдық қызмет үшін берілетін төлемдерге өтініштер маусым айының аяғына дейін қабылданады.Бұл туралы Өңірлік коммуникациялар қызметінің ақпараттық алаңында өткен баспасөз конференциясында Қызылорда облысының энергетика және тұрғын үй-коммуналдық шаруашылық басқармасы басшысының міндетін атқарушы Ерлан Жоламанов мәлімдеді.
<blockquote>
 «Өңірде 123 мың тұрғын аталған көмекті алуға құқығы бар. Оның ішінде 1, 2, 3 санаттағы мүгедектер – 27,2 мың, Ұлы Отан соғысының мүгедектері мен қатысушылары және теңестірілген адамдар – 1,5 мың, мүгедек балаларды тәрбиелеушi отбасылар – 5,4мың, көпбалалы отбасылар – 43,3мың, ең төмен және аз зейнетақы алатын зейнеткерлер – 37,5мың, атаулы әлеуметтік көмек алатын азаматтар – 8,3мың, мемлекеттiк немесе қоғамдық мiндеттерiн, әскери қызметiн орындау кезiнде қаза тапқан адамдардың отбасылары – 168. Сонымен қатар коммуналдық төлемді басқа да беріліп жатқан әлеуметтік көмектер сияқты жеке есеп-шотқа қаржылай түспейді. Яғни, бірден коммуналдық қызмет көрсетуші мекемелердің есепшотына аударылады», – деді Ерлан Жоламанов.
</blockquote>
Сонымен қатар, коммуналдық қызметтер бойынша қаражатты өтеу үшін тұтынушы жеке сәйкестендіру нөмірін, әлеуметтік мәртебесін және есепшотының деректерін көрсете отырып, жергілікті атқарушы органмен белгіленген call-орталық арқылы өтінім береді.
Өтінімдер келесі call-орталықтары арқылы қабылданады:
– Қызылорда қаласы: 400-700 телефон нөмірі немесе&nbsp;<a href="https://l.facebook.com/l.php?u=http%3A%2F%2Fwww.15.epd.kz%2F%3Ffbclid%3DIwAR2fzZH3A8wY1VuJ4GvcVmWd1vgdG-r3-elq3S4R2DwEJWrUj8EbanqTsDM&h=AT1usZz06XAGheano251ao5VIJ5f8Hxq6Mg-87lMWMRZ-Z-5WhZHyW1hdH627hKInFRVpKCZUU4m3aLscPgqgKf0DVtXOovMb6nWwrpGdh89sX5-ePOf1eO_fBfBwxxArk2G1osatlQd-M0rAXel4jyMYi6WAUqY">www.15.epd.kz</a>&nbsp;сайты арқылы; 
– Арал ауданы бойынша: 2-22-24;
– Қазалы ауданы бойынша: 7-91-35;
– Қармақшы ауданы бойынша: 2-27-62;
– Шиелі ауданы бойынша: 4-32-66;
– Жаңақорған ауданы бойынша: 2-10-17;
– Сырдария ауданы бойынша: 2-20-01;
– Жалағаш ауданы: 2-32-232, 31-101 нөмері арқылы.
Құрметті облыс тұрғындары, коммуналдық қызмет төлемі туралы түбіртекте 15 мыңнан кем болса, төлем келесі мерзімге шегеріледі. Коммуналдық қызметтің бір бөлігін өтегені бойынша төлем түбіртекте көрсетіледі.

Қызылорда: 15 мың теңге коммуналдық төлем үшін өтініштер қабылдау жалғасуда

<a href="https://kyzylorda-news.kz/">Kyzylorda-news.kz.</a> «Қызылорда – Жезқазған» автожолы жобасын талқылауға арналған қоғамдық тыңдаулар Қызылорда және Қарағанды облысында өтеді, деп хабарлайды ИИДМ баспасөз қызметі.
<blockquote>
 «ҚР ИИДМ Автомобиль жолдары комитеті 2020 жылғы 8 және 12 маусым аралығында «Республикалық маңызы бар «Қызылорда-Павлодар-Успенка-РФ шекарасы» автомобиль жолының ұзындығы 412 шақырымды құрайтын «Қызылорда-Жезқазған» (12-424 шақырымы) учаскесін қайта жаңарту» жобасының техникалық-экономикалық негіздемесі мен «Қоршаған ортаға әсер етудің алдын ала бағасы» жобасын ашық жиналыста талқылау мақсатында қоғамдық тыңдауларды өткізеді», – делінген ИИДМ баспасөз қызметінің хабарламасында.
</blockquote>
Қызылорда облысында қоғамдық тыңдауды өткізу мерзімдері мен орындары:
– 2020 жылғы 11 маусымда сағат 16:00-де, Қызылорда қаласы, Достық үйі ғимараты.
– 2020 жылғы 12 маусымда сағат 10:00-де, Сырдария ауданы, Тереңөзек елді мекені, Мәдениет үйі ғимараты.
– 2020 жылғы 12 маусымда сағат 16:00-де, Шиелі ауданы Шиелі елді мекені, «Арман» мәдениет үйі. Қарағанды облысында қоғамдық тыңдауды өткізу мерзімдері мен орындары:
– 2020 жылғы 8 маусымда сағат 11:00-де, «НұрОтан» партиясының Жезқазған қаласы бойынша филиалының ғимараты.
– 2020 жылғы 8 маусымда сағат 16:00-де, Талап елді мекені селосы, №14 мектептің ғимараты.
– 2020 жылғы 9 маусымда сағат 10:00-де, Ұлытау ауданы, Ұлытау елді мекені, Абай көшесі, 27.
– 2020 жылғы 9 маусымда сағат 17:00-де, Ұлытау ауданы Мибұлақ елді мекенінің клуб ғимараты.
<blockquote>
 «Сондай-ақ Қызылорда және Қарағанды облыстарында 2020 жылғы 16 мамыр мен 22 маусым аралығында сауалнама түріндегі қоғамдық тыңдаулардың өтіп жатқандығын еске саламыз. Қоғам өкілдері тарапынан ұсыныстар мен шағымдар электронды түрде қабылдануда. Сауалнама Қызылорда облысында 2020 жылғы 16 мамыр мен 13 маусым аралығында, Қарағанды облысында 2020 жылғы 22 мамыр мен 22 маусым аралығында өтеді», – делінген хабарламада.
</blockquote>
<img src="https://kyzylorda-news.kz/wp-content/uploads/2020/06/zhol-1.jpg" alt="" />

«Қызылорда – Жезқазған» автожолы жобасына қатысты қоғамдық тыңдаулар өтеді

Kyzylorda-news.kz. Қызылорда облысында коронавирус инфекциясын жұқтырғандар саны 425-ке жетті. Ал сауығып шыққандар саны – 247. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Соңғы тәулікте 23 дерек тіркелді. Оның 21-і індет жұқтырғандармен байланыста болған, ал 1-і провизорлық стационардан анықталса, 1-еуі скринингтеуден»,- деді бас дәрігер.
</blockquote>
Сондай-ақ, вирус жұқтырғандармен байланыста болған- 4912 азамат анықталды. Оның ішінде, 2800-і жақын қарым-қатынаста, 2112-і жанама байланыста болған. Бұдан бөлек, инфекциялық стационарда 149 адам ем алуда. Оның 29-ы карантиндік госпитальда , 26-ы провизорлық стационарда, ал 271 азамат карантиндік бақылауда.

Қызылорда: Соңғы тәулікте коронавирус инфекциясын тағы 23 адам жұқтырды

<a href="https://kyzylorda-news.kz/">Kyzylorda-news.kz.</a>&nbsp;Бүгін 2 маусымда Байқоңыр қаласының және ғарыш айлағының құрылғанына 65 жыл толды.
1955 жылдың 12 ақпанында СССР Қорғаныс министрлігінің №5 ғылыми-зерттеу сынақ полигонын құру туралы қаулы жарияланды. Бірақ Байқоңырдың негізі қаланған дата ретінде полигонның ұйымдастырушылық-штаттық құрылымы бекітілген – 1955 жылдың 2 маусымы белгіленді.
«Байқоңыр» – әлемдегі тұңғыш әрі ең ірі ғарыш айлағы. Халықаралық маңызы бар нысан туралы не білеміз?
1995 жылдан бері Байқоңыр&nbsp;– Ресей Федерациясының құрамындағы федералдық маңызы бар қала.&nbsp;
Мемлекеттік қауіпсіздік комитеті кеңестік ракеталардың құпиясын сақтау үшін ғарыш айлағы орналасу жерінің екі сызбасын құрастырды.&nbsp;
<img src="https://kyzylorda-news.kz/wp-content/uploads/2020/06/2-1.jpg" alt="" />
Жасалған келісім-шарт бойынша Байқоңырды жалға беру мерзімі 2050 жылы аяқталады.&nbsp;
1950 жылы Қазақ даласында ғарыш айлағын салу құрылысы басталғанда ықтимал қарсыластарды алдау үшін Қарағанды облысының Байқоңыр кентінде ағаштан тағы да&nbsp;бір ғарыш алаңы салынған. «Восток-1» («Шығыс-1») кемесін ұшырғаннан кейін (кеменің бортында атақты Гагарин болған) осы кенттен 300 шақырым жерде орналасқан басқа ғарыш айлағына «Байқоңыр» атауы берілді.
Жер шарын алғаш рет айналып шыққан «Восток-1» кемесінің ұшу мерзімі&nbsp;– 108&nbsp;минут.&nbsp;
&nbsp;«Байқоңыр» ғарыш айлағының астанасы&nbsp;– Байқоңыр қаласы. Қала 1955 жылдан бері салына бастаған. Құрылыс ғарыш айлағының маңызды нысандарын салумен бірге жүргізілген.&nbsp;
130-дан астам отандық және шетелдік ғарыш «Байқоңыр» ғарыш айлағынан орбитаға ұшып шықты.&nbsp;
<img src="https://kyzylorda-news.kz/wp-content/uploads/2020/06/1.jpg" alt="" />
«Байқоңыр» ғарыш айлағынан ұшырылған «Восток-1» кемесі белгіленген орбита бойынша 28&nbsp;000&nbsp;км/сағ жылдамдықпен қозғалды.&nbsp;
2000 жылы Қазақстан Республикасының тұңғыш ғарышкері – Тоқтар Әубәкіров «Жыл адамы» деп танылды.
&nbsp;«Байқоңырдағы» техниканың механизмдерін тазалау үшін спирт қолданылады, сондықтан да&nbsp;ғарыш айлағына 12&nbsp;тонна спирт жіберілген. 7&nbsp;тонна спирт пайдаланылған, ал&nbsp;спирттің қалған бөлігі үшін арнайы шұңқыр қазылды. Оның үстіне құм төселген. Алайда, мұны біліп алған адамдар шұңқырды қазып, ғарыш кешеніндегі «құрғақ» заңды бұзбақшы болыпты… Аз&nbsp;уақыттан кейін тәртіп қайта орнатылды. Шұңқырдағы спиртті өрттеп жіберді.&nbsp;
&nbsp;Көптеген адамдар біле бермейді, бірақ 1998 жылы ғарышқа екінші рет ұшқан Талғат Мұсабаев «Мир» орбиталық станциясын құтқарды.&nbsp;
&nbsp;2001 жылы Талғат Мұсабаев америкалық турист Денис Титомен бірге (әлемдік біріншілік) ғарышқа ұшты.&nbsp;
&nbsp;Юрий Гагаринді «ғарышкер» емес, «астронавт» деп атаған. Мұны Франция, Ұлыбритания, АҚШ басшылығы Мәскеуге жолдаған құттықтаулар дәлелдейді.&nbsp;
Байқоңыр қаласы бұрын «Ленинск» атауына ие&nbsp;болған. Бұл жерден көптеген ракеталар ғарышқа ұшырылып, жүздеген адамдардың өмірлері қыршыннан қиылды. Аталмыш оқиғалар Гагариннің ғарышқа ұшуына дейін орын алған. Сонымен бірге, тұңғыш ғарышкер – әйел ғарышқа ұшқаннан кейін де&nbsp;бір ракета жарылды. Оқиға орнында көп адам қаза тапты.&nbsp;
Кеменің кабинасында отырған Юрий Гагарин және бас құрылымдаушысы Сергей Ковалевтің өзара сөйлесуінің кадры&nbsp;— имитация (жасанды жолмен түсірілген кадр).&nbsp;
Юрий Гагарин ұшудың соңғы сатысында айқайлап жіберген: «Я&nbsp;горю, прощайте, товарищи!»&nbsp;— «Өртеніп жатырмын, қош болыңдар, жолдастар!» Ұзақ уақыт бойы ешкім де&nbsp;Гагариннің осы сөздерін жазбады.

Биыл Байқоңыр ғарыш айлағының құрылғанына 65 жыл толды

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда мемлекеттік университетінің ректоры, «Nur Otan» партиясы облыстық филиалы Саяси Кеңесінің мүшесі Бейбіткүл Кәрімова 1 маусым – Халықаралық балаларды қорғау күніне орай «Атамекен» отбасылық үлгідегі балалар ауылына барып, бүлдіршіндерді мерекемен құттықтады.
<img src="https://kyzylorda-news.kz/wp-content/uploads/2020/06/82628130_1935486323255451_2201088589360529408_o.jpg" alt="" />
«Атамекен» балалар ауылында қазіргі таңда 53 бала тұрады. Оның ішінде 4 бала биыл мектеп бітіреді. Осыған орай, университет ректоры мектеп бітіруші түлектерді құттықтап, алдағы бірыңғай ұлттық тестілеуден сүрінбей өтуіне тілектестігін білдірді.
<img src="https://kyzylorda-news.kz/wp-content/uploads/2020/06/101604285_1935487299922020_5497187994303463424_o.jpg" alt="" />
Ректор Бейбіткүл Каримова балаларды Қорқыт Ата атындағы ҚМУ-де білім алуға шақырып, өздері таңдаған мамандық бойынша 4 жыл тегін оқу сертификаттарын табыстады.
<blockquote>
 &nbsp;«Қорқыт ата атындағы Қызылорда мемлекеттік университетінде ата-анасының қамқорлығынсыз қалған 38 жас білім алуда. Олар мемлекеттік, облыс әкімінің гранттары мен университеттің, көптеген компаниялардың қолдауы негізінде тегін білім алып, ыстық тамақпен қамтамасыз етілген. 
Міне бүгін мереке аясында «Атамекен» отбасылық үлгідегі балалар ауылына арнайы барлықтарыңызды құттықтай келіп, соның ішінде мектеп бітіретін жас түлектерімізді қамқорлыққа алатынымызды жеткізгім келеді. 
Құрметті түлектер, 11 сыныпты аман-есен аяқтап, алда тұрған бірыңғай ұлттық тестілеуден сүрінбей өтулеріңізге тілектеспін. Республикамыз бойынша бәсекеге қабілетті мамандар даярлауда үздіктер қатарынан орын алатын Қорқыт ата атындағы Қызылорда мемлекеттік университетінің студенті атануға сіздерді шын ықыласпен шақырамын», – деді университет ректоры Бейбіткүл Кәрімова.
</blockquote>
<img src="https://kyzylorda-news.kz/wp-content/uploads/2020/06/101686306_1935487383255345_6473094036713373696_o.jpg" alt="" />
Сонымен қатар, университет жауапты ретінде қамқорлыққа алған балалар ауылындағы “Ақжайық” үйінің 6 тәрбиеленушісіне «Nur Otan» партиясы «Тұран» филиалы мүшелері тарихи-танымдық кітаптар тарту етті.
Айта кетейік, Қорқыт ата атындағы ҚМУ ұжымы жыл сайын “Атамекен” балалар ауылына келіп, балалармен түрлі мерекелерді бірге өткізіп келеді.
<img src="https://kyzylorda-news.kz/wp-content/uploads/2020/06/101707537_1935486993255384_8717921271641276416_o.jpg" alt="" />

Қызылорда: «Атамекен» балалар ауылының түлектерін университет тегін оқытпақ

<a href="https://kyzylorda-news.kz/">Kyzylorda-news.kz.</a> Жалағаш ауданында Жаңаталап ауылында бір жастағы қыз бала арықтағы суға құлап қаза болды.
<blockquote>
 «Оқыс оқиға туралы хабарлама облыстық диспетчерлік жедел басқару басқармасына келіп түсті. 2019 жылғы қыз бала ауыл ішіндегі арықтағы суға құлап, қаза болды. Оны ата-анасы қараусыз қалдырған. Баланың мәйітін судан жергілікті тұрғындар шығарған», – деп мәлім етті Қызылорда облыстық Төтенше жағдайлар департаменті Өрт сөндіру және авариялық-құтқару жұмыстары қызметінің баспасөз хатшысы Әлия Ережепова.
</blockquote>
Өңірде жыл басынан бері 8 адам суға кеткен. Олардың 4-еуі бала болса, қалғаны – ересек азаматтар.

Қызылордада бір жасар қыз бала арықтағы суға батып кетті

<a href="https://kyzylorda-news.kz/">Kyzylorda-news.kz.</a> Облыстық мәслихаттың кезекті 45-сессиясы өтті. Күн тәртібінде 23 мәселе қаралды.
Атап айтсақ, “2020-2022 жылдарға арналған облыстық бюджет”, “Қызылорда облысының білім беру ұйымдарына атау беру” және “Мүгедектерді әлеуметтік қорғау саласындағы облыстық Үйлестіру кеңесінің дербес құрамын бекіту” туралы және тағы басқа мәселелер.
Қазақстан Республикасы Президентінің тапсырмасы бойынша «Экономиканы қалпына келтіру жөніндегі 2020 жылдың соңына дейінгі кешенді жоспары» әзірленді. Аймақ басшысы төтенше жағдайдан кейін экономиканы қалыпқа келтіру жұмыстарының барысын бақылап, елдің әлеуметтік-экономикалық хал-ахуалымен танысу мақсатында мамыр айының екінші онкүндігіде Аралдан Жаңақорғанға дейінгі аудандарда және Байқоңыр қаласында іс-сапарда болды.
<blockquote>
 “Сапар барысында тұрғындармен кездесіп, аудан әкімдеріне мемлекеттік бағдарлама аясында бөлінген қаражатты ел игілігіне сапалы әрі дұрыс пайдалануды тапсырдым. Барлығы 7 аудан, 40-қа жуық елді мекен мен 100-ден аса нысанды араладым. Аудан әкімдері өндіріс, өнеркәсіп орындарының жұмысын жүйеге қойып, экономиканы қалпына келтіру бойынша ауқымды жұмыстар атқарулары тиіс” ,- деді облыс әкімі Гүлшара Әбдіқалықова.
</blockquote>
Сонымен қатар, өңір басшысы ауылшаруашылығы саласында атқарылған жұмыстарға тоқталды.
<blockquote>
 “Бүгінде көктемгі дала жұмыстары белгіленген жоспарға сәйкес атқарылуда. Су шаруашылық каналдарын дайындау жұмыстары өз мерзімінде жүргізілді. Облыстың шаруашылық құрылымдары қажетті минералдық тыңайтқыштармен, гербицидтермен, тұқымдық материалдармен және жанар-жағармайдың қажетті қорымен толық қамтамасыз етілген. Бүгінгі күні жоспарға сәйкес жаңа жоңышқа, арпа, бидай дақылдарын егу жұмыстары аяқталып, картоп, көкөніс, бақша,майлы дақылдарды егу жұмыстары жүргізілуде. Сонымен қатар, негізгі дақыл- күріш егу жұмыстары аяқталуға жақын. Жоспарланған 88,2 мыңға күріш егісінің бүгінге 93 пайызына дән себіліп, оның 90 пайызы суға бастырылды. 5 маусымға дейін аталған жұмыстарды толық аяқтау жоспарлануда”,- деді облыс әкімі Гүлшара Әбдіқалықова.
</blockquote>
Үкіметтің тапсырмасы бойынша барлық өңірлер Түркістан облысы Мақтаарал ауданындағы су тасқынынан зардап шеккен ауылдарға көмек көрсетуде. Маслихатта біздің өңірден де көмек көрсету мәселесі талқыланды. Бұл жұмыстарға облыстық бюджеттен 255 млн.тенге бөлінетін болады.
Сондай-ақ, Абайдың 175 жылдығы мен әл-Фарабидің 1150 жылдық мерейтойына орай облыстағы білім беру ұйымдарына Ұлы тұлғалардың атын беру мәселесі қаралды. Нақты айтатын болсақ, «Үш тілде оқытатын дарынды балаларға арналған мамандандырылған сыныптары бар «Мұрагер» мектебі» коммуналдық мемлекеттік мекемесін Абай Құнанбайұлының есімімен қайта атау және Жалағаш аудандық «№ 201 мектеп-лицей» коммуналдық мемлекеттік мекемесіне Әбу Насыр әл-Фарабидің есімін беру туралы ұсыныстар қаралып, қолдау тапты.
Айта кету керек, Қызылорда облысы бойынша тұрғын үй сертификаттарын алушылардың тізімі де бекітілді.
<img src="https://kyzylorda-news.kz/wp-content/uploads/2020/05/fb_img_1590782136388.jpg" alt="" />
<img src="https://kyzylorda-news.kz/wp-content/uploads/2020/05/fb_img_1590782139960.jpg" alt="" />

Облыстық мәслихаттың кезекті сессиясы өтті

<a href="https://kyzylorda-news.kz/">Kyzylorda-news.kz.</a> Мақтаарал ауданына гуманитарлық көмек көрсету мақсатында 2020 жылғы 4 мамырдан бастап облыстық жастар орталығында штаб құрылып, жұмыс жасауда.
Бүгінге күнге дейін барлығы 95 тонна гуманитарлық көмек бағытындағы заттар жинақталып, 6 мамырдан бастап алты кезеңмен, оның 89 тоннасы жеткізілді. 
Оның ішінде 77,5 тонна азық-түлік, 7 тонна киім-кешек пен көрпе-төсек, 10,5 тонна тұрмыстық заттар жөнелтілген&nbsp;болатын.
Сыр жұрты тасқын судан зардап шеккен Мақтарал тұрғындарына қайырымдылық жасауды жалғастыруда. Көмекке тағы 6 тоннадан астам гуманитарлық заттар жинақталып, Мақтаарал ауданына кезекті қайырымдылық керуені жолға шығады.

Сыр елінен Мақтаарал ауданына көмек беру жалғасуда

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус инфекциясын жұқтырғандар саны 340-қа жетті. Ал сауығып шыққандар саны – 233. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Соңғы тәулікте 15 дерек тіркелді. Оның 6-ы медицина қызметкерін скринингтеу барысында анықталса, 2-еуі «Д» есепте тұрған науқасты скринингтеуден, ал біреуі фильтр кабинетінен&nbsp;болса, 6-ы індет жұқтырғандармен байланыста болғандар. Қазіргі таңда науқастардың жағдайы бірқалыпты, емдерін хаттамаға сәйкес алуда»,-деді бас дәрігер.
</blockquote>
Сондай-ақ, індет жұқтырғандармен байланыста болған- 4298 азамат анықталды. Оның ішінде, 2387-і жақын қарым-қатынаста, 1911-і жанама байланыста болған. Бұдан бөлек, инфекциялық стационарда 82 адам ем алуда. Оның 26-ы карантиндік госпитальда , 31-і провизорлық стационарда, ал 214 азамат карантиндік бақылауда.
Құрметті облыс тұрғындары, статистикаға қарағанда вирустың жұғу мүмкіндігі қарым-қатынас арқылы болып отыр. Вирус ауа тамшылары арқылы жұғатын болғандықтан, ол көбіне сулы ауада көп сақталады. Сондықтанда сақтық шараларын қатаң сақтап және бетперде киюді жалғастыра беруге шақырамыз.

Қазақстан және Қызылорда облысының жаңалықтары: Басты жаңалықтар old