<a href="https://kyzylorda-news.kz/">Kyzylorda-news.kz</a>. Бүгін аймақ басшысы Гүлшара Әбдіқалықова облыстық «Кызылординские вести» газетінің бас редакторы Қазыбек Ботаевты 63 жасқа толу мерейтойымен құттықтады. Өңір басшысы мерейтой иесіне аймақтың ақпарат саласына қосқан үлесі үшін Қызылорда облысының Құрмет грамотасын табыстап, иығына шапан жапты.
<blockquote>
 “Құрметті Қазбек Камалұлы өзіңіз білім-біліктілігіңізбен, парасат-пайымыңызды, іскерлік қажыр-қайратыңызды орыс тіліндегі облыстық негізгі басылымның дамуына жұмсап келесіз. Әр жылдары сыр өңірінің бұқаралық ақпарат құралдарында радио, телеарналарда қызмет атқарып, аймақтың ақпарат саласының дамуына ерекше үлес қостыңыз. Өткен жылдан бастап облыстық «Кызылординские вести» газетінің бас редакторы қызметін абыроймен атқарып келесіз. Сіздің ақпарат саласындағы еңбегі лайықты бағаланып, Тұңғыш Президент, Елбасы Нұрсұлтан Әбішұлы Назарбаевтың Алғысымен, Қазақстан Журналистер Одағының Құрмет грамотасымен және әр түрлі дәрежедегі марапаттармен наградталдыңыз. Сізді өзімнің және облыс тұрғындары атынан тағы да мерейтойыңызбен құттықтай отырып, алғысымды білдіремін. Деніңізге саулық, отбастарыңызға амандық тілеймін”, – деді облыс әкімі Гүлшара Әбдіқалықова.
</blockquote>
Шарада сөз алған облыстық «QYZYLORDA» телеарнасының директоры Жағыппар Қарабала замандас досы Қазыбек Ботаев Сыр өңірінің бұқаралық ақпарат құралдарында жемісті еңбек етіп, аймақ журналистикасының алға жылжуына зор үлес қосты дейді.
<blockquote>
 “Бүгінгі мерейтой иесі Қазыбек Камалұлы 25 жылдан астам БАҚ саласында қызмет етіп, облыстың ақпарат кеңістігінде өз орнын қалыптастырды. Білгенін жастарға үйретіп, қанашама жас журналистің тұлға болып танылуына ықпал етті. Қазыбек Ботаев радио, телевидение және газетте алдымен тілші болып қызмет жасап, кейін аға тілші, аға редактор, газет редакторы қызметіне дейін көтерілді. Қазақ және орыс тілдерінде жетік жазып, сауатты сөйлей алатын аз журналистердің бірі болды. Сондықтың бұл кісінің тәлімі мен тәжірибесін біз алдағы уақытта да кәдеге жаратып, жас мамандарды дайындауда қолданатын боламыз”, – деді Жағыппар Қарабала.
</blockquote>
Сондай-ақ, «Сыр медиа» ЖШС бас директоры Аманжол Оңғарбаев басылым беделін көтеріп, оқырман қатарын арттыруда әріптесінің сіңірген еңбегінің өлшеусіз екендігін жеткізді. Өз кезегінде Қазбек Ботаев көрсетілген құрметке алғысын білдірді.

Гүлшара Әбдіқалықова Қазбек Ботаевты зейнет жасқа толу мейрейтойымен құттықтады

<a href="https://kyzylorda-news.kz/">Kyzylorda-news.kz</a>. Күннің тұтылуы дүйсенбі, 14 желтоқсанда болады. Оны бірнеше елдің тұрғындары сол сәтте-ақ көре алады.
Күннің тұтылуы UTC уақыт белдеуі бойынша 16:13-те немесе Мәскеу уақытымен 17:25-те басталып, тұтылудың максималды фазасы шамамен Мәскеу уақытымен 19:00-де күтіледі. Бүгінгі күн тұтылуының ұзақтығы 2 минут 10 секундты құрайды.
Астрономиялық бұл құбылыс Тынық мұхитының оңтүстік-шығысында жақсы байқалады. Соның ішінде Атлант мұхитының оңтүстігі мен Аргентина және Чили тұрғындары айқын көре алады.
Сондай-ақ, тұтылудың ішінара фазалары Оңтүстік Америкада, Полинезияда, Антарктида мен Африкада да көрінеді. ТМД аумағында күннің тұтылуы әлсіз байқалады.
Тәуліктің түнгі мезгіліне сай келгендіктен, күннің тұтылуын қазақстандықтар бақылай алмайды.
Айта кетейік, мұның алдындағы күннің тұтылуы 22 маусымда тіркелді және ол Қазақстан аумағында анық көрінген.
<a href="https://sputnik.kz/space/20201214/15730780/Sagat-kun-tutylu.html">SputnikҚазақстан</a>

Бүгін бірнеше сағатқа күн тұтылады

<a href="https://kyzylorda-news.kz/">Kyzylorda-news.kz</a>.&nbsp;13 желтоқсан 23:59-дағы эпидемиологиялық жағдай бойынша Қазақстанда 747 адам коронавируспен ауырғаны белгілі болды. Бұл ПТР арқылы расталды, деп хабарлайды &nbsp;<a href="https://www.coronavirus2020.kz/kz-%D0%BA%D0%B5">coronavirus2020.kz</a>.
Аймақтар бойынша:
Нұр-Сұлтан қаласы – 67 
Алматы қаласы – 72 
Шымкент қаласы – 4 
Ақмола облысы – 71 
Ақтөбе облысы – 10 
Алматы облысы – 48 
Атырау облысы – 58 
Шығыс Қазақстан облысы – 78 
Жамбыл облысы – 28 
Батыс Қазақстан облысы – 41 
Қарағанды облысы – 31 
Қостанай облысы – 74 
Қызылорда облысы – 7 
Маңғыстау облысы – 10 
Павлодар облысы – 73 
Солтүстік Қазақстан облысы – 68 
Түркістан облысы – 7
Жалпы ел бойынша ауырғандар саны 142 325.

Қызылордада 7 адам коронавирус жұқтырды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықованың қатысуымен кезекті 51 облыстық мәслихат сессиясы өтті.
Күн тәртібінде 8 мәселе қаралды. Атап айтқанда, облыстық экономика және бюджеттік жоспарлау басқармасының басшысы Нұрғали Қордабай 2021-2023 жылдарға арналған облыстық бюджет, облыстық мәслихат хатшысы Қылышбай Бисенов өткен жылы атқарылған жұмыстар, облыстық жұмылдыру дайындығы басқармасының басшысы Медет Усаин Қызылорда облысының аумағында оларды бұзғаны үшін әкімшілік жауаптылық көзделген төтенше жағдайлар туындаған кезде қоғамдық тәртіп пен қауіпсіздікті қамтамасыз ету, олардың алдын алу және жою жөніндегі қағидаларын бекіту, облыстық ішкі саясат басқармасы басшысының міндетін атқарушы Еркін Әбішев Қызылорда облысының кейбір әкімшілік-аумақтық бірліктерін қайта атау, облысының жер қатынастары басқармасының басшысы Сұлтан Мақашев «Облыстық жер комиссиясының құрамын және ережесін бекіту туралы» облыстық мәслихаттың 2018 жылғы 17 қазандағы № 248 шешіміне өзгеріс енгізу, облыс бойынша тексеру комиссиясының төрағасы Сәуле Құлымбетова «Қызылорда облысы бойынша тексеру комиссиясының төрағасы қызметін бағалау жөніндегі комиссия құрамын бекіту туралы» облыстық мәслихатының 2019 жылғы 12 желтоқсандағы № 393 шешіміне өзгеріс енгізу туралы айтып, облыстық мәслихатының Экономика, қаржы және жергілікті басқару мәселелері жөніндегі тұрақты комиссиясының төрағасы Райхан Ысқақова есеп берді.
Жиында сөз бастаған аймақ басшысы 2021-2023 жылдарға арналған кезекті үш жылдық бюджет талқыланып, бекітілетінін айтты.
<img src="https://kyzylorda-news.kz/wp-content/uploads/2020/12/130822801_2965229440246772_5271883871899434178_o.jpg" alt="" />
<blockquote>
 “Коронавирус пандемиясының әлі де болса күшейіп жатқанын ескере отырып, келесі 2021 қаржы жылы да індетпен күресу және алдын алу шаралары жалғасатын болады. Бұл тұрғыда өңір бюджеті басқа да сыртқы және ішкі факторларға, әсіресе ұлттық валютаның әлсіреуіне, минералдық ресурстар бағасының, мұнай өндірудің, бизнестің инвестициялық белсенділігінің төмендеуіне қарай әрекет етеді. Бұл жағдайда мемлекеттік шығыстардың сапалы жоспарлануы мен ашықтығы, сондай-ақ барынша тиімділігі маңызды. Коронавирус пандемиясына байланысты республикалық бюджеттің кіріс бөлігінің азаюы болжамдануына орай Қазақстан Республикасы Заңымен жергілікті бюджеттерден республикалық бюджетке 200 млрд теңге көлемінде ағымдағы нысаналы трансферттерді қайтару қарастырылуда. Қызылорда облысының қайтару үлесі 9,3 млрд теңгені құрады. Дегенмен, бюджеттен алып қоюға қарамастан, осыған дейін айтылған барлық міндеттемелердің орындалуы қамтамасыз етіледі. Ұсынылған жобада республикалық бюджеттен берілген трансферттерді қоса есептегенде 2021 жылға облыстық бюджеттің көлемі 411,5 млрд теңгені құрайды, ал 2020 жылы облыстық бюджет 267,5 млрд теңге құраған, яғни, 144 млрд теңгеге ұлғайып отыр. Бұқаралық іс-шараларды, имидждік шығыстарды қаржыландыру тоқтатылды, мекемелердің әкімшілік шығыстары қысқартылды”, – деді Гүлшара Әбдіқалықова.
</blockquote>
Бюджетті жоспарлауда аймақ басшысы алты басымдықты атап өтті. Ең бірінші кезекте әлеуметтік салаға 218 млрд. теңге бөлінеді деп жоспарлануда.
2021 жылы аймақ республикалық бюджет қаражаты есебінен іске асырылатын инвестициялық жобаларды қоса қаржыландыру бойынша міндеттемелерді жабу, барлық ауыспалы жобалардың құрылысын аяқтау, облигациялық бағалы қағаздар мен мемлекеттік – жеке әріптестік жобалары бойынша міндеттемелерді өтейтін болады. Сондықтан 2022 жылға арналған бюджет жаңадан жоспарланады.
Агроөнеркәсіптік кешенді субсидиялау, шағын және орта бизнесті несиелендіру секілді мемлекеттік қолдау шаралары болып табылады. Салынған бюджет қаражатының қайтарымы болады және белгілі бір экономикалық нәтижеге жұмыс жасайды.
Пандемия кезінде ветеринарлық бақылау мәселесі өте өзекті болып отыр. Келесі жылы ветеринария, табиғатты қорғау шараларымен айналысатын мекемелердің материалдық-техникалық базасын нығайтуға, оның ішінде арнайы автокөлік сатып алуға қаражат көзделеді.
Төтенше жағдайлардың алдын алу және өңірде қоғамдық қауіпсіздікті қолдау шаралары ұйымдастырылады. Су тасқынына қарсы іс-шараларға қаражат көзделеді. Әкімшілік полицияны, оның ішінде учаскелік полицейлерді қаржыландыру күшейтіледі, жоғарыда көрсетілгендерге байланысты құрылымдардың материалдық-техникалық базасын нығайтуға қаражат көзделетін болады.
Сессияда Қызылорда қаласы бойынша жеке табыс салығы мен әлеуметтік салықты облыстық бюджетке бөлу нормативін 30%-дан 90%-ға дейін қайта қарау ұсынылды.
Облыстық мәслихат хатшысы Қылышбай Бисенов 2019 жылғы 5 қыркүйектен бастап атқарылған жұмыстар туралы баяндап, есепті кезеңде Қызылорда облыстық мәслихатының 14 сессиясы өткізіліп, жалпы саны 167 шешім қабылданғанын атап өтті. Бүкіләлемдік пандемияның салдарынан 4 сессия онлайн режимде өткен.
<img src="https://kyzylorda-news.kz/wp-content/uploads/2020/12/130853768_2965234563579593_3704659087128260988_o.jpg" alt="" />
Шара барысында облыс әкімі Гүлшара Әбдіқалықова облыстық мәслихат депутаты Амангелді Арысбаевтың Шымкент қаласына басқа қызметке ауысуына орай «Құрмет» грамотасын табыстап, жаңа қызметіне сәттілік тіледі. Сонымен қатар облыстық мәслихаттың депутаттары Райкүл Байназарова мен Жорабек Нұрымбетов жалпы атқарылған жұмыстарға ризашылығын білдірді.
Сессияда көтерілген мәселелер оң шешімін тапты.

Гүлшара Әбдіхалықова: 2021 жылы облыстық бюджет 411,5 млрд теңгені құрайды

<a href="https://kyzylorda-news.kz/">Kyzylorda-news.kz</a>.&nbsp;Бүгін Нұр-Сұлтан қаласындағы Қазмедиа орталығында Қазақстан Республикасының Мемлекеттік хатшысы Қырымбек Көшербаевтың қатысуымен Қазақстан халқы Ассамблеясы Кеңесінің отырысы өтті. Алқалы кеңеске аймақ басшылары – ҚХА төрағалары онлайн режимде қатысты.
Күн тәртібінде Тұңғыш Президент – Елбасы, ҚХА Төрағасы Нұрсұлтан Назарбаевтың бейбітшілік пен келісім саясатын жүзеге асыру мәселелері, сондай-ақ еліміздің Тәуелсіздігін нығайтудағы Қазақстан халқы Ассамблеясының рөлі қарастырылды.
Шара барысында облыс әкімі Гүлшара Әбдіқалықова Қазақстан халқы Ассамблеясының құрылғанына 25 жыл толуына орай, ел бірлігі мен ұлтаралық татулықты нығайтуға қосқан үлесі үшін Қазақстан халқы Ассамблеясы Кеңесінің мүшесі, облыстық мәслихаттың хатшысы Қылышбай Бисеновке «Қазақстан халқы Ассамблеясына 25 жыл» мерекелік медалін табыстады.
Сондай-ақ отырыста ҚР Конституциялық заңының «Қазақстан Республикасындағы сайлау туралы» 87 бабы және ҚР Заңының «Қазақстан халқы Ассамблеясы туралы» 10 бабына сәйкес, ҚХА Кеңесі Ассамблеядан сайланатын Қазақстан Республикасы Парламенті Мәжілісінің депутаттығына Ассамблеядан сайланатын 9 үміткерді ұсынды.
<img src="https://kyzylorda-news.kz/wp-content/uploads/2020/12/131032318_2965183373584712_2762740495078948166_o.jpg" alt="" />
<img src="https://kyzylorda-news.kz/wp-content/uploads/2020/12/131001617_2965183273584722_7357276905710250914_o.jpg" alt="" />

Қазақстан халқы Ассамблеясы кеңесінің отырысы өтті

<a href="https://kyzylorda-news.kz/">Kyzylorda-news.kz</a>. Жаңақорған ауданындағы «Премиум Класс-Строй» ЖШС-нің әк зауыты 2018 жылы іске қосылды. Зауытта күніне 100 тонна әк шығарылса, ал жылына 70 мың тонна өндіріледі.
Бүгінде «Бизнестің жол картасы-2025» бағдарламасы аясында инфрақұрылым жүргізу үшін жоба-сметалық құжаты дайындалуда. Яғни, зауыттың жұмысын одан әрі дамыту мақсатында темір жол тұйығын тарту мен электр энергиясын жеткізу керек. Жоба мақұлданса өндіріс көлемі ұлғайып, қосымша 20 жұмыс орны ашылады.

Жаңақорғанда жылына 70 мың тонна әк өндіріледі

<a href="https://kyzylorda-news.kz/">Kyzylorda-news.kz</a>. Бүгін «Достық үйінде» «ВОЛОНТЕРЛІК – ӨМІР БЕЛЕСІ» атты облыстық волонтер жылының жабылу салтанаты өтті.
Шараға жыл көлемінде волонтерлік қызметтің 7 негізгі бағыты бойынша жұмыстарды үйлестірген облыстық басқарма басшылары, «Облыстық волонтерлер фронт-офисінің» мүшелері мен Қызылорда қаласы және аудандардағы волонтерлер, волонтер топтары қатысты.
Шара барысында облыстық ішкі саясат басқармасы басшысының міндетін атқарушы Е.Әбішев қатысушыларды аймақта «Волонтер жылының» жабылу салтанатымен құттықтап, бірқатар волонтерлерді марапаттады.
Оның ішінде, «Жыл волонтері» облыстық сыйлығының «Birgemiz»: «Bilim» номинациясымен – Меңдібай Талғат Амангелдіұлы; «Birgemiz»: «Saýlyq» номинациясымен – Серәлі Нарбота Серәліұлы; «Birgemiz»: «Sabaqtastyq» номинациясымен – Бүркітбай Ақбаян Бахытқызы; «Birgemiz»: «Taza Alem» номинациясымен – Стаева Ақбота Ертайқызы; «Birgemiz»: «Asyl mura» номинациясымен – Әбдіржан Аружан Сәкенқызы; «Birgemiz»: «Qamqor» номинациясымен – Омарова Рауан Базарбайқызы; «Birgemiz»: «Úmіt» номинациясымен – Сауапова Салтанат Бақытжанқызы марапатталды.
Сондай-ақ, Намурадин Айсана Қанатқызы, Баджанова Динара Мұратбекқызы және Дүйсенбаева Зарина Дүйсенбекқызы «Волонтерлік қызметті дамытуға қосқан үлесі үшін» номинациясының иегері атанды.
Мұнан бөлек, халық игілігіне қызмет етіп, Сыр өңірінің әлеуметтік дамуына қосқан үлесі үшін 10 волонтерге облыс әкімінің Алғысы табысталды.
<img src="https://kyzylorda-news.kz/wp-content/uploads/2020/12/130573004_1187030645025779_4155404032467931754_o.jpg" alt="" />
<img src="https://kyzylorda-news.kz/wp-content/uploads/2020/12/130922689_1187030658359111_4466707123542968522_o.jpg" alt="" />

Қызылордада волонтер жылының жабылу салтанаты өтті

<a href="https://kyzylorda-news.kz/">Kyzylorda-news.kz</a>. Биыл 11 айының қорытындысымен 8 нысан пайдалануға берілді. Сонымен қатар, тікелей басқарма арқылы 31 әлеуметтік нысанның құрылысы басталған. Жыл соңына дейін барлығы 19 әлеуметтік нысан пайдалануға беріледі. Қалғаны келер жылға өтпелі. Бұл туралы Өңірлік коммуникациялар қызметінің ақпараттық алаңында облыстық құрылыс, сәулет және қала құрылысы басқармасы басшысының орынбасары Арнұр Нұрмағанбетов баяндады.
<blockquote>
 “Ағымдағы жылы облыста сатып алу құқығынсыз жалға берілетін жалпы ауданы 815 пәтерді құрайтын 51,4 мың шаршы метр 20 тұрғын үйдің құрылысы жүргізілуде. Оның ішінде, Қызылорда қаласында 725 пәтерлі 15 тұрғын үй, Шиелі ауданында 90 пәтерді құрайтын 5 үй. Жыл аяғына дейін 698 пәтерді құрайтын 15 тұрғын үйді пайдалануға беру жоспарлануда”, – деді Арнұр Әлібекұлы.
</blockquote>
Қазіргі таңда, Қызылорда қаласында көпбалалы отбасыларға 10 пәтер сатып алу үшін және Жаңақорған ауданында 18 пәтерлі бір тұрғын үйді сатып алу үшін облыстық бюджеттен 140,9 млн теңге қаржы бөлінген. Келер жылы тұрғын үйлердің құрылысына 1,8 млрд теңге, атап айтсақ халықтың әлеуметтік осал топтары үшін Шиелі ауданында 18 пәтерлі 4 үйдің құрылысына 519,4 млн теңге, Байқоңыр қаласында 50 пәтерлі 5 үйдің құрылысына 1225,2 млн теңге, аз қамтылған көпбалалы отбасылар үшін Сырдария ауданында үш бөлмелі 3 тұрғын үй құрылысына 38,4 млн теңге қаралған. Сонымен бірге, халықтың әлеуметтік осал топтары мен аз қамтылған көпбалалы отбасылар үшін 342 пәтер сатып алуға ұлттық қордан 2,9 млрд теңге бөлінбек.

Қызылордада биыл 19 әлеуметтік нысан пайдалануға берілді

<a href="https://kyzylorda-news.kz/">Kyzylorda-news.kz</a>.&nbsp;Бүгін облыс әкімі Гүлшара Әбдіқалықованың төрағалығымен су тапшылығы жағдайында егін шаруашылығын әртараптандыру жөнінде мәжіліс өтті. Жиынға мемлекеттің орган, ғылыми-зерттеу институттарының өкілдері, шаруашылық басшылары мен онлайн режимде «Ұлттық аграрлық ғылыми-білім беру орталығы» АҚ басқарма төрағасының м.а. Айбын Төреханов, қала және аудан әкімдері қатысты.
<blockquote>
 «Қызылорда облысының басты ерекшелігі – бұл инженерлік жүйеге келтірілген егіс алқаптары, алтын қоры деп айтсақ та болады. Бүгінгі күні облысымызда 236 мың га суармалы жер болса, оның 178 мың га инженерлік жүйеге келтірілген. Жылда 180 мың гектардың үстінде ауыл шаруашылығы дақылдары егіледі. Мемлекеттік қолдаулардың арқасында облыстың ауыл шаруашылығы өндірісінің дамуында оң нәтижелер қалыптасты. Ағымдағы жылдың 10 айында ауыл шаруашылығы өнімдерінің өндірісі 128,5 млрд. теңгеге жетті. Есепті кезеңде ауыл шаруашылығы саласына тартылған инвестиция 10,6 млрд. теңгені құрап, өткен жылдың осы кезеңімен салыстырғанда көрсеткіш 1,9 есеге, тамақ өнімдеріне салынған инвестиция көлемі 1,2 млрд. тг құрап 1,6 есеге өсті. Дегенмен, соңғы жылдары ауа райының өзгерістері мен су тапшылығы облыста егін шаруашылығын әртараптандыруды қажет етіп отыр. Егіс көлемін әртараптандыру бағытында соңғы бес жылда мал азықтық дақылдар көлемі 4 мың гектарға, ал, күріштен басқа дәнді дақылдар көлемі 7,5 мың гектарға көбейгенімен, әртараптандыру жұмыстары әлі де баяу жүруде. Су тапшылығы жағдайында біз негізгі дақыл күріш егістігінің көлемін белгілі бір деңгейге дейін тұрақтандыруын, оның өнімділігін арттыруды және суды үнемдеуге мүмкіндік беретін басқа дақылдар көлемін ұлғайтуды қарастыруымыз қажет», – деді облыс әкімі Гүлшара Әбдіқалықова.
</blockquote>
Бүгінгі күні жаңбырлатып, тамшылатып суару және аквагельді пайдалана отырып ауыл шаруашылығы өнімдерін өндіруге ерекше назар аударылуда. Осы бағытта Жаңақорған ауданда «Orbis Agro» компаниясы 3 мың га жерге тамшылатып суару арқылы қызанақ, Шиелі ауданында «Тың Өріс» компаниясы 10 мың га жерге жаңбырлатып суару әдісімен жоңышқа, Қазалы ауданында «РЗА-Агро» серіктестігі 87 гектарға жаңбырлатып суарумен жүгері егу жобалары қолға алынған.
Сонымен қатар, биылғы жылдан бастап тәлімді жерлер игерілуде. Келесі жылы аталған жұмыстарды атқаруға Жаңақорған ауданында аквагельді қолдану арқылы 500 га мақсары дақылы мен 200 га жаздық бидай егіледі деп жоспарлануда.
Мәжілісте сала ғалымдары әртараптандыру кезінде суармалы суды үнемдеудің жаңа технологияларын енгізу, суармалы жерлерінің деградациясы және оларды төмендету жолдары, күріш ауыспалы егісін әртараптандыру және күріш алқаптары мен егістігінің жағдайына ғарыштық мониторинг жүргізу мәселелерін сөз етті.
2021 жылы егілетін дақылдардың егіс көлемінің сызбасы Қызылорда қаласы мен аудан әкімдіктерімен және тиісті мекемелерімен келісіліп, бөлінетін су көлемі лимиті шегінде жасалынды. Сызбаға сәйкес, ауыл шаруашылығы дақылдарын 187,3 мың гектарға орналастыру межеленсе, оның ішінде негізгі дақыл күріштің көлемі 85,7 мың гектарды құрап отыр.
Жиын соңында аймақ басшысы су тапшылығы жағдайында әртараптандыруды жүзеге асыру үшін егіншілік мәдениетіне ғылымның озық жетістіктерін енгізуді және егіншілік саласын пайдалы кәсіпке айналдыру қажет екенін атап өтті.
<img src="https://kyzylorda-news.kz/wp-content/uploads/2020/12/131053054_2962490900520626_930879195827898589_o.jpg" alt="" />

Қызылордада су тапшылығы жағдайында егін шаруашылығын әртараптандыру жөнінде мәжіліс өтті

<a href="https://kyzylorda-news.kz/">Kyzylorda-news.kz</a>.&nbsp;Бүгін облыс әкімі Гүлшара Әбдіқалықова 3 мәрте «Алтын домбыра» иегері Мұхтар Ниязов пен «Дарын» мемлекеттік жастар сыйлығының иегері Күнсұлу Түрікпенді қабылдап, қос өнерпазды жетістіктерімен құттықтады. Аймақ басшысы айтыс пен жыраулық өнердің Сыр өңірі үшін алар орны ерекше екендігін айтып, ұлттық құндылықтарды дәріптеп жүрген талантты жастардың алда да талай жеңістерге жететініне сенім білдірді.
<blockquote>
 “Сыр бойы Қазақстан Республикасының Тұңғыш Президенті Елбасы Нұрсұлтан Әбішұлы Назарбаев айтқандай «Сыр – Алаштың анасы» деп дәріптеліп келеді. Алты алашта «Сыр елі – жыр елі» деген сөз ежелден келе жатқан ұғым бар. Ескіден жеткен есті сөз қазіргі уақытта халықтың бағасына айналды. Киелі өлкеде өнердің саф алтындай өскіні өркендеп, ақындық пен жыршылықтың алтын тамыры ұрпақтан ұрпаққа жалғасып келеді. Осының дәлелі, кеше ғана Елордада өткен «Абай тағылымы – Тәуелсіздіктің тірегі» атты республикалық ақындар айтысында жерлесіміз ақын Мұхтар Мәуленұлы Ниязов «Бас жүлдені» иеленіп, үшінші мәрте «Алтын Домбыра» иегері атанды. Сіздерді барша жерлестеріңіздің атынан жеңістеріңіз, марапаттарыңызбеншын жүректен құттықтаймын”, – деді облыс әкімі Гүлшара Әбдіқалықова.
</blockquote>
Шарада сөз алған Мұхтар Ниязов бүгінгі жеңісі барша Сыр бойылықтардың жеңісі екендігін айтып, қолдау көрсеткен жерлестеріне алғысын жеткізді.
“Бүгінгі менің жеңісім барлық жанашыр жандарға ортақ. Өйткені алғаш «Алтын домбыра» сайысына қатысқаннан бастап, Сыр елі маған әрдайым қолдау көрсетіп келеді. Сондықтан мен алтын домбыраны алуым керек деп мақсат тұттым. Расымен де біздің өңір жыршылықтың, айтыстың отаны десек болады. Сіздердің өнерге деген қолдауларыңыздың арқасында көптеген өнерпаз жастарымыз жеңістерге жете береді деп ойлаймын”, – деді Мұхтар Ниязов.
Қазақстан Республикасының Үкіметінің қаулысымен «Дарын» мемлекеттік жастар сыйлығына ие болған Күнсұлу Түрікпен де ұлттық өнерге әрдайым қолдау білдірген Сыр жұртшылығы мен аймақ басшысына ризашылығын білдірді.
Жиын соңында облыс әкімі Гүлшара Әбдіқалықова ақын Мұхтар Ниязовқа қаржылай сый ұсынып, жырау Күнсұлу Түрікпенге домбыра сыйға тартты.
<img src="https://kyzylorda-news.kz/wp-content/uploads/2020/12/130892285_2962365703866479_5240986816120750199_o.jpg" alt="" />

Облыс әкімі Гүлшара Әбдіқалықова Сыр өнерпаздарына құрмет көрсетті

<a href="https://kyzylorda-news.kz/">Kyzylorda-news.kz</a>. Қызылорда облысы бойынша 15 тойхана өз қызметін өзге салаға қайта бағыттады.
Атап айтсақ, Арал ауданындағы “Ақ Ниет”, “Алмаз” мейрамхана қызметін сауда саласына ауыстырса, «Хан Шатыры» тойханасы асхана қызметін көрсетуде. Ал Қармақшыда «Мирас», «Алтын ғасыр» тойханасы құрылыс материалдары мен киім-кешек сату дүкенін айналса, «Малие ана» кондитер өнімдерін шығару және балалар ойын алаңын ашса, «Айқын» тойханасы құс шаруашылығымен айналысуда.
Сондай-ақ, Қызылорда қаласы бойынша 4, Қазалы ауданы бойынша 2 және Сырдария ауданы бойынша 2 тойхананың қызмет бағытын өзгерту жұмыстарын атқаруда. Бұл туралы Өңірлік коммуникациялар қызметінің ақпараттық алаңында Облыстық кәсіпкерлік және туризм басқармасы басшысының орынбасары Мұрат Тасқараев баяндады.
<blockquote>
 “Қызылорда қаласы бойынша «ДАЛАТЕКС» серіктестігімен «Orda» мейрамханасының ғимаратынан автоматтандырылған лаваш шығару өндірісі іске қосылуы күтілуде. Оған шамамен 30 млн теңге қаржы бағытталып, тиісті құрал-жабдықтарға тапсырыстар берілді. Сонымен бірге, «Ұлытау» тойханасында шырындар мен сусындар өндірісі іске қосылатын болады. Жоба «Байқоңыр» әлеуметтік кәсіпкерлік корпорациясымен бірлесіп іске асырылмақ. Оған шамамен 50-60 млн теңге қаржы жұмсалатын болады”, – деді Мұрат Тасқараев.
</blockquote>
Қазіргі таңда, платформа аясында кәсіпкерлік саласындағы мекемелер бір жерге шоғырландырылған арнайы «Бизнеске арналған Үкімет» кеңсе ғимараты жұмыс жасайды. Яғни, кәсіпкердің уақыты мен шығынын үнемдей отырып, әкімшілік кедергілерді барынша қысқартып, қызметтерді бір орталықтан алу мүмкіндігі бар.
<img src="https://kyzylorda-news.kz/wp-content/uploads/2020/12/130740951_1186916061703904_8864873500142785019_o.jpg" alt="" />

Қызылордада 15 мейрамхана қызметін өндіріске бұрды

<a href="https://kyzylorda-news.kz/">Kyzylorda-news.kz</a>. Үш дүркін «Алтын домбыра» иегері, айтыскер ақын Мұхтар Ниязов туған жеріне келді. Аймақ басшысы Г.Әбдіқалықованың қабылдауынан кейін журналистермен кездесіп, пікірлесті.
Тоғызыншы мәрте ұйымдастырылған аламан айтыс Нұр-Сұлтан қаласында өтті. Айта кетейік, Сырдың мақтанышы Мұхтар Ниязов «Алтын домбыра» айтысының барлығына қатысқан. Осыған дейін екі рет бас жүлдені қанжылаған болатын. Үшінші мәрте жеңіс тұғырынан көрініп, «Алтын домбыраның» мәңгі иегері атанды.
<blockquote>
 «Сырға барсаң жыршымын деме» деген сөзді ауызбен бәріміз айтамыз. Бірақ іспен дәлелдеуге дайын болуға бәріміз атсалысуымыз керек. Бұған дейін де солай болған. Қаншама халықаралық додаларда топ жарып жүрміз. Алдағы уақытта да бұнымен тоқтамаймыз. Бұл шыққан биігіміздің басы деп ойлаймын. Пандемияға байланысты биыл айтыс үш кезең бойынша ұйымдастырылды. Ең бірінші кезеңде Бекарыс Шойбековпен, одан кейін Арқалықтың ақыны Айбек Қалиевпен, сосын Семейлік Серік Қуанмен айтыстым. «Арық сөйлеп, семіз шық» дейді. Халық бағасын өзі береді, – деді Мұхтар Ниязов.
</blockquote>
Биыл додада 20 ақын бақ сынады. Сегіз ақын жартылай финалға сөз сайыстырды.

Қазақстан және Қызылорда облысының жаңалықтары: Басты жаңалықтар old