<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте коронавирус ПТР-сынама арқылы 652 адамнан анықталды, деп хабарлайды coronavirus2020.kz сайты.
Өңірлер бойынша:
Шығыс Қазақстан облысында – 18279 (+68),
Нұр-Сұлтан қаласында -17613(+58),
Алматы қаласында – 17532(+72),
Атырау облысында – 12561(+49),
Қарағанды облысында – 11696(+30),
Батыс Қазақстан облысында – 8822(+40),
Павлодар облысында – 8321(+75),
Солтүстік Қазақстан облысында – 7966(+63),
Қостанай облысында – 6875(+65),
Ақмола облысында – 6631(+58),
Алматы облысында – 6516(+41),
Шымкент қаласында -5452(+0),
Жамбыл облысында – 4848(+8),
Ақтөбе облысында -3629(+6),
Түркістан облысында – 3580(+5),
Маңғыстау облысында – 3574(+13),
Қызылорда облысында -3341(+1).
Жалпы, пандемия басталғалы ел бойынша ауырғандар саны – 147236.

Қызылордада коронавирус тіркелді

<a href="https://kyzylorda-news.kz/">Kyzylorda-news.kz.</a> Қазақстан Республикасының Мәдениет және спорт министрі Ақтоты Райымқұлова Сыр еліне жұмыс сапарымен келді.
Министр мен облыс әкімінің орынбасары Серік Ахмет алдымен Ә.Тәжібаев атындағы облыстық әмбебап ғылыми кітапханасындағы Әл-Фарабидің 1150 жылдығына арналған «Әл-Фараби әлемі», Абай Құнанбайұлының 175 жылдығына арналған «Кемеңгерліктің биік шыңы Абай», Тәуелсіздік күніне арналған «Ел тұғыры-Тәуелсіздік» тақырыбындағы кітап көрмелерімен танысты. Мұнан соң сырбойылық мәдениет және өнер саласы өкілдерімен кездесіп, ағымдағы жылы аймақтың мәдениет саласында атқарған жұмыстарын саралады.
<blockquote>
 “Сыр өңірін қашан да өнер ордасы деп танимыз. Сондықтан биыл Қызылорда облысы мәдениет саласында көптеген жұмыстар атқарып, үлкен жетістіктерге қол жеткізді. Белгілі ақын Мұхтар Ниязов Елордада өткен «Абай тағылымы – тәуелсіздіктің тірегі» атты республикалық ақындар айтысында бас жүлдені иеленіп, үшінші мәрте «Алтын домбыраны» жеңіп алды. Сүлейлердің ізбасары Күнсұлу Түрікпеннің «Дарын» мемлекеттік жастар сыйлығының иегері атанды. Мұның бәрі Қызылорда облысындағы мәдениет саласындағы майталмандардың ерен еңбегінің арқасы деп білемін. Баршаңызды «Тәуелсіздік күні» мерекесімен құттықтай отырып, алдағы жұмыстарыңызға да сәттілік тілеймін”, – деді Ақтоты Райымқұлова.
</blockquote>
Кездесуде сөз алған Н.Бекежанов атындағы қазақ академиялық музыкалық драма театрының көркемдік жетекшісі Әмір-Темір Хұсейін мемлекеттің мәдениет саласына жасап жатқан қолдауларына ризашылығын білдірді. Қасиетті өнердің қара шаңырағы – Н.Бекежанов атындағы қазақ академиялық музыкалық драма театры ғимаратының шатырына күрделі жөндеу жүргізіліп, облыстық филармонияның қосымша ғимаратының құрылысының басталуы Сыр өнерінің алға басуына айтарлықтай ықпал жасады дейді. 
Келелі жиында өнер иелері министр Ақтоты Рахметоллақызына сауалдарын жолдап, өңір мәдениетін дамыту тұрғысындағы пікірлерімен бөлісті. Кездесу соңында Қазақстан Республикасы Мәдениет және спорт министрлігінің «Мәдениет саласының үздігі» төсбелгісімен 6, Құрмет грамотасымен 3, Алғыс хатымен 3 өнерпаз марапатталды. Сонымен қатар Сыр өнерінің дамуына қосқан үлесі үшін 10 мәдениет саласының қызметкері облыс әкімінің Алғыс хатына ие болды.
Министр жұмыс сапары барысында «Мұз айдыны» спорт кешенінің жұмысын да көрді. Кешенде шайбалы хоккей және мәнерлеп сырғанау бойынша оқу-жаттығу сабақтарына, жарыстар өткізуге және халық жаппай сырғанауға арналған жасанды мұз айдыны, оқу-жаттығу сабақтары мен волейбол залы және күрес түрлері мен көркем гимнастикадан оқу-жаттығу сабақтары мен жарыстар өткізуге арналған зал бар. Ақтоты Райымқұлова мұнда Сыр спортшыларымен пікірлесіп, спорт саласындағы атқарылған жұмыстармен танысты. Кездесуде Вилорий Пак, Илья Ильин, Хәкімжан Елеусінов соңғы уақытта спортқа деген тұрғындардың қызығушылығы артқанын айтып, салаға мемлекет тарапынан жасалып жатқан қолдауларға алғысын жеткізді.
Мәдениет және спорт министрі Ақтоты Райымқұлованың Қызылорда облысындағы жұмыс сапары облыс орталығындағы А.Тоқмағанбетов атындағы қалалық мәдениет үйінде қорытындыланды. Министр мәдениет үйі жанынан құрылған «Жастар театрының» жұмысымен танысты. А.Тоқмағамбетов атындағы мәдениет үйі жанынан шығармашыл жастарға қолдау көрсету мақсатында 2016 жылы «Жастар» театры құрылып, «Алғашқы махаббат» қойылымымен театр шымылдығын ашты. Театрға «Мәдениет қайраткері» төсбелгісінің иегері Оңталап Нұрмаханов жетекшілік етеді. Қазір мұнда 15 жас талант қызмет атқарады. Театр ұжымы А. Құнанбайұлының 175 жылдығына орай Қарағанды қаласында өткен республикалық онлайн театрлар байқауына О.Нұрмахановтың «Қалың елім, қазағым, қайран жұртым…» атты қойылымымен қатысып Бас жүлдені иеленді. Ақтоты Рахметоллақызы мәдениет үйі мен театр ұжымының жұмысына оң бағасын беріп, алдағы жұмыстарына сәттілік тіледі.
<img src="https://kyzylorda-news.kz/wp-content/uploads/2020/12/131927106_2987338784702504_3298397092889574018_n.jpg" alt="" />
<img src="https://kyzylorda-news.kz/wp-content/uploads/2020/12/132129572_2987338781369171_2043377481280435336_n.jpg" alt="" />
<img src="https://kyzylorda-news.kz/wp-content/uploads/2020/12/132186516_2987338708035845_6921772339582407696_n.jpg" alt="" />
<img src="https://kyzylorda-news.kz/wp-content/uploads/2020/12/131935318_2987338654702517_8537990094835438279_n.jpg" alt="" />

Ақтоты Райымқұлова Сыр еліндегі атқарылып жатқан жұмыстармен танысты

<a href="https://kyzylorda-news.kz/">Kyzylorda-news.kz</a>. Елімізде халық тарапынан сұранысқа ие тауарлар бағамы қымбаттады. Бұл облыс нарығына да әсерін тигізуде. Мәселен, соңғы аптада 4 өнімнің бағасы жоғарылады. Оның ішінде, сүзбе, картоп, жұмыртқа, өсімдік майы.
<blockquote>
 “Соңғы аптада кейбір азық-түлік бағасы өндіруші кәсіпорын тарапынан жоғарылауы байқалды. Мысалы, тауық жұмыртқасының қымбаттауы жыл сайынғы қысқы маусымаралық кезеңге байланысты болуда. Баға өсуінің негізгі себебі, құс тұмауы таралуынан және құс азығының қымбатауы. Республикада жұмыртқаға сұраныстың артуынан бір аптада бағасы 20 пайызға қымбаттады. Айта кететін жайт, қарақұмық, қант, өсімдік майы, ұн өнімдері өңірімізде өндірілмеуіне байланысты республиканың басқа аймақтарынан әкелінеді. Бұл мәселе бойыша да біршама жұмыстар жасалуда. Өндірілмейтін өнімдер бағасын тұрақтандыру мақсатында облыстық бюджеттен кәсіпкерлерге қарыз беру үшін қосымша 400 млн. теңге бөлінді”, – деді облыстық ауыл шаруашылығы басқармасының басшысы Шахмардан Қойшыбаев.
</blockquote>
Брифингте сала басшысы бағаны тұрақтандыру мақсатында әлеуметтік маңызы бар тауарлардың шекті бағамына мониторинг жұмыстары жүргізіліп тұратынын айтты. Өңірдің тұрақтандыру қорында 2,5 мың тонна өнім бар. Бүгінде 29 әлеуметтік дүкен мен 2 әлеуметтік маркеттің және 4 ірі супермаркеттің әлеуметтік бұрыштарында сатылуда.

Қызылордада 4 өнімнің бағасы қымбаттады

<a href="https://kyzylorda-news.kz/">Kyzylorda-news.kz</a>. Қазақстан президенті Қасым-Жомарт Тоқаев азаматтардың құқықтарын қорғауға, сондай-ақ сыбайлас жемқорлықпен күресті күшейтуге бағытталған бірқатар заңға қол қойды, деп хабарлады Ақорда.
&nbsp;Мемлекет басшысы “Қазақстан Республикасының кейбір заңнамалық актілеріне қылмыстық процесте азаматтардың құқықтарын қорғауды және сыбайлас жемқорлыққа қарсы іс-қимылды күшейту мәселелері бойынша өзгерістер мен толықтырулар енгізу туралы” заңға қол қойды. &nbsp;
Атап айтқанда, заңға сәйкес мемлекеттік қызметшілерге, парламент депутаттарына және судьяларға шетелдік банктерден шот ашуға тыйым салынды.
Қазақстан президенті бұған дейін 2021 жылдан бастап мемлекеттік қызметшілер, депутаттар, судьялар үшін олардың шоттарына иелік ету, шетелдік банктерде қолма-қол ақша мен құнды заттарды сақтауға қатысты сыбайлас жемқорлыққа қарсы жаңа шектеу енгізу керек деп мәлімдеген болатын.
Сонымен қатар, президент “Қазақстан Республикасының кейбір заңнамалық актілеріне персонал беру жөніндегі қызметтерді көрсету мәселелері бойынша өзгерістер мен толықтырулар енгізу туралы” және “Қазақстан Республикасының кейбір заңнамалық актілеріне адамдарды Қазақстан Республикасының шегінен тысқары жерге шығарып жіберу кезінде ұстап алу мерзімдерін реттеу мәселелері бойынша өзгерістер мен толықтырулар енгізу туралы” заңдарға қол қойды.

Мемлекет басшысы бірқатар заңға қол қойды

<a href="https://kyzylorda-news.kz/">Kyzylorda-news.kz</a>. 20 желтоқсанда елдің басым бөлігінде қар жауады, деп хабарлайды «Қазгидромет» РМК баспасөз қызметі.
Түнде Қазақстан аумағының орталық және шығыс бөлігіне циклон ықпал етеді.
Салдарынан кей жерлерде қар жауады, оңтүстікте – жауын-шашын, түнде қатты жауын-шашын (жаңбыр, қар) болады.
Күндіз циклон солтүстік-шығысқа қарай жылжып, елдің басым бөлігіне Солтүстік-батыс антициклоны әсер ете бастайды.
Осыған байланысты батыс аудандарда жауын-шашын жаумайды.
Республиканың кей жерлерінде тұман түсіп, жел күшейеді, жаяу бұрқасын көтеріліп, көктайғақ болады.
Қызылорда облысының кей жерлерінде көктайғақ, түнде және таңертең жел екпіні 15-20 м/с жетеді.

20 желтоқсанға арналған ауа райы

<a href="https://kyzylorda-news.kz/">Kyzylorda-news.kz</a>.Бүгін өңірлік коммуникациялар қызметінде облыс әкімі Серік Ахмет қасқырлардың бас бапкерін таныстырды. Енді қызылордалық «Қайсар» футболшыларын жаңа маусымда жергілікті маман Сұлтан Әбілдаев жаттықтырады.
Сұлтан Әбілдаев 1970 жылы 21 наурызда Қызылорда қаласында дүниеге келген. Кәсіби футболшы. Алаңда жартылай қорғаушы қызметін атқарған. Мансабының басым бөлігін «Қайсар» футбол кубында өткізген. Тек 2002 жылы бір маусым «Атырау» командасында ойнаған. Сұлтан Әбілдаев «Қайсар» футбол клубының тарихында ең көп ойын өткізген футболшы. Қазақстан Ұлттық Құрамасының намысын қорғаған. 2005 жылы мансабын аяқтаған соң, бапкерлік қызметке ден қояды. Алдымен футбол орталығында шәкірт тәрбиелеумен айналысса, 2009 жылы «Қайсар» командасын жаттықтырады. 2010 жылы бас бапкердің көмекшісі қызметін абыроймен атқарды. 2016 жылға дейін клубта түрлі бағытта қызмет атқарып, 2016 жылы «Қайсар» футбол клубына бас бапкер қызметіне тағайындалып, команданы Бірінші лигадан Премьер-лигаға шығарады. Сол жылы Бірінші лига арасында ең үздік бапкер атағына ие болды. Бүгінде жергілікті жаттықтырушы өңір футболының дамуына үлес қосып келеді. Сонымен қатар үстіміздегі жылдан бастап осы уақытқа дейін «Байқоңыр» футбол клубының бас бапкердің кеңесшісі қызметін атқарып келді. 
Айта кетейік, Сұлтан Әбілдаевқа жергілікті жаттықтырушылар Қанат Шерімбетов пен Ерлан Шойтымов көмек көрсетеді.

«Қайсар» футбол командасына жаңа бапкер тағайындалды

<a href="https://kyzylorda-news.kz/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова Қызылорда облысы бойынша қорғаныс істері жөніндегі департаментінің басшысы Айдын Сағынбековпен кездесті.
Қабылдау барысында аймақ басшысы әскери бағыттағы негізгі жұмыстар туралы өзара әңгімелесіп, бірлескен жұмыстар шеңберіндегі атқарылған істер бойынша пікірлесті. Сондай-ақ, өңірдегі әскер қатарына шақыру жұмыстарының барысы туралы сөйлесті. Өз кезегінде департамент басшысы Айдын Сағынбеков жыл ішінде атқарған жұмыстардың негізгілеріне тоқталды.
Кездесу соңында департамент басшысы облыс әкіміне ҚР Қорғаныс істері министрінің Алғыс хатын табыстады.

Гүлшара Әбдіқалықова Қызылорда облысы бойынша қорғаныс істері департаментінің басшысымен кездесті

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 661 адамда коронавирус індеті ПТР арқылы расталып ауырғаны белгілі болды.
Аймақтар бойынша: 
Нұр-Сұлтан қаласы – 47 
Алматы қаласы – 74 
Шымкент қаласы – 3 
Ақмола облысы – 68 
Ақтөбе облысы – 2 
Алматы облысы – 37 
Атырау облысы – 39 
Шығыс Қазақстан облысы – 60 
Жамбыл облысы – 30 
Батыс Қазақстан облысы – 43 
Қарағанды облысы – 32 
Қостанай облысы – 72 
Қызылорда облысы – 4 
Маңғыстау облысы – 5 
Павлодар облысы – 71 
Солтүстік Қазақстан облысы – 70 
Түркістан облысы – 4
Жалпы ел бойынша ауырғандар саны – 142 986.

Қызылордада өткен тәулікте 4 адам коронавирус індетін жұқтырды

<a href="https://kyzylorda-news.kz/">Kyzylorda-news.kz</a>. Тәуелсіздік күні қарсаңында бірқатар азамат мемлекеттік наградалармен марапатталды, деп хабарлайды&nbsp;<a href="https://www.akorda.kz/kz/events/akorda_news/akorda_other_events/tauelsizdik-kuni-karsanynda-birkatar-azamat-memlekettik-nagradalarmen-marapattaldy-1">Ақорда.</a>
Тәуелсіздік күні мерекесі қарсаңында Қазақстан Республикасы Президентінің Жарлығымен мемлекетіміздің әлеуметтік-экономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі, белсенді қоғамдық қызметі үшін ел азаматтарының үлкен бір тобы мемлекеттік наградалармен марапатталды. Олардың қатарында өндіріс, бизнес, білім беру, денсаулық сақтау салаларының көрнекті өкілдері, әскери қызметшілер, құқық қорғау органдарының қызметкерлері, спортшылар, соғыс және еңбек ардагерлері, мәдениет және ғылым қайраткерлері бар.
«Қазақстанның Еңбек Ері» атағы Қазақстан Республикасының экономикасын дамытудағы және өндірістік қызметтегі ерекше еңбегі үшін Павлодар облысы «Еуроазия энергетикалық корпорациясы» АҚ «Восточный» кенішінің машинисі Мұрат Қайыргелдинге және Теміртау металлургия комбинатының атқарушы директоры Вадим Басинге берілді.
«Отан» орденімен «Астана Опера» мемлекеттік опера және балет театрының жетекші солисі Майра Мұхамедқызы марапатталды. «Қазақстан Республикасының Тұңғыш Президенті – Елбасы Нұрсұлтан Назарбаев» орденімен Қазақстан Республикасының Премьер-Министрі Асқар Мамин, Алматы облысының әкімі Амандық Баталов, «Kazakhmys Holding» ЖШС президенті Владимир Ким, «BSB» Қаржы-өнеркәсіп корпорациясы» ЖШС президенті Рашит Сарсенов; І дәрежелі «Барыс» орденімен Жәния Әубәкірова авторлық мектебінің директоры Жәния Әубәкірова, ақын Шөмішбай Сариев, Алматы облысы «Хильниченко и К» коммандиттік серіктестігінің төрағасы Виктор Хильниченко; ІІ дәрежелі «Барыс» орденімен жазушы, «Тіл-қазына» ұлттық ғылыми-практикалық орталығының бас директоры Әлібек Асқар, Абай атындағы Қазақ ұлттық педагогикалық университеті жанындағы орталықтың жетекшісі Әлия Бейсенова, Конституциялық Кеңес мүшесі Асхат Дауылбаев, Қызылорда қаласындағы «Болашақ» университетінің ғылыми басшысы Бақберген Досманбетов, Парламент Сенатының депутаты Мұхтар Құл-Мұхаммед; ІІІ дәрежелі «Барыс» орденімен Парламент Мәжілісінің депутаты Омархан Өксікбаев марапатталды.
Белгілі ғалымдар, мәдениет қайраткерлері, өндірістік сала өкілдерінің еңбектері «Парасат» орденіне лайық деп танылды. Олардың арасында Ұлттық ғылым академиясының академигі М.Баймаханов, «Бүркіт» мемлекеттік авиакомпаниясы» РМК директоры А.Дзюба, «Ақмола-Тіршілік» ЖШС директоры Ж.Ерғалиев, «Бибі-Ана» қайырымдылық қорының президенті Б.Иманғазина, Қазақстан Республикасының Ұлттық музейінің антропологы О.Ысмағұлов, «Ауыл шаруашылығы жұмыскерлерінің салалық кәсіби одағы» АҚ төрағасы Е.Каппель, Қ.Қуанышбаев атындағы Мемлекеттік академиялық қазақ музыкалық драма театрының әртісі Т.Мейрамов, Қазақстанның тұңғыш Президенті – Елбасының көмекшісі Д.Ақышев, Премьер-Министрдің орынбасары А.Смайылов, Сыртқы істер министрі М.Тілеуберді, ақын Р.Ниязбек, Абай атындағы Қазақ ұлттық педагогикалық университеті жанындағы ғылыми-практикалық орталықтың директоры Ф.Оразбаева, Қостанай облысы «Фрунзенское» ЖШС директоры Н.Шерер бар.
І дәрежелі «Достық» орденімен «Мабетекс групп» компаниясының негізін қалаушы Б.Паколли марапатталды. ІІ дәрежелі «Достық» орденіне Сыртқы істер министрлігінің ерекше тапсырмалар жөніндегі елшісі З.Аманжолова, Түркістан облысы «YDA Group» директорлар кеңесінің төрағасы А.Хусейн, Қызылорда облысы әкімі аппаратының жанындағы «Қоғамдық келісім» РММ сарапшысы С.Крюгер, дипломатиялық қызмет ардагері Б.Нұрғалиев, Н.Сац атындағы Мемлекеттік балалар және жасөспірімдер академиялық орыс театрының әртісі Т.Тарская, Жамбыл облысы бойынша Махмұд Қашғари атындағы Ұйғыр этномәдени бірлестігінің төрағасы М.Турдыева, Шығыс Қазақстан облысы «Семена масличных» ШҚ басшысы Л.Цыбенко және басқалар ие болды.
«Қазақстанның еңбек сіңірген қайраткері» құрметті атағы ғылым және мәдениет саласының 21 көрнекті өкіліне берілді, олардың ішінде белгілі әншілер Ж.Айжан мен Т.Серіков, ғалым Р.Жансараева, ақын И.Сапарбай, актер С.Матвеев, өнертанушы К.Ли, театр және кино әртістері З.Карина, Б.Тушаев және басқалар бар.
Белгілі ғалымдар, мәдениет қайраткерлері, өндірістік сала өкілдерінің еңбектері «Құрмет» орденімен бағаланды. Олардың қатарында Нұр-Сұлтан қаласының әкімдігі жанындағы Мемлекеттік академиялық филармонияның әншісі С.Айтбаева, Қазақстан Республикасының Моңғолиядағы Төтенше және өкілетті елшісі Ж.Әділбаев, жазушылар С.Дәуітов және А.Кемелбаева, «Дизайнерлердің еуразиялық одағы» акционерлік қоғамының төрағасы Е.Асылханов, Маңғыстау облысы Жаңаөзен политехникалық колледжінің директоры Т.Болатбаева, Түркістан облысы Арыс қаласы В.Комаров атындағы №8 жалпы білім беретін орта мектебінің мұғалімі Т.Бородина, Алматы қаласы «Қазақконцерт» мемлекеттік концерт ұйымының әртісі М.Жүнісова, «ҚазАқпарат» халықаралық ақпарат агенттігі Басқарма төрағасының кеңесшісі Қ.Әбуова, Солтүстік Қазақстан облысы «Раисовское» ЖШС директоры В.Коваленко, «Қазақ әдебиеті» газетінің бас редакторы Д.Қуатов, Ақтау қаласы «Ақ Бидай-Терминал» АҚ басқарма төрағасы С.Көбейсінов, қоғам қайраткері Қ.Жолдыбайұлы, ақын С.Дүйсенғазы, М.Әуезов атындағы Мемлекеттік қазақ академиялық драма театрының әртісі Ш.Меңдиярова, Павлодар қаласындағы №3 қалалық ауруханасының бөлім меңгерушісі В.Павлов, «Атырауинжстрой» жауапкершілігі шектеулі серіктестігі Директорлар кеңесінің төрағасы В.Пак, Ұлттық қоғамдық сенім кеңесінің мүшесі А.Омарова, айтыскер ақын А.Тұрсынбаева, актер Ә.Райынбеков, «Ақтөбе облысы Чернобыль мүгедектері» АҚ төрағасы Б.Сатов, Ғ.Құрманғалиев атындағы Батыс Қазақстан облыстық филармониясының солисі С.Таудаева, еңбек ардагері К.Әлпейісова, Л.Гумилев атындағы Еуразия Ұлттық университетінің кафедра меңгерушісі Т.Қайыркен, ғалым О.Сәбден және басқа да тұлғалар бар.
Өнеркәсіп, көлік, құрылыс, ауыл шаруашылығы, білім беру, денсаулық сақтау, әлеуметтік қамтамасыз ету және және басқа да салалардың 94 еңбеккері ІІІ дәрежелі «Еңбек Даңқы» орденінің иегерлері атанды.
Әскери және қызметтік борышын үлгілі атқарғаны, заңдылық пен құқықтық тәртіпті қамтамасыз етуде көрсеткен ерлігі мен жанқиярлығы, елдің ұлттық қауіпсіздігі мен қорғаныс қабілетін нығайтуға қосқан үлесі үшін әскери қызметшілер мен құқық қорғау органдары өкілдерінің бір тобы І және ІІ дәрежелі «Даңқ», сондай-ақ, І, ІІ, ІІІ дәрежелі «Айбын» ордендерімен, «Ерлігі үшін» және «Жауынгерлік ерлігі үшін» медальдарымен марапатталды.
Наградталғандардың тізімі баспасөзде жарияланады.
<img src="https://kyzylorda-news.kz/wp-content/uploads/2020/12/2012141519439518g.jpg" alt="" />
<img src="https://kyzylorda-news.kz/wp-content/uploads/2020/12/2012141519410617g.jpg" alt="" />

Тәуелсіздік күні қарсаңында бірқатар азамат мемлекеттік наградалармен марапатталды

<a href="https://kyzylorda-news.kz/">Kyzylorda-news.kz</a>.Облыс әкімі Гүлшара Әбдіқалықова Тәуелсіздік мерекесі қарсаңында жаңадан ашылған «Зерде» интеллектуалды мектебінің ашылу салтанатына қатысты. Аймақ басшысы соңғы жылдары жекеменшік мектептердің құрылысы бойынша инвесторлармен қарқынды жұмыс жүргізіліп жатқанын атап өтіп, жаңа білім ошағына баратын білім алушыларды құттықтап, ақжолтай тілегін жеткізді.
<blockquote>
 “Қазіргі таңда өңірімізде мемлекет пен жеке бизнес секторының арасында тығыз байланыс орнағаны белгілі. Осы орайда, жекеменшік мектептердің құрылысы бойынша инвесторлармен жұмыс белсенді жүргізілуде. 2019 жылы 1300 орындық 3 мектеп ашылды, биыл 300 және 500 орындық тағы 2 мектеп салынуда.Міне, 500 орындық «Зерде» интеллектуалды мектебін пайдалануға бергелі отырмыз. Осы жаңа мектеп ғимаратынан заманауи білімді меңгерген талапты да талантты тұлғалар, Тәуелсіз еліміздің дамуына аянбай үлес қосып, Сыр елін әлемге танытар зияткер ұрпақ білім алып шығады деп сенемін”, -деді облыс әкімі Гүлшара Әбдіқалықова.
</blockquote>
Аймақ басшысы Гүлшара Әбдіқалықова мемлекет және қоғам қайраткері Бекмырза Еламановпен бірге жаңа мектептің лентасын қиды. Мұнан кейін, мектеп фойесінде оқушылармен кездесіп, оқу ошағының материалдық-техникалық базасымен танысты. Мектептің құрылтайшысы Сейтқали Алшынбаев заманауи бағытта салынған интеллектуалдық мектептің ерекшеліктерін баяндады.
Мектептің мердігер мекемесі «Нұр-Ай» жауапкершілігі шектеулі серіктестігі. 500 орындық білім ошағының жоба құны 1 млрд. 250 млн.теңгені құрайды. Жаңа ғимараттың аумағы 8 000 шаршы метр, жалпы алаңы 1600 гектарды құрайды. Оқу ордасында 120 қызметкер жұмыспен қамтылатын болады. Интеллектуалды мектеп 3 қабаттан тұрады. Бірінші қабатта оқушылар үшін спортзал, би залы, асхана мен оқу кабинеттері орналасса, екінші қабатта балалар демалыс алаңы және теннис залы салынған. Ал, үшінші қабат заманауи үлгідегі акт зал, компьютер сыныпқа арналған.
Бүгінде аймақтағы 120 мектеп дәстүрлі режимде жұмыс жасаса, 180 мектеп қашықтан оқыту форматында білім беруде. 40 мыңға жуық бала оқитын 2 мыңнан астам кезекші топ ашылған. Тұрмысы төмен отбасылардың балаларына мектеп теңгеріміндегі 14 мыңнан астам компьютер беріліп, бюджет қаражаты мен демеушілер есебінен 27 мыңға жуық компьютерлік техника сатып алынған.
Ерекше айту керек, Сыр елінде апатты мектептерді жою бағытындағы жұмыстар шешілуде. Жыл басында 140 орындық бір мектептің құрылысы аяқталып, тағы бір мектептің құрылысы жалғасуда. Ал, келесі жылы үшінші мектептің құрылысы басталады.Еске сала кетейік, Қызылорда өңірінде 293 мемлекеттік мектеп болса, жеке мектептер саны 8-ге жетті.
<img src="https://kyzylorda-news.kz/wp-content/uploads/2020/12/131639727_2971688069600909_6867768590154779518_o.jpg" alt="" />
<img src="https://kyzylorda-news.kz/wp-content/uploads/2020/12/131263595_2971688806267502_8034157824221311116_o.jpg" alt="" />
<img src="https://kyzylorda-news.kz/wp-content/uploads/2020/12/131211263_2971688456267537_5678923512635500074_o.jpg" alt="" />

Гүлшара Әбдіқалықова «Зерде» интеллектуалды мектебінің лентасын қиды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова мереке қарсаңында Сырдария өзенінің сол жағалауында орналасқан 40 пәтерлі екі үйдің кілтін тұрғындарға табыстады. Пәтер иелерін жаңа қоныстарымен құттықтап, құрылыс саласындағы аймақтың жетістіктерін атап өтті.
<blockquote>
 “Қазақстан тәуелсіздік жылдарында толымды табыстарға қол жеткізсе, оған Сыр елі де өз үлесін қосып келеді. Соңғы жылдары аймағымыз қарқынды құрылыс алаңына айналды. Биылғы жылы облыста барлық қаржыландыру көздерінен 1 946 пәтерді құрайтын 98 тұрғын үйдің құрылысы басталды. Қызылорда қаласында жыл басынан бері 580 пәтерді құрайтын 15 тұрғын үй пайдалануға берілді. Тағы бір мақтанышпен айтатын жаңалығымыз жыл аяғына дейін қаламызда 680 пәтерді құрайтын 14 арендалық тұрғын үйдің құрылысы аяқталып, қабылданады. Қазіргі таңда Қызылорда қаласында 1 741 пәтерлік 38 көпқабатты тұрғын үйдің құрылысы жүргізілуде. Сырдария өзенінің сол жағалауында құрылысы жүргізіліп жатқан 725 пәтерлік 15 көпқабатты тұрғын үйдің 14-і ағымдағы жылы табысталмақ. 2021 жылы СПМК-70 тұрғын ауданы бойынша 13 көпқабатты тұрғын үйдің құрылысы аяқталып, пайдалануға берілмек”, – деді Г.Әбдіқалықова.
</blockquote>
Облыс орталығындағы №3 қалалық емхананың мейірбикесі Айжан Ізтілеуова бүгін баспанаға қол жеткізгендердің бірі. Ол жайлы үй табыстаған аймақ басшысы мен құрлысшыларға алғысын жеткізді.
<blockquote>
 “Әр адам жайлы баспана, жақсы жұмысы болғанын қалайды. Мен бүгін пәтер кілтін алып, үлкен қуанышқа кенеліп отырмын. Осындай қуаныштың себепшісі болған облыс әкімі Гүлшара Әбдіқалықова мен өзге де азаматтарға алғысымды айтамын. Бұл күнге біз Тәуелсіздіктің арқасында қол жеткізіп отырмыз деп ойлаймын. Сондықтан баршаңызды мерекемен құттықтаймын”, – деді А.Ізтілеуова. Шара соңында ардагер Шахизат Төребаев қоныс той иелерін құттықтап, ақ батасын берді.
</blockquote>
<img src="https://kyzylorda-news.kz/wp-content/uploads/2020/12/131110528_2971721899597526_439456155441365624_o.jpg" alt="" />

Қызылорда: Тәуелсіздік күні қарсаңында тұрғындарға пәтер табысталды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықованың қатысуымен мемлекет және қоғам қайраткері Нәлқожа Ергешбаевтың ескерткіш-мүсінінің салтанатты ашылу рәсімі өтті.
<blockquote>
 «Әр тарихи кезеңнің халқымыз үшін өз орны бары белгілі. Сол қоғамның дамуы мен өркендеуіне, ел іргесінің берік болып, халықтың ауызбіршілігі мен ынтымағының сақталуына еңбегі сіңген тұлғаларды еске алып, есімін ардақтау – елдік парызымыз. Сондай ардақты азаматтардың бірі – мемлекет және қоғам қайраткері Нәлқожа Ақбалаұлы Ергешбаев. Нәлқожа Ақбалаұлы – Сыр елінің әлеуметтік-экономикалық дамуында із қалдырған қайраткер азамат. Ол «Қазақ ауылшаруашылығы техникасы» облыстық бірлестігіне төраға болған тұста техниканы сақтайтын, жөндейтін арнаулы орындар ашу мәселесін алғашқы болып көтеріп, оны жүйелі жүзеге асырған басшылардың бірі ретінде ел есінде қалды», – деді облыс әкімі Гүлшара Әбдіқалықова.
</blockquote>
Ергешбаев Нәлқожа Ақбалаұлы 1931 жылы 1 наурызда Қызылорда облысы, Жаңақорған ауданы, Бірлік ауылында дүниеге келген.1954 жылы Қазақ мемлекеттік ауыл шаруашылығы институтын, 1965 жылы Кеңес Одағы Коммунистік Партиясы Орталық комитеті жанындағы Мәскеу Жоғары партия мектебін бітірген. «Ленин», «Құрмет белгісі», «Еңбек Қызыл Ту» ордендерімен марапатталған.
Еңбек жолын 1954 жылы Арал машина-трактор станциясында инженер-механик болып бастап, Аламесек трактор-жөндеу станциясының директоры, Қызылорда қаласындағы «Главторгмаш» облыстық басқармасының бастығы, Қызылорда қаласындағы «Қазақ ауыл шаруашылық техникасы» бірлестігінің төрағасы, Қазақстан Коммунистік партиясы Қызылорда облысы Тереңөзек аудандық комитетінің бірінші хатшысы, 1985 – 1992 жылдары зейнетке шыққанға дейін Қазақстан Коммунистік партиясы Қызылорда облысы Сырдария аудандық комитетінің бірінші хатшысы қызметтерін атқарған. 1997 жылы 9 желтоқсанда өмірден озды.
«Күріш өндіруді мамандандыру және шоғырландыру» кітабының авторы.
Шараға мемлекеттік мекемелер өкілдері, облыстық мәслихат хатшысы Қылышбай Бисенов, облыстық ардагерлер кеңесінің төрағасы Серік Дүйсенбаев пен мемлекет және қоғам қайраткерінің баласы Әбдіқадыр Ергешбаев қатысып, өз лебіздерін жеткізді. Мемлекет және қоғам қайраткерінің ескерткіш-мүсіні Тасбөгет кентіндегі Нәлқожа Ергешбаев атындағы № 172 орта мектептің ауласында орнатылды. Сондай-ақ, мектеп жанынан өмірі мен қызметіне арналған қоғамдық музей ашылды.
Ескерткіш-мүсін қола материалынан дайындалған, биіктігі 1 метрді құрайды, тұғырының биіктігі – 2,3 метр. Авторы – суретші, мүсінші, Қазақстан Суретшілер одағының Қызылорда облыстық филиалының төрағасы, Қазақстан Суретшілер одағының мүшесі, Қазақстан Республикасының «Құрмет» грамотасының, ҚР Мәдениет және спорт министрлігінің «Мәдениет қайраткері» төсбелгісінің иегері Аманкелді Кененбаев.
<img src="https://kyzylorda-news.kz/wp-content/uploads/2020/12/131624535_2971684459601270_5818302253673369729_o.jpg" alt="" />

Қазақстан және Қызылорда облысының жаңалықтары: Басты жаңалықтар old