<a href="https://kyzylorda-news.kz/">Kyzylorda-news.kz</a>.&nbsp; «Қазақстанның Жауынгерлік Өнер Қауымдастығы» және «Қазақ күресі» Ассоциациясының бас директоры Абат Имамбаев, Қазақстанның Жауынгерлік Өнер Қауымдастығының басқарушы директоры Берік Құнанбаев, Қазақстанның Жауынгерлік Өнер Қауымдастығы бас директорының кеңесшісі Мұсабек Мәулен, «Қазақ күресі» Ассоциациясының басқарушы директоры, PhD доктор Ербол Мырзабосынов, Қазақ күресінен Қазақстан Республикасының бас жаттықтырушысы Ерлан Естек арнайы Қызылорда облысына жұмыс сапарымен келді.
Сапар барысында Қызылорда қаласындағы бірқатар спорттық нысандарды аралады. Облыс орталығындағы №1 және №2 олимпиадалық резервтің мамандандырылған балалар-жасөспірімдер мектептері мен жоғары спорт шеберлігі мектебінің жұмысымен танысты. Аталған спорт мектептеріндегі қазақ күресі, самбо, шинкиокушинкай каратэ, кикбоксинг бөлімшелерін көріп, спортшылармен кездесіп, жаттығуларын тамашалады.
Мұнан соң облыс әкімдігінің мәжіліс залында облыс әкімінің орынбасары Серік Ахметтің төрағалығымен өткен «Қазақстанның Жауынгерлік Өнер Қауымдастығы» және «Қазақ күресі» Ассоциациясының Қызылорда облысындағы көшпелі отырысына қатысты. Сондай-ақ, жиында ҚР Ұлттық қауіпсіздік комитетінің Қызылорда облысы және Байқоңыр қаласы бойынша департаменті бастығының міндетін уақытша атқарушы Бауыржан Құндызбаев, Қызылорда облысы бойынша Қазақ күресі федерациясының төрағасы Рзақұл Нұртаев, облыстық дене шынықтыру және спорт басқармасының басшысы Жақсылық Оспанов және Қызылорда облысы бойынша Қазақстанның Жауынгерлік Өнер Қауымдастығы құрамына кіретін жергілікті федерациялардың басшылары мен қазақ күресінен ұлттық дәрежедегі төрешілер болды.
Отырыста екі мәселе қаралып, алғашқы мәселе Қазақстанның Жауынгерлік Өнер Қауымдастығының құрамына кіретін жергілікті федерациялардың және қазақ күресін дамыту бойынша атқарылып жатқан жұмыстар туралы облыстық дене шынықтыру және спорт басқармасының басшысы Жақсылық Оспанов баяндама жасады.
<blockquote>
 «Қазақстанның Жауынгерлік Өнер Ассоциациясының құрамына кіретін 15 спорт түрлері бойынша облыста барлығы 5 339 спортшы жатығады. Сыр спортшылары ҚР Ұлттық құрама сапында 2018-2019 жылдары халықаралық ареналарда өнер көрсетіп, Азия чемпионаттары мен кубоктарында 49 медаль иеленсе, Әлем чемпионаттары мен кубоктарында 56 медальға қол жеткізді. Ал, қазақ күресімен өңірде 298 секцияда 4879 спортшы шұғылданса,114 жаттықтырушы жұмыс жасайды. Облыстағы 21 балалар мен жасөспірімдер спорт мектептерінің 17-де қазақ күресімен 159 секцияда 2005 спортшы шұғылданса, 59 жаттықтырушы тұрақты жұмыс атқарып келеді. 2019 жылы Азия чемпионатында облыстың 2 палуаны алтын және қола жүлдегер атанды. Әлем чемпионатында 1 палуан чемпион атанса, Әлем барысында 1 палуан күміс жүлдені иеленді. Соңғы 3 жылда Сыр бойылық спортшылар ҚР чемпионаттары мен кубоктарында 117 медаль жеңіп алды», – деді Жақсылық Оспанов.
</blockquote>
Күн тәртібіндегі екінші мәселе Қазақстан Республикасының «Қазақ күресі» Ассоциациясының басқарушы директоры, PhD доктор Ербол Мырзабосынов және Қазақ күресінен Қазақстан Республикасының бас жаттықтырушысы Естек Ерлан хабарлама жасады.
Сонымен қатар, ҚР Ұлттық қауіпсіздік комитетінің Қызылорда облысы және Байқоңыр қаласы бойынша департаменті бастығының міндетін уақытша атқарушы Бауыржан Құндызбаев «Қазақстанның Жауынгерлік Өнер Қауымдастығы» және «Қазақ күресі» Ассоциациясы туралы өз пікірін білдірді.
Сондай-ақ, көшпелі отырыста спорттық жарыстардың қатарын арттыру мен Қазақ күресін дамыту бойынша бірқатар ұсыныс айтылды.
Ассоциацияның бас директоры Абат Имамбаев Қазақстанның Жауынгерлік Өнер Қауымдастығы мен «Қазақ күресі» Ассоциациясы тарапынан атқарылып жатқан жұмыстарды жеткізіп, жиынды қорытындылады.
<blockquote>
 «Біздің Қызылорда облысына келген мақсатымыз Ассоциация жұмысын одан әрі жетілдіріп, өңірлердегі маңызын арттыру болып табылады. Сонымен қатар, қазақ күресін дамытып, жас спортшыларды патриоттыққа баулу да біздің негізгі бағыттарымыздың бірі екенін айта кеткен жөн. Сондықтан, аймақтағы федерация филиалдарымен ынтықмақтастықты арттыра отырып, жоспардағы жұмыстарды жүзеге асыра аламыз», -деді Абат Имамбаев.
</blockquote>
<img src="https://kyzylorda-news.kz/wp-content/uploads/2021/03/158708770_3183944785041902_3173239152442166984_o.jpg" alt="" />
<img src="https://kyzylorda-news.kz/wp-content/uploads/2021/03/159177662_3183944661708581_4421908953759108581_o.jpg" alt="" />

«Қазақстанның жауынгерлік өнер қауымдастығы» және «Қазақ күресі» ассоциациясы өкілдері Сыр еліне жұмыс сапарымен келді

Kyzylorda-news.kz. Бүгін облыс әкімі Гүлшара Әбдіқалықова өңірдегі мүгедектігі бар азаматтармен кездесті. Кездесуге тиісті жауапты тұлғалар қатысты.
2020 жылы өңірімізде мүгедектігі бар адамдардың құқықтарын қамтамасыз ету және тұрмыс сапасын жақсарту жөніндегі 2025 жылға дейінгі Жол картасы әзірленіп, бекітілді. 
Жол картасы мүгедектігі бар адамдардың профилактикасы, білім беруге, спорттық, мәдени өмірге қолжетімділігі, кедергісіз орта, экономикалық дербестік, сапалы жұмыспен қамту, әлеуметтік оңалту, абилитация тиімділігін арттыру, төтенше жағдайлар кезінде мүгедектердің қауіпсіздігін қамтамасыз ету, әлеуметтік қызмет көрсету жүйесін жаңғырту шараларын қамтиды. 
Мүгедектігі бар адамдарды қолдау шаралары әрі қарай да жалғасын табатын болады.
Кездесу барысында Қызылорда, Байқоңыр қалалары мен аудандардан келген мүгедектігі бар адамдар тарапынан жеке көмекшінің көрсеткен қызметі үшін 8 сағатқа толық ақы төлеу, санаторий-курорттық емделу кезінде ілесіп жүрушіге жол жүру ақысы мен тұруға қаржы қарастыру, бөлмелік кресло-арбаның қолдану мерзімін қысқарту және т.б. мәселелер көтерілді.
Жалпы облыста 30 мыңнан астам мүгедектігі бар адамдар тіркелген. Оларды әлеуметтік қорғауға бөлінген қаржы көлемі жыл сайын артып келеді. 2020 жылы бөлінген қаржы өткен жылдармен салыстырғанда 1,5 есеге артып, 1,4 млрд.тенге құрады. Нәтижесінде 15 мыңнан астам жеке оңалту бағдарламалары орындалды.
Мүгедектерге берілетін техникалық оңалту құралдарының тізбесі жылдан-жылға кеңейтіліп келеді. 2020 жылы 55 түрі болса, биылғы жылы енгізілген өзгерістермен оңалту құралдарының түрі 60-қа жеткізілді. 
2020 жылдан бастап мүгедектігі бар адамдарға әлеуметтік оңалтудың іс-шараларын оңтайландыруға бағытталған Әлеуметтік қызметтер порталы қолданысқа енгізілді. 2020 жылы әлеуметтік оңалту шаралары ішінара Портал арқылы алынса, 2021 жылдан бастап толығымен Порталға көшті.
ҚР Еңбек және халықты әлеуметтік қорғау министрлігі тарапынан Порталдағы техникалық кемшіліктерді оңтайландыруға бағытталған жұмыстар жүргізілуде.
Кездесуде облыс әкімі Гүлшара Әбдіқалықова жауапты мемлекеттік органдардың басшыларына көтерілген мәселелер бойынша тапсырма беріп, заңдылыққа сәйкес кезең кезеңімен қарастырылатынын айтты.
Сонымен қатар облыстық жұмыспен қамту және әлеуметтік бағдарламалар басқармасының басшысы Гаухар Қалмақоваға белсенді мүмкіндігі шектеулі азаматтардың қатысуымен арнайы жұмысшы топ құрып, көтерілген мәселелер бойынша тиісті жұмыстар жүргізуді тапсырды. Нәтижесі бойынша наурыз айының соңына дейін есеп беруді жүктеді.
<img src="https://kyzylorda-news.kz/wp-content/uploads/2021/03/fb_img_1615303479721.jpg" alt="" />

Гүлшара Әбдіқалықова мүгедектігі бар азаматтармен кездесті

<a href="https://kyzylorda-news.kz/">Kyzylorda-news.kz</a>. Қазақстанда мектеп оқушыларының көктемгі демалысы 12 күнге созылады. Бұл туралы ҚР Білім және ғылым министрлігінің баспасөз қызметі мәлімдеді.
<blockquote>
 «Мектеп оқушыларының көктемгі демалысы 20-31 наурыз аралығында – 12 күн болады. 4-тоқсан сабағы 1 сәуірде басталады», – делінген хабарламада.
</blockquote>
Министрліктің мәліметінше, 3-тоқсанда 1 сынып оқушылары үшін қосымша демалыс болды. Ол 8-14 ақпан аралығында 7 күнге созылды.
Айта кетейік, оқу жылының 3-тоқсанынан бастап бітіруші сыныптар (9,11,12 сыныптар) санитарлық-эпидемиологиялық талаптар сақтала отырып, аралас оқыту (пәндердің 70 проценті дәстүрлі форматта, 30 проценті қашықтан) форматына көшірілді. Сондай-ақ ҚР Бас мемлекеттік санитариялық дәрігерінің жаңа қаулысына сәйкес 1 наурыздан бастап мектептерде білім беру аралас форматқа көшірілді. Оған сәйкес, 1-5 сынып оқушылары түгел мектептен оқи бастады.

Оқушылар көктемгі каникулда неше күн демалады?

<a href="https://kyzylorda-news.kz/">Kyzylorda-news.kz</a>. 1 наурыздан бастап ҚР Президентінің жанындағы Мемлекеттік басқару академиясында магистратура және докторантураға құжаттарды қабылдау басталды. Қабылдау 5 маусымға дейін жалғасады. Мұнда 2 жылдан әрі еңбек өтілі бар барлық мемлекеттік қызметшілер магистратураның жеті, докторантураның екі білім беру бағдарламаласының бірі бойынша грантқа түсе алады.
<blockquote>
 «Қазіргі таңда академияда мемлекеттік қызметшілердің біліктілігін арттыруда көптеген жұмыстар атқарылып жатыр. Оқуға түсуіне бар жағдай жасалған. Бұл олардың қоғамдағы рөлін және үлесін арттыруға үлкен мүмкіндік береді. Мәселен, өткен жылы біздің филиалдан 1680 тыңдаушы оқудан өтті. Оның ішінде 1039-ы мемлекеттік қызметшілер, қалған 641-і азаматтық қызметшілер», – деді ҚР Президентінің жанындағы Мемлекеттік басқару академиясының Қызылорда облысы бойынша филиалының директоры Мұрат Әйтімов.
</blockquote>
Басшы бұдан бөлек, биыл филиалды дамыту мақсатында өзгермелі әлемдік трендтерге сәйкес еліміздің мемлекеттік қызметін кәсібилендіру, мемлекеттік ұйымдарда, квазимемлекеттік секторда жобалық басқару стандартын дамыту, құзыреттілікті бағалау орталығын құру секілді бірқатар жұмыстар жоспарланып отырғанын тілге тиек етті.
<blockquote>
 «Біз биыл мемлекеттік қызметшілердің оң имиджін қалыптастыру бағытында ауқымды шараларды қолға алдық. Мәселен, мемлекет басшысының «Халық үніне құлақ асатын мемлекет» қағидатына сәйкес, ақпан айынан бастап, тұрақты түрде мемлекеттік қызмет көрсетуші мекеме басшыларының ХҚКО-да тұрғындарға жеке қабылдаулар жұмыстары жүргізілуде. Сонымен қатар, Қорқыт ата атындағы университетімен меморандумға отырып, «Абырой» жас мемлекеттік қызметшілер мектебі ашылды. Әрі аталмыш университет базасында алдағы жаңа оқу жылынан бастап, «Адам ресурстарын басқару» мамандығы енгізіліп, HR-мамандарын дайындау қолға алынатын болады», – деді ҚР Мемлекеттік қызмет істері агенттігінің Қызылорда облысы бойынша департаменті басшысының міндетін атқарушы Берікбол Байхожаев.
</blockquote>
Айта кетейік, бұрын бос лауазымдар конкурсына қатысу үшін қызметкерлер 9 құжат тапсыратын болса, қазір 3 құжатқа төмендеген. Оған қызметшінің төлқұжат, қызметтік тізімі, бос тұрған лауазым қатысу туралы өтінішіңіз болса жеткілікті.

Академияға құжат қабылдау басталды

<a href="https://kyzylorda-news.kz/">Kyzylorda-news.kz</a>. Тәуелсіздіктің 30 жылдығына орай Қызылорда облыстық Қазақстан халқы ассамблеясы жанындағы Аналар кеңесінің ұйымдастырумен «Әке – өмір тірегі» фотожобасы қорытындыланды.
Бір айға созылған жобаға қатысуға қызығушылық танытқандар қатары көп болды. Отбасылық құндылық, әкенің қоғамдағы рөлін арттыру мақсатындағы жоба қорытынды кешінің алғы сөзі «Қоғамдық келісім» КММ директоры Бауыржан Мастековке берілді.
Фотожобаға облыстың барлық аудандары мен қаланың әртүрлі саласында жұмыс жасайтын әкелер атсалысты.
Бірінші орын Қазалы ауданының тұрғыны Қанат Нұрлан мен Жалағаш ауданының тумасы Нұрболат Ахановқа бұйырды. Сондай-ақ, жобаға қолдау білдірген облыстық іскер әйелдер қауымдастығының төрайымы Манат Алмашева 5 әкені арнайы номинациялармен марапаттады.

Қызылордада «Әке &#8211; өмір тірегі» фотожобасы қорытындыланды

<a href="https://kyzylorda-news.kz/">Kyzylorda-news.kz</a>. Елімізде орта мектептерде «қазақ күресі», «тоғызқұмалақ», «асық ату» бойынша міндетті сабақ өткізу әдістемесі әзірлеп жатыр. Бұл жайында Мәжіліс депутаттарының сауалына орай ҚР Премьер-Министрі Асқар Маминнің жауабында айтылған, деп хабарлайды <a href="https://www.inform.kz/kz/mektepterde-kazak-kuresi-men-togyzkumalak-mindetti-sabak-retinde-otkizilmek_a3761886">ҚазАқпарат</a>.
<blockquote>
 «Бүгінде спорт секциялармен шамамен 1,4 млн бала немесе мектеп жасындағы балалардың жалпы санының (3,5 млн) 40 пайызы, оның ішінде 422 мыңнан бастам бала мектептен тыс ұйымдарда қамтылған. Бұқаралық спортты дамыту аясында спорт инфрақұрылымын, оның ішінде ауылды жерлерде дамытуға баса назар аударылып отыр. Мәселен, 2023 жылға дейін шамамен 159 ауыл мектебін спорт залмен қамтамасыз ету жоспарланған», – деді Асқар Мамин.
</blockquote>
Үкімет басшысының атап өтуінше, Білім және ғылым министрлігі дене шынықтыру мұғалімдерінің біліктілігін арттыру жұмысын жолға қойған. Өткен жылы 447 дене шынықтыру мұғалімі біліктілік арттыру курсынан өтті. Ал биыл 2 мыңнан астам педагогты қайта даярлау көзделіп отыр. Сонымен қатар 2021 жылдың қаңтарынан сабақтан тыс спорт үйірмелерін өткізгені үшін дене шынықтыру мұғалімдеріне базалық лауазымдық жалақының 100 пайызы мөлшерінде үстемеақы төлеу енгізілді. Үстемеақы дене шынықтыру мұғалімдерін білім беру ұйымдарында секциялар ашуға ынталандыратын болады.
<blockquote>
 «Балалардың денсаулығы мен тәлім-тәрбиесіне ұлттық спорт түрлерінен сабақ өткізу де оң әсерін тигізбек. Қазіргі уақытта Мәдениет және спорт министрлігі мен Білім және ғылым министрлігі «қазақ күресі», «тоғызқұмалақ», «асық атуды» алдағы уақытта дене шынықтыру бойынша мектеп бағдарламасына қосу және міндетті сабақ ретінде өтізу үшін әдістеме әзірлеп жатыр», – деді Премьер-Министр.
</blockquote>

Мектептерде қазақ күресі мен тоғызқұмалақ міндетті сабақ ретінде өткізілмек

<a href="https://kyzylorda-news.kz/">Kyzylorda-news.kz</a>. 8 наурыз күні денсаулық сақтау басқармасының басшысы Сабит Пазылов облыстық перинаталдық орталығында «Халықаралық әйелдер күні» мерекесінде босанған аналарды құттықтады.
<blockquote>
 Бұл күні дүние есігін ашты. Оның 13-і қыз бала болса , 9-ы ер бала. Соның ішінде 1-і егіздер.
</blockquote>
Басқарма басшысы аналардың демографияға қосқан үлесі үшін алғысын білдіріп, гүл шоқтары мен сыйлықтар табыстады.
<img src="https://kyzylorda-news.kz/wp-content/uploads/2021/03/159120250_3139943352898931_8686051821993323538_n.jpg" alt="" />
<img src="https://kyzylorda-news.kz/wp-content/uploads/2021/03/159099563_3139943416232258_6684777295737370269_n.jpg" alt="" />

8 наурыз: Қызылордада 22 нәресте дүниеге келді

<a href="https://kyzylorda-news.kz/">Kyzylorda-news.kz.</a>&nbsp;Биыл Жаңақорған ауданында қуаттылығы 10 мегаваттты құрайтын күн электр станциясы пайдалануға беріледі.
2022 жылы Арал ауданында қуаттылығы 20 мегаватты күн электр станциясын салу жоспарлануда.
<blockquote>
 «Жалпы мақсатымыз аймағымыздағы күн сәулесі мен желді тиімді пайдалану. Бұл «жасыл экономикаға» көшуге үлкен мүмкіндік береді. Бүгінде ауыл шаруашылығындағы 100-ден астам шаруа қожалық қуаттылығы 2 киловаттан асатын күн сәулесімен жұмыс істейтін кіші электр станцияларын тұрақты пайдалануда», – деді облыс әкімінің орынбасары Серік Сүлейменов.
</blockquote>
Бүгінде Шиелі және Жалағаш ауданындағы күн электр станцияларымен өндірілген электрэнергиясы бірыңғай энергетикалық жүйеге берілуде.

Жаңақорғанда электр станциясы пайдалануға беріледі

<a href="https://kyzylorda-news.kz/">Kyzylorda-news.kz.</a> «Қайсар» футбол клубы 12 жергілікті футболшымен келісім шарт жасасты. Жаңа маусымда Мақсат Байжанов, Олжас Алтаев, Елжас Алтынбеков, Абылайхан Төлегенов, Шоқан Абзалов, Нұрымжан Салайдын, Өркен Махан, Елжас Сарбай, Бекзат Құрманбекұлы, Данияр Әлімжан, Аян Құлмағанбетов секілді футболшылар «қасқырлардың» намысын қорғайды. Сонымен қатар, жергілікті команданың намысын Гегам Кадемян, Арман Кеңесов, Стефан Денкович, Егор Потапов, Усман Н’Дойе, Сергей Карпович, Каролис Лаукжямис, Йован Чадженович, Артем Леонов секілді шетелдік ойыншылар қорғайды.
<blockquote>
 «Біздің команда жаңа маусымға сақадай сай. Биыл команда ойынына қан жүргізетін жергілікті футболшылармен келісім жасастық. Сондай-ақ, жыл басынан бері команда жаңа маусымға дайындығын жүргізу барысында 3 оқу жаттығу жиынын өткізді. Оның екеуі қаламызда өтсе, соңғысы Түркияда болды. Жиын барысында Еуропа мен Азияның беделді командаларымен 9 жолдастық кездесу өткіздік. Соның төртеуінде жеңіске жетсек, төртеуімен тең түстік. Тек бір командадан ұтылдық», – деді «Қайсар» ФК бас бапкері Сұлтан Әбілдаев.
</blockquote>
Жолдастық кездесулерге Еуропаның жоғары деңгейлі командалары таңдалған. Мәселен, Украинаның үздік командасы «Десна», Македонияның жеңімпазы «Шкендия», Мавританияның жеңімпазы «Нуадибу», Қырғызстанның ең мықты ұжымы «Дордой», Ресейлік «Шинник», Грузияның «Телави» секілді командалар «Қайсарға» қарсылас болды. Жиын барысында 30-дан аса ойыншы қаралымға келіп, өздерін жақсы қырынан көрсеткен футболшылар «Қайсардың» сапына қосылды.
Айта кетейік, 12 наурызда «Қайсар» футбол командасының жаңа футболшыларын таныстыру рәсімі өтеді. Ал 14 наурызда «қасқырлар» ел біріншілігінің бірінші турынада «Тараз» командасын қабылдайды.

«Қайсардың» қатары жаңа футболшылармен толықты

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова 8 наурыз – «Халықаралық әйелдер күні» мерекесі қарсаңында әйел-аналармен кездесіп, оларды мерекемен құттықтады.
<blockquote>
 «Аналарымызды ардақтап, қадір тұтудың шектеулі мерзімі жоқ. Десек те, көктемнің күнін көрікті ететін 8 наурыз – «Халықаралық әйелдер күні» сол 365 күннің ең бір ерекше күні екені даусыз. Олай болса, бүгін қоғамның барлық саласында ерлермен иық тірестіре еңбек етіп жүрген нәзік жандарға, аяулы аналарға шынайы алғысымызды білдірсек деген ниетпен жиналып отырмыз. Биыл – Тәуелсіздігіміздің 30 жылдық мерейлі жылы. Осы жылдар ішіндегі еліміздің толағай табыстары мен Сыр өлкесінің қол жеткен жетістіктерінің барлығында бір қолымен бесік, екінші қолымен әлемді тербеткен әйелдер қауымының өз қолтаңбасы бар. Сіздерді қасиетті Жер-ана бусанып, қар астынан алғашқы бәйшешек бой көтеріп, жер-дүние күн шуағына бөленетін көктемнің көрікті мерекесімен құттықтауға рұқсат етіңіздер», – деді облыс әкімі Гүлшара Әбдіқалықова.
</blockquote>
Қазіргі таңда өңіріміздегі халық саны – 814 461 болса, оның ішінде нәзік жандылардың саны – 405 526 құрайды. Қалалық жердегі әйелдер – 185 462 болса, ауылдық жерде – 220 064. Көпбалалы аналар саны – 38 706. Оның ішінде «Алтын алқа» иесі – 4363 болса, «Күміс алқа» иесі – 9655. Облыс бойынша мемлекеттік қызметшілердің 37 пайызы – әйелдер. Сондай-ақ, медицина қызметкерлерінің 87 пайызы, педагогтардың 73 пайызы әйелдер болса, жалпы бюджеттік салада 60 пайыз қыз-келіншек қызмет етеді. Облыстық, қалалық аудандық депутаттары саны – 152 болса, оның 39-ы әйел азаматша. Бүгінде өңірімізде 54 157 шағын және орта кәсіпкерлік субъектісі тіркелсе, оның шамамен 22 мыңнан астамы әйел кәсіпкер. Өткен 2020 жылы «Бизнестің жол картасы-2025» мемлекеттік бағдарламасы аясында 382 кәсіпкерге қолдау көрсетілсе, оның ішінде 178-і әйел кәсіпкер қолдауға қол жеткізген.
Кездесуде аймақ басшысы көп балалы аналар Юлия Панащук пен Фарида Төреқожаеваға «Күміс алқа» төсбелгісін табыс етті.
Шарада сөз алған облыстың Құрметті азаматы Алмагүл Божанова мен ауылшаруашылығы саласының ардагері Рая Бердешова қөрсетіліп жатқан құрмет үшін аймақ басшысына алғысын білдіріп, өңірдің өркендеуіне тілектестіктерін білдірді.Ал, 25 жылдан аса акушер қызметін атқарып, 10 мыңнан аса сәбидің «Кіндік анасы» атанған Гүлмира Исабекова әйел және ана бақыты жайлы өнегелі ойларымен бөлісті. Ақын Асылзат Арыстанбек «Әйел әлемі» атты өлеңін оқып, мереке иелеріне жырдан шашу шашты. Тәуелсіздіктің құрдасы, Қорқыт ата атындағы Қызылорда университетінің Халықаралық байланыстар бөлімінің басшысы, «Мемлекеттік және жергілікті басқару» білім беру бағдарламасының докторанты Бекзат Ырза жастарға жасалып жатқан мемлекеттің қолдауларын айта келе, ел мүддесі үшін аянбай еңбек ететіндігін жеткізді.
Жалпы нәзіктік пен сұлулықтың символы саналатын, көктемнің шуақты мерекесінде бас қосқан әйелдер қауымы, нәзік жандылардың қоғамдағы орны, олардың ұрпақ тәрбиесі мен ел өміріндегі елеулі істерге үлесі жайлы еркін пікір алмасты.
Кездесу соңында аймақ басшысы салтанатты басқосудың қонақтарына мерекелік сыйлықтар табыстап, естелік суретке түсті.
<img src="https://kyzylorda-news.kz/wp-content/uploads/2021/03/157232422_3173667892736258_7892302175655144842_o.jpg" alt="" />
<img src="https://kyzylorda-news.kz/wp-content/uploads/2021/03/156982922_3173668796069501_1175854489383024145_o-1.jpg" alt="" />
<img src="https://kyzylorda-news.kz/wp-content/uploads/2021/03/157792247_3173668429402871_7077892523336190056_o.jpg" alt="" />
<img src="https://kyzylorda-news.kz/wp-content/uploads/2021/03/157122162_3173670256069355_2304275670717107863_o.jpg" alt="" />
<img src="https://kyzylorda-news.kz/wp-content/uploads/2021/03/157846978_3173670139402700_8378038318930707832_o.jpg" alt="" />
<img src="https://kyzylorda-news.kz/wp-content/uploads/2021/03/155043019_3173669952736052_326488085149614561_o.jpg" alt="" />
<img src="https://kyzylorda-news.kz/wp-content/uploads/2021/03/157209197_3173669546069426_8157269324026026223_o.jpg" alt="" />
<img src="https://kyzylorda-news.kz/wp-content/uploads/2021/03/157428783_3173669536069427_7337437340581930403_o.jpg" alt="" />
<img src="https://kyzylorda-news.kz/wp-content/uploads/2021/03/156953448_3173670982735949_8583325862154615607_o.jpg" alt="" />
<img src="https://kyzylorda-news.kz/wp-content/uploads/2021/03/157461107_3173670049402709_1944401475576254442_o.jpg" alt="" />
<img src="https://kyzylorda-news.kz/wp-content/uploads/2021/03/157638621_3173670342736013_7303971427956080748_o.jpg" alt="" />
<img src="https://kyzylorda-news.kz/wp-content/uploads/2021/03/157386587_3173670629402651_2441699131747967766_o.jpg" alt="" />

Гүлшара Әбдіқалықова әйел-аналарды мерекемен құттықтады

<a href="https://kyzylorda-news.kz/">Kyzylorda-news.kz.</a>&nbsp; Облыста әлеуметтік көмек алушылар қатарындағы отбасыларды жұмыспен қамту басты назарға алынып отыр. Бұл ретте жыл басынан бері осы санаттағы 1673 адам жұмыспен қамтылған. Оның ішінде 746 тұрақты жұмысқа орналастырылды.
<blockquote>
 «Біз әлеуметтік көмек алатын, аз қамтылған отбасылардағы еңбекке қабілетті азаматтарды жұмыспен қамтуды мақсат етіп отырмыз. Отбасылардың әлеуетін арттыруда мұның көмегі мол. Сондай-ақ, өңірде мұқтаж жандарға көмек ретінде жәрдемақылар мен төлемдер жүйесі қарастырылған. Аймағымызда мемлекеттік көмектерден бөлек, биылда қайырымдылық акциялары ұйымдастырылатын болады», – деді облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова.
</blockquote>
Жалпы биыл өтетін «Қайырымды істер марафоны» да мұқтаж жандарға көмектесу мүмкіндігін еселей түспек. Бұл ретте қайырымдылық ақшалай, азық-түліктей ғана емес, мұқтаж жандардың үйіне жөндеу жұмыстарын жүргізу, тұрмыстық заттар алу сияқты түрлі бағытта жүзеге асатын болады.
<blockquote>
 «Біздің мақсат аз қамтылған көмекке мұқтаж отбасыларға жәрдемдесу. Соңғы 3 жылда 45 отбасыға баспана берген екенбіз. Осы наурыз айында да жағдайы төмен 2 отбасыға баспана беру жоспарланып отыр. Бұдан бөлек, жыл басынан бері 570 отбасыны көмірмен қамтамасыз еттік», – деді Зекет қайырымдылық қорының басшысы Оңталап Жидебаев.
</blockquote>
Айта кететін жайт, алдағы уақытта қайырымдылық шаралары «Бақытты отбасы» орталығы арқылы өтетін болады. Бұл мәселе туралы Қызылорда облысының волонтерлер фрон офисінің басшысы Болатбек Әйтімбетов айтып берді.
<blockquote>
 «Қазір аз қамтылған кейбір отбасыларға тиісті көмек жетпей қап жатады. Мәселен, бір отбасы әр қордан айына 3-4 көмек алса, бір отбасына бұлда бұйырмай қап жатады. Сондықтан өңірдегі қайырымдылықпен айналсып жүрген барлық үкіметтік емес ұйымдар мен қорлардың басын біріктіру жоспарланып отыр. Алдағы уақытта барлық қайырымдылық көмектері «Бақытты отбасы» орталығымен жасалатын тізім арқылы жүзеге асатын болады. Бұл процес көмектің тиісті, нағыз мұқтаж отбасыларға жетуін қамтамасыз етпек» – деді Болатбек Әйтімбетов.
</blockquote>

Қызылордада әлеуметтік көмек алушылар қатарындағы 1673 адам жұмыспен қамтылды

<a href="https://kyzylorda-news.kz/">Kyzylorda-news.kz.</a> Қызылорда облысы кәсіпкерлер палатасының алаңында қоғамдық тамақтану саласындағы бизнес өкілдерінің облыстық санитарлық-эпидемиологиялық бақылау департаменті мамандарымен кездесу ұйымдастырылды.
<blockquote>
 «Жалпы облыста 149 қоғамдық тамақтану объектісі бар. Бүгінгі таңда пандемия салдарынан ең көп зардап шеккен банкет залдарының (тойхананың) қызметі болып отыр. Бұл саладағы кәсіпкерлер шамамен 2000 жұмыс орнын қамтамасыз етіп отырған болатын. Бүгінде тойхана иелері арасында бағытын өзгертіп, өзге кәсіп түріне ауыстырып жатқан азаматтар да кездеседі. Мұнан өзге, кафе, білім беру орындарындағы асханалар, отбасылық кешендер сияқты басқа да қоғамдық тамақтану нысандары үшін де шектеу шаралары қиындық тудыруда. Білім беру орындарындағы қоғамдық тамақтану объектілеріне облыстың бас мемлекеттік санитарлық дәрігерінің қаулысымен 9 ақпаннан бастап 30% – дан аспайтын мөлшерде жұмыс жасауға рұқсат етілді. Бүгінгі шарадағы уәкілетті орган тарапынан жүргізіліп отырған түсіндірме жұмыстары жақсы әдістемелік қолдау болады деген сенімдеміз», – деп атап өтті Кәсіпкерлер палатасының директоры Ғалымбек Жақсылықов.
</blockquote>
Санитарлық-эпидемиологиялық бақылау департаментінің бөлім басшысы Алмаш Шуахбаева мектеп жанындағы асханаларда қызмет көрсететін кәсіпкерлерге асхананың жұмысына, персоналына, жұмыс процесіне қойылатын талаптармен таныстырып өтті.
Ал департаменттің тамақтану объектілерін бақылау және қадағалау бөлімінің бас маманы Жанат Бекмұратова жыл басталғалы облыс бойынша карантин талаптарын бұзған 64 кемшілік анықталғандығын, оның ішінде 26-сы қоғамдық тамақтану саласына қатысты екендігін жеткізді. Сондай-ақ, алгоритмге сәйкес мониторингтік топ қоғамдық тамақтану саласындағы кәсіпкерлерді төменде көрсетілген 5 талап бойынша ғана тексеретіндігін айтты:
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – нысанның карантин кезеңінде қаулымен көрсетілген жұмыс уақытын сақтауын;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – тыйым салынған көпшілік шараларды өткізбеуін;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – әлеуметтік ара-қашықтықтың сақталуын;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – бетперде (маска) кию талабының сақталуын;
&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; – қоғамдық тамақтану орнына келушілерге арналған лимиттің сақталуын.
Өз кезегінде бизнес өкілдері тарапынан мониторингтік топ жұмысының ашықтығына көз жеткізу үшін осы саладағы кәсіпкерлерден аталмыш топқа өкілді мүше ретінде енгізуге өтініштерін білдірілгендігі және бұл өтінішті Кәсіпкерлер палатасы арқылы жергілікті атқарушы органға да&nbsp; жолданғандығы айтылды.
Кәсіпкерлерден түскен сауалдардың басым бөлігі мониторингтік топтың жұмысына қатысты екендігіне тоқталған облыстық санитарлық-эпидемиологиялық бақылау департамтенті басшысының орынбасары Ұлбосын Аханаева алдағы уақытта өзі жетекшілік ететін мекемемен облыс бойынша барлық мониторингтік топпен кездесу ұйымдастырып, түсіндірме жұмыстары жүргізілетіндігін жеткізді.
Кездесу барысында кәсіпкерлер карантин талаптарына қатысты көптеген сауалдарын уәкілетті орган өкілдеріне қойып, дер кезінде нақты жауаптарын алды және осындай шараның ұйымдастырылғандығына ризашылығын жеткізді.

Қазақстан және Қызылорда облысының жаңалықтары: Басты жаңалықтар old

«Қазақстанның жауынгерлік өнер қауымдастығы» және «Қазақ күресі» ассоциациясы өкілдері Сыр еліне жұмыс сапарымен келді

Гүлшара Әбдіқалықова мүгедектігі бар азаматтармен кездесті

Оқушылар көктемгі каникулда неше күн демалады?

Академияға құжат қабылдау басталды

Қызылордада «Әке – өмір тірегі» фотожобасы қорытындыланды

Мектептерде қазақ күресі мен тоғызқұмалақ міндетті сабақ ретінде өткізілмек

8 наурыз: Қызылордада 22 нәресте дүниеге келді

Жаңақорғанда электр станциясы пайдалануға беріледі

«Қайсардың» қатары жаңа футболшылармен толықты

Гүлшара Әбдіқалықова әйел-аналарды мерекемен құттықтады

Қызылордада әлеуметтік көмек алушылар қатарындағы 1673 адам жұмыспен қамтылды

Қызылордалық кәсіпкерлер мониторингтік топ мүшесі болуға ниетті

Қазақстан және Қызылорда облысының жаңалықтары: Басты жаңалықтар old

«Қазақстанның жауынгерлік өнер қауымдастығы» және «Қазақ күресі» ассоциациясы өкілдері Сыр еліне жұмыс сапарымен келді

Гүлшара Әбдіқалықова мүгедектігі бар азаматтармен кездесті

Оқушылар көктемгі каникулда неше күн демалады?

Академияға құжат қабылдау басталды

Қызылордада «Әке &#8211; өмір тірегі» фотожобасы қорытындыланды

Мектептерде қазақ күресі мен тоғызқұмалақ міндетті сабақ ретінде өткізілмек

8 наурыз: Қызылордада 22 нәресте дүниеге келді

Жаңақорғанда электр станциясы пайдалануға беріледі

«Қайсардың» қатары жаңа футболшылармен толықты

Гүлшара Әбдіқалықова әйел-аналарды мерекемен құттықтады

Қызылордада әлеуметтік көмек алушылар қатарындағы 1673 адам жұмыспен қамтылды

Қызылордалық кәсіпкерлер мониторингтік топ мүшесі болуға ниетті

Қызылордада «Әке – өмір тірегі» фотожобасы қорытындыланды