<a href="https://kyzylorda-news.kz/">Kyzylorda-news.kz</a>.&nbsp;Кәсіпкерлер палатасы Қызылордада туризмді дамытуға қатысты ұсыныстарын берді. Бұл туралы Қызылорда облысы кәсіпкерлер палатасының директоры Ғалымбек Жақсылықов айтты.
Палата басшысы Үкіметтің 2019 жылы бекіткен елімізде туризмді дамытуға арналған мемлекеттік бағдарламада 2025 жылға дейін жалпы ішкі өнімдегі туризмнің үлесін 8 пайыздан кем қылмауды қамтамасыз ету жөнінде тапсырма бар екенін айта келе, өңірдегі жағдайға тоқталды.
<blockquote>
 «Біздің өңіріміз географиялық жағдайы, сондай-ақ климаты да қолайлы, мәдени-тарихи мұра нысандарына бай, туризмді дамыту үшін үлкен әлеуетке ие аймақ. Республикалық туристік картаға облыстың 3 туристік нысаны енгізілген. Олар Қамыстыбас демалыс аймағы, Жаңақорған шипажайы және Байқоңыр туристік аймағы. Өткен жылдан басталған пандемия бұл саланы да айналып өтпеді. Бұл жағдайда туристік фирмалар ғана емес, қонақ үй, мейрамхана, жол бойы кешендері мен өзге де салаға қызмет көрсететін кәсіпкерлік субъектілері айтарлықтай зардап шекті, әлі де зардап шегуде», – дейді Палата директоры.
</blockquote>
Кәсіпкерлер палатасының сала кәсіпкерлері арасында жүргізген сауалнамасының нәтижесі бірқатар мәселелерді анықтауға мүмкіндік берді. Туризм саласындағы бизнес өкілдері несиелерді төлеуге қаражаттың жетіспеушілігін, қызметкерлеріне жалақы төлеу проблемаларын, штаттардың қысқаруын, сондай-ақ коммуналдық төлемдерді төлеуді негізгі мәселе ретінде көрсетіп отыр.
<blockquote>
 «Дегенмен пандемия салдарының да біз үшін тиімді тұстары бар. Қазір көпшілік шет мемлекеттерде шектеу шараларын қатаңдатуда. Осы жайтты пайдаланып, ішкі туризмді көтеруге жақсы мүмкіндік туып отыр. Ол үшін әрине бірінші кезекте еліміздің азаматтарының қызығушылығын тудыра білуіміз керек. Жасыратыны жоқ, демалыс, мереке күндері тіпті қызылордалықтардың өздері көрші облыстарда дем алғанды ұнатады. Бұл жерде оларды кінәлаудың қажеті жоқ. Тек негізгі проблеманы анықтау керек. Ал проблема салаға қатысты инфрақұрылымды жетілдіруді, насихаттық жұмыстарды арттыруды қажет етеді. Өкініштісі, 2020-2021 жылдарға туризм саласын дамытуға облыста қаржы қарастырылмаған», – деді Ғалымбек Жақсылықов.
</blockquote>
Кәсіпкерлер палатасының директоры өзге өңірлердегі жағдайды саралай отырып, көрші Шымкент қаласында өткен жылы туризмді дамытуға 125,7 млн теңге, Алматы қаласында 51,3 млн теңге, Алматы облысында 29,4 млн теңге бөлінгендігін жеткізді. Аталмыш қаржылар аясындағы сатып алулар туризм басқармалары арқылы жүзеге асырылған. Қаражат ақпараттық-имидждік қолдау, бейнероликтер мен жарнамалық роликтер, кәдесыйлар, атрибуттар, полиграфия өнімдерін шығару, жарнама құрылымдарын жасау, ақпараттық киоск сатып алу, экскурсиялық қызметтерді ұйымдастыру және басқа мақсаттарға қолданылған.
Мұнан өзге, жыл басынан бері Шымкент қаласында туризмді насихаттауға арналған қызметтерге мемлекеттік тапсырыс жарияланып, көрші өңір бұл бағытта белсенді жұмысын бастап кеткен екен.
Палата басшысы Ғалымбек Жақсылықов бұл мәселені аймақ басшылығына жазбаша да, кездесу барысында да жеткізгенін айта келе, саланы дамытуға қатысты берген ұсыныстарымен бөлісті.
Біріншіден, 2021 жылға арналған «Жұмыспен қамтудың жол картасы» жобаларының тізіміне туристік нысандарды инфрақұрылыммен қамтамасыз ету жобаларын қосуды ұсынды. Өткен жылы аталмыш Жол картасы аясында облыс бойынша 40 млрд теңгені құрайтын 291 жоба жүзеге асырылған. Алайда ішінде туризм саласындағы инфрақұрылымға арналған бірде бір жоба жоқ екен.
Екіншіден, туризмді дамыту жөніндегі іс-шараларды қаржыландыруға жергілікті бюджеттен қаражат бөлу.
Үшіншіден, үкіметтік емес ұйымдарды тарта отырып, мемлекеттік әлеуметтік тапсырыс тетігі арқылы туристік саланың әлеуетін ілгерілетуге қатысты әлеуметтік маңызы бар жобаларды жүзеге асыру.
Төртіншіден, «Қызылорда» өңірлік инвестициялық орталығы арқылы туризм саласындағы жобаларды несиелендіруге арнайы қаражат бөлу. Бұл сұрақтар жақын маңдағы саяжайларда, көлдердің жағасында демалыс аймақтарын ашуға тырысатын кәсіпкерлерге қатысты туындауда. Ол кәсіпкерлер үшін басты проблемалардың бірі – объектілердің орналасу мәртебесіне байланысты банктік несиелік ресурстарға қол жетімділіктің қиындығы.

Ғалымбек Жақсылықов: Қызылордада туризмді дамытуға қатысты ұсыныстар бар

<a href="https://kyzylorda-news.kz/">Kyzylorda-news.kz</a>.&nbsp; Облыста «Білім-инновация» лицейлеріне және «Дарын» мектебіне оқуға құжат қабылдау басталды. Аталған мектептерге қазір 6-шы сыныпта оқып жатқан оқушылар ғана құжат тапсыра алады.
«Білім-инновация» лицейлеріне талапкерлер тиісті құжаттарын 20 сәуірге дейін тапсыра алады. Онлайн форматта wvw.bilemtihan.kz cайтына тіркеліп, конкурсқа қатысу өтінішін толтырады. Ал «Дарын» мектебіне құжатты 1 сәуірге дейін qabyldau.daryn.kz сайты арқылы тапсырады.
<blockquote>
 «Бүгінде қазақ-түрік лицейлерінің атауы «Білім-инновация» болып өзгергенімен оқушыларды қабылдау емтихандары бұрынғыша жүргізіледі. Лицейге түсу үшін оқушылар математика, логика, Қазақстан тарихы, қазақ тілі сынды 4 пәннен емтихан тапсырады. Алғашқы кезеңде жоғары балл жинағандар екінші турға өтеді. Бірінші кезеңде 60 сұраққа 100 минут беріледі. Екінші турда 75 сұраққа 130 минут беріледі», – деді №10 Дарынды балаларға арналған «Білім-инновация» лицей-интернатының директоры Абайбек Сарсенбеков.
</blockquote>
№9 Дарынды балаларға арналған «Білім-инновация» лицей-интернатында мұғалімдер жаратылыстану-математикалық бағытта білім береді. Математика, физика, биология, химия, информатика пәндері ағылшын тілінде жүргізіледі.
<blockquote>
 «Лицей-интернатта 28 жоғары білімді педагог қызмет істейді. 27-і Қазақстан азаматы, 1-і түркиялық маман. Бүгінде «Oxford Vision» мекемесімен келісім шарт негізінде Филиппин Республикасынан келген азамат Дилберт Бартолемео және Луи Лиза лицей-интернатта ағылшын тілі пәнінен дәріс беруде», – деді №9 Дарынды балаларға арналған «Білім-инновация» лицей-интернатының директоры Руслан Сихимбеков.
</blockquote>
Ал «Дарын» мектебіне биыл 50 грант бөлінді. Қосымша «Мың бала» жобасы бойынша 5 квота берілді.
<blockquote>
 «Оқушының құжаттарын жүктеуге қатысты тоқталып өтсем, тек төрт қана құжат жүктеледі. Сондай-ақ, емтиханда математика және логикадан 55 сұрақ, оқу сауаттылығынан 10 және Қазақстан тарихы 10 сұрақтан тұрады. Сұрақтарды белгілеуге 120 минут беріледі. Конкурстың іріктеу нәтижелері апелляцияға өткізілмейді»,- деді №4 Дарын мектебінің директоры Қарлығаш Ақышева.
</blockquote>

Қызылордада «Білім инновация»  және «Дарын» мектебіне оқуға құжат қабылдау басталды

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықова Қызылорда қаласындағы бірқатар әлеуметтік нысандардың жұмысымен танысты. Алдымен аймақ басшысы «Nur Otan» партиясы Қызылорда қалалық филиалының жаңа ғимаратының ашылу рәсіміне қатысты.
<blockquote>
 “Бүгін қасиетті Тәуелсіздігіміздің 30 жылдығы қарсаңында «Nur Otan» партиясы Қызылорда қалалық филиалының жаңа ғимаратын салтанатты түрде пайдалануға бергелі тұрмыз. 
 Қазақстан Республикасының Тұңғыш Президенті – Елбасының кемеңгерлігімен «Nur Otan» партиясы еліміздегі ең ірі әрі белсенді партияға айналды. 
 Партия алғашқы құрылған күннен жігерлі бастамалар көтеріп, халықтың мүддесін жеткізіп, азаматтардың өзекті мәселелерінің шешімін табуға ұйытқы болып келеді. 
 Бүгін міне 36 бастауыш ұйымы мен 261 партиялық топты, 9 мыңға жуық партия мүшесін бір шаңыраққа жинап отырған қаламыздың саяси жетекші күші жаңа ғимаратқа көшірілуде. Жаңа ғимарат халық игілігіне қызмет ететін болады”, – деді облыс әкімі Гүлшара Әбдіқалықова.
</blockquote>
Сонымен қатар салтанатты шарада Қазақстан еңбек сіңірген қайраткері, қаржы саласының ардагері Қалқазбек Әжібеков жаңа ғимараттың ашылуымен құттықтап, лебізін жеткізді. 
Қазіргі таңда «Nur Otan» партиясының облыста 1 аймақтық, 11 аумақтық филиалы, 45 мыңға жуық мүшесі бар. 
Қалалық партия филиалының жаңа ғимараты заманауи талаптарға сай, озық сәулет үлгісінде салынған. Демеуші «Дәнекер» ЖШС.
Мұнда 100 адамға арналған конференция залы мен өтініш-тілегін жетекші партияның назарына жеткізуге ниетті азаматтарды қабылдауға арналған «Қоғамдық қабылдау» бөлмесі де қарастырылған.
Одан кейін облыс әкімі Гүлшара Әбдіқалықова демеушілік арқылы жөндеу жұмыстары жүргізілген «Саңыраулар қазақ қоғамының Қызылорда облыстық филиалы» қоғамдық бірлестігінің жұмысын көрді. 
Аталмыш ғимарат 2000 жылы салынған.
Өткен жылы «Саңыраулар қазақ қоғамының» Қызылорда облыстық филиалының әкімшілік ғимаратына демеушілердің көмегімен күрделі жөндеу жұмыстары жүргізілді. 
«Қазақ саңыраулар қоғамының» Қызылорда облыстық филиалы арқылы 
12 ымдау тілінің маманымен 120 мүгедекке қызмет көрсетілуде.
Облыс әкімі Гүлшара Әбдіқалықова «Nur Otan» партиясы Қызылорда қалалық филиалының жаңа ғимаратын салуға демеушілік көрсеткен «Дәнекер» ЖШС басшысы Әбдімәжит Жансақалов пен «Саңыраулар қазақ қоғамының» Қызылорда облыстық филиалының әкімшілік ғимаратының жөндеу жұмыстарына қаржылық көмек көрсеткен «Әділет» студиясының басшысы Әділет Байнашевқа «Алғыс хат» табыстады.
Сонымен қатар аймақ басшысы облыстық филормонияға барып, жұмысымен танысты.
«Жұмыспен қамтудың 2020-2021 жылдарға арналған жол картасы» аясында жергілікті бюджеттен қаржы бөлініп, 2020 жылдың желтоқсан айында облыстық филармонияның қосымша қосалқы ғимараты пайдалануға берілген. Өнер ұжымдарының дайындық шараларын жүргізуге арналған ғимаратта дайындық залдары мен бөлмелері бар. Онда Тұрмағамбет атындағы халық аспаптар оркестрі, «Ақмешіт» фольклорлық ансамблі, камералық оркестр, «Томирис» би ансамблі мен қобызшылар ансамблі дайындық жұмыстарын жүргізуде. Сондай-ақ, асхана, тігін цехы, киім қоймалары қамтылған.
Облыс әкімі ұжымның жұмысына сәттілік тілеп, өңірдің мәдени саласын дамытуға қызмет ететіндеріне сенім білдірді.
<img src="https://kyzylorda-news.kz/wp-content/uploads/2021/03/fb_img_1615446325570.jpg" alt="" />
<img src="https://kyzylorda-news.kz/wp-content/uploads/2021/03/fb_img_1615446332051.jpg" alt="" />
<img src="https://kyzylorda-news.kz/wp-content/uploads/2021/03/fb_img_1615446338298.jpg" alt="" />
<img src="https://kyzylorda-news.kz/wp-content/uploads/2021/03/fb_img_1615446357191.jpg" alt="" />

Гүлшара Әбдіқалықова Қызылорда қаласындағы бірқатар әлеуметтік нысандардың жұмысымен танысты

<a href="https://kyzylorda-news.kz/">Kyzylorda-news.kz</a>. Қызылорда облысында электронды форматтағы ақылы ұлттық тестілеу басталды. Білім сынағы 10 сәуірге дейін жалғасады.
Қызылордалық түлектер «Юстади» тәуелсіз орталығында компьютерлік тестілеу алаңында ақылы ҰБТ тапсырды. Басты ерекшелік – әр мектептің оқушысы ақылы тестілеуді тапсыру күнін өзі таңдайды. Яғни сайтқа өтініш қалдырып, ұлттық тестке рұқсат алады.
Алғашқы күнде түске дейін 13 оқушы ұлттық тест тапсырды. Барлық санитарлық нормаларды сақтай отырып талапкерлер білімдерін сынап көрді.
Айта кетейік, наурыз айындағы тест тек ақылы оқу орындарына түсуге мүмкіндік береді. Ал, мемлекеттік грантқа түсу тесті 11 сәуір мен 30 маусым аралығында өткізіледі. Яғни түлектер 2 рет тест тапсыру құқығына ие болады.

Қызылордалық түлектер электронды форматтағы ақылы ҰБТ тапсырып жатыр

<a href="https://kyzylorda-news.kz/">Kyzylorda-news.kz</a>. Аралда өткен жылы Германия, Голландия мемлекеттеріне 594 тонна қамыс және Өзбекстан Республикасына 136 тонна I-ші сұрыпты «Аралым ұны» экспортталды.
Аралда жылдық қуаттылығы 23 900 тоннадан асатын 9 балық өңдеу зауыты жұмыс істейді. Өткен жылы балықтың 2159 тоннасы Ресей, Қытай, Германия, Польша, Грузия мемлекеттеріне жөнелтілді. Бұл туралы Өңірлік коммуникациялар қызметінің ақпарат алаңында өткен брифингте Арал ауданының әкімі Мұхтар Оразбаев мәлімдеді.
<blockquote>
 «Агроөнеркәсіп кешеніндегі жалпы өнім көлемі 10,0 млрд. теңгені құрап, 102,1 пайызға артты. Ал мүйізді ірі қара 2 пайызға, жылқы 10,2 пайызға, түйе 7,2 пайызға, қой мен ешкі 1,4 пайызға өсті. Сондай-ақ, ауданда 193,0 гектар жерге егін егілді. Бұл жұмыстар биыл да жалғасын табады», – деді аудан әкімі Мұхтар Әуесұлы.
</blockquote>
Сонымен қатар, Ақбасты елді мекенінде екі бірдей балық цехы іске қосылды. Оның бірі ауланған балық қорын 100 тоннаға дейін сақтаса, екінші цех күніне 40-қа жуық балық консервісін шығаруда.

Арал ауданынан шығатын өнімдер шетелге экпортталуда

<a href="https://kyzylorda-news.kz/">Kyzylorda-news.kz</a>. Биыл Арал қаласындағы №71 мектеп-интернатының ірге тасы қаланады. Бүгінде жоба-сметалық құжаттамасы әзірленді. Жобаның жалпы құны 1,3 млрд теңге құрайды.
<blockquote>
 «Өткен жылы 22 799 шаршы метр болатын тұрғын үй пайдалануға берілді. Арал қаласынан 1 қабатты 4 пәтерлі 10 тұрғын үй құрылысы, Арал қаласынан қатты тұрмыстық қалдықтарға арналған полигон құрылысы, 250 орындық оқушылар үйінің құрылысы, Жаңақұрылыс, Қызылжар, Қаратерең, Бөген, Райым ауылында биотермиялық шұңқырлардың құрылысы жүргізілді», – деді аудан әкімі Мұхтар Оразбаев.
</blockquote>
Сонымен қатар, Жақсықылыш кентіндегі дәрігерлік амбулаториясына жөндеу, мұрағат ғимаратына, Арал қаласындағы көпсалалы колледжіне және индустриалды-техникалық колледжіне күрделі жөндеуден өтті.

Аралда жаңа мектеп салынады

<a href="https://kyzylorda-news.kz/">Kyzylorda-news.kz</a>. Қаңтар айынан бастап іске қосылған «Тұтынушылардың құқықтарын қорғаудың бірыңғай ақпараттық жүйесі» арқылы 30 қызылордалық өтініш білдірді. Бұл туралы Өңірлік коммуникациялар қызметінің ақпарат алаңында өткен брифингте облыс бойынша тұтынушылардың құқықтарын қорғау департаментінің басшысы Ерқасым Сүлейменов мәлімдеді.
Бұрын тұтынушылар өтініш немесе шағымын мекемеге барып жазатын. Енді ұялы телефонмен ақпараттық жүйеге кіріп өтініш жазу мүмкіндігі бар. Жауабында смартфон арқылы ала алады.
<blockquote>
 «Шыны керек, бұл жүйе біздің тұтынушымен байланысымызды арттыра түсті. Біз департаментке түскен әрбір өтінішті жіті қарап, заңға сәйкес жауап берудеміз. Тұтынушы шағым түсірген мекеме тексеруді қажет етпеген жағдайда 15 күн ішінде, ал мекемені барып тексеретін болсақ, 30 күн ішінде жауап береміз», – деді облыс бойынша тұтынушылардың құқықтарын қорғау департаментінің басшысы Ерқасым Сүлейменов.
</blockquote>
Өткен жылы жазбаша және телеграм бот арқылы департаментке тұтынушылар құқықтарының бұзылуы туралы 209 өтініш түскен. Оның 117-сі бөлшек саудаға, 40-ы жолаушылар тасымалдау, 19-ы тұрғын үй коммуналдық шаруашылық қызметтері саласына байланысты болса, басқа салалар бойынша – 33 өтініш түскен.

Қызылордада тұтынушылар өтінішті жаңа жүйе арқылы беруде

<a href="https://kyzylorda-news.kz/">Kyzylorda-news.kz</a>. Биыл Қызылорда облысында ұзындығы 339 шақырымды құрайтын автомобиль жолдары мен көпір өткелдері және көшелер жөнделетін болады.
Оған республикалық және облыстық бюджеттен 19 млрд теңгеден астам қаражат бөлінген. Сондай-ақ, мемлекеттік бағдарламалар арқылы да 10 362,0 млн. теңге көлемінде инвестиция тартылған. Бұл туралы Өңірлік коммуникациялар қызметінің ақпарат алаңында өткен брифингте облыстық жолаушылар көлігі және автомобиль жолдары басқармасының басшысы Мұрат Тлеумбетов мәлімдеді.
<blockquote>
 «Нұрлы жол» бағдарламасы аясында 33 жоба іске асырылады. Яғни биыл облыстық және аудандық маңызы бар жолдар жөнделіп, пайдалануға беріледі. Сондай-ақ, жол қозғалысы қауіпсіздігін қамтамасыз ету мақсатында «Қызылорда –Жалағаш» жолы жөндеуден өтеді. Елді мекендердің кіреберіс жолдарын дамыту және аудан орталықтарымен байланыстыру мақсатында Арал ауданының Жаңақұрылыс, Бекбауыл ауылдарына баратын жолдарды салу үшін жаңа жобалар жүзеге асырылады,- деді Мұрат Жолкелдіұлы.
</blockquote>
Сонымен қатар, облыстық маңызы бар жолдардың бойындағы бес апаттық жағдайдағы көпір жөнделеді. Бұған қоса, Қазалы ауданы, Қарлан учаскесіне Сырдария өзені арқылы көпір салынатын болады. Бүгінде жоба-сметалық құжаттары әзірленіп, мемлекеттік сараптамадан өткізілуде. Тиісті құжаттары дайын болғанда құрылыс жұмыстары басталады.

Биыл «Қызылорда – Жалағаш» жолы жөнделеді

<a href="https://kyzylorda-news.kz/">Kyzylorda-news.kz</a>.&nbsp;Қызылорда қаласы Тасбөгет кентіне қарасты “Сабалақ” саяжайында үй өртенді.
Үй иесі жалғызбасты ана 3 баласымен далада қалды. Оқыс оқиғадан зардап шеккендер жоқ. Өрт кезінде үйде ешкім болмаған.
Қазаргі таңда қала әкімдігі тарапынан азық-түлік, киім-кешек мәселесі шешілуде. Оқыс оқиғадан зардап шеккендерге уақытша баспана беріледі.
<img src="https://kyzylorda-news.kz/wp-content/uploads/2021/03/158890602_2137856203016186_7021883513419365695_n.jpg" alt="" />
<img src="https://kyzylorda-news.kz/wp-content/uploads/2021/03/159412602_2137856249682848_3460639863802748564_n.jpg" alt="" />
<img src="https://kyzylorda-news.kz/wp-content/uploads/2021/03/159966109_2137856293016177_7860602706603176572_n.jpg" alt="" />

Сабалақта үй өртенді

<a href="https://kyzylorda-news.kz/">Kyzylorda-news.kz</a>. Қызылорда облысында жылу беру маусымы басталғаннан төтенше жағдай департаментінің мамандары аз қамтылған, көпбалалы, тұрмыс жағдайы төмен отбасылар тұратын 1040 тұрғын үйге көмірқышқыл газын анықтайтын датчик орнатты. Бұл туралы Өңірлік коммуникациялар қызметінің ақпарат алаңында өткен брифингте облыстық ТЖД баскармасы бастығының орынбасары Асхат Оразбеков мәлімдеді.
Төтеншеліктер тұрмыс жағдайы төмен отбасыларға тұрғылықты жерлері бойынша 68 рейд жүргізген. Сонымен қатар, профилактикалық жұмыстар барысында 18 133 тұрғын сектордың 72 847 тұрғынына өрт қауіпсіздігін сақтаудың ережелін түсіндірді. 42 рет жиын өткізілді.
<blockquote>
 «Жалпы облыстағы өрттің пайда болу себептерінің басым бөлігі электр желілерінің қысқаша тұйықталуынан, тұрмыстағы пештің, газ қондырғыларының ақаулығынан болып отыр. Бүгінде аз қамтылған және көпбалалы отбасыларға датчиктер орнаттық. Полиция қызметкерлері және волонтерлармен бірлесіп, өрт қауіпсіздігін түсіндіру жұмыстарын жүйелі түрде жүргізіп келеміз», – деді облыстық ТЖД баскармасы бастығының орынбасары Асхат Оразбеков.
</blockquote>
Сондай-ақ, төтеншеліктер аурухана, халыққа қызмет көрсету орталықтарындағы күту залдарында орналасқан теледидарлардан өрт қауіпсіздігі туралы түрлі бейнероликтер көрсетіліп, халық көп жүретін жерлерде үнпарақтар ілінген. Жалпы, бұл бағыттағы жұмыстар бұдан әрі де жалғаса бермек.

Қызылордада мыңнан астам үйге көмірқышқыл газын анықтайтын датчик орнатылды

<a href="https://kyzylorda-news.kz/">Kyzylorda-news.kz</a>. Кәсіпкерлер «Қызылорда су жүйесі» мекемесінен көрсеткен қызметі үшін тиісті қаржысын ала алмай отыр. Бұл туралы Қызылорда облысы кәсіпкерлер палатасы директорының құқықтық мәселелер жөніндегі орынбасары Салават Құлмахан айтты.
Палата заңгерінің айтуынша, «Қызылорда су жүйесі» мекемесінен тиесілі ақшасын алмау жағдайы бірінші рет болып тұрған жоқ. Өткен жылы келісім шарт бойынша көрсеткен қызметіне ақысын дер кезінде алмаған 15 кәсіпкер Палатаға өтініш түсірген. Олардың 80 пайызы өздеріне тиісті қаржыны сот арқылы ғана өндіре алған.
Ал биылғы жылдың 2 айының қорытындысы бойынша 5 кәсіпкерден тағы да сол «Қызылорда су жүйесі» мекемесі құқығын бұзып отырғандығына қатысты арыз түсіп тұр. Палата заңгерлерімен жүргізілген келіссөздердің нәтижесінде аталмыш мекеме 2 кәсіпкерге 2,1 млн.теңгесін төлеп берген. Өзгелері әлі де күтуде.
<blockquote>
 «Кәсіпкерлер палатасына сатып алу бойынша кәсіпкерлерден 2019-2020 жылдары 130 өтініш түсті. Шағымдардың басым бөлігі сатып алу саласында жасалған келісім-шарт талаптарының бірі –&nbsp; актлерге тапсырыс беруші тарапынан дер кезінде қол қойылмауына, қаржыны төлемеуге қатысты болып отыр», – дейді Палата директорының орынбасары Салават Құлмахан.
</blockquote>
Маман мұндай жағдайдың орын алуының бірнеше себептерін де атап көрсетті. Палата заңгерінің айтуынша, бірінші себебі, мемлекеттік органдар, кәсіпорындар (тапсырыс берушілер) актілерді (тауарларды, орындалған жұмыстарды, көрсетілген қызметтерді қабылдау және беру) веб-портал арқылы негізсіз мақұлдамайды. Өйткені тараптар қол қойған актілер төлем үшін негізгі құжат болып табылады. Екіншіден, кей мекемелер актіге қол қойса да көрсетілген мерзімде тиісті қаржыны төлемей, төлеуді сұраған тапсырыс берушінің хатына «сотқа жүгін» деп, кейде мүлде жауап бермейтін жағдайлар да орын алады екен. Үшіншіден, егер тапсырыс беруші келісім-шарт талаптарын уақытында орындамаса оған ешқандай жауапкершілік қаралмаған. Нормативтік-құқықтық құжаттарда бұл жағы көрсетілмеген екен. Ал тапсырысты орындаушы, яғни кәсіпкер талаптарды орындамаса жосықсыз қатысушы болып табылады.
<blockquote>
 «Су жүйесі» мекемесіне байланысты, кәсіпкерлер көрсеткен қызметіне келісім-шартта келісілген қаржысын төлеуді сұрап қанша хат жазса да мекеме тарапынан жауапсыз қалып отыр. Тіпті аталмыш мекемеге біз – Кәсіпкерлер палатасы да хат жолдадық. Нәтижесіз. Бұл жерде мәселені сот арқылы шешуге болатынын жақсы түсініп отырмыз. Дегенмен, сотқа жүгіну кәсіпкерлердің онсыз да жетпейтін ресурсы – уақытын алады. Сондықтан да тапсырыс берушілерден бизнес өкілдеріне қаржысын уақытында аударып беруін сұраймыз», – дейді Палата заңгері Салават Құлмахан.
</blockquote>
Айта кету керек, Қызылорда облысы кәсіпкерлер палатасына биылғы жылдың екі айында кәсіпкерлерден құқығын қорғауды сұраған 71 өтініш түсіп, оның 12-сі оң шешілді. Осылайша Палата заңгерлері кәсіпкерлердің 31 млн.теңге қаржысын сақтап қала алды. Өзге өтініштермен жұмыс жасалуда.

«Қызылорда су жүйесі» мекемесі кәсіпкерлерге қарызын қайтармай отыр

<a href="https://kyzylorda-news.kz/">Kyzylorda-news.kz</a>.&nbsp; Қазақстанда 9 наурыз 23:59-дағы эпидемиологиялық жағдай бойынша ПТР арқылы 693 адамда коронавирус індеті расталды, деп хабарлайды <a href="https://www.coronavirus2020.kz/kz-%D0%BA%D0%B5">coronavirus2020.kz</a>.
Аймақтар бойынша:
Нұр-Сұлтан қаласы – 143,
Алматы қаласы – 160,
Шымкент қаласы – 2,
Ақмола облысы – 66,
Ақтөбе облысы – 6,
Алматы облысы – 28,
Атырау облысы – 40,
Шығыс Қазақстан облысы – 9,
Жамбыл облысы – 1,
Батыс Қазақстан облысы – 57,
Қарағанды облысы – 51,
Қостанай облысы – 49,
Қызылорда облысы – 3,
Маңғыстау облысы – 3,
Павлодар облысы – 56,
Солтүстік Қазақстан облысы – 16,
Түркістан облысы – 3.
Жалпы ел бойынша ауырғандар саны 220 018.

Қазақстан және Қызылорда облысының жаңалықтары: Басты жаңалықтар old