<a href="https://kyzylorda-news.kz/">Kyzylorda-news.kz</a>. Енді екпені кез келген уақытта ала аласыз.
Сәуір айының 29-нан бастап «Covid-19» қарсы вакцинаны аймақ бойынша барлық емхана, егу орындарынан аптасына 7 күн бойы үзіліссіз таңғы сағат 08:00-ден түнгі сағат 00:00-ге дейін ала аласыз. Яғни коронавирус инфекциясына қарсы екпе салдыру халыққа енді кез келген уақытта қолжетімді болмақ.

Covid-19: Екпені кез келген уақытта ала аласыз

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Гүлшара Әбдіқалықова «Табақ шыны өндіру және өңдеу» зауытына барып, құрылыс жұмыстарын тексерді.
Жобаның жетекшісі «Orda Glass Ltd» ЖШС. Зауыт құрылысы 80,23% аяқталған. Қалған негізгі жұмыстар – жоғары білікті инженерлерді тартуды қажет ететін балқыту ваннасы мен пештің жабдықтарын орнату. Алайда, бұл жабдықтарды орнататын мамандар елімізде болмау себебінен, шетелден шақырту қажет. Аталған жұмыстарды аяқтау үшін техникалық ерекшеліктер 4 айды және +10°C-тан жоғары жылы режим жағдайларын қажет етеді.
Облыс әкімдігі сыртқы инженерлік инфрақұрылымды жеткізу бойынша жұмыстарды орындады. Атап айтсақ, газ құбырының екі тармағы және сумен жабдықтау, электр желісі, автожол және байланыс жұмыстарын жүргізді. Темір жол тұйығының құрылысы жуырда аяқталады деп жоспарлануда.
Одан кейін аймақ басшысы Гүлшара Әбдіқалықова ҚР Индустрия және инфрақұрылымдық даму министрі Бейбіт Атамқұловтың төрағалығымен селекторлық режимде өткен «Табақ шыны өндіру және өңдеу зауытын салу» жобасын іске асыру мәселелері жөніндегі селекторлық кеңеске қатысты.
Жиында облыс әкімі жоғарыдағы атқарылған жұмыстарды тізбектеді.Сондай-ақ, селекторлық жиында «Orda Glass Ltd» ЖШС басқарма төрағасы Ержан Сағымбаев атқарылған жұмыстар туралы есеп беріп, министр Бейбіт Атамқұловтан ағымдағы жылы зауытты уақтылы іске қосу үшін ҚР СІМ арқылы қажетті жабдықтарды республика аумағына әкелуге рұқсат алуға жәрдем көрсетуді сұрады.ҚР Индустрия және инфрақұрылымдық даму министрі қолдау жұмыстары қарастырылатынын айтты.
Селекторлық отырыс соңында облыс әкімі Гүлшара Әбдіқалықова шыны зауытының құрылыс жұмыстары тікелей бақылауында болатынын атап өтті.
<img src="https://kyzylorda-news.kz/wp-content/uploads/2021/04/fb_img_1619696314781.jpg" alt="" />
<img src="https://kyzylorda-news.kz/wp-content/uploads/2021/04/fb_img_1619696312113.jpg" alt="" />
<img src="https://kyzylorda-news.kz/wp-content/uploads/2021/04/fb_img_1619696317086.jpg" alt="" />

Гүлшара Әбдіқалықова шыны зауытының құрылыс жұмыстары тікелей бақылауында болатынын айтты

<a href="https://kyzylorda-news.kz/">Kyzylorda-news.kz.</a> Биыл Қызылорда облысында би өнерінің негізін қалаушылардың қатарында болған, белгілі хореограф Болат Қаржаубаев, Татьяна Булгай, Фариза Сүлейменованың еске алуға арналған «Би бекзаттары» атты онлайн форматта концерт өткізіледі.
<blockquote>
 “Тәуелсіздік алғалы қазақ мәдениеті қарыштап дамыды. Оның ішінде би өнері біршама ілгеріледі. Оған Сыр елі хареографтар мен бишілерінің қосқан үлесі зор. Бұл жұмысты әрі қарай жалғастыру үшін облыстық халық шығармашылығын дамыту және мәдени-продюсерлік орталығы білім ордаларымен тығыз байланыс орнатты. «Сыр сұлуы», «Алтын Арай», «Қызғалдақтар», «Жас дәурен», «Экспресс» секілді ансамбльдердің репертуарын қайта жасақтау, қатарын толықтыру, базасын нығайту мақсатында жұмыстар жүргізуде. Мұндай жұмыстар би өнерінің өрісін кеңейтіп, дамыта түседі”, – деді облыстық мәдениет, архивтер және құжаттама басқармасының басшысы Мира Әбуова.
</blockquote>
Облыста балет және өнер мекемелерінде 116 би үйірмесі бар. Оған 2103 өнерпаз тартылған. Айта кетейік, барлық мәдени мекемелер жанындағы би үйірмелері ақысыз қызмет көрсетеді.
<blockquote>
 «Томирис» би ансамблінің құрылғанына биыл 20 жыл толды. Соған орай қазан айында үлкен іс-шара өткізуге дайындық жұмыстарын жүргізіп жатырмыз. Қазір елдің талғамы өсті. Қайталама дүниені көргісі келмейді. Сондықтан біз көрерменді жалықтырып алмас үшін жаңа би түрлерін енгізіп, сахналық костьюмдерді даярлаудамыз. Жалпы, ансамбль қоржынында бүгінде көрермен көзайымына айналған 80-ге жуық би бар. Ал енді талғам мен талапқа келсек, біз бишілермен 1 жылға келісім шартқа отырамыз. Сосын ақырындап келісім созыла береді. Қазір бізде 15 жылдан бері билеп келе жатқан талантты бишілеріміз бар. Ал аттестациядан 3 жылда бір рет өткіземіз”, – деді «Томирис» би ансамблінің жетекшісі Гүлбану Мырзабаева.
</blockquote>

Қызылордада «Би бекзаттары» онлайн концерті өтеді

<a href="https://kyzylorda-news.kz/">Kyzylorda-news.kz</a>. Бұған дейін Бахыт Алтайыр Мақсатұлының 27 сәуір күні жоғалып кеткенін <a href="https://kyzylorda-news.kz/kogam/qyzylordada-bes-zhasar-bala-izdestirilwde-108920/">хабарлаған</a> болатынбыз.
Бүгін баланың денесі табылды. Ол жеке тұрғын үйдің көше бетте орналасқан кәріз құдығына түсіп кеткен.
<blockquote>
 «Бүгін, 29 сәуір күні жергілікті уақыт сағат 11:00 шамасында жеке тұрғын үйдің кәріз құдығынан жоғалған баланың денесі табылды. Қажетті сот – медициналық сараптамалар тағайындалды. Баланың денесінде көзге көрінетін зорлық – зомбылық белгілері байқалмаған. Орын алған оқиға бойынша тергеу басталды. Тергеу әрекеттері менің жеке бақылауымда. Кішкентай Альтаирдың ата – анасы мен туыстарының ауыр қайғыларына ортақтасып, шын жүректен көңіл айтамын», дейді Қызылорда облысы полиция департаментінің бастығы <a href="https://www.facebook.com/profile.php?id=100051822340477">Бектөре Сұлтан.</a>
</blockquote>

Қызылордада екі күн бұрын жоғалған баланың денесі табылды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова мәнерлеп сырғанаудан ҚР еңбек сіңірген спорт шебері, Әлем чемпионатының күміс жүлдегері Элизабет Тұрсынбаевамен кездесті. Жиынға спортшының ата-анасы Байтақ Тұрсынбаев пен Падишакан Сұлтаналиева қатысты.
Элизабет Тұрсынбаева Сыр еліне мәнерлеп сырғанаудан өтетін республикалық турнир аясында келіп отыр. 
Аймақ басшысы ел мақтанышына айналған мәнерлеп сырғанау спортында есімі әйгілі Элизабет Тұрсынбаеваның спорттағы жетістіктерін атап өтіп, Сыр елінің саңлақ спортшыға деген құрметі ерекше екенін жеткізді.
<blockquote>
 «Қадірлі Элизабет, өзіннің спорттық шеберлігін мен табандылығының арқасында еліміз халықаралық аренада жарқын жетістіктерге жетіп келеді. Сенің жеңісінді тек жерлес қызылордалықтар ғана емес, тұтас Қазақстан мақтан етеді. Әлемдік спортта ересектер арасындағы сайыста төрт айналымдық сальховты сәтті орындаған тұңғыш мәнерлеп сырғанаушы ретінде тарихта қаласың. Бұл – біз үшін биік бедел, мерей-мәртебе. 
 Спортшы үшін ең бастысы – алға қойған мақсатқа нәтижелі жету. 2019 жылы Жапонияның Сайтама қаласында мәнерлеп сырғанаудан өткен Әлем чемпионатында күміс медальді иеленген сенің жетістігін – Қазақстанды әлемге танытқан ерекше спорт оқиғасы болды. 2022 жылы Пекинде өтетін Олимпиада ойындарында ең жоғары дәрежедегі медальға қол жеткізіп, тәуелсіз Қазақстанның әнұраны бүкіл әлемде шырқалса деймін»,-деді Гүлшара Әбдіқалықова.
</blockquote>
Кездесуде Элизабетке қолдау көрсетіп, ата-аналық парызымен бірге жаттықтырушылық қызметін атқарып жүрген әкесі Байтақ Тұрсынбаев сөз алып, ілтипат танытқан барша Сыр жұртына алғыс білдіріп, Элизабеттің алдағы жоспарларымен бөлісті. Сондай-ақ, соңғы жылдары мәнерлеп сырғанау спортына жастардың қызығушылығы артып келе жатқанын атап өтті.
Жиында облыс әкімі спортта ел байрағын әлем елдерінде биікке көтеріп жүрген Элизабетті өмірге әкеліп, бойындағы талабы мен қабілетін танып, қанаттандырған анасы Падишакан Беймырзақызына Қызылорда облысының Құрмет грамотасын табыстады. Ал, Элизабетке сый-сияпат жасап, ілтипат танытты.
Айту қажет, бүгін Сыр елінде Элизабет Тұрсынбаеваның құрметіне арналған республикалық турнир басталды. Ел мақтанышының жүлдесіне арналған биылғы жарыс Тәуелсіздіктің 30 жылдық мерейтойы аясында өтіп отыр. Турнирге 10 облыстан 200-ге жуық жасөспірім қатысады. Дәстүрлі шара өскелең ұрпақтың патриоттық сезімін арттырып, көптеген баланы мәнерлеп сырғанау спортына, салауатты өмір салтына ынталандыруға жол ашады.
<img src="https://kyzylorda-news.kz/wp-content/uploads/2021/04/179810181_3322420417861004_5131891702258540275_n.jpg" alt="" />
<img src="https://kyzylorda-news.kz/wp-content/uploads/2021/04/180045938_3322421244527588_2696148485822384765_n.jpg" alt="" />

Облыс әкімі Элизабет Тұрсынбаевамен кездесті

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 2883 адамда коронавирус ПТР-сынама арқылы расталды, деп хабарлайды coronavirus2020.kz.
Өңірлер бойынша:
Алматы қаласында – 53144 (+695),
Нұр-Сұлтан қаласында – 44562 (+584),
Шығыс Қазақстан облысында – 24745 (+92),
Қарағанды облысында – 23100 (+258),
Атырау облысында – 21783 (+110),
Алматы облысында – 20944 (+185),
Павлодар облысында – 20527 (+112),
Батыс Қазақстан облысында – 19030 (+153),
Ақмола облысында – 18146 (+140),
Қостанай облысында – 14683 (+25),
Солтүстік Қазақстан облысында – 13939 (+27),
Шымкент қаласында – 9226 (+114),
Ақтөбе облысында – 8984 (+128),
Жамбыл облысында – 7737 (+79),
Маңғыстау облысында – 5618 (+62),
Түркістан облысында – 5370 (+42),
Қызылорда облысында – 5427 (+77).
Айта кетейік, 27 сәуір күнгі бір тәулікте Қазақстанда коронавирус – 2682 адам, 26 сәуірде 2276 адамда анықталған болатын.
Жалпы пандемия басталғалы ел бойынша ауырғандар саны – 316 965.

Қызылордада 77 адамнан коронавирус анықталды

<a href="https://kyzylorda-news.kz/">Kyzylorda-news.kz</a>. Бүгін ҚР Тұңғыш Президенті – Елбасы, ҚХА Төрағасы Нұрсұлтан Назарбаевтың төрағалығымен, ҚР Президенті Қасым-Жомарт Тоқаевтың қатысуымен Қазақстан халқы Ассамблеясының XXIX сессиясы өтті. Сессияның күн тәртібіндегі мәселе: «Бірліктің, татулық пен келісімнің 30 жылы». Жиынға Сыр елінен онлайн режим арқылы облыс әкімі – облыстық ҚХА төрағасы Гүлшара Әбдіқалықова, облыс әкімінің орынбасары – облыстық ҚХА төрағасының орынбасары Серік Ахмет, облыстық Ассамблеяның мүшелері және өңірдегі бірқатар этномәдени бірлестіктің жетекшілері қатысты.
Сессияны ашқан Елбасы Ассамблеяның алдына қоғамдық келісім мен ұлттық бірлікті одан әрі нығайту бойынша нақты міндеттер қойды.
Ассамблея сессиясы барысында Үндеу қабылданды, онда «30 жыл бұрын Тәуелсіздікке алғаш қол жеткізгеннен бастап халқымыз, Қазақстанның Тұңғыш Президенті – Елбасы Нұрсұлтан Әбішұлы Назарбаевтың кемел басшылығымен, қоғамдық келісім мен жалпыұлттық бірлікті – ел дамуының басты ұстанымы ретінде таңдады. Бұл қағидат – табысты да ауқымды әлеуметтік-экономикалық реформалардың, саяси жүйені үздіксіз демократияландырудың, ұлттың әлеуметтік капиталын дамытудың мызғымас іргетасына айналды», – деп көрсетілген.
Сессия барысында Елбасы Нұрсұлтан Әбішұлы Назарбаев Қазақстан халқы Ассамблеясының төрағасы лауазымын еліміздің Президенті Қасым-Жомарт Кемелұлы Тоқаевқа тапсырды.
<blockquote>
 «Қазақстан Республикасының Тұңғыш Президенті – Елбасы туралы» Конституциялық заңға, Ассамблея туралы заңға сәйкес маған Қазақстан халқы Ассамблеясының төрағасы лауазымын өмір бойы атқару құқығы берілген. Жалпы, мен сіздермен барлық уақытта бірге боламын әрі одан бас та тартпаймын. Дегенмен, Ассамблеяны басқаруға қатысты бірқатар құзірет еліміздің Президентіне жүктелген. Қазақстан халқы Ассамблеясы тірек ретінде іс басындағы Президенттің жанында тұруы тиіс және екінші жағынан Мемлекет басшысы да Ассамблеяға арқа сүйейді. Сондықтан мен Ассамблеяны басқару құқығымды Президент Қасым-Жомарт Тоқаевқа беру туралы шешім қабылдадым,- деді Елбасы.
</blockquote>
Мемлекет басшысы Қасым-Жомарт Тоқаев Елбасы Нұрсұлтан Әбішұлы Назарбаевқа Ассамблеяның Құрметті Төрағасы болу туралы ұсынысын жеткізді.
Сессиясы біткеннен кейін аймақ басшысы – облыстық ҚХА төрағасы Гүлшара Әбдіқалықова облыстық ассамблея мүшелері мен өңірдегі этномәдени бірлестіктердің өкілдеріне алға қойған міндеттер бірлесіп орындалатынын айтты.
<blockquote>
 «Жаңа ғана өткен Қазақстан халқы Ассамблеясының ХХІХ сессиясында, Елбасы Нұрсұлтан Әбішұлы Назарбаев пен Мемлекет басшысы, Қазақстан халқы Ассамблеясының Төрағасы Қасым-Жомарт Кемелұлы Тоқаев алдымызға бірқатар жаңа міндеттер қойды. Алдағы уақытта сол міндеттерді жүзеге асыру мақсатында облыстық ассамблеяның XХІIІ сессиясын өткізуді жоспарлаймыз. Баршаңызды 1 мамыр – Қазақстан халқының бірлігі күні мерекесімен құттықтаймын! Тәуелсіздігіміз тұғырлы, еліміз еңселі болғай!», – деді Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2021/04/179517530_3320644948038551_1662329775644334040_n.jpg" alt="" />
Айта кетейік, өңірде 11 этномәдени бірлестік жұмыс жасайды. Жалпы аймақта 35 этнос өкілдері тұрады.

Қазақстан халқы Ассамблеясының XXIX сессиясы өтті

<a href="https://kyzylorda-news.kz/">Kyzylorda-news.kz</a>. Қазақстандықтар мамыр айында 13 күн демалады.
Мамыр айындағы күнтізбеде 3 мемлекеттік мереке күн бар, атап айтсақ 1 мамыр – Қазақстан халқының бірлігі күні, 7 мамыр – Отан қорғаушы күні, 9 мамыр – Жеңіс күні.
Биыл мемлекеттік мереке саналатын 1 мамыр сенбіге дәл келіп отыр. «Қазақстан Республикасындағы мерекелер туралы» Заңға сәйкес, демалыс және мереке күндері сәйкес келген жағдайда мерекеден кейінгі жұмыс күні демалыс болып есептеледі. Демек, қазақстандықтар сенбі, жексенбі, дүйсенбі – 3 күн қатарынан демалады.
Сонымен қатар, 9 мамыр жексенбі демалыс күнге келіп тұр. Сондықтан қазақстандықтар 7, 8, 9, 10 мамыр күндері тағы демалатын болады.

Қазақстандықтар мамыр айында қанша күн демалады?

<a href="https://kyzylorda-news.kz/">Kyzylorda-news.kz</a>. Ведомствоаралық жұмыс тобының құрамы жаңа мүшелермен толықты.
<blockquote>
 «Бүгінде мемлекеттік көрсетілетін қызметтер сапасына бақылау жүргізуде азаматтық қоғамның белсенділігі артуда. Қазір департамент жанындағы ведомствоаралық жұмыс тобының құрамын азаматтық қоғам белсенділерімен толықтырылуда. Әлеуметтік желіге хабарлама жарияладық. Әр ауданнан бір азамат іріктеп алдық. Оның ішінде мәслихат депутаттары, БАҚ және үкіметтік емес ұйым өкілдері бар», – деді облыс бойынша Мемлекеттік қызмет істері департаменті басшысының орынбасары Берікбол Байхожаев.
</blockquote>
Айта кетейік, ведомствоаралық жұмыс тобы мемлекеттік көрсетілетін қызметтер сапасына қоғамдық бақылау мен қабылдау өткізеді. Ағымдағы жылдың 1 тоқсанында 8 мемлекеттік мекемеде қоғамдық мониторинг жүргізіліп, анықталған кемшіліктерді жою жөнінде 7 ұсыным енгізілді.
Жалпы облыста 357 мемлекеттік орган бар. Ал аймақтағы мемлекеттік қызметшілердің штат саны 3 667 бірлікті құрайды. Жыл басынан бері 2 131 552 қызмет көрсетілген.

Қызылорда: Ведомствоаралық жұмыс тобының құрамы толықтырылды

<a href="https://kyzylorda-news.kz/">Kyzylorda-news.kz</a>. Алматыда іздеу жарияланған «Қазақстан аруы-2019» байқауының финалисті аман-есен табылды, деп хабарлайды ҚазАқпарат.
Алматы қалалық Полиция департаментінің хабарлауынша, жоғалған бойжеткен табылды.
<blockquote>
 «Белгілі болғанындай, ару осыдан бір күн бұрын ешкімді ескертпестен Тараз қаласына кетіп қалған. Ол байланысқа шықты. Аман-есен», – деп хабарлады департаменттен.
</blockquote>
Еске салайық, оның жоғалып кеткені туралы ақпарат әлеуметтік&nbsp;<a href="https://www.instagram.com/p/COLV63NFxSA/?igshid=19153lxxhes8j">желіде</a>&nbsp;тараған болатын.
Кеше кешкісін Алатау аудандық полиция басқармасына жоғалып кеткен қыздың құрбысынан&nbsp;<a href="https://www.inform.kz/kz/almatyda-kazakstan-aruy-2019-baykauynyn-finalisi-zhogalyp-ketti_a3781828">арыз түсті.</a>
Айта кетейік, Гүлнұр Нұртаза «Қызылорда аруы-2017» байқауының жеңімпазы.
Қазіргі уақытта Алматыда жұмыс істейді.

«Қызылорда аруы» табылды

<a href="https://kyzylorda-news.kz/">Kyzylorda-news.kz</a>. Антициклон әсерінен Қазақстанның оңтүстігінде, оңтүстік-шығысында және шығысында жауын-шашын жаумайды, күн ашық болады, деп хабарлайды Қазгидромет.
Ал Қазақстанның қалған аумағында ауа райын Оңтүстік циклоны және онымен байланысты атмосфералық фронттар анықтайды. Салдарынан кей жерлерде жаңбыр жауып, найзағай ойнайды.
Еліміздің кей жерлерінде жел күшейіп, оңтүстік-батыста және солтүстік-батыста тұман түседі.
Солтүстік Қазақстан облысында жел екпіні 23-28 м/с дейін күшейеді. Кей жерлерде дауыл тұрады.
Павлодар облысында жел жылдамдығы түнде кей жерлерде, күндіз басым бөлігінде 15-20 м/с жетеді.
Қостанай облысында кей жерлерде тұман түседі, жел қарқыны – 15-20 м/с.
Ақмола, түнде Жамбыл, күндіз Қызылорда, Қарағанды, Шығыс Қазақстан облыстарының кей жерлерінде 15-20 м/с жылдамдықпен күшті жел соғады.
Ақтөбе, Маңғыстау облыстарында түнде және таңертең кей жерлерде тұман түседі.
Алматы облысында Жалаңашкөл ауданында жел екпіні -15-20 м/с.

28 сәуірге арналған ауа райы болжамы

<a href="https://kyzylorda-news.kz/">Kyzylorda-news.kz</a>. Бүгін Арал ауданында «Арал теңізінің құрғап қалған түбін көгалдандыру: сексеуіл өсірудің жабық тамыр жүйесін тәжірибеге енгізу» ұлттық демонстрациялық жобасы аясында екі сексеуіл жылыжайы және туманарий ашылды. Демонстрациялық жоба Еуропалық Одақтың қаржылық қолдауымен «Орталық Азиядағы Нексус Диалогы» жобасы («Нексус» жобасы) аясында жүзеге асырылуда.
Ашылу салтанаты кезінде Аралды көгалдандырудың тиімді әдісін тексеруге мүмкіндік беретін жабық тамыр жүйесінде өсірілетін сексеуілдің алғашқы тұқымдары отырғызылды. Жылыжайда осы тұқымдардан өсірілген кем дегенде 2000 сексеуіл көшеттері ашық топыраққа 9-12 айда отырғызылады. Екі жыл ішінде бұл көшеттер Аралқұмның 10 гектарға дейінгі алқабын жауып, 8000тоннаға дейін құм жинай алады деп күтілуде.
<blockquote>
 «Біз Еуропалық Одақ пен Қазақстан арасындағы Кеңейтілген әріптестік пен ынтымақтастық туралы келісімнің мақсаттарына сәйкес «Нексус» жобасы арқылы Солтүстік Арал теңізінің экожүйесін қалпына келтіру жөніндегі Қазақстанның күш-жігерін қолдауға қуаныштымыз», – деп атап өтті Еуропалық ОдақтыңҚазақстандағы Елшісі, Жоғары Мәртебелі Свен-Олов Карлссон.
</blockquote>
Арал теңізінің құрғап қалған түбін көгалдандыру шөлейттенуге қарсы және тұзды топырақты азайтудың тиімді әдістерінің бірі болып саналады. Осыған сүйене отырып, бұлжылыжайлар мен туманарийАралдың түбін көгалдандырудың ең тиімді әдісінің көрсетілімдік мысалы болады.
<blockquote>
 “Ғылыми бақылауларға сәйкес, бұл әдіс көшеттердің бейімделудің жәнетіршілік етудің жоғарылауына (90% дейін) және ерте пісуіне әсер етіп, тұқымдарды 2-3 жыл бұрын жинауға мүмкіндік береді”, – деп хабарлады Халықаралық Аралды құтқару қорының Қазақстан Республикасындағы атқарушы дирекциясының&nbsp; директоры Болат Бекнияз.
</blockquote>
«Нексус» жобасын Еуропалық Одақтың (ЕО) қаржылық қолдауымен Орталық Азия аймақтық экологиялық орталығы (РЭЦЦА) жүзеге асырады. Жобаны іске асыру мерзімі – 36 ай (2020-2023). Жалпы бюджет 1 250 000 еуро,ЕО үлесі 1 000 000 еуро.
ЕО мен Қазақстан арасындағы Кеңейтілген <a href="https://online.zakon.kz/document/?doc_id=37496546">әріптестік және ынтымақтастық туралы келісім</a>2020 жылдың наурызында толық заңды күшіне енді. Ол ЕО пен Қазақстан Республикасы арасындағы 29 бағыт бойынша ынтымақтастықтың құқықтық негізін қалайды және басқа бағыттармен қатар қоршаған ортаны қорғау және климаттың өзгеруі мәселесі маңызды салалар қатарында.
Көлемі бойынша төртінші орын алатын Арал теңізі 1960 жылдары кішірейе бастады. Бұл көлді қоректендіретін өзендер кеңестік жер суландыру жобаларымен бағытталғаннан кейін болды. 1997 жылға қарай ол өзінің бастапқы мөлшерінің 10% -на дейін қысқарып, төрт көлге бөлінді. Судың мұндай айтарлықтай төмендеуі тұзды топырақты ірі Аралқұм шөлінің қалыптасуына әкелді. Шөл Орталық Азияда және одан тыс жерлерде шаңды және тұзды дауылдардың негізгі көзіне айналды. 5,5 миллион гектардан астам аумақты алып жатқан бұл шөл жыл сайын 100 миллион тоннадан астам шаң мен улы тұз түзеді, оларды Қызылорда облысының (Қазақстан), Дашогуз велаятының (Түркменстан), Қарақалпақстан Республикасының, Хорезмнің, Бұхараның және Науаи облысының (Өзбекстан) территориялары бойынша атмосферада мыңдаған километрге шашыратады.
<img src="https://kyzylorda-news.kz/wp-content/uploads/2021/04/01e12247-9dd1-43b0-9f6c-f1ac97d172ab.jpg" alt="" />
<img src="https://kyzylorda-news.kz/wp-content/uploads/2021/04/4d5ecdb3-a73e-4c3d-8106-bb58d3dd617c.jpg" alt="" />
<img src="https://kyzylorda-news.kz/wp-content/uploads/2021/04/06392e56-e0ae-405b-9c79-9083ad4bd0f3.jpg" alt="" />
<img src="https://kyzylorda-news.kz/wp-content/uploads/2021/04/7418fa29-5e17-4f90-be7e-f453bdd2f55a.jpg" alt="" />

Қазақстан және Қызылорда облысының жаңалықтары: Басты жаңалықтар old