<a href="https://kyzylorda-news.kz/">Kyzylorda-news.kz</a>. Бүгін Мәдениет және өнер қызметкерлері күніне орай облыс әкімі Гүлшара Әбдіқалықова сала қызметкерлерінің қатысуымен мерекелік қабылдау өткізді.
<blockquote>
 “Сыр өңірінің мәдениет және өнер саласының қызметкерлері ұлттық мәдениетімізді дамытып, төл өнерімізді ұрпақтан-ұрпаққа жеткізуде қашан да алда келеді. Тәуелсіз еліміздің рухани байлығын арттырып, ертеден келе жатқан асыл мұраларымызды ұрпақтан-ұрпаққа жеткізуде, төл өнерімізді халықаралық деңгейде танытуда мәдениет пен өнер саласы өкілдерінің алар орны ерекше. Мемлекет басшысы Қасым-Жомарт Кемелұлы Тоқаевтың Қазақстан халқына Жолдауынан туындайтын міндеттерді іске асыру мақсатында 2020 жылдың 1 қаңтарынан бастап мәдениет және өнер саласы қызметкерлерінің жалақысы 35 % өсті. Бұл өз кезегінде мәдениет саласының қызметкерлеріне көрсетілген үлкен қолдау деп есептейміз”, – деді облыс әкімі.
</blockquote>
Тәуелсіздік алған жылдар ішінде облыс бойынша типтік жобадағы 31 клуб, 6 музей, 1 кітапхана, 1 мемлекеттік архив құрылысы салынып, пайдалануға берілді.
Облыстық филармония жанынан кәсіби өнер ұжымдары құрылып, Нартай Бекежанов атындағы қазақ музыкалық драма театрына «Академиялық» мәртебе берілді. Бүгінде аталған шығармашылық ұжымдар өз өнерлерін аймағымызда ғана емес, алыс-жақын шетелдерде көрсетіп келеді.
Әлемді шарпыған пандемия кезінде де мәдениет қызметкерлері адам жанының рухани емшісіне айналып, карантиндік жағдайларға қарамастан әлеуметтік желілер мен арнайы ашылған «Сыр шаңырағы» Youtube каналында рухани-танымдық жобаларды, концерттер мен спектакльдерді, экскурсия, лекция, танымдық сағаттар мен виртуалды көрмелерді онлайн режимде жүзеге асырып, халықпен байланысын үзген жоқ. 
Сонымен қатар, биыл «Рухани жаңғыру» бағдарламасы аясында кәсіби мереке қарсаңында Нұр-Сұлтан қаласында Қазақстан Республикасы Мәдениет және спорт министрлігінің ұйымдастыруымен мәдениет ұйымдары мен сала қызметкерлері арасында «Рухани қазына – 2021» республикалық онлайн фестивалі ұйымдастырылып, Сыр елінің өнер ұйымдары 3 номинация бойынша жеңімпаз атанды.
Салтанатты шарада аймақ басшысы Гүлшара Әбдіқалықова мәдениет және өнер саласының дамуына елеулі үлес қосқан бірқатар сала мамандарына марапаттар табыстады. 
Атап айтқанда, Қызылорда қалалық М.Ералиева атындағы мәдениет үйінің әдіскері Ляйла Нәсімханова, Қызылорда облыстық тарихи-өлкетану музейі басшысының орынбасары Жаннат Ахметова, Қызылорда облыстық халық шығармашылығын дамыту және мәдени-продюсерлік орталығының бөлім меңгерушісі Әлия Иманалиева, Қызылорда облыстық филармониясының әртісі Рауза Ысқақова Қазақстан Республикасы Мәдениет және спорт министрлігінің «Мәдениет саласының үздігі» төсбелгісімен марапатталса, Қызылорда облыстық филармониясының Тұрмағамбет ұлт аспаптар оркестрінің әртісі Абылайхан Сқақов пен Қызылорда облыстық тарихи-өлкетану музейінің бөлім меңгерушісі Әйгерім Бекқұлиеваға Қазақстан Республикасы Мәдениет және спорт министрлігінің Құрмет грамотасы табысталды. 
Сонымен қатар, Қызылорда облыстық халық шығармашылығын дамыту және мәдени-продюсерлік орталығының бас режиссері Орынкүл Бұрханова, Нартай Бекежанов атындағы Қызылорда облыстық қазақ академиялық музыкалық драма театрының бас инженері Мұрат Абжанов, Қызылорда қаласы, А.Тоқмағамбетов атындағы мәдениет үйінің бөлімінің меңгерушісі Жанар Ермағанбетова, Қызылорда облыстық тарихи-өлкетану музейінің ғылыми хатшысы Асхат Сайлау, Қызылорда облыстық филармониясының «Ақмешіт» фольклорлық ансамблінің әртісі Тоқтар Ағыраев облыс әкімінің «Алғыс» хатымен марапатталды.
Шара соңында Абылайхан Сқақов пен Орынкүл Бұрханова әріптестерін кәсіби мерекемен құттықтап, аймақ басшысына көрсетілген құрметке алғыстарын жеткізді.
<hr />
<img src="https://kyzylorda-news.kz/wp-content/uploads/2021/05/fb_img_1621579336673.jpg" alt="" />
<img src="https://kyzylorda-news.kz/wp-content/uploads/2021/05/fb_img_1621579340471.jpg" alt="" />
<img src="https://kyzylorda-news.kz/wp-content/uploads/2021/05/fb_img_1621579344095.jpg" alt="" />
<img src="https://kyzylorda-news.kz/wp-content/uploads/2021/05/fb_img_1621579349001.jpg" alt="" />

Қызылордада мәдениет және өнер қызметкерлері марапатталды

<a href="https://kyzylorda-news.kz/">Kyzylorda-news.kz</a>. 2021 жылы 1 тоқсанда қызылордалықтарға көрсетілген медициналық қызметтердің сапасы мен көлемі бойынша 16,6 мың ақау анықталды.
Әлеуметтік медициналық сақтандыру қорының сарапшылары мемлекет тегін медициналық көмектің кепілді берілген көлемі (ТМККК) шеңберінде және МӘМС пакеті бойынша Жеткізушілер көрсеткен қызметтердің сапасы мен көлеміне мониторинг жүргізуді жалғастыруда.
Ағымда жылдың 1 тоқсанда халыққа медициналық көмек көрсету кезінде 16,6 мың түрлі кемшілік анықталды. Медициналық ұйымдарға салынған айыппұл сомасы 158 млн теңгеден асты.
<blockquote>
 «ТМККК және МӘМС пакеттері бойынша Қор жеткізушілері халыққа көрсеткен медициналық қызметтер үшін ақы төлеу осы қызметтердің сапасы мен көлеміне мониторинг жүргізілгеннен кейін ғана жүргізілетінін атап өткен жөн. Іс жүзінде көрсетілген және медициналық көмек көрсету стандарттары мен ережелерін, сондай-ақ клиникалық хаттамалардың ұсынымдарын сақтай отырып, құжатпен расталған қызметтерге ақы төленеді», – деп атап өтті «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Филиал директоры түсіндіргендей, анықталған кемшіліктің ең көп саны жан басына шаққандағы нормативке кірмейтін, әрбір қызмет жеке төленетін консультациялық-диагностикалық қызметтерді көрсетумен байланысты. Жалпы құны 17,6 млн теңге болатын 13,9 мыңнан астам осындай ақаулар тіркелді. Сондай-ақ, амбулаториялық-емханалық көмек көрсету кезінде 1197&nbsp;ақау, тәулік бойы жұмыс істейтін көп бейінді стационарларда медициналық көмек көрсету кезінде 1307 кемшіліктер және ауылдық стациоанрларда 141 ақаулар анықталды.
Шағым немесе өтініш беру үшін 1406 телефонына немесе Qoldau – 24/7 мобильді қосымшасы арқылы хабарласу қажет.

МӘМС: Қызылордада медициналық ұйымдарға 158 млн теңгеге айыппұл салынды

<a href="https://kyzylorda-news.kz/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықова «Ustudy» аймақтық тестілеу орталығына барып, орталықтың ұлттық біріңғай тест өткізу бағытындағы жұмыстарын көрді.
Биыл облыста 7007 мың бала мектеп бітірсе, оның 85 пайызы ұлттық сынаққа қатысады. Ұлттық біріңғай тестілеудің алғашқы кезеңінде 5992 түлек, екінші кезеңінде 5936 бақ сынайды. Өңірде ҰБТ 4 мамандандырылған тестілеу пунктте өтуде. Олардың бірі осы «Ustudy» орталығы болса, қалған үшеуі Қазалы, Қармақшы және Жаңақорған аудандарында орналасқан. Орталық директоры Гүлнәр Пейісова тестілеу пунктінің негізгі талаптарға сай жабдықталғанын, қазіргі уақытта ҰБТ өткізілетін орындарда санитарлық талаптардың қатаң сақталғандығын жеткізді. Өңір басшысы тестілеу кезінде түлектерге барлық жағдай жасалауын тапсырып, олардың қауіпсіздік шараларын да басты назарда ұстау қажеттігін ескертті.
<blockquote>
 «Биылғы түлектер де пандемия жағдайында ұлттық біріңғай тестілеуден өтуде. Сондықтан біз үшін әрбір талапкердің қауіпсіздігі маңызды. Сол үшін санитарлық талаптардың сақталуына аса мән беруіміз керек. Мемлекет тарапынан жастарға қолдау жасалып, мектеп бітірушілерге тестілеуден өтуге екі кезең берілді. Қай кезеңде балы жоғары болса, сол көрсеткіш есепке алынбақ. Бұл көптеген жастың өз мақсатына жетуіне, таңдаған мамандығының иесі атануына сеп болмақ», – деді Гүлшара Әбдіқалықова.
</blockquote>
Айта кетейік, биылғы ұлттық біріңғай тестілеу электронды форматты 6-мамырдан бастап өткізілуде. Бүгінгі күнге дейін аймақта 1530 түлек тест тапсырған. Орташа балл – 85 балл. Осыған дейін тест тапсырған мектеп бітірушілердің 15 пайызы 100-ден аса балл жинаған. ҰБТ 30 маусымға дейін жалғасады. Шалғай елді-мекенде бітірушілерді автобустармен тасымалдау шаралары ұйымдастырылуда. ҰБТ кезеңінде талапкерлердің өмір қауіпсіздігін қамтамасыз ету бағытында облыстық білім басқармасы медицина, өртке қарсы қызмет және ішкі істер органдарымен бірлесіп жұмыс жасауда.
Биылғы жылғы жаңа ереже бойынша, ҰБТ аяқталғаннан кейін тапсырмалардың жауаптарымен талдау картасы шығады. Яғни оқушылар тестілеу нәтижесін бірден көре алады. Түлектер 5 пән бойынша 120 сұрақтан тұратын тест тапсырып, ең жоғары 140 балл жинауға мүмкіндігі болады.
<img src="https://kyzylorda-news.kz/wp-content/uploads/2021/05/188520717_3381987875237591_4916480348521940100_n.jpg" alt="" />
<img src="https://kyzylorda-news.kz/wp-content/uploads/2021/05/188331579_3381988278570884_2860611323087047848_n.jpg" alt="" />
<img src="https://kyzylorda-news.kz/wp-content/uploads/2021/05/189819888_3381989258570786_7530795561960252018_n.jpg" alt="" />
<img src="https://kyzylorda-news.kz/wp-content/uploads/2021/05/187780562_3381989431904102_7797264798793219352_n.jpg" alt="" />

Гүлшара Әбдіқалықова: Біз үшін әрбір талапкердің қауіпсіздігі маңызды

<a href="https://kyzylorda-news.kz/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықова Қазақстандағы Өзбекстан Республикасының Бас консулы Аброр Фатхуллаевпен кездесті.
<blockquote>
 «Түркі халықтарының ежелгі астанасы болған қасиетті Сыр өңіріне қош келдіңіз! Қазақстан мен Өзбекстан Республикасы көптеген жылдар бойы ашық және сенімді қарым-қатынас орнатқан бауырлас мемлекет әрі стратегиялық серіктестер екендігі белгілі. Бүгінгі күні әлемде қалыптасқан күрделі экономикалық жағдайда мемлекетаралық ынтымақтастықты одан әрі дамыту және орнықты нығайту аса маңызды болып табылады. Сіздің Қызылорда облысына жұмыс сапарыңыз бауырлас екі ел арасындағы ынтымақтастықты одан әрі нығайта түсетініне зор сенім білдіремін», – деді Гүлшара Әбдіқалықова.
</blockquote>
Биыл екі ел арасындағы дипломатиялық қарым-қатынастардың орнағанына 29 жыл толып отыр. Осы жылдар ішінде Қазақстан мен Өзбекстан арасындағы рухани-мәдени, сауда-экономикалық, ғылыми-техникалық және саяси- ынтымақтастық берік орнатылды.
2021 жылдың бірінші тоқсанында Қызылорда облысының Өзбекстан Республикасымен тауар айналымы 7,8 мың АҚШ долларын құрады. Облыстың негізгі экспортталатын тауарлары-күріш, ауыл шаруашылығы өнімдері, цемент, мұнай және мұнай өнімдері болып табылады.Қазақстандағы Өзбекстан Республикасының Бас консулы екі ел арасындағы дипломатиялық қарым-қатынасты дамыту бағытында бірқатар ұсынысын жеткізіп, көрсетілген құрметке ризашылығын білдірді.
<blockquote>
 «Біз – бауырлас халықпыз. Екі ел арасындағы жан-жақты қарым-қатынасты сақтап, кеңейту үшін тиісті жұмыс атқарылуда. Қызылорда облысы географиялық орналасу жағынан экономикалық дамуға тиімді өңір болып табылады. Сол себепті Сыр елімен бірлесіп әлеуметтік-экономикалық, сауда-саттық және басқа да маңызды бағыттарды бірлесіп дамытуды көздеп отырмыз. Сонымен қатар екі ел азаматтарының заң аясында көші-қон мәселесін ретке келтіру міндеті тұр. Қос азаматтық алу фактілерін болдырмау қажет. Осы бағытта да қолдау көрсетуді сұраймыз. Сондай-ақ, үстіміздегі жылдың қазан айында Өзбекстанда Президент сайлауы өтеді деп жоспарлануда. Осы ретте, Қызылорда облысындағы өзбек азаматтарының сайлауға қатысуы үшін арнайы орын бөлуге ықпал етсеңіз», – деді Аброр Фатхуллаев.
</blockquote>
Облыс әкімі Гүлшара Әбдіқалықова көтерілген мәселелер бойынша заң аясында қолдау көрсетілетінін айтып, сексеуіл өсіру тәжірибесімен бөлісу, туризм мен балық шаруашылғын дамыту бағытында ұсыныстарын жеткізді.
Бас консул Сыр еліне жұмыс сапар барысында облыстық өзбек этномәдени орталығының өкілдерімен кездесіп, Ы. Жақаев атындағы Қазақ күріш шаруашылығы ҒЗИ-ге, облыстық тарихи-өлкетану мұражайына, Қызылорда облысының «Бизнеске арналған үкімет» КММ-не барады деп жоспарлануда.
<img src="https://kyzylorda-news.kz/wp-content/uploads/2021/05/186918448_3381570108612701_5606888861723189626_n.jpg" alt="" />

Гүлшара Әбдіқалықова Қазақстандағы Өзбекстан Республикасының Бас консулымен кездесті

<a href="https://kyzylorda-news.kz/">Kyzylorda-news.kz</a>. Биыл 397 шақырымды құрайтын автомобиль жолдары мен көпір өткелдері және көшелер жөндеуден өткізу жоспарланып отыр.
Жалпы ағымдағы жылы облыстық және аудандық маңызы бар 36 автокөлік жолдары пайдалануға беріледі. Оның 3-уі көпір өткелі. Бұл туралы Өңірлік коммуникациялар қызметінің ақпарат алаңында Қызылорда облыстық жолаушылар көлігі және автомобиль жолдары басқармасының басшысының орынбасар Қайрат Әбсұлтанов баяндады.
<blockquote>
 «Ағымдағы жылы облыстық және аудандық маңызы бар жолдардың индикаторлық көрсеткішінің үлесі 75 пайызға жеткізу жоспарланған. 2021-2023 жылдарға арналған жол картасы бойынша 21 дана көпір өткелі жөндеуден өтеді. Оның 18-і автомобиль көпірі, 1-і қалқымалы (Хан) және 2-і темір жол үстінен өтетін жаяу жүргіншілер көпірі», – деді облыстық жолаушылар көлігі және автомобиль жолдары басқармасының басшысының орынбасар Қайрат Әбсұлтанов.
</blockquote>
<img src="https://kyzylorda-news.kz/wp-content/uploads/2021/05/189438952_1293117037750472_4286270769391082325_n.jpg" alt="" />

Биыл Қызылордада 397 шақырым автомобиль жолы жөнделеді

<a href="https://kyzylorda-news.kz/">Kyzylorda-news.kz</a>. Қызылорда қаласында өз үйінде 10 келі есірткі сақтаған тұрғын ұсталды.
Қызылорда қалалық Полиция басқармасының Ақсай полиция бөліміне жергілікті тұрғын өз үйінде есірткі заттарын сақтайтыны туралы ақпарат келіп түсті.
Жедел-іздестіру іс-шараларының нәтижесінде күдіктінің тұрғылықты мекен-жайына тінту, тергеу әрекетін жүргізу барысында пәтеріндегі болконында ерекше иісі бар жасыл түсті өсімдік тектес 103 полиэтилен пакет табылып, тәркіленді. Тәркіленген заттар сараптама қорытындысымен 10 келіден астам кептірілген марихуана екені анықталды.
Сонымен қатар, арнайы іс-шара аясында жоғарыда аталған азаматтың бұл затты жеке пайдалану үшін сақтаумен айналысқаны белгілі болды. Белгілі болғандай, күдікті бұрын Қазақстан Республикасының Қылмыстық Кодексінің 300-бабы бойынша сотталып, 2018 жылы бостандыққа шыққан.
Күдікті Қызылорда қалалық Полиция басқармасының уақытша ұстау изоляторына қамалды.
Аталған дерек бойынша Қазақстан Республикасы Қылмыстық Кодексінің 296-бабының 4-бөлігі (Есірткі құралдарын, психотроптық заттарды, сол тектестерді аса ірі мөлшерде өткізу мақсатынсыз заңсыз дайындау, қайта өңдеу, сатып алу, сақтау, тасымалдау) бойынша сотқа дейінгі тергеп-тексеру амалдары жүргізілуде.
Айта кетейік, аталған қылмыс үшін 3 жылдан 7 жылға дейін бас бостандығынан айыру жазасы қарастырылған.
Қызылорда қаласы бойынша жыл басынан барлығы 42 есірткі қылмысы анықталды. Бұл бағытта ішкі істер органдары мен қаланың мүдделі қызметтері, басқа да құқық қорғау органдары арнайы органдарымен бірлесіп, қажетті жұмыстарды атқарып келеді. Есірткінің заңсыз алқаптарын анықтау және жою бағытында профилактикалық және рейдтік іс-шаралар өз жалғасын табуда.

Қызылорда: Үйінде 10 келі есірткі сақтаған тұрғын ұсталды

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысының 2023 жылға дейінгі экономикалық даму жоспары аясында 265 жобаны жүзеге асыру жоспарланған болатын. Өткен жылдың өзінде 89-ы іске қосылып, 1047 жұмыс орны ашылды. Мұнан бөлек, тағы 404 жобаны жүзеге асыру көзделуде.
<blockquote>
 «Экономиканы дамыту мақсатында іске асырылатын жобаларға талдау жасалып, 500-ге дейін арттыру көзделуде. Сондай-ақ, биыл 13,8 млрд. теңгені құрайтын 96 жобаны жүзеге асыру жоспарладық. Бүгінгі күнге жалпы құны 510 млн. теңгені құрайтын 29 жоба жүзеге асырылды, оларда 137 жұмыс орны құрылды. Бұл әрине ауқымды үлкен жобалар емес, дегенмен пандемия кезеңінде халықты жұмыспен қамту арқылы тұрақты табыс көзіне айналып тұрмыс тіршілігінің жақсаруына ықпал еткені анық. Бұл бағыттағы жұмыстар жалғасуда», – деді облыстық экономика және бюджеттік жоспарлау басқармасының басшысы Нұрғали Қордабай.
</blockquote>
Биыл «Ауыл-Ел бесігі» арнайы жобасы шеңберінде Қазалы, Қармақшы, Жалағаш, Сырдария және Шиелі аудандарына қарасты ауылдық елді мекендерде 13 инвестициялық жобаны іске асыруға республикалық бюджеттен 1,9 млрд теңге қаралды. Жоба аясында 3 307 тұрғын үйге газ желісі жүргізіледі. сондай-ақ 26,6 шақырым көше жөндеуден өтіп, 117 жұмыс орыны құрылатын болады.

Қызылордада 500-ге жуық жоба жүзеге асырылады

Kyzylorda-news.kz. Бүгін аймақ басшысы Гүлшара Әбдіқалықованың төрағалығымен облыс әкімдігі жанындағы мемлекеттік рәміздер жөніндегі комиссия отырысы өтті.
Жиында мемлекеттік рәміздердің насихатталуы және қолданылу жай-күйіне облыстық инспекциялық топтың тексеру қорытындысы, облыстық жұмыспен қамтуды үйлестіру және әлеуметтік бағдарламалар басқармасына қарасты мекемелерде мемлекеттік рәміздердің пайдаланылуы және насихатталу барысы, Жаңақорған ауданында мемлекеттік рәміздердің қолданылуы мен насихатталуы мәселелері қаралды.
Күн тәртібіндегі алғашқы мәселе бойынша облыстық ішкі саясат басқармасының басшысы Мира Қазбекова облыстық инспекциялық топтың 2021 жылдың 5-30 сәуір аралығында Қызылорда қаласы мен аудандардағы мемлекеттік мекемелерде Мемлекеттік рәміздердің стандарттарға сәйкес қолданылуы мен орналастырылуы бойынша жүргізген зерделеу жұмыстардың нәтижесін баяндады.
<blockquote>
 “2020 жылғы 20 тамызда өткен облыс әкімдігі жанындағы Мемлекеттік рәміздер жөніндегі комиссия отырысының хаттамалық тапсырмасын орындау мақсатында Қызылорда облысының ішкі саясат басқармасы және облыстық полиция департаментімен бірлескен ведомствоаралық облыстық инспекциялық топ құрылды. Инспекциялық топ 2021 жылдың 5-30 сәуіраралығында Қызылорда қаласы мен аудандардағы мемлекеттік мекемелерде Мемлекеттік рәміздердің стандарттарға сәйкес қолданылуы мен орналастырылуы бойынша зерделеу жұмыстарын жүргізіп, барлығы 374 мемлекеттік мекемені қамтыды. Зерделеу барысында 35 мекемеде кемшіліктер анықталып, 13-і дер кезінде қалпына келтірілсе, 2 мекемеге әкімшілік хаттама толтырылды”, – деді облыстық ішкі саясат басқармасының басшысы Мира Қазбекова.
</blockquote>
Өңір басшысы Гүлшара Әбдіқалықова кейбір аудан әкімдіктері мен аумақтық департаменттердің аудандық бөлімшелерінде заңнама талаптары сақталмайтынын айтып, аудандар әкімдіктері жанындағы мемлекеттік рәміздер жөніндегі комиссия тиісті деңгейде жұмыс істемей отырғанын тілге тиек етті.
<blockquote>
 “Рәміздерді қолдануда аудан әкімдіктері мен облыстық басқармаларға қарасты мекемелерде, аумақтық департаменттердің аудандық бөлімшелерінде заңнама талаптары сақталмайтыны айтылды. Биыл, Ел тарихындағы мерейлі дата, Тәулсіздігіміздің 30 жылдығы қарсаңында мемлекеттік рәміздерге деген құрмет ерекше болуы керек. Сондықтан, мемлекеттік рәміздерімізге құрметпен қарауды қалыптастыруда ең алдымен өздеріңіз үлгі болыңыздар. Алдағы уақытта заңнама талаптарын сақтамау фактілері тіркелетін болса, жеке жауапкершіліктеріңіз қаралатынын ескертемін”, – деді облыс әкімі Гүлшара Әбдіқалықова.
</blockquote>
Мұнан соң комиссия отырысының күн тәртібіндегі келесі мәселе Қызылорда облысының жұмыспен қамтуды үйлестіру және әлеуметтік бағдарламалар басқармасына қарасты мекемелерде мемлекеттік рәміздердің пайдаланылуы және насихатталу барысы туралы аталған басқарманың басшысы Гаухар Қалмақова баяндады. Басқарма басшысы рәміздерді пайдалануы мен насихаттау бағытында арнайы жұмыс жоспары бекітіліп, қазіргі таңда басқармаға қарасты мекемелерде кемшіліктер анықталмағанын жеткізді.
Ал, Жаңақорған ауданында мемлекеттік рәміздердің қолданылуы мен насихатталуы жайын айтқан аудан әкімі Руслан Рүстемов инспекциялық топтың ауданда анықтаған кемшіліктерінің барлығы бүгінде жойылғандығын айтты. Сондай-ақ, Қазақстан Республикасының Тәуелсіздігінің 30 жылдығына орай өткізілетін шаралар қатарында мемлекеттік рәміздер ұлықталатын болады деді.Отырыс соңында аймақ басшысы Гүлшара Әбдіқалықова мемлекеттік рәміздерді насихаттауда идеологиялық жұмыстарға аса мән беру керектігін жеткізді.
<blockquote>
 “Мемлекет Басшысы Қасым-Жомарт КемелұлыТоқаев «Егемен еліміздің бейбіт аспанында желбіреген көк туымыз бүгінгі күннің баға жетпес байлығы» – деген болатын. Мемлекеттік рәміздерге құрмет көрсетуді барша азамат қасиетті борышы ретінде ұғынуы тиіс. Осы ретте, 4 маусым – Қазақстан Республикасының Мемлекеттік рәміздері күні аясындағы іс-шаралардың мазмұны мен өткізілу форматтары жаңа бағыттарда болуы қажет. Халқымыздың рухын, ұлттық салт-санасын, қаһармандығы мен даналығын бейнелейтін ерекше құнды белгілерді құрметтеу, насихаттау – әрбір Қазақстан азаматының міндеті”, – деді облыс әкімі Гүлшара Әбдіқалықова.
</blockquote>
Сондай-ақ аймақ басшысы облыстық басқарма басшылары, Қызылорда қаласы және аудан әкімдері, аумақтық департамент басшыларына өздеріне қарасты мекемелерде мемлекеттік рәміздердің талапқа сай орналасуын тұрақты бақылауға алып, облыстық инспекциялық топтың тексеру қорытындысына сәйкес кемшілік жіберген мекеменің жауапты тұлғаларының жауапкершілігін қарауды тапсырды. Облыстық инспекциялық топ анықтаған кемшіліктерді 1 ай ішінде ретке келтіріп, аудан әкімдіктері жанындағы мемлекеттік рәміздер жөніндегі комиссияның жұмысын күшейтуді жүктеді.
<img src="https://kyzylorda-news.kz/wp-content/uploads/2021/05/fb_img_1621429139110-1.jpg" alt="" />

Гүлшара Әбдіқалықова: Мемлекеттік рәміздерге құрмет көрсетуді барша азамат қасиетті борышы ретінде ұғынуы тиіс

<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a>&nbsp;“Бизнестің жол картасы 2025” бағдарламасы аясында кәсіпкерлердің 666 жобасы несиелендірілді. Несие портфелі өткен жылмен салыстырғанда 6 есеге ұлғайды. Бұл туралы Өңірлік коммуникациялар қызметінің ақпарат алаңында Облыстық кәсіпкерлік және туризм басқармасының басшысы Фердоуси Қожабергенов мәлімдеді.
<blockquote>
 «Аймақта 528 жоба екінші деңгейлі банктердің “скоринг” бағдарламасы арқылы мақұлданды. Қаржыландырылған жобалардың басым бөлігі пандемия кезеңінде аса зардап шеккен бөлшек сауда, жолаушылар тасымалы, қоғамдық тамақтану және шағын қызмет саласында жұмыс жасайтын микро кәсіпкерлік субъектілерінің үлесінде. Сондай-ақ, өткен аптада Бақылау кеңесінің отырысында ауылдық елді мекен кәсіпкерлерінің 143 жобасы мақұлданды», – деді Фердоуси Әбілқасымұлы.
</blockquote>
Биыл облыстық бюджеттен шамамен 30 жобаны қайтарымсыз грант арқылы қаржыландыру жоспарлануда. Бұдан өзге, қаржы ұйымдары арқылы жыл басынан бері 41 адам шағын несиемен қамтамасыз етілді.
Айта кету қажет, өңірде соңғы бес жылдықта шағын және орта бизнес өнімі 13,5 %-дан 17,8 %-ға дейін ұлғайған.
<img src="https://kyzylorda-news.kz/wp-content/uploads/2021/05/ferdawsi.jpg" alt="" />

Қызылорда облысында биыл 666 жоба несиелендірілді

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықова жол-көлік инфрақұрылымын дамыту мәселелерін тыңдады. Облыстық жолаушылар көлігі және автомобиль жолдары басқармасының басшысы Мұрат Тлеумбетов атқарылатын жұмыстар мен алдағы жоспар туралы баяндады.
Қызылорда облысы аумағында автомобиль жолдарының жалпы ұзындығы 3397 км құрайды. Оның 1016 км республикалық, 557 км облыстық, 1824 км аудандық маңызы бар автомобиль жолдары болып табылады.
2021 жылы республикалық және облыстық бюджеттен барлығы 20 млрд теңге бөлініп ұзындығы 397 шақырымды құрайтын автомобиль жолдары мен көпір өткелдері және көшелер жөндеуден өткізу жоспарланған.
Жалпы ағымдағы жылы республикалық бюджеттен «Нұрлы жол», «Өңірлерді дамыту», «Ауыл ел – бесігі», «Кіші қалаларды дамыту» мемлекеттік бағдарламары аясында 10,8 млрд теңге көлемінде инвестиция тартылды.
Облыстық бюджеттен сол жағалаудағы Сырдария өзенінің қорғаныс бөгетін бойлай орналасқан магистралды көше құрылысын аяқтауға, Жаңақорған ауданының Қожакент, Манап ауылдарының көшелерін, облыстық маңыздағы автомобиль жолдарын жөндеуге қаржы бөлініп, тиісті жұмыстар атқарылуда.
Сонымен қатар облыстық маңызы бар жолдардың бойындағы 5 апаттық жағдайдағы көпірге және Қазалы ауданындағы Қарлан учаскесінде Сырдария өзені арқылы көпір салуға жобалау-сметалық құжаттамалары әзірленіп, мемсараптамадан өткізілуде.
Жол жөндеу жұмыстарына қолданылатын материалдардың сапасын және төселген асфальт жабындысынан сынама алып зертханалық тексеруден өткізу қызметін көрсету мақсатында «Ұлттық жол активтері сапа орталығы» РМК-мен келісім- шарт жасалып, жалпы 94 көше – жолдардың сапасына тексеру жүргізілді. Бүгінгі таңда, облыс аумағында 212 елді мекенді аудан және облыс орталығымен байланыстыратын 204 автобус маршруты ұйымдастырылған. Оның ішінде ауданаралық – 71 маршрут, кентішілік –101 маршрут, қалаішілік және қаламаңы – 32 маршрут. Сонымен қатар, Ташкент қаласына 1 халықаралық және Нұр-Сұлтан, Алматы, Шымкент, Жезқазған, Түркістан, Сарыағаш, Ақтөбе және тағы басқа қалаларға облысаралық 13 автобус маршруты жүруде.
Қызылорда облысының автовокзал, автостанциялар және жолаушыларға қызмет көрсету пункттеріне енгізілген Қызылорда қаласы мен аудан орталықтарындағы 4 автовокзал және 8 автостанса халыққа қызмет көрсетуде.
Бүгінгі күні, Қызылорда қаласы бойынша 25 қалаішілік және 8 қала маңын маршруттары ұйымдастырылған. Күнделікті осы маршруттарда 300 -350 аралығында автокөліктер қызмет көрсетіп келеді. «Қызылорда» Автобус Парк» ЖШС-нің балансында 135 автобус бар.
Жиында әуе, темір жол қатынастары бойынша да атқарылған жұмыстар талқыланды.
Облыс әкімі жол-көлік инфрақұрылымына бөлінген қаражаттың жұмсалуын қатаң бақылауда ұстауды және жол салуда сапаға аса мән беруді тапсырды. Сондай-ақ, қалаішілік, ауданаралық маршруттарды тиісті деңгейде ұйымдастыру қажет екенін атап өтті.

Гүлшара Әбдіқалықова жол салуда сапаға мән беруді тапсырды

*<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Біріккен Ұлттар ұйымының Бас Ассамблеясында Арал маңы аймағын «экологиялық инновациялар мен техниологиялар аймағы» деп жариялайтын қақарды бірауыздан мақұлдады. Бұл туралы ҚазАқпарат хабарлайды.*
Бұл бастаманы Өзбекстан көтерген, ал қақарды 50-ден астам мемлекет қолдаған, олардың арасында Әзербайжан, Беларусь, Қазақстан, Ресей, Тәжікстан және Түрікменстан елдері бар.
Өткен жылдың қыркүйек айында БҰҰ-да сөз сөйлеген Өзбекстан Президенті Шавкат Мирзиёев Арал теңізінің құрғап кету салдарынан Арал маңы аймағы «экологиялық апат ошағына» айналғанын айтты. Ол бұл проблеманы соның ішінде «2 миллион гектар аумақта жаңа ландшафт, орман сілемдерін және топырақ қабатын қалыптастыру жолымен» бірлесіп шешуді ұсынды».
Арал кезінде көлемі жағынан төртінші орынд тұрған жабық теңіз болған, қазіргі кезде ол құрғап кетіп, шағын суқоймаға айналды. Көптеген балық тұқымдары, сондай-ақ аймақта мекендеген жабайы жануарлар – Тұран жолбарысы, гепард, аққулар, фламинго, ақ тырна жоғалып кеткен.
Аралдың жалаңаштанған бөлігінде аумағы 5,5 млн гектардан астам тұз шөлі пайда болды. Мұнда шаң соғып, атмосфераға көптеген мың шақырым жерге шаң мен улы тұзды таратып, өсімдіктерді жойып отырады. Экологиялық апат миллиондаған адамның өмірі мен денсаулығына әсер етті: дәрігерлер көмекей және өңеш обырының, сондай-ақ респираторлық, көз және өзге аурулардың көбеюін атап өтуде. Арал теңізі бұрынғы қалпына келе алмайды, бірақ жергілікті тұрғындарға қорғаныс және көмек қажет болып отыр.
Осы қабылданған қарарда Бас Ассамблея Арал маңы аймағында экологиялық, әлеуметтік, экономикалық жне демографиялық жағдайды жақсартуға бағытталған аймақтық іс-шаралар мен бастамаларды қолдайтыны мәлімделген.

БҰҰ Арал маңын экологиялық инновациялық аймақ деп атады

*<a href="https://kyzylorda-news.kz/kogam/qyzylorda-qalasyn-ajaq-swmen-qamtamasyz-etw-zhumystary-qarqyn-aldy-111001/">Kyzylorda-news.kz.</a> Қазақстанда өткен тәулікте 2018 адамнан коронавирус табылды.*
Өңірлер бойынша мәлімет:
<ul>
<li>Нұр-Сұлтан қаласы – 264,</li>
<li>Алматы қаласы – 525,</li>
<li>Шымкент қаласы – 81,</li>
<li>Ақмола облысы – 131,</li>
<li>Ақтөбе облысы – 68,</li>
<li>Алматы облысы – 114,</li>
<li>Атырау облысы – 66,</li>
<li>Шығыс Қазақстан облысы – 77,</li>
<li>Жамбыл облысы – 21,</li>
<li>Батыс Қазақстан облысы – 98,</li>
<li>Қарағанды облысы – 328,</li>
<li>Қостанай облысы – 35,</li>
<li>Қызылорда облысы – 24,</li>
<li>Маңғыстау облысы – 56,</li>
<li>Павлодар облысы – 97,</li>
<li>Солтүстік Қазақстан облысы – 14,</li>
<li>Түркістан облысы – 19.</li>
</ul>
Жалпы ел бойынша ауырғандар саны – 364 048.

Қазақстан және Қызылорда облысының жаңалықтары: Басты жаңалықтар old