<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова Германия Федеративтік Республикасының Қазақстан Республикасындағы Төтенше және Өкілетті Елшісі Тило Клиннерді қабылдады. Кездесуде Қызылорда облысы мен Германия елінің арасындағы бірлескен ынтымақтастық мәселелері талқыланды.
<blockquote>
 «Қазақстан Республикасы мен Германия Федеративтік Республикасы арасында жүретін тауар айналымындағы Қызылорда облысының үлесі ағымдағы жылдың 4 айында 4 млн. АҚШ долларын құрайды. Оның ішінде экспорт бойынша 1,7 млн. АҚШ доллары. Негізгі бағыт – балық өнімдері. Импорт 2,3 млн. АҚШ долларын құрап, онда 48% негізгі бөлігін машина жасау және автоматика өнімдері алады», – деді облыс әкімі Гүлшара Әбдіқалықова.
</blockquote>
Қызылорда облысы мен Германия түрлі инвестициялық бағыт бойынша тығыз байланыс орнатқан.&nbsp;
Былтыр күзде Қызылорда қаласында Германияның Алматы қаласындағы Бас Консулы Кристиан Маркерттің қатысуымен жыл сайынғы инвестициялық форум өтті. Онда өңірдің туристік саласын дамыту мәселелері талқыланды.&nbsp;
Ал, биыл жыл басында Қызылорда облысы делегациясының Дортмунд қаласына сапары аясында неміс (ICMD International Corporationof Metaland Alloy Development Holding Gmbh) және поляк (EMP Energyand Metallurgical ProductsSp.Z&nbsp;o.O.) компанияларымен кездесу өтіп, «Қызылорда қаласында ферроқорытпа зауытын салу» жобасын іске асыру туралы үш жақты меморандумға қол қойылды.
Сондай-ақ, Халықаралық ынтымақтастық жөніндегі герман қоғамы (GIZ) «Солтүстік Арал өңірінің балық қорларын сақтау және дамыту, қауіпсіздігін қамтамасыз ету» жобасы шеңберінде Көкарал бөгетінде балық қорғау құрылғысы құрылысының жобасын қаржыландырып, қолдау көрсетіп келеді.
Кездесу соңында Тило Клиннер облыс әкіміне қабылдағаны үшін алғыс білдіріп, алдағы уақытта да ауыл шаруашылық, цифрландыру және өзге де салалардағы жобалармен ортақ жұмыс жасауға ұсыныс білдірді.
Елшінің Сыр өңіріндегі жұмыс сапары Арал ауданында жалғасады.
<img src="https://kyzylorda-news.kz/wp-content/uploads/2020/06/aki2-1.jpg" alt="" />
<img src="https://kyzylorda-news.kz/wp-content/uploads/2020/06/aki1-1.jpg" alt="" />

Қызылорда облысы мен Германия Федеративтік Республикасының ынтымақтастығы берік

<a href="http://kyzylorda-news.kz/">Kyzylorda-news.kz.</a> Құрлық әскерлері бас қолбасшысының жауынгерлік даярлық жөніндегі орынбасары генерал-майор Дәулет Оспанов бастаған Қазақстан Қарулы күштері Десанттық-шабуылдаушы әскери қызметшілерінің салтанатты есебі Ұлы Отан соғысындағы Жеңістің 75 жылдығына арналған әскери парадқа қатысу үшін Ресейге келді. Бұл туралы ҚР Қорғаныс министрлігі хабарлады.
Жақында парадқа қатысушылары мінген ұшақ Мәскеу маңындағы «Чкаловский» әскери аэродромына қонды.
Дайындық кезінде қазақстандық әскери қызметшілер «Звенигородский» әскери санаторийінде тұратын болады. Денсаулық қауіпсіздігін қамтамасыз ету мақсатында парад қатысушыларына халықпен және адамдармен қарым-қатынасты болдырмау үшін жаттығулардан басқа, аймақтан тыс шығуға тыйым салынады.
Әскери қызметшілер Мәскеуге кетер алдында коронавирусқа ПТР-тест тапсырды. Айта кету керек, қатысушылар әр үш күн сайын коронавирусқа қатысты ПТР-тест тапсырады.
Дайындық алдын алу және эпидемияға қарсы іс-шаралар кешенін орындай отыра, карантиндік шараларды қатаң сақтау арқылы жүзеге асырылатын болады. Атап айтқанда тәулігіне екі рет медициналық тексеру, үй-жайларды санитарлық өңдеу және желдету, әскери қызметшілерді қажетті дезинфекциялау және медициналық жеке қорғану құралдарымен қамтамасыз ету.
Жаттығулар Мәскеу маңындағы «Алабино» полигонының алаңында өтеді. Жалпы парад есебіндегі қазақстандық әскери қызметшілердің бірінші жаттығуы 15 маусымға жоспарланған.

Қазақстандық әскери қызметшілер парадқа қатысу үшін Мәскеуге барды

<a href="http://kyzylorda-news.kz/">Kyzylorda-news.kz.</a> Қазақстандық «Томирис» тарихи драмасының АҚШ аумағындағы дистрибуция құқығын Well Go USA компаниясы сатып алды, деп хабарлайды <a href="https://www.inform.kz/kz/tomiris-fil-mi-aksh-tagy-kinoteatrlarda-korsetiledi_a3661471">ҚазАқпарат</a>.
<blockquote>
 «Америка Құрама Штатының аумағында «Томирис» фильмінің дистрибуция құқығы сатып алынғаны туралы Variety, Hollywood Reporter және Screen Daily басылымдары жариялады. Осы мәміленің нәтижесінде Arclight Films компаниясы қазақстандық драманың АҚШ аумағында тарату құқығын Well Go USA компаниясына сатты», делінген хабарламада.
 «Мықты әйелдердің ерлігін паш етіп, шынайы оқиғаларына қызығушылық танытатын әлемде өмір сүріп жатқанымызға қуаныштымыз», – деді Arclight Films басшысы Гэри Хэмилтон.
</blockquote>
Еске салсақ, кинотуынды біздің заманымызға дейінгі VI ғасырда болған оқиғаны суреттейді. Фильмде кішкентай қыздан айбынды жауынгерге айналған, жақындарынан айрылып, сатқындардан өшін алған және сақ тайпаларын біріктірген ұлы даланың аты аңызға айналған Томирис патшайымының тағдыры баяндалады.
Фильм ҚР Мәдениет және спорт министрлігінің тапсырысымен «Қазақфильм» киностудиясында Sataifilm компаниясының қатысуымен түсірілген.
<blockquote>
 «Бұл эпикалық фильм таңғажайып пейзаждармен көркемделіп, жоғарғы сапада түсірілгендіктен көрермендерді бірден баурап алатыны сөзсіз», – деп жазды Variety басылымы.
 «Таңғажайып оқиғаларды біз ерекше ұнатамыз. Сондықтан да алғашқы тарихи «Амазон патшайымының» құпияға толы оқиғасы басқаларға қарағанда сенімдірек», – деді Well Go USA Entertainment президенті және атқарушы директоры Дорис Пфардрешер Hollywood Reporter тілшісіне.
</blockquote>

«Томирис» фильмі АҚШ-тағы кинотеатрларда көрсетіледі

<a href="http://kyzylorda-news.kz/">Kyzylorda-news.kz.</a> Қызылорда облысынан жыл басынан бері 13,9 млн долларды құрайтын 38,9 мың тонна ауыл шаруашылығы өнімдері экспортталып, былтырғы жылдың осы кезеңімен салыстырғанда 116,7 пайызға артты.
Экспортталған өнім түрлерінің қатарында балық, күріш, бидай қалдығы, қамыс бар. 
Облыста өндірілетін өнімдер Ресей, Қырғызстан, Беларусия, Әзірбайжан, Моңғол мемлекеті, Тәжікстан, Украина, Түркмения, Өзбекстан, Грузия, Қытай, Польша, Германия, Литва және Ирак мемлекеттеріне жөнелтілуде.
Сондай-ақ, биылғы жылы алғаш рет Германия мемлекетіне 122,1 тонна қамыс экспортталды. Біздің өнім үйлердің шатырымен тоқыма себетін (плетеночная корзина) жасауға пайдаланылуда.

Қызылорданың қамысына Еуропадан сұраныс бар

<a href="https://kyzylorda-news.kz/">Kyzylorda-news.kz.</a> Қазақстан хоккей ұлттық&nbsp;құрамасының бұрынғы капитаны және елорданың «Барыс» хоккей клубының ойыншысы Брэндон Боченский Солтүстік Дакотадағы Гранд-Форкс мэрі үшін сайлауда жеңіске жетті.
Сайлауға келгендердің жартысына жуығы оған дауыс берді, деп хабарлайды <a href="https://massaget.kz/layfstayl/sport/zhanalyktar/62409/">Massaget.kz</a>.
38 жастағы Боченский 49,62 пайыз дауыс жинаған. Қазіргі мэр Майк Браунға тұрғындардың 31,81 пайызы дауыс берген. Браун бұл лауазымды соңғы 20 жыл бойы атқарып келеді.
Жаңа мэр коронавируспен және оның экономикалық салдарымен бірінші кезекте күресетінін айтты.
<blockquote>
 «5 айлық қажырлы еңбектен кейін біз бұл нәтижеге қуануымыз керек. Менің ойымша, қала өзгеруге дайын. Алда қала тұрғындарын жемісті өзгерістер күтіп тұр», – деді бұрынғы спортшы.
</blockquote>
Айта кетейік, Боченский АҚШ-та туып, Ұлттық хоккей лигасында бірнеше клубтарында, ал «Барыс» клубында &nbsp;2010 жылдан &nbsp;бастап ойнаған. Боченский 2014 жылы Қазақстанның азаматы атанып, 2016 жылғы әлем чемпионатында Қазақстанның намысын қорғады. Спортшы мансабын 3 жыл бұрын аяқтаған.

Қазақстандық хоккейші АҚШ-та мэр атанды

<a href="http://kyzylorda-news.kz/">Kyzylorda-news.kz.</a> Сарқырма құрлықта ғана емес, мұхитта да бар. Дәл судың ішінде. Тығыздығы әртүрлі су кездескен кезде бір-біріне құйылатын құбылыс.
Ал судың тығыздығы оның температурасы мен тұздылығына байланысты. Суық су мен тұзды судың тығыздығы жоғары болады. Ал ыстық су мен тұщы судың тығыздығы төмендеу.
Егер су астындағы рельеф еңіс әрі екі арнаның суы әртүрлі тығыздықта болса, сол кезде сарқырама пайда болады. Тығыздығы жоғары су ылдиға құйылады. Жалпы, су астындағы сарқырама құрлықтағыға қарағанда қуатты әрі үлкен болады.
Мұндай сарқыраманың көбі әлі де анықталмаған болар. Өйткені мұхит пен теңіздің асты әлі толық зерттелген емес. Ғылымға әзірше Дат бұғазы мен Маврикий аралындағы су асты сарқырамасы ғана белгілі.
Әсіресе, Дат бұғазындағы сарқырама – ең үлкені. Гренландия теңізінің Гренландия мен Исландия аралдары арасындағы Атлант мұхитына құйылар тұсында алып, қуатты сарқырама бар. 600 метр тереңдіктегі су 4000 метр тереңдікке қарай сарқырап жатыр. Сонда сарқыраманың биіктігі 3200 метр болғаны.
<img src="https://kyzylorda-news.kz/wp-content/uploads/2020/06/sw1-1.jpg" alt="" />
Маврикий – Африка құрлығына таяу Үнді мұхитындағы арал. Осы аралдың жанында алып сарқырама бар. Оны аралдың үстінен қараған кезде көзге бірден шалынады. Мыңдаған тонна су төменге кетіп жатыр.
<img src="https://kyzylorda-news.kz/wp-content/uploads/2020/06/sw2-1.jpg" alt="" />
Жағалауда жақын судың түсу аспантүстес болса, мұхитқа қарайғы судың түсі қою көк түс екенін әрі судың бөлініп-бөлініп, бөлек ағып жатқанын аңғаруға болады.
<img src="https://kyzylorda-news.kz/wp-content/uploads/2020/06/sw3-1.jpg" alt="" />
Мұхиттың тереңдігі жағалауға жақын тұста 10-30 метр болса, сарқырама пайда болған жерде 150 метр.
<a href="https://massaget.kz/layfstayl/alemtanu/syrly-alem/62358/">Massaget.kz</a>

Су асты сарқырамасы барын білесіз бе? (ФОТО)

<a href="https://kyzylorda-news.kz/">Kyzylorda-news.kz.</a> Сарапшылар коронавирус сөйлесу кезінде жиі жұғатынын мәлім етті, деп хабарлайды&nbsp;<a href="https://stan.kz/galimdar-kol-alisu-arkili-koronavirus-zhyktiru-kaupi-ot-332334/">Stan.kz</a>.
Мұндай тоқтамға Қытайдың ауруларды бақылау және алдын алу орталығының ғалымдары келіп отыр.&nbsp;
Мамандар індетке тап болғандар сағат сайын миллиондаған вирус қалдықтарын ауаға бөлетінін&nbsp;айтады. Сөздерінше, аурудың белгілері байқалмағандардың өзі басқаларына үлкен қауіп төндіруі мүмкін екен.&nbsp;
Сондай-ақ зерттеушілер зат арқылы немесе қол алысу арқылы вирусты жұқтыру ықтималдығы өте төмен екенін жеткізді. Себебі инфекция тудырушылар көбіне ауа арқылы таралатын көрінеді.&nbsp;
Сарапшылардың сөздерінше, маска кию расымен де індеттің жаппай таралуын алдын алатын сыңайлы.&nbsp;
Еске салайық, бұған дейін коронавирустың талауының бірнеше жолдары айтылған еді. Мамандар жұқпалы ауру қол алысу, сөйлесу, тіпті, шаш пен көзді ұстаған кезде жұғатынын анықтапты.

Ғалымдар қол алысу арқылы коронавирус жұқтыру қаупі өте төмен екенін айтты

<a href="https://kyzylorda-news.kz/">Kyzylorda-news.kz.</a> Мәдениет және спорт министрі Ақтоты Райымқұлова Токио Олимпиадасына шегерілуіне байланысты Қазақстанда осы жартыжылдықта 4,3 млрд теңге үнемделіп, бюджетке қайтарылғанын мәлімдеді, деп хабарлайды <a href="https://www.inform.kz/kz/tokio-olimpiadasynyn-shegerilui-kazakstanda-4-3-mlrd-tenge-unemdeldi_a3658418">ҚазАқпарат.</a>
<blockquote>
 «Пандемияға байланысты бүкіл әлемде ірі спорттық шаралардың бәрі де кейінге шегерілді. Өздеріңіз білетіндей, Олимпиада ойындары да келесі жылға қалдырылды. Жазғы Олимпиада ойындары осы жылдың шілде айының аяғы мен тамыз айының басында өтуі тиіс болатын. Осыған байланысты халықаралық және лицензиялық сайыстардың өткізілу кестесіне де айтарлықтай өзгерістер енгізілді», – деді Ақтоты Райымқұлова.
</blockquote>
Министр қазіргі уақытта қазақстандық спортшылар өз жаттығуларына кіріскендігін айтып өтті.
<blockquote>
 «Алайда Олимпиада келесі жылға қалдырылғаннан кейін биылғы жартыжылдықта 4,3 млрд теңге үнемделіп, мемлекеттік бюджетке қайтарылды», – деді Ақтоты Райымқұлова.
</blockquote>

Токио Олимпиадасы: Қазақстанда 4,3 млрд теңге үнемделді

<a href="https://kyzylorda-news.kz/">Kyzylorda-news.kz</a>. Қытайда коронавирус инфекциясымен ауырған науқастардың 93%-дан астамы ауруынан айыққан, деп хабарлайды Төтенше жағдай режимін қамтамасыз ету жөніндегі Мемлекеттік комиссияның Жедел штабына сілтеме жасап.
Қазіргі уақытта бұл елде сырттан келген және жергілікті жерде коронавирус инфекциясын жұқтырғандардың саны күн сайын азайып келеді. Соңғы мәліметтерге сәйкес, Қытайда коронавирусты жұқтырғандар саны 82 798-ді құраған, оның 77 207-сі емделіп, ауруханадан шығарылған. Бұл жалпы науқастар санының 93,2%-ын құрайды. Ауруханаларда шамамен 1 мың емделуші қалған.
ҚХР Денсаулық сақтау мәселелері жөніндегі мемлекеттік комитетінің мәліметтері бойынша, коронавирус инфекциясын жұқтырғандардың 93,2%-ы сауығып, 5,59%-ы қайтыс болған.

Коронавирус: Қытайда науқастардың 93%-дан астамы ауруынан айыққан

<a href="https://kyzylorda-news.kz/">Kyzylorda-news.kz.</a> Токио Олимпиадасы ойындарын 2021 жылы ауыстыру Халықаралық олимпиада комитетін (ХОК) бірнеше миллион доллар шығынға ұшыратуы мүмкін. Бұл туралы ХОК президенті Томас Бах мәлім етті, деп хабарлайды <a href="https://www.inform.kz/kz/hok-tokio-olimpiadasyn-auystyru-birneshe-mln-dollar-shygynga-ushyratady_a3637166">ҚазАқпарат</a>.&nbsp;
<blockquote>
 Токиодағы Олимпиада ойыны 2020 жылы 24 шілдеден бастап 9 тамыз аралығында өтуі тиіс болатын. Бірақ коронавирус пандемиясы салдарынан бір жылға, яғни 2021 жылғы 23 шілде – 8 тамыз аралығына ауыстырылды. «Ауыстыру құнын әлі де есептеу қажет. ХОК бірнеше жүз миллион долларды құрайтын қосымша шығындарға ұшырайтындығын қазірдің өзінде ақ айтуға болады»,- деді Бах.
</blockquote>
&nbsp;ХОК ауқымды қаржы шығындарына ұшырамауы үшін Олимпиада-2020 ауыстыруға ұзақ уақыт келісім бермеген болатын. Ең ауыр шығынға батып отырған Жапония, бұл ел бүгінгі күні шамамен 12 млрд доллардан астам қаржы жұмсап үлгерді. Сарапшылардың бағалауынша, Ойындарды кейінге шегеру жарнама берушілерге де оңай түспей отыр, олар шамамен 1 млрд доллардан айырылуы мүмкін. Бұған қоса ұлттық олимпиада комитеттерінің және ойынға қатысатын елдердің әлі есептелмеген шығындары да бар.

ХОК: Токио Олимпиадасын ауыстыру бірнеше млн доллар шығынға ұшыратады

<a href="https://kyzylorda-news.kz/">Kyzylorda-news.kz.</a> Уханьда көліктер ақылы автомобиль магистральдары арұылы шығу бекеттерінде кезек орнатып, жолаушылар пойызға отырып, қаладан кетуге асығуда, деп хабарлайды <a href="http://russian.news.cn/2020-04/08/c_138955661.htm">Синьхуа</a>.
Қытайдың орталық бөлігінде орналасқан алып қалада ертеңнен бастап COVID-19 коронавирусын одан әрі таратпас үшін енгізілген шектеулер алынып, 11 аптаға созылған карантин аяқталады.
Ухань қаласының солтүстік бөлігіндегі Фухэ төлеу бекетінде көлік иелері дабылды асыға күтіп, қаладан шығуға асықты.
Уханьда жеке бизнесі бар Го Лэй көлігімен төлеу орнына сағат 20:40 шамасында келген. Онымен бірге көлікте тағы алты адам бар. Олардың барлығы үйіне қайтатын күнді күтіп жүрген.
«Мен үйге оралуды тағатсыз күтудемін», – дейді Го Лэй.
Ол – елдің шығысындағы Шаньдун провинциясының тумасы.
«Уханьда сегіз жылдан бері тұрып жатырмын. Көктем мерекесі кезіндегі демалыста туыстарым қалаға келіп, маған қажетті заттарды жеткізуге көмектесті. Эпидемия салдарынан барлығымыз осында қалып қойдық», – дейді ол.
<img src="https://kyzylorda-news.kz/wp-content/uploads/2020/04/whan-kaz-ishine.jpg" alt="" />

Уханьда бірнеше айға созылған карантин аяқталды

<a href="https://kyzylorda-news.kz/">Kyzylorda-news.kz.</a> Ресми мәліметтерге сәйкес, вирустың 200-ге жуық елде шамамен 1 миллион адамға жұққанына қарамастан, Тәжікстанда инфекция жұқтырудың бірде-бір оқиғасы тіркелген жоқ. Журналистер елге инфекцияның алдын алуға не нәрсенің көмектескенін анықтауға тырысты деп хабарлайды <a href="https://kaz.nur.kz/1848528-nelikten-tzikstanda-koronavirus-zok-bak-birnese-nska-syndy.html?utm_source=article-fragment&utm_medium=clipboard">NUR.KZ</a>.
Тәжікстанда коронавируспен ауыратын науқастардың болмауын түсіндіретін бірнеше нұсқалар бар.
Бірінші нұсқа бойынша, Тәжікстан айтарлықтай жабық ел. Бұл жерде туризм дамымаған, мемлекеттің өзі әсіресе шетелдіктер арасында танымал емес, республикада рейстер аз, ал транзиттік маршруттар мүлде жоқ. Осы факторлардың барлығы вирустың елге сырттан әкелуіне шектеу қояды. Сондай-ақ бұл елдің құрлық тереңдігінде, көлік ағындарына әсер етпей орналасқандығы атап өтілді.
Екінші нұсқа – кедейлік. Көптеген елдерде инфекцияны Еуропаға немесе Қытайға сапар шеккен азаматтар жұқтырған. Бірақ тәжіктердің басым көпшілігінің шетелге шығуға мүмкіндігі жоқ, көрші Өзбекстан, шетелде жұмыс істейтіндер үйге сирек келеді. Сондай-ақ, қазірдің өзінде елде жұқтыру оқиғалары бар деген болжам бар, алайда дәрі-дәрмектердің жетіспеуінен, тест жүйелері мен қажетті жабдықтардың болмауынан дәрігерлер дұрыс диагноз қоя алмайды. Басылым бұған дейін тәжіктер коронавируспен ауырып, иммунитеті. нығайтқан деген нұсқаны жоққа шығармайды. Осы нұсқаны қолдай отырып, қыстың алғашқы айларында Тәжікстанда атипті тұмаудың өршуі болғанын, пациенттің бірнеше күн бойы ыстығы көтеріліп, жөтеліп, құсып, ауырғаны туралы деректер келтіріледі. Ағымдағы жылдың қаңтар айының аяғында қабылданған шаралар вирустың таралуын болдырмады деп болжануда: осы уақыттан бастап елге келгендердің барлығы 2 аптаға карантинге жіберіліп, содан кейін шетелдіктер үшін шекараны толығымен жауып тастады.
Келесі нұсқа – 65 жастан асқан азаматтарға, созылмалы аурулардан зардап шегетіндерге, иммундық жүйесі әлсіреген адамдарға қатысты. Тәжікстанда олардың саны аз. Басылымның мәліметінше, туу деңгейінің жоғары болуына байланысты халықтың басым көпшілігі балалар, жастар және еңбекке қабілетті адамдар. Зейнеткерлікке шыққан адамдар тәжіктердің тек 5,4% құрайды.
Тағы бір нұсқа – тәжіктерді дін аман сақтайды. Халықтың көпшілігі күн сайын бес уақыт намаз оқитын ислам дінін ұстанады. Намаз алдында әр мұсылман дәрет алады – сақалын, ауызын, құлақтарын, қолын, аяқтарын, бетін бірнеше рет жуады. Мұндай жеке гигиена да вирустардан қорғайды.

Қазақстан және Қызылорда облысының жаңалықтары: Әлем