Жалағаш ауданыны әкімі Ардақ Ибраимовтың төрағалығымен мәжіліс өтті. Жиында мемлекеттік бағдарламалар аясында кәсіпкерлікті дамыту, халықтың әл-ауқатын арттыруға бағытталған шаралар және аймақ басшысы тарапынан берілген тапсырмалардың орындалу барысы қаралды.Мәжілісте аудан әкімі кәсіпкерлік саласының өңір экономикасындағы маңызын атап өтіп, бұл бағыттағы жұмыстарды жүйелі түрде жүргізудің қажеттігін айтты.«Кәсіпкерлік негізгі салалардың бірі болып табылады. Мемлекеттік және өңірлік бағдарламалар аясында шағын және орта бизнесті бастауға және дамытуға бағытталған жеңілдетілген несие қаражаттары мен мемлекеттік гранттар арқылы қаржыландыру, сондай-ақ жұмыспен қамтудың тиімді тетіктерін кеңейту бойынша нақты міндеттер жүзеге асырылуы тиіс, – деді А.Ибраимов.Сонымен қатар, «Ауыл аманаты» жобасының іске асырылу барысы да қаралды. Аталған жоба аясында 2025 жылы «Байқоңыр» әлеуметтік-кәсіпкерлік корпорациясы» АҚ арқылы жалпы сомасы 166,5 млн теңгені құрайтын 33 жоба қаржыландырылып, нәтижесінде 35 жаңа жұмыс орны құрылды.Жиын қорытындысы бойынша тиісті сала басшыларына, сондай-ақ кент және ауылдық округ әкімдеріне мемлекеттік бағдарламалардың тиімді орындалуын қамтамасыз ету, кәсіпкерлік бастамаларды қолдау және тұрғындардың табысын арттыру бағытында нақты тапсырмалар берілді.

Кәсіпкерлікті дамыту мәселелері қаралды 

Қармақшы ауданының әкімі Жандос Еркінбек бекітілген кестеге сәйкес аудан тұрғындарын жеке мәселелері бойынша қабылдап, ұсыныстарын тыңдады.Қабылдауға жазылған 20-ға жуық азаматтар тұрғын үй және ауыз су мәселелерін айтса, енді бірі тұрақты жұмысқа орналыстыру жөнінде талаптарын жеткізді. Тұрғын үй қажеттілігімен келген адамдарға аудан тұрғындарын баспанамен қамту әр санат бойынша жүргізілетіндігі түсіндірілді. Сондай-ақ тұрақты жұмыс сұрап келген азаматтарға мамандығына сәйкес және қоғамдық жұмысқа орналасу бойынша жауапты бөлім басшыларына заң шеңберінде барлық мүмкіндіктерді қарастыруды тапсырды.Жеке қабылдау барысында Жандос Еркінбек көтерілген әрбір мәселелерді сала мамандарымен бірге мұқият зерделеп, айтылған өтініш пен ұсыныс бойынша жауапты басшыларға нақты тапсырмалар жүктеді.

Тұрғындарды қабылдап, өтінін-тілектерін тыңдады

<a href="https://kyzylorda-news.kz/">Kyzylorda-news.kz</a> Бүгін, араға он жыл салып, туған жеріме сағынышымды арқалап қайтып келемін. Топырағында аунап, балалықтың бал дәуренін кешкен қасиетті өлкемде алтын ұя мектебімді бітірген соң студенттік шағымды осында өткіздім. Жүрегімдегі үлкен үміт пен асқақ арман мені осы қалаға жетеледі. Арманыма ақырын қадам басқаныммен, бөтен ортаға сіңіп кету алғашқы кезде маған оңайға соқпады.Жаңа орта, жаңа адамдар. Бәрі де маған беймәлім. Сол беймәлімдіктің ішінде өзімді табуға тырыстым. Бейімделу қиын болмады, себебі мені қабылдаған ортада жылулық та, қолдау мен шабыт та қатар жүрді. &nbsp;Бірақ, Сыр елі − жыр еліме аңсарым ауып тұратын. &nbsp;Елде қалған әке-шешем мен бауырларым болса, жазғы демалыстарында маған асығатын. Студенттік шақтың қарбалас өміріне бой алдырып, қолым тимеген соң ата-анамды қасыма шақыртып, осында тұрақтап қалуын өтінетінмін. Алайда үлкен кісілер бұл жақтың тұрмысына бейімделе алмайтындарын айтып, қоныс аударуға келіспеді. Сөйтіп, жылына бір мәрте ғана келіп, мені баладай еркелетіп, сағыныштарын басып қайтатын. Әр сапарында Қызылорданың иісі сіңген естеліктер мен түрлі сыйлықтарын ала келетін.Таңғы 6-ға таяп қалғанда келе жатқан пойыз дауысын естіп, жадырап тұрмын. Осы күнді маңдайыма жазған Аллаға шүкір айтып, келіп жеткен пойызға қарай адымдадым. Жүрегім алып-ұшып, қызық сезімдемін. Берілген орныма жайғасып пойыз жүре бастағанда терезеден қарап тұрып, табиғатпен үнсіз қоштастым. 10 жыл бойы бауырына басып, мені көтере білген жер анаға рақметімді айттым.…Мен шексіз бақытты адаммын. Қанша жыл жырақта жүрсемде, барлық ғажайып жерді көрсем де кіндік қан тамған жерге ешқандай жер тең келмейтінін ұғындым. Пойыз дыбыс беріп, Қызылорда вокзалына тоқтағанда екі аяғымнан жан кетіп, өзімді қалықтап ұшқалы тұрған құс секілді сезіндім. Арқалаған дорбаммен сыртқа түсіп, тізерлеп отыра қалдым да аспанға қарап, армансыз ауасын жұттым. Көптен күткен сәтте, мені сағынышпен күткен достарым мен туыстарым қуанышпен қарсы алды. Табаным туған жердің қасиетті топырағына тиген сәтте жүрегім толқып, риясыз шаттыққа бөлендім. Бәріміз бірге, асықпай қара шаңыраққа бет түзедік.«Туған жерім Қызылордам! Сен мен кеткелі біраз өсіп, өзгеріпсің. Бала кезде ойнаған аулаға ғимараттар салыныпты. Елден қалмай көркейіп келе жатқаныңды көріп қуандым. Ата-анамның сені тастап кете аламайтынын да түсінгендеймін. Бұрын мен жүрген жолдарға жарық қосылып, жайнатып жіберіпті. Мені кешір! Жыл сайын келіп сәлем бермегенім үшін кінәлімін», − деп, түнде масахана ішінде жатып, туған жеріме ақтарылдым.Таң шапағы біліне бергенде қораздың шақырған даусынан ояндым. Көз салсам, басына ақ орамалын таққан анам таза ауамен тыныстап, қоңыр самаурын қасында шәйін ішіп отыр екен. Ал, аула ішінде әкем малға жем-шөп беріп, күндегідей еңбегіне қызу кірісіпті. Қарбаласы толастамайтын үлкен шаһарда шаршап, таңды әрең атыратынмын. Ал, туған жерімнің қоңыр самалы мен саф ауасы жанымды сергітіп, қиындықсыз ояндым. Тұра сала, анамның алдына жатып балаша еркелеп, басымды сипатқан соң, әкеме қарай беттедім. Ол кісі ұзақ жылдар бойы мал шаруашылығымен айналысып келеді. Өзінің жаны сүйіп, жақсы көріп жасағандықтан шаршадым демейтін. Міне, осыдан 10 жыл бұрын көрген көрінісімді қайтадан көріп тұрғаныма көздерім риза. Қора қопсытып, тамақтандырып жатқан әке жанына келгенімде «құлыным» деген сөзінен кішкентай балаға айналғым келді..Түс ауа үйге достарым келіп, көлікпен табиғаттың әсем жерлерін араладық. Алысып ойнаған тұстарға келіп ұзақ кідіріп, сол шақтарды көз алдымнан өткізіп «қайта келмес күндерім-ай »,− деп ауыр күрсініп, келесі аялдамаға тартамыз. Бұрын көше басына жетпей үлкен төмпешік құмдар төгіліп тұрушы еді. Жаз мезгілінде жалаң аяқ бассаң шекеңе дейін терлеп, табаныңды күйдіреді. Сол бір төмпешіктердің орнында қазір зәулім үйлер сап түзеп тұр. Иә, бұл көркейіп әсем қалаға айналғанының белгісі болса да, бала кезімнің ыстық кезеңдері жойылғандығын ойлап көңілім жабырқайды..Әкемнің маған сыйлаған асыл тұқымды аты бар. Бұрын өзім қарап, баптайтынмын. Арман қуып кетер шағымда Құлагерді қимай, біраз қиналғаным әлі есімде. Қорадағы жалғыз үйшікте меңірейіп тұрған Құлагеріме жақындап, жібектей жалынына алақанымды тигізіп біраз тұрдым да, жанарындағы мөлдір дүниеге ұзақ үңілдім. Мені күтіп әбден сағынған секілді. Жанары жасқа толып, тұмсығын иығыма арта берді. Қақпаны ашып, соңыма жетектедім де, үйден аса бергенде үстіне шабармандар секілді мініп, шаба жөнелдім. Сол кездегі маңдайдан ескен самал желмен, шаңның иісін айтсаңшы…Осылайша мен ұзақ жыл бойы аңсап күткен шаққа жетіп, бұрын атауы Ақмешіт болған туған өлкем Қызылордама келіп, жаңа бастамаларға жол аштым. Қайда жүрсем де, жүрегім тулап, шын мәнінде рақаттанып демалатын жерім – осы қасиетті мекен екенін бүкпесіз айта аламын. Жылдар жылжып, ғасырлар алмасса да, өзіндік тарихы бар Сыр елі – менің мәңгілік мақтанышым. Өзге қалада жүргенде өзің өндіретін ақ күріштен ас әзірлеп, сенің топырағыңнан біткен дақылды ысырап қылмайтын едім.Қарақат Ыдырыс,Қорқыт ата атындағы Қызылорда университетінің4-курс студентіФото: freepik.com

Балалықтың ізімен...

«AMANAT» партиясының «Кітап – AMANAT» партиялық жобасы аясында аудандық партия филиалының және аудандық кітапхананың бірлесе ұйымдастыруымен ақын, Қазақстан Жазушылар одағының Қызылорда облыстық филиалының төрайымы, «Сырдария ауданының Құрметті азаматы» Қаршыға Есімсейітовамен кездесу өткізілді.Кездесуді «AMANAT» партиясы Сырдария аудандық филиалының Атқарушы хатшысы Ақтөре Ибрагимұлы ашып жүргізді. Іс-шараға аудан әкімінің орынбасары Димаш Байдушев, ақын, халықаралық «Алаш» әдеби сыйлығының иегері Қатира Жәленова, «Тоқтыбаев» бастауыш партия ұйымының төрайымы Жанна Сәркеева, аудандық мәдениет және тілдерді дамыту бөлімінің басшысы Анар Қалдыбаева, ауданның зиялы қауым өкілдері, ардагерлер, кітапхана оқырмандары, «Руханият» орталығында орналасқан мекемелердің басшылары мен қызметкерлері, партия мүшелері қатысты.Іс-шара барысында ақынның өлдері оқылып, оның сөзіне жазылған әндер шырқалды. Сонымен қатар өмірі мен шығармашылығына арналған бейнефильм көрсетілді. Кездесу соңында ақынға құрмет көрсетілді.Ардақты ақындар аудандық партия филиалы мен аудандық кітапхана ұжымына «Кітап – AMANAT» партиялық жобасы аясында бірлесе ұйымдастырған кездесу кеші үшін шынайы алғыстарын айтты.

Ардақты ақынмен кездесу кеші өтті

Облыс әкімі Нұрлыбек Нәлібаев Orhun Medical компаниясы жаңа медициналық орталығының жұмысымен танысты. Орталықтың негізгі бағыты – позитронды-эмиссиялық томография мен компьютерлік томографияны біріктіретін жоғары технологиялық диагностика. Бұл онкологиялық ауруларды ерте анықтауға, дерттің таралу деңгейін бағалауға және емдеу тиімділігін бақылауға мүмкіндік береді.Аталған диагностикалық қызметті алу үшін өңір тұрғындары &nbsp;Алматы және Астана қалаларына баратын. Енді бұл қызмет тұрғылықты жері бойынша көрсетіледі. Медициналық орталықтың жобалық қуаты жылына 3 500 ПЭТ/КТ, 16 000 магниттік-резонанстық томография, 20 000 компьютерлік томография, 25 000 рентгенологиялық зерттеу және 10 000 маммография жүргізуге есептелген.Қызылорда қаласындағы орталықтың ашылуы Orhun Medical компаниясының Қазақстан өңірлерінде жоғары технологиялық онкологиялық көмекті дамытуға бағытталған жобасының екінші кезеңі болып саналады. &nbsp;Ұлытау, Түркістан, Ақтөбе тұрғындарына да қызмет етеді. Бірінші кезеңде Ақтау қаласында осындай орталық іске қосылған. Зерттеулер тегін мемлекеттік кепілдендірілген &nbsp;көлемі аясында жүргізіледі.Бұдан бөлек, медициналық орталықта халыққа МРТ, КТ, рентгенография, маммография, ультрадыбыстық диагностика, бейінді мамандардың кеңестері, зертханалық зерттеулер және емшара бөлмелерінің қызметтері қолжетімді болады. Орталық ақпан айында ашылады деп жоспарлануда.

Архив

Кәсіпкерлікті дамыту мәселелері қаралды

Тұрғындарды қабылдап, өтінін-тілектерін тыңдады

Балалықтың ізімен...

Ардақты ақынмен кездесу кеші өтті

Аймақ басшысы медициналық орталықтың жұмысымен танысты