Қазақстан Республикасының Президенті Қасым-Жомарт Тоқаев қазақстандықтарды Астана күнімен құттықтады.<blockquote>Құрметті отандастар! &nbsp;Астана күні құтты болсын! &nbsp;Биыл бұл мереке Домбыра күнімен тұспа-тұс келіп отыр. Мұның символдық мәні зор. Қазақтың қасиетті қара домбырасы Ұлы даланың мыңжылдық бірегей мәдени мұрасын әйгілейді. Ал елордамыз Қазақстанның тұрақты әрі қарқынды өсіп-өркендеуін және жасампаз ұлттың жарқын болашаққа ұмтылысын айшықтай түседі. Бүгінде Астана – еліміздің қоғамдық, саяси және іскерлік ордасы. Дәл осы жерде халқымыздың болашағына қатысты маңызды шешімдер қабылданады, озық идеялар іске асырылып, биік мақсаттар орындалады. Мұнда білімпаздық пен еңбекқорлық құндылықтары берік орнығып, жұртымыздың ынтымағы мен келісімі нығая береді. Астана Орталық Еуразияның жауһары, заманауи Қазақстанның келбеті саналады. Халықаралық қауымдастық бас қаламызды бітімгершілік бастамаларды жүзеге асырып, жаһандық диалог орнату ісінде ерекше рөл атқаратын бейбітшілік шаһары ретінде біледі. Елордамыз әрдайым түбегейлі өзгерістер мен ауқымды реформалардың бастауында тұрады. Алдағы уақытта да Астанамыз Әділетті, Таза және Қуатты Қазақстанды құру жолындағы жалпыұлттық жаңғыру жұмыстарына ұйытқы бола береді деп сенемін. &nbsp;Сүйікті қаламыз өркендеп, гүлдене берсін! Баршаңызға зор денсаулық, бақ-береке тілеймін, – деді.</blockquote>

Мемлекет басшысы барша қазақстандықтарды Астана күнімен құттықтады

Бүгін облыс әкімі Нұрлыбек Нәлібаевтың төрағалығымен өткен мәжілісте тұрғындардың өз-өзін бақша дақылдарымен қамтамасыз етуі үшін жер бөлу, пісімшілік кезінде өнімдерін өткізуге жәрдемдесу мәселелері талқыланды.Аймақ басшысы аудан әкімдеріне, жауапты басқармаларға бақша өнімдерін егуге жер бөлуді жыл сайын ұлғайту, суару жүйелерін жетілдіру және өнімді өткізу тізбегін ұйымдастыру жөнінде нақты тапсырмалар берді.<blockquote>“Тұрғындардың сұранысын ескеріп, &nbsp;қосымша жер телімдерін анықтау керек. Ауылдық округтерде бос жатқан жерлерді келесі егін маусымында тиімді пайдалану үшін түгендеу жұмыстарын жүргізіңіздер. Егістік жерлерге су жеткізу үшін &nbsp;каналдар мен арықтарды тазалау, жөндеу және қажет болған жағдайда жаңадан қазу қажет”,- деді Нұрлыбек Нәлібаев.</blockquote>Айта кету керек, аймақта азық-түлік қауіпсіздігін қамтамасыз ету үшін облыс әкімінің тапсырмасына сәйкес 2022 жылдан бері жергілікті тұрғындар әлеуметтік маңызы бар картоп, көкөніс, бақша өнімдерін ұжымдасып еге бастады.Биыл облыс бойынша 5 100 отбасыға бақша егу үшін 3 300 гектар жер дайындалды, 866 гектарға &nbsp;картоп, 885 гектарға көкөніс, 1 550 гектарға бақша дақылдары егілді.Өткен жылы 3 179 гектар жер дайындалып, &nbsp;картоп 917 гектарға, көкөніс 817 гектарға, бақша 1 446 гектарға егілген болатын.Қазір нарықта Жаңақорған қарбызы сұранысқа ие. Биыл Жаңақорған ауданының &nbsp;Ақүй және Жайылма ауылдық округтерінде 1500 гектарға қарбыз егілді. Бүгінде жергілікті диқандар ерте пісетін қарбыз өсірудің барлық әдіс-тәсілін толық меңгерген. &nbsp;Көшетті алдымен ауладағы жылыжайда өсіріп, кейіннен ашық алқапқа көшіру әдісін қолдануда.Биыл қарбыз ерте пісіп, нарыққа шығарылды. Қазіргі таңда 1500 тоннаға жуық қарбыз сатылып, оның 700 тоннасы көрші Ресейге экспортталды. Қалғаны еліміздің солтүстік өңірлеріне жөнелтілді.Қызылорда облысы әкімінің баспасөз қызметі

Биыл 3300 гектар жерге бақша егілді

Елордада 4 шілде күні &nbsp;"Астана Бас жоспары" ҒЖЗИ" ЖШС және ARCHICA халықаралық медиа платформасының қолдауымен URBAN TALKS ASTANA іс-шарасы ұйымдастырылды.Астанада бас қосқан сарапшылар диалогы 8 шілдеде Қызылордада өтетін Ұлттық Урбан форумы – 2025 аясындағы іс-шаралардың алғашқы қадамы болды. "Астана Бас жоспарының" макеттеу залында Қазақстандағы қалаларды дамытудың тәсілін қайта форматтау идеялары сараланды.Кездесу хедлайнерлері:Гарри Доббс – халықаралық деңгейдегі сәулетші, Harry Dobbs Design-нің негізін қалаушы (Ұлыбритания), оның дизайны Лондоннан Эр-Риядқа дейінгі мегаполистерді қамтиды. Мақсаты – стратегиялық жоспарлау мен креативті индустрияларды қала құрылысына тартуға бағдарланған. • Юрий Милевский – Novaya Labs аналитикалық компаниясының негізін қалаушы (CEO). Қалалардағы тәуекелдерді бағалау және инновацияларды басқару саласы бойынша сарапшы. Компания құрылғанға дейін ол ЭЖМ ҒЗУ Урбанистика жоғары мектебіндегі жетекші академиялық позицияларда болды.Спикерлер қазақстандық қалалардың алдында тұрған сын-қатерлер мен перспективаларды саралады, болашақ пікірталастар тақырыптары белгіленіп, нақтыланды. Халықаралық тәжірибе мен жергілікті контексті интеграциялау мәселелеріне баса мән берілді.URBAN TALKS ел Астанасы мен өңірлері арасындағы өтпелі кәсіби диалогтың маңызды бөлігіне айналмақ. URBAN TALKS ASTANA мен алда өтетін Қызылорда форумы – урбанистік сын-қатерлерді түсіну мен оларды шешудің нақты тетіктерінің логикалық байланысын қамтамасыз етпек.8 шілдеде Гарри Доббс пен Юрий Милевский Ұлттық Урбан – 2025 форумының бейінді сессияларында сөз сөйлейді, сондай-ақ "Қазақстанның қалалық күн тәртібін өңірлер деңгейінде іске асыру" тақырыптық сессиясына "Астана Бас жоспары" ҒЗИ" АҚ жанындағы урбанистика орталығының басшысы Данияр Чиндалиев қатысады.Ұлттық Урбан форумы – 2025 БҰҰ-ның елдімекендер бойынша бағдарламасының (ЮН-Хабитат) аясында Қызылордада өтеді. Ол үш деңгейлі іс-шаралар жүйесінің бір бөлігі болып табылады. Атап айтқанда: • Ұлттық урбан-форумдар жергілікті диалог пен шешімдерді әзірлеуге арналған &nbsp;өңірлік платформа; • Елдерді географиялық орналасуы бойынша &nbsp;біріктіретін өңірлік кеңестер; • Дүниежүзілік қалалар форумы (World Urban Forum) — тәжірибе алмасуға және қалаларды тұрақты дамыту саласында халықаралық күн тәртібін қалыптастыруға арналған жаһандық алаң.

URBAN TALKS ASTANA: Қалалардың болашағы туралы халықаралық диалог — Қызылордадағы Ұлттық Урбан форумына жол

Қызылорда қаласында Ұлттық Домбыра күні аясында Мырза Тоқтаболатұлының 175 жылдығына арналған «Сыр толқыны» II Республикалық күйшілер конкурсы өтті. Сыр елінде екінші рет өтіп жатқан өнер додасына республикамыздың 10 өңірінен талантты 24 талапкер қатысып, өзара бақ сынады.Байқауға күй өнерінің танымал шеберлері, күйші-композитор, Құрмағазы атындағы Қазақ ұлттық консерваториясының профессоры, «Құрмет» орденінің иегері, академик Төлепберген Төреахметұлы, күйші-композитор, Абай атындағы Қазақ Ұлттық педагогикалық университетінің оқытушысы, профессор, Қазақстанның еңбек сіңірген қайраткері Ерболат Жұмашұлы, Қазанғап атындағы музыкалық жоғары колледжінің директоры, Қазақстанның еңбек сіңірген қайраткері, профессор Мүсілім Балтабайұлы, күйші, Қазанғап атындағы музыкалық жоғары колледжінің оқытушысы, «Ерен еңбегі үшін» медалінің иегері Әлімжан Нағызханұлы, күйші, Қорқыт ата атындағы Қызылорда университеті «Педагогика және дәстүрлі өнер» институтының оқытушысы, ҚР «Мәдениет саласының үздігі» төсбелгісінің иегері Алдияр Шағдатұлы қазылық етті. Қазақстанның әр өңірінде қалыптасқан күйшілік дәстүр мен оны таратып жеткізушілер бас қосқан күйшілер конкурсы Сыр бойы күйлерін қайта жаңғыртып, жергілікті күйші-композиторлардың мұрасын жас жеткіншектерге насихаттау арқылы халқымыздың көне, фольклорлық-этнографиялық домбыра аспабын меңгеруде кәсіби шеберліктеріне ықпал жасау, өнерпаздар қатарын дарынды, жаңа буын өкілдерімен толықтыруға мол мүмкіндік берді.Байқау қорытындысымен, III орын Ерімбет Орынбасаров (Арал ауданы), Мадияр Жасаңбаев (Қармақшы ауданы) және Алтынай Махмутқа (Қарағанды қаласы) &nbsp;бұйырса, Жәнібек Жұмабаев (Маңғыстау облысы) пен Айшолпан Қасымова (Астана) II орын иегері атанды. Жүлделі I орынды Саят Нұрәли (Алматы облысы) қанжығасына байласа, үздіктердің үздігі атанған жерлесіміз Махамбетхан Досымжан байқаудың Бас жүлдесін жеңіп алды.Өнер аламанында қарсыластарынан оқ бойы оза шапқан Серік Асқар (Шымкент қаласы), Әбілжан Тәттімбет (Жамбыл облысы), Көшербай Мұхамеддин (Қызылорда қаласы), Жұмағали Серік (Алматы қаласы) және Кенгесбаева Жұлдызайға (Алматы қаласы) байқаудың арнайы жүлдедері табысталды.Домбыра – халқымыздың рухани болмысының, дүниетанымы мен мәдениетінің алтын діңгегі. Күй – дәстүрлі өнеріміздің күрделі тармағы. Мерейлі мерекеде өткен өнер додасы сан ғасырлық саралану мен сұрыпталу дәуірінен өткен күйшілік өнердің жана толқынын анықтап, жас дарындардың өнерін өрістетуге жол ашты.

Республикалық күйшілер байқауы қорытындыланды

Облыстық қоғамдық даму басқармасының ұйымдастыруымен ХІ «Айбын» Халықаралық әскери-патриоттық жастар жиынына қатысқан жас сарбаздықтардың ата-аналарына құрмет көрсету мәжілісі өткізілді.Шараға «Сыр жастарының генералы» номинациясының иегері, «Облыстық Невада-Семей» қоғамдық бірлестігінің төрағасы, ардақты ардагеріміз Әбіш Сабит Ыдырысұлы, &nbsp;Қызылорда қалалық «Чернобыль» қоғамдық бірлестігінің төрағасы Шахатов Жұмабек Алиханұлы, &nbsp;Қызылорда облысының қорғаныс істері жөніндегі департаменті бастығының тәрбие идеологиялық жұмыстары бойынша &nbsp;орынбасары Искакова Нэлля Нәбиқызы, &nbsp;Қызылорда облысы бойынша Таулы Қарабақтағы этносаралық қақтығыстарды реттеуге қатысқан, ұрыс қимылдарының ардагерлері» қоғамдық бірлестігінің төрағасы Төлегенов Болатбек Шымбайұлы, «Сыр айбындары» командасы мүшелерінің ата-аналары қатысты.Ақтөбе облысында өткен ХІ Халықаралық «Айбын» әскери-патриоттық жастар жиыны Ұлы Жеңістің 80 жылдығы мен қазақтың батыр қызы Әлия Молдағұлованың 100 жылдық мерейтойына арналды. Аталған жиынға Қазақстан, Әзірбайжан, Беларусь, Қырғызстан, Ресей және Өзбекстан елдерінің жастары да қатысты.50 –ге жуық команда 800-ге жуық жас қатысқан додада біздің облысымыздың абыройын арқалаған жастарымыз төртінші орынды қанжығаға байлады.Шара соңында қатысушыларға сыйлықтар табысталып, естелік суретке түсті.

Жас сарбаздардың ата-аналарына құрмет көрсетті 

Парламент Мәжілісінің депутаты, «AMANAT» партиясы фракциясының мүшесі Мархабат Жайымбетов Қазалы ауданына жұмыс сапарымен келді. Халық қалаулысы сапар аясында «Қамқор Вагон» ЖШС-нің Қазалы вагон жөндеу депосында жаңадан іске қосылған дөңгелек жұптарын күрделі жөндеу цехының жұмысымен танысты.Аталған учаске 2025 жылдың сәуір айында пайдалануға берілген. Жоба «Қамқор Вагон» компаниясының ұзақ мерзімді даму стратегиясы аясында жүзеге асып, жүк вагондарының жөндеу сапасы мен сенімділігін арттыруды көздейді.Депутат жаңа өндірістік учаскені аралап, орнатылған заманауи жабдықтармен, оның ішінде екі режимді престеу қондырғылары, өлшеу және бұзбай бақылау құралдары, механикаландырылған жұмыс орындары және жинақтау-бөлшектеу аймақтарымен танысты.«Мұндай өндірістік жобалар еліміздің көлік-логистика саласын дамытуда маңызды рөл атқарады. Бұл – өңір үшін де үлкен қадам. Жүк тасымалының тиімділігін арттырып қана қоймай, жергілікті тұрғындар үшін жаңа жұмыс орындарын ашуға және тұрақты табыс көзін қамтамасыз етуге мүмкіндік береді», – деді халық қалаулысы.Кәсіпорын қуаттылығы жылына 3000 дөңгелек жұпты күрделі жөндеуден өткізуге есептелген. Бұл өндірістік қуат тапсырыс берушілердің сұранысын толық өтеуге мүмкіндік беріп, вагондарды жөндеу мерзімін едәуір қысқартады.Айта кетейік, цех жұмысымен танысу барысында депутат сол жерде қызмет атқаратын жұмысшы мамандармен де пікірлесті. Ол теміржолшыларды еліміздің көлік жүйесінің сенімді жұмысын қамтамасыз етіп отырған негізгі күш ретінде атап өтті. Сондай-ақ Мемлекет басшысының 2025 жылды "Жұмысшы мамандықтар жылы" деп жариялауы – өндірісте табанды еңбек етіп жүрген азаматтардың қоғамдағы рөлі мен мәртебесін арттыруға бағытталған маңызды қадам екенін жеткізді.&nbsp;

Депутат жұмысшы мамандармен кездесті

Облыс әкімі Нұрлыбек Нәлібаев Парламент Мәжілісінің депутаты Мұрат Әбенов және облыстық мәслихат төрағасы Мұрат Тілеуімбетовпен бірге сол жағалаудағы шағын өнеркәсіптік аймақтың жұмысымен танысты. Өткен жылдан бері Өнеркәсіп және құрылыс министрлігімен бірлесіп, өңірлерде шағын өнеркәсіптік аймақтар құру үшін жүйелі жұмыс жүргізілуде. Биыл сол жағалаудағы «Тұмар» жеке кәсіпкерлігі мен «Техоснастка-Ремсервис» ЖШС-нің базасында шағын өнеркәсіптік аймақ іске қосылмақ. Жобаның жалпы құны – 1 млрд 52 млн теңге.<img src="https://knadmin.beoblood.kz/uploads/malaya_promyshlennaya_zona_foto_oblakimat_2b14006001.jpg" alt="малая промышленная зона фото облакимат.jpg">«Тұмар» ЖК құрылыс жұмыстарын толық аяқтап, 1,9 мың шаршы метр нысан аумағын абаттандыруда. Қазіргі таңда 682 шаршы метр аумаққа 7 жоба орналастырылуда. Атап айтқанда, сүт өнімдерін өндіретін шағын цех, кондитерлік өнімдер, нан-тоқаш бұйымдары мен жартылай фабрикаттар өндіретін екі цех іске қосылмақ. «Техоснастка-Ремсервис» серіктестігі де құрылыс жұмыстарын толық аяқтаған. Жалпы ауданы – 1,9 мың шаршы метр.<img src="https://knadmin.beoblood.kz/uploads/malaya_promyshlennaya_zona_foto_oblakimat_2_c612c684ee.jpg" alt="малая промышленная зона фото облакимат 2.jpg">Айта кету керек, шағын өнеркәсіптік парк – жалға алушы кәсіпорындардың өндірістік қызметін жүзеге асыруына барлық жағдай жасалған арнайы аймақ. Мұнда қажетті инфрақұрылым, инженерлік желілер, өндірістік, қойма және әкімшілік ғимараттар толық қарастырылған.<img src="https://knadmin.beoblood.kz/uploads/malaya_promyshlennaya_zona_foto_oblakimat_3_a355b184d6.jpg" alt="малая промышленная зона фото облакимат 3.jpg">

Аймақ басшысы өнеркәсіптік жобалардың жай-күйімен танысты 

Арал ауданына жұмыс &nbsp;сапарымен келген ҚР Парламенті Мәжілісінің депутаты,"AMANAT" партиясы фракциясының мүшесі Жайымбетов Мархабат Жайымбетұлы жуырда ашылған «Руханият» орталығының жұмысымен танысты.Халық игілігіне берілген орталықта музей, кітапхана, мұрағат, неке қию залы, ардагерлер және аналар, жастар &nbsp;орталығы мекемелері орналасқан. Ғимарат ішіндегі мұражайда &nbsp;11600 экспонат сақталған.Сонымен қатар, кітапханада 112 мың кітап қорынан тұратын 2 үлкен оқу залы &nbsp;жалпы 7700 оқырманды қамти алады. Сондай ақ, архив бөлімінде жалпы 233-қор дерек, 62342 – сақтау бірлігі бар. Оның ішінде елімізге белгілі тұлғалардың 24 жеке тектік қоры, 781-сурет құжаттары сақталған.Фракция мүшесі орталықтың атына сай ұлт руханияттың алтын діңгегіне айналуын сәттілік тіледі.&nbsp;

Арал: Мәжіліс депутаты руханият орталығының жұмысымен танысты 

Облыс әкімі Нұрлыбек Нәлібаев Парламент Мәжілісінің депутаты Мұрат Әбенов және облыстық мәслихат төрағасы Мұрат Тілеуімбетовпен бірге Қызылорда қаласындағы білім беру мекемелерінің құрылыс барысымен танысты.<img src="https://knadmin.beoblood.kz/uploads/stroitelstvo_shkoly_Foto_oblakimat_3_7c0896436e.jpg" alt="строительство школы Фото облакимат 3.jpg">Алдымен СПМК-70 мөлтек ауданындағы 1500 орындық жаңа мектептің құрылыс алаңында болды. Бас мердігер &nbsp;“Integra Construction KZ” серіктестігі құрылыс-монтаж жұмыстарын аяқтауға жақын. Ғимараттың қабырғалары толық қаланып, іші әрленуде, инженерлік жүйелері орнатылуда. Құрылысқа 11 инженер-техникалық қызметкер, 183 жұмысшы және 6 техника жұмылдырылған.Арай мөлтек ауданындағы &nbsp;1500 орындық мектептің де құрылысы қарқын алған. Бас мердігер “Абу-Сер” серіктестігі ішкі әрлеу, есік-терезе орнату, жылу жүйелерін монтаждау және аулаға инженерлік желілерді тарту жұмыстарын атқаруда. Құрылыс басында 10 инженер, 185 жұмысшы еңбек етуде, 22 техника іске қосылған. Мектеп тамыз айында пайдалануға беріледі деп жоспарлануда.<img src="https://knadmin.beoblood.kz/uploads/stroitelstvo_shkoly_Foto_oblakimat_2_e0d2933cb3.jpg" alt="строительство школы Фото облакимат 2.jpg">

Облыс әкімі білім ордаларындағы құрылыс жұмыстарын көрді

Қармақшы ауданында бұқаралық ақпарат құралдары қызметкерлері арасында Қармақшы ауданы әкімінің жүлдесіне арналған шағын футболдан облыстық турнир өз мәресіне жетті.Жарыс қорытындысы бойынша I орынды – «Меншікті тілшілер» командасы, II орынды – «Сыр медиа» ЖШС командасы, III орынды – «Qyzylorda.tv» командасы жеңіп алды. Жүлдегер командаларға арнайы дәрежелік дипломдар мен қаржылай сыйлықтар табысталды.Сонымен қатар, турнир барысында ерекше көзге түскен ойыншыларға «Үздік қақпашы», «Үздік ойыншы», «Үздік шабуылшы», «Үздік қорғаушы»номинациялары бойынша марапаттар тапсырылды.Жарысқа белсене қатысқан басқа командаларға да алғыс хаттар табысталды.

БАҚ өкілдері арасында футбол турнирінің жеңімпаздары анықталды

Шілденің бірінші жексенбісі – қазақ халқының мәдени коды мен рухани болмысының бір бөлігіне айналған Ұлттық Домбыра күні. Бұл – дәстүр мен тарихты, өнер мен ұрпақ сабақтастығын ұлықтайтын маңызды күн, деп хабарлайды <a href="Бүгін – Ұлттық Домбыра күні https://share.google/CnYWYprLH7azgX60r">BAQ.KZ</a>.Мемлекеттік деңгейде атап өтілетін бұл мереке 2018 жылы бекітілді. Содан бері еліміздің түкпір-түкпірінде бұл күн ұлттық рух пен өнерге тағзым ретінде кең көлемде аталып келеді.Домбыра – қазақ халқының рухани жан дүниесінің бейнесі. Ол – тарихтың, ерліктің, мұң мен қуаныштың, ел мен жерге деген махаббаттың үнін жеткізетін қасиетті аспап.Қос ішекке қонған күй – ата-бабаларымыздың аузынан ауызға жеткен шежіре іспетті. Күй – тек музыкалық туынды емес, ол – ой, философия, көзқарас, ұлттың жан дауысы.Халқымыз "Нағыз қазақ – қазақ емес, нағыз қазақ – домбыра" деп тегін айтпаған. Бұл – домбыраның ұлт болмысындағы орнын дәл бейнелейтін сөз.Ұлттық домбыра күніне қарай еліміздің барлық өңірлерінде, облыс орталықтары мен ауыл-аймақтарда түрлі мәдени шаралар ұйымдастырылуда:<ul><li>Домбыра флешмобтары мен күй марафондары;</li><li>Ашық аспан астындағы концерттер;</li><li>Жас күйшілер байқауы мен домбыра шеберлерінің көрмесі;</li><li>Қолөнер жәрмеңкелері, күй шеберханалары мен ұлттық киім фестивальдері.</li></ul>Бұған дейін Қазақстан Президенті Қасым-Жомарт Тоқаев қазақстандықтарды Ұлттық домбыра күнімен құттықтап, өскелең ұрпақтың домбыраға деген ықыласы ерекше екенін атап өткен болатын.Домбыра – ұлттың жаны мен жүрегінің үні. Ұлттық Домбыра күні – ұлттық мәдениеттің қадірін білу, өткенге тағзым, болашаққа бағдар. Бұл – рухани жаңғырудың, ұлттың біртұтастығы мен өнерге деген құрметтің көрінісі.

Архив