<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев Қазақстан халқын Жеңіс күнімен құттықтады. Бұл туралы <a href="https://www.akorda.kz/kz/memleket-basshysy-kasym-zhomart-tokaevtyn-zhenis-kunimen-kuttyktauy-841425">Ақорда</a> мәлім етті.<blockquote>– Құрметті отандастар! Сіздерді Ұлы Жеңістің 80 жылдығымен шын жүректен құттықтаймын! Осы мерейлі күнді еліміздің әрбір азаматы ерекше көңіл-күймен қарсы алып, Жеңімпаз аға буынға шексіз ризашылығын білдіреді. &nbsp; Фашизмге қарсы сұрапыл соғыс халқымызға орасан зор қайғы-қасірет әкелді. Біздің қаһарман жауынгерлеріміз асқан ерлік пен батылдық танытып, азаттық пен әділдік жолында аянбай күресті. Жүз мыңдаған сарбазымыз ұрыс даласында қаза тапты. Тылдағы жұрт та адам айтқысыз қиындыққа қарамастан тынымсыз тер төгіп, Жеңісті жақындатуға өлшеусіз үлес қосты. Олар егіс алқабында, зауыттар мен фабрикаларда күн-түн демей жұмыс істеп, майданды қамтамасыз етті. Біз отандастарымыздың қайтпас қайсарлығы мен қажырлы еңбегін ешқашан ұмытпаймыз. Жанқиярлық пен ерліктің озық үлгісін көрсеткен батырларымыздың есімін әрдайым ұлықтаймыз. Ардагерлерімізге қамқорлық жасап, қолдау білдіреміз. Қазақстанда Жеңіс күніне орай көптеген іс-шара өткізіліп жатыр. Еліміз бойынша бес жүзге жуық көшені қаһарман ерлеріміздің атымен атау туралы шешім қабылданды. Ауқымды әскери шеру өтті. Мұның бәрі зұлмат соғыстың зардабын халқымыз ешқашан жадынан шығармауы үшін қажет. Біз Жеңіс күнінде бейбіт өмірдің қадірін ұғынып, достық пен тыныштықтың маңыздылығын терең түсінеміз. Осы мызғымас құндылықтар әрдайым халқымыздың әл-ауқатын арттырудың және Қазақстанды тұрақты дамытудың берік негізі болып қала береді. Мен бұған кәміл сенемін. Қадірлі ардагерлерімізге және барша отандастарымызға зор денсаулық, бақ-береке тілеймін! Ұлы Жеңіс күні құтты болсын, – деді.</blockquote>Фото: Ақорда

Мемлекет басшысы қазақстандықтарды Жеңіс күнімен құттықтады

<a href="https://kyzylorda-news.kz/">Kyzylorda-news.kz</a> Арал ауданында 9 мамыр – Жеңіс күніне арналған салтанатты шара өтті. Жеңістің 80 жылыдығына арналған мереке алдымен бабаларды бір минут үнсіздікпен еске алумен басталды.Мұнан соң майдан даласында шейіт болған жауынгерлер мен ел қорғаған батырлардың рухына арналып Құран бағышталды.<img src="https://knadmin.beoblood.kz/uploads/Ta_zym_etu_3_b7811777a0.jpg" alt="Тағзым ету 3.jpg">Салтанатты шарада аудан әкімі Аманжол Оңғарбаев сөз алып, аудан тұрғындарын мерекемен құттықтады.<blockquote>– Құрметті ағайын, қадірлі жерлестер! 9 мамыр – Ұлы Жеңістің 80 жылдығы құтты болсын! Күллі жерді қанға бөктіріп, қанша шаңырақтың отын өшірген Ұлы Отан соғысының жеңіспен аяқталғанына биыл 80 жыл. Батыр боздақтарымыздың азаматтық арды ту етіп, мұздай қаруланған жаудың екпініне тойтарыс беруі шексіз батырлық. Уақыт өткен сайын мұндай ерліктің шоқтығы биіктеп, қадір-қасиеті даралана бермек. Жаугершілік заманнан жалғасқан ел үшін, жер үшін болған қанды шайқастардың барлығында батырлар ерлігінің жарқын үлгісі жаңғырып жатыр. Осыдан 80 жыл бұрын аяқталған алапат соғыстың да сондай салмағы бар. Халқымыздың құрметке лайық қаһармандығы мен қайтпас қажыр-қайратының айнымас үлгісіне айналған Жеңіс күні баршаңызға құтты болсын, - деп ізгі лебізін білдірді.</blockquote><img src="https://knadmin.beoblood.kz/uploads/Ta_zym_etu_2_2642188691.jpg" alt="Тағзым ету 2.jpg">Шара соңы майдан даласында Отанын қорғап, көзсіз батырлық пен қайсарлық көрсеткен батыр бабалар мен боздақтар ескерткішіне гүл қою рәсімімен жалғасты.<img src="https://knadmin.beoblood.kz/uploads/Ta_zym_etu_4_66bd5a192d.jpg" alt="Тағзым ету 4.jpg">Фото: Арал ауданы әкімінің баспасөз қызметі

Архив

Мемлекет басшысы қазақстандықтарды Жеңіс күнімен құттықтады

Батыр боздақтардың рухына тағзым етті