<a href="https://kyzylorda-news.kz/">Kyzylorda-news.kz</a> Астана қаласындағы EXPO Конгресс-орталығында 25-26 сәуір күндері ENACTUS KAZAKHSTAN NATIONAL EXPO 2024 мектеп оқушылары мен студенттік кәсіпкерлік ұлттық кубогы өтеді. Қазақстанның барлық өңіріндегі мектеп оқушылары, колледждер және ЖОО студенттері, сондай-ақ бизнес және білім беру саласындағы көшбасшылары бас қосатын байқауда Қорқыт ата атындағы Қызылорда университетінің студенттері де бақ сынамақ. Жалпы көрмеге 200-ден астам команда қатысады деп жоспарлануда.Былтыр чемпионатқа 100-ден астам команда қатысқан болатын. Бұл командалар оқу жылы бойы әлеуметтік-кәсіпкерлік, экологиялық және инновациялық жобаларды әзірледі.&nbsp;Білім сайысының нәтижесінде Қарағандыдан келген ENACTUS BUKETOV UNIVERSITY кубок иегері атанды. Команда ұлттық чемпионы атағымен қоса Нидерландының Утрехт қаласында өтетін&nbsp; ENACTUS World Cup 2023 кубогында өнер көрсетуге жолдама алды.&nbsp;<blockquote>«ENACTUS – лидерлік, кәсіпкерлік және&nbsp; дербестік мектебі. 15 жыл ішінде біз талантты және мақсаты биік балаларға студенттік жылдардан бастап табысты мансап пен бизнес құруға мүмкіндік беретін тұтас әлеуметтік институтты құра алдық», – деді бағдарлама жетекшісі, &amp; CEO ENACTUS KAZAKHSTAN президенті Альбина Ержанова.</blockquote>Былтыр «Enactus Korkyt Ata university» командасы экологиялық табиғи таза өнім әзірледі. Олар «Active seat» көрпешесін күріш қауызынан жасап шығарды.<blockquote>«Қазіргі уақытта адамдар уақытының көбін отырып жұмыс істеумен өткізеді. Бұл денсаулыққа үлкен зиян келтіріп, көптеген аурудың пайда болуына себепші болады. Осы орайда, біз ыңғайлы әрі денсаулыққа пайдалы «Active Seat» көрпешесін шығаруды қолға алдық. Өнімнің басты компоненттерінің бірі &nbsp;– күріш қауызы. Өңірімізде жыл сайын 100 тоннадан астам күріш қалдықтары полигондарда өртеледі. Бұл процесс табиғатқа да, адам денсаулығына да айтарлықтай кері әсерін беруде. Жобамыз – аймағымыз үшін де, тұрғындар үшінде пайдалы», – &nbsp;деді «Enactus Korkyt Ata university» командасының капитаны Темірлан Абжанов.</blockquote>Сондай-ақ, Enactus Korkyt ata ұйымы өткен жылы 5-8 сынып оқушыларына тегін қаржылық сауаттылық курсын жүргізді. Бұл сабақтар KMF&amp;KMF-Демеу Корпоративтік қорының «FINBOSS» қаржылық сауаттылық негіздері» аясында өтті.Ал биыл жаңа идеялар мен стартаптардың басы-қасында жүретін студенттер жаңа инновациялық жобаға қызу дайындық үстінде.ENACTUS KAZAKHSTAN NATIONAL EXPO 2024 - Қазақстандағы ENACTUS халықаралық бағдарламасының қатысушыларының жоба бойынша нәтижелерінің жыл сайынғы көрмесі. Іс-шараға демеуші компаниялардың көрмесі, бос орындар жәрмеңкесі, іскерлік кездесулер, питчинг және қатысушыларға арналған арнайы байқаулар кіреді.Басты оқиға студенттік кәсіпкерліктің ұлттық кубогының финалы болып табылады, оның нәтижелері бойынша жеңімпаз команда ENACTUS WORLD CUP 2024 әлем чемпионатында Қазақстанның намысын қорғау құқығын алады.ENACTUS тарихында әлемдік кубоктар Лондон, Париж, Йоханнесбург, Пекин, Вашингтон сияқты қалаларда өтті, биыл Дүниежүзілік біріншілікті өткізу құқығын біздің еліміз жеңіп алды. Бірінші рет ТМД-да, атап айтқанда, Қазақстанның елордасы Астана қаласында үздік студенттік бизнес - жобалардың Әлемдік кубогы өтеді.Ауқымды сайыстың ұйымдастырушысы – ENACTUS Kazakhstan қоры. Ал ресми демеушілер – Olzha Agro, KMF&amp;KMF-Демеу, TURAN табиғи суы, Eurasian Resources Group, Raimbek Group, KT Cloud Lab, White&amp;Case, Caravan Resources, Kazakhstan Mining, TSSP, KazAgroFeed, ABS Строй, Leader Еngineering group, NES Kazakhstan. Ресми серіктестер – "Kazakh Tourism" Ұлттық компаниясы" АҚ, "Атамекен" ҰКП, ҚР жоғары білім және ғылым министрлігі.Бағдарлама бойынша World Cup League: ENACTUS Ұлттық кубогы, ENACTUS World Cup 2024 әлемдік кубогына жолдама үшін басты байқау алаңы, Early Stage League: ерте кезеңдегі жобалар байқау алаңы, ENACTUS #NextGenLeaders Мектеп кәсіпкерлігінің V Республикалық чемпионаты, Колледж студенттері арасындағы ENACTUS Kazakhstan кубогы өткізілмек.&nbsp;ENACTUS KAZAKHSTAN Ұлттық кубогында жас көшбасшылар 17 ТДМ-ға қол жеткізуге бағытталған әлеуметтік-кәсіпкерлік, экологиялық және инновациялық жобаларды көрсетеді.

ENACTUS KAZAKHSTAN NATIONAL EXPO 2024: Ауқымды байқауда қызылордалық студенттер бақ сынайды

Биылдан бастап балаларды бірінші сыныпқа қабылдау тәртібіне өзгеріс енгізілді.Тиісінше, Egov.kz «Электрондық үкіметтің» веб-порталы арқылы шағын мөлтектегі білім беру ұйымдарын автоматты түрде таңдау қарастырылған. Осы арқылы сынып жинағы да автоматты түрде жинақталады. Сондай-ақ, «электронды үкімет» порталы арқылы білім беру ұйымымен келісім шарт электрондық форматта жасалатын болады. Жалпы, облыста бірінші сыныпқа құжат қабылдау 1 сәуір мен 31 тамыз аралығында жүргізіледі. Бұл жөнінде Өңірлік коммуникациялар қызметінің ақпарат алаңында облыстық білім басқармасы басшысының орынбасары Бағдат Бердаулетов хабарлады.<blockquote>-Осы жылы бірінші сыныпқа құжаттарды қабылдау мерзімі 31 тамызға дейін ұзартылды. Қазіргі таңда балаларды бірінші сыныпқа қабылдау тәртібіне енгізілген өзгеріске байланысты ата-аналарға тиісті түсіндірме жұмыстары жүргізілуде. Ал білім беру ұйымдарында арнайы E-gov өзіне-өзі қызмет көрсету бұрыштары жасақталған. Биыл облыс бойынша 2024-2025 оқу жылына 17 448 бала бірінші сыныптың табалдырығын аттайды деп жоспарлануда. Оның ішінде қазақ тілінде оқитын оқушылар саны – 16 345 бала болса, орыс тілінде білім алатын балалар саны – 1 103 құрайды. Дегенмен, балалардың мектепке дайындығы да аса маңызды. Осы ретте, балабақша немесе білім беру ұйымдарының даярлық тобында тәрбиеленбеген балалар үшін тамыз айында өңіріміздегі барлық мектептерде дайындық сыныптары жұмыс істейтін болады. Бұл өз кезегінде оқушылардың қыркүйек айынан бастап сабақ процесіне кедергісіз енуіне мүмкіндік жасамақ, - деді Бағдат Қамбозұлы.</blockquote>Қызылорда қаласында үш тілде оқытатын дарынды балаларға арналған мамандандырылған сыныптары бар білім беру ұйымдарында үш ауысымды оқытудың алдын алу үшін қажетті шаралар қабылданды. Мәселен, аталған білім беру ұйымдарына қосымша құрылыс нысандары салынып, балалардың санына орай сынып кабинеттері жасақталды. Сондай-ақ, бірінші сыныпқа қабылдау реттілігі 9,11 сынып бітірушілердің санына қарай сынып жинақтау тапсырылды.Фото: Нұрболат Нұржаубай

Бірінші сыныпқа құжат қабылдау тәртібі өзгерді

Айтбек Амангелді қарындасы Салтанат Нүкенова осы уақыт аралығында бір рет ғана түсіне кірген екен. Түсінде Салтанат аян берген, - деп хабарлайды Sadaqmedia.kz.Қазір қарындасының есімін қараламай, оның өліміне себепкер болған адамдар заң түрінде қатаң жазалануына барын салуда. Еліміздің білікті адвокаттары көмекке келіп, күн сайын сот процесінде мүдделерін қорғап келеді. Одан бөлек, қаншама қазақстандық марқұмның ағасына жан-жақты қолдау білдіріп келеді.Айтбек Амангелді Дана Орманбаеваның «Дай слово» бағдарламасына берген сұхбатында түсінде Салтанатты көргенін айтты. Айтуынша, түсі өте анық, ұзақ және шын өмірдегідей болған.&nbsp; «Түсімде Салтанатты іздеп жүр екенмін. Неге екенін білмеймін, алдымен университетке барып, іздемекші болдым. Бірақ мені ішіне кіргізбеді. Сол кезде жаныма бір адам келді, бірақ оның түрі жоқ, бұлыңғыр көлеңке сияқты. Күзет бізді Салтанаттың оқытушысына жібергісі келмеді. Жанымдағы образ басқа жолмен баруды ұсынды. Біз оқытушының кабинетіне кіріп, сөйлескіміз келсе, ол үндемей отыр. Жанымдағы адамның көлеңкесі оқытушыға алма ұсынды, жемісті алып, жей бастаған соң, бізбен сөйлесе бастады. Сол сәтте күзет бізді тауып алды. Біз қашып барамыз. Университет бір шыңда орналасқандай. Биікке қарай қашып барамыз, күзет бізді қуып келеді. Төменде сай орналасқан, ол жерде бұлақ ағып тұр. Төменге апаратын жол тік орналасқан. Төменге қарай сумен сырғанап түсіп барамыз. Төменде құдық бар сияқты, бұлақтың суы сол жерге құйылады екен. Жанымдағы көлеңке әрі қарай кетіп қалды, ал мені сол құдыққа сорып әкетті. Су өте суық, мұздай. Қолдарым мен денем суық судан қақсап барады. Әрі қарай бір ауылға тап болдық. Ол жерде үйлер өте көп, жан-жағында жануарлардың барлық түрлері жүр. Ауыл балшыққа толы, өте лас. Жанымдағы көлеңке мені белгілі бір үйге апара жатыр. Алдымыздан әдемі той өткізетін ғимарат шықты. Аппақ мәрмәр тастан жасалған. Ішіне кірсек, барлық адамдар мерекелік киім киіп алған, барлығы шетінен әдемі. Алдымыздан тағы бір есік ашылғанда, бір топ әдемі жас қыздар шықты. Арасында Салтанат бар. Қолынан ұстап, қайда жүрсің, мен сені іздеп жүрмін, дедім. Ата-анамызға хабарласып, сені тапқанымды айтайын дедім. Телефонымды алып, суретке түсірмек болдым. Суретке түсіп, телефоныма қарасам, суретте менен басқа ешкім жоқ. Салтанат сол сәтте жанына бір әйелді шақырды. Меніңше, ол да менің жанымдағы көлеңке сияқты. Салтанат мені басқа бір балаларға арналған бөлмеге апарды. Төртеуміз кірдік. Сол кезде мен одан не болып жатқанын түсіндіруді сұрадым. Жанындағы әйел менің білмеу керектігімді айтты. Салтанат ол әйелге менің білу керектігімді, мен түсінбей жүргенімді түсіндіріп жатыр. Кейін өзі түсіндіре бастады. Дауыстар мен әріптер айтылып жатыр, бірақ мен не айтып жатқанын түсінбеймін. Кейін ол қолымен екі санды жазып көрсетті. 11 санын жазды. Мен жазып алдым. Сол сәтте желкемнен біреу қысып ұстап, жұлып шығарды. Мен оянып, төсегімнен атып тұрдым», - деп баяндады түсін.&nbsp; Бұл түсті ағасы қараша айының ортасында көрген. Көргенін жақын адамымен бөліскен. Ол әйел мешітте жұмыс істейді. Айтуынша, ол әйелдің өлген адамдардың рухымен сөйлесе алатын қасиеті бар. Салтанат оған жерлеу рәсіміне қатысып, сөз сөйлеуді сұраған екен.Кеше, яғни 11 сәуір күні Қазақстан парламенті тұрмыстық зорлық-зомбылық туралы заң қабылдады. Аталған заң әйелдер мен балалардың қауіпсіздігін күшейтеді.Осы тұста Айтбек Амангелді түсінде көрген сол екі санды «11» деп өзінше жорамалдады. Ойынша, Салтанат оған аян берген.11 саны:11 қараша – Салтанат жер қойнына тапсырылды;11 наурыз – Бишімбаевтың ісі бойынша алдын ала тыңдалым өтті;11 сәуір #Салтанатзаңы қабылданды.«Енді не болады? Тағы бір айтылмаған дүние бар. Оны сот отырысы аяқталған соң айтамын», - деп жазды Айтбек Амангелді.

"Салтанат аян берді". Айтбек Амангелді өз жорамалын айтты

Мемлекет басшысы Су тасқынына қарсы іс-шараларды үйлестіру және су тасқыны салдарын жою жөніндегі республикалық штабтың отырысын өткізді.Қасым-Жомарт Тоқаев қазіргі уақытта ахуал әлі де өте күрделі екенін атап өтті.Оның айтуынша, бес аймақта, яғни Атырау, Батыс Қазақстан, Шығыс Қазақстан, Ақмола және Солтүстік Қазақстан облыстарында су тасқынының екінші толқыны болуы мүмкін.Қалған алты облыста, атап айтқанда, Қостанай, Қарағанды, Ақтөбе, Абай, Павлодар, Ұлытауда жағдай тұрақтала бастаған.Мемлекет басшысы адамдарды дер кезінде қауіпсіз жерге көшіру және қарғын судан зардап шеккен азаматтарға қажетті көмек беру қазіргі басты міндет екеніне назар аударды. Президент өзінің тапсырмасы бойынша мемлекеттік материалдық резервтен арнаулы техника және басқа да жабдықтар алуға рұқсат етілгенін айтты.<blockquote>— Мен шығынды өтеу үшін тиімді тәсілдер қарастыру жөнінде нақты тапсырма бердім. Бұл мақсатқа бюджет қаражатымен қатар «Қазақстан халқына» қоры мен ірі бизнес өкілдері бөлген қаржы жұмсалады. Сондай-ақ тағы бір өте маңызды мәселе. Бұл — су басқан аймақтардағы эпидемиологиялық ахуал. Жағдайды қатаң бақылауда ұстау қажет. Көктемгі егіс науқанына да дайындалу керек. Су астында қалған елді мекендерде ешқандай заң бұзушылыққа жол бермеу қажет. Менің тапсырмаммен Үкімет басшысы және оның орынбасарлары қазір аймақтарда жүр. Олар жағдай тұрақталғанша барлық жұмысты үйлестіреді, елмен бірге болады, — деді Қасым-Жомарт Тоқаев.</blockquote>Мемлекет басшысы табиғи апаттан зардап шеккен аймақтардағы азық-түлік қауіпсіздігі мәселесін айрықша бақылауда ұстау және бағаның өсуіне жол бермеу қажет екеніне тағы да назар аударды.&nbsp; Сондай-ақ азаматтар үшін әуе және темір жол көліктеріне билеттің қымбаттауына жол беруге болмайтынын ескертті.<blockquote>— Үкімет пен әкімдіктер зардап шеккен адамдарды орналастыру, оларға қажетті көмек беру мәселелерін тез арада шешуге тиіс. Қазір бұл жұмыстар атқарылып жатыр. Эвакуациялық пункттердегі жағдайды тұрақты бақылауда ұстау керек. Жоғалған құжаттарды қалпына келтіру, құқықтық және психологиялық көмек көрсету пункттерін жедел ұйымдастыру қажет. Айтпақшы, жоғалған құжаттар да проблема болады. Адамдар үйлерін асығыс тастап кетті. Құжаттарын қалпына келтіруге көмектесу керек. Жағдай өте күрделі аудандарда қоғамдық штабтар орналастырылып, түсіндіру жұмыстары жүргізілсін, — деді Президент.</blockquote> Жиын барысында Денсаулық сақтау министрлігіне Ауыл шаруашылығы министрлігімен бірге еліміздегі санитариялық-эпидемиологиялық және эпизоотиялық жағдайға бақылауды күшейтіп, тәулік бойы мониторинг жүргізу, сондай-ақ көппәтерлі үйлерге, әлеуметтік және басқа да нысандарға дезинфекция жасау жөнінде тапсырма берілді.Су тасқынына байланысты жұқпалы аурулардың таралып жатқаны және эпидемиологиялық жағдайдың нашарлағаны туралы әлеуметтік желілерде жарияланған ақпарат расталмады.Өнеркәсіп және құрылыс министрлігіне тұрғын үйлерді, әлеуметтік инфрақұрылымды, коммуналдық шаруашылық нысандарын қайта қалпына келтіру жұмыстарын үйлестіру үшін жедел топ жасақтау жөнінде тапсырма берілді.&nbsp;<blockquote>— Су басқан өңірлердің әкімдері қажетті қаржыландыру туралы есепті жедел штабқа тез арада беруі керек. Сондай-ақ аумақты қоқыстан, қираған үйлер мен құрылыстардың үйінділерінен тазартқан жөн. Зардап шеккен өңірлерге Ауыл шаруашылығы, Көлік, Денсаулық сақтау, Су ресурстары, Төтенше жағдайлар, Экология, Ғылым және жоғары білім вице-министрлерін жіберу қажет. Айтпақшы, су тасқынына ұшырамаған өңірлерде менің тапсырмаммен «Таза Қазақстан» науқаны басталды. Мен әкімдердің бәріне бұл бірреттік науқан емес екенін ескерттім. Басқаша айтқанда, сенбілікке шығып, жұмыс істеген сыңай танытып, көзбояушылық жасауға болмайды. Көршілес елдердегі секілді бізге де Қазақстанды көгалдандыру, өңірлер мен қалалардың аумақтарын тазарту жұмыстарын үнемі жүргізу керек, — деді Қасым-Жомарт Тоқаев.</blockquote>Мемлекет басшысы азаматтар үшін тұрғын үйлерді қалпына келтіру жұмыстарына нақты уақыт режимінде мониторинг жүргізу жөнінде тапсырма берді. Сондай-ақ жыл соңына дейін су тасқынына қарсы шараларды басқарудың ұзақмерзімді стратегиясын анықтап, тиісті бағдарламалық құжаттарды қабылдау міндетін жүктеді.Жиын барысында Премьер-Министр Олжас Бектенов, Төтенше жағдайлар министрі Шыңғыс Әрінов, Өнеркәсіп және құрылыс министрі Қанат Шарлапаев, Денсаулық сақтау министрі Ақмарал Әлназарова, Ауыл шаруашылығы министрі Айдарбек Сапаров, Атырау облысының әкімі Серік Шәпкенов, Ақтөбе облысының әкімі Асхат Шахаров, Батыс Қазақстан облысының әкімі Нариман Төреғалиев, Қостанай облысының әкімі Құмар Ақсақалов, Солтүстік Қазақстан облысының әкімі Ғауез Нұрмұхамбетов, Шығыс Қазақстан облысының әкімі Ермек Көшербаев, Маңғыстау облысының әкімі Нұрлан Ноғаев баяндама жасады.

Архив

ENACTUS KAZAKHSTAN NATIONAL EXPO 2024: Ауқымды байқауда қызылордалық студенттер бақ сынайды

Бірінші сыныпқа құжат қабылдау тәртібі өзгерді

"Салтанат аян берді". Айтбек Амангелді өз жорамалын айтты

Президент: Таза Қазақстан — көзбояушылық жасайтын сенбілік емес