<a href="https://kyzylorda-news.kz/">Kyzylorda-news.kz.</a> Жаңақорған ауданы аумағында автомобиль жолдарының жалпы ұзындығы 451 шақырымды құрайды. Оның 101 шақырымы республикалық, 157,9 шақырымы облыстық және 192,1 шақырымы аудандық маңыздағы автомобиль жолдары санатында. Сонымен қатар, 26 кент және ауылдық округтің 526 көшесі 586,4 шақырым болады. «Ауыл – ел бесігі» бағдарламасы бойынша 2023 жылы елді мекендердің жалпы ұзындығы 64,15 шақырым 54 көшесін орташа жөндеуге кірісті.<blockquote>«2023 жылы аудан көлеміндегі автомобиль жолдары мен елді мекен көшелерін жөндеуге 869,4 млн теңге қаржы қаралды. Оның ішінде, республикалық бюджеттен – 264,2 млн, облыстық бюджеттен – 174,4 млн және аудандық қазынадан – 430,8 млн қаражат жұмсалуда. Оған қоса биыл 2 көпірді жөндеу жұмыстары жүргізілуде. Дегенмен, аталмыш жобаларды толық аяқтауға облыстық бюджеттен 181,8 млн теңге қажет», – деді бөлімнің бас маманы Дәулет Оразәліұлы.</blockquote>Биыл 4 ауылға кіре беріс жолдар қайта жаңғыруда. Соның бірі – «Самара-Шымкент-Аққұм» автомобиль жолы орташа жөнделуде.– 2022 жылы жөндеу жұмыстарын жүргізуге республикалық және облыстық бюджеттен 174,7 млн теңге бөлініп, мемлекеттік сатып алу конкурсы жүргізілді. Сөйтіп «Жаңақорған Жібек жолы» ЖШС-мен келісім-шарт жасалған. Мердігер тарапынан бүгінгі күнге автомобиль жолына асфальт төсеу жұмыстары жобаланып, қазан айында пайдалануға беріледі. Одан бөлек, «Самара-ШымкентТалап», «Самара-ШымкентҚыраш» және «Тау самалы лагеріне кіре беріс» автомобиль жолын орташа жөндеу жүргізілуде.– Дұрыс, дегенмен бақылауды күшейту маңызды. Бұл бойынша қандай жұмыстар атқарылуда?– 2021 жылы көшелердің жөндеу жұмыстарының сапасын бақылау мақсатында «Жол активтерінің сапасы ұлттық орталығы» Қызылорда облысының филиалымен аудандық бюджет есебінен 6,1 млн теңгеге келісім шарт жасалды. Келісім шарт шегінде Жаңақорған кенті көшелері мен аудандық маңызы бар «Самара-Шымкент-Жайылма», «Кеңес-Бесарық су қоймасы» автомобиль жолдары, Сүттіқұдық ауылдық округі Ш.Торғаев көшесі, Талап ауылдық округі Темір жол көшесі, Қожамберді ауылдық округі, М.Көкенов және Шадиков көшесінің құрылыс материалдарына зертханалық сынамалар жүргізілді.Биыл жоғарыда айтылған аудандық маңыздағы 4 жолдың сапасы мен құрылыс материалдарына сараптама жүргізу үшін «Жол активтерінің сапасы ұлттық орталығы» РМК Қызылорда облыстық филиалымен 7,3 млн теңгеге келісім шарт жасалды. Зерттеу жұмыстарының құрамында: қиыршық тас құрамын анықтау, асфальттың суға қанығуын, тапталуын, қысымға төзімділігін анықтау жұмыстары қамтылған. Сондай-ақ, материалдардың ЖСҚ-да көрсетілген материалға сәйкестігін тексердік.– Сапасы қалай енді?– Иә, қазір барлығы қырағы қадағалауда. Кезіндегі кеңшілік жоқ қазір, сапалық өлшем маңызды. Сондықтан биылғы жұмыстарға әзірге көңіл толады. Ал, кент ішіндегі ой-шұқырлы көшелер де ретке келтіріледі. Алдағы жоспарға тоқталсақ, 2014 жылы орташа жөндеу жүргізілген «Самара-Шымкент-Екпінді» автомобиль жолының 4-6 шақырымы мен 2015 жылы орташа жөндеу жүргізілген «Әбдіғаппар-Төлегетай-Хорасан ата» автомобиль жолының 9-12 шақырымы орташа жөндеуді талап етеді. Сондықтан аталған жолдарды орташа жөндеу жобасметалық құжаттамасын әзірлеуге және ведомствалық сараптамадан өткізуге – 4 млн 792,1 мың теңге қаржы сұралуда.Сондай-ақ, «Ауыл – ел бесігі» бағдарламасы бойынша 2023 жылы елді мекендердің жалпы ұзындығы 64,15 шақырым 54 көшесін орташа жөндеуге 1 598 197,9 мың теңге қаржыға бюджеттік өтінім Қызылорда облыстық жолаушылар көлігі және автомобиль жолдары басқармасына ұсынылды.Жауапты маманның айтуынша 2023 жылы 17 елді мекеннің ұзындығы 21,1 шақырым көшелерін жөндеуге аудандық бюджеттен 430,8 млн теңге қаржы қаралған. Қазіргі уақытта Әбдіғаппар ауылының А.Құнанбаев, Аққұм ауылының С.Базарбаев, Ақсуат ауылының Ш.Құдайберді көшесінің жөндеу жұмыстары аяқталып, пайдалануға берілді. Жыл соңына дейін барлық көшелердің жөндеу жұмыстары аяқталады екен.Қалай десек те, жол сапасының сын көтеруі ең маңызды іс. Сондықтан, жауапты мамандарға ғана сенім артпай, жергілікті жұрт та бейқам қалмауы тиіс. Әсіресе, көше асфальттарына сол көшенің тұрғындары жауаптылық танытса игі. Қорыта айтқанда, құзырлы органдар құзыреттілігін білдіргенімен, біз бенсіз де білек сыбана бақылауға кіріссек бітпейтін іс болмайды. Ендеше, уақыт оздырмай салынып жатқан жолға мән беріңіздер.

Жаңақорғанда «Ауылым ел бесігі» бағдарламасы аясында жұмыстар қарқынды жүруде

<a href="https://kyzylorda-news.kz/">Kyzylorda-news.kz.</a> &nbsp;ХХІ ғасырда адами капиталға басымдық берген елдер озады. Осыны ескерген ел үкіметі дәстүрлі оқытуды кезең-кезеңімен жаңартылған оқу бағдарламасымен байытуға ұмтылуда. Бұл бойынша мұғалім креативті ойлап, өзінің оқу-әдістемелік құралын қалыптастырып, заманауи жаңалықтарды меңгеріп, ұлттық таным дағдыларымен ұштастырып, жасөспірімдерге сапалы білім беруі тиіс. Бағдарлама бойынша ең жоғары саты – «Педагог-шебер». Жаңақорған ауданында аталмыш біліктілікті меңгерген ұстаздар бар.&nbsp;Алдымен педагог шебердің кім екенін сараласақ. Педагог-шебер – оқытушылық және тәрбие жұмысымен айналысушы, оқу-тәрбие қызметінің технологиясын еркін меңгерген, бірнеше жыл бойы жоғары нәтижеге қол жеткізген тұлға. Демек, ол ұстаздық жолда ең жоғары дәрежедегі маман. Өз ісінің нағыз шебері екенінің айқын дәлелі.Ауданда «Педагог – шебер» біліктілігін алған үш ұстаз бар. Соның бірі – Гүлнар Сабырханқызы. Ол саналы ғұмырының 30 жылға жуығын бала оқытуға арнап, өзінің еңбекке құштарлығымен дараланып келеді. Еңбек жолын №3 мектеп-интернаттан бастаған мұғалім бүгінде осы білім ошағында тәжірибесі толысқан білікті ұстаз. Әріптестеріне мұғалімдік өнердің қыр-сырын бөлісіп, үйретуден жалыққан емес.<blockquote>«Бүгінгі білім беру саласының басты бағыты – білім мазмұнына жаңалық енгізудің тиімді әдісін іздестіру мен оларды жүзеге асыра алатын жаңашыл мұғалімдерді даярлау. Яғни бәсекеге қабілеттілікті арттыру. Ұстаз оқушыға тек мәлімет беру¬мен шектелмей, әрбір ақпараттың мәні мен маңызын түсіндіріп, жан-жақты білімділікке тәрбиелеу керек. Білім реформасына енген жаңашылдықты толық меңгеріп, оны ұрпақтың санасына сіңіруде біліктілігі мен білімін сарқып жұмсауы тиіс», – дейді білікті ұстаз.</blockquote>Гүлнар Әлібекова ұстаз болу тынымсыз ізденісті талап ететін мамандық екенін әуел бастан түсініп, осы бағытта жұмысын тоқтатпай, ізденісін арттырды. Нәтижесінде ол «EDTECH-KZ» Халықаралық білім орталығының, «LEARNING GROUP» Қазақстандық ғылым білім беру орталығының, облыстық білім басқармасы басшы¬сының арнайы «Алғыс хатына» ие болды. Қызылорда облысы білім басқармасының мемелекеттік тілді дамытуға арналған облыстық байқауда ІІ дәрежелі грант иегері атанды. Басты жетістігі – «9 сынып негізінде қазақ тілінің стилистикасын оқытудың әдіс-тәсілдері» атты авторлық кітабы қолданыста жүр. Аудандық тамыз мәслихатында Гүлнар Әлібекова білім беру саласындағы ерекше еңбегі үшін ҚР Білім және ғылым министрілігінің «Құрмет» грамотасымен марапатталды.Білім беру саласында нәтижелі жұмыс жасап, биік белестерді бағындырған ұстаздың бірі – Ләззат Жұмабекова. Ол №163 орта мектепте тарих пәнінің мұғалімі. Сыр өңірінен республикалық аттестацияға қатысқан 17 мұғалімнің ең үздігі танылып, «Қазақстан Республикасы білім беру ісінің Құрметті қызметкері» атанды. «Шебер ұстаз» деңгейін еншілеген мұғалім жаңашылдығының арқасында шәкірттерге тәлімді тәрбие беріп, еңбегі еленіп құрметке бөленді. Үнемі ізденісте жүретін үлгілі ұстаз өзі еңбек етіп келе жатқан 27 жылдық тәжірибесінде бірнеше рет біліктілік арттыру курстарынан өтіп, елімізде білім мазмұнын жаңарту бойынша жүріп жатқан реформаның сәтті жүзеге асуына үлесін қосып, оқушылармен бірге мектеп мұғалімдерінің де кәсіби деңгейінің көтерілуіне ықпал етіп келеді. Ең алғаш болып ауданда «Оқу мен жазу арқылы сыни тұрғыдан ойлауды дамыту технологиясы», «Назарбаев Зияткерлік мектептері» педагогикалық шеберлік орталығы мен Кембридж университетінің Білім беру факультеті әзірлеген бағдарлама бойынша біліктілік арттыру курстарының I(ілгері) деңгейін оқып бітірді. ҚР білім мазмұнын жаңарту шеңберінде «Қазақстан тарихы» және «Құқық негіздері» пәндері бойынша біліктілігін арттыру курсынан өтіп, аудан мақтанышына айналған ұстаз «Түркі әлемі: Түркістан жеріндегі құрылтай» халықаралық ғылыми-практикалық конференциясында «Түр¬кілердің тоғыз тарау мәдениеті» атты мақаласы ғылыми жинаққа енді. Бұл жинаққа қазақ мұғалімдерінің үздік зерттеулері ғана енген. Осыдан-ақ, шығармашыл ұстаздың еңбегін бағамдауға болатындай.<blockquote>«Уақыт бір орында тұрмайды. Әлем дамып жатыр. Кез-келген сала маманы сол дамудан қалыспауы керек. Жаңашылдыққа бет бұрған ұстаз ғана өзін дамыта алады. Ол үшін «Оқушыға қандай білім беремін? Бүгінгі сабаққа қандай дайындықпен барамын? Бала¬ның зейінін арттыру үшін не қажет?» Осы іспетті сұраққа күнде жауап таба білуің тиіс», – дейді ұстаз.</blockquote>Айта кетейік, Ләззат Жолдасқызы бірнеше авторлық бағдарлама иесі. Оның «Тарих сабағында инновациялық технологиялар негізінде оқушылардың функционалдық сауаттылығын арт-тыру», «Мәңгілік ел идеясын тарих сабағында оқытудың маңызы», «Жаңартылған білім беру аясында тарих пәнін оқытудың ерекшеліктері» атты авторлық бағдарлама әдістемелік-нұсқаулықтары жарық көрген.Жаңашыл ұстаздың қатарында – Меруерт Мелденова да бар. Ол кенттегі №163 мкетептің география пәнінің мұғалімі. Үздіксіз орындалып жатқан әдістемелік жұмыстарының нәтижесінде еңбегі ескерілген ұстаз Білім және ғылым министрлігінің, Ыбырай Алтынсарин академиясының «Құрмет грамотасымен», «Алғыс хатымен» марапатталып, халықаралық жобаларда білімін шыңдап, «Педагог-шебер» мәртебесін алды. Білім берудің соңғы технологиясын меңгерген мұғалім карантин уақытында онлайн өткен «Дарын» ғылыми-практикалық орталығы, Ғылым және білім министрлігі мен Ыбырай Алтынсарин академиясының бірлескен телесабағына тәуелсіз сарапшы ретінде қатысып, онлайн сабақтың сапалы өтуіне өз септігін тигізді.<blockquote>«Қазіргі кезде біздің қоғамымыз дамудың жаңа кезеңіне көшті. Бұл кезең – ақпараттық кезең, яғни компьютерлік техника мен оған байланысты ақпараттық-коммуникативтік технологиялар педагогтер қызметінің барлық салаларынан көрініп, оның табиғи ортасынан өз орнын алып отыр. «Білім берудегі ақпараттық-коммуникативтік технологиялар» ұғымы «оқытудың жаңа инновациялық технологиялары», «қазіргі ақпараттық оқыту технологиялары», «компьютерлік оқыту технологиялары», «Смарт құрылғыларды белсенді түрде қолдану» тақырыптарымен тығыз байланысты. Сондықтан балаға білімді дербес үйретуіміз керек», – дейді Меруерт Жұмаділләқызы.</blockquote>Жаңашылдықпен ізденімпаздықты айнымас жолдасына айналдырған Меруерт Мелденованың ағарту саласында жеткен жетістіктері мен алған алғыстары аз емес. Біз солардың негізгісін атап өтсек. ЮНЕСКО Клубы – «EDTECH-KZ» Халықаралық білім орталығының «Педагогикалық-полилог» педагогикалық-психологиялық оқыту курсына қатысып, аудан көлемінде оқушыларды ҰБТ-ға дайындау курстарын жүргізсе, «Географиялық атаулар сыры» атты авторлық бағдарламасы бар, «Рухани жаңғыру» бағдарламасы аясында «BILIM-ÓRKENIETI» ұлттық инновациялық ғылыми-зерттеу орталығы» «Жылдың жүз үздік география пәні мұғалімі» жинағына еніп, төсбелгі тақты. Назарбаев зияткерлік мектебі Кембридж Университетімен бірлесіп әзірлеген «Деңгейлік бағдарламасы» бойынша І-деңгей курсынан өтіп сертификатталса, «Тәжірибедегі рефлексия» мектеп тренерлері курсынан өтіп сертификатталды.P.S.: «Ұстаз болу – өз уақытыңды аямау, өзгенің уақытын аялау» деп француз ойшылы Жан Жак Руссо айтқандай, мұғалім мәртебесі қашанда биік. Білім нәрін ұрпақ санасына сіңіріп, келешегімізді кемел біліммен тәрбиелеп шығару тынымсыз талпынысты талап ететіні хақ.

Жаңақорғандық ұстаздар біліктілігін арттырды

<a href="https://kyzylorda-news.kz/">Kyzylorda-news.kz.</a> &nbsp;Жаңақорған ауданы, Әбдіғаппар ауылының тұрғындары Кенжебаевтар әулеті туралы сөз қозғағанда осы мәтелдің шынайылығы еске түседі. Неге десеңіз, бұл әулеттің егесі Шерубай Кенжебаев кезінде осы ауылдың іргесін қалаған, ашаршылық кезінде өзге елдерге ауып кеткен ағайынның басын атамекенге қайта жинап, жаңа шаруашылықтың күнкөрісін тіктеп, соған өзі басшылық жасаған кісі.&nbsp;Бұл кісінің көзін көрген кісілердің аузынан басқарма Шерубайдың өте іскер, кісінің бетіне тура қарамайтын, бірақ елдің өтініш-тілегін көңілімен құп алып, тап-тұйнақтай атқаруға тырысатын ұқыпты адам болғанын талай естіп те жүрміз. Бүгіндері осы кісінің қарашаңырақтағы ұлы Серік Шерубайұлының да әке жолымен елге бас болған, өзінің қысқа ғұмырында қараша ел бетке тұтарлықтай азамат болып өткенін дәріптейтін кітап ел қолына тиіп отыр. Кітапта еңбек адамы туралы өзінің замандастары, жолдастарының естеліктері қамтылған. Сондаяқ, перзенттері де туған әкеге деген өз сағыныштарын бөлісіпті.Серік Шерубайұлы 28 наурыз 1953 жылы Жаңақорған ауданы Қыраш елді мекенінде дүниеге келген. Орта мектептен соң кеңес армиясы қатарында қызмет етіп, одан оралған соң шаруашылықта еңбек еткен. Шымкент облысы, Ванновка ауданындағы гидромелиорация техникумын су мамандығы бойынша бітіріп шығады. Еңбек жолын Задарья совхозында егіс бригадирі болып бастайды. Осы жұмысты атқара жүріп, Алматыдағы ауыл шаруашылығы институтын бітіреді. Совхозда қырман меңгерушісі, одан әрі бас агроном болып істейді. Совхоз тараған соң шаруа қожалығын құрып, соның төрағасы болды. Ол өмірінің соңғы күндеріне дейін Әбдіғаппар ауылы аталып кеткен «Қыркеңсе» елді мекенінде қызмет жасады. Қырдың басында орын тепкен Шерубай басқарма отыратын ауылдың кеңсесін кезінде жұрт осылай атап кеткен екен.Кеңестік шаруашылық жүйесі бойынша совхозда жұмыс атқарып, мамандығын жетік меңгеруі арқасында үздік орыннан танылып, социалистік міндеттемелерін асыра орындағаны үшін ауыспалы вымпелді қолдан бермей келген Серік Шерубай ұлының бригадасы ел ырыздығының еселеп артуына көп үлесін қосты.Елде тұлғалық болмысы бай, сөзі өтімді, кісілік қарымқабілетімен ерекшеленетін Серік Шерубайұлының жоқ-жұқанаға көмек қолын созып, ауыл мешітіне жүйелі қамқорлық әрекеттері жөнінде әркім-ақ айтып бере алады.Кеңестік жүйе күйреп, шаруашылықтар жекешеленген соң нарық талабына икемделуге тура келді. Серік Кенжебаев 2007 жылы «Бұқарбай» жеке шаруашылығын ашып, соның жұмысын басқарды. 2011 жылы ауылдық қоғамдастық кеңесі төрағасы қызметін атқарды. Ол ел ағасы ретінде көп мәселеге бас-көз болып, елге ортақ игіліктердің иесіз қалмауына да қамқорлығын аямаған екен. Жастар арасында өтетін түрлі жарыстардың жалғасын тауып отыруына, елді мекенде дәстүрлі түрде мерекелік шаралардың ұйымдастырылуына да қолдау көрсетіп отырыпты. Жылына екі рет «Мектепке жол» акциясына белсене қатысып, ауылдағы жағдайы төмен отбасыларына өз атынан да, өзі басқаратын шаруашылық атынан да қолұшын беруден алыс тұрмапты.Сенбі күні Серік Шерубайұлының бауырлары, балалары болып, әке атын жаңғыртып, Әбдіғаппар ауылындағы №213 мектеп базасында жаңа кітаптың тұсауын кесті. Әке атында футболдан турнир өткізді.Аталмыш шараға аудан әкімінің орынбасары Дархан Тұрсынбаев, аудандық мәслихат хатшысы Ғалымжан Сопбеков, ауылдағы зиялылар қауымы, шара иесінің перзенттері мен туған-туыс, бауырлары қатысты.Шараны ашқан Дархан Есалыұлы кезінде өз балалық шағы өткен өзінің де ауылы туралы жарқын естеліктерін айта келе, ауыл тұрғыны Серік және Алмагүл апайы туралы лебізін бөлісті. «Алмагүл апай бізге сабақ берген аяулы ұстазымыз. Өмірден өткеніне он жылдан аса уақыт өтіпті. Бірақ жарқын бейнесі біздің жүрегімізде ұзақ сақталады» – деді ол.Шара барысында Серік Шерубайұлының бауырлары Әріп және Тотыгүл, Серік пен Алмагүлдің ұл-қыздары: сәкен, Айнұр, Рүстем, Айгүл, Мұратқалидың естеліктері көптің көңілін толқытты.Жүректегі қос шырақОсы күні тұсауы кесілген «Жүректегі қос шырақ» деп аталатын кітаптың авторы осы отбасының ортаншы перзенті – Айгүл Серікқызы екен. Кітаптың мазмұны отбасы іргетасын мықты сақтау үшін қажет қағидалармен бекітіліпті. Мәселен: Балаға жақсы тәрбие берудің үш бағыты. Әулетте беделді иеленудің басты шарты. Отбасындағы қамқорлықтың жемісі деген тараулар бір ғана жанұя емес, қазақ отбасындағы құндылықтарды дәріптеуімен көпшілік көңіоінен жылы орын алды деуге болады.Осы күні ұйымдастырылған турнирде үздік ойынын көрсеткен жеңімпаздарға Шерубаевтар отбасы атынан ақшалай сыйлықтар табыс етті.

Жаңақорғанда кітаптың тұсауы кесілді

<a href="https://kyzylorda-news.kz/">Kyzylorda-news.kz.</a> &nbsp;Рок музыканың алғашқы тынысын елімізге алып келген эстрадалық әуендер ВИА вокалды эстрадалық ансамбль арқылы халықтың арасына кең тарады. Ал оның бастау бұлағына келсек, әлем музыкасын алпысыншы жылдары жаулай бастаған битломанияның әр елде болмысы бөлек болғанымен жанға жағымды, жүрекке жақын гитара аспабының жүрек қылын тербеткен сыйқырлы үні тұла бойыңды кернегенде керемет күш құйылғандай жан дүниеңді жадыратар ерекшелігі оған жаһандық қуат дарытты. Мәңгілік жастықтың жарқылындай эстрадалық жанрдың жасты да, кәріні де еріксіз елітер, құлағының құрышын қандырып, бойға қайрат пен жігер құйып, қымбат өмірге құлшындырып, көңілді көлдей тасытып, шалқытып, шабыттандырар рухани құдіреті қазақ даласында алғаш «Дос-Мұқасанмен» түлеп, тамырын кеңге жайды.Ансамбль алғаш 1972 жылы Минскіде өткен Бұкілолақтық студенттер байқауында Бас жүлдені жеңіп алды. Одан әрі Берлинде өткен Бүкілдүниежүзілік байқауда жеңімпаз атанды. Сол кездегі мықты ансамбльдер – «Песняры», «Самоцветы», «Веселые ребята» сынды өнерлі ұжымнан бірде-бір кем емес деңгейде атағын шығарып үлгерді.Тақырыбымызды ВИА-ның өз өңірімізге келу тарихынан тарқатайық. Аудан мәдениет саласының саңлағы Махмұд Әуезов ағамыз Ленинград мәдениет институты жанындағы эстрадалық студияда оқи жүріп, батыс үлгісіндегі вокалды аспаптар ансамблі құрамында тәжірибе жинақтап, елге келген соң Жаңақорғанда жаңғыртуды жоспарлайды. Ең алғаш 1972 жылы Жаңақорған кенті орталығында Тұтқабай Сабырханов ағамыз басқаратын автобаза жанынан эстрадалық ансамбль жасақталады, қажетті аппаратураларды мекеме басшылығы сатып алып береді.Ансамбль құрамында ағайынды Мұхтар, Асқар Исмайловтар, Юрий Пак, Қалжан Байзақов, Болат Асанов, Бекен Төребаев, Нурдин Қойшыбаев, Серік Мелдебеков, Бексұлтан Байкенжеев, Ермек Құланбаевтар болды. Ансамбль 1981 жылы аудандық мәдениет үйі қарамағына берілді. Сол жылдары «Экспресс» ансамблінің ән қоржынында халық әуендері, қазақ-кеңес композиторларының және жергілікті сазгер¬лердің әндері болды.1985 жылы мамыр айында ансамбльді басқару кәсіби маман Дүйсенхан Сыздықовқа жүктелді.«Экспресс» тобының бас гитарисі Серік Жаңабековтен басқасы толығымен жаңартылды. Топқа Уәлихан, Кенжебек Ибрагимовтар, Ғалымжан Исмайлов, клавиштік аспапқа Орынбасар Синаев келді. Топтың музыкалық бағыты, стилі өзгерді. Сол жылдары әлемде атышулы «Хард-Рок» тыңдаушы көрерменнің назарын жаулап алды. Айта кету керек, сол кездердегі Дүйсенханның жаңашылдық еңбектері арқасында ансамбльдің аты республикаға мәлім болды. Ансамбль өнерін дамытуда кейінгі толқын ішінде Дүйсенхан Сыздықов, Әбдірейім Өміров, Қалтай Арқабаевтар құлшына еңбек етті.Ансамбль 1987 жылы Қарағандыда өткен байқауда жүлделі 1 орынды жеңіп алды. Осы жылы Алматыда өткен телебайқауға қатысты.1994 жылы «Экспресс» тобы республикалық «Жас қанат» байқауына қатысып, арнайы сыйлыққа ие болды «Көтеріңкі көңіл күй», «Кеш жарық» бағдарламсына қатысты. 2005 жылдан бастап бүгінгі күнге дейін ансамбльдің басшысы Серік Жаңабековты әңгімеге тарттық.«Ансамбль дәстүрлі бағытынан танбай, тынбай еңбектенумен көрерменнің зор ықыласына бөленіп келеді. Өзім ансамбльде бас гитарист, Сайран Ділманов кпавиште, Уәли Ибрагимов дауылпазшы, Талап Тотаев әнші, хит топ-шоу бағдарламасының авторы, Роллан Бақтыбаев әнші, Кенжебек Ибрагимов, Нұржан Ержігітов музыкалық көркемдеуші ретінде ізденісті жұмыс жасап келеміз. Жетістіктеріміз аз емес.Байқоңырда өткен халықаралық «Рок-миссия» фестивалінде Роллан мен Талап үздік әнші номинациясын иеленді. 2012 жылы Дүйсенхан Сыздықовтың «Бақ құсы», 2014 жылы Алматыда республикалық сарайда өткен Бексұлтан Байкенжеевтің «Сағынып жүрші» деп аталатын шығармашылық кешінде ән салған Қазақстанның бергілі әншілерін вокалды аспапта сүйемелдеп, жоғары баға алды. Астана қаласында өткен «Еңсесі биік Астана» мерекелік концертіне қатыстық. Жанды дауысты насихаттау мақсатында Ақтөбеде өткен байқауда Бас жүлдені жеңіп алдық.– Экспресстің ел арасындағы беделін кешегісінен кемітпеу үшін не істеу керек? Қандай жоспарларыңыз бар?– Эстрадамыздың даму қарқыны батыстың деңгейінен кем емес. Ол үшін үнемі ізденіп, замана ырғағына бейімделіп отыруға тырысамыз. Эстрада жанрының ритмі өзгеше, әсері де бөлек. Сондықтан сырлы лирикаға толы дәстүрлі әндерді де эстрадалық үлгіде әрлеп, тыңдарман жүрегіне жеткізуге тырысамыз. Алайда әннің негізгі әуенін, бастысы сөзін бұзып айтуға болмайды. Әннің бояуы сақталуы тиіс.– ВИА-лардың өміршеңдігіне сенуге бола ма?– Сенуге болады. Эстраданың шын жанашырлары аман тұрғанда ол ескірмейді.ТҮЙІН: Жетпісінші жылдардан бастап эстраданың желкенін желбіретіп, жалауын тік көтерген өнер өкілдерінің жанкешті еңбегі жанып, алдағы уақытта да шыңдарды бағындыра берсін дегіміз еледі.

Жаңақорған ауданында рок музыка кеші

<a href="https://kyzylorda-news.kz/">Kyzylorda-news.kz.</a> Синоптиктер республиканың 6 өңірінде қолайсыз ауа райына байланысты ескерту жасады.&nbsp;Қызылорда облысында жел солтүстік-шығыстан соғады, облыстың орталығында, шығысында күндіз күші - 15-20 м/с.Сонымен қатар 24-26 наурыз аралығында ауаның оң мәнді температурасының сақталуы мен ары қарай жоғарылау болжамына байланысты Ақтөбе (Қобда, Мартөк, Қарғалы, Хромтау, Әйтеке би, Ойыл, Алға, Ақтөбе қ. ауданы) және Қарағанды (Шет, Ақтоғай аудандары) облыстарында қарқынды қар еруі, еріген қар ағындысының қалыптасуы, мұздық құбылыстардың әлсіреуі жалғасады, бұл ретте өзендерде су деңгейлерінің кенеттен көтерілуі және судың жайылуы мүмкін.

Архив

Жаңақорғанда «Ауылым ел бесігі» бағдарламасы аясында жұмыстар қарқынды жүруде

Жаңақорғандық ұстаздар біліктілігін арттырды

Жаңақорғанда кітаптың тұсауы кесілді

Жаңақорған ауданында рок музыка кеші

Ауа райы: 6 өңірде ескерту жарияланды