Kyzylorda-news.kz 17 - 22 тамыз күндері аралығында Иордания мемлекетінің астанасы Амман қаласында грек-рим, еркін және әйелдер күресінен U17 жасөспірімдер арасындағы Әлем чемпионаты өтуде. Аталған чемпионаттың алғашқы күні грек – рим күресінен U17 жасөспірімдер арасында белдескен жерлесіміз Алпамыс Болатұлы 55 кг салмақ дәрежесінде күміс жүлдегер атанды.
Алпамыс Сыр елінің спорт тарихында жасөспірімдер арасында грек-рим күресінен Әлем чемпионатында жүлдегер атанған алғашқы спортшы. Сонымен қатар, грек-рим күресінен жасөспірімдер арасындағы Азия чемпионатының жеңімпазы және 3 дүркін ҚР чемпионатының жеңімпазы.
Қазіргі таңда мақтанышымыз Астана қаласындағы Қажымұқан Мұңайтпасов атындағы олимпиада резервінің республикалық мамандандырылған мектеп-интернат - колледжінің студенті.
Бозкілем төрінде атой салып жүрген аралдық чемпионның жаттықтырушылары – жоғары санатты жаттықтырушылар Т.Қожекенов, Б.Төлебаев (№19 Арал ОРМБЖМ) және Д.Кегенбаев (Қажымұқан Мұңайтпасов атындағы олимпиада резервінің республикалық мамандандырылған мектеп – интернат - колледжі).