Kyzylorda-news.kz. 12 қазанда Испания мемлекетіндегі Понтеведра қаласында ерлер, әйелдер, кадеттер мен жасөспірімдер арасында грэпплингтен әлем чемпионаты басталды. Жарысқа әлемнің 24 елінен 300-ден астам спортшы қатысуда.
Чемпионат бағдарламасын кадеттер (16-17 жас) мен жасөспірімдер (18-20) ашты. Жарыс қорытындысы бойынша біздің құрама жалпыкомандалық есепте бірінші орынды иеленді. Қазақ спортшылары Испания, Украина, Израиль, Қырғызстан және Франция құрамаларын артта қалдырып, 26 алтын, 21 күміс және 13 қола медаль жеңіп алды.
Айта кету керек, біздің команда екі жас санатында (кадеттер мен жасөспірімдер) екі бөлімде (No Gi және Gi) бірінші орын алып, жетістікке жетті. Өткен жылы тек кадеттер 16-17 жас аралығында бірінші орынды қанағат тұтқан.
Айта кетейік, 14-15 қазанда ерлер мен әйелдер жарысады. Еліміздің намысын қорғап жүрген нәзікжандыларға алдағы сайыста сәттілік тілейміз.
