Kyzylorda-news.kz Саналы ғұмырын еліне адал қызмет етуге арнаған мемлекет және қоғам қайраткері Бердібек Сапарбаевтың есімі халық жадынан ешқашан ұмытылмайды. Ол Тәуелсіз Қазақстанның қалыптасуына ерекше үлес қосып, еселі еңбегі арқылы халықтың алғаусыз алғысын алған арда азамат.
Бүгінде Бердібек Машбекұлы салған сара жолы, азаматтық қадір-қасиеті, қайталанбас тұлғасы кейінгі ұрпаққа үлкен өнеге десек артық айтқандық емес. Себебі, егемен еліміздің сындарлы саясатын кәсіби біліктілігімен жүргізіп, мемлекетіміздің өсіп-өркендеу жолында өзіндік қажыр-қайратымен бес облыстың тізгінін ұстады. Еліміздің еңсесін тіктеу үшін аянбай еңбек етті, қамыққан халқының қасынан табылды.
Осыған орай, бүгін “Болашақ” университетінде қайталанбас қайраткердің есімін ұлықтап, ізгілікке толы өмірі мен еңбек жолын еске алуға арналған «Берен тұлға Бердібек» атты ғылыми-танымдық конференция өтті. Конференция басталмас бұрын ҚР Мемлекет және қоғам қайраткері Бердібек Машбекұлы Сапарбаев атындағы атриум залдың салтанатты ашылу рәсімі өтті. Одан кейін Бердібек Машбекұлы туралы арнайы бейнесюжет көрермен назарына ұсынылды. Игі шараға Қызылорда қаласының әкімі Серік Қожаниязов, мемлекет және қоғам қайраткері, ҚР Ұлттық Ғылым академиясының академигі, профессор, экономика ғылымдарының докторы, профессор, «Болашақ» университетінің құрылтайшысы Бақберген Досманбетов, сондай-ақ, белгілі қоғам және мемлекет қайраткерлері, экономист ғалымдар, ғылыми-мәдени қауымдастықтардың көрнекті өкілдері және журналистер қатысты.
– Мен ол уақытта Қорқыт ата университетінде едім. Ал Бекең министрлікте жұмыс істейтін. Іссапармен барғанымда «Сіз, қызылордалықсыз ба?» деп сұрады. Солай жолдастық таныстығымыз басталып, араласып кеттік. Бір күні Алматыға баратынымды айтып хабарласқанымда: «Мен Қызылордаға барайын деп жатырмын, маған соқпай-ақ қой» деді. Көп ұзамай облысқа әкімдікке келді. Қаланың әкімі болуға ұсыныс білдірді. Ректордан төмен қызмет деп ойлап келіспедім. Бірақ, бұл әңгіме халық арасына тарап кеткен. Сонымен ұсынысқа келіспеуге лажым қалмады. Бекеңдей адам сирек. Әрі досым, әрі әріптесім, мені ректорлықтан әкімдікке бағыттап, Сенатқа қарай жетелеген жан. Оның іскерлігі мен тазалығы, ел дамуы жолындағы еңбегі ерен, – деді Б.Досманбетов.
Жиын барысында Бердібек Машбекұлымен қызметтес болған әріптестері және белгілі тұлғалар арнайы сөз сөйлеп, қайраткердің өмір жолындағы қиындықтары мен тарих беттерінен ешқашан өшпейтін жылы естелектерін айтып, артына қалдырған мәңгілік мұрасын көпке үлгі етуді тілге тиек етті.
– Мен қала әкімі ретінде бір мәселеге айрықша тоқталғым келеді. Бердібек Машбекұлы облыс басшысы кезінде жылу-электр орталығында оқыстан апат орын алды. Қаланың жылусыз қалу қаупі күшейді. Қаржының қиындығына қарамастан, батыл шешім қабылдап, жуық арада жылу орталығы қайта іске қосылған еді. Қайраткер тұлғаның тәуелсіз Қазақстанның дамуына қосқан үлесі өте зор. Өмір жолы – біз үшін үлкен мектеп, өмірлік тәжірибе, – деді Серік Салауатұлы.
Ғылыми-танымдық конференция соңында қатысушылар мемлекет және қоғам қайраткері Бердібек Машбекұлы Сапарбаевтың жарқын бейнесін боямасыз бейнелейтін еңбектерімен таныс болды.
Фото: Қызылорда облысының Өңірлік коммуникациялар қызметі