Kyzylorda-news.kz. Қызылордада соңғы жылдары жанға жайлы ғимарат пен көпқабатты тұрғын үймен толықты. Осылайша бір екі жыл көлемінде қаламыз әсем қалаға айналды.
Бүгінгі күні қаламыздың көркіне көрік беріп, зәулім үйлер мен ғимараттар салуға өз үлесін қосып жүрген жанның бірі – Қалдыбек Абдреев. Кейіпкеріміз «Дәнекер құрылыс компаниясы» ЖШС-да учаске басшысы қызметін атқарады.
Кейіпкеріміз 1960 жылы Қызылорда облысының Сырдария ауданына қарасты Шаған ауылында дүниеге келген. Өмір жолын құрылыс саласына арнаған Қалдыбек Абдреевтің қажырлы еңбегі зор құрметке ие. Оның қырық екі жыл бойы жасаған құрылыс нысандарында өзіндік қолтаңбасы қалған.
Алғаш еңбек жолын 1981 жылдың маусым айында ПМК – 18 «Риссовхозстрой» мекемесіне IV разрядты тас қалаушы болып бастаған. Сол мекемеде бірнеше айдан кейін шебер қызметкері болған. Бір жылдан кейін бас инженер қызметіне ауысып, төрт жылдан кейін ӨТБ басшысы қызметіне дейін өскен.
Ал 1987 жылы Тереңөзек күріш совхозына ЖКО инжтеплотехник қызметіне жұмысқа ауысқан. Онда үш жыл қызмет жасағаннан кейін шаруашылық прорабы болған.
Аталған мекемеден 2012 жылы өз еркімен жұмыстан шығып, «Дәнекер құрылыс компаниясы» ЖШС-на прораб ретінде жұмысқа қабылданған. Серіктестікте алты жыл еңбек еткен кейіпкеріміз 2018 жылдан бастап учаске басшысы қызметіне дейін көтерілген.
«Дәнекер құрылыс компаниясы» ЖШС мекемесі кейіпкеріміздің тұрақты жұмыс орнына айналған. Бұл мекемеде еңбегі еленген Қалдыбек Абдыреев 2018 жылы құрылысшылар күніне орай алғыс хатпен марапатталған. Ал 2019 жылы «Қазақстанның құрметті құрылысшысы» атты құрмет белгісін алған.
Қазіргі таңда мекемедегі әріптестерімен бірге қала мен облыс аумағындағы аудандарда көптеген тұрғын үй мен ғимарат құрылыстарының, жол, ауызсу, аяқсуларды елді-мекендерге пайдалануға, түрлі қоғамдық жұмыстарға белсене араласып, тұрғын үй нысандарының құрылыстарын салуға және қала орталығын көркейтуге атсалысып келеді.
