Kyzylorda-news.kz. Қазақстан Республикасының Президенті Қасым-Жомарт Тоқаевтың 2022 жылғы 3 наурыздағы «Әкімдердің халықпен кездесулерін өткізу туралы» Жарлығына сәйкес, барлық деңгейдегі әкімдер жыл бойы халықпен кездесулер өткізіп, кездесу барысында халықты толғандыратын әлеуметтік мәселелерге баса назар аударып, туындаған мәселелерді шешудің жолдарын түсіндіруді және қарастыруды тапсырған болатын. Мемлекет басшысының тапсырмасын жүзеге асыру аясында бүгін Жалағаш ауданы әкімі Асқарбек Есжанов Жаңадария, Аламесек, Еңбек ауылдық округінің тұрғындарымен кездесіп, ауданның биылғы жылдың 10 айындағы әлеуметтік-экономикалық даму қорытындысы мен 2023 жылғы міндеттері туралы айтты.
Халықпен кездесу барысында аудан әкімі ауыл тұрғындарына ауданда атқарылған жұмыстармен таныстырып, тұрғындардың ұсыныс-пікірлерін тыңдады.
Сапарын Жаңадария ауылынан бастаған аудан басшысы ең алдымен ауыл ақсақалдарымен және тұрғындармен кездесті. Кездесу барысында тұрғындар ауылдағы канал мәселесін, халықты тұрақтандыру қажеттігін ортаға салды.
Тұрғындарды мұқият тыңдаған аудан басшысы айтылған мәселелердің барлығы тікелей бақылауында болатындығын айтып, жауапты сала басшыларына тиісті шараларды жүргізуді жүктеді. Асқарбек Есжанов ауыл тұрғындары тарапынан көптен бері шешімін таппай келе жатқан мәселе балалар ойын алаңының келесі жылы салынатынын, балалардың қуанышынан артық ештеңе жоқ екендігін жеткізді.
Одан соң аудан әкімінің сапары Аламесек, Еңбек ауылдық округінде жалғасты. Бұл ауылдарда да жергілікті тұрғындармен жүздесіп, өзекті деген мәселелерге құлақ түрді. Осы уақытқа дейін атқарылған жұмыстарға, ауданның әлеуметтік-экономикалық даму көрсеткіштеріне тоқталып, алдағы жылы атқарылатын жұмыстармен бөлісті.
