**[Kyzylorda-news.kz.](https://kyzylorda-news.kz/)** **Қызылордада өрт сөндірушілер төрт қабатты үйдің жертөлесіндегі өрттен үй-күйсіз жүрген 3 адамды және 19 жастағы тұрғынды құтқарып қалды, деп хабарлайды** [**ҚазАқпарат**](http://lenta.inform.kz/kz/kyzylordada-ort-sondirushiler-uy-kuyi-zhok-3-adamdy-aman-alyp-kaldy_a3597509)**.** Аталған оқиға Қызылорда қаласының орталық бөлігінде орын тепкен Әйтеке би көшесі бойындағы төрт қабатты үйдің жертөлесінде болған. Өрт сөндірушілер оқиға орнына жылдам жетті. Онда өрт сөндіру қызметінің 7 маманы мен 2 арнайы автокөлік жұмыс істеді. > _«Өрт сөндіру қызметінің жеке құрамы оқиға орнында барлау жұмысын жүргізді. Көпқабатты үйдің астындағы жертөледен үй-күйсіз жүрген 3 адам мен 2000 жылы туған азамат құтқарылды», – деп мәлім етті Қызылорда облыстық төтенше жағдайлар департаменті өрт сөндіру және апаттық-құтқару жұмыстары қызметінің баспасөз хатшысы Әлия Ережепова._ Өрт сөндірушілердің жылдам іс-қимылының нәтижесінде төрт қабатты тұрғын үйге ешқандай залал келген жоқ.