Қызылордада күріштен басқа дақылдарды жинау жұмыстары аяқталды – Kyzylorda News
Басты бет

Қызылордада күріштен басқа дақылдарды жинау жұмыстары аяқталды

16.10.2021, 15:00

453 0

Kyzylorda-news.kz. Биылғы жылы статистикалық мәліметтерге сәйкес 188,1 мың гектар жерге ауыл шаруашылығы дақылдары егілді. Негізгі дақыл күріштің көлемі 83,6 мың гектарды құрайды. Биыл орын алған су тапшылығына байланысты күріш дақылының көлемі өткен жылмен салыстырғанда 5,9 мың гектарға дейін азайтылған. Оның орнына суды аз қажет ететін өнімдер 9,8 мың гектарға дейін артып, жалпы егіс көлемі 3,9 мың гектарға көбейді. Бұл туралы Өңірлік коммуникациялар қызметінде өткен брифингте облыстық ауыл шаруашылығы басқармасының басшысы Талғат Дүйсебаев хабарлады.

«Күзгі егін жинау науқаны оңтайлы мерзімде жүргізілуде. Қазіргі таңда күріштен басқа дақылдарды жинау жұмыстары аяқталды. Биыл мемлекеттік қолдау аясында егіншілік саласына 4,1 млрд. теңге қаржы бөлінді. Атап айтсақ, дақылдардың өндірісін субсидиялау – 208,7 млн. теңгені құраса, тыңайтқыштардың құнын субсидиялауға – 204,6 млн. теңге бөлінді. Мал азықтық дақылдарға келетін болсақ. ораққа түскен 40,3 мың гектардан 248,6 мың тонна жоңышқа шөбі жиналды. Егін жинау жұмыстарына бөлінген 12,5 мың тонна дизель отыны кестеге сәйкес алынуда. Облыстағы азық-түлік бағасы туралы айтатын болсақ, бір апта ішінде өңірде азық-түлік тауарларының бағасын тұрақтандыру үшін жедел шаралар қабылданды. Әлеуметтік маңызы бар тауарлар бағасының өсу қарқыны бәсендеп, орташа өсу индексі 100,2 пайызды құрады. Нақтырақ айтсақ, жұмыртқа бағасы 3,5 пайызға өссе, пияздың бағасы 1 пайызға төмендеді. Ұн мен нанның бағасын реттеу мақсатында Қостанай облысының ұн өндіруші мекемелерімен 1000 тонна ұнмен қамтамасыз ету жөнінде келісім жасалды. Сондай-ақ жыл аяғына дейін кәсіпкерлік субьектілер арқылы 45 тонна тазартылған күнбағыс майы қамтамасыз етіледі», – деді басқарма басшысы Талғат Тұрсынұлы.

Баспасөз конференцияда «Байқоңыр» ӘКК» АҚ-ның төрағасының орынбасары Жеңісбек Ахметов егін жинау барысына тоқталды.

«Бүгінде бидай, арпа, сұлы дақылдарын жинау аяқталса, мақсары жүгері, картоп сынды дақылдарды жинау жұмыстары жалғасуда. Аудандарда жинақталған ақпараттарға сәйкес 9,4 мың тонна күздік бидай өнімдері жиналып, орта өнім 13,8 центнерді құрады. Жалпы егін жинау жұмыстарына барлық техникалар толық дайын. Сондай-ақ, егілген күріштіен жоғары өнім алу мақсатында күріш егісіне 100 пайыз жоғары репродукциялы тұқым себілді. Нәтижесінде, биыл ораққа түсетін күріштің 75 пайызының жағдайы жақсы. Облыста күрішке орақ салу жұмыстары 26 тамыздан басталған болатын», – деді Жеңісбек Алпамысұлы