Kyzylorda-news.kz Қорқыт ата атындағы Қызылорда университетінде 25 қазан – Республика күніне арналған «Қыран елім, Тұран төрім – Қазақстаным!» атты салтанатты мерекелік жиын өтті.
Іс-шара Қазақстан Республикасының Мемлекеттік Гимнімен басталып, Басқарма Төрағасы – Ректор Наурызбай Байқадамовтың құттықтау сөзімен жалғасты. Университет басшысы Республика күнінің ел тарихындағы маңызына тоқталып, жиынға қатысушыларды ұлттық мерекемен құттықтады.
Салтанатты жиында оқу орнының дамуына, білім мен ғылымның өркендеуіне елеулі үлес қосып жүрген бірқатар профессор-оқытушылар мен қызметкерлер марапат төрінен көрінді.
Республика күні – Қазақстан мемлекеттілігінің қалыптасу тарихындағы айрықша күн. 1990 жылғы 25 қазанда Қазақ КСР-інің мемлекеттік егемендігі туралы Декларация қабылданып, еліміздің тәуелсіз мемлекет ретінде дамуына құқықтық негіз қаланды. Осы тарихи құжаттың негізінде 1991 жылғы 16 желтоқсанда Қазақстан Республикасының мемлекеттік тәуелсіздігі жарияланды.
Мемлекет басшысы Қасым-Жомарт Тоқаевтың бастамасымен 2022 жылы Республика күніне ұлттық мереке мәртебесі қайтарылды. Биыл еліміздің егемендігі туралы Декларацияның қабылданғанына 36 жыл толды.
Мерекелік кеш университет өнерпаздарының патриоттық концерттік бағдарламасымен қорытындыланды.
