Елімізде бір науқас коронавирусты 80 адамға жұқтырған – Kyzylorda News
Басты бет

Елімізде бір науқас коронавирусты 80 адамға жұқтырған

18.04.2020, 18:00

541 0

Kyzylorda-news.kz. Індетке шалдыққан науқас вирусты 80 адамға дейін жұқтыруы мүмкін. Бұл туралы бас мемлекеттік санитар дәрігері Айжан Есмағамбетова мәлімдеді, деп хабарлайды Sputnik Қазақстан.

«Инфекцияның таралуын талдау барысында бір науқастың вирусты жақын араласқан 80 адамға дейін жұқтырғанын байқадық. Көршілер карантинде болса да, бір-бірімен араласып, вирусты бір біріне жұқтырып жатыр. Мұндай оқиғалар бізде кездеседі. Орташа есеппен алғанда бір науқас 30 адаммен жақын байланыста болған», – деді Есмағамбетова онлайн брифингте.

Бас санитар дәрігер дертке шалдыққандардың 70 процентінде ауру белгілері байқалмайтынын және бұл жағдайды қиындатып отырғанын айтты.

«Бұл дегеніміз, сырттай cау көрінген адам айналасындағыларға вирус жұқтырып жүр деген сөз. Тиісінше, карантин шаралары дәл қазір коронавирустың алдын алудың жалғыз жолы. Сол себепті үйде отырыңыздар, карантин аяқталғанға дейін себепсіз далаға шықпаңыздар. Тәртіпке бағынсақ, қалыпты өмірімізге тезірек ораламыз», – деді ол.

Соңғы дерек бойынша республикада барлығы 1498 адам коронавирус жұқтырды.

Есмағамбетованың айтуынша, вирус жұқтырғандар 31 мың адаммен жақын байланыста болған.