<a href="https://kyzylorda-news.kz/">Kyzylorda-news.kz.</a> Абай елге белгілі Құнанбайдың баласы еді. Күллі Тобықты руының бетке ұстар билер әулетінің ұлы еді. Әкенің атағы да, байлығы да жетіп артылатын.&nbsp;
Білім, ғылымға құмар Абайдың Қытайға барып кітап ақтарамын десе де, Бұхарға барып білім аламын десе де әкенің дәулеті мен ұзын қолы жететін. Алайда осынша дәулет бола тұра, ғылым мен білімге құмар Абай Семейден ұзап ешқайда барған жоқ. Бұл бір. Екіншіден, Абайдың діни сауаты терең болды. Шариғаттың шарттарын, сүннеті мен парызын жақсы білді. Бірақ&nbsp;тағы да сол бар мүмкіндігі бола тұра, Құнанбай қажының ұлы Меккеге бармады. Осы орайда “Абай неге Семейден ұзап шықпады?”, “Қажының баласы неге бесінші парызын орындамады?” деген сұрақтар туындайды. Біз осы сұрақтардың жауабын абайтанушы Асан Омаровтан сұрап көрдік.&nbsp;
<img src="https://kyzylorda-news.kz/wp-content/uploads/2020/02/29abaikaj2.jpg" alt="" />
Абайтанушы Асан Омаров өз сөзінде былай дейді.
Абай сол кездегі көзқараспен қарағанда өте көп көлемде білім алды. Ол заманда Семейде үлкен кітапхана болған. Ол жерде грек&nbsp;ойшылдарының, орыстың ақын-жазушыларының кітаптарынан бастап әлемдік деңгейдегі үлкен кітаптардың қоры бар еді. Абай жасатайынан сол кітаптарды оқып өсті. Кейін елден жыраққа шыққан, қажылыққа барған татар достары шығыстың айтулы ғұламалары мен ақындарының кітаптарын алып келетін. Шығыстың Низами, Науаи, Сәғди, Қожа Хафиз, Фзули сияқты ұлы ғұлама, классик ақындарын оқыды. Мен бала кезімде Семейдің мешітіндегі қабырғаға жағалай жиналған көп кітаптарды өз көзіммен көргенмін. Ол 1970 жылдар болатын. Кеңес заманы келіп, кітаптардың бәрін құртқан кез еді. Ал Абай заманында оның қандай болғанын елестетіп көріңіз.&nbsp;Осынша кітаптың арасында отырған Абайға Семейден ұзап шығудың қажеті де жоқ еді.&nbsp;
Ал қажылыққа бару мәселесіне келсек, Абайдың көп уақыты болған жоқ. Көбіне тіршілікке байлаулы болды. Күндіз Абайдың алды кісіден босамайтын. Түнде жазатын. Екінші жағынан ол заманда қажылыққа бару қиын болатын. Әкесі Құнанбай үш ай жүріп қиындықпен, бейнетпен барды. Абай бейнетке жоқ кісі болды.&nbsp;
Бұл туралы баласы Тұрағұл өзінің естелігінде Долгополовтың Абайды сынағанын жазады.&nbsp;
“Сенің басың алтын адамсың, бірақ&nbsp;үйренген әдет-салтың ұнамсыз, таңертең төсектен тұрасың, киімдеріңді біреу әкеліп береді, арқаңа шапаныңды жабады, есікті ашып тысқа шығарады, қайтып келген соң тағы да есікті ашып үйге енгізіп, алдыңа шылапшынды әкеліп, құманмен суды қолыңа құяды. Ас келсе, шайыңды құйып береді, етіңді жапырақтап береді, ұйықтамақ болсаң, төсегіңді салып, өзіңді біреу шешіндіріп, жатқызып, шақшаңды бір жағыңа, мұрын орамалыңды бір жағыңа тығып, үстіңе көрпеңді жауып салады. Өзің-өзің үшін не қыласың? Әр нешік ұйықтап көресің”, – депті Долгополов естелігінде.&nbsp;Осы Долгополовтың аз ғана сөзі менің әкемнің бірқатар әдетін, салтын көрсетер деп жаздым, бірақ бұл әкеме сырт берілген сын, оның оқу, жазу, ой қызметі – бәрінен де қиын ғой, Долгополов осы жағына көңіл бөлмеген сияқты, – деп жазады Тұрағұл.
<a href="https://baq.kz/news/othernews/abay-nege-qazhylyqqa-barmady/">Baq.kz</a>

Абай неге қажылыққа бармады?

<a href="https://kyzylorda-news.kz/">Kyzylorda-news.kz.</a> Сауд Арабиясы умра қажылығына келетіндерді елге кіргізуге уақытша шектеу қойды, деп хабарлайды <a href="https://24.kz/kz/zha-aly-tar/lemde/item/377135-saud-arabiyasyna-azhyly-a-baru-to-tatyldy">«Хабар 24»</a>.
Корольдік мұндай шешімді коронавирустың таралуына байланысты жасап отыр. Енді бейсенбіден бастап аталған кеселдің таралу қаупі жоғары елдердің визасын алған азаматтар ел аумағына кіре алмайды. Бұған қоса елге кіру бекеттерінде денсаулық сақтау органдары барлық шетелдіктердің Сауд Арабиясына келмес бұрын қандай елдерде болғанын тексереді.
Айта кетейік, жыл сайын миллиондаған адам умра қажылығына бару үшін Сауд Арабиясына барады.

Сауд Арабиясына қажылыққа бару тоқтатылды

<a href="https://kyzylorda-news.kz/">Kyzylorda-news.kz.</a> ҚМДБ-ның Қызылорда облысы бойынша өкілдігі, «Әйелдер-қыздар» секторының ұйымдастыруымен «Өлмейтұғын артында із қалдырған» тақырыбында рухани кеш өтті.
Қазақстан мұсылмандары діни басқармасының 30 жылдық, Абай Құнанбайұлының 175 жылдық мерейтойларының құрметіне орай ұйымдастырылған шара Қасиетті Құран аяттарымен ашылып, қонақтардың назарына ұлы ақынның өмірінен тағылымды қойылымдар, өнегелі өлеңдерінен үзінді, бейнероликтер ұсынумен жалғасты. Және де ҚМДБ, «Әйелдер-қыздар» секторының Қызылорда облысы бойынша жетекшісі Л.Сыдықова мен облыстық тілдерді дамыту орталығының тіл маманы Ә.Бақытқызы Абай атамыздың өмірінен қызықты деректер келтіре отырып, насихат айтты.
Сонымен қатар, көрермендер арасында “Ойлан тап” ойыны ойнатылып, дұрыс жауап берген белсенді жамағатқа Абай атамыздың қара сөздері мен поэмалары жинақталған кітапшасы тарту етілді.
<img src="https://kyzylorda-news.kz/wp-content/uploads/2020/02/27kmdb2.jpg" alt="" />
<img src="https://kyzylorda-news.kz/wp-content/uploads/2020/02/27kmdb3.jpg" alt="" />

Қызылордада ҚМДБ-ның 30 жылдығына арналған рухани кеш өтті

<a href="https://kyzylorda-news.kz/">Kyzylorda-news.kz.</a> Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бастамасымен “Е-мүфтият” ақпараттық жүйесі құрылатын болды, деп хабарлады <a href="https://sputniknews.kz/society/20200227/12940879/bas-mufti-bastama.html">Sputnik Қазақстан</a>.
Елордада өткен алқалы жиында Бас мүфтиге аталған жобаның жоспары таныстырылды.
“Е-мүфтият” ақпараттық жүйесіне имам-молдалардың білім деңгейі, ғылыми дережесі, ұлты, отбасы жағдайы, облыстағы мешіт саны, тағы басқа мәліметтер енгізілмек.
<blockquote>
 “Қазір электронды технологияның дамыған заманы. Әлем электронды жүйеге көшу үдерісінде. Біз, дін қызметкерлері бұл тенденциядан қалыс қалмауымыз қажет. “Е-мүфтият” ақпараттық жүйесі жұмыс тиімділігін арттырумен қатар, ҚМДБ Орталық аппаратының кадр қызметін оңтайландыруға оң ықпал етеді. Сондықтан осы жобаны жетілдіріп, іске қосуды тапсырамын”, – деп атап өтті Бас мүфти Наурызбай қажы Тағанұлы.
</blockquote>
Айта кетейік, Наурызбай қажы Тағанұлы 7 ақпан күні Нұр-Сұлтан қаласында өткен Қазақстан мұсылмандары діни басқармасының кезектен тыс ІХ құрылтайында Бас мүфти қызметіне сайланды.
Мемлекет басшысы Қасым-Жомарт Тоқаев елордадағы Әзірет-Сұлтан мешітіне барып, жаңадан сайланған Бас мүфтиді&nbsp;жаңа қызметімен құттықтап, алдағы қызметіне табыс тіледі.
Кездесу барысында елдегі татулық пен тұрақтылықты сақтау, дін арқылы азаматтарды келісім мен ынтымаққа шақыру, рухани бағдар беру қажеттілігі мен&nbsp; жат діни ағымдардың зиянды әрекеттері жайында айтылды.
<blockquote>
 “Халықты татулыққа, бірлікке, пәтуаға шақыру керек. Қазіргі уақытта дүние жүзінде әртүрлі жат үдерістер пайда болып жатыр. Сондықтан бұған тыйым салып, жол бермеуге тиіспіз. Ел мүддесіне қызмет етіп, осы бағытта дұрыс үгіт-насихат жұмыстарын жүргізу қажет”, – деді Тоқаев.
</blockquote>

Жаңа Бас мүфти тың бастама көтерді

<a href="https://kyzylorda-news.kz/">Kyzylorda-news.kz.</a> Қызылорда облыстық ішкі саясат басқармасының Дін мәселелерін зерттеу орталығы өзге облыстардағы мамандармен тәжірибе алмасу мақсатында «Дерадикалдандырудың заманауи тәжірибелері» тақырыбындағы республикалық семинар-тренинг өткізді.
Оған облыстық ішкі саясат басқармасының қызметкерлері мен Қызылорда қаласы мен аудандардағы ішкі саясат бөлімдерінің теолог мамандарына, мешіт имамдары, АТТ мүшелері, Қызылорда облыстық ҚАЖД-нің, Қызылорда облыстық Полиция департаменті экстремизмге қарсы іс-қимыл басқармасының қызметкерлеріне, орталықтың теолог мамандары қатысты.
Бұдан бөлек аталған шараға Батыс Қазақстан олбысы мен Шымкент қаласының Дін мәселелерін зертеу орталықтарының теолог мамандарын қатысты. Семинарды облыстық ішкі саясат басқармасының басшысы Талғат Маханов ашып, бүгінгі шараның деструктивті діни ағымдардың алдын алуға және мемлекеттік дін саясатын түсіндіруде таптырмас құрал болатындығын жеткізді. Мұнан соң сөз алған «Нұрлы білім» Қоғамдық бірлестігінің теолог маманы Р.Сыздықов «Жалған діни уәжденген экстремизм мен терроризмнің алдын алуға бағытталған базалық ақпарат» тақырыбында баяндама жасады.
<blockquote>
 «Діни мәселе тек бізді ғана емес, бүкіл әлем елдерінің бас ауруына айналған ауқымды мәселе. Сондықтан бұл проблемаға келгенде әркім әрқандай тәсілге жүгінеді. Ал, қазақ қоғамы үшін ұлттық тәрбие адастырмайтын бағыт. Әр қазақ ұлы Абайды жете таныса, Ыбырай Алтынсариннің өлеңдерін жатқа білсе, Шәкәрімнің шығармашылығын оқыса, бүгінгідей адасу бізде болмас еді», – дейді Рүстем Мәлікұлы.
</blockquote>
Семинар-тренингте «Тұлғалық даму мектебі» отбасылық орталығының жетекшісі Лимана Қойшиева «Діни экстремизмнің психологиялық себептері мен алдын алу» тақырыбын сөз етті. Оның айтуынша деструктивті діни ағымдардың тұзағына білімі таяз адамдар тез түсетін көрінеді. Сондай-ақ кейбір отбасылардағы экономикалық қиыншылықтар жат ағымдардың жетегіне кетуге себеп болады екен. Оның алдын алу үшін бала тәрбиесіне ата-ана жіті мән беру керек дегенді айтады.
Шара барысында Шымкент қаласы мен Батыс Қазақстан облысынан келген теолог мамандар да тәжірибелерін ортаға салды. Қатысушылар баяндамашыларға сауалдарын қойып, өзара пікір алмасты.
<img src="https://kyzylorda-news.kz/wp-content/uploads/2020/02/21teologtar02.jpg" alt="" />
<img src="https://kyzylorda-news.kz/wp-content/uploads/2020/02/21teologtar3.jpg" alt="" />

Қызылордада теологтардың республикалық семинары өтті (ФОТО)

<a href="https://kyzylorda-news.kz/">Kyzylorda-news.kz.</a> Ә.Тәжібаев атындағы облыстық әмбебап ғылыми кітапханасының қоры ұлы философ, ғұлама ойшыл Әбу Насыр Әл-Фарабидің 1150 жылдығына орай Халықаралық Абай клубының президенті, жазушы Роллан Сейсенбаевтың құрастыруымен қазақ және орыс тілдерінде шығарылған жеті томдық кітаппен толықты.
Жинақтың бірінші томында ғұлама ғалымның «Қайырымды қала» кітабындағы тарауларға шолу жасалған. Ал «Қайырымды қала тұрғындарының көзқарастары» деген трактаттарында бірқатар қоғамдық, әлеуметтік, этикалық мәселелерге талдау жасалынған. Әл-Фарабидің бұл шығармасында мемлекеттің пайда болуы, ондағы теңсіздіктің өмірге келуі, идеал қала халқының моральдық бейнесі, қала әкімдеріне қажетті адамгершілік қасиеттер, әр адамның бақытқа жету үшін бүкіл қоғам болып тіршілік ету керектігі туралы айтылған.
«Философиялық трактаттар» атты екінші томында Әл-Фарабидің философиялық көзқарастары, интеллектің түрлері, тіл туралы ғылым, логика, математика, табиғат және тәңірлік ғылымдар, азаматтық ғылым, фиқһ және діни ілім бойынша бес тараулық тақырыптар тереңінен қамтылған.
«Әлеуметтік этикалық трактаттар» атты үшінші томына ұлы ойшылдың «Бақыт жолын сілтеу», «Азаматтық саясат», «Мемлекеттік қайраткерлердің нақыл сөздері», «Бақытқа жету туралы» төрт трактаты енгізілген.
Жеті томдықтың «Музыка туралы үлкен кітап» атты төртінші томында Әл-Фараби музыканың табиғатын түсіндіретін терорияларды, поэзиялық және музыкалық өнердің байланысын ашып көрсетеді.
Ұлы ойшылдың шығармалар жинағының «Ғылым туралы кітап» атты бесінші томына ғалымның «Евклидтің бірінші және бесінші кітап кіріспесіндегі түсініксіз тұстарды түсіндіру», «Геометриялық денелердің табиғи құпиялары мен рухани шебер амалдар туралы кітап», «Адам денесінің мүшелері туралы Аристотельмен келіспеген Галенге айтылған уәждер» және тағы да басқа трактаттары енген.
Сондай-ақ бұл томнан ғалымның ғылым мен жаратылыстанудағы, медицина, физика, химия, математика салаларындағы ізденістерін аңғаруға болады.
Алтыншы том – «Ой-сана туралы кітап» деп аталғанымен, бұл алдыңғы кітаптың жалғасы ретінде саналады. Осы жинақтан математика мен жаратылыстану салаларының қыр-сырын терең түсінуге болады. Сондай-ақ бұл томға Дешті-Қыпшақ даласына он бір ғасырдан кейін жеткен Фараби жырлары жинақталған. Әл-Фараби өлеңдерін қазақшаға аударған А.Нысаналин. Сонымен қатар кітапта ұлы ойшылдың өмір жолы мен еңбектері туралы мол мәлімет бар.
Жетінші томын Әнуар Әлімжанов «Ұстаздың оралуы» атты романымен аяқтайды. Мұнда автор сонау X ғасырда ғұмыр кешкен әл-Фарабидің ғибратты өмірін сөз етеді. Музыкалық мәдениеті мен сауатының арқасында жазушы әл-Фарабидің «Музыканың ұлы кітабын» көркем желіге айналдыруға күш салады. Романнан шартарапқа білім шырағын жаққан, артына асыл рухани мол мұра қалдырған Әл-Фарабидің жарқын бейнесін көруге болады.
<img src="https://kyzylorda-news.kz/wp-content/uploads/2020/02/20kitapkhana2.jpg" alt="" />

Қызылордадағы облыстық кітапхананың қоры «Фараби» атты жеті томдық кітаппен толықты

<a href="https://kyzylorda-news.kz/">Kyzylorda-news.kz.</a> Облыстық ішкі саясат басқармасында, қалалық, аудандық ішкі саясат бөлімдерінде, кент, ауылдық округ әкімдіктерінде &nbsp;және Дін мәселелерін зерттеу орталығы мен облыстық ақпараттық талдау орталығында мемлекеттік дін саласындағы саясатын іске асыруға жауапты мамандар бар.
Аталған мамандар Қазақстан Республикасының дін саласындағы мемлекеттік саясатының 2017-2020 жылдарға арналған тұжырымдамасында сәйкес, өз аймақтарындағы діни ахуалды талдап отырады. Жұмысты одан әрі жетілдіріп, мамандардың&nbsp; біліктілігін арттыру мақсатында облыстық ішкі саясат басқармасының Дін мәселелерін зерттеу орталығының ұйымдастыруымен бүгін «Ағымдағы ахуалды талдау, дін саласындағы мемлекеттік саясаттың даму үрдістері» тақырыбындағы оқыту курсы басталды.
Екі күндік шараның алғашқы күнінде ҚР Білім және ғылым министрлігінің Тарих институтының ғылыми жетекші қызметкері, республикалық ақпараттық түсіндірме тобының мүшесі Бауыржан Шериязданов «Дін саласындағы мемлекеттік саясат» және «Діни саладағы ақпараттық-түсіндіру жұмыстарының жаңа нысандары мен әдістері» тақырыптарында дәріс өткізді.
<blockquote>
 «Дін мәселесі – өте нәзік тақырып. Себебі біздің мемлекетіміз зайырлылық қағидатын ұстанғаннан кейін, ешкімнің діни еркіндіні мен бостандығына қол сұғуымызға жол жоқ. Ұлтына, нәсіліне, дініне бөлмей, бәріне құрметпен қарауымыз керек. Десек те, дін атын жамылған кей деструктивті діни ағымды насихаттаушылар біздің ұстанымымызды теріс пайдаланып, елдің тыныштығын бұзуды көздейтіні жасырын емес. Сондықтан дәстүрлі емес діни ағымды ұстанушылармен кездесіп, оларды дәстүрлі дінге оралту барысында қағидамызға қарсы келмейтін әрекет жасауға тиіспіз» – дейді Бауыржан Рахымғалиұлы.
</blockquote>
Жиын соңында қатысушылар дәріскерге қызметтеріне қатысты сауалдарын жолдап, өз пікірлерін ортаға салды. Оқыту семинары ертең &nbsp;Нұрсұлтан қаласының Дін проблемаларын зерттеу орталығының маманы, социолог Нұрбек Рахманқұлдың дәрісімен жалғасып, &nbsp;«Ағымдағы ахуалды талдау, дін саласындағы мемлекеттік саясаттың даму үрдістері» мен «Деструктивті діни ағымдардың тарихына талдау жасау» тақырыптары кеңінен тарқатылатын болады.

Қызылордада дін мамандарына арналған оқыту курсы басталды

<a href="https://kyzylorda-news.kz/">Kyzylorda-news.kz.</a> ҚМДБ-ның Қызылорда облысы бойынша өкілдігі, қалалық «Нұр» мешітінің ұйымдастыруымен «Достық» үйінде «Жарасымды жанұя» тренингі өтті.
Қазақстан мұсылмандары діни басқармасына 30 жыл толуына орай, ҚМДБ төрағасы, Бас мүфти Наурызбай қажы Тағанұлының бастамасымен қолға алынған өнегелі шаралардың тұсаукесері – тұңғыш рет өткен жаңа форматтағы отбасылық тренинг болды.
Тренингті ашып берген «Ақмешіт-Сырдария» орталық мешітінің наиб имамы Жеңіс Әбибуллаұлы «30 жылдық мерейтойға 30 игі шара» республикалық акциясы аясында бастау алған бірқатар жобалармен таныстырып, облыстық мешітте «Діни сұрақтар бойынша кеңес беру» орталығы үздіксіз жұмыс жасайтынын айтты.
Бұдан кейін қоғамдағы өзекті мәселелердің түйіткілін түртіп, түйінін шешуге арналған тағылымы мол рухани кештің басты спикерлері: қалалық «Әл-Уәли» мешітінің Бас имамы Батырбек Тұрғанбайұлы бала тәрбиесіндегі Пайғамбар (оған Алланың игілігі мен сәлемі болсын) үйреткен тәлімді мысалға келтіре отырып, ата-ана мен бала арасында берік көпір орнату, салихалы ұрпақ өсіру туралы ой саларлық кеңестерімен бөліссе, «Нұр» мешітінің Бас имамы Марат Үркімбайұлы ерлі-зайыптылардың қарым-қатынасы, міндеттері мен құқықтары, бақытты отбасы болудың құпиясы жайында сөз қозғады.
Кеш соңында көрермендердің қатысуымен «сұрақ-жауап» ойыны ойнатылып, 3 кезең бойынша барлық сұрақтарға дұрыс жауап берген Ілесбек есімді азамат кіші қажылыққа жолдаманы жеңіп алса, одан бір ұпайға ғана есе жіберген Шынболат бауырымыз жүлделі екінші орынды иемденіп, Samsung S10 маркалы ұялы телефонды қанжығасына байлады.
Айта кетейік, мерекеге арналған мерейлі шараның басты демеушілері – үнемі шарапаты мол сауапты істердің қасынан табылатын белсенді азаматтардан құралған ҚМДБ-ның Сыр өңіріндегі өкілдігіне қарасты «Нұр» мешітінің ерікті жамағаты.
Тегін тренингке келіп, берекелі кештің куәсі болған 350-ге жуық көрермен ерекше әсерлерімен бөлісіп, ұйымдастырушыларға риясыз ризашылықтарын жеткізді. Алдағы уақытта да осындай ерекше форматтағы тағылымды жобалар көптеп жүзеге асырылуына тілек білдірді.
<img src="https://kyzylorda-news.kz/wp-content/uploads/2020/02/12trening2.jpg" alt="" />
<img src="https://kyzylorda-news.kz/wp-content/uploads/2020/02/12trening3.jpg" alt="" />

Қызылордалық азамат қажылыққа тегін жолдама алды

<a href="https://kyzylorda-news.kz/">Kyzylorda-news.kz.</a> Қазақ тілінің жетілуі – заман талабына сай өзгеріп отырғаны баршаға мәлім. Тарихқа жүгінетін болсақ, қазақ халқы өзге түркі халықтары сияқты 4-5 ғасыр бойы араб жазуын пайдаланды.
ХIХ ғасырдың екінші жартысынан бастап зиялылар, оның ішінде Ыбырай Алтынсарин тәрізді ағартушылар, қазақтың ұлттық жазба әдеби тілін қалыптастыру үшін оның дыбыстық жүйесін толық бере алатын жазуды жетілдіруді күн тәртібіне қоя бастады.
Жазуды жаңа әліпбиге көшірудің мәдени-әлеуметтік, лингвистикалық, экономикалық, саяси, ақпараттық, педагогикалық себептері бар. Осы орайда, қазақ жазуын латын графикасына көшіруде мезгілі жеткен мәселе екенін қазіргі Қазақстан қоғамында болып жатқан талқылаулар көрсетіп отыр деп ойлаймын. Барлық озық технологияның тіліне айналған латын әліпбиіне көшу — еліміз үшін, өнеріміз бен мәдениетіміз үшін үлкен рухани құбылыс. Елбасы өзінің «Болашаққа бағдар: рухани жаңғыру» мақаласында бұл мәселені таяу жылдардағы негізгі міндеттердің бірі деп бекітті. Әлемдік өркениет көшінен қалмай, қазақ тілінің халықаралық дәрежеге көтерілуін қаласақ, латын қарпін қолданысқа енгізудің мәні орасан. Қазіргі таңда латын әліпбиі үлкен беделге ие болып, қолданыс аясы да мүмкіндігі де зор екендігін танытып отыр. Латын әріптері&nbsp; графизация (әріп таңбалау) заңдылықтарына, яғни, «көру-қабылдау-тану» талаптарына да сай. Жер бетінде латын әліпбиі барлық салада қолданылатыны байқалады. Барлық дәрі-дәрмек атаулары, математика, физика, химия формулалары, көптеген терминдер, мамандықтарға қатысты ғылыми әдебиеттер т.б латын әліпбиімен байланысты екенін байқауға болады. Латын графикасын қолданатын барлық елдердің әліпбиіндегі әріп саны тілдегі фонемалар санынан әлдеқайда аз болуы да оның жетістігі болып табылады. Латын әліпбиінде әр түрлі диакритикалық таңбалар (нүкте, қос нүкте, сызықша, айшық, дәйекші т.б), яғни қосымша белгілер арқылы көптеген елдің барлық фонемалары латынның 26 таңбасымен ғана белгіленуі жазу үнемділігін танытатын тиімді әліпби дәрежесіне жеткізіп отыр.&nbsp; Жазуға қойылатын басты талап лингвистикалық (тілді дәл жеткізу) бағытта ғана емес, техникалық жағдайларға (баспа ісі, компьютер, телефакс, интернет т.б.) да сай болуы керек деп ойлаймын. Қазір латын әліпбиі осы талаптар биігінен де көрінеді, сондықтан оның бұл артықшылығын ескеріп,&nbsp; халық өз еркімен таңдауға мүмкіндігі болып тұрғанда, әлемнің озық елдері игілігін көріп, көпшілігі қолдап отырған латын әліпбиіне біздің де көшкеніміз дұрыс&nbsp; деп білемін.
&nbsp; Жазу – әрбір халықтың рухани, мәдени өсуін, даму деңгейін көрсететін әлеуметтік мәні зор құбылыс. Ол өткен мен бүгінді, бүгін мен келешекті жалғастыратын алтын көпір. Сондықтан жазу, әліпби адамзат тарихындағы құнды дүниелердің бірі ретінде ұрпақтан-ұрпаққа мирас етіп қалдыратын байлығымыз. Қазіргі орфографиямыздағы кейбір қиындықтарға қарап, «біздің жазуымыз осыншама сын көтермегені ме?» деп те ойлауға болмайды. &nbsp;Осы жазуымыз аға ұрпаққа білім беріп, оларды талай биіктерге жетеледі, қазақтың әдебиетін, мәдениетін, ғылымын көтерді, егеменді мемлекетімізге де қызмет етіп келеді. Енді жағдай өзгерді, біз бұрынғыны қанағат етіп қана қалмай, алға ұмтылған, әлемдегі дамыған озық елдердің деңгейінде ғана емес, алдыңғы қатардан көрінуге мүмкіндігі мол егеменді қазақ елі ретінде әліпбиіміз бен жазуымызға да мемлекеттік тіл дәрежесіндегі қазақ тілін әлемге таныта алатындай жағдай жасауымыз қажет. Латын графикасы арқылы таңбаланған қазақ әліпбиі мен жазуы қазақ елін&nbsp; биіктерге бастайтынына кәміл сенемін.
Гүлмира СЕЙІТҚАДЫР
Шиелі ауданы,
№207 «Жаңатұрмыс» орта мектебінің
қазақ тілі мен әдебиеті пәнінің мұғалімі

Латын әліпбиіне көшу – рухани жаңғыру талабы

<a href="https://kyzylorda-news.kz/">Kyzylorda-news.kz.</a> &nbsp;Бұрынғы Бас мүфти Серікбай қажы Ораз қызметінен денсаулығына байланысты кеткені белгілі болды, деп хабарлайды <a href="https://sputniknews.kz/society/20200207/12764956/Qazaqstan-Bas-mufti.html">Sputnik Қазақстан</a>.
Серікбай қажы Қазақстан мұсылмандары діни басқармасының IX құрылтайында отставкаға кеткенін жариялады, деп хабарлады Әзірет Сұлтан мешітінің мамандары. Оған денсаулық жағдайы себеп болған.
Серікбай қажы 2017 жылдың 8 желтоқсанында Қазақстан мұсылмандары діни басқармасының төрағасы, Бас мүфти болып сайланған еді.
Ол өзінің орнына Наурызбай қажының кандидатурасын ұсынды.
<blockquote>
 “Наурызбай қажы Тағанұлы менің бірінші орынбасарым ретінде көптеген игі жобаларды жүзеге асырды. Дін саласында тәжірибесі мол. Наурызбай қажы Тағанұлының діни басқарма жұмысын жандандырып, жаңа бастамаларға ұйытқы болатынына сенемін”, – деп атап өтті Серікбай қажы Ораз.
 “Құрылтайға еліміздің әр облысынан келген 300 делегат менің кандидатурама дауыс беріп, сенім білдіріп, Бас мүфти лауазымына сайлады. Бұл сенімді абыроймен ақтауға бар күш-жігерімді жұмсаймын. Жоспарлап отырған бірқатар жұмысымыз бар”, – деді ҚМДБ төрағасы, Бас мүфти Наурызбай қажы Тағанұлы журналистерге берген сұхбатында.
</blockquote>

Серікбай қажы Ораздың қызметінен неге кеткені белгілі болды

<a href="https://kyzylorda-news.kz/">Kyzylorda-news.kz.</a> Наурызбай қажы Тағанұлы енді Қазақстан мұсылмандары діни басқармасының төрағасы болды.
Жаңадан тағайындалған Бас мүфти бүгін Қазақстан мұсылмандары діни басқармасының кезектен тыс ІХ құрылтайында таныстырылды. Бұған дейін бірінші наиб мүфти қызметінде болған Наурызбай қажы Тағанұлы енді еліміздің мұсылмандарына рухани ұстаздық ететін болады.
Бұған дейін Бас мүфтидің қызметін атқарған Серікбай қажы Ораз Наурызбай қажы Тағанұлына сәттілік тіледі.
Еске сала кетелік, құрылтайға ҚР Ақпарат және қоғамдық&nbsp; даму &nbsp;министрі Дәурен Абаев және еліміздің түкпір-түкпірінен бас имамдар қатысты.
Өтпенов Наурызбай Тағанұлы 1977 жылдың 13 наурызында дүниеге келген.
Білімі:
1993-1997 жылдары Ташкенттегі «Имам Әл-Бұхари» атындағы Ислам институтында оқып жоғарғы діни білім алған.
1999-2001 жылдары ҚМДБ жанындағы Ислам институтын оқыған.
2009 жылы Мысыр Араб Республикасында қысқа мерзімде діни білімін жетілдірген.
2010 жылы Абай атындағы Алматы Мемлекеттік университетінің «Тарих» факультетін сырттай оқып бітіріп жоғарғы білім алған. 2011-2013 жылдары аталған университеттің «Дінтану» мамандығы бойынша магистратурасын бітірген.
2017 жылдан бастап «Нұр-Мүбарак» Египет ислам мәдениеті университетінде «Исламтану» мамандығы бойынша PhD докторантурасында оқуда.
Еңбек жолы:
1997-2006 жылдары Республикамыздың түрлі мешіттерінде имамдық қызметтерді атқарумен бастау алған.
2006-2011 жылдары ҚМДБ-ның Қарағанды өңіріндегі өкілі, Қарағанды қалалық №1 орталық мешітінің Бас имамы.
2011-2013 жылдары Қазақстан Республикасы Дін істері агенттігінің Діни бірлестіктермен байланыстар жөніндегі басқармасының Бас сарапшысы.
2013-2018 жылдары ҚМДБ төрағасының бірінші орынбасары, наиб мүфти, ҚМДБ-ның Астана қаласы бойынша өкілі, «Нұр Астана» орталық мешітінің Бас имамы.
2018 жылдың шілде-қазан айлары ҚМДБ төрағасының бірінші орынбасары, наиб мүфти, ҚМДБ-ның Түркістан қаласындағы кеңсе басшысы, Түркістан облысы бойынша өкілі имамы.
2018 жылдың қазан айынан бастап ҚМДБ төрағасының бірінші орынбасары, наиб мүфти, ҚМДБ-ның Нұр-Сұлтан қаласы бойынша өкілі, &nbsp;Республикалық «Әзірет Сұлтан» мешітінің Бас имамы.
Еңбек жолындағы жетістіктері:
Наурызбай Тағанұлының тікелей жетекшілігімен 2002-2005 жылдары ШҚО, Аягөз қаласында орталық және «Жаңауыл» мешіттерінің құрылысы сәтті жүргізіліп, іске қосылған. 2010-2011 жылдары Қарағанды қаласындағы орталық мешіттің салынуына үлес қосқан. Қарағанды облысында «Сұлу әлем», «Нұрлы мінбер», «Жұлдызды гол» атты жобаларды іске асырған. Республикалық БАҚ беттерінде жарияланған көптеген діни, рухани-танымдық мақалалар мен «Үміт сәулесі», «Мазһабсызбен сұхбат» атты кітаптардың авторы.
Марапаттары:
«Құрмет» орденінің иегері, Аягөз ауданының құрметті азаматы,&nbsp;Қазақтан Тәуелсіздігінің 20 жылдығы медалімен, Қазақтан Тәуелсіздігінің 25 жылдығы медалімен, Қарағанды облысы әкімінің құрмет грамотасымен, Нұр-Сұлтан қаласы әкімдерінің алғыс хаттарымен марапатталған.

Елімізде Бас Мүфти ауысты

<a href="https://kyzylorda-news.kz/">Kyzylorda-news.kz.</a> ҚМДБ-ның Қызылорда облысы бойынша өкілдігі, Жаңақорған аудандық мешіті және “Жаңарған Жаңақорған жастары” қоғамдық қорының ұйымдастыруымен Құран оқудан облыстық жарыс өтті.
Қазақстан мұсылмандары діни басқармасына 30 жыл толуына орай, «30 жылдық мерейтойға 30 игі шара» акциясы аясында өткен жарыста ҚМДБ-ның Қызылорда облысы бойынша Бас имамы Болатбек Ұласқанұлы қатысушыларға сәттілік тілей отырып, ұйымдастырушылар мен демеуші азаматтарға алғысын білдірді. Және де Нұр-Сұлтан қаласында өткен І республикалық медресеаралық Құран Кәрімді жатқа оқу жарысында «29-30-пара» аталымы бойынша бас жүлдені иемденіп, кіші қажылыққа жолдаманы жеңіп алған жерлесіміз Ж.Әлиакпарды жамағат алдында құттықтады.
Жаңақорғанда өткен тартысты сайыста облысқа қарасты қала, аудан мешіттерінен келген 50-ден астам үміткер Құран Кәрімді мәнерлеп және 2 парасын жатқа оқу бойынша додаға түсті.
Бағалау ережесіне сәйкес, үміткерлерге қазылар алқасы тарапынан үш сауал қойылып, шәкірттердің Құран аяттарын жаттау қабілеті, оқу мәнері және әуезділігі ескерілді. Қазылар алқасының шешіміне бойынша «Құран Кәрімді мәнерлеп оқудан» Р.Әлихан бірінші орынды жеңіп алса, ІІ-орынды Н.Аююбай, ІІІ-орынды М.Сұлтан мен Р.Өмірбектер иеленді. Ал «Құран Кәрімнің 2 парасын жатқа оқу» аталымы бойынша Н.Нәби, Қ.Мұқамбетқали, Ж.Жәпеков жүлделі І,ІІ,ІІІ-орындарға лайық деп танылса, сайыстың басты жүлдесі – кіші қажылыққа жолдаманы Б.Біржанов қанжығасына байлады.
Байқау соңында жеңімпаздарға қаржылай сыйлықтар таратылып, барлық қатысушыларға алғыс хаттар мен ынталандыру сыйлықтары табысталды.
<img src="https://kyzylorda-news.kz/wp-content/uploads/2020/02/4kuranoku2.jpg" alt="" />
<img src="https://kyzylorda-news.kz/wp-content/uploads/2020/02/4kuranoku3.jpg" alt="" />

Қазақстан және Қызылорда облысының жаңалықтары: Руханият