<a href="https://kyzylorda-news.kz/">Kyzylorda-news.kz.</a> Ертең “Евразия” спорт кешенінде қазақ күресінен XII облыстық «Алтын белбеу» жарысы басталады.
Бұл сыннан іріктеліп шыққан екі спортшы шілде айында Нұр-Сұлтан қаласында өтетін «Қазақстан барысы» турнирінде ҚР тұңғыш Президенті жүлдесін сарапқа салады.
Жарыс бағдарламасына сәйкес бүгін алдын-ала белдесулер өтуде.
Қазақстан Тәуелсіздігінің 30 жылдығы және Қажымұқан Мұңайтпасұлының 150 жылдығына арналған дүбірлі бәсекеге Байқоңыр, Қызылорда қалалары мен аудандардан 9 команда 200-ге жуық балуан қатысуда. Жарыс 3 кезеңнен тұрады және 3 жас ерекшелігі бойынша өткізіледі. Жас ерекшеліктері бойынша 2004-2005 жылы туған жасөспірімдер, 2002-2003 жылы туған жастар және ересектер арасында балуандар 26 салмақ дәрежесінде шеберлік байқасады. Қазақ күресінен «Түйе палуан» атанған спортшы «Сыр Барысы» атағын иеленіп, оған «Алтын белбеу» тағылады.
Ақтық белдесулер ертең сағат 10.00-де басталады. Жарыс карантин талаптарын сақтай отырып, көрермендерсіз өткізіледі.
<img src="https://kyzylorda-news.kz/wp-content/uploads/2021/05/img-20210504-wa0398.jpg" alt="" />
<img src="https://kyzylorda-news.kz/wp-content/uploads/2021/05/img-20210504-wa0399.jpg" alt="" />

&#8220;Қазақстан барысы&#8221;: Қызылордада іріктеу жарысы басталды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова ҚР еңбек сіңірген спорт шебері Элизабет Тұрсынбаеваның жүлдесіне арналған жасөспірімдер арасындағы республикалық турнирінің жеңімпаздарын марапаттады. Республикалық турнир 2021 жылдың 29 сәуір – 1 мамыр аралығында Қызылорда қаласындағы «Мұз айдыны» спорт кешенінде өткізілді.
<blockquote>
 «Баршаңызды 1 мамыр – Қазақстан халқының бірлігі мерекесімен шын жүректен құттықтаймын! Тәуелсізігіміздің 30 жылдық мерейтойы аясында Қазақстан спортының жарық жұлдызы, Сыр елінің мақтанышы Элизабет Тұрсынбаеваның жүлдесіне арналған республикалық турнир бүгін өз мәресіне жетті. Тұңғыш Президентіміз – Елбасы Нұрсұлтан Әбішұлы Назарбаевтың бастамасымен, Мемлекет басшысы Қасым-Жомарт Кемелұлы Тоқаевтың қолдауымен ел спорты қарқынды дамып, спортшыларымыз әлемдік додаларда жоғары жетістіктерге жетіп, Көк туымызды желбіретіп, Әнұранымызды асқақтатып келеді. Соның ішінде Элизабетті әлемдік спорт тарихында төрт айналымдық сальховты сәтті орындаған тұңғыш мәнерлеп сырғанаушы, Қазақстан спортының тарихында осы спорт түрінен қыздар арасында Әлем чемпионатында жүлде алған алғашқы спортшы ретінде бәріміз мақтаныш етеміз. Бүгінгі дәстүрлі шара жас ұрпақтың патриоттық сезімін арттырып, спортқа ынталандыра берері сөзсіз. Жарыстың жеңімпаздары мен жүлдегерлерін жеңістерімен құттықтаймын! Алдағы уақытта бұдан да биік белестерді бағындырып, жеңіс тұғырынан көріне беріңіздер!» – деді облыс әкімі Гүлшара Әбдіқалықова.
</blockquote>
Элизабет Тұрсынбаеваның жүлдесіне арналған республикалық турнир биыл бесінші мәрте өткізіліп отыр. Аталған жарыста еліміздің он облысынан 5-18 жас аралығындағы спортшылардан жасақталған 10 команда, 250-ден аса мәнерлеп сырғанаушы қысқа және еркін бағдарламалар бойынша бақ сынады.
<img src="https://kyzylorda-news.kz/wp-content/uploads/2021/05/180970543_3328806950555684_1022300763217740122_n.jpg" alt="" />
<img src="https://kyzylorda-news.kz/wp-content/uploads/2021/05/180881037_3328807250555654_6444740637646332295_n-1.jpg" alt="" />
<img src="https://kyzylorda-news.kz/wp-content/uploads/2021/05/180333213_3328807543888958_1976313871781524384_n.jpg" alt="" />

Гүлшара Әбдіқалықова республикалық турнирдің жеңімпаздарын марапаттады

<a href="https://kyzylorda-news.kz/">Kyzylorda-news.kz</a>. Қызылорда қаласындағы Достық үйінде Тәуелсіздіктің 30 жылдығына орай 1 мамыр – Қазақстан халқы бірлігі мерекесі күні қарсаңында дөңгелек үстел өтті.
«Достық, береке, бірлік – Тәуелсіздік тірегі» атты шараға облыстық ішкі саясат басқармасының басшысы Мира Қазбекова, ҚР Парламенті Мәжілісінің депутаты Бақытбек Смағұл, ҚР ҰҒА академигі Қылышбай Бисенов, этномәдени бірлестіктердің жетекшілері, жоғары оқу орындарының басшылары, көрнекті ғалымдар, қала және аудандардағы зиялы қауым өкілдері бейнебайланыс арқылы қосылып, қатысты.
Шараға қатысушылар ең алдымен «Сыр елі суретші көзімен: Кеше. Бүгін» атты облыстық суретшілердің жылжымалы көрмесін тамашалады. Көрмеге Сыр өңірінің белгілі суретшілерінің туындылары қойылды.
Іс-шара модераторы облыстық ішкі саясат басқармасының басшысы Мира Қазбекова қатысушыларды татулық пен достықты ту еткен – Қазақстан халқының бірлігі мерекесі күнімен құттықтап, дөңгелек үстел жұмысының маңызын атап өтті.
<blockquote>
 «Тәуелсіздіктің 30 жылдығында Елбасының көшбасшылығының арқасында, ел болып бірлесе атқарған жұмыстардың нәтижесінде саяси жүйесі тұрақты, экономикалық әлеуеті мықты, ұлттық рухы берік, бәсекеге қабілетті, халықаралық беделі зор қуатты мемлекет болып құрдық. Еңселі ел, іргелі мемлекет атануымызда бірлік, келісім және өзара қолдау қағидаттарына негізделген Қазақстан халқы Ассамлеясының орны ерекше», – деді Мира Қазбекова.
</blockquote>
Дөңгелек үстелді бейнебайланыс арқылы Нұр-Сұлтан қаласынан қосылған ҚР Парламенті Мәжілісінің депутаты Бақытбек Смағұл «Ынтымаө, бірлік, келісім, ең асыл бақыт – ел үшін» тақырыбындағы баяндамасымен жалғастырды. Сондай-ақ ҚР ҰҒА академигі Қылышбай Бисенов «Елбасы және Тәуелсіздік: Татулық пен келісім жолы» тақырыбында баяндама жасады. Ал облыстық неміс этномәдени бірлестігінің белсендісі Светлана Крюгер «Бірлік пен бейбітшілік – біздің ортақ мүддеміз» тақырыбында баяндама жасады.
Қорқыт Ата атындағы Қызылорда университетінің 3 курс студенті, ҚХА жанындағы «Абай қазынасына саяхат» клубының жетекшісі Елена Пак және облыстық «Кызылординске вести» газетінің жауапты хатшысы, журналист Кирилл Денисов танымдық шарада тұщымды ойларын ортаға салды.
Облыстық ішкі саясат басқармасының басшысы Мира Қазбекова мазмұнды шараны қорытындылай келе, Тәуелсіздік жылдарында дамудың қалыптасқандығына тоқталып, қазақы қаймағы бұзылмаған Сыр өңірінің бірлігі мен әрбір азаматтың Отанға деген сүйіспеншілігі, халқымыздың достығы мен өзара түсіністігі әрдайым берік болып, бірлігіміз мәңгі жасай берсін деген тілегін білдірді.

Қызылордада «Достық, береке, бірлік – Тәуелсіздік тірегі» атты шара өтті

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова тәуелсіз еліміздің ақпараттық кеңістігінде өзіндік орны бар «Qyzylorda» телеарнасының құрылғанына 30 жыл толуына орай арна ұжымымен кездесіп, 30 жылдық мерейтойымен құттықтады. Кездесуге телеарнаның қалыптасуына үлес қосқан ардагер журналистер, сала мамандары қатысты.
Аймақ басшысы ақпараттық саясатты жетілдіруде өңірдің өркенді істері мен айшықты оқиғаларынан өзекті хабарлар әзірлеп, көзі қарақты көрерменге шынайы әрі жедел хабар таратуда «Qyzylorda» телеарнасының үлесі зор екенін атап өтті.
«Qyzylorda» телеарнасы журналистикадағы жаңа тенденцияларды өндіріске батыл енгізген жетекші арналардың бірі. Мемлекет Басшысы Қасым-Жомарт Кемелұлы Тоқаевтың «Халық үніне құлақ асатын мемлекет» Тұжырымдамасын тиімді іске асыруда тікелей эфирде әлеуметтік-саяси мәселелерді қозғайтын «Өзекжарды» бағдарламасы, сан алуан тақырыпты қамтитын «Өмірдің өзі» әлеуметтік ток-шоуы, апталық «Үштаған»ақпаратты-сараптау бағдарламалары көрермен көзайымына айналып, телеарнаның оң имиджін қалыптастыруда айтарлықтай үлес қосып келеді. 
30 жыл ішінде телеарна көзі қарақты көрермен алдындағы миссиясын адал атқарып, шынайы әрі жедел хабар тарату қағидасын басты назарда ұстап келеді. Алдағы уақытта да телеарна билік пен қоғам арасындағы бірлікті сақтай отырып, ұлттың рухани жаңғыруына үлес қоса береді деген сенімдеміз»,-деді Гүлшара Әбдіқалықова.
Кездесуде облыстық телерадиокомпаниясында түрлі қызметтер атқарып, 16 жылдан бері іскер де білікті, ұйымдастырушылық қабілетін танытқан телеарна директоры Жағыппар Қарабала сөз алып, телеарнаны дамытуда мемлекет тарапынан қолдаудың жоғары екенін айтып, телевидение тарихына өлшеусіз үлес қосқан кәсіби мамандардың еңбегін ерекше атап өтті. Сондай-ақ, телеарнаның түлегі, «Қазақстан» РТРК» АҚ аймақтық хабар таратуды дамыту департаментінің директоры Арсений Дүйсенов, телевизия саласының негізін қалаушы тұлғалардың бірі, журналистика саласының ардагері, сарапшы журналист Айткүл Шалғынбаева телеарнаның қалыптасу кезеңіндегі ерекше сәттерге тоқталып, әсерлі естеліктерімен бөлісті.
<img src="https://kyzylorda-news.kz/wp-content/uploads/2021/04/179703113_3325146440921735_4955471142821408474_n.jpg" alt="" />
Жиында облыс әкімі Гүлшара Әбдіқалықова телеарнаны дамытуда өзіндік үлес қосқан, халыққа шынайы ақпарат жеткізуде ерекше қолтаңбасы бар журналистерге құрмет көрсетті.
Облыс әкімінің «Құрмет» грамотасы телеқондырғыларға қызмет көрсету жөніндегі инженер Жәнібек Жумановқа, шеф редактор Бекзат Есқалиевке табысталды. Ал, режиссер Гүлсара Мамбетова, персонал жөніндегі менеджер Дина Елеу, бөлім басшысы-жауапты шығарушы Асемгүль Тапалова, телеарна іргетасын қалаған маман Зина Есмаханова, репортер, редактор-жүргізуші Арсений Дүйсенов, ардагер журналист Айткүл Шалғынбаева облыс әкімінің «Алғыс» хатымен марапатталды.
«Qyzylorda» телеарнасы – республикалық филиалдардың ішінде халық шығармашылығын дамыту, жергілікті музыкалық контентті қалыптастыру бағытында арнайы телебайқаулар мен фестивальдар өткізіп келе жатқан бірден-бір арна.
1991 жылдың 30 сәуірінен бастап телеарна көгілдір экраннан жаңалықтар тарата бастады. Ал, 2009 жылдың тамыз айынан бастап телеарна республикада алғашқылардың бірі болып, облыс аумағына тәулігіне 15 сағат көлемінде хабар таратуға көшті.
30 жылдық мереке қарсаңында «Qyzylorda» телеарнасы заманауи телестудияда жаңалықтар таратуда.
<img src="https://kyzylorda-news.kz/wp-content/uploads/2021/04/179778992_3325148027588243_810348607537331689_n.jpg" alt="" />
<img src="https://kyzylorda-news.kz/wp-content/uploads/2021/04/180253002_3325148520921527_4947739664722961337_n.jpg" alt="" />

Гүлшара Әбдіқалықова «Qyzylorda» телеарнасының ұжымымен кездесіп, мерейтойымен құттықтады

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаев қазақстандықтарды Қазақстан халқының бірлігі күнімен құттықтады, деп хабарлайды&nbsp;<a href="https://www.akorda.kz/kz/memleket-basshysy-kasym-zhomart-tokaevtyn-kazakstan-halkynyn-birligi-kunimen-kuttyktauy-2935542">Ақорда.</a>
***
Құрметті отандастар!
Баршаңызды Қазақстан халқының бірлігі күнімен шын жүректен құттықтаймын!
Тұңғыш Президентіміз – Елбасы Нұрсұлтан Назарбаевтың бастамасымен белгіленген бұл мереке ғасырлар бойы қазақ жерінде берік орныққан достық пен ауызбіршілік, өзара құрмет пен сенім сияқты қастерлі құндылықтарға негізделген.
Тәуелсіздік кезеңінде негізі қаланған «әралуандығымыз – бірлікте» қағидаты Қазақстанның сан қырлы мәдениеті мен дәстүрін баға жетпес байлығымызға айналдырды. Ырыс-ынтымақ пен отаншылдық рух ұлттық кодымыздың ұйытқысы болып отыр.
Халқымыздың әділетті әрі дамыған мемлекет құрып, елімізді өркендету жолындағы мүддесі ортақ.
Біз қоғамдағы тұрақтылық пен келісімнің, өзара қолдау мен жасампаз еңбектің арқасында кез-келген қиындықты еңсеріп, көздеген мақсатымызға жетеміз.
Сіздерге зор денсаулық, бақ-береке тілеймін!
Әр шаңырақта татулық пен өзара түсіністік болсын!

Мемлекет басшысы қазақстандықтарды Қазақстан халқының бірлігі күнімен құттықтады

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова мәнерлеп сырғанаудан ҚР еңбек сіңірген спорт шебері, Әлем чемпионатының күміс жүлдегері Элизабет Тұрсынбаевамен кездесті. Жиынға спортшының ата-анасы Байтақ Тұрсынбаев пен Падишакан Сұлтаналиева қатысты.
Элизабет Тұрсынбаева Сыр еліне мәнерлеп сырғанаудан өтетін республикалық турнир аясында келіп отыр. 
Аймақ басшысы ел мақтанышына айналған мәнерлеп сырғанау спортында есімі әйгілі Элизабет Тұрсынбаеваның спорттағы жетістіктерін атап өтіп, Сыр елінің саңлақ спортшыға деген құрметі ерекше екенін жеткізді.
<blockquote>
 «Қадірлі Элизабет, өзіннің спорттық шеберлігін мен табандылығының арқасында еліміз халықаралық аренада жарқын жетістіктерге жетіп келеді. Сенің жеңісінді тек жерлес қызылордалықтар ғана емес, тұтас Қазақстан мақтан етеді. Әлемдік спортта ересектер арасындағы сайыста төрт айналымдық сальховты сәтті орындаған тұңғыш мәнерлеп сырғанаушы ретінде тарихта қаласың. Бұл – біз үшін биік бедел, мерей-мәртебе. 
 Спортшы үшін ең бастысы – алға қойған мақсатқа нәтижелі жету. 2019 жылы Жапонияның Сайтама қаласында мәнерлеп сырғанаудан өткен Әлем чемпионатында күміс медальді иеленген сенің жетістігін – Қазақстанды әлемге танытқан ерекше спорт оқиғасы болды. 2022 жылы Пекинде өтетін Олимпиада ойындарында ең жоғары дәрежедегі медальға қол жеткізіп, тәуелсіз Қазақстанның әнұраны бүкіл әлемде шырқалса деймін»,-деді Гүлшара Әбдіқалықова.
</blockquote>
Кездесуде Элизабетке қолдау көрсетіп, ата-аналық парызымен бірге жаттықтырушылық қызметін атқарып жүрген әкесі Байтақ Тұрсынбаев сөз алып, ілтипат танытқан барша Сыр жұртына алғыс білдіріп, Элизабеттің алдағы жоспарларымен бөлісті. Сондай-ақ, соңғы жылдары мәнерлеп сырғанау спортына жастардың қызығушылығы артып келе жатқанын атап өтті.
Жиында облыс әкімі спортта ел байрағын әлем елдерінде биікке көтеріп жүрген Элизабетті өмірге әкеліп, бойындағы талабы мен қабілетін танып, қанаттандырған анасы Падишакан Беймырзақызына Қызылорда облысының Құрмет грамотасын табыстады. Ал, Элизабетке сый-сияпат жасап, ілтипат танытты.
Айту қажет, бүгін Сыр елінде Элизабет Тұрсынбаеваның құрметіне арналған республикалық турнир басталды. Ел мақтанышының жүлдесіне арналған биылғы жарыс Тәуелсіздіктің 30 жылдық мерейтойы аясында өтіп отыр. Турнирге 10 облыстан 200-ге жуық жасөспірім қатысады. Дәстүрлі шара өскелең ұрпақтың патриоттық сезімін арттырып, көптеген баланы мәнерлеп сырғанау спортына, салауатты өмір салтына ынталандыруға жол ашады.
<img src="https://kyzylorda-news.kz/wp-content/uploads/2021/04/179810181_3322420417861004_5131891702258540275_n.jpg" alt="" />
<img src="https://kyzylorda-news.kz/wp-content/uploads/2021/04/180045938_3322421244527588_2696148485822384765_n.jpg" alt="" />

Облыс әкімі Элизабет Тұрсынбаевамен кездесті

<a href="https://kyzylorda-news.kz/">Kyzylorda-news.kz</a>. Бүгін ҚР Тұңғыш Президенті – Елбасы, ҚХА Төрағасы Нұрсұлтан Назарбаевтың төрағалығымен, ҚР Президенті Қасым-Жомарт Тоқаевтың қатысуымен Қазақстан халқы Ассамблеясының XXIX сессиясы өтті. Сессияның күн тәртібіндегі мәселе: «Бірліктің, татулық пен келісімнің 30 жылы». Жиынға Сыр елінен онлайн режим арқылы облыс әкімі – облыстық ҚХА төрағасы Гүлшара Әбдіқалықова, облыс әкімінің орынбасары – облыстық ҚХА төрағасының орынбасары Серік Ахмет, облыстық Ассамблеяның мүшелері және өңірдегі бірқатар этномәдени бірлестіктің жетекшілері қатысты.
Сессияны ашқан Елбасы Ассамблеяның алдына қоғамдық келісім мен ұлттық бірлікті одан әрі нығайту бойынша нақты міндеттер қойды.
Ассамблея сессиясы барысында Үндеу қабылданды, онда «30 жыл бұрын Тәуелсіздікке алғаш қол жеткізгеннен бастап халқымыз, Қазақстанның Тұңғыш Президенті – Елбасы Нұрсұлтан Әбішұлы Назарбаевтың кемел басшылығымен, қоғамдық келісім мен жалпыұлттық бірлікті – ел дамуының басты ұстанымы ретінде таңдады. Бұл қағидат – табысты да ауқымды әлеуметтік-экономикалық реформалардың, саяси жүйені үздіксіз демократияландырудың, ұлттың әлеуметтік капиталын дамытудың мызғымас іргетасына айналды», – деп көрсетілген.
Сессия барысында Елбасы Нұрсұлтан Әбішұлы Назарбаев Қазақстан халқы Ассамблеясының төрағасы лауазымын еліміздің Президенті Қасым-Жомарт Кемелұлы Тоқаевқа тапсырды.
<blockquote>
 «Қазақстан Республикасының Тұңғыш Президенті – Елбасы туралы» Конституциялық заңға, Ассамблея туралы заңға сәйкес маған Қазақстан халқы Ассамблеясының төрағасы лауазымын өмір бойы атқару құқығы берілген. Жалпы, мен сіздермен барлық уақытта бірге боламын әрі одан бас та тартпаймын. Дегенмен, Ассамблеяны басқаруға қатысты бірқатар құзірет еліміздің Президентіне жүктелген. Қазақстан халқы Ассамблеясы тірек ретінде іс басындағы Президенттің жанында тұруы тиіс және екінші жағынан Мемлекет басшысы да Ассамблеяға арқа сүйейді. Сондықтан мен Ассамблеяны басқару құқығымды Президент Қасым-Жомарт Тоқаевқа беру туралы шешім қабылдадым,- деді Елбасы.
</blockquote>
Мемлекет басшысы Қасым-Жомарт Тоқаев Елбасы Нұрсұлтан Әбішұлы Назарбаевқа Ассамблеяның Құрметті Төрағасы болу туралы ұсынысын жеткізді.
Сессиясы біткеннен кейін аймақ басшысы – облыстық ҚХА төрағасы Гүлшара Әбдіқалықова облыстық ассамблея мүшелері мен өңірдегі этномәдени бірлестіктердің өкілдеріне алға қойған міндеттер бірлесіп орындалатынын айтты.
<blockquote>
 «Жаңа ғана өткен Қазақстан халқы Ассамблеясының ХХІХ сессиясында, Елбасы Нұрсұлтан Әбішұлы Назарбаев пен Мемлекет басшысы, Қазақстан халқы Ассамблеясының Төрағасы Қасым-Жомарт Кемелұлы Тоқаев алдымызға бірқатар жаңа міндеттер қойды. Алдағы уақытта сол міндеттерді жүзеге асыру мақсатында облыстық ассамблеяның XХІIІ сессиясын өткізуді жоспарлаймыз. Баршаңызды 1 мамыр – Қазақстан халқының бірлігі күні мерекесімен құттықтаймын! Тәуелсіздігіміз тұғырлы, еліміз еңселі болғай!», – деді Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2021/04/179517530_3320644948038551_1662329775644334040_n.jpg" alt="" />
Айта кетейік, өңірде 11 этномәдени бірлестік жұмыс жасайды. Жалпы аймақта 35 этнос өкілдері тұрады.

Қазақстан халқы Ассамблеясының XXIX сессиясы өтті

<a href="https://kyzylorda-news.kz/kogam/qyzylordalyq-syr-tuelegi-toby-zhueldeli-oryn-enshiledi-108613/">Kyzylorda-news.kz.</a> Бүгін Қызылорда қаласындағы Тағзым алаңы аллеясында Чернобыль радиациялық апат құрбандарын еске алу күніне арналған митингі және гүл шоқтарын қою рәсімі өтті.
Шараға облыс әкімінің орынбасары Серік Әбжәліұлы Ахмет, облыстық және қалалық ардагерлер кеңесінің төрағалары, «Чернобыль ардагерлері», «Ару-Ана» қоғамдық бірлестігінің мүшелері қатысты. 
Адамзатқа орны толмас зор қасірет әкелген әлемдегі ең ірі ядролық техногендік апатқа биыл 35 жыл толды. Апаттың салдарынан 5 миллионнан астам халық зардап шекті. Оны залалсыздандыруға 600 мыңға жуық адам қатысты. Химиялық қорғау полкі құрамында 32 мың қазақстандық болды. Қызылорда облысынан апаттың зардабын жоюға 1000-ға жуық азамат қатысса, бүгінде оның 300-дейі ғана ортамызда.
<blockquote>
 «Сіздердің әрбіріңіздің Тәуелсіз еліміз бен Сыр өңірі үшін орындарыңыз бөлек. Ел мерейін еселеп, тәу етер Тәуелсіздігімізді баянды ету Сіз бен біздің қолымызда екендігін ешқашан ұмытпауымыз қажет. Халқымызда «Ерлік – жан дүниенің ұлы қасиеті» – деген сөз бар. Өмірінің өлшеулі бір бөлігін, жауқазын жастық шағының сүбелі үлесін қиыншылық пен қасіретті кезеңде өткізсе де бүгін ортамызда жүрген рухы биік, батыл жандармен жүздесу – біз үшін үлкен ғанибет.Баршаларыңыздың дендеріңізге саулық, отбастарыңызға амандық тілеймін! Тәуелсіздігіміз тұғырлы, елдігіміз әрқашан еңселі болсын», – деді облыс әкімінің орынбасары Серік Ахмет.
</blockquote>
Еске алу шарасының жалғасы ретінде өңіріміздегі барлық білім беру ұйымдарында онлайн ашық тәрбие сабақтары, музейлер мен кітапханаларда «Чернобыль АЭС апатына 35 жыл» тақырыбында онлайн көрмелер ұйымдастырылуда. Жалпы залалдың зардабын жоюға атсалысқан азаматтардың мүддесін қорғайтын Қызылорда облыстық және қалалық «Чернобыль ардагерлері», «Ару-Ана» Кеңес Армиясы, Чернобыль және Ауған жесірлерінің одағы» қоғамдық бірлестіктері жұмыс жасайды.
<img src="https://kyzylorda-news.kz/wp-content/uploads/2021/04/178121512_1277184622677047_5473962846235564841_n.jpg" alt="" />
<img src="https://kyzylorda-news.kz/wp-content/uploads/2021/04/178518886_1277184682677041_2886373970185445537_n.jpg" alt="" />

Чернобыль радиациялық апат құрбандарын еске алуға арналған митинг өтті

<a href="https://kyzylorda-news.kz/">Kyzylorda-news.kz</a>. Биыл облыс кітапханаларында «Кітап ғажайып әлем» атты кітап оқу марафоны, «Менің ең сүйікті кітабым» оқырмандар арасында кітап талқылау, мемлекеттік қызметшілер арасында «Жылдың үздік оқырманы» байқауы, «Оқуға құштар мектеп» жобасы, «Жазғы кітапхана», «Отбасымызбен оқимыз» атты сайыс, жергілікті ақын-жазушылармен кездесу кештері ұйымдастырылады. Бұл туралы Өңірлік коммуникациялар қызметінің ақпарат алаңында өткен брифингте Ә.Тәжібаев атындағы облыстық әмбебап ғылыми кітапханасының басшысы Нұрлыбек Мыңжас мәлімдеді.
<blockquote>
 «Кітап – адам баласы ақыл-ойынан туған рухани байлықты сақтап, оны ұрпақтан ұрпаққа жеткізіп отыратын құрал, білім мен тәрбие көзі. Біз облыс кітапханаларында кітаптар мен авторларды насихаттау, олардың әдеби еңбектерін халық санасына сіңіру мақсатында көптеген шаралар өткізіп келеміз. Алайда, бүгінгі күнгі эпидемиологиялық ахуалға байланысты барлық шараларды онлайн форматта өткізуге мәжбүрміз. Биыл жыл бойы оқырмандарға арналған сайыстар және марафондар өткізбекпіз. Сондай-ақ, «Тәуелсіздіктің 30 жылдығына – 30 кітап» атауымен танымал қазақстандық авторлардың поэзия, проза, драматургия, балалар әдебиеті және аударма саласындағы 30 үздік шығармасы жалпыхалықтық оқуға іріктелді. Бұл жұмыстар біздің өңірде де өтеді. Бұндай шаралардың ұлт пен ұрпақты тәрбиелеуде маңызы зор», – деді Нұрлыбек Кәрбозұлы.
</blockquote>
Бұдан бөлек, облыста жастарды әдебиетке тарту, олардың ақындық және жазушылық қырларын шыңдап, қазақ қаламгерлерінің қатарына қосу бойынша да жұмыстар жүргізіліп келеді.
<blockquote>
 «Сыр бойы – өнерлі жастардың, ақындар мен жыраулардың қасиетті мекені. Бүгінге дейін сыр топырағынан алдына қара салмайтын небір мықтылар өтті. Қазір солардың ізін жалғаған жастар жетерлік. Бүгінде біз облыс бойынша 40-қа жуық талантымен тәнті еткен жас ақындар мен жазушыларды іріктеп, олардың рухани өсуіне барынша жәрдемдесіп, бағыт-бағдар беріп келеміз. Ол үшін Ә,Тәжібаев атындағы кітапханада талай шаралар өткізіп, жастардың еңбегін жұртшылыққа көрсетіп әрі насихаттап жатырмыз. Алдағы уақытта олардың кітаптарының шығуына, авторларға қаламақы төленуіне жағдай жасаймыз. Бұл бағыттағы жұмыстар біртіндеп шешілетін болады, – деді Қазақстан Жазушылар одағының облыстық филиалының төрайымы Қаршыға Есімсейітова.
</blockquote>
<img src="https://kyzylorda-news.kz/wp-content/uploads/2021/04/176886066_1275014579560718_191483839651208092_n.jpg" alt="" />

Облыстық кітапханада 30 үздік шығарма жалпыхалықтық оқуға іріктелді

Kyzylorda-news.kz. Бүгін&nbsp;жыр алыбы&nbsp;Жамбыл Жабаевтың 175 жылдық мерейтойын&nbsp;республика көлемінде&nbsp;ресми&nbsp;түрде&nbsp;<a href="https://turkystan.kz/article/140136-zhambyl-zhabaevty-175-zhyldy-mereytoyy-bastaldy/">мерекелеу басталды.</a>&nbsp;ҚР&nbsp;Мемлекеттік хатшысы&nbsp;Қырымбек Көшербаев елордадағы Жамбыл ескерткішіне гүл&nbsp;шоқтарын қойып, Қ.Қуанышбаев атындағы Мемлекеттік академиялық қазақ музыкалық драма театрының жаңа ғимаратында өткен мерейтойлық жылдың салтанатты ашылуына&nbsp;ресми тұлғалармен, мәдениет және ғылым қайраткерлерімен, Алматы және Жамбыл облыстарынан келген делегация өкілдерімен бірге қатысты.
<img src="https://turkystan.kz/wp-content/uploads/2021/02/foto-28.jpg" alt="foto 28" title="Жамбыл Жабаевтың 175 жылдық мерейтойы басталды 2" />
Мерекелік кештің қонақтары жаңа театр фойесінде ұйымдастырылған Жамбыл Жабаев мұражайының экспозициясымен танысты. Салтанатты іс-шара Жамбылдың 175 жылдығына арналған мерекелік концертпен жалғасты. Жамбылдың өмірі мен өнері туралы баяндама жасаған ҚР Мәдениет және спорт министрі Ақтоты Райымқұлова жиынды ашты. Қ.Қуанышбаев атындағы Мемлекеттік академиялық қазақ музыкалық драма театры мен «Астана Опера» мемлекеттік опера және балет театры симфониялық оркестрінің әртістері көрермен назарына «Жыр алыбы – Жамбыл» атты театрландырылған қойылым ұсынды. Ұлы ақынның баға жетпес мұрасын, өзіндік ерекшелігі мен дарынын ашып көрсететін әдеби-музыкалық композицияда оның айтыстары мен әйгілі «Кең байтақ Қазақстаным», «Ақындарға арнау», «Күләшқа», «Ленинградтық өренім!» және т.б. шығармалары орындалды. Сонымен қатар, мерекелік бағдарламада Құрманғазы атындағы Қазақ ұлттық халық аспаптары оркестрі, Н.Тілендиев атындағы «Отырар сазы» академиялық фольклорлық-этнографиялық оркестрі, «Жастар» театры және «Астана Балет» театрының әртістері, сондай-ақ, «Қорқыт» этно-ансамблі, «Құлансаз» фольклорлық-этнографиялық ансамблі, К.Әзірбаев атындағы Жамбыл облыстық филармониясы және «Акак» комузшылар ансамблінің (Қырғызстан) жеке орындаушылары өнер көрсетті.
<img src="https://turkystan.kz/wp-content/uploads/2021/02/foto-34.jpg" alt="foto 34" title="Жамбыл Жабаевтың 175 жылдық мерейтойы басталды 3" />
Ақтоты Райымқұлова, ҚР Мәдениет және спорт министрі:
<img src="https://turkystan.kz/wp-content/uploads/2021/02/foto-13-300x200.jpg" alt="foto 13" title="Жамбыл Жабаевтың 175 жылдық мерейтойы басталды 4" />
– Әуреге салған пандемия жағдайында Абайдың 175 жылдығын лайықты түрде атап өттік. Міне, тағы бір ұлы тойдың кезегі келіп тұр. Биыл ұлтымыздың ұлы жыршысы Жамбылдың 175 жылдығын атап өткелі отырмыз. Қазақтың рухани қос алыбы Абай мен Жамбылдың әрбір мерейтойы мемлекетіміздің мәртебелі белестерінің межесіндей. Біз уақыт аламанының әр айналымында өрісті істерімізді ақыл таразасына салып келеміз. Қос тұлғаның торқалы тойында ұлтымыздың жоғары жетістіктеріне баға беріп, рухани өрлеудегі түбірлі істерімізді түгендеу дәстүрге айналды. Тәуелсіздікті жаңа алып, ел еңсесін енді көтеріп жатқанда Тұңғыш Президент-Елбасы Нұрсұлтан Назарбаев ұлы даланың ұлы тұлғаларының мерейтойларын ел болып атап өту жөнінде шешім қабылдады. Мұны жұртшылық әруақты сыйлап, құндылықтарды құрметтеп, өткенін көреген деп білетін ұлы халықтың ұлағатты ұйғарымы ретінде қабылдады. Араға ширек ғасыр салып, XIX ғасырдың ортасында өмірге келген екі ұлы ақыннынң 175 жылдықтары рет-ретімен жоғары деңгейде&nbsp; мерекеленуде. Ұлтымыздың осындай ұлы тұлғаларынсыз ғасыр сырын, ғасыр мұңын түсіну бізге әлдеқайда қиын соғар еді. Жамбылдың 175 жылдығына орай, биыл республика бойынша 500-ге жуық әлеуметтік, имидждік, ғылыми, танымдық іс-шаралар жоспарланған. Бұдан бөлек, ақын туралы фильмдер түсріліп, өлеңдерінің жаңа жинақтары шығарылады және кітап көрмелерін ұйымдастыру, мерейтойлық монета, пошта маркасын әзірлеу және тағы басқа іс-шараларды өткізу көзделіп отыр.
Салтанат Жамбылова, Жамбыл Жабаев әдеби-мемориалды музейінің меңгерушісі, ақынның немересі:
<img src="https://turkystan.kz/wp-content/uploads/2021/02/foto-1-300x210.jpg" alt="foto 1" title="Жамбыл Жабаевтың 175 жылдық мерейтойы басталды 5" />
– Жамбыл атамыздың 175 жылдығына арналған іс-шараны облыс көлемінде тойлауды қаңтар айынан бастап кеттік. Ал республика көлеміндегі алғашқы іс-шара бүгін ұйымдастырылып отыр. Біле білсеңіз, атаның өзі тұрған үйі бір жылдан кейін музейге айналды. Атамыздың туғанына биыл 175 жыл толса, музейіміздің ашылғанына биыл 75 жыл болды. Бүгінгі іс-шараға атаның киген киімдерін, қолданған заттарын, алған сыйлықтарын жұртшылық білсін, көрсін деген мақсатпен осында алып келдік. Жалпы, біздің музейдегі бағалы заттардан көрме ұйымдастыру ісі тек бас қаламен шектелмейді. Бізді Көкшетау, Атырау, Қызылорда облыстарындағы музей меңгерушілері шақырып жатыр. Сонымен қатар, республика бойынша Жамбыл атындағы мектептерде онлайн режимде байланыс орнатудамыз.
Мырзатай Жолдасбеков, мемлекет және қоғам қайраткері, филология ғылымдарының докторы, профессор:
<img src="https://turkystan.kz/wp-content/uploads/2021/02/foto-12-300x200.jpg" alt="foto 12" title="Жамбыл Жабаевтың 175 жылдық мерейтойы басталды 6" />
–Былтыр бір жыл бойы Абай атамыздың 175 жылдығын тойладық. Осылайша, ұлы ақынды білетін әлем жұртшылығы оны бұрынғыдан бетер тани түсті. Ал енді биыл Жамбыл атамыздың 175 жылдығын тойлатқалы отырмыз. Ғабит Мүсірепов ағамыз Жамбылдың 125 жылдығына арнап «Феномен Феникс» атты мақала жазған. Сол мақалада ол «Жамбыл дүниеге екі рет келген адам, бір рет тоғыз ай, тоғыз күн толғатып, ана құрсағынан туды, сосын жасы жетпістен асқанда заман құрсағынан тағы бір туды» деп тауып айтқаны бар. Жалпы, кезінде Жамбылдың революцияға дейінгі өмірі туралы материал аз болды. Мен Жамбылдың өмірі туралы докторлық диссертация қорғадым. Негізі, ол кісі төңкеріс алдындағы өмірді ашық сипаттаған.
Ұзынағаш, Қаратас,
Қалқабайдай қайран жас.
Бекеттен нан қоймайды,
Жалаң аяқ, жалаң бас.
Қайтіп жаның ашымас,
Неткен заман қатыбас.
Еткен еңбек, төккен тер
Қалай түкке татымас?!, – деп өз заманының сипатын керемет жеткізген. «Жамбылдың балалық шағы» деген көркем фильмге сценарий жаздым. Ол кісі туралы бірнеше кітап жазып шығардым. Көпшілік биылғы мерейтой аясында Жамбыл туралы көп мәліметке қанық болады деп ойлаймын.
&nbsp;Сауытбек Әбдірахман, ҚР Парламент Мәжілісінің депутаты:
<img src="https://turkystan.kz/wp-content/uploads/2021/02/foto-2-300x200.jpg" alt="foto 2" title="Жамбыл Жабаевтың 175 жылдық мерейтойы басталды 7" />
–Бүгінгі мерейтой– елдегі бір жақсылықтың белгісі. Себебі былтыр Абайдың 175 жылдығын тойлау кезінде мұндай кеш өткізуге, көп адам жинауға мүмкіндік болмады. Ал қазір елдің барлық өңірі қауіпті қызыл аймақтан шығып, көктемнің самалы ескелі тұрған жақсы шақта ұлы Жамбылдың тойы басталғалы жатыр. «Ұлы Жамбыл» деген сөз баяғы штамптардың, стандарттардың қайталануы емес. Жамбыл заман ауысқан кезде уақыт сынына қайтадан түсті. Тәуелсіздік алған алғашқы жылдарда Жамбыл мұрасына сыни көзқарас күшейді, өзі сүрген заманды көтере мақтап, саясаттың сойылын соққан ақын деген пікірлер көп айтылды. Бірақ уақыт өте келе, көпшіліктің Жамбылдың шын мәнінде эпик-ақын, бүкіл бір заманның сөзін жеткізген, сол дәуірдің шындығын ашқан сөз зергері екеніне көзі жетті. Жамбылдың өз заманының көсемдеріне арнаған жырларының көркемдігі қайран қалдырады. Оның сыртында ақынның айтыстары, қисса-дастандары да ерекше. 1996 жылы Мәдениет министрінің бірінші орынбасары қызметін атқарып жүргенімде Санкт-Петербургте ұйымдастырылған Жамбыл туралы кешке қатыстым. Сол кештің соңында Ресей Мемлекеттік Думасының бір депутаты «Бала күнімда анам мені Жамбылдың «Колыбельная» әнімен ұйықтататын» деді. Қазақ ақынының өлеңі өзге елдің бесік жырына айналуы деген ғажап нәрсе! Осылайша, Жамбылды қай жағынан қарасақ та, керемет тұлға екенін байқаймыз. Ең қиын жылдарда халықтың сөзін сөйлеп, қазақтың даңқын асқақтатқан ұлы бабамызды қалай құрметтесек те жарасады.
Дәулеткерей Кәпұлы, Қазақстан Жазушылар одағы Нұр-Сұлтан қалалық филиалының төрағасы:
<img src="https://turkystan.kz/wp-content/uploads/2021/02/foto-6-300x226.jpg" alt="foto 6" title="Жамбыл Жабаевтың 175 жылдық мерейтойы басталды 8" />
–«Ұлы даланың Гомері» атанған Жамбыл Жабаевтың шығармашылығын қай ғасырға насихаттасаң да, өлмейді, сөнбейді деп білемін. Өйткені Жамбыл – екі ғасырдың арасындағы алтын көпір. Жамбыл Кеңес дәуірінің біраз жақсылығын көрді. Көп адам оның Сталинді жырлауын, саясатқа араласуын алға тартып, шығармашылығын мансұқтағысы келеді. Бірақ, олар қателеседі. Жамбылдың эпикалық шығармаларын алып қарасаңыз, оның таңды таңға ұрып жырлайтын жырлары қазақ даласындағы синкреттік өнер – жыраулық дәстүрдің ең үлкен ірі тұлғасы екенін байқайсыз. Жамбыл сондай тұлға ретінде қаралуы керек және осы тұрғыда насихатталуы қажет. Жамбылдың ізбасары Кенен Әзірбаев «Жамбыл жыры» дастанында ақынның тұлғасын толық ашып берген. Мысалы, Романовтар әулетінің 300 жылдық тойына шақырылмаған Жамбыл қазақ-қырғыз ақындарының думандатып отырған жеріне кіріп келіп, былай деп айтқаны бар:
Атам батыр Қарасай,
Ағам ақын Сүйінбай,
Петроград, Алматы,
Бір жылдық жол арасы-ай.
Патшаның қуын қарашы-ай!
Өзі келмей істеткен
Айдалаға тамаша-ай.
Қазақ пенен қырғыздың
Табақ-табақ еті мен
Тойғызып жатыр сабасы-ай.
Өңшең ұлық өгіздей,
Біз бұзау мен танасы-ай.
Сол кезде ұлықтарға жақын болған ақын-жыршыларды осылайша сынап, «Жұртқа керек өлеңді, ауылға барып айталық» деп ақындардың барлығын тұрғызып алып кеткен. Түсініп тұрғаныңыздай, Жамбылдың өз заманында ақындық миссиясы болған. Сол себепті Жамбылды ағаш атқа мінгізгенді қойып, бұрын қалай керемет ұлықталса, қазір де солай құрметтеу керек.

Қазақстан және Қызылорда облысының жаңалықтары: Қазақстан Тәуелсіздігіне – 30 жыл

“Қазақстан барысы”: Қызылордада іріктеу жарысы басталды

Гүлшара Әбдіқалықова республикалық турнирдің жеңімпаздарын марапаттады

Қызылордада «Достық, береке, бірлік – Тәуелсіздік тірегі» атты шара өтті

Гүлшара Әбдіқалықова «Qyzylorda» телеарнасының ұжымымен кездесіп, мерейтойымен құттықтады

Мемлекет басшысы қазақстандықтарды Қазақстан халқының бірлігі күнімен құттықтады

Облыс әкімі Элизабет Тұрсынбаевамен кездесті

Қазақстан халқы Ассамблеясының XXIX сессиясы өтті

Чернобыль радиациялық апат құрбандарын еске алуға арналған митинг өтті

Облыстық кітапханада 30 үздік шығарма жалпыхалықтық оқуға іріктелді

Жамбыл Жабаевтың 175 жылдық мерейтойы басталды

Қазақстан және Қызылорда облысының жаңалықтары: Қазақстан Тәуелсіздігіне – 30 жыл

&#8220;Қазақстан барысы&#8221;: Қызылордада іріктеу жарысы басталды

Гүлшара Әбдіқалықова республикалық турнирдің жеңімпаздарын марапаттады

Қызылордада «Достық, береке, бірлік – Тәуелсіздік тірегі» атты шара өтті

Гүлшара Әбдіқалықова «Qyzylorda» телеарнасының ұжымымен кездесіп, мерейтойымен құттықтады

Мемлекет басшысы қазақстандықтарды Қазақстан халқының бірлігі күнімен құттықтады

Облыс әкімі Элизабет Тұрсынбаевамен кездесті

Қазақстан халқы Ассамблеясының XXIX сессиясы өтті

Чернобыль радиациялық апат құрбандарын еске алуға арналған митинг өтті

Облыстық кітапханада 30 үздік шығарма жалпыхалықтық оқуға іріктелді

Жамбыл Жабаевтың 175 жылдық мерейтойы басталды

“Қазақстан барысы”: Қызылордада іріктеу жарысы басталды