<a href="https://kyzylorda-news.kz/">Kyzylorda-news.kz</a> Кеше Қызылорда облыстық филармониясы Жыраулар үйінде «Дәуірлердің дүбірі» атты жыр кеші &nbsp;өтті.Қазақ хандығының 560 жылдығы негіз болған рухани кешке арнайы Ақтөбе қаласынан қонақтар, зиялы қауым өкілдері, жергілікті жыршы-жыраулар қатысты. Кеш тізгінін «ҚР Мәдениет саласының үздігі» төсбелгісінің иегері, жыршы Марат Сүгірбай ұстады. Тағылымды кеште талғамы жоғары көрермен XV-XІХ ғасырда жыршы-жыраулар шығармашылығына арқау болған тарихи жырлармен сусындады.Дәстүрлі өнер кешінде Асан қайғы, Доспамбет, Қазтуған, Шалкиіз, Жиембет, Махамбет, Марқасқа, Бұқар жыраулардың, Төле би, Тілеуке Құлекеұлы, Саршуаш ақындардың толғаулары тыңдарманның құлақ құрышын қандырды. Жырларды нақышына келтіре орындаған Сыр еліне белгілі өнер өкілдері – Әділхан Қуаңбаев, Шолпан Бимбетова, Ақмарал Ноғайбаева, Руслан Ахметов, Тоғжан Өтенова, Бисенбек Төлеубаев, Бексұлтан Орынбасаровтар болды.Рухани кешке Талсуат оңалту орталығының ем алушылары да қатысып, жыр терапияға қанық болды.<img src="https://knadmin.beoblood.kz/uploads/Zhyr_t_gilgen_kesh_2_d26bb8ae91.jpg" alt="Жыр төгілген кеш 2.jpg"><img src="https://knadmin.beoblood.kz/uploads/Zhyr_t_gilgen_kesh_3_8b28975151.jpg" alt="Жыр төгілген кеш 3.jpg">Фото: Жыраулар үйі

Жыр төгілген кеш

<a href="https://kyzylorda-news.kz/">Kyzylorda-news.kz</a> Кеше Өнер орталығында талантты әнші, «Мәдениет саласының үздігі» төсбелгісінің иегері Гүлфира Әлиханованың «Әйел&nbsp;–&nbsp;шырақ» атты ән кеші өтті.Облыстық филармония солисі ретінде кәсіби сахна төріне шаққанына 20 жыл толған Гүлфира Нариманқызының қоржынында облыстық, республикалық және халықаралық конкурстардың жүлделері бар. Өзінің лирикалық әуезді әндерімен көрермен көзайымына айналған ол, шығармашылығын ұдайы жаңартып, жаңашыл репертуармен толықтырып тұрады.Сырдың ерке де, ерек әншісі кеш шымылдығын "Ән бастау" әнімен ашып, тақырыпқа арқау болған "Әйел – шырақ" әнімен жалғады. Ұмытылмас кеште ақын, әнші, сазгер, ҚР «Мәдениет саласының үздігі» төсбелгісінің иегері Индира Елубаева, қазақ эстрадасының жарық жұлдызы Кеңес Әлімжан және сырбаз әнші Бекзат Молдабергенов өнер көрсетіп, кеш иесімен бірге дуэт боп шырқады. Сонымен бірге, Гүлфира Әлиханованың қызы Сезім Ұлықбекқызы да әсем әнімен көрермен қошеметіне бөленді. Кеште өнер иесі қос ата-анасына құрмет гүлін ұсынып, жиналған қауымның жүрегін елжіретті.Лирикалық әндер салтанат құрған сазды кеште облыстық филармонияның режиссері Азиза Іздіқұлованың орындауында "Құмсағат" әнінің тұсауы кесілді. Сондай-ақ ән кешін "Томирис" және "Ai-Aru" ұжымдары бимен көркемдесе, облыстық филармония солистері "Жаңа күн" әнімен қорытындылады.Ән кешінің режиссері ҚР Мәдениет саласының үздігі&nbsp;– &nbsp;Азиза Іздіқұлова.<img src="https://knadmin.beoblood.kz/uploads/G_lfira_lihanovany_n_keshi_tti_1_15792a5ee1.jpg" alt="Гүлфира Әлиханованың ән кеші өтті 1.jpg"><img src="https://knadmin.beoblood.kz/uploads/G_lfira_lihanovany_n_keshi_tti_2_736719a2c3.jpg" alt="Гүлфира Әлиханованың ән кеші өтті 2.jpg">

Гүлфира Әлиханованың ән кеші өтті

<a href="https://kyzylorda-news.kz/">Kyzylorda-news.kz</a>&nbsp;Шымкент қаласында өткен республикалық «Күміс домбыра-2024» атты жас ақындар айтысында сырбойылық Бексұлтан Орынбасар топ жарып, күміс домбыра иегері атанды.– Айтыс өте тартысты өтті. Екі күнге созылған өнер бәйгесінде елімізден 16 ақын бақ сынады. Бірінші күні 8 ақын іріктелді. Екінші күні үш айналымнан 4 ақын оза шығып, финалға дейін жеттік. Айтысқа бір ай дайындалдым, нәтижесінде бәрі ойымдағыдай болып, жеңіске жеттім. Сыр еліне "Алтын домбырадан" кейін "Күміс домбыра" келе жатыр, – деді Бексұлтан Орынбасар.Республикалық деңгейде ұйымдастырылған бұл айтыс өскелең ұрпақты отансүйгіштікке тәрбиелейді. Сондай-ақ, қазақтың төл өнері мемлекеттің мерейін арттырары сөзсіз.<img src="https://knadmin.beoblood.kz/uploads/K_mis_dombyra_yzylordada_e4041afbe2.jpg" alt="Күміс домбыра Қызылордада.jpg">Фото: Өңірлік коммуникациялар қызметі

"Күміс домбыра" Сыр елінде

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев 10 қаңтарда «Қызылорда - Астана» бағытындағы ұшақ бортында адам өмірін құтқарып қалған жерлесіміз Дінмұхаммед Бектұрғанның ата-анасы Нұрболат және Ғалия Нұрсейітовтермен кездесті.Дінмұхаммедтің жас болса да, шұғыл әрі батыл, сауатты әрекет жасағанына ризашылығын білдірді. Баласына жақсы тәлім-тәрбие бергені үшін ата-анасына алғысын жеткізді.Интерн маман оқуын әрі қарай үш жылдық резидентурада жалғастыруды жоспарлаған. Аймақ басшысы елдің атынан алғыс ретінде Дінмұхаммед Бектұрғанның оқу ақысын төлеуге қолдау білдіретінін айтты.<blockquote>«Дінмұхамед медициналық көмекке мұқтаж азаматқа дер кезінде алғашқы жәрдем көрсетіп, өмірін сақтап қалды. Оның уақыт оздырмай қабылдаған шешімі, сауатты іс-қимылы өзі сияқты медицина мамандығында білім алатын жастарға үлгі-өнеге болды.Бұл арқылы Дінмұхамед өз мамандығын жақсы меңгергенін ғана емес, ата-анасынан, ұстаздарынан, аға буын әріптестерінен тағылымды тәрбие алғанын көрсетті.Дінмұхамед секілді жас мамандар – еліміздің болашағы. Біз осындай азаматтарға әрдайым қолдау көрсетіп, ерлік ісін өскелең ұрпаққа үлгі етіп насихаттауымыз қажет.Мемлекет басшысы Қасым-Жомарт Кемелұлы: «Мемлекетіміздің келешегі – жастардың қолында. Ол жай ұран емес. Бұл – біздің басты саясатымыз. Сондықтан келешекте де біз жастарды қолдаймыз. Оларға жәрдем береміз. Әсіресе, дарынды жастарды тұрақты түрде қолдауымыз керек» деген болатын.Білімді, білікті, адал, туған елінің патриот жастарын қолдау мемлекеттік саясаттың басты бағыттарының бірі болып қала береді.Президентіміз тек жастардың ғана емес, өскелең ұрпақты тәрбиелейтін ұстаздардың, қарапайым еңбек адамдарының өнегелі істерін әрдайым көпке үлгі етіп айтып келеді. Өз мамандығын жетік білуге талпынған, үздік оқитын, патриот азаматты тәрбиелеп өсірген сіздерге және ұстаздарға барша Сыр жұртшылығының, өзімнің атымнан зор ризашылығымды білдіремін», – деді Н.Нәлібаев.</blockquote>Еске салайық, Дінмұхаммед Бектұрған Астана медицина университетінің 7- курс студенті. Қазір интернатурада оқиды.Кеше Денсаулық сақтау министрі Ақмарал Әлназарова Дінмұхаммедті министрліктің «Құрмет грамотасымен» марапаттады. Интерн маман Астана медицина университеті ректорының міндетін атқарушы Анар Тұрмұхамбетованың, «Аманат» партиясы Астана қалалық филиалының жетекшісі Мұхаммед Болысбектің және «ҚазақЭйр» компаниясы экипаж командирінің «Алғыс хаттарына», 4 тегін авиабилетке ие болды.<img src="https://knadmin.beoblood.kz/uploads/Oblys_kimi_sha_ta_adam_mirin_sa_tap_al_an_bolasha_d_rigerdi_rezidenturada_y_o_u_a_ysyn_t_leuge_oldau_bildiretinin_ajtty_5148759ad1.jpg" alt="Облыс әкімі ұшақта адам өмірін сақтап қалған болашақ дәрігердің резидентурадағы оқу ақысын төлеуге қолдау білдіретінін айтты.jpg">Фото: Қызылорда облысы әкімінің баспасөз қызметі

Нәлібаев ұшақта адам құтқарған жігітке қолдау көрсетеді

<a href="https://kyzylorda-news.kz/">Kyzylorda-news.kz</a> Арал аудандық мәдениет үйінде көрнекті жазушы, қазақ әдебиетінің заңғары, халық жазушысы Әбдіжәміл Нұрпейісовтің 100 жылдығына арналған қорытынды шара өтті.Шарада аудан әкімінің орынбасары Н. Бохаев сөз алып, ұлы қаламгер Әбдіжәміл Нұрпейісовтың шығармашылығы мен оның рухани мұрасы дәріптеуге арналған 100 жылдық мерейтой аясында өткізілген шаралардың және жыл бойы ұйымдастырылған барлық мәдени-көпшілік шаралардың жоғары деңгейде өтуіне елеулі үлес қосқан мәдениет саласының қызметкерлерлеріне алғысын жеткізді.&nbsp;<blockquote>- Бүгін біз қазақ әдебиетінде алтын әріппен жазылған ұлы есім – халық жазушысы, аса көрнекті қаламгер, Ұлы Отан соғысының ардагері Әбдіжәміл Нұрпейісовтің 100 жылдығына арналған қорытынды шараға жиналдық. Қасиетті Сыр елінде, Арал топырағында дүниеге келген Әбеңнің 100 жылдық мерейтойы – тек біздің өңірдің ғана емес, күллі қазақ халқының қуанышы. Алаштың асыл перзентінің мерейтойы аясында Аралда бірқатар іс-шаралардың аталып өткенін жақсы білесіздер. Олардың ішінде ғылыми-танымдық конференциялар, әдеби және мәдени кездесулер, спорттық жарыстар, халықаралық суретшілер симпозиумы, шығармашылық байқаулар сияқты ел руханиятына серпін беретін игі істер бар. Бұл шараларға ел руханиятына үлес қосып жүрген ақын-жазушылар, ғалымдар, өнер майталмандары қатысты. Мен осы мүмкіндікті пайдаланып, Әбдіжәміл Нұрпейісовтің 100 жылдығына арналған шаралардың жоғары деңгейде өтуіне атсалысқан барша ниеттес жандарға, ұйымдастыру жұмыстарына белсенді түрде қатысқан азаматтарға аудан әкімінің және өз атымнан ерекше алғысымды білдіремін! Шын мәнінде, Әбеңнің рухына жасалған құрмет – болашақ ұрпақтың рухани қазынасын молайта түсудің бір жолы. Біз Әбеңнің мол мұрасын қастерлеп, келер ұрпаққа жеткізуге міндеттіміз. Баршаңызға шығармашылық шабыт, зор денсаулық, отбасыларыңызға амандық тілеймін! Әбеңнің рухани мұрасы мәңгілікке ел жадында жаңғыра берсін!»-деді.&nbsp;</blockquote>Мұнан соң, ел руханиятының қалыптасуы жолында аянбай қызмет етіп, халықтың көңілінен шыға білген мәдениет саласының бірқатар қызметкерлері марапат төрінен көрінді. &nbsp;Іс-шара соңы аудандық өнерпаздардың концерттік бағдарламасына ұласты.Фото: Арал ауданының әкімдігі

Өнер иелері марапат төрінде

<a href="https://kyzylorda-news.kz/">Kyzylorda-news.kz</a> Кеше облыс әкімі Нұрлыбек Нәлібаев ұзақ жыл мемлекеттік қызметте абыройлы еңбек еткен мемлекет және қоғам қайраткері, «Құрмет», «Парасат» ордендерінің иегері, &nbsp;Парламент Сенаты жанындағы Сенаторлар кеңесінің мүшесі Еламанов Бекмырза Қайыпұлын 75 жасқа толған мерейтойымен құттықтады.Іс-шараға Сыр еліне арнайы келген Бекмырза Еламановтың замандас достары, зиялы қауым өкілдері мен еңбек ардагерлері қатысты. Аймақ басшысы мерейтой иесіне ізгі тілегін жеткізді.<blockquote>«Саналы ғұмырын халықтық іске арнап, елдің мұң-мұқтажын жанымен түсініп, еңбегімен төрге озған ағамыздың бүгінгі мерейтойына ел ағалары, ардақты азаматтарымыз есті естеліктер мен жарқын сәттерді жеткізу үшін жиналды. Бабаларымыз «Арлы адамның орны - төр» деп, адалдық пен еңбекке бас игендерге қашанда лайықты құрмет көрсеткен.&nbsp; Сіз Сыр елінің қарышты қадам басуына қомақты үлес қосып, қиын кезеңде елдің жүгін бірге арқалап, игілікті істердің бастамашысы болып құрметті қайраткер атандыңыз.Қиын да өтпелі кезеңде &nbsp;көпшілікті байыпты әрекеттерге бастап, елді ортақ мүддеге ұйыстыра білген табанды қасиетіңіз сізді қабырғалы қайраткер етті. Сыр халқы &nbsp;еліміз жоспарлы экономикадан нарықтық экономикаға ауысқан күрделі кезеңде облыстың бірнеше ауданын басқарып, күрмеулі мәселелердің орнықты шешудегі қажырлы еңбегіңізді ерекше бағалайды.&nbsp;Әсіресе, ауыл шаруашылығы басқармасын басқарып, облыс әкімінің орынбасары қызметін атқарған уақытыңызда аграрлық саланың жандануына елеулі еңбек сіңірдіңіз.&nbsp;Ауыл тіршілігінің тамырына нәр беріп, туған жердің тұғырлы болуына еткен еңбегіңізді Қармақшы, Жаңақорған жұрты айрықша құрмет тұтады. Сіз Сенат депутаты болған тұста халықтың әл-ауқатын жақсартуға бағытталған &nbsp;бастамалар көтеріп, олардың заңнамалық негізделуіне елеулі үлес қостыңыз. Қазақ халқының дәстүрінде өзіңіздей елге тілеулес, ұлтқа жанашыр жоталы ақсақалын ардақ тұтып, құрмет төріне оздырған.&nbsp; Сізді жерлестеріміздің, өзімнің атымнан мерейлі жасыңызбен шын жүректен құттықтаймын! Ақыл-парасат, даналық пен даралық секілді &nbsp;төл өнегеңіз ұрпаққа нұр, ұлтқа ұлағат бола бергей», – деді Н.Нәлібаев.</blockquote>Жиында мерейтой иесіне ұзақ жылғы қажырлы еңбегі және елдің өркендеуіне, қоғамның жаңғыруына, аймақтың әлеуметтік-экономикалық дамуына қосқан елеулі үлесі үшін «Қызылорда облысының Құрметті азаматы» атағы беріліп, “Құрмет”грамотасы табысталды және халқымыздың игі дәстүріне сай сый-сияпат жасалды.Сонымен қатар, мемлекет және қоғам қайраткерлері, Жамбыл облысының әкімі, Қазақстанның Республикасының Өзбекстан Республикасындағы төтенше және өкілетті елшісі лауазымды қызметтерін атқарған, «Құрмет», «Парасат» ордендерінің иегері Бөрібай Жексенбин, Парламент Сенатының VII шақырылым депутаты, Алматы облысының әкімі лауазымын атқарған, ауыл шаруашылығы саласының белді маманы, «Құрмет» орденінің иегері Аңсар Мұсаханов, &nbsp;Ақмола облысы әкімінің бірінші орынбасары болған, Қазақстан Республикасы Сенатының &nbsp;VII &nbsp;шақырылым депутаты, «Құрмет», «Парасат» ордендерінің иегері Рашид Әкімов, Ұлттық Ғылым Академиясының академигі, профессор, Қызылорда облысының Құрметті азаматы, «Құрмет», «Парасат» және ІІ дәрежелі «Барыс» ордендерінің иегері Бақберген Досмамбетов, &nbsp;Парламент Сенатының депутаты, Конституциялық заңнама, сот жүйесі және құқық қорғау органдары комитетінің мүшесі Наурызбай Байқадамов, облыстық ардагерлер кеңесінің төрағасы, Қызылорда облысының Құрметті азаматы, «Құрмет» орденінің иегері Серік Дүйсенбаев мерейтой иесін құттықтап, еңбек жолындағы жетістіктеріне тоқталды.Жиын соңында Қызылорда облысының және Қызылорда қаласының, Қармақшы, Жаңақорған аудандарының Құрметті азаматы Бекмырза Еламанов көрсетілген құрметке алғысын жеткізіп, өңірдің әлеуметтік-экономикалық тұрғыдан өркендей беруіне тілектестігін білдірді.Фото: Қызылорда облысы әкімінің баспасөз қызметі

Аймақ басшысы Бекмырза Еламановты  мерейтойымен құттықтады

<a href="https://kyzylorda-news.kz/">Kyzylorda-news.kz</a> Кеше облыс әкімі Нұрлыбек Нәлібаевтың қатысуымен «Саналы ұрпақ - болашақ кепілі тақырыбында форум өтті. Алқалы отырысқа Парламент Сенаты мен Мәжілісінің депутаттары Наурызбай Байқадамов, Руслан Рүстемов, Мұрат &nbsp;Әбенов, Мархабат Жайымбетов, Мұрат &nbsp;Ергешбаев, Бас прокуратура өкілі Жасұлан Даулембаев, облыс прокуроры Ризабек Ожаров, құқық қорғау органдарының,жауапты салалардың басшылары қатысты. Аймақ басшысы осы бағытта атқарылған жұмыстарға тоқталып, форумға қатысушыларға сәттілік тіледі.<blockquote>«Форум идеологиялық мәні зор, пайымды пікірлерге толы қоғамдық көшбасшылардың ортақ алаңына айналады деп санаймын. Кездесуге келген сіздердің тәжірибелеріңіз, ойларыңыз, ұсыныстарыңыз алдағы жоспарларымызды нақтылап, ортақ мақсатымызға жетуге септігін тигізеді. Президентіміз Қасым-Жомарт Кемелұлы республикалық «Ана тілі» газетіне берген сұқбатында «Жастарымыз халқымыздың болмысына жат идеялардың жетегінде кетпесе, күйзеліске түспесе, нигилизмге бой алдырмаса екен деп тілеймін. Олардың белсенді, тәртіпті, білімпаз, еңбекқор болғанын қалаймын» деп, жастар арасындағы зиянды әдеттерге айрықша тоқталып өтті.Бүгінде жасөспірімдер арасындағы құқық бұзушылықтың алдын алу - қоғам алдындағы басты міндеттердің бірі. Әсіресе, олардың құқықтық сауаттылығын арттыру, заңсыз іс-әрекеттер жасаудан қорғау, заңға бағынушы азамат ретінде құқықтық тәлім– тәрбие беру - заман талабы. Елімізде құқық қорғау органдарының тиімді жұмысының нәтижесінде соңғы 5 жылда құқық бұзушылық саны 32 пайызға азайды. Облысымызда да едәуір, яғни &nbsp;49,7 пайызға төмендеген. Бұл - әлі де азайтуды қажет ететін маңызды көрсеткіш! Сол себепті, біз аймақта тұрақтылықты сақтау және &nbsp;құқық бұзушылықты болдырмау бағытында барлық деңгейдегі құқық қорғау органдары басшыларымен бірге алқалы жиындар, түрлі кездесулер, ашық қабылдаулар өткізіп келеміз. Бұл өз кезегінде азаматтардың құқық қорғау органдарымен сенімді әрі сындарлы диалог орнатуына жол ашты. Халқымызда «Тәрбиелі адам – тағалы атпен тең» деген жақсы сөз бар. Тәртіп бар жерде өркениетті қоғам қалыптасатынын бүгінгі ұрпаққа жеткізу – біздің басты міндетіміз. Саналы ұрпақ тәрбиелеу – мәртебесі биік, маңызы зор ұлттық міндет. Әділетті Қазақстан құру жолындағы ізгі мақсат-мұратымызға бекем бірлікпен, тату тірлікпен, толайым жетістікпен жете берейік! Елдігіміз еңселі, Тәуелсіздігіміз тұғырлы болғай! Форум жұмысына сәттілік тілеймін!», -деді аймақ басшысы. Жиында Парламент Сенатының депутаты Наурызбай Сейтқалиұлы, Мәжіліс депутаты Мұрат Абдуламитұлы, облыс прокуроры Ризабек Кәрімұлы, Нұрлан имам Байжігітұлы, Олимпиада чемпионы Ермахан Ибраимов, актер режиссер Рүстем Омаров сөз сөйледі.</blockquote>Сонымен қатар, іс-шарада «Нашақорлыққа жол жоқ» бір айлық акциясының нәтижесімен белсенді қатысушылар марапатталды.Айта кетейік, аймақта балалардың жарқын болашағына бағытталған ауқымды жобалар бар. Өткен жылы «ҚазГермұнай» компаниясының демеушілігімен Қызылорда қаласында &nbsp;заманауи үлгідегі 350 орындық "Оқушылар сарайы" пайдалануға берілді. «Білімді қолдау қоры» есебінен &nbsp;физика-математика мектеп-интернаты, балалар мен жасөспірімдердің шығармашылығын шыңдау мақсатында &nbsp;«Шығармашылық академиясы» салынуда. Дарындар тоғысатын жаңа ғимарат мамыр айында ел игілігіне табысталады. «Саутс Ойл» компаниясының демеушілігімен музыкалық колледждің жаңа ғимараты бой көтеруде. Ел Президентінің бастамасымен іске асқан «Жайлы мектеп» ұлттық жобасы аясында 3 мектеп пайдалануға беріліп, балалар лайықты білім алуда. Жаңақорған ауданының орталығынан &nbsp;"Оқушылар үйі" мен &nbsp;"Өнер мектебі", &nbsp;«Самұрық Қазына Траст» әлеуметтік жобаларды қолдау қорымен бірлесіп, &nbsp;«Үстел теннисі» орталығы іске қосылды.Барлық ауданда ішінде неке қию залы, кітапхана, музей, архив, жастар сарайы, ардагерлер мен аналар үйі бар «Руханият» орталықтары салынуда. &nbsp;Қармақшы және Шиелі аудандарындағы осындай орталықтар ашылды, &nbsp;жақын арада қалған аудандарда да пайдалануға берілмек. Фото: Қызылорда облысы әкімінің баспасөз қызметі

«Саналы ұрпақ – болашақ кепілі» тақырыбында форум өтті

<a href="https://kyzylorda-news.kz/">Kyzylorda-news.kz</a> &nbsp;Бұл туралы әлеуметтік желісіне IT маман Тимур Бектұр жазды, деп хабарлайды <a href="https://baq.kz/muhtar-magauin-aqsh-ta-zherlenedi-200005243/">BAQ.KZ.</a> Кемеңгер жазушы 85 жасқа қараған шағында дүниеден өтті.<blockquote>Әгәрәки, АҚШ-та жүргендер болса, рәсімдері осындай: Қаңтардың 9-ы, бейсенбі ақшамда дүние салған Мұхтар Мағауиннің жаназасы ертең, қаңтардың 11-і сенбі күні сағат 10:00-де түріктің Diyanet Center of America мешітінде (9610 Good Luck Rd, Lanham, MD 20706) оқылады, қонақасы да сол орында 13:00-де беріледі. Жерлеу рәсімі 11:00-де Parklawn Memorial зиратында (12800 Veirs Mill Rd, Rockville, MD 20853) өтеді, – деді Тимур Бектұр.</blockquote>

Мұхтар Мағауин АҚШ-та жерленеді

<a href="https://kyzylorda-news.kz/">Kyzylorda-news.kz</a> &nbsp;Президент Қасым-Жомарт Тоқаев аса көрнекті жазушы, Мемлекеттік сыйлықтың лауреаты Мұхтар Мағауиннің дүниеден өтуіне байланысты оның отбасы мен жақын-жуықтарына көңіл айтты.<blockquote>– Мұхтар Мұқанұлы ғибратты ғұмырын киелі сөз өнеріне арнаған, ұлттық әдебиетіміз бен тарихымыздың көкжиегін кеңейтуге елеулі үлес қосқан заңғар тұлға еді. Төл руханиятымыздың төрге озуына, ұлт тарихнамасының тасқа басылуына өзінің алға қойған асыл мұратымен, қайтпас қажыр-қайратымен қалтқысыз еңбек сіңірді. Халық жазушысының қуатты қаламынан туған шығармалары, тарихи еңбектері, естелік-эсселері қалың оқырманның жүрегінен өз орнын тапты. Соңына бай әдеби мұра қалдырып, өнегелі өмір сүрген Мұхтар Мұқанұлының қайталанбас есімі халқымыздың жадында сақталады. Марқұмның иманы саламат, жаны жәннатта болсын, – делінген жеделхатта.</blockquote>Фото: magauin.com

Мемлекет басшысы Қазақстанның халық жазушысы Мұхтар Мағауиннің отбасы мен жақын-жуықтарына көңіл айту жеделхатын жолдады

<a href="https://kyzylorda-news.kz/">Kyzylorda-news.kz</a> Белгілі жазушы Мұхтар Мағауин дүниеден озды.Бұл туралы қаламгердің ұлы Едіге Мағауин<a href="https://www.facebook.com/yedige.magauin/posts/10228520309777488?ref=embed_post"> Facebook-тегі </a>парақшасында жазды.<blockquote>– Арыстан ӘКЕМ фәниден бақиға аттанып кетті, АҚШ-тың Мерилэнд штатындағы үйінде, бала-шағасының ортасында, 2025 жылғы қаңтардың 9-ы, жергілікті уақыт бойынша сағат 19:55–те (Қазақстан уақыты бойынша қаңтардың 10-ы, сағат таңғы 5:55), – деп жазды ол.</blockquote>Мұхтар Мұқанұлы Мағауин 1940 жылы 2 ақпанда сол кездегі Семей облысының Шұбартау ауданында туған. 1962 жылы Қазақ мемлекеттік университетінің филология факультетін, 1965 жылы аспирантурасын бітірген.«Қазақ әдебиеті» газетінің бөлім меңгерушісі, «Жазушы» баспасында бас редактордың орынбасары, Қазақ КСР Ғылым академиясының М.Әуезов атындағы Әдебиет және өнер институтында аға ғылыми қызметкер болып қызмет атқарды.&nbsp;Мәскеуде М.Горький атындағы Әдебиет институтында қазақ фольклоры мен қазақ әдебиеті тарихы бойынша арнайы лекциялық курстар жүргізді.&nbsp;1984-86 жылдары «Жазушы» баспасының бас редакторы, 1988-2006 жылдары «Жұлдыз» журналының бас редакторы болды.Баспасөз бетінде алғаш рет 1959 жылы көрінді. 60-жылдары негізінен әдебиет зерттеушісі ретінде танылды. Шығармалары орыс тіліне аударылған, шетел тілдерінде басылған. Филология ғылымының кандидаты (1967) деген ғылыми атағы бар. Қазақстан Жазушылар одағы Басқармасының хатшысы болып та қызмет атқарған.&nbsp;«Аласапыран» тарихи роман-дилогиясы үшін Қазақ КСР-інің Абай атындағы мемлекеттік сыйлығы берілді. Қазақстанның Халық жазушысы (1984) атағының, Түркияның халықаралық «Түрік дүниесіне қызмет» сыйлығының иегері (1997), «Тарлан» сыйлығының лауреаты (2002), Қазақстанның Құрметті жазушысы (2019) болды.2006 жылдың желтоқсанында Қазақстаннан Чех Республикасында қоныстанды. Содан бері Чехия, АҚШ, Түркия елдерінде тұрып, шығармашылықпен, ғылыми зерттеулермен айналысты.Фото: <a href="https://kaz.inform.kz/news/muhtar-magauin-omrden-ott-334eda/">vestisemey.kz</a>

Мұхтар Мағауин өмірден өтті   

<a href="https://kyzylorda-news.kz/">Kyzylorda-news.kz</a> &nbsp;Облыстық филармония жанынан 42 адамнан тұратын Хор ұжымының негізі қаланды. Ұжымның көркемдік жетекшісі – Қуаныш Арайлым. Өнер ұжымы “Руханият” жылының қорытынды концертінде алғашқы дебютімен көрерменінің ыстық ықыласына бөленіп те үлгерді.Шығармашылық ұжым алдағы уақытта ұлттық, әлемдік және классикалық күрделі шығармаларды кемеріне жеткізе орындап, өз тыңдармандарын түрлі жанрдағы тың туындыларымен қуанта бермек. Әртүрлі дәуірлердің, стильдер мен жанрлардың хорға арналған шығармалары енді Сыр сахнасында орындалмақ!Фото: Қызылорда облыстық филармониясы

Сыр өңірінде жаңа хор ұжымы құрылды

<a href="https://kyzylorda-news.kz/">Kyzylorda-news.kz</a> &nbsp;2024 жылдың қорытындысы бойынша 55,1 миллиард теңге көлемінде артық шығынның алдын алды. Талдау барысында Қызылорда облыстық филармониясы картинаны сегіз есе қымбат бағаға сатып алмақ болғаны анықталды. Бұл туралы <a href="https://stan.kz/bir-kartina-20-min-tenge-kizilorda-oblistik-filarmoniya-412139/">Stan.kz</a> ақпарат агенттігі хабарлайды."2024 жылдың қорытындысы бойынша 55,1 миллиард теңге көлемінде артық шығындардың алдын алды. Оның 26 миллиард теңгесі бюджетке қайтарылған, қалған соманы тапсырыс берушілер қайта қарап, жоспарланған бағаларды төмендеткен немесе сол сомаға сатып алынатын тауарлар санын көбейткен",&nbsp; – делінген агенттік хабарламасында.Агенттік дерегінше, Солтүстік Қазақстан облысында 230 миллион теңгенің заңсыз шығынының алдын алды. Петропавл қаласындағы телемұнараға жарықдиодты жабдықтарды орнату жұмыстары төтенше жағдайларды жою сылтауымен жүргізілгені белгілі болды. Алайда, бұл жұмыстардың төтенше жағдаймен еш байланысы болмаған. Соңында келісімшарт бұзылып, бюджетке қаражат қайтарылды.Қарағанды облысындағы мамандандырылған музыкалық мектеп-интернат 18 мың бөтелке үстел сірке суын 9 миллион теңгеге сатып алуды жоспарлаған. Бұл көлем мекеменің (барлығы 460 адам) қажеттілігінен әлдеқайда жоғары болған. Бұған қоса бір бөтелкенің құны нарықтағы 300 теңгенің орнына 500 теңгеге бағаланған. Бұл шығынды 3,5 миллион теңгеге арттырған. Антикордың араласуынан кейін сатып алу тоқтатылып, бюджетке 9 миллион теңге үнемделді.Ал Қызылорда облыстық филармониясы 300 қабырға картинасын 48 миллион теңгеге (әрқайсысы 160 мың теңгеден) сатып алуды жоспарлаған. Нарықтағы орташа баға бір картинаға 20 мың теңге екенін ескерсек, жалпы артық шығын 42 миллион теңге болған.Антикордың ұсынысынан кейін бұл сатып алу да тоқтатылып, қаражат бюджетке қайтарылды.Фото: pixabay.com

Қазақстан және Қызылорда облысының жаңалықтары: Мәдениет