Kyzylorda-news.kz. Күні кеше әлеуметтік желілерде облыс көлемінде жария етілген мемлекеттік сатып алу конкурстарына сын-пікірлер білдіріліп, оның ішінде туризм саласындағы қатысты іс-шара бойынша сұрақтар туындады. Осыған орай, осы мәселе бойынша түсіндірме беруді жөн көрдік.
Жалпы, туризм саласы елімізде, соның ішінде өңірімізде кенже қалғаны рас. Оның үстіне, былтыр әлемді шарпыған пандемия саланың дамуына кері әсер етті.
Нәтижесінде 2020 жылы Республикаға келушілер саны 3,5 млн адам құрап (2019 жыл – 6,2 млн адам), 2019 жылмен салыстырғанда 43,6 пайызға азайды.
Оларға орналастыру орындарымен 66,8 млрд теңгенің қызметі көрсетіліп (2019 жыл –120,5 млрд теңге), 44,6 пайызға төмендеді.
Ал, Қызылорда облысына келушілердің саны 50704 адамды құрап (2019 жыл -71 669 адам), 2019 жылмен салыстырғанда 29 пайызға азайса, орналастыру орындарымен 723,5 млн теңге (2019 жылдың 9 айы –1 млрд 84 млн теңге) көлемінде қызметтер көрсетіліп, 33 пайызға төмендеді.
Өткен жылы Қазақстан Республикасы Президенті Қасым-Жомарт Кемелұлы Тоқаевтың тапсырмасымен имидждік іс-шараларға қарастырылған қаражат көлемі қысқартылып, облыстық бюджетке кері қайтарылды.
Дегенмен, бұған қарамастан бюджет қаражатынсыз жоспардағы жұмыстар тоқтаған жоқ.
Мәселен, Қызылорда облысының кәсіпкерлік және туризм басқармасының ұйымдастыруымен туристік фирмалардың өкілдеріне «Байқоңыр» ғарыш айлағы мен «Қорқыт ата» мемориалдық кешеніне ақпараттық тур, «Vizit Qyzylorda» туристік фирмасымен бірлесіп мүмкіндігі шектеулі балаларға Қызылорда қаласында сити-тур, 27 қыркүйек – Дүниежүзілік туризм күніне орай жоғарғы оқу орындарының студенттеріне «Сығанақ» қалашығына ақпараттық-тур, Халықаралық Аралды құтқару қорының Қазақстан Республикасындағы атқарушы Дирекциясы және «Барсакелмес» қорығының мамандарымен бірлесіп Арал ауданындағы «Возрождение» аралына экспедиция ұйымдастырылды.
Осының негізінде, бүгінгі күні Арал қорымен бірлесіп «Возрождение» аралындағы көне қалдық кемелер орналасқан аймақтан аспан асты мұражай ашу жұмыстарын қолға алдық.
Сонымен қатар, «Asyl Mura» танымдық бағытында волонтерлардың қатысуымен Қазалы ауданындағы көне «Жанкент» қалашығына ақпараттық-тур, 16 желтоқсан – ҚР Тәуелсіздік күні мерекесі қарсаңында мектеп оқушыларына «Тірі сабақ» (живой урок) пилоты негізінде Қызылорда қаласы ішінде «сити тур» ұйымдастырылды.
Бұл жұмыстар биыл да жалғасын тауып, ақпанның басында «Шуақты бөбек» қайырымдылық қорының қарауындағы балалар үшін қалаішілік сити-тур өткізілді.
Жалпы, аймақтың туристік әлеуетін туристік дестинацияларға баратын инфрақұрылым жағдайын жақсарту және имидждік шараларсыз дамыту қиын.
Осы орайда, өткен жылдың соңы мен осы жылдың басында әлеуметтік желі қолданушылар және қоғам белсенділерімен кездесіп, биылғы жоспарымызды айқындадық.
Айта кеткен жөн, кездесу өткізуден бұрын алдын-ала «Facebook» әлеуметтік желісіндегі Басқарманың ресми парақшасында хабарландыру берілді.
Сондай-ақ, ақпан айында облыс әкімі Г.Н. Әбдіқалықованың төрағалығымен туризм саласын дамыту туралы арнайы мәжіліс өткізіліп, алдағы мақсаттарымызды белгіледік.
Соның нәтижесінде осы жылы облысқа 45 000 адам келеді деп болжанып, 7,1 млрд тг қаржы болатын 9 нысанды іске қосу және жаңадан 150 тұрақты, құрылыс кезеңінде 110 жұмыс орнын құру жоспарланды.
Бұл іске қосылатын нысандар өз кезегінде өңірімізде туризм саласының дамуына оң септігін тигізеді деп жоспарлап отырмыз.
Атап өткен жөн, қолданыстағы заңнамаға сәйкес туризм саласындағы келушілер саны туралы ақпарат облыстағы орналастыру орындарымен тапсырылатын статистикалық есеп негізінде қалыптастырылады.
Қазіргі таңда Басқарма статистикалық есепке орналастыру орындарынан бөлек, жағажай, демалыс аймақтарын енгізу бойынша жұмыстар жүргізуде.
Сонымен бірге, облыстық жобалық кеңсе аясында «Visitorda.kz» ресми ақпараттық-туристік сайты әзірленіп, осы жылдың 1-жартыжылдығында іске қосылады. Одан әрі сайттың мобильдік қосымшасын әзірлеуге кірісеміз.
Сондай-ақ, облыс әкімдігімен, ҚР Мәдениет және спорт министрлігімен келісе отырып «Қызылорда облысының 2021-2023 жылдарға арналған туризм саласын дамыту туралы», «Қолөнер саласын дамыту туралы» жоспарлары бекітілді.
Жоспарға сәйкес туризм саласын дамыту бағытында төмендегі жобалар облыстық бюджеттік комиссиядан қолдау алды.
Олар:
1. «Қолөнер – асыл қазына» қолөнершілер көрмесі – 3,1 млн теңге. Дәстүрлі көрмелер облыстағы қолөнершілердің танымалдылықтарын арттырып, беделдерін көтереді. Сонымен қатар, жұртшылық назарына дәстүрлі қолөнер бұйымдарының көрмесі ұсынылатын болады.
2. «Қонақ үй және мейрамхана бизнесі персоналына менеджмент бойынша семинар-тренинг өткізу»- 5,3 млн. теңге.
Қонақ үй және мейрамхана бизнесінің персоналдарының біліктілігі артады және пандемия жағдайындағы қызмет көрсету кезінде сервис сапасын арттыруға мүмкіндік береді.
3. Қазақстандық туроператорлар, белсенді әлеуметтік желі қолданушылары және БАҚ өкілдері арасында ақпараттық тур ұйымдастыру – 4,1 млн теңге.
Ақпараттық турдың басты мақсаты – Қызылорда облысының туристік әлеуетін БАҚ-тарда, әлеуметтік желілерде жарнамалау болып табылады. Өңірдің танымалдылығы өсіп, аймағымызға келуші туристер, оның ішінде шетелдік туристер санының артуына ықпал жасайды.
4. 4К форматында түсірілген «Қызылорда облысының туристік әлеуеті», «Ғарыштық туризм» және «Медициналық туризм» тақырыптарында 3 видеоролик дайындау – 14,2 млн теңге.
Әлемдік тәжірибеде туристік әлеуетті дамытудың ең тиімді әдісі – жарнамалық бейнероликтер жасау. Жарнамалық бейнероликтер әлеуметтік желілерде таратылып, «Kazakh Tourism», «Kazakh Invest» АҚ арқылы инвесторларға ұсынылатын болады.
Құрметті достар!
Байқасаңыздар, соңғы уақытта еліміздің басқа өңірлерінде туризм саласын дамытуға жақсы мән беріліп келеді.
Осы орайда, көзделген жұмыстарды жоғары деңгейде ұйымдастыруға атсалысып, жоспарланған шараларға қатысуға шақырамыз.
Бұл өз кезегінде өңіріміздің туристік әлеуетін арттырып, оң имидж қалыптастыруға мүмкіндік береді деген сеніміміз мол.
Қорыта келе, Басқарма кәсіпкерлік, сауда және туризм салалары бойынша «Ашық диалог» жүргізуге әрқашан дайын екендігін хабарлайды.
Кез-келген сұрақтарыңыз бойынша кездесіп, пікір алмасуға әрқашан ынталымыз.
Кері байланыс: 8/7242/70-54-87, 8/7242/40-10-56;
tourismkzo@gmail.com;401056@mail.kz;
Мекен-жайымыз: Қызылорда қаласы, Қорқыт Ата көшесі № 123, «Бизнеске арналған үкімет» ғимараты, 2 қабат, 212 бөлме.
Қызылорда облысының кәсіпкерлік
және туризм басқармасы

Қызылорда: Пандемия тұсындағы туризм саласының әлеуеті қандай?

*<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова сырбойылықтарды қос мерекемен құттықтады.*
Құрметті Отан қорғаушылар, ардақты ардагерлер!
Сіздерді Отан қорғаушылар күнімен және Ұлы Жеңістің 76 жылдық мерекесімен шын жүректен құттықтаймын!
Қос мерекенің қатар келуі де заңдылық тәрізді. Кешегі жау оғынан қорғаған майдангерлерімізге, бүгінгі еліміздің айбынын асқақтатар әскерімізге қандай құрмет көрсетсек те жарасады.
Тұңғыш Президентіміз – Елбасы Нұрсұлтан Әбішұлы Назарбаев кез келген елдің егемендігі экономикалық және саяси ғана емес, сонымен бірге, әскери әлеуетпен қамтамасыз етілгенде ғана нағыз тәуелсіздікке айналады десе, Мемлекет Басшысы, Бас Қолбасшы Қасым-Жомарт Кемелұлы Тоқаев жауынгерлеріміздің батырлығы мен қайтпас қайсарлығы жер бетінде бейбітшілік пен тыныштықты сақтауға мүмкіндік бергенін атап өтті.
Біз Отан Қорғаушылар күні мен Жеңіс күнін қатар атап жүрміз. Өйткені, бұл мерекелер рухы жағынан бір-бірін толықтыратын, ұрпақтар сабақтастығына ұласқан мерекелер. Әр отбасында сұрапыл соғысқа қатысып, елі мен жерін, ұрпағының бейбіт өмірін қорғаған өз батырлары бар. Мен де майдангердің ұрпағы ретінде бұл күннің қадір-қасиетін жоғары бағалаймын. Бұрындары түрлі кездесулер өткізіп, алаңдарда, мәдени ғимараттарда концерттер беріп мерекелеп жататынбыз. Былтырдан басталған пандемия бұрынғыша атап өтуге мүмкіндік бермей отыр. Биыл коронавирус бәсеңдесе, майдангерлеріміздің үйіне құттықтап барамыз, мәңгілік алуға гүл шоқтарын қоямыз деген едік. Өкінішке қарай, бірнеше аптадан бері “қызыл, сары аймақтарда” болуымыз оған кедергі жасап отыр. Дегенмен, «NurOtan» партиясы облыстық филиалының бастамасымен ел Тәуелсіздігінің 30 жылдығы мен партияның «Ардагерлерді ардақтайық» жобасы аясында облыс көлемінде «Мың алғыс Сізге, майдангер» арнайы хэштегпен ақпараттандырылған шаралар шеруі басталып, интернет-ресурстарда, әлеуметтік желілерде, ардагерлер, жастар, үкіметтік емес ұйымдар, этнос өкілдері онлайн түрде ықыластарын білдіруде.
Ардагерлерді ардақтау – ұрпақ парызы. Жыл өткен сайын майдангерлеріміздің қатары да сиреп барады. Қазір облысымызда Ұлы Отан соғысының 11 ардагері бар. Толық атап кетсем деймін. Бес ардагер – Жүнісов Төлеген, Бәйтіков Әбдрахман, Колесник Любовь Сергеевна, Әбішев Әбдраман, Сатыбалдиев Әбдірауық Қызылорда қаласында, 3 ардагер – Бектұрғанов Қалеп, Смағұлов Қабақ, Тобабергенов Тілеуберген Қазалы ауданында, ал, Жанасов Талжан Байболұлы Арал ауданында, Тасыров Яхия Сырдария ауданында, Байжанов Сәрсенбек Шиелі ауданында тұрады. Оларға облыстық бюджеттен біржолғы материалдық көмек 1 млн теңге, жергілікті бюджеттен біржолғы әлеуметтік көмек 116,6 мың теңге төленуде.
ҰОС жылдарындағы тылдағы қажырлы еңбегі мен мінсіз әскери қызметі үшін бұрынғы КСРО ордендерімен және медальдарымен марапатталғандарға (35 адам) 1 адамға облыстық бюджеттен 100,0 мың теңгеден, аудандық/қалалық бюджеттен 87,5 мың теңгеден біржолғы әлеуметтік көмек беріледі.
Екiншi рет некеге тұрмаған, қайтыс болған соғыс мүгедектерiнiң және соларға теңестiрiлген мүгедектердiң, қатысушылардың әйелдерiне (күйеулерiне) (49 адам) 1 адамға 100 мыңтеңгеден, ҰОС жылдарында тылда кемінде 6 ай жұмыс істеген азаматтарға (3661 адам) әрқайсысына 100,0 мың теңгеден облыстық бюджеттен біржолғы әлеуметтік көмек төленуде.
Қымбатты Отан қорғаушылар! Ат жалын тартып мінген азамат үшін Отан қорғаудан қасиетті міндет жоқ!
Пандемияның шарықтау шегінде алдыңғы шепте жүріп, ерен еңбектің үлгісін көрсете білдіңіздер.
Биыл тәуелсіздігімізге 30 жыл. Тәуелсіздік құндылықтарының қорғалуы ең көкейтесті мәселе. Сондықтан, ата-бабаларымыз аманат еткен атамекенімізді, туған Отанымызды, жерімізді, халқымызды көзіміздің қарашығындай қорғай білейік. Бейбіт күннің бағасын білейік. Тәуелсіз еліміздің тыныштығын тілейік.
Қайыспас қайсар майдангерлеріміз, айбынды Отан қорғаушыларымыз! Сіздерді мерейлі мереке – Отан қорғаушылар және Ұлы Жеңіс күндерімен тағы да шын жүректен құттықтаймын!
Өнегелі ғұмыр сүріп, бейбітшілік, болашақ үшін тер төгіп, қанын да, жанын да аямаған ардагерлерімізге алғысымызды айтамыз. Олардың майдан даласындағы ерен ерліктері бүгінгі ұрпағы үшін нағыз өнеге, тәлім-тәрбие.
Бар өмірін әскери іске арнап, ыстық-суық демей, күн-түн демей, елін, жерін қорғап, өз қызметін мінсіз атқарып жүрген әскерімізге ризашылығымызды білдіреміз. Еліміздің айбынын асқақтатар ер-азаматтарымыз, сардарлар мен сарбаздарымыз аман болсын!
Тәуелсіз Қазақстан жасасын!

Гүлшара Әбдіқалықова қызылордалықтарды қос мерекемен құттықтады

<a href="https://kyzylorda-news.kz/">Kyzylorda-news.kz.</a> Театр тарланы, Қазақстан Республикасының еңбек сіңірген әртісі, «Құрмет» орденінің иегері Бақытбек Алпысбай өмірлік жары, Қазақстанның еңбек сіңірген қайраткері Кәмила Әбжанова екеуі вакцина салдырды.
Өнер майталмандары жақындарының саулығы үшін осындай шешім қабылдағанын айтады.
<blockquote>
 “Сексен төрт жасқа келген Асанәлі Әшімов ағамыз екпе салдырды. Жеңгемізбен хабарласып, жағдайын білген кезде қорықпай вакцина алу қажеттігін айтты. Ол кісі медицина саласында көп жылдар еңбек еткен. Мамандардан да кеңес алдық. Ескпе салдыруға шешім қабылдадық. Қазір жағдайымыз жақсы. Ешқандай кері әсерін байқамадық. Негізі екпе салдыру өз еркіңіз. Бірақ жақындарыңыздың саулығы үшін салдырғаныңыз дұрыс. Бірліктің, ауызбіршіліктің арқасында түрлі қиындықты еңсердік. Бұл дертті жеңетінімізге сенемін”, – деді ҚР Еңбек сіңірген әртісі, «Құрмет» орденінің иегері Бақытбек Алпысбай.
</blockquote>

Бақытбек Алпысбай: Жақындарыңыздың саулығын тілесеңіз вакцина салдырған дұрыс

<a href="https://kyzylorda-news.kz/">Kyzylorda-news.kz</a>.&nbsp;Қазалы ауданының аудан әкімі Мұрат Ергешбаев 1 мамыр – Қазақстан халқының бірлігі күні мерекесіне орай өзге ұлт өкілдерін қабылдап, сый-құрмет көрсетті. Басқосуға аудандық мәслихат хатшысы Бақытжан Жарылқап пен орыс, неміс, грек, өзбек, татар және кәріс ұлтының өкілдері қатысты.
Жиналған қауымды алдымен аудан әкімі Мұрат Ергешбаев құттықтап, игі тілектерін жеткізді.
Басқосуда аудандық ардагерлер кеңесінің ардагері Оразғали Бекбанов пен өзбек ұлтының өкілі Муаззам Рахметова, орыс ұлтының өкілі Галина Шамина құттықтау сөз сөйледі. Мұнан соң Галина Шамина орыс әндерінен попури орындап берсе, Роза Бағланова атындағы мәдениет орталығының өнерпаздары қазақ әнін әуелете шырқады.
Қазақстан халқының бірлігі күні мерекесіне орай мерекелік шараға қатысушылардың барлығына аудан әкімі Мұрат Ергешбаевтың «Құттықтау» хаты табысталып, сый-сияпат жасалды.
Айта кетейік, бүгінгі таңда қасиетті Қазалы ауданында 9 түрлі ұлттың 400-ге жуық ұрпағы жергілікті тұрғындармен тату-тәтті өмір сүруде. Олардың барлығы қазақтың тілі мен салт-дәстүрлерін жетік меңгеріп, ортақ үйіміз – Қазалы ауданының дамуына лайықты үлес қосуда.

Тұғырымыз &#8211; тұрақтылық, таңдауымыз &#8211; тағаттылық

Kyzylorda-news.kz. Қызылорда облысының әкімі Гүлшара Әбдіқалықова сырбойылықтарды мерекемен құттықтады.
Қымбатты жерлестер!
Сіздерді 1 Мамыр – Қазақстан халқының бірлігі мерекесімен шын жүректен құттықтаймын! 
Ынтымақты ырысына балаған елімізде бұл мерекенің өз орны бар. 
Еліміздің Тұңғыш Президенті – Елбасы Нұрсұлтан Әбішұлы Назарбаев 1995 жылдың 18 қазанында 1 мамырды Қазақстан халқының бірлігі күні деп жариялау туралы Жарлыққа қол қойып, 1996 жылдан бастап бірлік мерекесі ретінде аталып келеді. 
Тәуелсіз Қазақстан тарихында мүлдем жаңаша мән-маңызға ие болып, көпэтносты елдің тыныштығы мен татулығының белгісіне айналды. Бүгінгі күні қазақ халқының кең пейілі мен дархан көңілі, жомарт жүрегінің арқасында елімізде қаншама этнос өкілі бір ананың баласындай, бір өзеннің сағасындай өмір сүруде. 
Мемлекет басшысы Қасым-Жомарт Кемелұлы Тоқаев айтқандай, «Тәуелсіздік кезеңінде негізі қаланған «әралуандығымыз – бірлікте» қағидаты Қазақстанның сан қырлы мәдениеті мен дәстүрін баға жетпес байлығымызға айналдырды. Ырыс-ынтымақ пен отаншылдық рух ұлттық кодымыздың ұйытқысы болып отыр». 
Бір шаңырақтың астындағы халқымыздың бірлігі мен достығы, өзара түсіністігі одан әрі жалғасып, еліміздегі этносаралық татулық әрдайым берік болып, ауызбіршілігіміз арта берсін! 
Баршаңызды бүгінгі мерекемен құттықтай отырып, зор денсаулық, еңбектеріңізге толайым табыс, отбастарыңызға құт-береке, амандық тілеймін! 
Тәуелсіз Қазақстанымыздың тұғыры нық, ғұмыры мәңгі болсын!

Гүлшара Әбдіқалықова сырбойылықтарды мерекемен құттықтады

Kyzylorda-news.kz. Бүгін – Қазақстан халқының бірлігі күні.
Бұл мереке 1996 жылдан бастап атап өтіледі. Достық пен өзара түсіністіктің нышаны болған бұл мейрам – Қазақстан қоғамындағы біріктіруші факторлардың бірі. Ал Қазақстан – мәдениеттерінің, тілдері мен дәстүрлерінің әралуандығы басты байлығына айналған, ал азаматтары жасампаздық пен даму идеясы айналасында біріккен ел. Сол тұрғыдан алғанда 1 мамыр мерекесі елімізде ұлттар мен ұлыстардың достығы мен татулығының, азаматтық келісімнің, ауызбірлігінің жарқын көрінісін паш етеді.
Қазақстан халқының бірлігі күнін жаңа тұрпатта тойлау қажеттігін, оны еліміздің басты мейрамына айналдыру идеясын Елбасы Н. Назарбаев 2011 жылы көтерген болатын.
<blockquote>
 «Көктемгі 1 мамыр мерекесі біздің елдегі этностарды бұрынғыдан да жақындастыра түсуі тиіс. Бұл біздің туған Қазақстанымыздағы негізгі мерекеміз болады. Бірінші мамыр – бірліктің ерекше мерекесі. Сондықтан да, мамырда тұтас ай бойы жақындасудың барлық жаңа жолдарын байқап көру керек. Ал тұрақтылық болмаған жерде даму да болмайтынына қазіргі жер жаһанда орын алып жатқан мысалдар жеткілікті. Сондықтан да, бірлікті ту еткен еліміз Қазақстан халқының бірлігі күнін басты мерекелердің біріне айналдыруды қолдап келеді. Жұмыс істеу қажет. Егер барлық облыстарда тереңінен ойластырса, өте қызықты шаралар жүзеге асатын болады әрі мұның елге пайдасы да зор», -деген еді Елбасы.
</blockquote>
Осы маңызды мерекеге байланысты Мемлекет басшысы Қасым-Жомарт Тоқаев барша жұртшылықты Қазақстан халқының бірлігі күнімен құттықтады.
<blockquote>
 «Тұңғыш Президентіміз – Елбасы Нұрсұлтан Назарбаевтың бастамасымен белгіленген бұл мереке ғасырлар бойы қазақ жерінде берік орныққан достық пен ауызбіршілік, өзара құрмет пен сенім сияқты қастерлі құндылықтарға негізделген. Тәуелсіздік кезеңінде негізі қаланған «әралуандығымыз – бірлікте» қағидаты Қазақстанның сан қырлы мәдениеті мен дәстүрін баға жетпес байлығымызға айналдырды. Ырыс-ынтымақ пен отаншылдық рух ұлттық кодымыздың ұйытқысы болып отыр. Халқымыздың әділетті әрі дамыған мемлекет құрып, елімізді өркендету жолындағы мүддесі ортақ. Біз қоғамдағы тұрақтылық пен келісімнің, өзара қолдау мен жасампаз еңбектің арқасында кез келген қиындықты еңсеріп, көздеген мақсатымызға жетеміз. Сіздерге зор денсаулық, бақ-береке тілеймін! Әр шаңырақта татулық пен өзара түсіністік болсын!», – деді Қазақстан Президенті.
</blockquote>
Жылдағы дәстүр бойынша бірлік күні Нұр-Сұлтан мен Алматыда, барлық облыс орталығы мен аудан-ауылдарда шерулер мен фестивальдар өтіп жататын. Алайда былтырдан бері коронавирус инфекциясы бүкіл әлем халқын әуре-сарсаңға салып, қалыпты өмірге үлкен ықпалын тигізгеніне куә болып отырмыз. Әйтсе де Қазақстан халқы бүгінгі күні сабыр мен ынтымаққа төр беріп, қиындықты еңсеріп келеді.
<a href="https://www.inform.kz/kz/bugin-kazakstan-halkynyn-birligi-kuni_a3783155">ҚазАқпарат</a>

Бүгін &#8211; Қазақстан халқының бірлігі күні

Kyzylorda-news.kz. Қызылорда облысында Қазақстан халқының бірлігі күніне орай тоқсанға жуық іс-шара өткізіледі. Аталған шаралардың басым көпшілігі онлайн форматта ұйымдастырылуда.
<blockquote>
 “Облыс тұрғындарын Қазақстан халқының бірлігі күні мерекесімен шын жүректен құттықтаймын! Биыл бірлігі бекем, татулығы жарасқан Қазақстан халқы Тәуелсіздіктің 30 жылдығын атап өтуде. Бүгінде Ұлы Дала төрінде бір шаңырақтың астында 100-ден астам, ал Алаштың анасына айналған Сыр өңірінде 35 этнос өкілдері тату-тәтті өмір сүруде. Олар мемлекетіміздің өсіп-өркендеуіне, бәсекеге қабілетті 30 елдің қатарына енуіне аянбай еңбек етуде. Бұл – бабалардан өсиет болып қалған, халқымызға қасиет болып қонған береке – бірлігіміз бен тарих табыстырған ортақ тағдырымыздың жемісі”, – деді Қызылорда облысының ішкі саясат басқармасының басшысы Мира Қазбекова.
</blockquote>
Мерекеге арналған шара осы аптаның басында басталды. Мәселен, бүгін «Достық. Береке. Бірлік – Тәуелсіздік кепілі» тақырыбында республикалық дөңгелек үстел отырысы өтті.
Бұдан бөлек, облыстық іс-шаралар аясында облыстық білім басқармасы тарапынан мектептер мен колледж білім алушылары арасында «Бірлігіміз жарасқан» көркемсөз оқу шеберлерінің челленджі, «Достық бекеті» шығармашылық байқауы, облысық мәдениет, архивтер және құжаттама басқармасы мұрындық болуымен «Бірлігі жарасқан Қазақстан», «Татулық тірегі – Сыр елі» тақырыптарында онлайн тарихи-құжаттық және кітап көрмелері, «Қоғамдық келісім» мекемесінің ұйымдастыруымен «Сыр өңірі – бейбітшілік пен келісімнің мекені» атты этнос өкілдерінің мәдени күндері аясындағы қайырымдылық акциясы, «Ынтымақ әуендері» атты этнос өкілдері мен «Мереке» вокалды аспапты ансамблінің бірлескен концерті ұйымдастырылуда.
Сондай-ақ, қала мен аудандарда «Қазақстан – бірлік пен татулықтың мекені», «Достығымыз жарасқан», «Ұлт бірлігі – ұлы байлық», «Біз Достықты жырлаймыз!» және тағы басқа тақырыптарда мерекелік онлайн концерттер өтуде. Ал қалада орналасқан «Бауырластар зиратында» экологиялық акция өтеді.

Қызылордада Бірлік күні тоқсанға жуық іс-шара өтеді

Kyzylorda-news.kz. Әлемнің түрлі елдеріндегі көрермен қауым, оның ішінде Бразилия, Аргентина, Боливия, Венесуэла, Колумбия, Парагвай, Перу, Уругвай, Чили, Эквадор, сондай-ақ Ресей, Польша, Бельгия, Сингапур, Швеция мен Австралияда мекендейтін отандастарымыз Қазақстан халқының бірлігі мерекесі аясында «Астана Опера» театрының эксклюзивті спектакльдерін тамашалай алады. Бұл туралы театрдың баспасөз қызметі хабарлады.
Опера және балет спектакльдерінің онлайн көрсетілімі елордалық театрдың YouTube платформасында көрсетіледі, сонымен қатар таратылымның уақыты мен күні туралы толық ақпаратты әлемнің 16 еліндегі Қазақстан Республикасы Елшілігінің өкілдері таратын болады.
<blockquote>
 “Адамдарды мәдениет сияқты ешнәрсе топтастырып, біріктіре алмайды, сондықтан біз Қазақстан халқының бірлігі күні әлемнің әр бұрышында спектакльдеріміздің онлайн көрсетілім жобасын жүзеге асыру туралы шешім қабылдадық. Оған 16 ел қатысады, алғашқылардың бірі болып Қазақстан Республикасының Ресей, Бразилия, Польша мен Швециядағы Елшіліктері келісім білдірді. Онлайн-афишаға 5 спектакль енді – 28 сәуір күні өтетін А.Аданның «Корсар» балеті, келесі күні жұртшылық назарына П.И.Чайковскийдің «Аққу көлі» танымал балеті ұсынылмақ, опера өнерін сүйер қауым үшін 30 сәуірге Дж. Пуччинидің «Турандот» спектаклін әзірледік. Ал 1 және 2 мамыр күндері халықаралық аудиториямызды әлемдік хореография жауһарлары – Л.Минкустың «Дон Кихот» және А.Аданның «Корсар» балеттерімен қуантпақпыз, – деді Қазақстанның еңбек сіңірген қайраткері, «Астана Опера» театрының директоры Ғалым Ахмедьяров.
 “Еліміздің барлық тұрғындарын тамаша, жарқын әрі ізгі мереке – Қазақстан халқының бірлігі күнімен шын жүректен құттықтаймын. Осы күні әрбір отбасына мықты денсаулық, амандық, бейбітшілік пен гүлдену тілегім келеді. Қазақстан – шамамен 125 ұлт пен ұлыс мекен еткен көпұлтты мемлекет. Ел тәуелсіздігінің 30 жылы ішінде қазақстандықтардың бейбітшілік пен келісімде тұрып жатқандығы қуантады. Баршамыздың музыкаға деген махаббатымыз бірлігімізді арттыра берсін, – деп сөзін қорытындылады театр директоры.
</blockquote>
Барлық онлайн көрсетілімдер шығарылған күні сағат 00.00-ден бастап келесі күні сағат 9.00-ге дейін театрдың YouTube-арнасында Қазақстан елшіліктерінің ресми дереккөздеріндегі сілтемелер бойынша қолжетімді болады.
Онлайн спектакльдерден бөлек, елорда тұрғындары мен қонақтарына 1 мамырда «Астана Операның» Камералық залы сахнасында өтетін «Махаббат пен достық үні» мерекелік концерті ұсынылады.
Оған опера солистері мен оркестр әртістері қатысады. Бағдарламаға қонақжай қазақ жерінде, бір шаңырақ астында тату-тәтті өмір сүріп келе жатқан ұлыстардың романстары, халық әндері, аспаптық музыкасы енген. Ұлттық музыкалық дәстүрлердің сан алуандығы көрермендерге мерекелік көңіл-күй сыйлайтыны анық.
Карантин кезінде театрға келу «Ashyq» қосымшасы арқылы жүзеге асырылатындығын еске саламыз.

1 мамыр- Қазақстан халықтарының Бірлігі күні: Әлемнің 16 елі онлайн бас қосады

<a href="https://kyzylorda-news.kz/">Kyzylorda-news.kz.</a> Биыл Қызылорда облысында би өнерінің негізін қалаушылардың қатарында болған, белгілі хореограф Болат Қаржаубаев, Татьяна Булгай, Фариза Сүлейменованың еске алуға арналған «Би бекзаттары» атты онлайн форматта концерт өткізіледі.
<blockquote>
 “Тәуелсіздік алғалы қазақ мәдениеті қарыштап дамыды. Оның ішінде би өнері біршама ілгеріледі. Оған Сыр елі хареографтар мен бишілерінің қосқан үлесі зор. Бұл жұмысты әрі қарай жалғастыру үшін облыстық халық шығармашылығын дамыту және мәдени-продюсерлік орталығы білім ордаларымен тығыз байланыс орнатты. «Сыр сұлуы», «Алтын Арай», «Қызғалдақтар», «Жас дәурен», «Экспресс» секілді ансамбльдердің репертуарын қайта жасақтау, қатарын толықтыру, базасын нығайту мақсатында жұмыстар жүргізуде. Мұндай жұмыстар би өнерінің өрісін кеңейтіп, дамыта түседі”, – деді облыстық мәдениет, архивтер және құжаттама басқармасының басшысы Мира Әбуова.
</blockquote>
Облыста балет және өнер мекемелерінде 116 би үйірмесі бар. Оған 2103 өнерпаз тартылған. Айта кетейік, барлық мәдени мекемелер жанындағы би үйірмелері ақысыз қызмет көрсетеді.
<blockquote>
 «Томирис» би ансамблінің құрылғанына биыл 20 жыл толды. Соған орай қазан айында үлкен іс-шара өткізуге дайындық жұмыстарын жүргізіп жатырмыз. Қазір елдің талғамы өсті. Қайталама дүниені көргісі келмейді. Сондықтан біз көрерменді жалықтырып алмас үшін жаңа би түрлерін енгізіп, сахналық костьюмдерді даярлаудамыз. Жалпы, ансамбль қоржынында бүгінде көрермен көзайымына айналған 80-ге жуық би бар. Ал енді талғам мен талапқа келсек, біз бишілермен 1 жылға келісім шартқа отырамыз. Сосын ақырындап келісім созыла береді. Қазір бізде 15 жылдан бері билеп келе жатқан талантты бишілеріміз бар. Ал аттестациядан 3 жылда бір рет өткіземіз”, – деді «Томирис» би ансамблінің жетекшісі Гүлбану Мырзабаева.
</blockquote>

Қызылордада «Би бекзаттары» онлайн концерті өтеді

Kyzylorda-news.kz. “Nur Otan” партиясы Қызылорда облыстық филиалының қоғамдық қабылдау бөлмесінде облыстық мәслихат депутаты Бисенов Қылышбай Алдабергенұлы азаматтарды жеке мәселелері бойынша қабылдап, өтініш айта келген тұрғындардың талап-тілектеріне жете назар аударды.
Депутаттың қабылдауына келген азаматтар баспана алу, бала денсаулығы және әлеуметтік мәселелер төңірегіндегі өтініштерін жолдады.
Депутат қабылдауда айтылған бірқатар мәселелерге ҚР қолданыстағы заңнамалар аясында қажетті кеңестер беріп, кейбір әлеуметтік өтініштерге “Ақмешіт шапағаты” қоғамдық бірлестігі арқылы қаржылай көмек көрсетуге ықпал етті.

Мәслихат депутаты Қылышбай Бисенов тұрғындарды қабылдады

<a href="https://kyzylorda-news.kz/">Kyzylorda-news.kz</a>. Археологтар зерттеу жұмыстарын мамыр-маусым айларына жоспарлап отыр. Яғни бірінші отряд қалашықтың бас қақпасының ішкі бетіне қима салу әдісі арқылы және екінші топ бірнеше бөліктен тұратын ірі тұрғын жайға қазба және консервация жұмыстарын жасайды. Ал үшінші отряд қалашықтың цитаделінің бекіністі мұнараларын ашады.
<blockquote>
 «Керамика кешені мен жануарлар сүйектерін зерттеу бойынша ауқымды жұмыстар жүреді. Тиісті зертханалық талдаулар жасалғаннан кейін, жәдігерлер музей қорына өткізіледі. Ескерткіштің ерте дәуірлердегі мәдени қабаттары, қалашықтың батыс бөлігіндегі тұрғын кварталы, ішкі жоспарлары және цитаделдің мәдени қабаттарының ерекшеліктері жайлы тың деректер алудамыз. Бүгінде үлкен керамикалық материалдар жинақталды. Олардың типологиясы мен морфологиялық ерекшеліктері зерттеліп, өңделуде. Қалашықты туристік нысанға айналдыру мақсатында қазба нысандарында қайта қалпына келтіру жұмыстары да қолға алынды» ,- деді Қорқыт ата атындағы Қызылорда университетінің «Археология және этнография» ғылыми-зерттеу орталығының жетекшісі Әзілхан Тәжекеев.
</blockquote>
Сондай-ақ, аршылған нысандар бойынша сақтау, уақытша бекіту жұмыстары да жүргізіледі.

Жанкент қалашығына үш қазба тобы археологиялық жұмыстар жүргізеді

<a href="https://kyzylorda-news.kz/">Kyzylorda-news.kz</a>. Қазақтың танымал ақыны, жазушы Есенғали Раушанов өмірден өтті. Бұл туралы ақын, Қазақстан Жазушылар одағы басқарма төрағасының бірінші орынбасары Ақберен Елгезек “Facebook” парақшасында жазды.
<blockquote>
 «Қадірлі ағайын! Қазақтың аса көрнекті ақыны, Қазақстан Республикасы Мемлекеттік сыйлығының лауреаты Есенғали Раушановтан айырылып қалдық. Алла алдынан жарылқасын. Асыл рухы бейіштің төрінде шалқысын», – деп жазды ол.
</blockquote>
Есенғали Әбдіжаппарұлы Раушанов 1957 жылы 5 қазанда Қарақалпақстанда дүниеге келген. Белгілі ақын, ҚР Мемлекеттік сыйлығының лауреаты, «Парасат» және «Құрмет» ордендерінің иегері.
1983–1987 жылдары «Жалын» және «Арай» журналдарында поэзия бөлімінің меңгерушісі, жауапты хатшы, 1988–1995 жылдары «Білім және еңбек» («Зерде») журналының бас редакторы қызметін атқарды. «Жазушы» баспасының директоры болды.
Жазушының «Бастау» (1980), «Келінтөбе» (1984), «Шолпан жұлдыз туғанша» (1986), «Ғайша бибі» (1992), «Қара бауыр қасқалдақ» (1995), «Періштелер мен құстар» (2005), «Бозаңға біткен бозжусан» (2006), «Құстар біздің досымыз» (2007) секілді бірқатар жыр жинақтары жарық көрген.

Қазақстан және Қызылорда облысының жаңалықтары: Мәдениет

Қызылорда: Пандемия тұсындағы туризм саласының әлеуеті қандай?

Гүлшара Әбдіқалықова қызылордалықтарды қос мерекемен құттықтады

Бақытбек Алпысбай: Жақындарыңыздың саулығын тілесеңіз вакцина салдырған дұрыс

Тұғырымыз – тұрақтылық, таңдауымыз – тағаттылық

Гүлшара Әбдіқалықова сырбойылықтарды мерекемен құттықтады

Бүгін – Қазақстан халқының бірлігі күні

Қызылордада Бірлік күні тоқсанға жуық іс-шара өтеді

1 мамыр- Қазақстан халықтарының Бірлігі күні: Әлемнің 16 елі онлайн бас қосады

Қызылордада «Би бекзаттары» онлайн концерті өтеді

Мәслихат депутаты Қылышбай Бисенов тұрғындарды қабылдады

Жанкент қалашығына үш қазба тобы археологиялық жұмыстар жүргізеді

Ақын, жазушы Есенғали Раушанов дүниеден өтті

Қазақстан және Қызылорда облысының жаңалықтары: Мәдениет

Қызылорда: Пандемия тұсындағы туризм саласының әлеуеті қандай?

Гүлшара Әбдіқалықова қызылордалықтарды қос мерекемен құттықтады

Бақытбек Алпысбай: Жақындарыңыздың саулығын тілесеңіз вакцина салдырған дұрыс

Тұғырымыз &#8211; тұрақтылық, таңдауымыз &#8211; тағаттылық

Гүлшара Әбдіқалықова сырбойылықтарды мерекемен құттықтады

Бүгін &#8211; Қазақстан халқының бірлігі күні

Қызылордада Бірлік күні тоқсанға жуық іс-шара өтеді

1 мамыр- Қазақстан халықтарының Бірлігі күні: Әлемнің 16 елі онлайн бас қосады

Қызылордада «Би бекзаттары» онлайн концерті өтеді

Мәслихат депутаты Қылышбай Бисенов тұрғындарды қабылдады

Жанкент қалашығына үш қазба тобы археологиялық жұмыстар жүргізеді

Ақын, жазушы Есенғали Раушанов дүниеден өтті

Тұғырымыз – тұрақтылық, таңдауымыз – тағаттылық

Бүгін – Қазақстан халқының бірлігі күні