<a href="https://kyzylorda-news.kz/">Kyzylorda-news.kz</a>. Ауылдағы мәдениет ұйымдарында кадр жетіспейді. Бұл туралы ҚР Президенті жанындағы Адам құқықтары жөніндегі комиссия отырысында Мәдениет және спорт министрі Ақтоты Райымқұлова айтты, деп хабарлайды <a href="https://www.inform.kz/kz/auyldagy-madeniet-uyymdarynda-kadr-zhetispeydi-aktoty-rayymkulova_a3802269">ҚазАқпарат</a>.
<blockquote>
 «Саланың алдында тұрған тағы бір проблема ауылдағы мәдениет ұйымдарында кадрлардың жетіспеушілігі болып табылады. Бүгінгі таңда ауылдық жерлердегі мәдениет ұйымдарындағы кадрлардың тапшылығы әр түрлі мамандықтар бойынша 1200 адамды құрайды. Оның ішінде кітапханашылар, хореографтар, мәдени ұйымдастырушылар, вокалистер, музей, ауылдық клуб қызметкерлері және басқалары бар», – деді министр.
</blockquote>
Оның атап өтуінше, жергілікті жерлерде жас мамандарды әлеуметтік қолдауға бағытталған бірқатар бағдарлама жұмыс істемейді.
<blockquote>
 «Мысалы, «Дипломмен – ауылға» жобасы ел өңірлеріндегі кадр проблемасын шешпейді. Мамандардың келуіне, бірінші кезекте, ауылдағы өмір сапасы – тұрғын үйдің болуы, жалақының лайықты деңгейі, әлеуметтік қолдау шаралары әсер етеді. Бұл – ізденушілердің әңгімелесу кезінде қоятын басты сұрақтары. Бұл мәселені шешу жан-жақты болуы керек. Шешім ретінде ауылдағы көпфункционалды орталықтар үшін әмбебап жұмысшыларды даярлау болуы мүмкін. Мысалы: кітапханашы- экскурсовод – мәдениеттанушы», – деді Ақтоты Райымқұлова.
</blockquote>

Ақтоты Райымқұлова: Ауылдағы мәдениет ұйымдарында кадр жетіспейді

<a href="https://kyzylorda-news.kz/">Kyzylorda-news.kz</a>. Қызылорда облыстық татар этномәдени бірлестігінің ұйымдастыруымен Достық үйінде дәстүрлі Сабантой мейрамы тойланды.
Сабантой татар тіліндегі ұғымда «жер өңдеу тойы» деген мағынаны білдіреді. Мерейлі мейрамның тарихы тым тереңде. Нәпақасын еңбектен тапқан татар этносы көктемгі егіс науқанын ойын-сауыққа ұластырған. Демек Сабантойды тойлаудың астарында егін бітік шықсын, жиын-терім мол болсын деген халықтың ақ тілегі мен арман-мұраты жатыр.
Сабантойдың негізі сынған құмыра болып саналады. Мерекеде құмыра сындыру рәсімін облыстық ішкі саясат басқармасының басшысы Мира Қазбекова жасады.&nbsp;
<blockquote>
 «Тәуелсіздікпен бірге шаңырақ көтерген облыстық татар этномәдени бірлестігі аталған жылдар ішінде еліміздің өсіп-өркендеуіне өз үлесін қосып келеді. Олардың белсенділері үнемі бас қосып, мәдени салт-дәстүрді жаңғыртуға атсалысып, бабадан қалған бай мұраларын сақтап қалуға барын салуда. Бүгін міне, бауырмалдық, жомарттық пен қайырымдылық қасиеттерін айшықтайтын Сабантой мерекесінде жиналып отырмыз. Баршаңызды еңбек пен береке, бірліктің негізіне айналған айтулы мерекемен шын жүректен құттықтаймын. &nbsp;Қоғамдағы достық пен келісімді нығайту, жалпы рухани адамгершілік құндылықтарды насихаттап, өңіріміздің дамуына сүбелі үлесін қосып жүрген Сіздерге алғысымды білдіремін», – деді Мира Қазбекова.
</blockquote>
Мейрам аясында меймандарға татар этносының ұлттық тағамы «чак-чак» таратылды. Ән-жыр айтылып, би биленді. Ұлттық ойындар ұйымдастырылды. Сонымен қатар Шым қаладан келген қонақтар Наиля Хузеева, Гулнур Файрузова музыкалық ән-шашуын тарту етті.
Концертпен қатар спорт кешенінде ұлттық сайыс түрлері армлестлинг, «татарча курәш» күресі, гір көтеру сайыстары өтті. Сайыс жеңімпаздарын облыстық ішкі саясат басқармасының «Қоғамдық келісім» КММ басшылық құрамы марапаттап, бағалы сыйлықтар табыс етті.&nbsp;Осылайша еңбек пен береке-бірліктің мерекесі бар сән-салтанатымен аталып өтті.
<img src="https://kyzylorda-news.kz/wp-content/uploads/2021/06/mw6a6842-scaled.jpg" alt="" />
<img src="https://kyzylorda-news.kz/wp-content/uploads/2021/06/mw6a7014-scaled.jpg" alt="" />
<img src="https://kyzylorda-news.kz/wp-content/uploads/2021/06/mw6a6928-scaled.jpg" alt="" />

Қызылордада Сабантой мерекесі аталып өтті

<a href="https://kyzylorda-news.kz/">Kyzylorda-news.kz</a>. Қызылорда облысында Абылай ханның 310 жылдығына арналған республикалық ғылыми-тәжірибелік конференция өтті.
«Абылай хан және оның тарихи дәуірі» атты жиынды Қорқыт ата атындағы Қызылорда университеті мен Рухани жаңғыру орталығы ұйымдастырды.
Орталық директоры Уәлихан Ибраев алғысөзінде ұрпаққа мұра, ұлтқа ұран болған тұлға есімін ұлықтаудың маңызы ерекше екенін атап өтті.
<blockquote>
 «Ол – қазақ тарихындағы тағдырлы кезеңнің күллі тауқыметін бойына жүктеген тұтас бітімді тұлға. Алаш баласының азаттықты ардақ тұтқан асқақ арман-аңсауы мен ерiк-жiгерi бабамыздың бойында тамаша тоғысқан. Абылай ханның басшылығымен қазақ халқының туған жерi, отанын жаудан азат ету жолындағы қиян-кескi ұрысы, күрделi геосаяси жағдайда айналадағы мемлекеттермен қарым-қатынаста дербестiк сақтауға қол жеткiзуi – ұлттық тарихымыздың жарқын беттерi», – деді ол.
</blockquote>
Шара барысында Ұлттық ғылым академиясының академигі, тарих ғылымдарының докторы, профессор Берекет Кәрібаев, Қазақстанның еңбек сіңірген қайраткері, филология ғылымдарының кандидады Зарқын Тайшыбай, сондай-ақ университет ғалымдары халқына дана, еліне пана болған ханның өмірі, ұстанған саясаты мен халыққа сіңірген еңбегіне тоқталды.
<blockquote>
 «Абылай аңсаған асқақ арманға, ұлы мұратқа бүгінгі ұрпақ жетті. Мұхтар Әуезов атындағы әдебиет және өнер институтының қолжазбалар қорында тұлға туралы 15 тарихи жыр сақтаулы. Әлі көптеген дерек ашылған жоқ. Оны танып-білу үшін осы жағын тереңірек зерттеу керек», – деді тарих ғылымдарының магистрі, Қорқыт ата атындағы Қызылорда университетінің аға оқытушысы Бақытжан Ахметбек.
</blockquote>

Қызылордада Абылай ханның 310 жылдығына арналған республикалық конференция өтті

<a href="https://kyzylorda-news.kz/">Kyzylorda-news.kz</a>. Биыл Қызылорда облысында Тәуелсіздіктің 30 жылдығына орай азат елдің жетістіктерін насихаттайтын 12 тақырыптық бағыт бойынша 266 түрлі форматтағы іс-шараларды қамтитын облыстық кешенді іс-шаралар жоспары бекітілді. Жыл басынан бері 70 іс-шара өткізілді.
<blockquote>
 «Жалаңтөс Баһадүрдің 445 жылдығына арналған іс-шаралар, республикалық айтыс, ақын, жырау Кете Жүсіптің 150 жылдығына арналған жыраулар мен жыршылар байқауын өткізуді жоспарлап отырмыз. Атақты күрішші, «Дала академигі» Ыбырай Жахаевтың 130, КСРО халық артисі, әнші Роза Бағланованың 100 жылдықтарын атап өтеміз», – дейді Қызылорда облысының әкімі Гүлшара Әбдіқалықова.
</blockquote>
Сонымен қатар аймақта ұлттық мәдени құндылықтарды дәріптеуге және ел тарихын зерттеуге ерекше назар аударылуда.
Осы жылдың мамыр айында ең ежелгі өркениет орталықтары болған қалалар – сақтардың астанасы Бәбіш мола, оғыздардың бас қаласы Жанкент, қыпшақтар мен Қазақ хандығының астанасы – Сығанақ қалаларының орнында археологиялық зерттеулер басталды.

Гүлшара Әбдіқалықова: Ыбырай Жақаевтың 130, Роза Бағланованың 100 жылдығын атап өтеміз

<a href="https://kyzylorda-news.kz/">Kyzylorda-news.kz</a>.&nbsp;«Мерейлі отбасы» ұлттық конкурсының қалалық деңгейдегі бірінші кезеңіне құжат қабылдау жалғасуда.
Конкурсқа қатысуға еңбектегі, спорттағы, шығармашылық, зияткерлік, ғылыми жетістіктері жоғары отбасылар жіберіледі.Қызметі Қазақстан Республикасының аумағында тыйым салынған ұйымдардың құрамына кіретін (кірген) мүшелері бар және де бұрын сотталған мүшелері бар отбасылар конкурсқа қатыса алмайды.
Конкурсқа қатысуға қажетті құжаттар тізімі:
1) ата-аналардың (қорғаншылардың, қамқоршылардың) жеке басын куәландыратын құжаттардың көшірмелері, балалардың туу туралы куәліктерінің көшірмелері;
2) асырап алушы (қорғаншы) отбасылар үшін – жергілікті уәкілетті органның кәмелетке толмаған балаға қорғаншылықты (қамқоршылықты) белгілеу туралы шешімінен үзінді көшірме;
3) неке қию туралы куәліктің көшірмесі (бар болса);
4) Ата-аналарының біреуі қайтыс болған жағдайда, қайтыс болу туралы куәліктің көшірмесі- бар болса;
5) Балаларды тәрбиеленгені үшін алған көтермелеулердің, белгілі бір жетістіктері үшін алған көтермелеулердің бар екенін куәландыратын құжаттардың көшірмелері;
6) балалардың, ата-аналардың (қорғаншылардың, қамқоршылардың) жұмыс (оқу) орнынан анықтамалар және мінездемелер;7) ұсынымдар (әріптестерінің, көршілерінің, достарының);
8. отбасы мүшелерінің еңбектегі, спорттағы, шығармашылық, зияткерлік, ғылыми жоғары жетістіктерін куәландыратын құжаттардың көшірмелері.
«Мерейлі отбасы» ұлттық конкурсына құжаттар 2021 жылдың 15 мамыр – 15 маусым аралығында қалалық ішкі саясат бөлімінде қабылданады. Мекен-жайы: Қызылорда қаласы, Ы.Жақаев көшесі №16 үй (қала әкімдігінің ғимараты), 303 – кабинет, байланыс телефоны: 26-35-62, 26-39-54.

«Мерейлі отбасы» конкурсына құжат қабылдау жалғасуда

Kyzylorda-news.kz. “Көптен бері халық алдына шықпай жүрген өнер адамдары қайда жүр?” деген сұрақ баршамыздың көкейімізде шығар. Бірі тұрмысқа шығып, өнерден алыстаса, ендігі бірі сахна төрінен мүлде көрінбей кетті. Көптен бері халық алдына шықпай кеткен өнер адамдарының қайда жүргенін анықтап көруге тырыстық.
Нұрлан Өнербаев
<img src="https://kyzylorda-news.kz/wp-content/uploads/2021/06/2e59f0dc8c9e234193596613d55cb78c.jpeg" alt="" />
Әнші Нұрлан Өнербаев сахнадан көрінбей кеткен әншілердің қатарында деп айтуға болады. Өнербаев 2008-2011 жылдар аралығында Парламент мәжілісі депутаты болғаны белгілі. 2011 жылдан бері шығармашылығын қолға алған. Ал 2016 жылы Өнербаев сахнаға оралатынын мәлімдеген. Бүгінде әнші Қазақстан қалаларында концерттерге шығып, өнер көрсетіп жүр. Әншінің Instagram желісінде бір ғана ресми парақшасы бар. Желідегі аккаунтында 38 мың оқырманы бар әнші қоғамда болып жатқан оқиғалар туралы ойын жиі бөлісіп отырады.
Гүлнар Сихымбаева
<img src="https://kyzylorda-news.kz/wp-content/uploads/2021/06/428ce05394b916a3d26095809d72b55f.jpeg" alt="" />
1985 жылдан бастап “Гүлдер” ансамблінде қызмет еткен Гүлнар Сихымбаева бүгінде сахнадан гөрі білім саласына көп уақытын арнайтын көрінеді. Бүгінде әнші Алматы қаласындағы Қазақ ұлттық қыздар педагогикалық университетінде ұстаздық қызметін атқарып жүр. “Қазақ ұлттық қыздар ПУ-дың, өнерлі, ұстаздарымен бір селфи! Шақырамыз қыздар біздің қара шаңырақтан білім алуға!”, – дейді әнші Facebook желісіндегі жазбасында.
Рахат Тұрлыханов
<img src="https://kyzylorda-news.kz/wp-content/uploads/2021/06/5407c811700585115177e9186381792b.jpeg" alt="" />
Әнші Рахат Тұрлыхановты сахнадан мүлде көрінбей кеткен әнші деп айтуға болады. “Әйел бақыты” бағдарламасына тікелей эфирге шыққан әнші бүгінде IT саласында жүргені белгілі болды. Қазір мобиль қосымшаға арналған жобамен айналысып жүрген көрінеді. Әнші бүгінде үш баланың әкесі.
Әсем Жәкетаева
<img src="https://kyzylorda-news.kz/wp-content/uploads/2021/06/f263b2b2ea893e3bd963ecc2f49e7e3c.jpeg" alt="" />
Superstar.kz жобасының қатысушы, бір кездері “Айлан” лақапатымен белгілі болған әнші Әсем Жәкетаева бүгінде бар уақытын отбасына арнайтын көрінеді. Әнші – Айсана есімді қыздың анасы. Сахнадан көрінбей кеткен ол желіде белсенді. Оның Instagram желісіндегі парақшасында 450 мың оқырманы бар.
Нұржан Қалжан
<img src="https://kyzylorda-news.kz/wp-content/uploads/2021/06/007fae87e9d0cf5362203667b0115fd6.png" alt="" />
Бір кездері ерекше даусымен халықты тәнті еткен Нұржан Қалжан да сахна төрінен көрінбей кеткен әншілердің бірі. Бүгінде әнші сахнаға шықпай кеткенімен үнемі жаңа әндер жазып, Instagram желісіндегі парақшасында жанкүйерлерімен жаңалықтарын бөлісіп отырады. Қазірді баяу қарқынмен сахнаға оралатын ойы бар. Әнші Instagram желісінің белсенді қолданушысы, оның 297 мың оқырманы бар.
Асқар Жүнісбеков
<img src="https://kyzylorda-news.kz/wp-content/uploads/2021/06/zhunisbekov.jpg" alt="" />
Әншінің Instagram желісіндегі парақшасын қарап, Асқар Жүнісбеков шоу-бизнестен той-бизнеске біржола ауысқан деп ойларсыз. Сахнадан көрінбей кеткенімен әнші тойларда жиі өнер көрсетеді екен. Одан бөлек әнші репертуарындағы әндерін жаңартып, отандық бағдарламаларға қатысып, өнерге де бет бұрып келе жатқаны байқалады.
Динара Қырықбаева
<img src="https://kyzylorda-news.kz/wp-content/uploads/2021/06/09dc818d799d5224de9a235281d1bbaa.jpeg" alt="" />
Бүгінде Динара Қырықбаева – үш баланың анасы. “Әнші балапанға” бес жасында қатысып, басқа да балалар байқауында топ жарып, әншілікке толықтай бет бұрған Динара әндер жаздырып, бейнеклиптер түсіріп, тіпті жеке концертін де беріп үлгерген. Жеке бизнесін қолға алған әнші сахнадан алыс кетіп, жеке өміріне көбірек көңіл бөлуді таңдаған. Әнші бүгінде үшінші баласын дүниеге әкелді.
Еркін Мәулен
<img src="https://kyzylorda-news.kz/wp-content/uploads/2021/06/305a74e806e1db7191e904d41f630768.jpeg" alt="" />
Кезінде көпшілік әндерін сүйіп тыңдайтын әнші көгілдір экраннан көрінбей кетті. Еркін Мәулен өзінің неліктен сахнадан көрінбей кеткенін “Әйел бақыты” бағдарламасында шоу бизнесте “қара тізімге” еніп кеткенін түсіндірген. “…Кезінде өздері ұсыныс жасап, жыл сайын аңсап күтетін жылда қатысып жүрген “Сағындырған әндер-ай” ән фестиваліне қатыспақ болып Майра апамызға хабарластым. “Екі-үш әніміз бар еді, бұған дейін де қатысып жүр едік. Өзіңіз тыңдап көрсеңіз” деп ұсыныс тастадым. Майра апама өкпе жоқ, ол кісі өз жұмысын істеп отыр ғой. Ол кісі: “Өкінішке қарай, Еркін мырза, мен сізді шығара алмаймын. Өйткені сіз қара тізімдесіз” деді. Сондай қара тізімдер бар екен. Сондай тізімде тұр екенбіз”, – деген еді әнші. 
Әнші өзін “қара тізімге” енгізген адамның кім екенін білмейтінін айтқан.&nbsp;
<a href="https://massaget.kz/blogs/28083/">Massaget.kz</a>

Сахна төрінен көрінбей кеткен әншілер

<a href="https://kyzylorda-news.kz/">Kyzylorda-news.kz</a>.&nbsp;Қаламгер Қаныбек Әбдуовтың «Ауыл атауының ақиқаты» атты кітабы жарыққа шықты.
Тәуелсіздіктің 30 жылдығы аясында шыққан туындысында Жаңақорған ауданындағы елді мекендер атауының шығу тарихы көнекөз қариялардың естеліктері мен тарихшылардың түйінін жер-су атауының этимологиялық астарымен сабақтастыра отырып, журналистік тұжырым жасайды.
Тұсаукесер салтанатына Жаңақорған ауданының әкімі Руслан Рүстемов қатысып, қаламгер Қаныбек Әбдуовтің еңбекқорлығы және автордың кітап жазу процесіндегі ізденістері жайлы айтып берді.

Қызылордалық қаламгердің кітабы жарыққа шықты

Kyzylorda-news.kz. 4 маусым – Қазақстан Республикасының мемлекеттік рәміздер күніне орай Сыр бойындағы барлық мемлекеттік мекемлер мен ұжымдар жұмыс күнін Гимн айтудан бастады.
Ал негізгі шара, облыс орталығы – Қызылорда қаласында орналасқан Мемлекеттік рәміздер аллеясында «РӘМІЗДЕР – ЕЛДІГІМНІҢ, ТЕҢДІГІМІНІҢ АЙБАРЫ» тақырыбымен патриоттық акция ұйымдастырылды.
Тәуелсіздігіміздің тұмары, елдігіміздің айбары саналатын рәміздерімізді ұлықтауға арналған облыс басшылығы, аймақтағы зиялы қауым, ардагерлер, этномәдени бірлестіктер, азаматтық қоғам өкілдері, әскерилер мен жастар, жас бүлдіршіндер қатысты.
Салтанатты шара барысында хордың сүйемелдеуімен жанды дауыста Мемлекеттік Гимн шырқалып, жас өнерпаздар мен жергілікті әншілердің орындауында патриоттық әндерге ұласты.
Шара соңында ел Тәуелсіздігінің 30 жылдығына орай, 30 автокөліктің қатысуымен авто, велошеру қала көшелерімен жүріп өтті.
Жалпы, айтулы мереке күні өңірде түрлі бағыттағы шаралар ұйымдастырылды. Атап айтқанда, қала тұрғындары мен қонақтарына мерекелік көңіл-күй сыйлау мақсатында «көңілді автобус» тақырыбында жергілікті өнерпаздар қоғамдық көліктерде патриоттық әндер шырқаса, «Жастар орталығы ғимаратында» шығармашылық жастар кездесуі, сұхбаттар алаңы жұмыс жасады. Өнер арбаты мен ірі сауда ойын-сауық орталықтарында өткен «Менің Қазақстаным» акциясы, «Домбыра думан», «Qosyl acoustic» патриоттық әндер кеші мерекенің маңызын аша түсті.
Бұл шаралардан бөлек, осы күні оқу орындары мен кітапханаларда, мәдениет ошақтарында, қала және аудандарды басқа да тақырыптық шаралар ұйымдастырылды.

Қызылордалықтар Рәміздер күнін кеңінен атап өтті

<a href="https://kyzylorda-news.kz/">Kyzylorda-news.kz</a>. Қызылорда қаласындағы Достық үйінде Рәміздер күні аталып өтті.
Биыл Тәуелсіздігіміздің символына айналған мемлекеттік рәміздерге 29 жыл. Мемлекеттік нышандар – еліміздің егемендігін айқындайтын жарқын бейне. Сол себепті баршамыз үшін қастерлі.
Осы орайда ҚР Мемлекеттік рәміздер күні Достық үйінің алдында облыстық ішкі саясат басқармасының «Қоғамдық келісім» КММ-нің қызметкерлері, этномәдени бірлестік мүшелері және «Жаңғыру жолы» жастары бірлесіп ҚР Әнұранын орындады. Осылайша жұмыс күнін еліміздің негізгі нышандарын ұлықтаумен бастады.
<blockquote>
 «Тәуелсіздігіміздің тұмарына айналған мемлекеттік рәміздеріміз болашаққа бет түзеген ұлы көшімізді демеп, игі істерімізді қолдай бергей! Әрдайым еліміз тыныш, халқымыз аман, туымыздың мәртебесі биік болсын»,- деді Бауыржан Мәстеков.
</blockquote>
Ал «Жаңғыру жолы» жастар қозғалысының белсенділері арбаттың бойында парад жасап, Сыр өңірінің тұрғындарын айтулы мерекемен құттықтады. Жылы лебіздерін білдіріп, оларға желбіреген аспан түстес байрағымыз көк туды сыйға ұсынды.
Мұнан соң мекеме директоры және этномәдени бірлестіктердің жетекшілері мен белсенділері, жастар Рәміздер алаңындағы саланатты шараға қатысты.
<img src="https://kyzylorda-news.kz/wp-content/uploads/2021/06/6-scaled.jpg" alt="" />

Қызылорда: Достық үйінде Рәміздер күні аталып өтті

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова аймақ тұрғындарын 4 маусым – Мемлекеттік рәміздер күнімен құттықтады.
Қадірлі жерлестер! Сіздерді елдің елдігін, мемлекеттің мәртебесін айқындайтын бірегей белгісі – Мемлекеттік рәміздер күнімен шын жүректен құттықтаймын!
Рәміздеріміз – ТУ , Елтаңба және ГИМН тәуелсіз еліміздің дербестігін әлемге танытып қана қоймай, өткені мен бүгінін жалғастырып, болашағымен сабақтастырады.
Елбасымыз Нұрсұлтан Әбішұлы Назарбаевтың сөзімен айтсақ, “Мемлекеттік рәміздер – халқымыздың рухын, ұлттық санасы, қаһармандығы мен даналығын, болашаққа деген үмітін, арман-тілегін жеткізетін ерекше құнды белгілер”.
Рәміздер халықтың рухы мен елдің егемендігін ғана емес, сол мемлекеттің өркениет көшінен алар орны мен деңгейін де белгілейді.
Бүгінгі күні Тәуелсіздігіне 30 жыл болған Қазақстанның мемлекеттік Туы өзімен экономикалық және достық қарым-қатынас орнатқан көптеген мемлекеттерде желбіреп тұр. Жеңімпаз спортшыларымыз Туымызды көкке көтеріп, Гимнімізді асқақтатуда.
Бұл әрбіріміз үшін зор мақтаныш, бақыт екені даусыз!Осы ретте, жас ұрпақтың Мемлекеттік рәміздерге деген құрметін қалыптастырып, санасына сіңіру баршамыздың азаматтық борышымыз ғана емес, басты жауапкершілігіміз екенін естен шығармасақ деймін.
Ел Президенті Қасым-Жомарт Кемелұлы Тоқаев: «Елтаңба, Ту, Әнұран – Тәуелсіздігіміздің басты құндылықтарының көрінісі, бейбітшіліктің, бірлік пен келісімнің, өсіп-өркендеудің белгісі», – деп айтқанындай, аспан түстес Көк Байрағымыз асқақтап, тұлпар тұрпатты Елтаңбамыз жарқырап, Гимніміз шарықтап, Тәуелсіздігіміз нығая берсін!
Мемлекеттік тіліміздің мәртебесі үстем болсын! Шекарамызға ешкім сына қақпасын! Тәуелсіз Қазақстанымыз жасасын!

Гүлшара Әбдіқалықова: Рәміздер мемлекеттің өркениет көшінен алар орны мен деңгейін белгілейді

<a href="https://kyzylorda-news.kz/">Kyzylorda-news.kz</a>. Бүгін Тәуелсіз Қазақстанның мемлекеттік рәміздері – Мемлекеттік ту, Мемлекеттік елтаңба және Мемлекеттік гимн күні.
Осыдан тура 29 жыл бұрын, нақты айтқанда 1992 жылдың 4 маусымында ҚР Тұңғыш Президенті – Елбасы Нұрсұлтан Назарбаев «Қазақстан Республикасының Мемлекеттік туы туралы», «Қазақстан Республикасының Мемлекеттік елтаңбасы туралы» және «Қазақстан Республикасы Мемлекеттік әнұранының музыкалық редакциясы туралы» Заңдарға қол қойған еді. Ал «Қазақстан Республикасының Мемлекеттік рәміздері туралы» Конституциялық Заң 2007 жылы 4 маусымда қабылданды.
Осы Заңға сәйкес жыл сайын 4 маусым Қазақстан Республикасында Мемлекеттік рәміздер күні ретінде мерекеленеді. Мемлекеттік рәміздер – бұл кез келген мемлекеттің егемендігі мен біртұтастығын бейнелейтін, оның ажырағысыз атрибуттарының бірі.
Қазақстан Республикасында Мемлекеттік ту, Мемлекеттік елтаңба және Мемлекеттік гимн мемлекеттік рәміздер болып саналады. Осынау мемлекеттік үш нышанды таңдау үшін 1992 жылдың басында Жоғарғы Кеңес президиумы жұмыс тобын құрып, арнайы шығармашылық комиссия тағайындады. Оның құрамына Салық Зиманов, Ербол Шәймерденов, Серікболсын Әбділдин, Серік Әбдрахманов сынды қайраткерлер кірді. Осыдан кейін бүкіл Қазақстан көлемінде Елтаңба, Ту, Әнұран нұсқаларына конкурс жарияланды. Бір ғана тудың өзіне 600 адамнан 1 200 нұсқа түссе, Елтаңбаның 245 жобасы, әнұранның 750 үлгісі байқауға қатысты. Эстетикалық сипатымен де, тарихи, саяси, экономикалық символизмге сәйкес келуі бойынша да үздік туынды ұсынған байқау жеңімпаздарын қазір халық мемлекеттік нышан авторлары ретінде таниды.
Атап айтқанда, Қазақстан Республикасының Мемлекеттік туы. Тудың авторы – Қазақстанның еңбек сіңірген өнер қайраткері Шәкен Ниязбеков.
Еліміздің мемлекеттік туы – ортасында шұғылалы күн, оның астында қалықтап ұшқан қыран бейнеленген тік бұрышты көгілдір түсті мата. Тудың сабының тұсында ұлттық өрнек тік жолақ түрінде нақышталған. Күн, оның шұғыласы, қыран және ұлттық өрнек бейнесі алтын түстес. Тудың ені мен ұзындығының арақатынасы – 1:2.
Қазақстан Республикасы Мемлекеттік елтаңбасының авторлары – белгілі сәулетшілер Жандарбек Мәлібеков пен Шот-Аман Уәлиханов. Қазақстан Республикасының Мемлекеттік елтаңбасы – дөңгелек нысанды және көгілдір түс аясындағы шаңырақ түрінде бейнеленген, шаңырақты айнала күн сәулесіндей тарап уықтар шаншылған. Шаңырақтың оң жағы мен сол жағында аңыздардағы қанатты пырақтар бейнесі орналастырылған.
Жоғарғы бөлігінде – бес бұрышты көлемді жұлдыз, ал төменгі бөлігінде «QAZAQSTAN» деген жазу бар. Жұлдыздың, шаңырақтың, уықтардың, аңыздардағы қанатты пырақтардың бейнесі, сондай-ақ «QAZAQSTAN» деген жазу – алтын түстес. Қазақстан Республикасының Мемлекеттік Туы мен Мемлекеттік Елтаңбасының эталондары Қазақстан Республикасы Президентінің Резиденциясында сақталады. Тәуелсіз Қазақстанның тұңғыш Әнұранның авторлары ретінде – әуенін жазған Мұқан Төлебаев, Евгений Брусиловский мен Латиф Хамидидің есімі тарихта қалды.
Үздік мәтінге жарияланған байқауды Мұзафар Әлімбаев, Қадыр Мырзалиев, Тұманбай Молдағалиев және Жадыра Дәрібаева жеңіп шықты. 2006 жылы «Менің Қазақстаным» әні ретінде танымал болған Қазақстанның гимні Президент Нұрсұлтан Назарбаевтың бастамасымен 2006 жылы 6 қаңтарда еліміздің Парламентінде бекітілді.
Бірінші рет ол 2006 жылы 11 қаңтарда Тұңғыш Президент, Елбасының салтанатты ұлықтау рәсімінде орындалды. Әннің авторы Шәмші Қалдаяқов, сөзін жазғандар: Жұмекен Нәжімеденов, Нұрсұлтан Назарбаев.
<a href="https://lenta.inform.kz/kz/bugin-memlekettik-ramizder-kuni_a3796604">ҚазАқпарат</a>

Бүгін &#8211; мемлекеттік рәміздер күні

<a href="https://kyzylorda-news.kz/">Kyzylorda-news.kz</a>. Бүгін Түркітілдес мемлекеттер ынтымақтастық кеңесінің Саммиті аясында Түркістан облысы әкімінің қолдауымен, «Түрксой» халықаралық ұйымының ұйытқы болуымен ҚР Тәуелсіздігінің 30 жылдығына орай «Түркістаным-Тұраным» атты симпозиумына қатысушы суретшілердің әлемдік деңгейде жазылған шығармаларынан жасақталған көрменің ашылуы өтті.
Басты мақсат – Түркітілдес халықтар арасындағы ынтымақтастық пен достықты, мәдени байланысты нығайту, түркілік мәдениет пен өнерді ұрпақтан-ұрпаққа жеткізу, түркітілдес мемлекеттердің белгілі суретшілерінің туындыларын насихаттау және бір-бірімен іс-тәжірибе, пікір алмасу. Түркітілдес елдердің рухани астанасы Түркістанды өнер тілімен насихаттау.
Симпозиумге Халықаралық дәрежедегі суретшілер Татарстан республикасы Еңбек сіңірген суретшісі Ильнур Сиразиев, Түрік республикасынан суретші Замира Шахин, Әзірбайжан республикасынан Жалал Агаев, Ресей федерациясынан Геймран Баймуханов, Өзбекстан республикасынан Дилором Мамедова, Бішкектен Қырғызстанның халық суретшісі академик Юристанбек Шигаев, Қазақстан Көркем академиясының толық мүшелері, Қазақстанның Еңбегі сіңген қайраткерлер, академик Ерлан Айтуаров, Өсербай Шоранов, Сейсенхан Маханбетов, Алпысбай Қазығұлов, Мұрат Қалқабаев, Жанұзақ Мүсәпір, Айнабек Оспанов және Қазақстан көркем академиясының академиктері Бақытнұр Бүрдесбеков, Қайыр Оразғалиев, Халықаралық Тұран сыйлығының лауреаты Әділғали Баяндин, Қазақстанның халықаралық дәрежедегі суретшілері өнертанушы – Жеңіс Кәкенұлы, Камила Жапалова, Толқын Табысбек, Динара Нүгер, Құдаш Нұрсадықов, Ерзат Болатхан, Жантөре Байдаулетов, профессор – суретші Жанарбек Берістен, ҚР Мәдениет қайраткерлері Нұрлан Шилібаев, Марат Ғабдрахманов, Аманат Назарқұл, Түркістандық суретшілер Жантөре Байдаулетов, Мұрат Шаханбаев қатысты.
Симпозиумда «Түрксой» Халықаралық ұйымының Бас хатшысы&nbsp;Дүйсен Қасейінов сөз сөйлеп, суретшілерге сертификат тапсырып, мәртебелі дипломдармен марапаттады.
Шарада шетел суретшілері атынан Қырғызстан республикасының Халық суретшісі Юристанбек Шығаев пен Қазақстан суретшілері атынан ҚР Көркем академиясының академигі және вице-президенті Ерлан Айтуаров сөз сөйлеп, көрменің маңыздылығын тілге тиек етті.
Айта кетейік, симпозиумда суретшілер 5 күн аралығында 120-дан астам жоғары дәрежедегі туындыларды жазды.
<img src="https://kyzylorda-news.kz/wp-content/uploads/2021/05/beac8c17-3ddc-4a3f-8030-b4569b65ae1a.jpg" alt="" />

Қазақстан және Қызылорда облысының жаңалықтары: Мәдениет

Ақтоты Райымқұлова: Ауылдағы мәдениет ұйымдарында кадр жетіспейді

Қызылордада Сабантой мерекесі аталып өтті

Қызылордада Абылай ханның 310 жылдығына арналған республикалық конференция өтті

Гүлшара Әбдіқалықова: Ыбырай Жақаевтың 130, Роза Бағланованың 100 жылдығын атап өтеміз

«Мерейлі отбасы» конкурсына құжат қабылдау жалғасуда

Сахна төрінен көрінбей кеткен әншілер

Қызылордалық қаламгердің кітабы жарыққа шықты

Қызылордалықтар Рәміздер күнін кеңінен атап өтті

Қызылорда: Достық үйінде Рәміздер күні аталып өтті

Гүлшара Әбдіқалықова: Рәміздер мемлекеттің өркениет көшінен алар орны мен деңгейін белгілейді

Бүгін – мемлекеттік рәміздер күні

«Түркістаным-Тұраным»: Халықаралық суретшілер көрмесі өтті

Қазақстан және Қызылорда облысының жаңалықтары: Мәдениет

Ақтоты Райымқұлова: Ауылдағы мәдениет ұйымдарында кадр жетіспейді

Қызылордада Сабантой мерекесі аталып өтті

Қызылордада Абылай ханның 310 жылдығына арналған республикалық конференция өтті

Гүлшара Әбдіқалықова: Ыбырай Жақаевтың 130, Роза Бағланованың 100 жылдығын атап өтеміз

«Мерейлі отбасы» конкурсына құжат қабылдау жалғасуда

Сахна төрінен көрінбей кеткен әншілер

Қызылордалық қаламгердің кітабы жарыққа шықты

Қызылордалықтар Рәміздер күнін кеңінен атап өтті

Қызылорда: Достық үйінде Рәміздер күні аталып өтті

Гүлшара Әбдіқалықова: Рәміздер мемлекеттің өркениет көшінен алар орны мен деңгейін белгілейді

Бүгін &#8211; мемлекеттік рәміздер күні

«Түркістаным-Тұраным»: Халықаралық суретшілер көрмесі өтті

Бүгін – мемлекеттік рәміздер күні