<a href="https://kyzylorda-news.kz/">Kyzylorda-news.kz</a> Қызылорда облысы бойынша Экономикалық тергеп-тексеру департаменті қаржы пирамидасын ұйымдастыру дерегін анықтап, оның заңсыз қызметіне тосқауыл қойды.Аталған қылмыстық іс Қызылорда қалалық сотында Қазақстан Республикасы Қылмыстық кодексінің 217-бабының 3-бөлігінің 2) тармағы (қаржы (инвестициялық) пирамидасын ұйымдастыру және оған басшылық ету, аса ірі көлемде ақша қаражатын тарту) бойынша қаралды.Сотта анықталғандай, сотталушы заңсыз пайда табу мақсатында қаржы пирамидасының қызметін ұйымдастырып, азаматтардың ақшалай қаражатын заңсыз тартқан. Сенімге кіру үшін анасының атына бірнеше екінші деңгейлі банкте жеке кәсіпкерлікке арналған шоттар ашқызып, оларды өз қызметінде пайдаланған.Сонымен қатар, ол әйелдер киімін сататын дүкен ашып, әлеуетті салымшылармен байланыс орнатқан. Кейін «WhatsApp» мессенджерінде «Бай Қыздар» атты топ құрып, «Fari_Invest» инвестициялық жобасы арқылы салынған қаражатқа жоғары табыс төленетінін, сондай-ақ белгілі бір мөлшерде қаржы салған азаматтарға алтын бұйымдар мен «iPhone» ұялы телефоны сыйлыққа берілетінін уәде еткен.Жаңа салымшыларды тартқан қатысушыларға қосымша сыйақы берілетінін хабарлап, азаматтардың сеніміне кіріп, олардың қаражатын жеке басының пайдасына пайдаланған.Сот үкімімен азаматша Қазақстан Республикасы Қылмыстық кодексінің 217-бабының 3-бөлігінің 2) тармағымен кінәлі деп танылып, азаматтардың ақшалай қаражаты мен инвестицияларын тартуға байланысты қызметпен айналысу құқығынан 7 жылға айырылып, 5 жыл мерзімге бас бостандығынан айырылды.Жазаны қылмыстық-атқару жүйесінің қауіпсіздігі барынша төмен мекемесінде өтеу белгіленді.Сонымен бірге, Қазақстан Республикасы Қылмыстық кодексінің 74-бабының 1-бөлігі қолданылып, сотталғанның он төрт жасқа толмаған баласының болуына байланысты жазаны өтеу 5 жылға дейін, бірақ баласы 14 жасқа толғаннан асырмай кейінге қалдырылды. Осы кезеңде оған пробациялық бақылау белгіленіп, Қызылорда қалалық пробация қызметінің бақылауына жүктелді.Сот жәбірленушілердің азаматтық талаптарын толық көлемде қанағаттандырып, сотталғаннан келтірілген материалдық залалды өндіру туралы шешім қабылдады. Сондай-ақ мемлекет пайдасына мемлекеттік баж және Жәбірленушілерге өтемақы қорына заңда белгіленген мөлшерде міндетті төлем өндірілді.Заттай дәлелдемелер, заңды иелеріне қайтарылуға жататын мүліктер қайтарылды. Қалған заттай дәлелдемелер қылмыстық іс материалдарымен бірге сақталатын болды. Бұған дейін тыйым салынған кейбір мүліктерге қойылған шектеулер алынды. Үкім заңды күшіне енген жоқ

Қызылорда облыстық экономикалық тергеп-тексеру департаменті қаржы пирамидасын ұйымдастырушылардың жолын кесті

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен өткен Үкімет отырысында отандық тауарларды қолдауда және ілгерілетуде атқарылған шаралар талқыланды. &nbsp;Оған облыс әкімі Мұрат Ергешбаев селекторлық режим арқылы қатысты.&nbsp;Үкімет отырысынан кейінгі мәжілісте аймақ басшысы көлік-логистика саласындағы бастамаларға, Қызылорда қаласында жүзеге асып жатқан &nbsp;жобаларға тоқталды.&nbsp;<blockquote>«Күні кеше Президентіміз Қасым-Жомарт Кемелұлының қатысуымен еліміз үшін ең маңызды жобалардың бірі «Қызылорда – Сексеуіл», «Ұлғайсын – Сексеуіл» және «Бейнеу – Сексеуіл» автокөлік жолдарының құрылысы бастау алды. &nbsp;Біз Мемлекет басшысының тапсырмасын тиісті деңгейде орындап, жобаларды белгіленген мерзімде ел игілігіне табыстауымыз керек. Сондықтан жол саласына жетекшілік ететін сала басшылары &nbsp;жұмысты қатаң бақылаңыздар. 1-2 тамыз күндері өңірімізге Премьер-министрдің бірінші орынбасары Нұрлыбек Машбекұлы &nbsp;жұмыс сапарымен келді. Президент саябағы аумағындағы көпқабатты тұрғын үйлерді, жаңа драма театр мен Президенттік кітапхананы, «Қызылорда Арена» спорт кешенін, Титов және сол жағалаудағы медициналық нысандарды көріп, мердігер мекемелерге &nbsp;тапсырма берді. &nbsp;«Tau Group» серіктестігінің өндірістік алаңында жаңа инвестициялық жобалармен танысты. Жауапты басқармалар Қызылорда қаласы әкімдігімен бірлесіп, &nbsp;құрылыс сапасын бақылау, инвестициялық жобаларды жан-жақты сүйемелдеу керек», - деді аймақ басшысы.&nbsp;</blockquote>Отандық тауарларды ілгерілетуде өңдеу өнеркәсібі, сауда және ауыл шаруашылығы салаларына тұрақты қолдау көрсетіліп келеді.&nbsp;<blockquote>«2025-2026 жылдары өңдеу өнеркәсібі мен сауда саласына 32 млрд теңге, ауыл шаруашылығына 60 млрд теңге қаралды. Бұдан бөлек, жыл сайын «Даму» қоры &nbsp;отандық кәсіпкерлерді қолдауға қомақты қаржы бөледі. Бизнеске берілген қаржы мақсатты жұмсалып, салық базасын ұлғайтуға, тұрақты жұмыс орындарын ашуға оң ықпалын тигізуі қажет. &nbsp;Қолдауға ие болған сауда субъектілері заңнамаға сәйкес сауда нысандарындағы сөре кеңістігінің кемінде 50 пайызын отандық тауарлармен толықтыруы тиіс. «Даму» қоры, бұл бағыттағы жұмысты толық зерделеңіздер», - деді Мұрат Нәлқожаұлы.&nbsp;</blockquote>Сондай-ақ, мәжілісте &nbsp;отандық тауарөндірушілердің өнімдерін кедергісіз өткізу, өндірілген тауарларды ішкі нарықпен қатар онлайн платформаларда сатуды жандандыру, әлеуметтік маңызы бар азық-түлік бағасын тұрақтандыру мәселелері қаралды.&nbsp;

Отандық тауарларды қолдауда атқарылған жұмыстар талқыланды 

<a href="https://kyzylorda-news.kz/">Kyzylorda-news.kz</a> Мемлекеттік және реттелетін сатып алулар шеңберінде отандық тауар өндірушілермен 82 млрд теңге сомасына 45 мыңнан астам шарт жасалды. Сонымен қатар, «Самұрық-Қазына» қоры 390 млрд теңгеден асатын 286 ұзақ мерзімді келісімдер мен офтейк-келісімшарттарға қол қойды. Бұл туралы Үкімет отырысында өнеркәсіп және құрылыс министрі Ерсайын Нағаспаев мәлімдеді.Ведомствоның мәліметінше, қазақстандық кәсіпорындар үшін басымдықа ие бола отырып сатып алуға 5323 тауар позициясы белгіленген, ал жер қойнауын пайдалану саласында 123 млрд теңгеге 425 кепілдендірілген сатып алу шарты ресімделген. Мемлекеттік қолдау шаралары Шымкенттегі трансформатор зауытының өндірістік қуатын 90%-ға, Семей қаласындағы кабельдік тоқ өткізгіш өнімдер кәсіпорнының өндірістік қуатын 72%-ға, Қарағандыдағы темір арқан зауытының өндірістік қуатын 71%-ға дейін көтеруге мүмкіндік берді.<blockquote>– Жаңа өндірістерді дамыту мақсатында 2023 жылдан бері өңдеу өнеркәсібін дамытуға бағытталған 623 жоба іске қосылды. Осының нәтижесінде елімізде бұрын өндірілмеген жаңа өнім түрлері шығарыла бастады. Атап айтқанда, локомотивтердің тірек балкалары, автобустардың қаптама элементтері, жүк техникасына арналған бөлшектер, автокөлік орындықтары мен мультимедиялық жүйелер, тұрмыстық техника, тік жікті құбырлар, терезе профильдері, фиброцемент тақталары, ламинат, жылыту радиаторлары және өзге де жаңа өнім түрлері өндіріле бастады, – деді Ерсайын Нағаспаев.</blockquote>Айта кетейік, бірінші жартыжылдықта өңдеу өнеркәсібіндегі өндіріс көлемі 9,8% өсіммен 16 трлн теңгеге жетті. Шикізаттық емес тауарлардың экспорты 14,6%-ға артып, $12 млрд құрады.Сурет: magnific.com

Қазақстанның өңдеу өнеркәсібіндегі өндіріс көлемі 16 трлн теңгені құрады

<a href="https://kyzylorda-news.kz/">Kyzylorda-news.kz</a> Кеше Мемлекет басшысы Қасым-Жомарт Тоқаевтың қатысуымен өткен «Қызылорда – Сексеуіл», «Ұлғайсын – Сексеуіл» және «Бейнеу – Сексеуіл» автокөлік жолдары құрылысының басталуына арналған телекөпірге «Қызылорда – Сексеуіл» автомобиль жолының &nbsp;учаскесінен облыс әкімінің бірінші орынбасары Данияр Жаналинов қосылды.&nbsp;Телекөпір барысында ҚР Премьер-министрінің бірінші орынбасары Нұрлыбек Нәлібаев жобаны бастауға әзірлік жөнінде баяндады.&nbsp;Облыстық ардагерлер кеңесінің төрағасы Серік Дүйсенбаев аса маңызды жобаның алғашқы қадамына ақ батасын берді. Жалпы ұзындығы 462 шақырым &nbsp;«Қызылорда – Сексеуіл» &nbsp;жолы қайта жаңартылып, төрт жолаққа дейін кеңейеді. Бұл қауіпсіз көлік қозғалысын реттейді, жолаушылар мен жүк тасымалын тиімді ете түседі. Еліміздің батыс өңірлері мен Қызылорда облысы арасындағы көлік қатынасына, халықаралық және республикалық транзиттік дәліздердің өткізу қабілетін арттыруға, жол бойындағы сервистік инфрақұрылымның дамуына серпін береді.&nbsp;<img src="https://knadmin.beoblood.kz/uploads/Nachalos_stroitelstvo_avtodorogi_Kyzylorda_Saksaulsk_1_d307959ec2.jpg" alt="Началось строительство автодороги «Кызылорда – Саксаульск»1.jpg">Шығыс пен Батысты жалғайтын жаңа көлік жүйесін қалыптастырады. Жоба мерзімі белгіленіп, 2029 жылы толық аяқталады деп жоспарланған.&nbsp;Жол құрылысына 10 мыңнан астам жұмысшы және 3 мыңға жуық техника тартылады, 81 көпір, 452 су өткізу құрылысы, демалыс аймақтары, сервистік нысандар және цифрлық бақылау жүйелері салынадыЖол шамамен 1 мың шақырымға, шығыстан Каспийге жүк жеткізу уақыты 3 тәулікке дейін қысқарып, өткізу қабілеті 2,5 есе артады.

«Қызылорда-Сексеуіл» автомобиль жолының құрылысы басталды

<a href="https://kyzylorda-news.kz/">Kyzylorda-news.kz</a> Премьер-министр Олжас Бектеновтің төрағалығымен өткен Үкімет отырысында отандық тауарларды қолдау және ілгерілету мәселелері қаралып жатыр.&nbsp;<blockquote>– Мемлекет басшысы отандық өндірістің өсуі үшін қолайлы жағдай жасау міндетін қойды. Ішкі нарықта қазақстандық өнімнің үлесін арттыру жергілікті өндірістің дамуына серпін беріп, кәсіпорындардың бәсекеге қабілеттілігін күшейтеді әрі ел экономикасын нығайтуға ықпал етеді, – деп атап өтті Олжас Бектенов.</blockquote>Қабылданып жатқан шаралар туралы сауда және интеграция министрі Арман Шаққалиев, өнеркәсіп және құрылыс министрі Ерсайын Нағаспаев, ауыл шаруашылығы вице-министрі Азат Сұлтанов, сондай-ақ бірқатар өңір әкімдері баяндама жасайды.Сауда және интеграция министрлігінің деректері бойынша бүгінде ішкі нарықтағы отандық өнімнің үлесі 83%-ды құрайды. Бұл ретте жекелеген тауар санаттары бойынша импортты алмастыру үшін елеулі әлеует сақталып отыр.Сурет: gov.kz

Үкіметте Президенттің отандық тауарды қолдау жөніндегі тапсырмаларының жүзеге асырылу барысы қаралуда

<a href="https://kyzylorda-news.kz/">Kyzylorda-news.kz</a> Жалағаш ауданындағы «Агрохимсервис-С» ЖШС 2020 жылғы 15 қыркүйекте жеке қаражат есебінен құны 400 млн теңгені құрайтын минералды тыңайтқыштар өндіру зауытын іске қосты. Жоба аясында 11 жаңа жұмыс орны ашылып, өндірістің жылдық қуаты 30 мың тонна өнімді құрайды.Қазіргі таңда кәсіпорын өндірістік қуатын кеңейту мақсатында жалпы құны 905 млн теңгені құрайтын қоймалар мен шатыр құрылысы жобасын іске асыруда. Жоба бойынша 750 млн теңге көлемінде «Өрлеу» бағдарламасы аясында несие қаражаты тартылған.Жоба-сметалық құжаттамасы әзірленіп, сараптаманың оң қорытындысы алынған және құрылыс жұмыстарын бастауға рұқсат берілген. Қазіргі уақытта құрылыс жұмыстарының 90 пайыздан астамы орындалып, Қытайдан жеткізілген жабдықтарды монтаждау жұмыстары жүргізілуде. Жоба толық іске қосылған жағдайда қосымша 5 жаңа жұмыс орнын ашу жоспарлануда.Аталған жобаның іске асырылуы Қызылорда облысының өнеркәсіптік әлеуетін арттыруға, минералды тыңайтқыштардың отандық өндіріс көлемін ұлғайтуға және ауыл шаруашылығы тауарын өндірушілерді сапалы өніммен қамтамасыз етуге мүмкіндік береді. Сонымен қатар импортқа тәуелділікті төмендетуге, өңдеу өнеркәсібінің дамуына, инвестиция көлемінің артуына, жаңа жұмыс орындарының құрылуына, салық түсімдерінің көбеюіне және өңір экономикасының әртараптануына оң ықпал етеді.Мемлекеттік қолдау шараларының тиімді іске асырылуы нәтижесінде жүзеге асып жатқан бұл жоба өндіріс саласын дамытуға, инвестициялық белсенділікті арттыруға және Қызылорда облысының тұрақты әлеуметтік-экономикалық өсімін қамтамасыз етуге бағытталған маңызды бастамалардың бірі болып табылады.

«АГРОХИМСЕРВИС-С» ЖШС өндірістік қуатын кеңейтуде

<a href="https://kyzylorda-news.kz/">Kyzylorda-news.kz</a> Қазалы ауданында Теміржол көлігі қызметкерлері күніне арналған салтанатты шара өтті.ьӘйтеке би кенттік Мәдениет үйінде өткен мерекелік жиынға аудан әкімі Алмасбек Есмаханов қатысып, теміржол саласының ардагерлері мен қызметкерлерін кәсіби мерекелерімен құттықтады.Аудан басшысы өз сөзінде теміржол саласының ел экономикасындағы стратегиялық маңызына тоқталып, Мемлекет басшысы Қасым-Жомарт Тоқаевтың көлік-логистика инфрақұрылымын дамытуға ерекше басымдық беріп отырғанын атап өтті.<img src="https://knadmin.beoblood.kz/uploads/Temirzholshylar_merekesi_32cdab4172.jpg" alt="Теміржолшылар мерекесі.jpg"><blockquote>– Көлік инфрақұрылымы – мемлекеттің экономикалық қуатын айқындайтын басты тетік. Мемлекет басшысы: «Жол – тіршілік көзі. Теміржол болмаса, экономика дамымайды. Біз көлік-логистика инфрақұрылымын дамытуға ерекше мән береміз», – деп бұл саланы дамытуды стратегиялық басымдық ретінде белгілеп берді. Бүгінде елімізде мыңдаған шақырым жаңа теміржол желілері салынып, олардың өткізу мүмкіндігі артып келеді. Президент тапсырмасына сәйкес республика бойынша 124 теміржол вокзалы қайта жаңғыртылуда. Оның ішінде 10 жоба Қызылорда облысында жүзеге асуда. Жуырда ғана Мемлекет басшысы, Үкімет және облыс әкімінің қолдауымен осы жобалардың бірі – 120 жылдан астам тарихы бар Қазалы теміржол вокзалы толықтай қайта жаңғыртылып, халық игілігіне пайдалануға берілді. Тарихи ғимаратты жаңғыртуға «Қазақстан темір жолы» ұлттық компаниясы тарапынан 1 млрд 290 млн теңге қаржы бөлінді. Сонымен қатар вокзал аумағын абаттандыру жұмыстарына аудандық бюджеттен 91 млн теңге бөлініп, вокзал аумағы абаттандырылды. Бұдан бөлек, жыл басында құны 1,3 млрд теңгені құрайтын жаяу жүргіншілерге арналған аспалы көпір қайта салынып, бүгінде тұрғындар игілігіне қызмет етуде. Теміржол – жоғары жауапкершілік пен темірдей тәртіпті талап ететін сала. Күннің аптап ыстығы мен қыстың қақаған аязына қарамастан, болат жол бойында тынымсыз еңбек етіп жүрген әрбір қызметкердің еңбегі зор құрметке лайық. Барша Қазалы халқының атынан сіздерге адал еңбектеріңіз үшін шынайы алғысымды білдіремін, – деді аудан әкімі Алмасбек Әбілқасымұлы.</blockquote><img src="https://knadmin.beoblood.kz/uploads/Temirzholshylar_merekesi_2_af7ef6a02f.jpg" alt="Теміржолшылар мерекесі 2.jpg">Салтанатты іс-шара барысында ауданның теміржол саласының дамуына елеулі үлес қосқан бірқатар сала қызметкерлері Қазақстан Республикасы Көлік министрлігінің Құрмет грамотасы және Алғыс хатымен, «Қазақстан вагон жөндеу кәсіпорындары қауымдастығы» заңды тұлғалар бірлестігінің төсбелгісімен, сондай-ақ облыс әкімінің және аудан әкімінің Алғыс хаттарымен марапатталды.Мерекелік шара аясында ауданның теміржол тарихынан сыр шертетін арнайы көрме ұйымдастырылып, қонақтар оның мазмұнымен танысты. Салтанатты жиын аудан өнерпаздарының мерекелік концерттік бағдарламасына ұласып, мереке иелеріне арналған аудан әкімінің ықылас гүлі сахна төріне шығарылды.&nbsp;Айта кетейік, Қазалы ауданы аумағы арқылы өтетін теміржол желісінің жалпы ұзындығы 91 шақырымды құрайды. Бүгінде аудан арқылы 13 жұп жолаушылар пойызы қатынайды. Жыл басынан бері 500 мыңнан астам жолаушы мен 9 миллион тонна жүк тасымалданған. Сонымен қатар аудан аумағындағы 15 теміржол мекемесі мен кәсіпорнында 2 мыңға жуық қызметкер ел экономикасының күретамыры саналатын салада абыройлы еңбек етіп келеді.

Қазалыда теміржолшылардың кәсіби мерекесі аталып өтілді

<a href="https://kyzylorda-news.kz/">Kyzylorda-news.kz</a> «Заң мен Тәртіп» қағидаты аясында Жаңақорған аудандық полиция бөлімінің ювеналды полиция тобының инспекторлары «Тау самалы» жазғы сауықтыру лагерінде демалып жатқан оқушылармен профилактикалық кездесу өткізді.Іс-шараның басты мақсаты – жасөспірімдердің құқықтық сауаттылығын арттыру, қауіпсіздік ережелерін сақтау мәдениетін қалыптастыру және құқық бұзушылықтың алдын алу.Кездесу барысында балаларға жол қозғалысы ережелерін сақтау, жаяу жүргіншілердің қауіпсіздігі, жолдан дұрыс өту тәртібі, сондай-ақ велосипед, мопед және электр самокатын пайдалану кезіндегі қауіпсіздік талаптары кеңінен түсіндірілді.Сонымен қатар қоғамдық орындардағы тәртіп ережелері, буллинг пен кибербуллингтің, вандализмнің, ұсақ бұзақылықтың және өзге де құқық бұзушылықтардың алдын алу, олардың заң алдындағы жауапкершілігі туралы жан-жақты ақпарат берілді.Іс-шара соңында полиция қызметкерлері оқушыларды заң талаптарын құрметтеуге, қоғамдық тәртіпті сақтауға және өз өмірі мен айналасындағылардың қауіпсіздігіне жауапкершілікпен қарауға шақырды. &nbsp;Кездесу форматта өтіп, оқушылар құқықтық қауіпсіздікке қатысты өздерін толғандырған сұрақтарға жауап алды.<img src="https://knadmin.beoblood.kz/uploads/V_letnem_lagere_proshla_profilakticheskaya_vstrecha_so_shkolnikami_ed1ad18e2e.jpg" alt="В летнем лагере прошла профилактическая встреча со школьниками.jpg">

Жазғы лагерьде оқушылармен профилактикалық кездесу өтті

<a href="https://kyzylorda-news.kz/">Kyzylorda-news.kz</a> Қызылорда облысының кәсіпкерлік және өнеркәсіп басқармасы өңірге инвестиция тарту және шетелдік инвесторлармен өзара ынтымақтастықты кеңейту бағытындағы жұмыстарды жүйелі түрде жалғастыруда.Облыс әкімінің аппаратының ұйымдастыруымен Үкіметтік делегацияның Қызылорда қаласына жұмыс сапары аясында өңірдің инвестициялық әлеуеті таныстырылып, бірқатар ірі инвестициялық жобалар бойынша ұсыныстар ұсынылды.Жобалар өңдеу өнеркәсібін дамытуға, жаңа өндіріс орындарын ашуға, экспорттық әлеуетті арттыруға және халықты тұрақты жұмыспен қамтуға бағытталған.Инвесторларға ұсынылған жобалар қатарында:«ROCA Group» (Испания) – санитарлық-техникалық бұйымдар (керамикалық санитарлық жабдықтар, қолжуғыш, унитаз) өндіретін зауыт салу жобасы. Кәсіпорын іске қосылған жағдайда жылына 50 мың шаршы метр өнім өндіріледі. Жоба құрылыс индустриясын сапалы отандық өніммен қамтамасыз етіп, импортқа тәуелділікті төмендетуге және құрылыс материалдары өндірісін дамытуға мүмкіндік береді.«Liaoning Hongda Group» (Қытай) – қорғасын-мырыш кенін өндіру және байыту комбинатын салу жобасы. Жоба аясында жыл сайын 220 мың тонна қорғасын және 420 мың тонна мырыш концентраты өндіріледі. Бұл жоба тау-кен металлургия саласын дамытуға, экспорт көлемін ұлғайтуға, салық түсімдерін арттыруға және өңірдің өнеркәсіптік әлеуетін күшейтуге елеулі үлес қосады.«Chengdu Sepmen Co., Ltd» (Қытай) – сұйытылған табиғи газ (LNG) өндіру зауытының құрылысы. Кәсіпорында жылына 264 мың тонна сұйытылған табиғи газ өндіріледі. Жоба өңірдегі газды терең өңдеу деңгейін арттырып, экологиялық таза отын өндірісін дамытуға және энергия ресурстарын тиімді пайдалануға мүмкіндік береді.«Alprecon Group – Göknur Gıda» (Түркия) – томат пастасы мен көкөніс пюресін өндіру зауыты. Жоба іске асқанда жылына 18 мың тонна дайын өнім өндіріледі. Бұл ауыл шаруашылығы өнімдерін терең өңдеуді дамытуға, жергілікті диқандардың өнімін өткізудің жаңа нарығын қалыптастыруға, қосылған құны жоғары өнім шығаруға және экспорттық әлеуетті арттыруға ықпал етеді.«Sarnıç İnşaat» (Түркия) – көпфункционалды сауда-ойын-сауық кешенін салу жобасы. Жоба аясында кешенде сауда орындары, қоғамдық тамақтану, ойын-сауық және қызмет көрсету нысандары орналасады. Бұл жоба өңірдің қызмет көрсету саласын дамытуға, кәсіпкерлікті қолдауға, туризмнің дамуына және тұрғындардың бос уақытын тиімді өткізуіне қолайлы жағдай жасауға бағытталған.Жобаларды таныстыру барысында олардың инвестициялық тартымдылығы, өндірістік қуаттылығы, іске асыру кезеңдері және өңірдің әлеуметтік-экономикалық дамуына қосатын үлесі жан-жақты таныстырылды.Аталған инвестициялық жобалардың жүзеге асырылуы Қызылорда облысында жаңа өндірістердің қалыптасуына, өңдеу өнеркәсібінің дамуына, тұрақты жұмыс орындарының көбеюіне, салық түсімдерінің артуына және өңір экономикасының әртараптануына оң әсерін тигізеді. Осы бағыттағы жұмыстар алдағы уақытта да жалғасатын болады.

Қызылорда облысының инвестициялық әлеуеті таныстырылды

<a href="https://kyzylorda-news.kz/">Kyzylorda-news.kz</a> Өңірлік коммуникациялар қызметінің ақпарат алаңында өткен баспасөз конференциясында Қызылорда облысы Төтенше жағдайлар департаменті бастығының бірінші орынбасары Жасұлан Түйменов өңірдегі өрт қауіпсіздігі ахуалы туралы баяндап, тұрғындарды қарапайым қауіпсіздік талаптарын қатаң сақтауға шақырды.Спикердің айтуынша, облыста тіркелетін өрт оқиғаларының басым бөлігі тұрғын үй секторында, автокөліктерде, орман қоры аумақтарында, түрлі нысандарда және өзге санаттағы объектілерде орын алады. Жүргізілген талдау нәтижесі бойынша өрттердің жартысына жуығы электр желілерінің тозуы мен ақаулы электр құралдарын пайдаланудан туындаған.Сонымен қатар тұрғын үй секторындағы өрттердің негізгі себептері электр желілерінің ақауы, ашық отты абайсыз пайдалану және темекі тұқылын толық сөндірмей тастау фактілері.<blockquote>– Талдау көрсеткендей, өрттердің едәуір бөлігі қарапайым қауіпсіздік талаптарының сақталмауынан орын алып отыр. Сондықтан әрбір азамат электр желілерінің жарамдылығына мән беріп, ашық отты абайлап пайдаланып, өрт қауіпсіздігі ережелерін қатаң сақтауы қажет. Өрттің алдын алу әркімнің өзінен басталады. Өрт қауіпсіздігі талаптарын бұзған азаматтарға қатысты заңнамаға сәйкес әкімшілік жауапкершілік қарастырылған. Жыл басынан бері 596 әкімшілік құқық бұзушылық туралы хаттама толтырылып, жалпы сомасы 11,4 миллион теңгеден астам айыппұл салынған, – деді Жасұлан Қалдыбайұлы.</blockquote>Қызылорда облысындағы мемлекеттік орман қорының жалпы көлемі 7,3 миллион гектарды құрайды. Оның 3,9 миллион гектары орманды алқап болса, тіркелген өрттердің негізгі бөлігі жергілікті атқарушы органдардың қарауындағы орман алқаптарында болған.Өрттің алдын алу мақсатында Төтенше жағдайлар департаменті күнделікті профилактикалық жұмыстарды күшейткен.&nbsp;<blockquote>- Бүгінгі күнге дейін 200-ден астам бірлескен рейд ұйымдастырылып, 10 мыңнан астам тұрғынға түсіндіру жұмыстары жүргізілді. Сонымен қатар халық арасында қауіпсіздік мәдениетін қалыптастыру үшін бұқаралық ақпарат құралдары мен әлеуметтік желілер арқылы ауқымды ақпараттық жұмыстар атқарылуда. Жыл басынан бері осы бағытта 4029 ақпараттық материал жарияланды, - деді спикер.</blockquote>Жасұлан Түйменов тұрғындарды өрт қауіпсіздігі талаптарына жауапкершілікпен қарап, өз өмірі мен жақындарының қауіпсіздігі үшін қарапайым сақтық шараларын ұстануға шақырды. Мамандардың айтуынша, өрттің алдын алу материалдық шығынды ғана емес, адам өмірін сақтап қалудың ең тиімді жолы.&nbsp;

Өрттің алдын алу – ортақ міндет

Қармақшы ауданы әкімінің тапсырмасына сәйкес, бүгін «Руханият» орталығында Марал ишан Құрманұлының ұрпағы, зерттеуші әрі қаламгер Мұхамедхан Қасымханұлының «Үш жүзге пір атанған әулие» атты кітабының тұсауы кесілді.«Бабалар жолымен» республикалық экспедициясының мүшелері киелі Қармақшы жеріне арнайы автошерумен келіп, аудандық тарихи-өлкетану музейін аралауы арқылы ауданымыздың тарихымен танысты. Содан соң Марал ишанның өмірі мен рухани мұрасы туралы дайындалған деректі бейнефильмді тамашалады.Жиынға қатысқан аудан әкімінің орынбасары Диас Молдабаев бұл еңбектің тарихи маңызына тоқталып:<blockquote>– «Тарихи тұлғалардың тағылымды өмір жолын кейінгі ұрпаққа жеткізу – ұлттық сананы нығайтып, төл тарихымызды тереңірек тануға жол ашады. Марал бабаның өмірі – бүгінгі жас буын үшін имандылықтың және адамгершіліктің жарқын үлгісі. Осындай құнды еңбекті жарыққа шығарып отырған Мұхамедхан Қасымханұлына аудан жұртшылығы атынан алғысымды білдіремін! Бұл туынды ұлттық құндылықтарды дәріптеуге қызмет ететін маңызды еңбек болады деп сенемін», – деді.</blockquote>Салтанатты рәсімде Марал ишанның ұрпақтары жаңа кітаптың тұсауын кесіп, ақжарма тілектерін арнады.Кеш барысында әулиеге арналған жыр-толғаулар орындалып, ақындардың арнау өлеңдері оқылды. Сондай-ақ «Бабалар жолымен» экспедициясының мүшелері, Кенесары хан, Жалаңаяқ ишан, Айтқожа ишан, Құлболды ишан және өзге де тарихи тұлғалардың ұрпақтары сөз сөйлеп, Марал ишанның мұрасын насихаттаудың маңызы жөнінде өз ойларымен бөлісті.Ал Мұхамедхан Қасымханұлы көпшілікке ризашылығын білдіріп, бірнеше жылдық ізденістің нәтижесінде жарық көрген еңбектің басты мақсаты - Марал бабаның өмір жолы мен өнегесін келешек ұрпаққа аманат ету екенін атап өтті.<img src="https://knadmin.beoblood.kz/uploads/FB_IMG_1785757186847_ff62ca798a.jpg" alt="FB_IMG_1785757186847.jpg">

Жаңа кітаптың тұсаукесері өтті 

Мемлекет басшысының 2026 жылды «Цифрландыру және жасанды интеллект жылы» деп жариялады. Қызылорда облысында цифрлық технологиялар мен жасанды интеллектіні түрлі салаларға енгізу жұмыстары жүйелі түрде жүргізілуде. Бұл туралы облыстық цифрлық технологиялар басқармасының басшысы Сәбит Ибадулла Өңірлік коммуникациялар қызметінің ақпарат алаңында өткен баспасөз конференциясында баяндады.<blockquote>– Жасанды интеллектіні экономиканың барлық саласына енгізу үшін ең алдымен білікті кадрларды даярлау маңызды. Осы бағытта өңірде жүйелі жұмыстар атқарылуда. Қызылорда облысында 2023 жылдан бері Қорқыт Ата атындағы Қызылорда университеті мен Сеул ұлттық ғылым және технология университетінің бірлескен жобасы Қазақстандағы алғашқы Жасанды интеллект институты жұмыс істейді. Қазіргі таңда онда 240 студент білім алуда. Сонымен қатар облыстың мемлекеттік қызметшілері жасанды интеллект құралдарын пайдалану бойынша толық оқытылды. Өңірдегі инновациялық жобаларға да қолдау көрсетілуде. Соңғы үш жылда Kyzylorda Hub арқылы 48 стартап жоба жүзеге асырылып, 20 жаңа жұмыс орны ашылды, – деді басқарма басшысы.</blockquote>Жасанды интеллектінің әлеуметтік маңызы бар салалардағы қолданысы да кеңейіп келеді. Биыл облыстағы 21 медициналық ұйымға онкологиялық ауруларды ерте анықтауға мүмкіндік беретін AI технологиясы енгізілді.Қоғамдық қауіпсіздікті қамтамасыз ету бағытында да цифрлық шешімдер кеңінен қолданылуда. Өңірде 2100 бейнебақылау камерасы, 150 жылдамдық өлшегіш құрылғы және 80 интеллектуалды қиылыс жұмыс істейді. Барлық бейнекамералар жасанды интеллект мүмкіндіктері бар жүйеге біріктірілген. Сондай-ақ Қызылорда облысында алғаш рет 25 SUNQAR құрылғысы арқылы көлік жүргізу кезінде қауіпсіздік белдігін тақпау және ұялы телефон пайдалану фактілерін автоматты түрде анықтап, айыппұл рәсімдеу іске қосылды.<blockquote>- Азаматтардың өтініштері мен жедел хабарламаларын бақылауды жетілдіру мақсатында «Көмек-109» және «Көмек-112» жүйелері Қазақстандағы алғашқы жасанды интеллект элементтері бар «Цифрлық қадағалау» пилоттық жобасына қосылды. Алдағы кезеңде өңірдегі жасанды интеллект экожүйесін одан әрі дамыту көзделіп отыр. Жыл соңына дейін Қызылорда қаласында «Alem AI» базасында IT орталығын ашу жоспарланған. Мұнда стартаптарды дамытуға, мамандар даярлауға және жастардың цифрлық дағдыларын арттыруға мүмкіндік жасалады, - деді спикер.</blockquote>Басқарма басшысының айтуынша, цифрландырудың келесі кезеңінде өңірлердің ерекшелігін ескеру маңызды.<blockquote>– Цифрлық даму деңгейі, инфрақұрылымдық мүмкіндіктер мен кадрлық әлеует әр өңірде әртүрлі. Сондықтан цифрлық трансформация кезінде өңірлік тәсілді күшейтіп, нақты көрсеткіштер мен жол карталарын қалыптастыру маңызды. Сыр өңірінде цифрландыру тек технологиялық жаңғыру құралы емес, мемлекеттік қызметтердің сапасын арттыруға, қауіпсіздікті күшейтуге, жаңа жобалар мен жұмыс орындарын қалыптастыруға бағытталған маңызды даму тетігіне айналып келеді, – деді Сәбит Ибадулла.</blockquote>

Қазақстан және Қызылорда облысының жаңалықтары: Қоғам