<a href="https://kyzylorda-news.kz/">Kyzylorda-news.kz</a> Осыдан тура 32 жыл бұрын егемендіктің белгісі – Ту, Елтаңба және Әнұран бекітілді. Мемлекеттік рәміздер ел рухын асқақтатып, ұлттың бітім-болмысын айшықтай түсті. Аспаннан сәулесін төккен шұғылалы күні, еркіндікте қалықтап ұшқан қыраны бар көк туымыз көкте желбіреді. Әсем өрнектелген шаңырақ, қос қапталында қанат жайған пырақ – Елтаңба, ал, «Менің Қазақстаным» әні – тәуелсіздіктің теңдессіз нышаны. Осындай ұлт айбынын қалай қастерлесек те жарасады емес пе?Олар тәуелсіздіктің басты белгілері екені айтпаса да белгілі. Бейбіт елдің рәмізін жасап, оны халық талқысына салу, арнайы құрылған мемлекеттік комиссияның сараптамасынан өткізу маңызды міндет еді. «Туымыздың бейнесі қандай болады?», «Елтаңбаның ерекшелігі ше?», «Әнұранымыз бойға қуат, ұлтқа рух беріп тұра ма?» деп талай жан егемендіктің елең-алаңында ұйқы қашырған болатын. Көне түркі дәуірінен бергі ХV ғасырдағы Қазақ хандығының өз байрағы болған.2007 жыл, 4 маусым. Астана қаласы. Дәл осы күні рәміздердің 15 жылдығына арналған «Менің Қазақстаным» республикалық жастар форумы өтті. Осы күннен бастап «Қазақстан Республикасының мемлекеттік Рәміздері туралы» Конституциялық Заң қабылданып, еліміздегі Мемлекеттік мерекелер саны тағы да көбейген-ді. Бұл күн – Ұлы даланың тарих беттерінде өзіндік орны қалған күн. Ал, мерекелік датаны атап өту жыл сайын дәстүрлі үрдіске айналды.Бала күнімізде үлкендер осы үш нышанды ерекше қастерлеуге, қадірлеуге тәрбиеледі. Бойымызға сіңіріп өсірді. Елтаңба бейнеленген 1 теңгелік монетаның өзін жерден көрсек, биікке қоюға асығатынбыз. Бұл да, киелі дүниенің бірі болды. Қазірдің өзінде жерге тастамай қастерлей ұстаймыз. Туымыздың желбіреп тұрғанынан қуат аламыз. Әнұран орындала кетсе, бейсана түрде оң қолымызды жүрекке қойып, рухымызды асқақтатамыз. Ал, түрлі сайыста орындалған әнұран әрбір қазақтың құлағынан кіріп, бойын алары сөзсіз. Тек, белгілі бір мерекеде емес, оқу ошақтарында сабақ басталмай оқушылар бойын тіктеп, қолын жүрегіне қойып әуелете таңын атыратын-ды. Тіпті, кей мектепте үзіліс қоңырауының орнына әнұранның дауысы сыңғырлады. Керемет емес пе? Қазір ауыл болсын, қала болсын туымыз түстес мектеп формасын арнайы тіктіреді. Қазақы оюын да, жейдесінің бір бөлігіне жабыстырады. Соңғы үлгіде шыққан сәнді қазақи киімдерге қарап, еріксіз қуанамыз. Қай жерде болмасын ұлттық нақышымызды көргенде бойдағы қанымыз еріксіз тулайды. Мақтаныш, қуаныш, сүйіспеншілік сезімі Отанға деген құрметті одан әрі тасытатындай. Қай кезде болмасын, қазекемнің менталитеті шекарадан аспаған. Жерден нанды жолай көтермей кетпейтін қазақ жоқ. Сол секілді туымыз да жерде жатпайды, әнұран да ескі таспада қалмайды. Отанын қалай сүйсе, құндылығын да солай дәріптейтін Ұлы даланың халқымыз. «Ел» дегенде ең алдымен рәміздер көз алдымызға оралатыны да осыдан.Біз Тәуелсіздігімізді алып, бейбіт елде марқаятын күнді армандадық емес пе? Рәміздер – ұлт тұтастығының беделбедері, тәуелсіздігіміздің басты құжаты. Көкке қалықтаған туы, айдары айшық Елтаңбасы, құлақтан кіріп бойды алған Әнұраны бар Тәуелсіз елдің ынтымағы жарасқан халқымыз. Еліміздің өз алдына дербес мемлекет екенін айғақтайтын, қазақ халқының дарқандығы мен кеңдігін бейнелейтін төл нышандарды құрметтеу – Отанға деген сүйіспеншіліктің, жоғары азаматтығымыздың көрінісі болып қала бермек.Айнұр Қазмағанбетова

Егемендіктің белгісі – рәміздерді мақтан етемін

<a href="https://kyzylorda-news.kz/">Kyzylorda-news.kz</a> Математика нақты ғылымдар саласында алатын орны орасан зор. Оны ғылымдардың іргетасы деп бағалайды. Ғылымның бұл саласы физика, химия, биологияны дамытуға жол ашады. Математика кез келген ғылым саласына жан бітіріп, бойына қан жүгіртеді. Осы саланы тереңнен меңгеріп, шәкірт тәрбиелеп, түрлі байқаулардың төрінен көрініп жүрген ұстаздардың бірі –Сәбит Бәймен. Ол Қызылорда &nbsp;қаласындағы Назарбаев Зияткерлік мектебінің мұғалімі.&nbsp;Педагогика саласында 6 жылдан бері қызмет атқарып келеді.Үнемі ізденістің үстінде жүретін ұстаз жыл сайын түрлі байқауларда бақ сынайды. Бұл оның білімі мен біліктілігін шыңдауға септігін тигізеді екен. Мәселен, биыл Сәбит Бәймен халықаралық математика, физика және информатика мұғалімдері арасында өткен IMPACT Olympiad ашық шығармашылық байқауында екінші орын алды.Өткен жылы аталған байқауда бірінші орын алған едім. Биыл екіншіорын бұйырды. Сондай-ақ, мен былтыр А.Жұмаділдаев атындағы халықаралық байқауда екінші орын алған едім. Одан басқа көптеген олимпиадаларда алдыңғы орындардан көріндім.Математикалық есептеулердің арқасында қазір технология қарыштап дамып келеді. Адамдар қауіпсіз үйлер салып, ғарышты зерттеуге мүмкіндік алды. Ол адамның жалпылау, анализ жасау, заңдылықтарды анықтау, тез ойлау, шешім қабылдау, жоспарлау, абстракты ойлау қабілеттері және логикасы, интеллектін дамытады.Математиканың шығу тегі және даму барысы ұзақ мерзімге созылды. Арифметиканың өзі дербес ғылым ретінде бірітіндеп қалыптасты. Оның негізгі сұғымы өте ертеде пайда болды. Геометрияның бастапқы қарапайым ұғымдары табиғатты бақылау, тікелей практикалық өлшеу тәжірибесінен алынған. Оған байланысты бастапқы мағлұматт барлық халықта бар, − дейді жеңімпаз ұстаз.Жалпы, математиканың дамуы ерте кезден басталады. Ол біздің заманымыздан бұрынғы 7-6 ғасырларға дейін созылды. Ол уақытта математика адамзат практикасы мен тәжірибесіне тікелей тәуелді еді. Нәтижесінде сол дүниелерден қорытылған ережелер жинағынан тұрды. Келесі сатысы математиканың өз алдына дербес теориялық ғылым болып туу, қалыптасу кезеңін қамтиды. Онда арифметика, геометрия, алгебра, тригонометрия айрықша теориялық пән болып қалыптасты.Ғалымдар аталған уақытта тұрақты шамалар математикасының, кейде элементар математика кезеңі деп бағалайды. Ол екі мың жылға жуық мерзімге созылып, шамамен ХІІ ғасырда аяқталды. Айнымалы шамалар математикасы немесе жоғары математиканың туу, қалыптасу кезеңін оның келесі сатысы ретінде саналады. Бұл ХІІ ғасырда басталып, ІХ ғасырдың екінші жартысына дейін созылды. Жиындар теориясына байланысты анализдің, геометрияның және алгебраның жаңа сападағы салалары шыққаннан кейін, математиканың негізгі мәселелерін жалпы қарастыру кезеңін төртінші кезеңге жатқызуға болады.Сәбиттің математикаға деген қызығушылығы бала кезден басталған. Оған анасының ықпалы да зор болған екен.<blockquote>−Анам математика пәнінің мұғалімі, өте шығармашыл адам. Үйімізде екі қабырғаға салынған сөрелер кітапқа толы. Олардың арасында математикаға байланысты кітаптар өте көп. Алғашқыда аталған кітаптардың суретін қарайтын едім. Кейіннен ішіндегі есептерін шығара бастадым. Сыныпта алдыңғы қатардан көріндім. Осылайша математика мені өзіне баурап алып кетті. Жаңа айтқанымдай, математика химия, физика секілді жаратылыстану пәндеріне әсерін тигізеді. Одан қалды қазақ тілі пәніне де әсері бар деп ойлаймын. Мәселен, сөздің, сөйлемнің құрылымы, фонетикалық талдаулар секілді талаптарға әсері бар. Яғни, математиканы барлық жерде қолдануға болады, оның пайдасы көп. Менің математиканы терең білуіме анам мен ұстаздарым әсер етті, − дейді ол.</blockquote>Жер шарында қызықты қаншама ғылым саласы бар.&nbsp;Оған қатысты қызықты болжамдар, деректер айтылады. Солардың арасында математика саласы ерте ғасырдан бері адамзат баласымен бірге жасап келеді. Осы мақсатта қаншама атақты ғалымдар жемісті еңбек етті.Оны білу үшін ғылым, технология дамыған елдерді білу керек. Менің ойымша, математикасы дамыған ел өркениет шыңына шыға алады. Олардың қатарында Қытай, Сингапур, Оңтүстік Корея, Ресей, АҚШ секілді алдыңғы қатарлы мемлекеттер бар. Бүгінде бұл салаға деген жастардың қызығушылығы артып келеді.Оған бір жақты баға беруге болмайды.&nbsp;Қазір көптеген халықаралық байқауларда топ жарып жүрген қазақстандық өрендер аз емес. Олардың қабілет деңгейі әлемде жоғары бағаланып жатады. Жалпы, математика әрбір жастың білімін жетілдіруіне оң ықпалын тигізеді деген ойдамын. Дегенмен кейбір оқушылар оған қызыға бермейтінін жасыра алмаймыз. Мен өзім сабақты бастар алдында оған ерекше құрметпен қараймын. Оған өзімнің қызығушылығым зор. Айта кетсем, адам білмейтінінен қорқады, сондықтан оны жек көреді. Сол себепті оқушыларға есептің оңай екенін, қолынан келетінін, өмірдегі қолданысын көрсету арқылы қызықтыруға тырысамын, − дейді.Мейрамгүл ДАУЫЛБАЙҚЫЗЫ&nbsp;&nbsp;

Математика - ғылымдардың іргетасы 

<a href="https://kyzylorda-news.kz/">Kyzylorda-news.kz</a> Қызылорда ашық университетінің кітапхана қоры жаңа кітаптармен толықты. Бағалы сыйлықты Халықаралық туризм және меймандостық университетінің профессоры Жандос Есіркепов тапсырды.<blockquote>– Ғалым Жандос Мергенбайұлы кітапханамызға авторлық үш кітабын сыйға тартты. Атап айтсақ, «Дене тәрбиесінің теориясы және әдістемесі», «Дене шынықтыру», Оқу орындарында спорт секцияларын ұйымдастыру негіздері» және «Әбдісалан Нұрмаханов: спортшы,ғалым,бапкер» кітаптары. Өз еңбегінде дене тәрбиесі мен спорттың ғылыми бағыттарына теориялық негіздеме берген. Әбдісалан Нұрмаханов туралы тың деректерді жинақтап, Қазақстан боксының тарихынан мәлімет жинақтаған. Оқулықтар колледж, университет студенттері мен оқытушыларға құнды ақпарат беретініне сенімдімін. Университет кітапханасының есігі оқырмандарға әрдайым ашық,– деді кітапхана меңгерушісі Ақзира Сейіл.</blockquote>Қызылорда ашық университетінің кітапханасында әдебиеттер саны 214525 дананы құрайды. Кітапхана қоры жалпы білім беру, гуманитарлық, әлеуметтік-экономикалық, арнайы, жалпы кәсіптік пәндер бойынша оқулықтар, оқу- әдістемелік және ғылыми әдебиеттер, көркем әдеби шығармалар, анықтамалықтар және энциклопедиялармен қамтылған.

Кітапхана қоры жаңа туындымен толықты

<a href="https://kyzylorda-news.kz/">Kyzylorda-news.kz</a> Ақпарат ағынында жүрген соң аудандағы әрбір мекемемен байланысып тұрамыз. Ашықтық қалыптасып келе жатқан уақытта теелфон нөмірімізді табу да қиын емес. Сенбі күні бейтаныс нөмірден хабарлама келді. Анықтап қарасам, сүйінші сұраған сынып жетекші. Көзтаныс болған ұстаз оқушысының республикалық фестивальден гран-при ұтып алғанын қуана жеткізіпті. Әрдайым жерлестеріміздің жақсы жаңалығын жариялауға асығатын біз ұстазға алғысымызды айтып жеңімпаз оқушы мен жетекшіге хабарластық.Миллионер оқушы Нұржігіт Науқанбаев Жосалы кенті орталығындағы Шоқан Уәлиханов атындағы №26 мектепте білім алады. 8-сыныпты тәмамдаған жеңімпаз қалдық заттардан түрлі бұйым жасағанды жақсы көреді. Көркем еңбек пәнінің мұғалімі Мұхтар Науановтың жетекшілігімен түрлі байқауда бақ сынап, жүлделі орындар иеленген. Бұл жолы да экофестиваль туралы арнайы хабарды сайттан біліп, ұсыныс жіберген. Бұл нендей фестиваль десеңіз, толығырақ тарқатайық.«Aiala» экофестивалі – Қазақстанда алғаш рет креативті индустрия, балалар мен экология тоғысқан кездесу. Іс-шараның негізгі мақсаты – экологиялық құндылықтар қалыптастыру, балаларды экологиялық тұрғыдан тәрбиелеу. Бұл фестивал Мемлекет басшысының тапсырмасы бойынша өткізілді. Биыл алғаш рет ұйымдастырылған іс-шара енді жыл сайын ұйымдастырылмақ.&nbsp;Себебі мұндай жиындар балаларға экологиялық тәрбие беруге мүмкіндік беретін қадам.Хабарландыру жарияланғаннан кейін бір ай көлемінде шығармашыл, дарынды балалардан экология тақырыбы бойынша 250-ден астам өтініш келіп түскен.&nbsp;Фестиваль еліміздің түкпір-түкпірінен келген оқушылар үшін өнер арқылы қоршаған ортаға қамқорлық көрсетуге мүмкіндік берген. Олар 6 санат бойынша экология тақырыбында қызықты жұмыстар жасай отырып, өздерінің таланттары мен шығармашылығын шыңдап, бақ сынасты. Осы санаттар бойынша 36 финалист іріктеліп алынды. Нәтижесінде осы оқушылардың ішінен 6 финалистке гран-при бұйырды. Біздің Нұржігіт «Халық» қайырымдылық қорының демеушілігімен, Мәдениет және ақпарат министрлігі, «Азаматтық бастамаларды қолдау орталығы» КЕАҚ ұйымдастыруымен Халықаралық балаларды қорғау күнінде Бейбітшілік және келісім сарайында алғашқы республикалық «Aiala» арт-эко фестивалінен&nbsp;Arle – сәндік-қолданбалы өнер бағыты бойынша &nbsp;гран-приді жеңіп алып, 1&nbsp;000 000 теңгеге ие болды.Алдымен өз баласы бәйге алғандай қуанып сүйінші сұраған сынып жетекшіні сөзге тарттық.<blockquote>– Нұржігіт өте сабырлы жігіт. Сыныптастары арасында сыйлы. Берілген тапсырманы жауапкершілікпен орындайды. Сыныбымдағы әрбір балаға өз балаларымдай қараймын. Қуаныштарына олармен бірдей қуанып, уайымдаса сейілтуге тырысамын. Олардың әрбір жетістігі – мен үшін мақтаныш. Осындай бағы мен бабы қатар шапқан шәкірттеріміз көп болсын, – дейді Индира Әбдіқалықова.</blockquote>&nbsp; Ал шәкіртін шеберлікке баулып жүрген ұстаздың өз айтары бар. Ол алдына келген шәкірттерінің ер адамға лайық бір нәрсені болсын үйреніп кеткенін қалайды. Оны ұстаздық міндеті деп біледі. Мамандығына адалдықпен қарайтын ұстаздың еңбегі осындай жеңістермен нәтиже көрсетуде.<blockquote>– Жалпы мектебімізде қолынан іс келетін балалар жетерлік. Нұржігітпен де бірнеше байқауға барып бақ сынады. Еңбек еш кеткен емес. Балалар арасында өтетін «Алтын қазына» көркем және сәндік-қолданбалы балалар шығармашылығының республикалық көрме-байқауының облыстық кезеңінде ІІІ орын иелендік. Ал бұл фестиваль туралы&nbsp;сайттан біліп, ұсыныс жасап, көрмеге қатысып, гран-при иелендік. Бұл берген бағыт-бағдарды дұрыс қолданып, үйреткенді ұғынған еңбекқор шәкіртімнің нәтижесі. Қай кезде де тынымсыз еңбек пен тұрақтылық болған жерде еңбек нәтижелі болатыны сөзсіз. Ал шәкірттің жеңісі – біздің еңбектің жемісі. Біз осындай шәкірттерімізбен мақтанамыз, – дейді жеңімпаздың жетекшісі Мұхтар Науанов.</blockquote>Расында да мұғалімнің маңдай тері шәкіртінің жеңісті күндерімен өлшенбек. Талапты шәкірт те осындай шеберлікті үйрекен ұстазына дән риза.<blockquote>– Финалистерді Астана қаласына шақыртқандықтан біз Мұхтар ағаймен жолға шықтық. Онда бізге экологиялық қалдық заттар ұсынылды. Барлығымыз сол жерде түрлі заттар жасадық. Мен өзіме ұсынылған қалдықтардан өрмекшінің мүсінін дайындадым. Бұл жұмысты «Таза болса табиғат, аман болар адамзат» тақырыында ұсындым. Жеңімпаз &nbsp;атанғанымда алғашында сенбедім. Гран-при иеленген соң менен телеарна тілшілері сұхбат алды. Өзге финалистермен де тез тіл табысып, қызықты ақпараттар алмастық. Көптеген жерді аралап, саяхаттадық. Алдағы уақытта да қалдық заттарға екінші өмір сыйлау арқылы Таза Қазақстан акциясына өз үлесімді қосқым келеді, – дейді миллионер Нұржігіт.</blockquote>Ардақ СӘКЕНҚЫЗЫ

Қармақшылық оқушы мүсін жасап, миллион алды

<a href="https://kyzylorda-news.kz/">Kyzylorda-news.kz</a> Сырдария аудан әкімі Берік Сәрменбаев «Жалын» лагерінде тынығу маусымының ашылуына қатысып, баларды құттықтады.Аудан басшысы балалардың сапалы білім және саналы тәрбие алуы үшін барлық жағдай жасалып келе жатқанын жеткізді.<blockquote>– Мемлекет басшысы Қасым-Жомарт Кемелұлы Тоқаев өскелең ұрпақтың жақсы өмір сүруі мемлекеттің басты міндеті екенін атап көрсетті. Сондықтан елімізде балаларға барлық жағдай жасалып келеді. Аймағымызда Мемлекет басшысының, Үкіметтің қолдауымен, облыс әкімі Нұрлыбек Машбекұлы Нәлібаевтың тапсырмасымен балаларды сапалы біліммен қамту, шығармашылықпен айналысу және тынығуын қамтамасыз ету үшін барлық мүмкіндіктер қарастырылуда. Аймақ басшысының бастамасымен клубтар мен мәдениет үйлері жанынан түрлі бағыттағы шығармашылық үйірмелерді қамтитын «Адал адам» рухани-мәдени орталықтары ашылды. Облысымызда 7 ауданда ішінде неке қию залы, кітапхана, музей, мұрағат, жастар орталығы, ардагерлер мен аналар үйі бар «Руханият» орталықтарының құрылысы жүріп жатыр. Мұнда жас буын үлкендердің ақылын тыңдап, тәжірибелерін меңгереді. Балалар мен жасөспірімдердің шығармашылығын шыңдау мақсатында облыс орталығынан құны 11 млрд. теңгені құрайтын «Шығармашылық академиясы» салынады. Сырдария өзенінің сол жағалауынан 300 орындық жатақханасы бар 400 орындық физика-математика мектеп-интернаты, 350 орындық заманауи Оқушылар сарайы және құны 4,8 млрд. теңгені құрайтын музыкалық колледждің жаңа ғимараты салынуда. Мемлекет басшысының бастамасымен қолға алынған «Жайлы мектеп» ұлттық жобасы аясында былтыр 10 мектептің құрылысы басталса, биыл тағы 11 мектептің құрылысы жүргізіледі. Оның ішінде, 1 мектеп Тереңөзек кентінде салынатын болады. Мұның барлығы – жастардың жарқын болашағы үшін атқарылып жатқан жұмыстар, – деді Берік Әбдіғаппарұлы.</blockquote>Лагерьдің ашылуында топ басшылары рапорт беріп, балалар өз өнерлерін көрсетті.

"Жалын" лагері өз жұмысын бастады

<a href="https://kyzylorda-news.kz/">Kyzylorda-news.kz</a> Қармақшы аудандық білім бөлімі мен кәсіподақ комитеті ұйымының ұйымдастыруымен №284 мектеп-лицейінде аудан прокуроры Мейрамбек Маханбетжановтың қатысуымен «Прокурор сағаты» өтті. Оған білім беру ұйымдарының жас мамандары қатысып, аудан прокурорымен ашық, еркін форматта сұхбат жүргізді.Жастармен кездесуде Мейрамбек Жаңбырбайұлы еліміздің ертеңі болар жас ұрпаққа тәлім тәрбие берудегі ұстаздар қауымының еңбегі өлшеусіз екенін тілге тиек етті. Сонымен қатар, қазіргі қоғамда ұстаздар өз мәртебесі деңгейінде қызмет жасап, өз құқығына қайшы келетін жайттарға жол бермеу, әкімшілік құқық бұзушылық мас күйінде көлік тізгіндеу, құмар ойындарына салыну секілді әрекеттерден аулақ болуы керектігі жөнінде жан-жақты, заң аясында түсіндірме жұмыстарын жүргізді. Мұнан өзге жастарға ұстаздық ұлы қасиетті алып жүрудің әдеп қағидаларына қатысты ақыл-кеңестерін айтып, ел мүддесі жолында қызмет жасауға шақырды.Келелі кездесуде жас мамандар аудан прокурорына қоғамдағы өзекті мәселелер төңірегінде сауалдар жолдап, қойылған сұрақтар барысына тұшымды жауаптарын алды. Ал аудан прокуроры жасөспірімдер арасындағы құқық бұзушылық әрекеттердің алдын алу және оны болдырмаудың бағытында еселі еңбек етіп жүрген бірқатар ұстаздар қауымын оқу жылының аяқталуымен құттықтап, Алғыс хаттар табыс етті.Кездесудің соңына қарай Қармақшы аудандық білім бөлімінің басшысы Гүлзира Абдазиева кештің қонағы болған, қашан да жастарға қамқорлығы мен қолдауын білдіретін аудан прокурорына өз алғысын айтып, ізгі ниетті ілтипатын жеткізді.

Жас мамандар аудан прокурорымен кездесті

<a href="https://kyzylorda-news.kz/">Kyzylorda-news.kz</a> Тағы бір оқу жылы да өз мәресіне жетті. Жадыраған жаз да келді. Жаз айлары басталысымен білім беру мекемелері жанынан жазғы тынығу лагері ашылатыны белгілі. Бұл – оқушылардың демалыс уақытын тиімді әрі қызықты өткізудің бірден-бір жолы. Осы орайда Дүр Оңғар ауылындағы №107 орта мектеп жанынан «Балдырған» жазғы этно-лагері ашылды.Оған Қармақшы аудандық білім бөлімінің басшысы Гүлзира Абдазиева, Қармақшы ауданының құрметті азаматы, ардагер-ұстаз Дәмелі Жалғасбаева, Халықаралық «Қазақ тілі» қоғамы аудандық филиалының төрағасы Гүлжауһар Раева, аудандық санитариялық-эпидемиологиялық бақылау басқармасының басшысы Гүлнар Төлепбергенова қатысып, балаларға жазғы демалыстарын көңілді, сәтті, қуанышты өткізуіне тілектестігін білдірді.Сонымен қатар мектеп ұжымы қатысушы қонақтарға жазғы тынығу лагері барысында мектеп ауласына киіз үй тігіліп, алты бақан, бес асық ұлттық ойындары және ұмыт қалған төл дәстүрлерімізді жаңғырту мақсатындағы ата-әжелердің құрақ құрау, ұршық иіру, қамшы өру секілді рухани-тәрбиелік мәні бар әдет-ғұрыптар көрсетіп, жазғы лагердің мақсат-міндетін айқындады.

Дүр Оңғар ауылында дәстүрді дәріптейтін этно-лагерь ашылды

<a href="https://kyzylorda-news.kz/">Kyzylorda-news.kz</a> Дін мәселелерін зерттеу орталығының ұйымдастыруымен «Дін және тарих» тақырыбында жергілікті мешіт жамағаттары арасында интеллектуалды сайыс өтті.Білім сайысына 100-ден астам адам қатысты. Олар зияткерлік сайыстың «Логикалық сұрақтар», «Ислам және ғылым тарихы», «Ұлттық мәдениеттің негізі&nbsp;– салт-дәстүр», «Алаштықтар аңсаған күн» және «Қазақстандағы жер атаулары» атты 5 кезеңінде түрлі тақырыптағы сауалдарға жауап беріп, өздерінің ой зеректігі мен білім деңгейлерін сынады.Тартысты өткен сайыс нәтижесінде, әділ қазылар алқасының анықтауымен 15 топ арасынан «Алдажар Жәме» мешітінің командасы бас жүлдені иеленді.Ал, жүлделі I орынды «Мақтұм сейіт» мешітінің жамағаты алса, II орынды Қарауылтөбе ауылдық округі мешітінің командасы еншіледі.«Қалмұхаммед Ишан» және «Ыбырайым молда» мешіттерінің жамағатына III орын бұйырса, IV орынға «Әл Уали» және ««Ерназар Мақсұм» мешіттерінің командалары тұрақтады.Сайыс соңында жеңімпаз командалар бағалы сыйлықтармен марапатталып, барлық қатысушыларға арнайы алғыс хаттар табысталды.Жалпы, мұндай сипаттағы іс-шараның мақсаты мешіт жамағаты арасындағы бірлікті нығайту және білімнің маңыздылығын түсіндіру болып табылады.

«Дін және тарих» тақырыбында интеллектуалды сайыс өтті

<a href="https://kyzylorda-news.kz/">Kyzylorda-news.kz</a> Жақында Төретам кенті, Ақай ауылына қарасты №23 «Балдырған» бөбекжай-бақшасында «Заттық-кеңістік дамытушы орта арқылы нәтижеге бағытталған даму механизмін құру» тақырыбында педагогтардың іс-тәжірибесін насихаттау мақсатында аудандық семинар өтті. Оған Қармақшы аудандық мәслихат депутаты Еркін Рзалиев, Ақай ауылының әкімі Эльмира Қазиева және мемлекеттік, жекеменшік мектепке дейінгі ұйымдардың әдіскерлері мен тәрбиешілері қатысты. Оны Қармақшы аудандық білім бөлімінің басшысы Гүлзира Абдазиева ашып, мектепке дейінгі білім беру саласында болып жатқан нәтижелі жұмыстар легін айтып, мектепке дейінгі білім беру ұйымдары бойынша жүргізіліп жатқан жұмыстарға кеңінен тоқталды.Семинар барысында бүлдіршіндердің қатысуымен әндер айтылып, би биленді. Семинардың тағы бір ерекшелігі – балалардың қалдық материалдардан жасалған креативті, сәнді, заманауи киімдер үлгісі қатысушылардың көз қуанышына айналып, көрерменді тәнті етті.Балабақша ауласына түрлі топ бойынша балалардың болашақ мамандықтарға бейінін анықтау бойынша көрме ұйымдастырылды. Одан бөлек қатысушыларға балалардың ой өрісі мен қабілетін арттыру барысындағы ойын түрлері мен түрлі рухани бағыттағы іс-шара&nbsp;ұсынылды.Семинар соңында қатысушылар іс-шарада көрсетілген жұмыстар бойынша мамандар тәжірибе алмасып, өзіндік ұсыныс пікірлерімен бөлісті.

Ақай ауылында тәрбиешілер тәжірибе алмасты

<a href="https://kyzylorda-news.kz/">Kyzylorda-news.kz</a> «Қызылордада тал өспейді» деген сөзге тойғанбыз. Әзіл. Бірақ түбінде зіл бар. Кім болса да осылай Қызылорданың қысы-жазы желден көз ашпайтын, ауасы құрғақ, топырағы тұзды климатын тұспалдағанын түсінеміз.«Тал өспейді» деген «тал екпейді» деген сөз емес. Егуіміздің кемі жоқ. «Жасыл Қызылорда» мекемесінің мәліметіне сенсек, биыл көктемде облыс орталығында 8 мың көшет отырғызу жоспарланған. «Жоспарды 12 мыңға артығымен орындадық» деп ақпар берді ондағылар.<blockquote>– Қаланың аяқсу тұрақты беріліп тұрған Бейбарыс сұлтан, Қорқыт ата, Сағымбаев және тағы басқа орталық көшелеріне климатқа қолайлы талдар егілді. Мониторинг жүргізіп тұрамыз. Нәтижесінде қураған талдар анықталса, кесіп алынады, – дейді «Жасыл Қызылорда» КММ басшысының орынбасары Болат Бисенбаев.</blockquote>Канал, арық жүйелерін тазалау, жерасты ұңғымасы және насос арқылы аяқсу беру, сквер аллеялар мен орталық көшелердегі гүлзарларға гүл егу, көгалды күтіп ұстау, қураған ағаштарды кесу және балақтау ендігі жерде осы мекеменің міндетінде. Оның құрылғанына көп болған жоқ. Қоғам белсендісі Болат Нұрқожаев жаңа мекемеге сенім артатынын, бірақ жұмысы бір ізге түскенше кемі екі-үш жыл керек екенін жеткізді.«Әуелі&nbsp;суару жүйесін жөндеп алайық»Қызылордалық Болат Нұрқожаев ерікті түрде көшелерге ағаш отырғызып жүр. Бізбен әңгімесінде 12 метр жерден 500 көшет алып, оны сұрағандарға таратып бергенін айтты.Сыр өңірінде жылда егілетін талдың санында есеп жоқ. Былтыр көктемде қаланың әр аумағына 5 мың түп тал егілген. Әкімдік оған 10 миллион теңге жұмсаған. Бірақ сансыз көшеттің көктегені некен-саяқ. Туған жеріміздің жайқалып тұрғаны шамалы. Қоғам белсендісі суарылмағасын, күтіп-баптамағасын солай болатынын алға тартты.<blockquote>– Шымкент, Алматы, Астана қалаларында тал егіп, су құйсаң, шыға береді. Қызылордада олай емес. Тамшылатып суару жылыжайға, бүркіп суару газонға арналған. Қаланың сол жағалау бөлігін абаттандырып, тамшылатып суаратын етіп қойған. Оны Назарбаев даңғылында да бірнеше рет байқадым. Пандемия кезінде бүркіп суару жүйесін пайдаланылды. Ол да іске аспай қалды. Бюджеттің қаржысы осылай тиімсіз жұмсалып жатыр. Бейбарыс сұлтан көшесі көгалдандырылды. Бірақ оның бойындағы әрбір ағаш бұрын-соңды суару жүйесі арқылы жақсы жетілді. Бізге, ең алдымен, арықпен суару жүйесі мәселесін шешіп алу керек, – дейді ол.</blockquote>Сыр топырағы қарағаш, үйеңкі, жиде, тораңғыл егуге қолайлы. Қылқан жапырақты өсімдіктерді жерсіндіру қиын. Қоғам белсендісі оны тек бағбан күтім жасайтын ғимарат немесе үйдің алдына егуге кеңес берді. Су келмеген жерге егудің қажеті жоқ.<blockquote>– Тал күтіміне келсек, алдымен, жерді баптау керек. Біз болсақ, бір шелек су сыятындай етіп қазып, көшетті отырғызамыз. Ол дұрыс емес. Өскен кезде де тамыры жайылатындай етіп, қорек ретінде топыраққа көң араластырып, жерді өңдеп барып еккен дұрыс. Қара жерге шыбықты қадай салғанмен шаруа шешілмейді. Қорек болмағасын көшет көбіне өліп қалып жатады, – дейді Болат Нұрқожаев.</blockquote>Сондай-ақ ол тұрғындар бәрін әкімдікке итеріп салмай, өзі де қарекет қылу керек екенін жеткізді.<blockquote>– Ең болмаса, жылына бір рет үй жағын, арық жүйесін тазалау керек. Қалада жұмыс күші жетпеуі мүмкін. Жасыл желекті көбейтуден бұрын бар талды сақтап қалудың өзі мұң болып тұр. «Болатын баланың бағын кеспе, өсетін талдың басын кеспе» дейді. Ал біз талдың басын кесеміз. Биік өсу үшін талдың астын балақтау керек, – дейді қоғам белсендісі.</blockquote>Арша, шырша,&nbsp;қарағай,&nbsp;қайыңға&nbsp;дейін жайқалтқанҚызылордадағы тал-дарақ өсіру ісіне бір кісідей үлес қосқан бір жан болса, ол – Бектай Сүлейменов.Жақында ғана жасы 85-ке толды. Соған қарамастан күйлі, қуатты. Қаланың сырт жағындағы 25 гектар жердің 8 гектарын баққа айналдырған. Біз барғанда бейнеткеш ақсақал бел жазбастан сонда жүр екен. Қолында кетпен-күрегі. Азаннан кешке дейін тыным таппайды. Көздің жауын аларлық көрініс – 34 жыл бойғы осындай еңбектің жемісі.<blockquote>– Әуелгіде 4-5 сотық жерді шағын насоспен суару арқылы егуден бастадым. Қазір мұнда алма, алмұрт, шие, сары өрік, қара өрік, жиде, жүзімнің үш-төрт сорты, таулы жерде өсетін арша, бот арша, боз арша сияқты ағаштарға дейін бар. Қызылорданың климатында көшетті күзде егудің тиімділігі төмен. Одан көктемде дұрыс. Жазда қылқан жапырақтыларды егуге болады, – дейді Бектай Сүлейменов.</blockquote>Кейіпкеріміз Қызылорданы жасыл қалаға айналдыруға болатынын әлдеқашан дәлелдеп үлгерген. Оған жетудің жолы – құр науқаншылдық емес, шынайы ынта мен еңбек қана екенін үнемі айтып келеді. Бейнеттің зейнеті шығар, қазіргі күні ат шаптырым аумақта қарағай-қайың, аршаға дейін бой түзеп тұр.Бағбан ақсақал қаладағы тубдиспансердің емделушілеріне тиімді ұсынысын жеткізді.<blockquote>– Өкпе ауруына шалдыққан науқастар үшін жасыл желектің пайдасы мол. Дәрігерлер тубдиспансерде жатып емделген науқастарға емі біткесін Көкшетаудағы, Солтүстік Қазақстандағы қарағай орманына баруды ұсынады. Осындай жағдайды өзімізде де жасауға болады. Жергілікті билік мәселеге көңіл бөліп, қаражат қарастырса, 7-8 гектар жерге қатарластырып ағаш егуге өзім көмектесер едім. Науқастар ем-дом қабылдағаннан кейін жасыл желекте таза ауа жұтып, серуендеп жүрсе, денсаулығын түзеуге көп көмектесер еді, – деді ол.</blockquote>Бектай атаны мазалайтын тағы бір жайт – баққа барар жолдың жайы. Ойдым-ойдым жолмен, әсіресе, жауын-шашынды күні көліктің де, жаяу адамның да онда жетуі қиын. Қаланы көгалдандыруға зор үлес қосқан ақсақалдың бұл өтініші жергілікті билік тарапынан елеусіз қалмаса екен дейміз.Назерке СәниязоваФото: tengrinews.kz

Биыл көктемде облыс орталығында 12 мың көшет отырғызылды 

<a href="https://kyzylorda-news.kz/">Kyzylorda-news.kz</a> 4 маусым – Қазақстан Республикасының Мемлекеттік рәміздер күнін барша қазақстандықтар айтулы мереке ретінде атап өтіп келеді.Тәуелсіз Қазақстанның мемлекеттік рәміздері Мемлекеттік Рәміздер – Ту, Елтаңба және Гимн Қазақстан Республикасының дербестігі мен тәуелсіздігін бүкіл әлемге танытушы әрі мемлекетіміздің өткені мен бүгіні және болашағы арасындағы сабақтастықтықтың жарқын көрінісі.Сондай-ақ рәміздер – халқымыздың рухын, қаhармандығы мен даналығын, асқан арман-тілегін жеткізетін құнды белгілер.Айтулы күнге орай, Қызылорда облысы ПД-ның жеке құрамы салтанатты түрде сапқа тұрып, Қазақстан Республикасының Мемлекеттік Гимнін шырқады.Іс-шара барысында департамент бастығының орынбасары полиция подполковнигі Оралбек Омаров жеке құрамды 4-маусым Қазақстан Республикасының Мемлекеттік рәміздер күнімен құттықтап, тәуелсіздігіміздің тұмарына айналған мемлекеттік рәміздеріміз болашаққа бет түзеген ұлы көшімізді демеп, игі істерімізді қолдай бергей, әрдайым еліміз тыныш, халқымыз аман, туымыздың мәртебесі биік болуына өз тілегін жеткізді.<blockquote>«Бұл мереке барлығымызды біріктіре түседі, ұлттық сананы қалыптастырады, патриоттық сезімді оятады, азат елдің бірден-бір нышаны саналатын рәміздерімізді құрметтеп, қастерлей білу-бүгінгі,ертеңгі ұрпақтың парызы » – деп атап өтті Оралбек Тәубақабылұлы.</blockquote>

Қызылордалық полицейлер Мемлекеттік рәміздер күнін атап өтті

<a href="https://kyzylorda-news.kz/">Kyzylorda-news.kz</a> Қызылордадағы «Атамекен» отбасылық үлгісіндегі балалар ауылы 2015 жылы 1 маусымда ашылған еді. Онда жетім және ата-ананың қамқорлығынсыз қалған балаларға білім мен тәрбие беріледі. Бүгінде мұнда 3 пен 18 жас аралығындағы түрлі ұлт өкілдерінің балалары тәрбиеленуде.Балалар ауылының басты миссиясы – жеткіншектердің құқықтары мен заңды мүдделерінің қорғалуын қамтамасыз ету, бәсекеге қабілетті, зияткер тұлға етіп тәрбиелеу, отбасындағыдай жағдайда тәрбие бере отырып, әлеуметтік ортаға толық бейімдеп шығару. Мұндай үлгі, біріншіден, балалардың бір үйде тәрбиеленуіне мүмкіндік береді, екіншіден, олар өз-өзіне қызмет көрсетуге дағдыланады, яғни, күнделікті ас дайындауға, үй жинауға, үй шаруасымен айналысуға үйренеді. Сонымен қатар өзін-өзі басқару арқылы отбасындағы шығыстарға қатысуға және сатып алуға, төртіншіден, білім мекемесін таңдау құқығын және бос уақытты тиімді ұйымдастыруға жаттығады. Ал мұндағы ана-тәрбиешілер ашық конкурс негізінде «Отбасы үлгісіндегі балалар ауылы» туралы заң және «Ана-тәрбиешілерге қойылатын талаптар» ережелеріне сай қабылданады.Қосқабатты 8 үй мен әкімшілік ғимаратынан бөлек, балалар ауылында баскетбол, волейбол және басқа да спорттық ойындарға арналған үлкен алаң, әткеншектер мен бүлдіршіндерге арналған түрлі ойын орындары бар. Әрбір ғимарат 10 балаға арналған жатын, қонақжай, ойын бөлмелері және сабаққа даярлық бөлмесі, барлық санитарлық талаптарға сәйкес санитарлық-гигиеналық жуыну бөлмелерімен, заманауи талапқа сай техникалық құрылғылармен жабдықталған. Еңбек Ері Әбіш Кекілбаевтың ұсынысымен үйлерге «Үшқоңыр», «Байқоңыр», «Ақжайық», «Оқжетпес», «Ұлытау», «Мадияр» және «Сарыарқа» атаулары берілген.<blockquote>– Балалардың бойына ұлттық құндылықтарды, өзіне-өзі сенімді болуды, халқымыздың салт-дәстүрін, тарихын, мәдениетін құрметтейтін елжандылықты сіңіреміз, жұмысымыз бәсекеге қабілетті тұлғаны қалыптастыруға негізделген. Алғаш ашылған күннен бері 83 бала түлеп ұшты. Жасаған жұмыстардың нәтижесінде 25 түлек ЖОО-ға, 58-і арнаулы орта оқу орнына түсті, 48-і тұрғын үймен қамтамасыз етіліп, 20 шақты түлегіміз отбасын құрып, отау тігіп отыр.&nbsp;8 бала мемлекеттік білім грантын жеңіп, шәкіртақы алады.Қазір ауылда 51 тәрбиеленуші бар. Кейінгі үш жылда 62 бала тіркеліп, балалар ауылының бағдарламасына сай тұрғын үймен қамтамасыз етілді. Ең маңызды мәселенің бірі – балаларды отбасына орналастыру. Осы уақытқа дейін 39-ы отбасына қабылданып, ана-тәрбиешілер мен ұстаздарының ыстық ықыласынан соң олардан кем емес жылы орта тапты. 14 бала патронаттық, 17-сі қамқоршылық-қорғаншылық тәрбиеге берілді. Ал 8 бала туған ата-анасына қайтарылған, – дейді «Атамекен» балалар ауылының директоры Лиза Ноғайқызы.</blockquote>Кішкентайынан бойындағы қабілет-қарымын танытып, дарынымен дараланған үздіктер қатары да көбеюде. Мәселен, балалар ауылының оқушысы Ерсұлтан Қыпшақбаев «Жаңа Қазақстанның үздік 100 дарынды оқушысы» төсбелгісінің иегері атанса, Алена Митрофанова «AQYL-OI» республикалық ғылым-білім дамыту орталығы ұйымдастырған «Element-2023» І республикалық кешенді пәндік олимпиадасында гуманитарлық бағыт бойынша І орын және «Ұлы дала баласы» ұлттық білім сайыстарының халықаралық кезеңінде бас жүлде алған. Михаил Турсунов есімді шәкірт спорт шеберлігіне үміткердің бірі, 2022 жылдың тамыз айында Малайзия елінде муайтайдан өткен Әлем чемпионатының қатысушысы, 2022 жылдың «Үздік спортшысы» атанып үлгерген.Басшының айтуынша, кейінгі жылдары Үкімет тарапынан түрлі жеңілдіктер қарастырылған. Балалар ауылына келіп түскен күннен бастап олардың жеке құжаттарын толықтыру, тұрғын үй кезегіне қою және пәтер алуға жағдай жасау – бірінші кезекте атқарылатын іс. Бітіруші түлектер мамандық алуы үшін мемлекеттік грант, әкім гранты, университет ректорының грантымен қамтамасыз етіледі.Балалар арасында ауыл президенті тағайындалып, қарамағында 8 министрімен бірге ауылдың дамуы мен өркендеуіне өз үлесін қосып келеді. «Оқуға құштар ауыл», «Жастар парламенті», «Балалар және театр», «Дебат қозғалысы», «Еңбек – менің мұратым» жобалары да жеке тұлға ретінде қалыптасуына, талантын танытуға бағытталып отыр.&nbsp;Дина Бөкебай

Қазақстан және Қызылорда облысының жаңалықтары: Қоғам