<a href="https://kyzylorda-news.kz/">Kyzylorda-news.kz</a> Ақорда Айбек Смадияровтың Президенттің кеңесшісі – Баспасөз хатшысы болып тағайындалғанын <a href="https://kaz.inform.kz/news/aybek-smadiyarov-prezidenttn-kenesshs-baspasoz-hatshisi-boldi-29168d/">хабарлады.</a><blockquote>- Мемлекет басшысының өкімімен Айбек Серікбайұлы Смадияров Қазақстан Республикасы Президентінің кеңесшісі – Президенттің Баспасөз хатшысы болып тағайындалды, ол бұрынғы атқарған лауазымынан босатылды, - делінген ресми дереккөзде.</blockquote>Айбек Смадияров II сыныпты Төтенше және Өкілетті Уәкіл дипломатиялық дәрежеге ие. Қазақ, орыс, ағылшын және түрік тілдерін меңгерген. Ол 1983 жылғы 7 шілдеде Оңтүстік Қазақстан облысында дүниеге келген. 2004 жылы Абылай хан атындағы Қазақ халықаралық қатынастар және әлем тілдері университетін бітірген.Еңбек жолын 2005 жылы «Қазақстандағы Қытай банкі» АҚ Әкімшілік департаментінің маманы ретінде бастаған. 2006 жылдан 2008 жылға дейін ҚР Сыртқы істер министрлігі Консулдық қызмет департаментінің маманы ретінде қызмет атқарды.2008-2010 жылдары ҚР СІМ Еуропа департаментінің атташесі және үшінші хатшысы лауазымдарында жұмыс істеді.2010-2012 жылдар аралығында Қазақстанның Мажарстандағы Елшілігінде үшінші хатшы қызметін атқарды.2012 жылдан 2013 жылға дейін ҚР Президентінің Баспасөз қызметінде сарапшы, ал 2013-2014 жылдары ҚР СІМ Сыртқы саяси сараптау мен болжамдау комитетінің бірінші хатшысы лауазымын атқарды.2014 жылдан 2018 жылға дейін Вьетнамдағы ҚР Елшілігінде екінші және бірінші хатшы қызметінде жұмыс істеді.2018-2019 жылдары ҚР СІМ баспасөз қызметін басқарып, 2019-2023 жылдар аралығында ҚР СІМ Халықаралық ақпарат комитеті төрағасының орынбасары – баспасөз хатшысы лауазымын атқарды.2023 жылғы маусымнан бастап ҚР СІМ Коммуникациялар департаментінің директоры – Ресми өкілі болды.2025 жылы ҚР СІМ Халықаралық ақпарат комитетінің төрағасы — Ресми өкілі.Фото: ҚР СІМ

Айбек Смадияров Президенттің кеңесшісі – Баспасөз хатшысы болды   

<a href="https://kyzylorda-news.kz/">Kyzylorda-news.kz</a> Қорғаныс министрлігі жыл басынан бері Қарулы Күштерде әскери қызметкерлердің қаза табуына байланысты&nbsp;ресми мәлімдеме жасады. Бұл туралы <a href="https://stan.kz/">Stan.kz</a> ақпарат агенттігі хабарлады.Ведомство басшылығы жыл басынан бері қаза тапқан әскери қызметшілердің&nbsp;жақындарына көңіл айтып,&nbsp;әскери қызмет қауіпсіздігін қамтамасыз ету жөніндегі жауапкершілік деңгейін толық түсінетінін атап өтті.<blockquote>“Жыл басынан бері Қарулы Күштерде әскери қызметкерлердің қаза табуына байланысты Қазақстан Республикасы Қорғаныс министрлігінің басшылығы қаза болғандардың отбасыларына, туған-туыстарына және жақындарына шынайы көңіл айтады”, –&nbsp;делінген хабарламада.</blockquote>Сондай-ақ Қорғаныс министрі Дәурен Қосановтың тапсырмасы бойынша&nbsp;келер уақытта мұндай трагедиялардың қайталануына жол бермеуге бағытталған шұғыл шаралар&nbsp;қабылданған.Біріншіден, тәрбие жұмысының ұйымдастырылуы мен әскери тәртіпті бақылау күшейтілді.<blockquote>“Жарғы талаптары мен қарумен жұмыс істеу кезіндегі қауіпсіздік шараларының, оқу-жаттығуларды өткізу, атыс жүргізу және қызметтік міндеттерді орындау барысында қауіпсіздік талаптарының сақталуы қатаң реттеліп отыр”, –&nbsp;делінген хабарламада.</blockquote>Екіншіден, барлық әскери бөлімдерге жеке құрамды кешенді психологиялық тексеруден өткізу үшін комиссиялар жіберілді. Әскери қызметкерлердің психикалық жай-күйіне, сондай-ақ қызметтік міндеттерді орындауға психологиялық дайындық деңгейіне қайта бағалау жүргізілмек.Үшіншіден, командирлер мен сержанттық құрамның&nbsp;жеке жауапкершілігі күшейтілді. Негізгі назар оқыс оқиғалардың алдын алуға және қауіпсіз мінез-құлық дағдыларын қалыптастыруға бағытталды.Төртіншіден, әскери полиция күштерімен әскери бөлімдерде жан-жақты тексерулер ұйымдастырылды. Жеке құрамға бақылау, бейнебақылау, оның ішінде қызметтен тыс уақытта да, күшейтілді.Бесіншіден, әскери полиция күштерімен жан-жақты тексерулер ұйымдастырылды. Жеке құрамға бақылау күшейтілді, оның ішінде қызметтен тыс уақытта да.<blockquote>“Тәулік бойғы бақылау енгізіліп, құқықбұзушылықтар мен оқиғалардың алдын алуға бағытталған қосымша профилактикалық шаралар қабылданды”, –&nbsp;делінген хабарламада.</blockquote>Алтыншыдан, скери қызметкерлердің жақындарымен тұрақты бейнебайланыс жасау жүйесі құрылды. Бөлімше командирлері ресми арналар арқылы ата-аналармен тұрақты байланыс орнатып, жүйелі түрде өзара әрекет етеді.Кадрлық және тәртіптік шешімдер<blockquote>Бұған дейін тіркелген деректер&nbsp;бойынша кадрлық және тәртіптік шаралар қабылданды. “Шығыс” өңірлік қолбасшылығының қолбасшысы, штаб бастығы және қолбасшының тәрбие және идеологиялық жұмыс жөніндегі орынбасары тәртіптік жауапкершілікке тартылды. Қаза тапқан сарбаздың әскери бөлім командирі, оның орынбасары және батальон командирі қызметтерінен босатылды. “Қабылданып жатқан барлық шаралар ең алдымен жеке құрамның өмірі мен денсаулығын сақтауға және мұндай қайғылы жағдайлардың қайталануына жол бермеуге бағытталған. Бұл бағыттағы жұмыс тұрақты негізде жалғасын табады”, –&nbsp;делінген хабарламада.</blockquote>Фото:&nbsp;Pexels.com

Бірнеше командир қызметінен кетті: Қорғаныс министрлігі әскердегі өлім-жітімге байланысты мәлімдеме жасады

<a href="https://kyzylorda-news.kz/">Kyzylorda-news.kz</a> Қазіргі таңда Шиелі ауданында экономикалық ахуал тұрақты қалыптасып, негізгі көрсеткіштер бойынша оң өсім байқалуда. Бүгінде аудан бюджетінің көлемі 16,5 млрд теңгеге жетіп, өз кірістері 2022 жылмен салыстырғанда 170 пайызға артқан. Бұл туралы Өңірлік коммуникациялар қызметінің ақпарат алаңында Шиелі ауданының әкімі Айтбай Жандарбеков мәлімдеді.<blockquote>- Аймақ басшысының тапсырмасына сәйкес, аудан дамуының негізгі басымдықтары ретінде инвестиция тарту, жаңа жұмыс орындарын құру, салық базасын кеңейту, кәсіпкерлікті дамыту, тұрғындарды көгілдір отынмен қамтамасыз ету, көркейту-көгалдандыру және қоғамдық-саяси тұрақтылықты сақтау бағыттары айқындалған. Осы мақсатта аудан экономикасына тікелей әсер ететін барлық негізгі көрсеткіштерде оң динамика қалыптасты. Жыл сайын жүзеге асырылатын инвестициялық жобалардың да саны артып келеді. Атап айтқанда, өткен жылы 10 ірі инвестициялық жобаны іске асыру басталды. Олардың қатарында «Тесис» ЖШС-ның қуаттылығы 40 МВт күн электр станциясы, «VIGOR Holding» ЖШС-ның қуаттылығы 20 МВт күн электр станциясы, «Эко Энерджи Плюс» ЖШС-ның «Батыс Қытай – Батыс Еуропа» халықаралық автодәлізі бойында газ құю және сервистік қызмет көрсету кешені бар. Сондай-ақ, «Ақмая» шаруа қожалығының күріш ақтау зауыты, «Таң ЛТД» ЖШС-ның жүгері дақылдарын кептіру және терең өңдеу жобасы, «Transshipment 1» ЖШС-ның сұйық реагенттер қоймасы мен «Шиелі әк» ЖШС-ның жылына 1 млн тонна әк өндіретін зауыты бар. Аталған жобалардың бірқатары өз жұмысын бастап, қалғандары кезең-кезеңімен іске қосылатын болады,- деді Айтбай Насриддинұлы.</blockquote>Егін шаруашылығы бойынша өткен жылы Шиелі ауданында жалпы 30 192 гектар жерге ауыл шаруашылығы дақылдары орналастырылды. Оның ішінде негізгі дақыл саналатын күріш 12 301 гектар алқапқа егілді. Аталған егістіктің әр гектарынан орта есеппен 61,3 центнерден өнім алынып, нәтижесінде 75 405 тонна сыр салысы қамбаға құйылды.<blockquote>– Өткен жылы су тапшылығының алдын алу және егіс алқаптарындағы суды тиімді пайдалану мақсатында ерте көктемнен бастап 9 500 гектар жерге лазерлік тегістеу жұмыстары жүргізілді. Сонымен қатар, заманауи су үнемдеу технологияларын енгізу аясында 2 100 гектар жерге тамшылатып суару әдісі қолданылды. Оның ішінде 700 гектар алқапқа «Таң ЛТД» ЖШС тарапынан дәндік жүгері дақылы егілсе, 1 400 гектар жерге көкөніс пен бақша дақылдары орналастырылды. Ауыл шаруашылығы саласының материалдық-техникалық базасын нығайту бағытында соңғы төрт жыл көлемінде отандық және шетелдік техникалар есебінен ауданның ауыл шаруашылығы құрылымдарының техника паркі 68,5 пайызға жаңартылды. Одан бөлек, ауыл тұрғындарының табысын арттыруға бағытталған мемлекеттік қолдау тетіктері де тиімді іске асырылуда. Атап айтқанда, 2023 жылдан бастап облыс көлемінде жүзеге асырылып келе жатқан «Ауыл аманаты» жобасы аясында Шиелі ауданында соңғы жылдары 145 жоба қаржыландырылды. Аталған бастамалардың ауқымын кеңейту және тұрғындарға қолжетімділігін арттыру мақсатында демеушілердің қолдауымен аудан орталығында арнайы «Ауыл аманаты» орталығы ашылды,- деді Айтбай Насриддинұлы.</blockquote>Биыл Үкімет пен аймақ басшысының айрықша қолдауының нәтижесінде республика көлемінде теміржол вокзалдары мен вокзал маңы аумақтарын күрделі жөндеу және абаттандыру жұмыстары бастау алып, бұл бастама облыс аумағында да кең көлемде жүзеге асуда. Осы ауқымды жобалар аясында 1903 жылы салынған Шиелі теміржол вокзалы да күрделі жөндеуден өткізіліп, тарихи нысан жаңаша келбетке ие болуда.<blockquote>– Мемлекет басшысы Қазақстанда азаматтарды қолжетімді тұрғын үймен қамтамасыз ету – мемлекеттің басты әлеуметтік міндеттерінің бірі екенін бірнеше мәрте атап өткен еді. Өйткені баспана тек тұрғын үй емес, ол әр отбасының тұрақты өмірі мен әлеуметтік әл-ауқатының берік негізі. Осы бағытта аудан тұрғындарын баспанамен қамту мақсатында 2021 жылдан бүгінгі күнге дейін 370 пәтер пайдалануға берілді. Ал өткен жылдың өзінде әлеуметтік осал топтағы азаматтар үшін 52 пәтер салынып, тұрғындар жаңа қонысқа ие болды. Қазіргі таңда аудан бойынша 18 елді мекен табиғи газбен қамтылған. Елді мекендерді газдандыру деңгейі халық санына шаққанда 81,6 пайызды құрап отыр. Сонымен қатар, Шиелі ауданы тұрғындары бүгінгі күні 100 пайыз сапалы ауыз сумен қамтамасыз етілген, - деді Айбай Насриддинұлы.</blockquote>Ауданда әлеуметтік инфрақұрылым саласында да ауқымды жұмыстар атқарылуда. Атап айтқанда, Шиелі кентіндегі көп бейінді орталық аудандық аурухана ғимаратына қосымша блок салынып, МРТ құрылысын орнатуға 733 млн теңге бөлініп, құрылыс жұмыстары толық аяқталды. Бұдан бөлек, 650 млн теңгеге заманауи МРТ аппараты орнатылып, пайдалануға беріліп, «Болашақ» дәрігерлік амбулаториясын күрделі жөндеуге 255 млн теңге қаржы бөлініп, құрылыс жұмыстары толығымен аяқталды. Сондай-ақ, аймақ басшысының қолдауымен Шиелі ауданына 30 жедел жәрдем көлігі жеткізіліп, жедел медициналық қызмет көрсетудегі өзекті мәселе толық шешімін тапты.

Шиеліде ірі инвестициялық жобалар арқылы экономикалық өсім қалыптасты

<a href="https://kyzylorda-news.kz/">Kyzylorda-news.kz</a> Қызылорда облысы бойынша Қазынашылық департаменті өткен жылы 903 мемлекеттік мекемеге, квазимемлекеттік сектор субъектілеріне, жергілікті өзін-өзі басқару органдарына, мемлекеттік сатып алу жүйесіне, сондай-ақ білім беру инфрақұрылымын қолдау қоры мен қаржылық және қаржылық емес қолдау операторларының шоттарына қызмет көрсетті. Одан бөлек, 700 мыңға жуық қаржылық құжат қабылданып, оның 665 мыңы өңделді. Ал 16 515 құжат ресми хат арқылы орындаусыз кері қайтарылды. Бұл туралы департамент басшысы Қалмұханбет Байсариев мәлімдеді.<blockquote>- Жыл қорытындысы бойынша департаменттің кіріс және шығыс құжат айналымы 20 529 құжатты құрады. Өткен жылы департаментке және аудандық, қалалық қазынашылық басқармаларына жеке және заңды тұлғалардан барлығы 99 өтініш келіп түсті. Барлық арыз-шағымдар заңнама талаптарына сәйкес уақтылы қаралып, тиісті жауаптар берілді. Сонымен қатар ҚР Тілдерді дамыту мен қолдауға арналған мемлекеттік бағдарламасын іске асыру аясында Қызылорда облысы бойынша Қазынашылық департаментінде іс жүргізу толықтай мемлекеттік тілде жүзеге асырылды,- деді Қалмұханбет Сапарбекұлы.</blockquote>

Қызылорда қазынашылығы: 2025 жылдағы жүйелі жұмыстар қорытындыланды

<a href="https://kyzylorda-news.kz/">Kyzylorda-news.kz</a> «AMANAT» партиясының облыстық филиалының төрағасы Жандос Базартайдың қатысуымен партия филиалы жанындағы сыбайлас жемқорлыққа қарсы іс-қимыл жөніндегі аймақтық кеңестің отырысы өтті.Жиынның күн тәртібінде мемлекеттік сатып алу саласы бойынша сыбайлас жемқорлыққа қарсы іс - қимыл аясында жүргізіліп жатқан жұмыстар талқыланып, кеңестің құрамына өзгеріс енгізілді.<blockquote>«Мемлекеттік сатып алу саласында ұйымдастырылатын конкурстардың ашықтығы мен оңтайлылығын қамтамасыз ету, сыбайлас жемқорлық тәуекелдерін болдырмау және жергілікті атқарушы органдарға түсетін жүктемені азайту мақсатында, облыс әкімінің бастамасымен 2023 жылдан бастап, облыстық басқармалар мен қала, аудан әкімдіктері және оларға бағынысты мекемелер арасында мемлекеттік сатып алудың бірыңғай ұйымдастырушысы ретінде облыстық мемлекеттік сатып алу басқармасы айқындалды. Атап өту керек, бір облыста – бір ұйымдастырушы тәсілін республика бойынша бірінші болып, Қызылорда облысы енгізді.»-деді облыстық мемлекеттік сатып алу басқармасы басшысы Бауыржан Шаменов.</blockquote>2025 жылы мемлекеттік сатып алу веб-порталда 1 158 тапсырыс берушімен жалпы 110 309 сатып алу жоспарланып, жүзеге асырылған.Бұл ретте, жалпы жоспардың тек 3 пайызы немесе 3 304 сатып алу облыстық мемлекеттік сатып алу басқармасымен конкурс тәсілі арқылы өткізілсе, қалған 97 пайыз мемлекеттік сатып алулар тапсырыс берушілердің тікелей өздерімен өткізілген.<blockquote>Жиында барысында кеңес төрағасы Мақсұт Нәлібаев: «Мемлекеттік сатып алу саласында жүргізілетін мемлекеттік саясатқа сәйкес мемлекеттік басқарудың стратегиялық мақсаттарына қол жеткізіліп, мемлекеттің міндеттері мен функциялары қамтамасыз етіледі. Сонымен бірге бұл қызмет негізінен қаржылық қатынастардан тұратындықтан және мемлекеттік органдармен бірге көптеген кәсіпкерлік субъектілерін қамтитындықтан өте маңызды болып табылады.»-деді.</blockquote>Мұнан бөлек жиында кеңес мүшелерінің құрамына өзгерістер енгізілді. Отырысты қорытындылаған филиал төрағасы Жандос Базартай сыбайлас жемқорлыққа қарсы іс-қимыл баршаға ортақ міндет екендігін тілге тиек етіп, мемлекеттік сатып алу саласындағы сыбайлас жемқорлық, құқық бұзушылық көріністері мен оның туындау себеп салдарын жою мақсатындағы жұмыстар алдағы уақытта да тұрақты түрде бақылауда болатындығын атап өтті.

Мемлекеттік сатып алудағы ашықтық пен тиімділік партия алаңында қаралды

Конституцияның адамның жеке басына қол сұқпаушылық, адамның негізгі құқықтарын қорғау және сот билігінің тәуелсіздігіне қатысты нормалары айтарлықтай күшейтіледі. Бұл мәселелер Конституциялық комиссияның төртінші отырысында қаралған Ата Заңға енгізілетін өзгерістердің жиынтық жобасынан көрініс тапты.Жоба таныстырылымында Конституциялық сот төрағасының орынбасары Бақыт Нұрмұханов ұсынылған өзгерістердің басты тұстарына ерекше тоқталып, «Негізгі құқықтар, бостандықтар мен міндеттер» атты бөлімнің жаңа атауы қарастырылған мәселелерді толық қамтитын атап өтті.Бұл ретте ұсынылған новеллалар адамның ең жоғары құндылық екені туралы қағидатқа сүйене отырып, құқықтар мен бостандықтарды іске асыру және қорғау кепілдіктерін күшейтеді және толықтырады.<blockquote>«Бұл өмір сүру құқығын абсолюттік дәрежеге көтеру, адамға бағдарланған саясат, адамның жеке басына қол сұғылмаушылық пен «Миранда ережесінің», цифрлық дәуірде жеке мәліметтерді қорғау, ар-намыс пен қадір-қасиетті қорғауды күшейту, әлеуметтік құқықтар мен құқықтық анықтық қағидаттарын бекіту деген сөз», — деді Бақыт Нұрмұханов.</blockquote>Ол қазіргі уақытта Конституцияның 7-бөліміндегі сот әділдігі қағидаты ретінде қарастырылып отырған кейбір нормалардың адам құқықтарын қорғау кепілдігі ретінде осы бөлімге көшіріліп, жеке бапқа біріктірілетінін айтты.<blockquote>«Сөз бостандығы мен шығармашылық еркіндік құқығына жаңа мән-мағына беріліп, демократиялық және құқықтық мемлекетте жеке тұлғаның еркін дамуының маңызды шарты саналатын зияткерлік меншікті қорғау кепілдіктерінің бөлек түрлері белгіленді», – деп атап өтті Конституциялық сот төрағасының орынбасары.</blockquote>Оның айтуынша, Конституцияда неке мен отбасы құндылықтарын, сондай-ақ қоршаған ортаны қорғау міндеттемелері күшейтіледі.<blockquote>«Аты өзгерген «Сот жүйесі. Прокуратура. Құқық қорғау тетіктері» бөлімінде айтарлықтай өзгерістер көзделген. Оған сот ісін жүргізу нысандарын кеңейтуге, әділеттілік пен сот тәуелсіздігінің конституциялық қағидаттарын нығайтуға, сондай-ақ сот жүйесіндегі кадр мәселелеріне қатысты сот мәселелері бойынша маңызды түзетулер кіреді», – деді Бақыт Нұрмұханов.</blockquote>Сондай-ақ, ол Конституциялық комиссия мүшелерінің назарын адвокатураның құқықтық мәртебесін бекітетін жеке баптың қарастырылғанына аударды.Сонымен қатар, Конституциялық комиссияның мүшесі Құрылтайдың құрылуына байланысты «Жергілікті мемлекеттік басқару және өзін-өзі басқару» бөліміне нақты түзетулер енгізу қажет болғанына да тоқталды.Сөз соңында Бақыт Нұрмұханов «Конституцияға өзгерістер мен толықтырулар енгізу» деп аталатын жаңа бөлім Ата Заңның мәтінін ең үздік халықаралық тәжірибеге сәйкес жаңартуға мүмкіндік беретінін атап өтті.Фото: Азаматтарға арналған үкімет

Қазақстанда неке мен отбасы құндылықтары конституциялық деңгейде күшейтіледі

<a href="https://kyzylorda-news.kz/">Kyzylorda-news.kz</a> Конституцияның Преамбуласын толық жаңартып, мемлекет пен діннің өзара ықпалдастығы нормаларын жетілдіру ұсынылады. Бұл туралы Конституциялық сот төрағасының орынбасары Бақыт Нұрмұханов Конституциялық комиссияға түзетулердың жиынтық жобасын таныстырған кезде мәлімдеді.Оның айтуынша, Конституцияның Преамбуласын жаңа редакцияда толық өзгерту ұсынылып отыр, ол жаңа ұлттық құндылықтарды және қазіргі заманның талаптарын ескере отырып дайындалған.Бақыт Нұрмұхановтың айтуынша, Преамбулада Конституцияны қабылдаудың негізгі мақсаттары, қағидаттары, құндылықтары және себептері бекітілген. Сондай-ақ, қоғамдық бағдарды анықтайтын мемлекеттің миссиясы, тарихи контекст пен мәдени ерекшеліктер көрініс табады. Жалпы алғанда, Преамбула қоғам мен мемлекеттің даму бағытын айқындайды.<blockquote>«Жобада мемлекеттің мәртебесі анықталған – Қазақстан Республикасы демократиялық, зайырлы, құқықтық және әлеуметтік мемлекет, ал оның ең жоғары құндылықтары – адам, оның өмірі, құқықтары мен бостандықтары ретінде танылған», – деп атап өтті Бақыт Нұрмұханов</blockquote>Жалпы, ол «Конституциялық құрылым негіздері» бөлімінде мемлекеттің ұйымдастырылуын, Қазақстанның егемендігін, аумақтық тұтастығын және басқа да маңызды қағидаттарды бекітетін негізгі ережелер көрсетілетінін атап өтті.Сонымен қатар, билікті бөлу қағидаты туралы норма жаңаша тұжырымдалды және елдің қолданыстағы құқығы мәселелеріне арналған конституциялық ережелер нақтыланды.Бақыт Нұрмұханов қазіргі замандағы мәселелерді ескере отырып, қоғамдық бірлестіктердің қызметін және олардың мемлекетпен өзара іс-қимылын реттейтін конституциялық ережелердің де нақтыланғанын атап өтті.<blockquote>«Мемлекет пен діннің, мемлекеттік рәміздердің және басқалардың өзара іс-қимылын реттейтін ережелер жетілдіріліп жатыр», – деп атап өтті ол.</blockquote>Фото: t.me/consot_kz

Қазақстан Конституциясының преамбуласының редакциясы толықтай жаңартылады

<a href="https://kyzylorda-news.kz/">Kyzylorda-news.kz</a> Конституциялық сот төрағасының орынбасары Бақыт Нұрмұханов Конституциялық реформа комиссиясының мүшелеріне Ата Заңға енгізілетін өзгерістердің жиынтық жобасын таныстырды.Бұл құжат азаматтардан, саяси партиялардан, қоғамдық ұйымдардан және сарапшылардан түскен барлық ұсыныстардың негізінде әзірленді.Бақыт Нұрмұхановтың айтуынша, жаңартылған Конституция жобасында Преамбула, 11 бөлім және 104 бап бар. «Халық кеңесі» және «Конституцияға өзгерістер мен толықтырулар енгізу» атты екі жаңа бөлім енгізілген. Тағы 4 бөлімнің атауы өзгерді.Жалпы, өзгерістер мен толықтырулар Ата заңның барлық бөлімдерін қамтып, 77 бапқа түзетулер енгізілді. Бұл Конституция мәтінінің 84%-ын құрайды.<blockquote>«Ұсынылған өзгерістер – маңызды әрі ақылға мұқият салынған қадам, олар тұжырымдамалық тәсілдерді өзгертіп, құқықтық дәлдікті нығайтып, Конституцияның сапасын арттырады», – деп атап өтті Конституциялық комиссияның мүшесі.</blockquote>Жиынтық жоба білікті заңгерлер мен лингвистерден құралған жұмыс топтарында қатар пысықталуда.Бақыт Нұрмұхановтың айтуынша, мамандар Конституцияның нормаларын дұрыс жазу, мағыналық сәйкессіздіктер мен қарама-қайшылықтарды, сондай-ақ түсініксіздіктерді болдырмау бойынша үлкен жұмыс атқарды.Жиынтық жобада ұсынылған новеллалар Қазақстанның конституциялық негіздерін қамтып, оның келбетін түбегейлі өзгертеді. Бұл түзетулер көзделген институционалдық және құрылымдық реформалар үшін үлкен әлеуетке ие.«Адам мен азаматтың конституциялық құқықтары мен бостандықтарын жүзеге асыру және қорғау кепілдіктері күшейтіліп жатыр. Президенттік басқару формасын сақтай отырып, мемлекеттік билік құрылымы айтарлықтай өзгереді», – деп мәлімдеді Конституциялық сот төрағасының орынбасары.Сонымен қатар ол негізгі өзгерістерді де атап өтті: жаңа бір палаталы Парламент моделі енгізіледі, азаматтардың мемлекеттік басқаруға қатысу мүмкіндіктері кеңейеді, Конституциялық соттың құқық қорғау тетіктері мен Ата заң негізінде құқық үстемдігін қамтамасыз ету бойынша қызметінің тиімділігі артады.Бақыт Нұрмұхановтың хабарлауынша, конституциялық новеллалар мемлекет миссиясын, оның функцияларының мазмұнын, мемлекеттік органдар, қоғамдық ұйымдар мен азаматтар арасындағы өзара қарым-қатынас қағидаттарын жаңа қырынан түсінуге мүмкіндік береді, азаматтық қоғам институттарын мемлекеттік маңызы бар мәселелерді шешуге кеңінен тартуға жол ашады.<blockquote>«Бұл Конституция мазмұнының жаңаруы мен түбегейлі өзгеруі туралы айтуға мүмкіндік береді», – деп атап өтті ол.</blockquote>Фото: elbasylibrary.gov.kz

Конституциялық реформа: түзетулер Ата заң мәтінінің 84%-ын қамтиды

<a href="https://kyzylorda-news.kz/">Kyzylorda-news.k</a>z Қазақстанда медициналық қалдықтарды басқарудың өзекті мәселелері, оның ішінде нормативтік талаптарды жетілдіру және құқықтық қолдану практикасы «AMANAT» партиясы жанындағы Экологиялық кеңестің отырысында қаралды.Жиынға өңірден партияның облыстық филиалының төрағасы Жандос Базартай, облыстық филиал жанындағы Экологиялық кеңес төрағасы Жорабек Нұрымбетов және жауапты басқармалардың басшылары мен кеңес мүшелері бейнебайланыс арқылы қатысты.Қызылорда облысында 2025 жылдың қорытындысымен халықтың санитариялық-эпидемиологиялық саламаттылығы саласының мемлекеттік бақылау және қадағалауында 973 денсаулық сақтау объектілері болды (2024 ж.-924), яғни 49 объектіге көбейген, соған қарамастан «Б» және «В» сыныбының медициналық қалдық көлемі азайған. Облыс бойынша қауіпсіз жою қораптарымен қамтылу көрсеткіші-100 пайыз.Сондай-ақ қоршаған орта мен табиғи ресурстардың жай-күй» туралы Ұлттық деректер банкі (ndbecology.gov.kz) порталы арқылы медициналық қалдықтарға қалдықтарды түгендеу жөніндегі есептік барысында 2025 жылы 298,4 тонн қалыптасып, мамандандырылған кәсіпорындарға тапсырылған. Қызылорда облысы аумағында медициналық қалдықтарды қайта өңдеу және кәдеге жаратумен айналысатын 2 кәсіпорын қызмет көрсетуде.Жиыннан соң күн тәртібіндегі мәселеге сәйкес өңірде атқарылып жатқан жұмыстар пысықталды.

Экологиялық кеңесте медициналық қалдықтар мәселесі қаралды 

<a href="https://kyzylorda-news.kz/">Kyzylorda-news.kz</a> ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде туризмді дамыту, 2026-2030 жылдарға арналған «Қазақстан балалары» тұжырымдамасын іске асыру мәселелері қаралды. Оған облыс әкімі Нұрлыбек Нәлібаев қатысты.Аймақта туристерге қолайлы жағдай жасау үшін жүйелі жұмыс жүргізілуде. Өткен жылдың қорытындысымен облысқа 157 500 турист келіп, 35 пайыз өсім қалыптасты. Қызмет көрсету көлемі 2 млрд. 441 млн. теңге болып, 57,6 пайызға артты. Қайта жаңғыртудан өткен теміржол вокзалының, «Қорқыт ата әуежайының» ішінен &nbsp;туристерге ақпарат беретін виртуалды карта әзірленіп, QR кодтар қойылды. Жаңадан ашылған заманауи үлгідегі музейде экскурсияға келушілерге тарихи деректер жан-жақты таныстырылады.&nbsp;Облыстағы демалыс парктері жаңартылып, туристерге қолайлы және қауіпсіз қызмет көрсетіледі. Қауіпсіздікті қамтамасыз ету мақсатында халық көп шоғырланатын орындарда «102», «SOS» арнайы дабыл батырмасының 15 құрылғысы орнатылды.&nbsp;<img src="https://knadmin.beoblood.kz/uploads/Turizmdi_damytu_m_selesi_araldy_474088546d.jpg" alt="Туризмді дамыту мәселесі қаралды.jpg">Туристік инфрақұрылымды дамыту үшін Rixos және Pana Hotel қонақүй желілері салынуда. Аудан орталықтарындағы теміржол вокзалдары қайта жаңғыртылуда.«Қазақстан балалары» тұжырымдамасы аясында жүзеге асырылатын іс-шараларға жергілікті бюджеттен 30 млрд. теңгеден астам қаржы бөлу жоспарланған. Бүгінде жоспардағы жұмыстар басталды. Балалардың құқықтарын қорғау саласында отбасылық-тұрмыстық зорлық-зомбылыққа қарсы күрес жөніндегі мамандандырылған бөлімшелер құрылды. «Отбасына көмек көрсетудің бірыңғай орталығы» ашылды. Қызылорда қаласы мен барлық ауданда 8 «Отбасын қолдау орталығы» құрылып, жұмыс жасауда.&nbsp;Жетім және ата-анасының қамқорлығынсыз қалған балаларға арналған ұйымдардың материалдық-техникалық базасы жаңғыртылып, қызметтік автокөліктері 100 пайыз жаңартылды.Білім беру ұйымдарына 100 пайыз бейнебақылау камералары орнатылып, жасанды интеллект технологияларын енгізу мақсатында 480 млн. теңге қаржы бөлінбек. Мектепке дейінгі тәрбие мен оқытуға мемлекеттік білім беру тапсырысын қаржыландыру көлемі жыл сайын 50 пайызға ұлғайып келеді.&nbsp;Балалардың мүмкіндіктерін ерте анықтау, сапалы оңалту арқылы толыққанды өмір сүруге бейімдеу үшін білім саласында 3 оңалту орталығы ашылды. &nbsp;Денсаулық сақтау саласында да 2022 жылдан бері 3 оңалту орталығының жұмысы жолға қойылған.&nbsp;

Туризмді дамыту мәселесі және «Қазақстан балалары» тұжырымдамасы талқыланды

<a href="https://kyzylorda-news.kz/">Kyzylorda-news.kz</a> Астанада Конституциялық комиссияның екінші отырысы өтіп, реформаға байланысты келіп түскен ұсыныстар талқыланды. Комиссия жұмысы ашықтық пен жариялылық қағидаттарына негізделген,талқылаудың барлық кезеңі тікелей эфирде көрсетілуде.&nbsp;Отырыс модераторы, Қазақстан Республикасы Конституциялық Сотының төрайымы Эльвира Азимова екі мыңнан астам ұсыныс келіп түскенін, оның барлығы біртұтас жинақталған кестеге топтастырылғанын атап өтті. Азаматтар мен сарапшылардың белсенді қатысуы конституциялық өзгерістердің қоғамдық маңызын және реформаға деген жоғары қызығушылықты айқын көрсетеді.&nbsp;<blockquote>«Мұндай диалог форматы реформаның негізгі қағидатын көрсетеді: конституциялық реформа ең алдымен халықтың мүддесі үшін және оның тікелей қатысуымен жүргізіледі», – деді Эльвира Азимова.</blockquote>Отырыста үш негізгі спикердің, атап айтқанда, Әділет министрі Ерлан Сәрсембаев, Сенат депутаты Нұрлан Бекназаров және Мәжіліс депутаты Снежанна Имашеваның баяндамалары тыңдалды. Олар 2025 жылдың қазан айынан бері түскен ұсыныстар негізінде әзірленген құқықтық тәсілдер мен түзетулерді ұсынды.Басқосуда «Құрылтай», «Халық кеңесі» бөлімдері талқыланды. Конституциялық комиссия мүшелері Ата заңның жекелеген нормалары, баптары мен бөлімдерін жан-жақты талдады.Еске салсақ, Мемлекет басшысы Конституциялық реформа жөніндегі комиссияны құру туралы Жарлыққа қол қойып, оның ережесі мен құрамы бекітілген болатын. Комиссия құрамында еліміздің өңір басшыларының арасынан Қызылорда облысының әкімі Нұрлыбек Нәлібаев бар. Аймақ басшысы Конституциялық комиссияның отырыстарына, жекелеген жұмыс секцияларындағы талқылауларға қатысуда.&nbsp;Сондай-ақ, Астанаға сапары аясында Үкімет басшысының орынбасарларының қабылдауында болып, Байқоңырда жүзеге асырылатын жобалар, алдағы егін егу науқаны, су тапшылығы, жол мәселесі бойынша ұсыныстар енгізді.

Конституциялық комиссияның кезекті екі отырысында ұсыныстар талқыланды

<a href="https://kyzylorda-news.kz/">Kyzylorda-news.kz</a> Өңірге арнайы жұмыс сапарымен келген ҚР Премьер-Министрінің кеңесшісі Ералы Тоғжанов елді мекендерді сапалы ауыз сумен қамтамасыз ету мәселелері бойынша мәжіліс өткізді.Жиын барысында Мемлекет басшысының халықты 2025 жылдың соңына дейін 100 пайыз орталықтандырылған ауыз сумен қамту жөніндегі тапсырмасының орындалу барысы талқыланды. Қызылорда облысында жүзеге асырылып жатқан ауыз су жобалары, оның ішінде топтық су құбырларын салу, ішкі су желілерін жүргізу және су тұшытқыш қондырғыларын орнату мәселелері кеңінен қаралды.Мәжіліске Қазалы ауданының әкімі Алмасбек Есмаханов бейнебайланыс режимі арқылы қатысып, аудан аумағында іске асырылған ауыз су жобалары жөнінде баяндады. Атап айтқанда, Сарбұлақ, Шитүбек, Шәкен және Шилі елді мекендерінде ішкі су желілерінің құрылысы толық аяқталғаны айтылып, тұрғындарды сапалы ауыз сумен қамту бағытында атқарылған жұмыстарға тоқталды. Сонымен қатар, Бірлік ауылында орнатылған су тұшытқыш қондырғысының жұмысы туралы ақпарат беріліп, аудан бойынша ауыз су сапасы мен қолжетімділігіне қатысты мәселелер назарға алынды.Жиында Премьер-Министрінің кеңесшісі халықты сапалы ауыз сумен қамту халықтың денсаулығын сақтау, өмір сүру сапасын арттыру және елдің әлеуметтік-экономикалық дамуын қамтамасыз етудің негізгі факторларының бірі екенін айтып, бұл жұмыстар бойынша республикада ешқандай мәселе болмауы керек екенін жеткізді.Мәжіліс қорытындысы бойынша бірқатар нақты тапсырмалар беріліп, жауапты мемлекеттік органдарға жобаларды мерзімінде әрі сапалы аяқтау жөнінде міндеттер жүктелді.

Қазақстан және Қызылорда облысының жаңалықтары: Қоғам