<a href="https://kyzylorda-news.kz/">Kyzylorda-news.kz</a> Арал ауданының білім беру саласында көші ілгері білім ордаларының бірі қаладағы №262 мектеп-гимназия екендігі көпке белгілі. Мұндағы педагогтар да, оқушылар да заман талабына сай бейімделіп білім бәсекесінде өздерін танытып келеді. Іргесі қаланғанына 15 жылға жуық уақыт ішінде аталған білім ордасы білім көшіне ілесіп қана қоймай, биік шыңдарды бағындырып келеді. Ендеше бүгінгі сөз төркіні тап осы алтын ұяға бағытталмақ.&nbsp;№262 мектеп-гимназиясы КММ-сі 2009 жылы пайдалануға берілді. Қазіргі таңда «Ұ.Қараманов атындағы №262 мектеп-гимназиясы» КММ-сі атын еншілеген білім ұясында 116 мұғалім еңбек етеді. 1242 оқушының заманауи білім алуы үшін 34 оқу кабинеттері ашылған. Мектеп ашылған уақыттан бастап 2020 жылға дейін Бекболат Садуақасов директор болды. Ал 2020 жылдан бастап білім ордасын Руслан Сисенов басқарып келеді.Биылғы оқу жылы аталған мектеп үшін табысты жылдар көшін жалғады. Мектеп мұғалімдері мен оқушыларының&nbsp; жетістік қоржыны толыға түсті. Аудан мерейін өсірген ақжолтай жаңалық&nbsp;мектеп-гимназияның облыс әкімінің&nbsp;“Үздік білім беру ұйымы – 2022» додасында &nbsp;34 миллион иеленгені болды. Мектептің қазақ тілі мен әдебиеті пәнінің мұғалімі Күлпаршын Дәуленбаева «Қызылорда облысының білім беру саласын дамытудағы еңбегі үшін» жергілікті ерекшелік белгісін иеленсе, оқу ісі жөніндегі орынбасары Құрманалиева Жанар мен&nbsp;Ұзақбаев Қырықбай&nbsp; Қызылорда&nbsp; қаласы «Оқыту, тәрбиелеу, жақсы көру: Қазақстандағы балалар жылы» ХІІІ халықаралық&nbsp; ғылыми-практикалық конференциясында&nbsp; баяндама әзірлеп, іс-тәжірбиемен&nbsp; бөлісті. Және осы еңбектері үшін&nbsp;Астана қаласында сертификат иеленді. Сондай-ақ Құрманалиева Жанар Астана&nbsp; қаласына&nbsp;&nbsp;«Білім – тұрақты дамудың және ұлттың әлеуетін арттырудың инновациялық ресурсы» атты педагог қызметкерлердің І Республикалық съезінің Қызылорда облысы бойынша делегаты ретінде қатысты. Және мектеп мұғалімі Тәжібаева Айнұр облыстық «Үздік педагог-психолог–2024» кәсіби байқауында І орын иеленіп, республикаға жолдама алғанын да мақтанышпен айтуға болады. Ал арифметиканың сиқырына үңілген математика пәні мұғалімі Бақыткүл Асылбекқызы аудандық «Үздік математика пәнінің мұғалімі–2024» &nbsp;сайысында І орын иеленген. Сол сияқты пән мұғалімдері бойынша өткен «Үздік ағылшын тілі пәні мұғалімі–2024»&nbsp; сайысында &nbsp;Анар&nbsp;Маратқызы ІІ орын алған. Мақсат Сәкенұлы&nbsp; аудандық «Үздік қазақ тілі мен әдебиеті пәнінің мұғалімі-2024»&nbsp;кәсіби байқауында ІІ орын еншілеп отыр. Және бастауыш сынып мұғалімдері арасында математика пәні бойынша өткізілген облыстық «Алтын тұғыр» олимпиадасында Қуандықова Назерке ІІІ орынды жеңіп алған. Аудандық «Үздік дүниетану пәні мұғалімі–2024» байқауында Сейтмамбетова Ақмәуе І орын иеленіп, облыстан Алғыс хат алған.Мектеп-гимназияда білім алушы оқушылар да елдің болашағын қалыптастыратын білімді ұрпақ екендіктерін дәлелдеп келеді. Ұстаздарының еңбегін ақтап, мектептің мерейін өсірген оқушылар жетістігі үнемі жаңарып отырады. Әрине, бұл бәсекелі білім саласындағы ізденімпаздық пен еңбекқорлықтың жемісі.&nbsp;<blockquote>– Оқушыларымыздың білім бәсекесінде өздерін танытып, жүлделі орын еншілеуіне мұғалімдері тарапынан қолдау көрсетіліп отырады. Сабақ уақытынан тыс ынталы оқушылармен жекелей жұмыстар жүргізіледі. Соның нәтижесінде білімге құштар шәкірттеріміз биіктерден көрінуде. Мәселен, 11-сынып оқушысы Көптілеуова Ақгүл – жалпы білім беретін пәндер бойынша республикалық олимпиаданың облыстық кезеңінде қазақ тілі мен әдебиеті пәні бойынша қола медаль иегері. Және орыс тілі мен әдебиеті пәні бойынша 11-сынып оқушысы Тоғыс Жансая да қола медальмен марапатталды. Ал 7-сынып оқушысы Ерболатұлы Нұртай физика пәнінен аталған республикалық олимпиаданың облыстық кезеңінде ІІ орынға ие болды. 2023-2024 оқу жылында 10-сынып оқушысы Асанхан Шыңғыс облыстық олимпиадаға география пәні бойынша қатысып, ІІІ орын иегері атанды. Сондай-ақ 11-сыныпта оқитын Жасұланқызы Ақұлжан қазақ тілі мен әдебиеті пәні бойынша облыстық олимпиаданың күміс медалін алса, Айтұратова Камшат ІІ орын иеленді. 11-сынып оқушылары Қапанов Абат және Сансызбай Баян Астанада өткізілген республикалық дебат турниріне қатысып, 2 рет министрмен кездесіп келді. Рустамұлы Зейнулла пен Кәдірханов Нұрдәулет робототехника және бағдарламалау бойынша R:ED FEST ашық халықаралық фестиваліне «Сумо» санаты бойынша қатысып 3 орын, «Сызық бойынша қозғалыс» санаты бойынша &nbsp;2 орын иеленді, – дейді мектеп басшысы Руслан Сисенов.</blockquote>Білім беру ордасы балалардың жан-жақты дамуына барлық жағдай жасауға тырысады. Заман талабына сай жабдықталған кабинеттер мен мектептің материалдық-техникалық базасы толықтырылып отырады. Мектепте ғарыш әлеміне қызығушылығы артқан балаларға арналған астрономия кабинеті бар. Және қазіргі сұранысқа ие мобилограф болуға құштар оқушыларға «Жас мобилограф» үйірмесі жұмыс істейді. Ол үшін арнайы телестудия кабинеті жасақталған. Мұнда барлық қажетті техникалармен қамтамасыз етіп, оқушылардың видео түсіруіне, сұхбат жүргізуіне мүмкіндік беріліп отыр.&nbsp;<blockquote>–&nbsp; Оқушылардың спортпен шұғылдануы үшін мектеп жанында барлық жағдай жасалған. 3 спортзал бар. Және спорттың барлық түрлері бойынша үйірмелер жұмыс істейді. Тағы бір биылғы жылдың жаңалығы мектеп жанынан жылыжай ашылды. Бұл балалардың өсімдіктер әлемін танып білуіне, бау-бақша өсіруіне деген ынтасын оятты. Жылыжайда аз уақытта көкөністер өсті. Оны мектеп асханасына пайдаланады. Осылай қыс мезгілінде балалар көкөністен дәм татты. Жалпы мектеп ұжымында тұрақты ахуал орнаған. Оушылардың білім алуынан бөлек тәрбие жұмыстары да оңтайлы жүргізілуде. Және олардың қызығушылығын оятып, шығармашылық қабілетін шыңдай түсу үшін де түрлі танымдық шаралар мен кездесулер, интеллектуалды сайыстар ұдайы өткізіліп тұрады, – дейді мектеп басшысы.&nbsp;</blockquote>Білім жылын ойдағыдай аяқтап, көңіл қуантарлық нәтижелермен түйіндеген мектепте бүгін 54 түлек қияға қанат қағуда. Айта кету керек, мектеп тарихының 15 жылдық парақтарын ақтарсақ, осы уақытқа дейін білімнің шыңын бағындырған түлектердің 30-ға жуығы «Алтын белгі» иегері атанған.&nbsp;Бар білімнің бастауы мектеп қабырғасынан басталады. Партадағы шәкіртіне саналы білім, сапалы тәрбие беру мұғалімдердің құзырында. Қазірге дейін тек жақсы қырымен танылған №262 мектеп-гимназиясы білімді ұстаздар мен талабы таудай шәкірттердің алтын ұясы екендігін дәлелдеп жүр. Бұл мектеп аудан көлемінде ғана емес, облыс бойынша да үздіктер көшіне ілескен. Бұл да көңіл қуантарлық жаңалық. Көш басындағы білім беру ордасының әлі талай биікті бағындыра беретіндігіне сенімдіміз.&nbsp;

Аралдағы миллионер білім ордасы

<a href="https://kyzylorda-news.kz/">Kyzylorda-news.kz</a> Жуырда Шиелідегі «Арман» мәдениет үйінің ұйымдастыруымен «Сырлы бояу» үйірмесінің шәкірті Айзере Әділханқызының «Ғажайып сурет әлемінде» атты шығармашылық сурет көрмесі өтті. Таңғажайып туындыларды қылқаламмен қағаз бетіне түсіріп, жансыз бейнені тілсіз сөйлететін бейнелеу өнері екінің бірінің қолынан келе бермейтіні белгілі. Ал, осы үйірмеге он жылға жуық қатысқан 11-сынып оқушысы облыстық, республикалық және Ташкент, Лондон, Дубайда өткен халықаралық байқаулардың жеңімпазы болып үлгерген.Жұртшылықтың қызығушылығын оятқан «Ғажайып сурет әлемінде» атты аталмыш көрмені «Арман» мәдениет үйінің директоры, өнер жанашыры Нұргүл Шалекеева құттықтау сөз сөйлеп, Айзереге шығармашылық шабыт пен толағай табыс тіледі.&nbsp;– Құрметті қонақтар, өнер жанашырлары. Қазақ даналығында «Өнерлі болу, бір құрмет, Өнерді сүю мың құрмет» деген сөз бар. Бүгін аудандарда көп бола бермейтін ерекше сурет көрмесіне қош келдіңіздер. Бұл Айзере Әділханқызының көрмесі әлемдік деңгейдегі сурет көрмесінің алғашқы баспалдағы деп білеміз. Сурет өнері ішкі құбылысты, өзінің сезіне алған ойдағы түйсігін бейнелеу арқылы жеткізу болып саналады. Айзерені қол өнерге баулып, сурет салудың қыр-сырын үйретіп жүрген ұстазы, үйірме жетекшісі Зухра Баймырзаеваға&nbsp; ерекше алғысымды білдіремін» – деді мәдениет үйінің басшысы.&nbsp;Көрмеде Айзере Әділханқызының бірнеше жұмыстары қойылып, түрлі тақырыптарды қамтитын суреттері көрермен назарына ұсынылды. Суреттер тамашалау арқылы Айзеренің мінез-құлқын, ішкі жан дүниесін түсінуге болады. Барлығы автордың қиялынан туындаған суреттер мен сезімін, көңіл-күйін білдіретін тамаша картиналар. Көрмені тамашалауға келген ата-аналар мен балалар ерекше көңіл күйге бөленіп, алдағы уақытта жалғасын табу беруін жекізді. Олардың айтуынша, бұндай шаралар бейнелеу шеберлігінің әрі қарай жетіліп, жаңа туындылардың пайда болуына қозғалыс алмақ.&nbsp;Кеше ғана алтын ұя мектеппен қоштасып, үлкен өмірге қанат қаққалы тұрған Айзере суретші мамандығын таңдап, шығармашылық емтихан тапсырғалы отыр. Өмірін өнермен өрнектеуді қалаған Айзеренің таудай талабы орындалса игі.

Шиелідегі жас суретшінің сырлы әлеміне саяхат

<a href="https://kyzylorda-news.kz/">Kyzylorda-news.kz</a> Дертіне шипа іздеген науқастың сауығып кетуіне алдымен дәрігер жауапты болса, одан кем қарамайтын денсаулық сақшысы – медбике. Бүгінгі кейіпкеріміз – Арал аудандық аурухананың хирургия бөлімшесінде еңбек жолын медбикеліктен бастап, табан аудармай 43 жыл жемісті еңбек етіп келе жатқан медбике&nbsp; Күлжақан Шәкірқызы Саймова.Күлжақан Шәкірқызы 1962 жылы 25 қаңтарда Арал қаласында дүниеге келді. Анасы үй шаруасында, әкесі теміржолшы болды. Отбасында 7 бала тәрбиеленді. Күлжақан 1969 жылы №213 мектепке қабылданып, осы мектептен&nbsp; сегізжылдықты бітіріп, 9-10 сыныпты №13 мектептен&nbsp; тәмамдады. Сөйтіп, 1979 жылы онжылдықты бітірген соң киелі Түркістан қаласындағы медициналық училищесіне оқуға түсті. Мамандық таңдауда қателеспеген алғыр қыз медициналық училищені 1981 жылы "қызыл" дипломмен бітіреді. Сол жылы жас мейірбике 19 жасында Арал аудандық ауруханасының хирургия бөлімшесіне өз мамандығы бойынша қызметке орналасады. Сөйтіп ата-анасынан өнегелі тәлім-тәрбие алған қаршадай қыз болашағын медицина саласымен байланыстырды. Оның&nbsp; қызметтегі алғашқы ұстазы, бүгінде зейнеткер Клара Доштаевадан үйренгені көп."Отан отбасынан басталады" деп бекер айтпаған. Әрбір адамзаттың — алтын ұясы десе алдымен отбасы ойымызға орала кетеді. Бала отбасында әкеден ақыл, анадан мейірім алады. Күлжақанды тағдыр еркелете қоймады. Медучилищеде оқып жүргенде анасы өмірден өтіп, қиындық туындаған сәтте мойымады. Ізінен ерген бауырларын ешкімнен кем қылмай оқытып-тоқытты, қатарға қосты. Аллаға шүкір, бүгінде барлығы да отбасылы, балалы-шағалы.– Ақ халатты жандардың сенімді серігіне айналған мейірбикелердің жұмысы қашанда үлкен жауапкершілікті қажет етеді. Дәрігер емінің нәтиже беруі де ең алдымен медбикенің ұқыптылығына байланысты. Әр медицина қызметкері өз білімі мен біліктілігін үнемі жетілдіріп, медицина саласындағы жаңалықтарды оқып-біліп отыруы тиіс. Дә­рігер науқасты тексеріп, тағайындауын бергеннен кейінгі бар жұмысты медбике атқарады. Адамның жаны өмір мен өлімнің арасында тұрғанда әр секунд қымбат. Әрбір өзгерісті қалт жібермей қа­дағалап, оны дәрігерге жеткізу – медбикенің міндеті. Сонымен қатар егуін жасап, дәрі-дәрмегін уақытылы беріп, төсек-орын, ас-­ауқатын, жалпы хал-жағдайын қадағалап, науқасқа қарайтын медбикелердің еңбегі өлшеусіз. Осындай жауапкершілігі мол жұмысқа өзіммен қатар келіп,&nbsp; адал еңбек еткен, бүгінде зейнеткер Тәжігүл Дүйсенбаева, Марал Әбілдаева, Гүлнар Бимағанбетова сынды құрбыларым және аға медбике Шолпан Ахметова мен егу бөлмесінің аяжаны Ләззат Піренова және де басқа әріптестерімнің&nbsp; еңбектеріне табыс, отбастарына амандық тілеймін,– дейді ақ халатты абзал жан Күлжақан Шәкірқызы.Медбике Күлжақан осы күнге дейін қаншама жас буынның тәжі­рибесін толықтырды, білікті медби­ке етіп шығарды. Қазіргі таңда хирургия бөлімшесіндегі медбикелер Күлжақанның ізін жалғастырып келе жатқан Ақтоты Шынбергенова мен Назым Айсауытова, Динара Бимағанбетова мен Жазира Қанатова өз ісінің мықты мамандары. Үзілгелі тұрған үмітті қайта жалғайтын, тіпті кейде ажалдан арашалап, екінші өмір сыйлайтын ақ халаттылар қандай құрметке де лайық. Уақытпен санаспай тәулік бойы науқастың жанында қалатын медбикенің қызметі адалдық пен жауапкершіліктен жаратылғанына ерік­сіз бас иесің, құрмет тұтасың, мақтан етесің.Абзал жанның ұзақ жылғы қызметі аудандық, облыстық сала басшылығы тарапынан лайықты бағаланып, түрлі мақтау-марапатқа да ие болды. Жақында медицина қызметкерлері күні қарсаңында кезекші мейірбике Күлжақан Саймова хирургия бөлімшесіндегі 41 жыл азаматтардың денсаулығын сақтау ісіне қосқан үлесі мен мінсіз, адал қызметі үшін Қазақстан Республикасы Денсаулық сақтау министрлігінің Алғыс хатымен&nbsp; марапатталды.&nbsp;Еңбектің өтеуі деген осы болар.Жоғары санатты медбике туралы әріптесі Алима Жандеуова:– Күлжақанмен қызметке де бірге келдік. Оның мамандығына деген сүйіспеншілігі, адалдығына тәнтімін. Қызметіне жауап­кершілікпен қарайды. Қазір қай салада болмасын талап күшейтілді. Білікті маман бөлімшедегі әріптестерімен тығыз байланыс орнатып, науқастарды кү­тіп-баптауды үйретуге де уақыт табады. Қолы қалт етсе, жастарға білгенін үйретіп, тәжірибесімен бөлісу, кәсіби деңгейін көтеруден жалыққан емес. Замандасым Күлжақан ұдайы алдыңғы шепте жүріп, науқастардың тез са­уығып кетуіне атсалысып келеді, – деп жылы лебізін білдірді.Өзінен кейінгі жас мамандарға білгенін үйретіп, кәсіби біліктілігін арттырып келе жатқан өз ісінің майталманы Күлжақан Шәкірқызы– отбасында сүйікті жар, аяулы ана, мейірімді әже. Жолдасы Әмірхан кеме құрастыру зауытында токарь болып еңбек етті. Қазір жеке кәсібімен айналысады. Жан жары Әмірханмен бірге төрт қыз, бір ер баланы дүниеге әкеліп, өсіріп-тәрбиеледі. Бүгінде ата-ана бақытына бөленген Әмірхан мен Күлжақан ұлын ұяға, қыздарын қияға қондырып, немере сүйіп отырған жандар. Балаларының барлығы да жоғары білімді мамандар. Бақытын отбасынан, сүйікті ма­мандығынан тапқан Күлжақан Шәкірқызының ендігі арманы – жолдасымен тең отырып, бейнетінің зейнетін көріп, балалары мен немерелерінің сүйіспеншілігіне бөленіп, олардың жақсылығын көру.Ақ халатты абзал жандар үшін ең бастысы – халықтың алғысына бөлену. Өйткені ол – марапаттың төресі. Еңбекқор әрі ізденгіш, абырой-беделі артқан қадірлі маман, аяулы ана, мейірбан әже Күлжақанның бақыты да, мұраты да – осы.

Мейірбике – мерейлі мамандық

<a href="https://kyzylorda-news.kz/">Kyzylorda-news.kz</a>&nbsp; Сырдария ауданына қарасты А.Тоқмағанбетов ауылының жастарымен сыбайлас жемқорлыққа қарсы заңнама бойынша, сыбайлас жемқорлыққа қарсы мәдениетті қалыптастыру жөніндегі іс-шаралар кешенді жоспары негізінде түсіндіру жұмыстары жүргізілді. Кездесуді жастар ресурстық орталығының кеңесшісі Рамазан Ыдырысов жүргізді.Іс-шараның негізгі мақсаты &nbsp;қоғамның әртүрлі орталарындағы сыбайлас жемқорлықтың алдын-алу, профилактикалық жұмыстарын насихаттау. Сонымен қатар сыбайлас жемқорлыққа қарсы күрес туралы заңдарды негізге ала отырып, құқықтық мағлұмат беру, білімдерін дағдыландыру, саяси өмірден хабардар жеке тұлғаны қалыптастыра отырып, жастардың еркін сөйлеуіне, қоғамға деген өз ой-пікірлерімен санасуға жағдай жасау, ҚР-на адал қызмет етуге, Ата заңды құрметтеуге, адамгершілікке тәрбиелеу.<blockquote>– Біздің қоғамда сыбайлас жемқорлыққа орын жоқ. Қоғамның барлық күш-жігерін біріктіріп, осы дерттің одан әрі ушықпауы үшін оны тоқтатудың барлық амалдарын қолдану арқылы ғана бұл құбылысқа тиімді түрде қарсы тұруға болады. Сондықтан сыбайлас жемқорлықпен күресу барлық Қазақстан Республикасы азаматтарының азаматтық борышы деп білу керек, – дейді жастар ресурстық орталығының кеңесшісі Рамазан Ыдырысов.</blockquote>

Сыбайлас жемқорлықтың алдын-алу – аса маңызды

<a href="https://kyzylorda-news.kz/">Kyzylorda-news.kz</a> Дана халқымыз «Қыз-өрісің» деген тәмсіл сөзді бекер айтпаса керек-ті. Қыз бала бойжеткен соң ақ босаға аттап, бір үйдің түтінін түзу түтететін келінге айналады. Кешегі Домалақ аналардың көзіндей, Зере мен Ұлжанның өзіндей қазақ әйелдерінің асыл бейнесі әлі де жойылған жоқ. Олардың бойындағы асыл қасиетті кейінгі буынға ұлағат ету парыз.&nbsp;Осындай мақсатпен Шиелі ауданының қоғамдық даму бөлімінің мемлекеттік әлеуметтік тапсырысы шеңберінде «Қызылорда облысының жастар Одақтары» қоғамдық бірлестігінің ұйымдастыруымен «Жергілікті әйелдер кеңестері жұмысын дамыту және отбасы мен неке құндылықтарын насихаттау бағытында шараларды ұйымдастыру қызметі» әлеуметтік жобасы аясында «Арман» мәдениет үйінде «Пай, пай қазақтың келіндері-ай!» атты Шиелі аудандық келіндер байқауы өтті.&nbsp;Іс-шараның шымылдығын Шиелі аудандық қоғамдық даму бөлімінің басшысы Кенжехан Шахизатұлы ашып берді.&nbsp;<blockquote>– Қазақ келіні қай кезден де отбасының ынтымағын келтіріп, татулығын бекемдей білген. Байқаудың мақсаты да қазақтың салт-дәстүрін, әдет-ғұрпын берік ұстанып, келіндердің ізеттілігін, инабаттылығын, отбасы құндылықтарын насихаттау, – деді ол.&nbsp;</blockquote>Аталған сайыста отбасының көркін келтіріп, жан-жақтылығымен танылып жүрген ақылына көркі сай, он саусағынан өнер тамған он екі келін қатысып, өзара сынға түсті. Байқау шарты бойынша әр үйдің үлгілі келіндері алдымен, өздерінің шыққан тегі мен түскен шаңырағынан мағлұмат беріп таныстырды. Ұлттық киімде ерекше мән берілді. Келесі «Өнерлі келін – сүйкімді» кезеңде қатысушылар ән салып, би билеп, қойылым қойып, өздерінің қолынан шыққан ұлттық нақыштағы бұйымдарын ұсынды. Үй шаруасын ұршыққа иіріп қана қоймай, саналы ұрпақ тәрбиелеп отырған келіндер өз өнерлерін барынша ортаға салып, көпшіліктің көңілінен шыға білді. «Ойлы болсаң, озып көр» аталған үшінші бөлімде келіндер салт-дәстүрге қатысты сұрақтарға асқан шеберлікпен мүдірмей жауап берді. Байқаудың соңғы бөлімінде сайыскерлер талайды тамсантуға тырысып бақты. Яғни әкелген ұлттық тағамдарының жасалу жолдарын айтты. Осылайша, жан-жақты дайындығымен келген келіндер байқауда өздерінің ерекшеліктерімен танылып, көптің ризашылығына бөленді. Өнегеге толы сайысқа Бәйтерек ауылдық әйелдер кеңесінің төрайымы Ұлмекен Назарбекова, Шиелі аудандық әйелдер кеңесінің төрайымы, ауданның «Құрметті азаматы» Найлә Палымбетова, Шиелі аудандық орталықтандырылған кітапхана басшысы Гүлдана Жақыпова мен «Ziyatker school» ЖШС мектебінің директоры Шахархан Бектұрғанқызы әділ бағасын берді.Осылайша, қазақ келінінің ақылы мен парасаты сынға түскен байқау да өз мәресіне жетті. Қазылар алқасы үшін «мыңнан тұлпар, жүзден жүйріктерді» анықтаудың қиын болған рас. Соның нәтижесінде «Үлгілі келін» номинациясы бойынша Назгүл Кәрісбекова, «Инабатты келін» номинациясында Жазира Ибрагимова, ал «Аспазшы келін» Гүлзира Асқарова болса, «Ибалы келін» номинациясына Динара Жұмабек, «Өнегелі келін» деген атауға Жанат Ахетова иеленсе, «Өнерлі келін» номинациясына Мира Жаханова лайықты деп саналды.Дүбірлі додада бас жүлдені Жиделіарық ауылынан келген Лаура Қалиқызы жеңіп алса, бірінші орынды Сағыныш Қайратқызы қанжығалады. Ал екінші орынды еңбекшілік Гүлжайна Баймұратова және Әйгерім Әлмахан алса, үшінші орын Гүлназ Назарбаева мен Алмагүл Нұрабаеваға бұйырды.

Шиеліде он келін сынға түсті

<a href="https://kyzylorda-news.kz/">Kyzylorda-news.kz</a> 1997 жылы Қызылорда қаласында арнайы экономикалық аймақ кұрылды. Осы тұста қала басшылығы арнайы аймақтың өз алдына газеті мен телеарнасы және баспаханасы болу керек деп ұйғарды. Қоғамдық телекомпанияның тарихы «Қала ТV» деген атпен осылай басталды. Білімді журналистер көп болғанымен, телеарнаның қыр-сырын білетіні некен-саяқ кез еді. Бастапқыда басшы табу қиындық тудырды. Экономикалық аймақтың басшысы, қала әкімі болған Бақберген Досманбетов естелік жазбасында былай дейді:<blockquote>– Сондықтан бар салмақты әріптестерін жақсы танитын Бауыржан Омаровтың өзіне салдым. «Мына Байқоңырдың телекомпаниясы жабылайын деп жатқанын естіп отырмыз. Сонда Шаһизада Әбдікәрімов деген іскер жігіт бар көрінеді. Телекомпания төрағасының басшылығымен және Шаһизаданың тікелей қатысуымен «Байқоңыр» ғарыш айлағындағы әрбір ұшырылым жайлы республикалық «Қазақстан», «Хабар» телеарналары эфирлерінен тікелей хабарлар топтамасы беріліп тұрады екен. Өздеріңіз білесіздер, газетіміздің редакторлығына қаншама адам ұсыныс білдірді. Ал қалалық телеарна басшылығына лайықты кандидатура болмай жатыр. Сақа журналистер көп, бірақ телеарна жұмысынан бейхабар. Тірелгеніміз жалғыз осы Шаһизада болып тұр. Егер келісетін болса, Байқоңыр телеарнасының техникалары өте күшті. Жылжымалы екі телестудиясының өзі неге тұрады?! Өзімен бірге ала келеді» деді ол. &nbsp;Жарайды, мен қарсы емеспін, шақыр, сөйлесіп көрейік, – дедім.</blockquote>Лайықты таңдалған басшы Шаһизада Әбдікәрімовтің телеарнаның құрылуы, қалыптасуы, жаңа кезеңге аяқ басуында еңбегі зор болды. Кілең сайдың тасындай жалындап тұрған жастардың басын қосқан ұжымның ауызбіршілігі мықты еді. Жаңадан құрылған соң, жетіспейтін жақтары көп болса да, сыр білдірмей биікке ұмтылды. Қала өмірінің жақсы жағын жарқырата көрсетті, көлеңкелі тұсын да көлденең тартты. Көпшіліктің көңілінен шығып, сан мыңдаған көрерменнің көзайымына айналды. Қарқынды жұмыс істеген «Қала ТV» жұртшылықтың арқасүйер тірегі болды. Алғашқы кезде эфирге бір сағат шығатын. Санаулы құраммен сол бір сағат ішінде қала тіршілігін ақпараттандырып қана қоймай, түрлі хабарлар да түсірді. Танымдық тұрғыдан қызықты хабарларды көрермен асыға күтті. Олардың қатарында «Шарайна», «Уақыт геометриясы», «Жаңғырық», «Бізбен бірге болыңыздар», «Болашақ», «Біздің қаланың адамдары» хабары болды.Қызылордадан 1999 жылы экономикалық аймақ статусы алынып тасталды. Тағы да Б.Досманбетовтің жазбасына сүйенсек, былай дейді:– Сен басқарып отырған телеарна өз жұмысын тоқтатуы қажет. Қазірдің өзінде қатынас қағазы келіп тұр. Сондықтан өзің ізденіп, телеарнаны меншіктеп ал. Қолда бар дүниеңді жоғалтқанымыз жарамас десек, Шаһизада: «Ой аға, ол менің қолымнан келе қоймас. Қалтасы қалың қаламгер көріп пе едіңіз?» демесі бар ма?! Сөзді қой, қолыңа ал» дедім рухтандыра, қайрай түсіп. Көмектесемін, түсінсең бұнда менің де еңбегім бар. Сол кезде барып Шәки інім «Жарайды, аға» деп зорға келісті!Қазіргі кезде «Qogam TV» атауымен ауданнан бөлек, «Отау» спутнигі арқылы республикаға 14 сағат бойы эфир тарататын телеарнаның тарихы осылай басталған еді. Республикалық телеарналармен қатар компьютерлік монтаждау әдісін ең алғаш болып бастады. Бұған сол уақытта атқарушы директор болған Бақытжан Шөкенов пен Мұрат Шалабаевтың еңбегі зор. Қазіргі атқарушы директор Мұрат Шалабаевтың айтуынша, бұл салада жұмыс істеу үшін телеарнаны жан-тәніңмен сүйе білуің керек.<blockquote>– Егер телеарнаны сүйе білмесең, онда ұзақ жұмыс істей алмайсың. Уақытша жұмыс істеп кетемін деп келетіндер сондықтан да көп тұрақтамайды. Өйткені, олар бұнымен «ауырмайды». Алғаш телеарна құрылған кезде ленталық кассетамен түсіреміз, монтаждауда аналогтық құрал болатын. &nbsp;ВХС камералармен түсіріп, таспамен жазатынбыз. Ол уақытта мамандар да қат. Тіпті журналистер, операторлар дайындайтын оқу орны жоқ-тұғын. Айналдырған бір сағат эфир үшін бір күн тер төгеміз. Қазіргідей түсіріп келе сала, эфирге шығармайды. Оны көшіріп, таспаға қайта басамыз, монтаждаймыз. Ал бүгінде компьютер арқылы жылдам монтаждап, оны эфирге таратамыз. Екі жылдан бері облысқа да шығып келеміз. Спутник арқылы еліміздің кез келген қаласынан қосылуға мүмкіндік бар, – дейді ол.</blockquote>Ширек ғасыр көрермен көзайымына айналған телеарна тарихында Тілеген Бекарыстанов, Жеткерген Жүсіпов, Баян Құлтанова, Райхан Тәжібаева, Нұрлан Соңғыбайұлы, Жанар Жанасылова, Ғалымжан Бәйімбет, Нұрсәуле Қоңырбаева, Ізмұрат Құрбанбаев, Сахитжан Бермағанбетов, Нұргүл Ұзақбаева, Гүлнұр Бүркітбаева, Нұрлан Жақыпбек, Елена Рыбина, Болат Жұмабаевтың қолтаңбасы бар.Телеарнаның іргесін қаласқан шеф-редактор Баян Құлтанова алғаш құрылған кезде қиындықтар болғанын айтады.<blockquote>– Бос тұрған ғимараттың ішінде тіпті үстел мен орындық та болмады. Біріміз сюжеттің мәтінін жазып отырсақ, басқаларымыз терезенің алдында тізіліп кезек күтіп тұратынбыз. Студиямыз да бір бұрышта орналасқан. Ал бүгінде заманға сай барлық қызметкердің жұмыс бөлмесі бар. Қазір «Qogam TV» – үлкен ұжым. Осы 25 жыл ішінде қаншама жас журналист пен оператор маман қанаттанып ұшып шығыпты. Олардың көбі шетелде, республикалық арналарда, облыстық телеарналарда қызмет етіп жүр. «Qogam TV» – жастарды тәрбиелейтін ұстахана іспетті. Жыл сайын бізде өндірістік тәжірибеден студенттер өтеді. Қорқыт ата атындағы, «Болашақ» университеттерінен бөлек, Мәскеу, Чехияда білім алып жатқан жастар келеді. Бізде бір ерекшелігі – келген студентті бірден қызу жұмысқа салып жібереміз. Келген күні танысып, ертесіне түсірілімге барып, эфирге сюжетін дайындайды. Бірыңғай байланыс жүйесі болғандықтан, олардың жазған дүниесін оператор да, монтажер де бір уақытта көріп отырады. Жастардың ішінде өндірістік тәжірибеге қызығып келетіндер көп. Тіпті бірінші курстан бастап, бітіргенше осында жүретіндер бар. Әрбіріне маман ретінде қарап, үлкен жауапкершілік жүктейміз. Жастар да сол сенімнен шығып, өздерін жақсы жағынан көрсетеді. Студенттер дайын маман болып келмейді. Телеарнаның қазанында қайнап, пісіп, бірде журналист, бірде жүргізуші, бірде диктор, нәтижесінде әмбебап маман болып шығады. Журналистикаға деген махаббатын алтын қазық еткен жігерлі жастар барда телеарна жұмысы жандана түсері сөзсіз, – дейді Баян апай.</blockquote>Бастапқыда небәрі 7 адаммен жұмысын бастаған ұжымда қазір 42 қызметкер бар. Әдепкі уақыттан бері саланың ыстық-суығына бірге төзген Гүлмира Ерманова, Мұрат Шалабаев, Баян Құлтанова, Ғалима Керейтбаева осы ұжымда. Ал бүгінде Нұрдәулет Қалабаев, Олжас Дәуіт, Назгүл Қажытаева, Мәдина Ералиева, Айдана Қауленова, Арайлым Кенжебекқызы, Шапағат Торғай есімді журналистер ақпарат таратып, тынымсыз еңбек етіп жүр. Операторлардан Асылбек Құлпайыстанов, Ерлан Жұмабаев және басқа да техникалық қызметкерлердің еңбегі зор.Ұжымдағы журналистер мен техникалық қызметкерлердің біліктілігін арттыруға барынша көңіл бөлінеді. Шетелдік мамандар өткізген семинар-тренингтерге қатысып, кәсіби шеберлігін шыңдап отыру күн тәртібінен түскен емес. Мамандар әр кезеңде Париждегі «5-канал», Красноярскідегі «Афонтово Тв», Ташкенттегі электронды ақпарат құралдары ассоциациясы, Германияның «Неміс толқыны» станциясы базаларында тәжірибе алмасып қайтты. Бүгінде барлық техника цифрлық жүйеге көшкен.Сыр халқы өзінің күнделікті сырласына айналған телеарнаны Шаһизаданың «Қоғамы» деп атап кеткен. Бұл айтулы ақын, облыстың Құрметті азаматы, белгілі журналистке жергілікті жұртшылықтың шынайы ілтипаты болса керек. Өйткені, алғашқы күннен бастап халықтың тіршілік түйткілдерін толассыз да тоқтаусыз толғап келетін «Qogam TV» өз биігіне осылай көтерілді.Алғашқы қоғамдық телеарна жайында Шаһизада Әбдікәрімовтің өзі былай дейді:<blockquote>– Иә, бұл – алғашқы қоғамдық телеарна. Телеарна тәуелсіз болғандықтан қоғамдағы барлық пікірге еркін орын береміз. Биліктің не оппозицияның сөзін сөйлеп, біржақты кетпейміз. Хал-қадірімізше мәселені жан-жақты көтереміз.</blockquote>2000 жылдардан бері «Қызылорда қоғамдық телерадиокомпаниясы» ЖШС басқарушысы болған Тұрсынкүл Желдербаеваның да сіңірген еңбегі зор. Сол уақытта телеарна Қазақстан Ұлттық хабарларын таратушылар қауымдастығының мүшелігіне өтті. 2002 жылы «Жарнама-2002» республикалық конкурсының жеңімпазы болса, 2003 жылы инвестициялық тендерде жеңімпаз атанып, қалалық әкімшіліктің бұрынғы қосымша ғимаратын сатып алды. Ал 2005 жылы республикалық «Жаңалықтар уақыты» конкурсында &nbsp;«Ең үздік ақпараттық бейнесюжет», «Ең үздік телерепортаж», «Ең үздік операторлық жұмыс» номинацияларының жеңімпазы атанды. Сонымен қатар жыл сайынғы өткізілетін байқауларда топ жарып, үздік ақпарат таратушы атанып келеді.Облыстағы ақпарат саласында ширек ғасыр жаңалық таратып келе жатқан телеарнада &nbsp;«Рауан», «Аптаның алты ауызы», «Көзбе-көз», «Әкім сағаты», «Мезгіл мәселесі», «Жастар», «Прокурор сағаты» хабарлары тұрақты көрсетіліп тұрады. Ұжым өңір халқын облыста орын алған саяси, әлеуметтік және экономикалық маңызды оқиғалардан хабардар етіп, жалпы ел өміріне қатысты басты жаңалықтарды көпшілік назарына жедел әрі сапалы тұрғыда таратуда тынымсыз тіршілік етуде.Телевизия – аламан. Шабандозы – журналист. Ал оның ар жағында тақым қысқан қаншама қызметкер бар. Қызығы мен шыжығы көп таңғажайып әлемде бір минуттық сапалы дүние ұсыну үшін бір сағат, тіпті бір күн аздық етуі мүмкін. Десе де бұл саланың мамандары табанынан сыз өтіп, желдің өтінде жүрсе де шығармашылықпен шабыттанып, қаламмен қаруланған қағілез сарбазға айналады.Төл тарихтың айнасындай айқын, бағдаршамындай бағалы телеарна осынау 25 жыл ішінде аймақтың әлеуметтік мәселелерін қаузады. Көрерменге етене жақын болып, Сыр руханиятының, мәдениетінің көкжиегін кеңейтті. Иә, бұл қастерлі құт мекеннің қабырғасы – талай мықтының алғашқы қадамын бағамдаған, ел мен жерге сүйініп қызмет етуіне мұрындық болған, жақсылықтың, жаңалықтың бастауындай!&nbsp;Айсәуле Қарапбаева

Көрермен көзайымына айналған телеарна

<a href="https://kyzylorda-news.kz/">Kyzylorda-news.kz</a> Елімізде жеке кәсібін ашып, жаңа жұмыс орындарын қалыптастырамын деген әрбір жанға әрдайым қолдау бар. Ең бастысы – ашқалы отырған кәсібінің қоғамға қаншалықты маңызды екендігін дәлелдеп, арнайы бизнес жоспарын қорғап шықса болғаны. Бүгінгі күні мемлекет тарапынан қолдау тауып, өз кәсібін дөңгелетіп отырған жандар жетерлік. Солардың бірі Арал ауданының тұрғыны сүйікті ісін кәсіпке айналдырып, көпшілік ризашылығына бөленген – Даража Бижанова. Даража Әлімбайқызы өз кәсібі жөнінде:<blockquote>– Бұл кәсіпке келгенге дейін түрлі жұмыстарды істеп жүрдім. Тіпті үйлерді ремонттап, дизайндар жасадым. Бірақ өзім бала кезден тігін тіккенді жақсы көрдім. Алғашында үйде тұрмысқа қажетті дүниелерді келтіріп тіге беретінмін. Содан кейін әлеуметтік желілерден видео сабақтарды қарап жүріп, құрақ көрпе тігуге ой келді. Міне, қазір құрақ көрпе тігіп жүргеніме&nbsp;5 жылдан асты. Осы ісімді әрі қарай жетілдіру мақсатында қалаларға барып ақылы курстар оқыдым.&nbsp; Тапсырыс алып, қыздың жасауларын, қонаққа жаятын арнайы көрпелер жасаймын. Күндізгі күйбең тіршілік қамынан соң кешкілік уақыттары қолыма ине мен жіп алып, ойыма түскен түрлі фантазиялар арқылы көрпелер тігемін. Иә, құрақ жасау үлкен шыдамдылықты талап ететін жұмыс. Себебі бұл жерде түстердің бір-бірімен үйлесімділігі өте маңызды болып табылады. Сондай-ақ матаның да қалай қиылғандығына ерекше назар аудару қажет.&nbsp; Ендігі мақсатым – тігін тігумен айналысуға арнайы шағын ғимарат алып, қасыма көмекші қыздар алсам ба деймін. Себебі&nbsp; кейде тапсырыстың көптігінен жалғыз өзім үлгере алмай қалып жатамын. Өзім көпбалалы ана, «Күміс алқа» иегерімін. Аудандағы кәсіпкерлер палатасымен кеңесе отырып, «Бастау бизнес» жобасына қатыстым. Содан қайтарымсыз грант ұтып, тігін тігуге арналған түрлі машиналар мен құралдар алдым. Елімізде кәсіпкерлерді қолдайтын осындай жобалардың болғанына ризамын,–деді.</blockquote>Көз майын тауысып, қара нардай қайратын арнап тігін тігумен айналысып келе жатқан Даража Бижанова бүгінде осы кәсібінің несібесін көріп келеді. Иә, тәуелсіз елімізде кәсіпкерлерге көмек көрсетіп, қолдайтын жобалардың бары қалың бұқараны да қуантпай қоймайды.

Тігіншілік –  текті өнер

<a href="https://kyzylorda-news.kz/">Kyzylorda-news.kz</a>&nbsp; Сырдария аудандық партия филиалының мәжіліс залында аудандық мәслихаттағы партия фракциясы мен аудандық партиялық бақылау комиссиясының бірлескен отырысы өтті.Бірлескен отырысты аудандық партия филиалының төрағасы Ержан Әжікенов ашып, жүргізіп отырды. Отырыстың күн тәртібінде&nbsp;төрт мәселе қаралды: Бірінші&nbsp;«AMANAT» партиясы сайлауалды бағдарламасы аясындағы жол картасының 2024 жылға арналған индикаторларының орындалу барысы бойынша Сырдария ауданы әкімінің орынбасары Роллан Еспенбетовтың есебін тыңдау, екіншісі партияның сайлауалды бағдарламасындағы ауылшаруашылығы және жер қатынастары саласына қатысты индикаторларының орындалуы туралы аудандық ауылшаруашылық және жер қатынастары бөлімінің басшысы Қанат Нұрсейіттің есебін тыңдау, Сондай-ақ партияның сайлауалды бағдарламасындағы білім саласына қатысты индикаторлардың орындалу барысы туралы және және аудан бойынша мектеп оқушыларының жазғы демалысқа дайындық барысы туралы Сырдария ауданы бойынша білім бөлімі басшысының міндетін атқарушы Жанар Бегайдарованың есебін тыңдау, соңғысы Шаған ауылдық округінің әкімінің сайлаушыларға берген уәделерінің орындалуы бойынша ауылдық округ әкімі Нұғман&nbsp;Смайловтың есебін тыңдауКүн тәртібі бірауыздан бекітілген соң, алғашқы мәселе бойынша аудан әкімінің орынбасары Роллан Еспенбетов партияның сайлауалды бағдарламасы аясындағы жол картасының 2024 жылы ауданда орындалу барысы және жоспарлары туралы хабарлама жасады. Жол картасындағы өз салаларына қатысты 18 іс-шара жыл соңына дейін толық орындалатындығын атап өтті. Сонымен қатар Роллан Манарбекұлы аудандағы алдағы жылу беру маусымына дайындық жұмыстары туралы да айтып өтті. Отырыс барысында фракция мүшесі Ақтөре Ибрагимұлы аудан әкімінің орынбасарына бірқатар сұрақтар қойды. Мәселен, Тереңөзек кентіндегі Бердіқұлов көшесі арқылы өтетін канал көпірінің үсті ойшықтанып, көлік жүргізушілеріне жүру барысында қиындық тудырып жүргендігін атап өтті. Роллан Манарбекұлы аталмыш мәселе жол жөндеу жұмыстары басталған сәтте реттелетіндігін атап өтті. Сонымен қатар, фракция мүшесі Алмас Зейноллаұлы Тереңөзек кентіндегі Жеңістің 50 жылдығы көшесіндегі ауыз су құбырларын ауыстыру барысында жол дұрыс тегістелмей, тұрғындар наразылық тудырып отырғанын айтты. Бұл сауалға аудандық құрылыс және қала құрылысы бөлімінің бас маманы С.Аймаханов жауап берді. Су құбырларын ауыстыру жұмыстары толық аяқталған соң, мердігер мекеме көшені толық реттейтіндігін жеткізді.Екінші мәселе бойынша аудандық ауылшаруашылығы және жер қатынастары бөлімінің басшысы Қанат Нұрсейіт хабарлама жасады. Ол өз сөзінде жол картасындағы 7 іс-шара өз саласына қатысты екендігін атап, «Жер аманаты», «Ауыл аманаты» жобаларының ауданда іске асырылу барысына тоқталды. Барлық шаралар жыл соңына дейін орындалатындығын атап өтті.Күн тәртібіндегі үшінші мәселе бойынша аудан бойынша білім бөлімі басшысының уақытша міндетін атқарушы Ж.Бегайдарова хабарлама жасады. Ол өз хабарламасында сайлауалды бағдарлама аясындағы жол картасының 8 іс-шарасы білім саласына қатысты екендігін айтып, жыл соңына дейін аталған шаралар орындалатындығын жеткізді. Сонымен қатар аудандағы мектеп оқушыларының жазғы демалысын ұйымдастыру барысына тоқталды. Отырыс төрағасы Ержан Ертарғынұлы аудандағы жазғы тынығу лагерлерінің жұмысына партиялық мониторинг топтарын құрып, лагерлердегі қауіпсіздік шаралары мен асхана жұмыстарына зерделеу жұмыстарын жүргізуді аудандық партия филиалына жүктеді. Фракция мүшесі Алмас Зейноллаұлы ұстаздардың кешкі кезекшілік жұмыстарын жүйелі жүргізу бойынша ұсынысын енгізді.Күн тәртібіндегі соңғы мәселе бойынша Шаған ауылдық округінің әкімі Нұғман&nbsp;Смайлов хабарлама жасады. Ол өз хабарламасында Шаған ауылындағы сайлаушыларына берген сайлауалды уәделері туралы атап айтты. Мәселен, Шаған ауылында кәсіпкерлікті қолдау, жұмыссыздық деңгейін төмендету, инфрақұрылымды дамыту бойынша бірқатар жұмыстар атқарылып жатқандығын жеткізді. Отырыс барысында фракция мүшесі Алмас Зейноллаұлы Шаған ауылындағы Тұйғынов көшесіндегі оқушыларды мектепке тасымалдау бойынша қандай шаралар атқарылып жатқандығын сұрады. Аталған мәселе бойынша «Шаған Жер» ЖШС демеушілігімен аталған көшеге уақытша айналма жол салынып, мектеп автобусы қатынап жатқандығын атап өтті.Күн тәртібіндегі барлық мәселелер толық қаралған соң, қаулы қабылданып, отырыс жабық деп жарияланды.

Бірлескен отырыс өтті

<a href="https://kyzylorda-news.kz/">Kyzylorda-news.kz</a> Елімізде 21 мамыр мәдениет және өнер қызметкерлер күні аталып өткені айқын. «Арқалағаны алтын, жегені жантақ» деп кезінде Шерхан Мұртаза журналистер қауымының еңбекқорлығын ескерсе, бүгін біз осы сөзді мәдениет және өнер қызметкерлеріне қарата айтуды жөн көрдік. Дәл осы айтулы датаға орай, Шиелі ауданында «Мәдениетім – мәртебем» атты салтанатты шара мен мәдениет үйлері мен клуб кәсіпорындары басшылары арасында «Үздік аймақ – 2024» атты байқау өтті.Әр халықтың рухани байлығы, тыныс-тіршілігі, салт-дәстүрлері мәдениет деген асыл ұғыммен ұштасып жатыр. Мерекеге Шиелі ауданында өткізілген қоғамдық-саяси, мәдени-рухани көпшілік шаралардың басы-қасында болып, ұлттық мәдени мұрамызды таныту жолында аянбай еңбек еткен осы саланың ардагерлері Қуатбай Нарқұлов, Төлепберген Рыскелдиев, Нағима Рысбек және Тұрмат Баймағамбетов, Нәйлә Палымбет және Болат Күлімбетов қатысты. Осылайша, дүйім жұртқа керемет көңіл-күй сыйлаған кеште пейілдері дариядай мәдениет саласы саңлақтары мен өнер қызметкерлері қызыл кілеммен жүріп өтті. Әрмен қарай қонақтар «Мәдениет саласы қызметкерлерінің бір күні» атты фотокөрмені тамашалады.Шара барысында Шиелі ауданының мәдениет және тілдерді дамыту бөлімінің басшысы Аруна Өркенқызы мәдениет және өнер саласының қызметкерлерін мерекемен құттықтап, ауданның мәдени және рухани әлеуетін арттыруға үлес қосып жүрген мәдениет қызметкерлерін марапаттады. Содан кейін салтанатты кеш байқаумен жалғасын тапты. Сайысқа «Жеті қазына», «Жаңа Қазақстан», «Мәдениет жауһарлары» мен «Үздік аймақ» тобы қатысып, бағын сынады. Олар бірінші кезеңде өздерін таныстырса, екінші кезеңде руханият жылының маңыздылығын насихаттау мақсатында мәдениет қызметкерінің бір күні арқылы тақырыпты аша білді.Ал соңғы кезеңде әр аймақ өздері қалаған жанрда аспаптың барлық түрін пайдалана отырып өз өнерін көрсетті. Тартысты әрі қызықты өткен сайыстың нәтижесінде «Жаңа Қазақстан» тобы бас жүлдені жеңіп алды.

Шиелі: Бас жүлде "Жаңа Қазақстан" тобында

<a href="https://kyzylorda-news.kz/">Kyzylorda-news.kz</a>&nbsp; "Қазақтелеком" АҚ 1 шілдеден бастап тарифтердің қымбаттануына байланысты бәсекелестікті қорғау және дамыту агенттігі компанияға ескерту жолдады. Бұл туралы <a href="https://stan.kz/1-shildeden-bastap-internet-kimbattaydi-kazaktelekomga-eskertu-berildi-400739/">Stan.kz</a> ақпарат агенттігі хабарлайды."Қазақтелеком" үй интернеті қызметтерін, сондай-ақ ұялы байланысы бар пакеттік қызметтерді қамтитын тіркелген байланыс бойынша 51 мұрағаттық тарифтік жоспарға өзгерістер туралы хабарлаған еді.Бұған байланысты Кәсіпкерлік кодекстің 198-бабының 1-тармағына сәйкес бәсекелестікті қорғау саласындағы заңнамасын бұзудың алдын алу мақсатында "Қазақтелеком" АҚ-ға қатысты заңнаманы бұзуға әкеп соғуы мүмкін іс-әрекеттер жасауға жол бермеу туралы алдын ала ескерту жолдаған."Қазақтелеком" АҚ 2024 жылғы 20 мамырында өзінің интернет-ресурсында 2024 жылғы 1 шілдеден бастап тарифтердің көтерілуі туралы ақпарат жариялады. Байланыс туралы заңнамаға сәйкес байланыс қызметтеріне тарифтерді байланыс операторлары тек негізделген шығындар бойынша белгілейді", –&nbsp;делінген агенттік хабарламасында.Айта кетейік,&nbsp;2024 жылғы 1 шілдеден бастап архивтегі тарифтік желінің кейбір тарифтік жоспарларының&nbsp;бағасы&nbsp;көтерілетіні&nbsp;хабарланды. 51 тарифтік жоспардың бағасы 5500 бен 11000 теңге аралығында бекітілген. Бұл бағалар үйдегі интернет пен ALTEL, Kcell тарифтеріне әсер етеді.Фото: “Қазақтелеком” АҚ баспасөз қызметі

1 шілдеден бастап интернет қымбаттайды: Қазақтелекомға ескерту берілді

<a href="https://kyzylorda-news.kz/">Kyzylorda-news.kz</a> Алла ең алдымен ғаламшарды, сосын планеталарды жаратты десек, жер бетінде тіршілік пайда болмастан бұрын тау мен тасты, су мен өсімдікті жаратты. Мұнан кейін жер бетіне түрлі тіршілік иелерін жіберіп, оған иелік ету үшін адамзатты жаратты. Сол есте жоқ ескі замандарда табиғаттың тамаша үйлесімімен біте қайнасып жатқан бұл Аралдың бір шеті қарт Каспиймен ұштасып, шегі жоқ иен далаға нәр берді десек сенер ме едіңіз?! Анығында солай.Осыдан 21 миллион 1200 жыл бұрын Кайнозой дәуірінің орта шенінде Арал мен Каспий бір болған деген дәлелді дәйектер айтылады тарихшылар мен археологтардың дерегінше. Олай дейтініміз, теңіздің теріскей жағындағы Ақеспе жағынан 80 метр тереңдіктен Олигоцен уақытында өмір сүрген теңіз балықтарының тасқа айнала бастаған қаңқалары табылған. Яғни үлкен теңіздерде өмір сүретін киттер мен қызыл балықтардың сүйектері осы Арал теңізінің қазіргі орнынан шыққан. Оған қоса теңіз жыртқышы саналған акуланың тісі мен сүйегі де табылды. Демек бұл Аралдың бір дәуірлерде талай тіршілікке арқау болған ұлы теңіз болғанын тарихтың өзі айқындап отыр. Бүгінде бәлду-бәлду бәрі өтірік. Сол теңіздің сарқытын көріп, ақжал толқынымен алысқан аға буын әлі күнге арамызда жүр. Бүгінде олар теңіз анаға қарап тебіренеді, оған жасалған қиянатты кешіре алмайды. Десе де теңізден кіндік үзбеген ел әлі күнге осы маңды мекендейді. Замана ағымымен өсіп-жетілген ұрпақ бүгінде теңіз-ананың сарқыты Кіші теңізден балық аулап, қоңыртөбел күн кешуде. Теңіз барда басталған балық шаруашылығы жайлап етек жайып, арнайы ұйымға айналды.Іргесі 1905 жылы қаланып, «Алтықұдық» деп аталған кішкене қыстақ Кеңес өкіметі орнағаннан соң жұмысшы поселкесіне, кейін қалаға айналды. Бұл өңірге темір жол тартылып, тіршілік жанданған айрықша кезең болатын. Оған теңіздің атымен аттас қылып Арал деген айрықша есім тағылып, 1927 жылы құжат жүзінде Арал қаласы ретінде тарих бедеріне енді. Осы Аралдың құрылғанына биыл 95 жыл толып отыр. Аз уақыт емес. Осы ғасырға жуық құнды уақыттардың ішінде Арал қаласы көптеген тарихи шешімдердің куәсі болып, келелі басқосулардың орталығына айналды. Көркейді, дамыды. Енді міне, өзіңіз көргендей өңірдегі сәні келіскен шаһарға айналып отыр.1925 жылы ауданда ірі балық аулау тресі құрылып, 1927 жылы аудандық атқару комитетінің төрағасы Т.Медетбавтың шығарған бұйрығы негізінде 1 қазаннан бастап халық көп шоғырланған осы өлкеге Арал қаласы деген айрықша статус беріледі. Бұл жөнінде облыстық мемлекеттік архиві Арал аудандық филиалының басшысы Б.Қуатов:– Арал қаласы 1927 жылы 1 қазанда құрылған. Бұл туралы Арал балық комбинатының ІV кворында сол кездегі аудандық атқару комитетінің төрағасы Т.Медетбавтың шығарған бұйрығы бар. Сол тұстағы барлық мекемелерге сол бұйрық таратылып, құжат жүзінде 1 қазаннан бастап Арал қаласы пайда болды. Кейіннен 1927 жылы Қазалы уезі таратылған соң 1928 жылдан бастап Арал ауданы құрылды. Оған Қамыстыбас поселкесі қарап, кейін аудан еншісі ұлғайтылды, – дейді.Мұндағы елдің тіршілігі тікелей балық шаруашылығына қатысты болғандықтан, сол кезде салынған ғимараттардың дені осы балық шаруашылығы саласына қатысты салынған. Қолда бар құжаттардың дені солай дейді. Яғни қазірдің өзінде жұрнағы қалған барақ үйлердің дені кезінде балық қабылдау пункттері болған. Яғни балық сақтау пункттерінің көптеп салынуы сол кездің өзінде балық өнімдерін шығарып, оны экспорттау мәселесіне басымдық берілгендігін аңғартады. Қазір сол ғимараттардың қатары көптеген еңселі нысандармен толыққан.Сәні мен салтанаты келіскен шырайлы шаһардың бүгінгі келбетіне келер болсақ айтуға сөз бөлек. Қателеспесем осыдан бірер ай бұрын осы Аралға дәм-тұз айдап сонау Алматыдан келген әріптесіміз, «Спорт жұлдыздары» республикалық ғылыми-әдістемелік, спорттық-патриоттық журналдың Нұр-Сұлтан және Алматы қалалары бойынша шеф-редакторы Жандос Аянбекұлы:– Мен бұл кезге дейін жұмыс бабымен көптеген қалаларда болдым.&nbsp;Әрине журналист болған соң назарымызда көп дүниелер болады. Менің бір таңғалғаным, Арал қаласы көшелерінен ретсіз тасталған қоқыс көрмедім. Тіпті бір целлофан немесе құтының ретсіз жатқанын байқамадым. Тазалығы жағынан осы Арал қаласы мен барған қалалардың ішінде Грозныйдан кейінгі қала ма дедім. Сәулеттік жобалары да үйлесім тапқан. Бір сөзбен айтқанда, Арал – ең таза қала, – деген болатын.Бұл сөз шын мәнінде біз білетін Арал қаласына жарасатындай-ақ пікір. Қазіргі қаланың келбетін бұрынғымен салыстыруға мүлдем келмейді. Қазір қала көшелерінің көптеген бөлігі асфальтталып, жарық шамдары қойылған. Бұрынғы кеңестік кезде қойылған көше атаулары қазір келмеске кетіп, түгел қазақшаланды. Жаяу жүргіншілер жолақтары салынып, көптеген кәсіпкерлік ғимараттар бой көтерді. Мемлекеттік нысандардан бөлек, өндіріс ошақтары пайда болды. Қаланың іргесін халықаралық маңызға ие "Батыс Еуропа – Батыс Қытай" көлік дәлізі кеулей өтеді. Темір жол да қаланы қақ жарып өтеді. Осылайша транспорттың қос түрі қаланың күретамырына айналды. Бұл дегеніңіз, Арал қаласының сәні мен салтанаты келісіп, шаһар көркі шырайланды деген сөз. Сол шаһардың құрылған жылын атап өту шарасы да назардан тыс қалмайды.

Сәулеті дамыған Арал

<a href="https://kyzylorda-news.kz/">Kyzylorda-news.kz</a> Қазалы ауданы – Қызылорда облысының экономикалық қуатты аудандарының бірі. Кәсіпкерліктің көкжиегі кеңейген. Бұдан бөлек, ауданның инфрақұрылымы да келіскен. Жыл сайын осындағы ағайынға қолайлы орта қалыптастыру үшін және Қазалы қаласы мен Әйтеке би кенті екіаралығын қосу мақсатында жаңа ғимараттар да салынуда. Қазалыдағы осындай әрбір құрылыстың сапалы жүруі бірінші кезекте аудан басшысы Мейрамбек Шермағанбеттің жіті бақылауына алынған.Жақында Мейрамбек Зинабдинұлының тапсырмасына сәйкес, аудан әкімінің орынбасары Жалғас Сүйеубаев ауылдық елді мекендерде жүргізіліп жатқан бірқатар құрылыс нысанын аралап, жұмыстың сапасын бақылады.Жалғас Оңғарұлы алдымен, Жанқожа батыр ауылындағы «Жайлы мектеп» ұлттық жобасы аясында салынып жатқан 300 орындық мектеп құрылысына барды. Қазіргі таңда жаңа білім ордасының бірінші қабатының терезелерін орнатып, екінші қабатының кірпішін өру жұмыстары қарқынды жүргізілуде.Мұнан соң, Бекарыстан би ауылына барып, елді мекенде жуық арада басталған спорт кешенінің құрылысын көрді. Құрылыс жұмыстарымен мердігер мекеме «Жылу ХХІ» жауапкершілігі шектеулі серіктестігі айналысуда. Дәл қазіргі уақытта спорт кешені құрылысының жер қазу шаруалары аяқталып, іргетасын қою жұмыстары атқарылуда.Сонымен қатар, Жалғас Сүйеубаев Кәукей ауылына да барып, ондағы 100 орындық ауылдық клубтың құрылыс жұмыстарын да бақылады. Қазіргі кезде клуб құрылысы толықтай аяқталуға жақын. Мердігер мекеме «SCSИнжиниринг» жауапкершілігі шектеулі серіктестігі қызметкерлері ішкі әрлеу және жабдықтарын орнату, клуб ауласын аббаттандыру жұмыстарын жүргізуде.Қазалы ауданы аумағындағы құрылыс жұмыстарының барысын көрген аудан әкімінің орынбасары аудандық құрылыс, сәулет және қала құрылысы бөлімінің басшысы мен мердігер мекемелердің жауапты қызметкерлеріне құрылыс жұмыстарын сапалы әрі уақытылы жүргізілуін қадағалауды тапсырды.

Қазақстан және Қызылорда облысының жаңалықтары: Қоғам