<a href="https://kyzylorda-news.kz/">Kyzylorda-news.kz</a>. 19 шілде – арапа, 20, 21, 22 шілде – Құрбан айт мерекесі. Пандемия жағдайына байланысты 20 шілде күні Құрбан айт намазы оқылмайды. Сонымен қатар, құрбан шалу рәсімі бұрынғыдай мешіттерде жүзеге асырылмайды.
<blockquote>
 «Жергілікті әкімшілік пен бас санитардың келісімімен арнайы орындарда жүргізілетін болады. Рәсімге құрбан шалушы да, ет алушы мұқтаж жандар да қатыстырылмайды», – деді ҚМДБ-ның Қызылорда облысы бойынша Бас имамы Болатбек қажы Ұласқанұлы.
</blockquote>
Бұл жұмыстарды жүргізу үшін ҚМДБ-ның сайты арқылы құрбан шалушы онлайн тапсырыс бере алады. Тапсырыстарды арнайы құрылған штаб жүзеге асырады. Құрбан шалушыға қажеттігінше фото-видео есеп беріледі. Етке мұқтаж жандардың тізімі «Бақытты отбасы» әлеуметтік орталығынан алынады. Сайт арқылы өтініштер де қабылданады. Оны мешіт имамдары мен еріктілер тобы таратып береді. Облыс бойынша құрбандық шалуға арналған орын болып «KZO.ЕТ» және «Нұрболат» қасапханасы бекітілді. Шариғат бойынша, сойылатын малдардың да өз талаптары бар. Осыған орай, биыл іріктелген малдардың ортақ бағалары да шығарылды.
<blockquote>
 «6 айдан асқан тоқтылар базарда жоқ. Сондықтан жас тоқтылар сойылмайды. Қой бағасы – 70 000 тг, сиыр малы – 350 000 тг, түйе – 600 000 теңгеге бағаланған», – деді облыстың бас имамы Болатбек қажы Ұласқанұлы Өңірлік коммуникациялар қызметінде өткен “Құрбан айт мерекесінің аталып өтілуі және құрбан шалу шарттары” туралы баспасөз конференциясында.
</blockquote>

Қызылорда: Құрбан айт намазы оқылмайды

<a href="https://kyzylorda-news.kz/">Kyzylorda-news.kz</a>. Бүгінде Қызылорда облысы бойынша ҚАЖ мекемелеріндегі жазасын өтеушілер жұмыспен қамтылған.
Қауіпсіздігі барынша төмен ЗК-169/4 мекемесіндегі&nbsp; 140 жазасын өтеуші 23 кәсіпкердің жұмыс обьектісінде жұмыс істейді. Олар пластик терезелер жасаумен, жалюз тігумен, машина жөндеумен, кірпіш өнімдерін шығарумен айналысады. Мекемедегі 8 сотталған «Еуропласт» пластик терезелер шығаратын цехта жұмыс істейді.
Мекеме бастығы әділет майоры Руслан Алимовтың айтуынша түрме әкімшілігі аталған бағыттағы жұмыстарды жергілікті кәсіпкерлермен бірлесе жүзеге асыруда. Осының нәтижесінде жеке кәсіпкер тәтті өнімдер шығаратын цех ашпақшы. Бірнеше жазасын өтеуші жұмыспен қамтылмақ.
<blockquote>
 «Цехтан шығып жатқан&nbsp; пластикалық терезелер сапалы, әрі қолжетімді өнімге сұраныс жоғары. Тапсырыстар өте көп, мерзімінде жасап беруге тырысамыз. Пластик терезе жасайтын өнімді Алматы қаласынан алдырамыз. Сотталған азаматтар уақытылы жұмысқа келіп, тиянақты жұмыс жасайды.Күні. Осы азаматтардың арқасында тапсырыстарды халыққа уақытында жеткізіп отырмын»&nbsp; – дейді цех директоры Талған Әлиев.
</blockquote>
Өмірден шалыс басып, жазасын өтеп жатқандардың бірі – Арман. Ол заңсыз балық аулап, істі болып&nbsp; сотталған. Қазір ол пластик терезелерді жасауға машықтанып алған. Көпқабатты үйлер мен зәулім ғимараттарға қолданылатын сапалы пластик терезелер істейді.
<blockquote>
 «Қылмыстың өтеуі –жаза дегендей,&nbsp; жазамды өтеудемін. Бос уақытымыз жоқ десем болады.&nbsp; Осы цехта 8 сотталған жұмыс істейміз.&nbsp; Уақытылы айлық жалақымды алып, артылғанын отбасыма жіберіп отырмын»,- дейді Арман.&nbsp;
</blockquote>
<img src="https://kyzylorda-news.kz/wp-content/uploads/2021/07/whatsapp-image-2021-07-16-at-11.41.58.jpeg" alt="" />
<img src="https://kyzylorda-news.kz/wp-content/uploads/2021/07/whatsapp-image-2021-07-16-at-11.41.57.jpeg" alt="" />

Қызылордада 140 жазасын өтеуші жұмыспен қамтылған

<a href="https://kyzylorda-news.kz/">Kyzylorda-news.kz</a>. Қазгидромет 17-19 шілдеге арналған ауа райы болжамын жариялады.
Алдағы үш күнде еліміздің оңтүстігі мен батысында ыстық ауа райы сақталады. Батыста ауа температурасы +28+39℃, солтүстікте +20+36℃, орталықта және шығыста +23 +35℃, ал оңтүстікте +29+40°С болады.

Демалыс күндері 40 градусқа дейін аптап ыстық болады

<a href="https://kyzylorda-news.kz/">Kyzylorda-news.kz</a>. Қызылорда облысы кәсіпкерлер палатасы Өңірлік кеңесінің мүшесі Болат Нұрхожаев аймақ басшысына өңірдегі жем-шөпке тапшылық мәселесін шешуге қатысты ұсыныстарын жеткізді.
Жақында ғана Арал ауданындағы жағдайға қатысты төтенше жағдай жарияланып, мемлекеттік деңгейде көмек көрсетілетіндігі белгілі болды. Дегенмен, қызылордалықтар да қарап қалмай, қолдарынан келген көмектерді жасауда.
Өткен аптада Өңірлік кеңестің мүшелері, кәсіпкерлер өздері бастама көтеріп, Аралдағы ағайынға бірнеше машина шөп жеткізген болатын. Осы аптада Қармақшы ауданындағы III Интернационал ауылының тұрғындары қолдау ретінде шөп оруға шықты. Басы-қасында ұйымдастырып жүрген кәсіпкер Мұрат Сәрсенбаев.
<blockquote>
 «Арал ауданында қуаңшылық жайлаған ауылдарға жем-шөп жеткізуде әлеуметтік осал топтардың қорғалуы мақсатында ауылдағы жағдайды нақты көргеннен ұсынамын. Біріншіден, әр ауылдағы шөпке мұқтаж отбасылардан бөлек, бір-жар сауын малымен күнелтіп отырған мұқтаж отбасылар тізімі жасалып, шөп бірінші кезекте соларға үйлестірілуі керек. Бұл тізім ауылдың қоғамдық қауымдастық, ауыл ақсақалдары, әділеттік айтатын кәсіпкер азаматтарымен бірлесіп шешілуі керек және шөп жеткізілген кезде әділетті үлестірілуін қадағалау қажет. Мұқтаж отбасыларға шөп тиіспей қалса жағдайлары одан да төмендейді. Қазір олар қорасындағы бұзау-боталарына беретін шөп таппай отыр. Жақында ауыл әкімдерін сайлау науқаны басталғалы отыр, бірақ қызметтегі ауыл әкімдері осы кезден тізім нақтылауға қысқа мерзімде кірісуі қажет», – деген Өңірлік кеңес мүшесі Болат Нұрхожаев өзге де ұсыныстарын айтты.
</blockquote>
Кәсіпкер Болат Нұрхожаев облыс әкімінен мұндай шаралармен қоса, қабылданатын шешім барысында келесідей жайттардың басшылыққа алынуын сұрайды.
«- Қуаңшылық бойынша қызыл аумақтағы ауылдарды әр ауданға мүмкіндігіне қарай және ауылдың ірілігіне, егістік пен шабындық көлеміне қарай шефтік бекітіліп берілуі керек. Ол шефтік аудан, ауыл тұрғындарына қуаңшылық жағдайындағы елге көмек жасап қиындықтан бірге шығу қажеттігін түсіндіру жұмыстары жүргізілуі керек, әйтпесе сыртқа сатып жатсыңдар дейтін наразылар болып жатыр.
– Облыстан тыс келетін шөп(жем) мал санына қарай ауылдарға әділетті бөлінуі үшін штабтарға қоғам белсенділерімен қатар Кәсіпкерлер палатасының аудандық филиалы ұсынысымен кәсіпкерлерді қосу қажет, себебі тәуелсіз кәсіпкерлер әділеттілікті қамтамасыз етуде тиімдірек.
– Ауыл әкімдері мұқтаж отбасылардың шөп сатып алатын қаржысы бар-жоғын, ол үшін сататын малдарын, одан шөпке қаржы жинақтауын немесе ауылдағы ірі кәсіп иелерінен шөп алуға қарызға болса да меценаттық көмек көрсетуді реттеуі керек. Олай болмаған жағдайда жолы нашар, алыс ауылдар мен осал топтарға жем-шөп жетпей қалуы мүмкін. Бәрі солай дей алмаймыз, бірақ барлық ауыл әкімдері бұл жұмыстарды ауылдағы өз деңгейінде атқара алмауы мүмкін, сенім мен бедел болмауы мүмкін, ал оның соңы айқай-шуға ұласатынын білесіз, сондықтан қазірден алдын алу керек.
– Әрбір жіберіліп жатқан шөптің үлестірілуі туралы ақпарат жария, әділетті болуын қамтамасыз ету керек. Қай ауылға, қанша шөп, кімдерге және қалай, қанша бағамен, ол туралы аудандық штабқа ақпарат түсіп отыруы және ол сұралған жағдайда берілуі керек. Қазіргі таңда, осынша шөп жіберілді деп айтылғанымен оның қай ауылға, кімге, қанша бағамен үлестіріліп жатқаны туралы еш ақпарат жоқ, оны бір адам сатып алып жатыр ма, әлде жолдағы бір ауылға ғана барып жатыр ма, қалай үлестіріп кім шешіп жатырғаны туралы ақпарат жоқ. Жалпы облыс бойынша күнделікті дайын жем-шөп жөніндегі ақпарат болса бос көліктерді(попутный) тиімді пайдалануға болады
– Шөп тасуға бейімделген көліктер тізімі жасақталып, төтенше жағдайда оларға жанар-жағар май шығыны субсидиялану ақпараты да ашық болуы керек. Облыс бойынша ниет білдірген шөп тасуға бейімделген көліктер тізімі жасақталуы тиіс, себебі Арал ауданындағы көлік иелері Қарабұтақ жақта жүр, кейбірі Жалағашта шөп ала алмай жатып қалып жатыр, оларға ақпарат бөлісе отырып штабтан тиімді пайдалану керек. Еріктілермен дайындалған шөп трасса бойына бір шаруашылықтың базасына жиналып, ауылдарға жөнелтілуі тізіммен реттелуі керек, кез келген уақытта жедел желі (горячая линия) бойынша трассадағы попутный көліктерді пайдалану мүмкіндігін қарастыру керек, шөп тасымалында транспорт құны шөп бағасының 50%-ын құрайды.
– Аудан, ауылдарда мұқтаж жандарға үлестірілетін шөп келгенде түсіріп тарататын орын және адамдар (ауыл еріктілері) тізімі болуы керек».
<blockquote>
 «Гүлшара Наушақызы, бұндай шаралар қарастырылмаса күші барлар ғана алып, әлеуметтік осал топтардың жағдайы одан да төмендеуі мүмкін. Бұл шаралардың орындалуы ауыл әкімдеріне, қоғамдық қауымдастық төрағаларына қатаң тапсырылуы керек және штабпен күнделікті қадағаланса. Шөп үлестіруде рулық пен тамыр-таныстық орын алса, әділетті жасалмаса ауылдағы бірлікті бұзып алуымыз мүмкін. Барлық мәселелер ашық, мұқтаж отбасылар туралы ақпарат ауылдағы штабпен талқыланып, әділетті болуы тиіс.Біз қазір ауылдар бойынша тіпті нақты мал санын (статистикалық емес) білмейміз. Ауыл тұрғындарына мал санын нақтыламаса жем-шөптен құр қалатыны түсіндірілуі керек», – деді ол.
</blockquote>
Кәсіпкердің айтуынша, бүгінде өзге облыстардан шөпке осы кезден алдын-ала тапсырыс беруі салдарынан облыс тұрғындары тапшылықты сезініп отырғанын да баса айтты. Ол үшін жергілікті жем-шөппен айналысатын кәсіпкерлерді жазғырудың қажеттілігі жоқ деп санайды. Тек түсіндірме жұмыстарын жүргізіп, бизнестің әлеуметтік жауапкершілігі аясында жұмысты ұйымдастыруға кәсіпкерлерді де, жергілікті атқарушы органды да шақыруда.

Болат Нұрхожаев: Жем-шөп алдымен мұқтаж отбасыларға таратылуы керек

<a href="https://kyzylorda-news.kz/">Kyzylorda-news.kz</a>. 1-30 маусым аралығында ұлттық халық санағының I кезеңі өтті. Тұрғынжайлар, тұрғын үйлер, ғимараттар және тұрғын емес үй-жайлар тізімдерін жасау жұмыстары толығымен аяқталды. Бұл туралы Өңірлік коммуникациялар қызметінің ақпарат алаңында өткен баспасөз конференциясында облыстық статистика департаментінің басшысы Мариям Баекеева мәлімдеді.
I-кезеңдегі сұқбатшылардың қауіпсіздігін қамтамасыз ету мақсатында, әрбір санақ учаскелеріне облыстық ішкі істер департаментінің учаскелік инспекторлары бекітілді. Санақ жұмыстарына жастарды тарту мақсатында көбінесе облыстық «Жастар ресурстық орталығында» жұмыссыз тіркелген жастар мен студенттер тартылды.
<blockquote>
 «Алдағы II кезеңіндегі санақ жұмыстарына 1113 адам тартылатындығын және ол адамдардың планшетпен жұмыс жасай алуы керектігін ескерсек, жұмыспен қамту орталығы мен қала және аудан әкімдерінің үлкен көмегі керектігін баса айтқым келеді. Санақтың II-кезеңі 1қыркүйектен – 30 қазан аралығында тұрғындарды жаппай халық санағынан өткізу жұмыстары жүргізіледі. 1 қыркүйектен 15 қазан аралығында онлайн режимінде, 1-30 қазан аралығында планшет құрылғысымен», – деді М.Баекеева.
</blockquote>
Айта кету керек, халықтың санаққа белсене қатысуы өте маңызды. Санақшының қойған сұрақтарына дұрыс жауап беру әр азаматтың міндеті, санақ нәтижелері үй шаруашылықтарының жағдайларын, отбасылық қатынастарды жақсарту, мүмкіндігі шектеулі адамдардың өмірін, халықтың тұрғын үй жағдайларын жақсарту бойынша мемлекеттік бағдарламаларды әзірлеу үшін, сонымен қатар білім, жұмыспен қамту, туу және көші-қон мәселелері бойынша шешімдерді қабылдау үшін қажет.

Халық санағының ІІ кезеңі қыркүйекте басталады

<a href="https://kyzylorda-news.kz/">Kyzylorda-news.kz</a>.&nbsp; Бүгін облыс әкімі Гүлшара Әбдіқалықова «Nur Otan» партиясы жанындағы Сыбайлас жемқорлыққа қарсы іс-қимыл жөніндегі республикалық қоғамдық кеңесінің мүшесі Абзал Құспанмен кездесіп, сыбайлас жемқорлықты жою мәселелерін талқылады.
Абзал Темірғалиұлы сыбайлас жемқорлықты алдын алу, азаматтар арасында жемқорлыққа мүлдем төзбеушілік қағидатын қалыптастыру бағытында қоғамдық кеңестің белсенді түрде жұмыс жүргізіп келе жатқанын атап өтті.
<img src="https://kyzylorda-news.kz/wp-content/uploads/2021/07/218012486_3531146790321698_7834536419263970174_n.jpg" alt="" />
Өз кезегінде аймақ басшысы Сыр еліне арнайы келген кеңес мүшесіне алғыс білдіріп, Қызылорда облысында сыбайлас жемқорлықты алдын алуға бағытталған кешенді жұмыстардың маңыздылығына тоқталды. Сонымен бірге сыбайлас жемқорлық тәуекелдерін төмендету бағытында арнайы комиссия отырысында өзекті мәселелер ұдайы түрде жүргізілетінін тілге тиек етті.
Кездесуді қорытындылай келе Гүлшара Әбдіқалықова «Nur Otan» партиясы жанындағы Сыбайлас жемқорлыққа қарсы іс-қимыл жөніндегі республикалық қоғамдық кеңесінің жұмысына сәттілік тіледі.
Айта кетейік, партия жанындағы қоғамдық кеңестің жұмысшы тобы бірнеше күн бойы Қызылорда қаласы мен аудандардағы нысандарды аралап, бірлескен бағыттарда жұмыс жүргізетін болады.

Гүлшара Әбдіқалықова Абзал Құспанмен кездесті

<a href="https://kyzylorda-news.kz/">Kyzylorda-news.kz</a>. Қазалы ауданында шөп орудан жарыс өтті. Жастарды еңбекке баулу, қуаңшылыққа байланысты тұрмысы төмен отбасыларды шөппен қамтамасыз ету мақсатында ұйымдастырылған сайысқа қала, кент және ауылдық округтерден 40-тан астам жас қатысты.
Жарысқа қатысушылар таңертеңнен бастап Қарашеңгел ауылдық округіндегі «Жалаңтөс батыр» ЖШС-ның күріш алқабында белгіленген жерден шөп орды. Шөп оруға келген жастарға аудан әкімі Мұхтар Оразбаев арнайы келіп, арымасын айтты. Қысылтаяң уақытта осылайша жұмыла көтерген жүк жеңіл болатынын жеткізді.
Жарыстың қорытындысы бойынша 93 бау шөп орған Жалаңтөс батыр ауылының тұрғыны Ақтілек Бекболат І орынды жеңіп алды. Екінші, үшінші орындарды түктібаевтық Әли Еркебұлан мен Қазалы қаласының атынан қатысқан Рауан Аленов өзара бөлісті.
Ал, Қазыбек Ерсұлтан «Шалымды орақшы», Талант Нұрадин «Епті орақшы», Жеңіс Жолдасбаев «Белсенді орақшы», Талап Мурзалиев «Ұқыпты орақшы» номинацияларымен марапатталды.
Жарыстың жеңімпаздары мен жүлдегерлерін аудан әкімінің орынбасары Күнтілес Назымбеков құттықтап, бағалы сыйлықтармен марапаттады. Номинация иегерлеріне де бағалы сыйлықтар тапсырылды.
Айта кетейік, жарысқа қатысушылардың барлығы 1553 бау пішен орды. Бұл шөп ұйымдастырушылардың шешімімен аз қамтамасыз етілген, асыраушысынан айырылған отбасыларға берілетін болып келісілді.
<img src="https://kyzylorda-news.kz/wp-content/uploads/2021/07/01b9ed5e-09b8-4cbd-b8fb-77ac3ca4a242.jpg" alt="" />
<img src="https://kyzylorda-news.kz/wp-content/uploads/2021/07/1ce4c962-c142-4677-9a42-28e2f8bc6401.jpg" alt="" />

Қуаңшылық: Қазалыда шөп орудан жарыс өтті

<a href="https://kyzylorda-news.kz/">Kyzylorda-news.kz</a>. ҚМДБ төрағасының орынбасары, наиб мүфти Ершат Оңғар құрбандық шалатын қасапшы мен қасапханаға қандай талаптар қойылатынын түсіндірді, деп хабарлайды ҚазАқпарат.
<blockquote>
 «Қасапханаға міндетті түрде бетперде тағып кіріп, антисептик заттарын барынша пайдалану керек. Арақашықтықты қатаң сақтау, бір-бірімен қол алыспау, дене қызуы 37 градустан жоғары, тұмау және басқа да ауру белгілері бар адамдарға келмеу және жасы 65-тен асқан қариялардың, әйелдер мен балалардың құрбан малын шалатын орындарға бармауы сұралады», – деді Ершат Оңғар Орталық коммуникациялар қызметінде өткен баспасөз мәслихатында.
</blockquote>
Спикердің айтуынша, қасапшы мұсылман болуы керек, кәмелетке толған, физикалық және психикалық тұрғыда сау, мал союды жақсы меңгерген болуы қажет.
<blockquote>
 «Сойылатын жерге малды қинамай апару керек. Пышақты мал алдында қайрауға, өтпес пышақпен союға, бір малдың көзінше басқа бір малды бауыздауға болмайды. Малды құбылаға қаратып, сол жағымен жатқызып, екі алдыңғы аяғы мен бір артқы аяғын қоса байлау керек. Бірден өңештің екі күретамырын кесіп, жаны шыққанын күту керек. Жаны шықпай тұрып, терісін алмаңыздар. Сойылған малдың терісі мен ішек-қарнын аяқасты етпей, барынша қолдануы шарт», – деп түсіндірді наиб мүфти.
</blockquote>
Қасапханаға келетін адамдардың дене қызуын өлшенеді, антисептик пен маска қойылады.
<blockquote>
 «Қасапханаға толымдығын 30 пайыздан асырмай, кемінде&nbsp;1 метр&nbsp;ара қашықтықты білдіретін сызықтар сызу қажет. Ақпарат тақтасын жасау немесе қабырғаға қажетті мәліметті ілу, қауіпсіздік ережелерімен танысу және мал сойылатын жерлердің таза болуы да талап етіледі», – дейді Ершат Оңғар.
</blockquote>

Құрбандық шалатын орын мен қасапшыға қандай талаптар қойылады?

<a href="https://kyzylorda-news.kz/ru/obshestvo/rost-prodolzhaetsja-za-swtki-v-kyzylorde-vyjavleno-43-slwchaev-koronavirwsa-117054/">Kyzylorda-news.kz</a>. Адамзат тарихында пайда болған барлық діндер гуманистік идеяны, қоғамдағы рухани құндылықтарды насихаттаған. Ешбір дін зұлымдық пен қиянатқа, зорлық-зомбылыққа жол бермеген. Дегенмен, адамдар арасында билік пен байлыққа талас туындағанда діннің атын жамылып, мистикалық ұғымдарды, медитациялық тәсілдерді пайдаланған, ораторлық қабілеттерін дамытқан теріс пиғылды белсенді индивидтердің әрекеті әр түрлі діни ағымдардың пайда болуына әкелді. Бұл құбылыста ислам діні де шетте қалмады.
Ислам діні қазақ даласына таралу кезеңінде &nbsp;Әбу Насыр Әл-Фараби, Ахмет Игүнеки, Жүсіп Баласағұн, Махмуд Қашғари, Қожа Ахмет Яссауи, Абай Құнанбайұлы, Шәкәрім Құдайбердіұлы т.б. шоқтығы биік тұлғалардың рухани көкжиегіне елеулі әсер етті. Ал, Ахмет Байтұрсынұлы, Ыбырай Алтынсарин, Мұстафа Шоқай, Шоқан Уәлиханов, Сұлтанмахмұт Торайғыров сынды ағартушы зиялылардың ғұмыр баспалдағында алғашқы сауатын медреседен ашқан. Осыдан-ақ дәстүрлі ислам құндылықтары халықты рухани кемелденуге, адамгершілік пен имандылыққа тәрбиелейтінін аңғаруға болады.
Тарих сахнасында қазақ халқы діни сенімді, рухани мұраларды билікке қол жеткізу мақсатында саяси құрал ретінде пайдаланбаған. Шығыс пен Батысты жалғастырған «Жібек» жолындағы сауда-саттық барысында будда, христиан діндері де ұлы дала төрінде таралып үлгерді. Алайда, дін мәселесі төңірегінде алауыздықтар, өзге дін өкілдерін кемсіту секілді оқиғалар орын алмаған.
Замана келбетінде жақсылық пен жамандық, қараңғылық пен жарық, мейірімділік пен зұлымдық қатар жүргендіктен, бейбітшілікке үндейтін ислам әлемімен бірге соғыс отынының тұтануына мүдделес топтардың жүретінін табиғи заңдылық деп те қарауға болады. Мұндай масштабты хаосты көздейтін, қарулы қақтығыс арқылы мемлекеттің қауіпсіздігіне зиян тигізетін әрекеттерге «Терроризм» ұғымы беріледі.
«Терроризм» – (латын тілінен аударғанда «terror» – қорқыныш, үрей деген мағынаны білдіреді) саяси мақсатты сылтауратып, күш қолдану, қоғам мен мемлекетке қысым жасау мақсатында жасалатын қасақана қылмыстық іс-әрекет болып табылады.
Терроризмнің үш сипаты бар, бірінші саяси, екінші діни және үшінші ұлттық сипаттағы төңкеріс. Жекелей тоқталсақ, 1) саяси сипаты – революциялық жолмен билікті басып алуға, қоғамдық резонанс тудыру арқылы мемлекеттің күйреуіне апаратын әрекет. 2) діни сипаттағы терроризм – діни ұғымдарды, догмаларды алға тартып, лаңкестік әрекетке шақыру және жасау. 3) ұлттық сипаты – ұлтаралық қақтығысқа, фашисттік идеяға басымдылық беру арқылы елдің тыныштығы мен бірлігін бұзуға әкелетін әрекет болып табылады.
XVIII ғасырда пайда болған бұл «Терроризм» ұғымы соңғы 20 жылдықта кеңінен қолданыла бастады. Бұған себеп 2001 жылғы 11 қыркүйекте АҚШ-та болған оқиға мен содан бері Ирак, Ауғанстан, Сирия, Ливан елдерінде жалғасып келе жатқан лаңкестік әрекеттер болып отыр. Таяу Шығыс елдерінің соғыс алаңына айналуының негізгі себептерінің бірі Батыстық «Исламофобиялық стратегиядан» шыққан деген болжамды пікір бар. Бұл ақпараттық идеологияның жұмысы нәтижесіз болмағандығын байқаймыз.
Сондықтан, сыртқы ықпалды күштердің құрығына ілінбей, діни фанатизмге жол бермес үшін ата-баба дәстүрімен біте қайнасқан рухани және мәдени құндылықтарымызды бағалау, интернет кеңістігі мен қоршаған ортадан ақпарат алмасу барысында ішкі сүзгіден өткізу және Тәуелсіздік тұғырымызды сақтау жолында еңбек етуіміз қажет деп білемін.
Қорытындылай келе, тарихымызда қазақ халқы арасында теократиялық мемлекет, халифат құру секілді мәселелер көтерілмеген. Қоғамдық шиеліністерді бейбіт түрде шешу төрелігін билер алқасы орындап отырды. Бұл тарихи фактілер халық дүниетанымында діни тағаттылықтың орныққандығын көрсетеді.
Дархан ЕРНАЗАРОВ,
Қызылорда облысы Дін істері басқармасының маманы

Дархан Ерназаров: Терроризм – біздің тарихи санамыз бен табиғи болмысымызға жат құбылыс

<a href="https://kyzylorda-news.kz/">Kyzylorda-news.kz</a>. Құрбан шалуға ниет еткен азаматтар тапсырыс беріп, мұқтаж жандар құрбандық етін алуға өтініш бере алатын&nbsp;<a href="https://qurban2021.kz/kk/">qurban2021.kz</a>&nbsp;сайты 15 шілдеде іске қосылады. Бұл туралы Қазақстан мұсылмандары діни басқармасы төрағасы, Бас мүфти Наурызбай қажы Тағанұлы мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “Биыл 20 шілде күні республика аумағында таңғы сағат 07.00-де қатаң санитарлық талаптарды сақтап, аймақтарда 10 минуттық Құрбан айт намазы оқылады. Дегенмен “қызыл” аймақта Құрбан айт намазын оқу жергілікті мемлекеттік бас санитар дәрігердің қаулысына сәйкес жүзеге асырылады”, – деді Бас мүфти.
</blockquote>
Соған байланысты Қазақстан мұсылмандары діни басқармасы жамағаттан қауіпсіздік шараларын қатаң сақтауды, айт намазы аяқталған сәтте мешіт ауласында ұзақ болмауды сұрады.
Сонымен қатар qurban2021.kz сайты бүгін сағат 15:00-де іске қосылды. Сайт 22 шілдеге дейін жұмыс істейді. Құрбан шалуға ниет еткен азаматтар осы аралықта тапсырыс бере алады.
“Qurban2021.kz сайты арқылы республика бойынша мұқтаж отбасылар құрбандық етін алу үшін 17 шілдеден бастап өтініш білдіре алады. Мұқтаж отбасылардың өтінішін қабылдау, сараптау және құрбандық етін жеткізіп беру жұмыстарымен ҚМДБ-ның жергілікті өкілдіктері және еріктілер айналысады”, – деді Наурызбай қажы Тағанұлы.
Ал ауылдық жерде жеке тұрғын үйде тұратын адамдарға құрбан шалуға қатысты ҚМДБ тарапынан ешқандай шектеу қойылмаған.
Биыл барша мұсылманның ұлық мерекесі – Құрбан айт 20-22 шілдеге түсіп тұр.
Бас мүфти Наурызбай қажы Тағанұлының айтуынша, 2021 жылы құрбан шалу рәсімі екі жолмен жүзеге асырылады:
<ul>
<li>мемлекеттік санитарлық-эпидемиологиялық қадағалау органдары тарапынан рұқсат берілген жергілікті қасапханаларда санитарлық ережелерді қатаң сақтап, “сары” және “жасыл” аймақтарда онлайн және офлайн форматта өткізу.</li>
<li>еліміздің “қызыл” аймақтарында пандемия жағдайында құрбан шалушыға қолайлы жағдай жасау және көмекке мұқтаж жандарды қолдау мақсатында былтырғы тәжірибені қолданып, құрбан шалу рәсімін шариғаттағы “өкілдік” қағидасына сәйкес qurban2021.kz сайты арқылы тек онлайн режимде жүзеге асыру.</li>
</ul>
Сонымен қатар коронавирустың таралуы бойынша “сары” және “жасыл” аймақтағы құрбандық шалатын арнайы орындарға Ashyq қосымшасы енгізіледі.
Жүйеде “қызыл” және “сары” мәртебесі бар азаматтар құрбандық шалу орындарына жіберілмейді, “көк” және “жасыл” статустағылар ғана кіре алады

Qurban2021.kz сайты іске қосылды

<a href="https://kyzylorda-news.kz/">Kyzylorda-news.kz</a>. Қызылорда облысы аумағында мотоцикл құралдарының қатысуымен жол-көлік оқиғаларының алдын алу және жол қозғалысы ережелерін өрескел бұзушылықтардың жолын кесу, оның ішінде мас жүргізушілерді анықтау мақсатында шілде айының 13-17 күндері аралығында &nbsp;«Мотоцикл» жедел-профилактикалық іс-шарасы өткізілуде. &nbsp;&nbsp;&nbsp;
Іс-шараның 1 күнінде мотокөлік құралдарының жүргізушілері тарапынан жол қозғалысы ережесін бұзудың барлығы 57 дерегі анықталды. Оның ішінде 4 мотокөлік иесі түнгі тыныштықты бұзған. 1 техникалық ақауы бар мотокөлік, 1 заңсыз қайта жабдықталған, 5 міндетті техникалық қарап-тексеруден өтпеген, 11 мотошлем пайдалану жөніндегі талаптарды бұзған, 3 маневр жасау қағидаларын бұзған, 1 авариялық жағдай туғызған, 10 жүргізуші тиісті құжатсыз мотокөлік басқарған. 1 тұрғын мас күйінде мотокөлік басқарған, 13 мотокөлік айып алаңдарына қойылған.

«Мотоцикл»: Қызылордада 13 мотокөлік айып алаңына қойылды

<a href="https://kyzylorda-news.kz/">Kyzylorda-news.kz</a>. Жұмыс істемейтін жүкті әйелдер МӘМС жүйесінде азаматтардың жеңілдікке ие санаты ретінде сақтандырылғандықтан, қымбат диагностикалық зерттеулер мен тегін медициналық көмектің толық пакетін алуға құқылы.
Жүкті әйелдер тегін медициналық көмектің кепілдендірілген көлемі аясында және (немесе) міндетті әлеуметтік медициналық сақтандыру жүйесі бойынша медициналық қызмет алу үшін жүктіліктің он екі аптасына дейін өзі тіркелген емханаға&nbsp; медициналық есепке тұруға міндетті.
Аяғы ауыр әйел жүктілігін сақтағысы келіп, емханаға бірінші рет жүгінген кезде акушер-гинеколог, жалпы тәжірибелік&nbsp;&nbsp;&nbsp; дәрігер (бұдан әрі – ЖТД) немесе алғашқы медициналық-санитарлық көмек орталығының учаскелік терапевті:
1) анамнезді жинайды, жүкті әйелде және туыстарында аурулардың (қант диабеті, артериялық гипертензия, туберкулез, психикалық бұзылулар, онкологиялық аурулар және т. б.) болуын, туа біткен даму кемістіктері және тұқым қуалайтын аурулары бар балалардың тууын анықтайды;
2) бала кезінде және ересек жаста болған ауруларға (соматикалық және гинекологиялық), операцияларға, қан мен оның компоненттерін құюға назар аударады;
3) анамнезді жинау кезінде «Медициналық генетика» мамандығы бойынша дәрігерге жіберу үшін туа біткен және тұқым қуалайтын патология бойынша (ультрадыбыстық скринингсіз және аналық сарысу маркерлерін талдаусыз) мынадай айғақтарға сәйкес «қатер» тобын анықтайды: жүкті әйелдің жасы 37-де және одан асса, анамнезінде генетикалық айғақтар бойынша жүктілікті үзу және/немесе ДПР немесе хромосомалық патологиясы бар баланың тууы, моногенді тұқым қуалайтын ауруға шалдыққан баланың тууы, хромосомалық немесе гендік мутацияның тұқым қуалауы, ауыр акушерлік анамнез (өлі туу, әдеттегі түсік түсіру және басқалар);
4) жүктіліктің бірінші&nbsp; үш айлығында аналық Сарысу маркерлерін талдау үшін жүкті әйелдерді қан алуға жібереді және жүктіліктің бірінші, екінші және үшінші айлықтарында ультрадыбыстық скринингті тағайындайды;
5) ұрпақты болу функциясының ерекшеліктерін зерделейді;
6) жұбайының денсаулық жағдайын, қан тобын және резус тиістілігін нақтылайды;
7) ерлі-зайыптылар жұмыс істейтін өндірістің сипатын, зиянды әдеттерді зерделейді;
8) уақтылы зерттеп-қарау үшін жүкті әйелдерді 12 аптаға дейін ерте есепке қоюды және жүктілік анықталған күні тіркеуді жүзеге асырады;
9) жүктілікті көтеруге қарсы көрсетілімдердің болуын анықтайды;
10) жүкті әйелдер тіркелімінен және ФЖӘ-дан алдыңғы жүктіліктің барысы және бұрын анықталған соматикалық аурулар туралы ақпарат алу мүмкіндігін пайдаланады.
11) анықталған факторларды ескере отырып, жүктілікті жүргізудің алдын ала жоспарын жасайды.
Тексеру нәтижелерін алғаннан кейін:
1) қауіп факторларын ескере отырып, жүкті әйелдің қандай да бір топқа жататындығы айқындалады.
2) тәуекел факторларын ескере отырып және ана мен ұрықты тексерудің қазіргі заманғы технологияларын пайдалана отырып, жүкті әйелді байқаудың жеке жоспары жасалады.
3) ресімделеді:
– жүкті және босанған әйелдің жеке картасы дәрігердің бақылау жазбаларына арналған медициналық құжаттама
– жүкті әйелге алғашқы барған кезде берілетін және бақылау орнына және басқа медициналық ұйымдарға ұсыну үшін жүктілік кезінде оның қолында болатын алмасу картасы.
Жүкті әйелді босанғанға дейін (физиологиялық) бақылау бағдарламасы қалыпты жағдайда 7 рет&nbsp; келуді қамтиды:
Алғаш келген кезде әйел мына&nbsp; зерттеулерге жіберіледі:
<ul>
<li>жалпы қан және зәр талдауы;</li>
<li>дене салмағының индексі 25.0-ден жоғары болған кезде қандағы қант;</li>
<li>қан тобы және Rh факторы;</li>
<li>бак. зәрді талдау;</li>
<li>онкоцитологияға жағынды;</li>
<li>АИТВ-ға ИФТ және гепатит маркерлері;</li>
<li>Вассерман реакциясы;</li>
<li>биохимиялық генетикалық маркерлер.</li>
<li>бірінші УДЗ скринингі.</li>
<li>босануға дайындық мектебіне бару, отбасы өкілімен маманға бару ұсынылады.</li>
</ul>
Екінші рет қаралу, әдетте, жүктіліктің 16-20 аптасында тағайындалады. Акушерлік тексеру, ақуызға зәр анализі және екінші ультрадыбыстық скрининг жүргізіледі.
24-25 апта мерзімі ішінде жүкті әйел зертханалық зерттеулерге жіберіледі (ақуызға зәр анализі, қанның резус-теріс факторы бар антиденелер), алдын-алу шараларын тағайындайды.
30-32 апта мерзімі ішінде &nbsp;акушер-гинеколог жүкті әйел мен ұрықтың жалпы жағдайын бағалайды. Осы уақытта пациент Вассерман реакциясын, ЖИТС-ке ИФТ, ақуызға зәр анализі және жалпы қан анализін тапсырады. Осы кезеңде босанғанға дейінгі демалыс беріледі.
Жүкті әйелдің келесі келуі 36 апта ішінде тағайындалады. Акушер-гинеколог жүкті әйелдің және ұрықтың жалпы жағдайын бағалайды. Босанудың болжамды мерзімі нақтыланады.
Алтыншы кеңес әдетте босанғанға дейін 38-40 аптада жасалады. Акушер-гинеколог, жалпы тәжірибелік дәрігері (бұдан әрі – ЖТД) немесе алғашқы медициналық-санитарлық көмек орталығының учаскелік терапевті де ықтимал асқынулардың профилактикасын жүргізеді және қажет болған жағдайда жүктілікті жүргізу жоспарын түзетеді, артериялық қысымды өлшейді, сыртқы акушерлік тексеруді жүргізеді, жатырдың биіктігін өлшейді, ақуызға зәр анализіне жібереді.
Жүктілікті бақылау кезінде жалпы тәжірибелік дәрігері (бұдан әрі – ЖТД) немесе алғашқы медициналық-санитариялық көмек орталығының учаскелік терапевті және учаскелік акушер жүкті әйелге үйде патронаж жүргізеді.
Жүктіліктің өтуі асқынған жағдайда келушілер саны мен клиникалық-диагностикалық зерттеулерді шектеусіз жүргізудің жеке жоспары жасалады.
Егер пациент скринингтердің кез келгеніне емханаға тағайындалған күннен кейін үш күн ішінде келмеген жағдайда, оны үйде тонометр, термометр және стетоскоп болуы тиіс акушер немесе мейіргер патронажға алады.
МӘМС туралы Заңның 26-бабына сәйкес жұмыс істемейтін жүкті әйелдер де жарналарды төлеуден босатылғанын қосымша хабарлаймыз. Бұл тұлғаларға жеңілдік мәртебесі ҚР ДСМ АЖ есепке қойылғаннан кейін беріледі.
Жүкті әйелдер мен аналардың денсаулық сақтау саласындағы құқықтары мен міндеттері «Халық денсаулығы және денсаулық сақтау жүйесі туралы»&nbsp; ҚР Кодексінің 81-бабымен айқындалады.

Қазақстан және Қызылорда облысының жаңалықтары: Қоғам