<a href="https://kyzylorda-news.kz/">Kyzylorda-news.kz</a> Қызылорда облысы бойынша Мемлекеттік кірістер департаменті салық төлеушілерге 2022 жылдың 1 қаңтарынан бастап бастап жаңа төлем – «цифрлық майнинг үшін төлем» енгізілетінін хабарлайды.
Өзгерістерге сәйкес Салық кодексінің 606-1-606-5-баптары 2022 жылғы 1 қаңтардан бастап қолданысқа енеді.
Цифрлық майнинг үшін төлем төлеушілер цифрлық майнинг (криптовалюта өндіру) жүзеге асыратын заңды және жеке тұлғалар болып табылады.
Төлем объектісі цифрлық майнинг (криптовалюта өндіру) кезінде тұтынылатын электр энергиясының көлемі болып табылады.
Цифрлық майнинг үшін төлемақы ставкасы цифрлық майнингті жүзеге асыру кезінде (криптовалютаны өндіру) тұтынылған электр энергиясы қуатының 1 киловаты үшін 1 теңге мөлшерінде болады.
Цифрлық майнинг үшін төлем есептеу үшін салық кезеңі тоқсан болып табылады, салық есептілігі көзделмеген.
Төлеушілер өз қызметінің нәтижелері туралы Қазақстан Республикасының цифрлық даму, инновациялар және аэроғарыш өнеркәсібі министрлігінің Ақпараттық қауіпсіздік комитеті болып табылатын майнинг мәселелері жөніндегі уәкілетті органға хабарлайтын болады.

Келесі жылдан бастап салық төлеушілер үшін жаңа төлем енгізіледі

<a href="https://kyzylorda-news.kz/">Kyzylorda-news.kz</a>&nbsp; Аэроғарыш саласындағы республикалық мемлекеттік кәсіпорын басшысына қатысты қылмыстық іс қозғалды. Белгілі болғандай кәсіпорын басшысы 600 мың теңге көлемінде пара алған.
Бұл туралы Қызылорда облысының сыбайлас жемқорлыққа қарсы қызметі хабарлады.
<blockquote>
 «Қызылорда облысының сыбайлас жемқорлыққа қарсы қызметі «Байқоңыр» ғарыш айлағы алаңының аумағынан қараметалды кедергісіз әкеткені үшін жалпы сомасы 600 мың теңге пара алу фактісі бойынша аэроғарыш саласындағы республикалық мемлекеттік кәсіпорын басшысына қатысты қылмыстық істі тергеуде», – делінген хабарламада.
</blockquote>
Күдіктіге қатысты сот қамауға алу түріндегі бұлтартпау шарасына санкция берілген.

Қызылордада пара алған кәсіпорын басшысы тергелуде

<a href="https://kyzylorda-news.kz/">Kyzylorda-news.kz</a> Бүгін Жаңақорған ауданының әкімі Руслан Рүстемов өңірдегі мал азығындық егіспен айналысушы шаруа қожалықтың төрағаларын жинап, Арал ауданы малшыларын қолдау мақсатында шөппен қамтамасыз ету шарасына атсалысуға шақырды.
<blockquote>
 «Қазіргі табиғаттың қатал мезгілін, қуаншылықты жеңу тек біз бен сіздің қолдауымыз арқылы ғана мүмкіндік бар. Сондықтан барынша атсалысқанымыз абзал. Бұл бірліктің де белгісі, тірлікті түзеудің де тетігі» – деді аудан әкімі.
</blockquote>
Басқосуға жиналған «Бесарық», «Ислам», «Нұрбол И» шаруа қожалықтары мен «Түгіскен ТШ» ЖШС директорлары аралдықтарға көмегін аямайтынын жеткізді.
<blockquote>
 «Аралдық ағайынның ауыртпалығына ара түсу үшін қамқорлық арқау іс қажет-ақ. Біз бұған бей-жай қарай алмаймыз. Сол себепті «Сұңқар» шаруа қожалығы атынан 1 мың прес шөпті арзан бағада беремін», – деді Құлмағамбет Исаханов.
</blockquote>
Енді көлік мәселесі шешілсе Арал ауданы малшыларына арқау көмек Жаңақорғаннан жөнелтіледі.

Аралға Жаңақорғаннан көмек жіберіледі

<h4 id="kyzylordanewskzhttpskyzylordanewskz25740151"><a href="https://kyzylorda-news.kz/">Kyzylorda-news.kz</a> Биыл 25 шілдеде ауыл әкімдерінің сайлауы өтеді. Қызылорда облысындағы 7 ауданында 40 ауылдық округ әкімінің сайлауына 151 кандидат ұсынылған. Бұған дейін тек жергілікті мәслихат депутаттары сайлап келген ауыл әкімдерін халық тікелей сайлайтын саяси науқандағы дайындық барысын Қызылорда облыстық сайлау комиссиясы төрағасының орынбасары Болат Накиповтан сұрап білдік.</h4>
– Болат Нұржігітұлы елімізде алғаш рет өтіп жатқан ауыл әкімдерінің сайлауының халыққа пайдасы бар ма? Артықшылықтары қандай?
– Ауыл әкімдерін тікелей сайлау ең алдымен халық үшін маңызды екенін атап өткім келеді. Біріншіден, әкімдердің тұрғындар алдындағы жауапкершілігі артады, өйткені оларды жергілікті халық тікелей таңдайтын болады. Екіншіден, тұрғындар өздерінің туған ауылдарының өміріне белсенді қатыса алады.
Жалпы, ауылдық деңгейдегі әкімдердің сайлауын жанама сайлау жүйесінен тікелей сайлау жүйесіне өзгертілуінің басты себебі жергілікті халықтың басқару жүйесіндегі белсенділігін арттыру және еліміздің демократиялық процестерді одан әрі дамыту болып табылады.
– Біздің облыста қалай ұйымдастырылып жатыр?
– Қазір дайындық – ең маңызды сәт. Әкімдердің сайлауын ұйымдастыру және өткізу жөніндегі бекітілген күнтізбелік жоспарға сәйкес 26 маусымда үміткерлерді ұсыну басталып, 9 шілде күні жергілікті уақыт бойынша сағат 18.00-де аяқталды. Ұсынылған кандидаттарды тіркеу 14 шілде күні жергілікті уақыт бойынша сағат 18.00-ге дейін жүргізіліп, әрі қарай тіркелген кандидаттардың үгіт жұмысы 24 шілдеде сағат 00.00-ге дейін жүргізіледі.
Жергілікті атқарушы органдар сайлау өтетін ауылдық округтер бойынша әрбір сайлау учаскесі кесінінде сайлаушылардың тізімін а.ж. 5 шілдеде сайлау учаскелеріне сайлау учаскелеріне табыс етті. 10 шілдеден бастап, яғни бұгінгі күннен бастап әрбір сайлаушы сайлау учаскесіне барып, өзін сайлаушылар тізімінен тексеруіне болады. Аталған 40 ауылдық округте 36 мыңнан астам сайлаушы тіркелген.
Ұсынылған 151 кандидаттың 98-і өзін-өзі ұсынған болса, 53-і саяси партиялармен ұсынылғандар.
Осы ретте айта кету керек, өзін-өзі ұсынған екі кандидаттың өз өтініштеріне сәйкес кандидатуралары алынып тасталды.
– Саяси партиялардың үлесі қанша?
– Саяси партиялардың ішінен жоғары белсенділік танытқан «Nur Otan» партиясы. Бұл партиядан 32 кандидат, «Ауыл» партиясынан – 7 кандидат, &nbsp;«Ақ жол» партиясынан – 5 кандидат, «Адал» партиясынан – 4 кандидат, «ҚХП» – 5 кандидат ұсынылды.
Қазіргі таңға ұсынылған 151 кандидаттың 113-нің мемлекеттік қызмет заңнамасымен қойылған біліктілік талаптарға сәйкестігі анықталған болса, 6 үміткердің біліктілік деңгейі заңнамаға сай келмеді. Қалған кандидаттар анықталуда.&nbsp;
Әзірге біліктілік талаптарға сәйкестігі анықталған 113 кандидаттың 67-і (59,3%) тіркелді, оның 41-і саяси партиялар ұсынған кандидаттар.
Аудандар бойынша бөлетін болсақ: Арал – 34, Қазалыда – 3, Қармақшыда – 3, Жалағашта – 4, Сырдарияда – 3, Шиеліде – 5, Жаңақорғанда – 15 кандидат тіркелді.
– Үміткерлердің жас ерекшеліктеріне тоқталсаңыз.
– Ұсынылған кандидаттардың арасында 8 (5,2%) әйел, ең жас кандидат 25 жаста, ең үлкені 62 жаста. Кандидаттардың орташа жасы 41 жасты құрап отыр.&nbsp;&nbsp;
– Оларға қойылатын талап қандай?
– Қазақстан «Республикасындағы жергілікті мемлекеттік басқару және өзін-өзі басқару туралы» ҚР заңының 36-бабына сәйкес, сайлауға 25 жасқа толған ҚР азаматы кандидат ретінде қатыса алады. Сонымен қатар, ауылдық округ әкімінің лауазымы Е-R-1 санатындағы «Б» корпусының мемлекеттік әкімшілік қызметші лауазымына жатқызылуына байланысты мемлекеттік қызмет саласындағы заңнамамен белгіленген біліктілік талаптарға сәйкес келуі шарт. Ауылдық округтің әкімі болуы үшін аталған кандидатта жоғары немесе жоғары оқу орнынан кейінгі білімі мен жұмыс тәжірибесі бойынша қаралған біліктілік талаптардың 9 нұсқасының ең болмағанда біріне сәйкес келуі тиіс.
– Бір мандатқа қанша үміткерден келеді? Қай ауданда бәсекелестік жоғары?
– Орташа 1 мандатқа бәсекелестік 3,8 кандидаттан келеді. Аудандар бойынша ең жоғары бәсекелестік Арал, Қармақшы, Жаңақорған аудандарында байқалады. Ал, ауылдық округтер бойынша ең жоғары бәсекелестік Шиелі ауданындағы Майлытоғай және Жаңақорған ауданындағы Кейден ауылдық округтерінде, бұл округтерде 1 мандатқа 6 кандидаттан түсіп отыр.
– Сұхбатыңызға рақмет.
<a href="https://baq.kz/">BAQ.KZ</a>

Болат Накипов: Ауыл әкімдерін тікелей сайлау халық үшін маңызды

<a href="https://kyzylorda-news.kz/">Kyzylorda-news.kz</a> Қазақстан мұсылмандары діни басқармасының төрағасы, бас мүфти Наурызбай қажы Тағанұлы Құрбан айт қарсаңында кәсіпкерлерге&nbsp;үндеу жасады.
Қадірлі отандастар! Құрметті кәсіпкерлер!
Мұсылман қауымының ұлық мейрамы – Құрбан айтқа санаулы күндер қалды. Ұлық күнде исі мұсылман баласы шынайы ниетпен құрбан шалып, құрбандық етін мүгедектер мен жетімдерге, көпбалалы отбасылар мен қарттарға таратып, алғысын алуға тырысады. Адамның алғысын алып, батасына бөлену – сауапты істің бірі. Халқымыз «Алғыс алған арымас. Бота алғанша бата ал» дейді емес пе?
Құрбан айтта орындалатын негізгі ізгі амалдың бірі – құрбан шалу. Өйткені ардақты Пайғамбарымыз Мұхаммед (оған Алланың салауаты мен сәлемі болсын):&nbsp;«Адам баласы құрбан айт күні құрбан шалудан өзге амалымен Аллаға жақындаған емес…»&nbsp;дейді. Демек Құрбан айт күні Аллаға ұнамды әрі ең сүйікті амал – құрбан шалу.&nbsp;&nbsp; &nbsp;
Айт күндері халық тарапынан мал сатып алуға деген сұраныстың арта түсетіні белгілі. Осы ретте еліміздегі барша шаруа қожалықтарының қожайындарын ұлық мейрам – Құрбан айттың құрметіне мал құнын шарықтатпай, халыққа оңтайлы бағаны ұсынуға шақырамын. Сонымен қатар, барша кәсіпкерлерді тұрғындар күнде тұтынатын әлеуметтік маңызы бар азық-түлік бағасына мүмкіндігінше жеңілдік жасауға үндеймін.
Құрбан айттың негізгі мәні мұсылмандар арасында өзара мейірімділік, жомарттық, қайырымдылық, қанағат сынды адамгершілік құндылықтарды қалыптастыру. Алланың рақым нұры төгілетін құрбан айтта жұртымызға жақсылық жасап, көпшіліктің ризашылығына бөленейік.
Жаратушы Иеміз Құранда:&nbsp;«Өздерің жақсы көрген нәрсені Алла жолына жұмсамайынша игілікке жетпейсіңдер»&nbsp;(«Әл-Имран» сүресі, 92-аят) деп баяндаған. Сауаптар еселеніп жазылатын сәттерде Алла разылығы үшін елдің жағдайын ескеріп, тауар бағаларына жеңілдік жасап, әр отбасыға қуаныш пен мерекелік көңіл күй сыйлауға тырысайық.
Ардақты ағайын!
Сүйікті Пайғамбарымыз Мұхаммед (оған Алланың салауаты мен сәлемі болсын):&nbsp;«…Кімде-кім мұсылман бауырының қажетіне жараса, Алла Тағала да оның қажетін өтейді…»&nbsp;деген сүйінші хабар жеткізген. Қазақстан мұсылмандары діни басқармасы қуаңшылықтан зардап шеккен өңірлердегі шаруаларға қолдау көрсету мақсатында «Қиындықта ел бірге» атты қайырымдылық акциясын бастады. Акция аясында Қызылорда, Маңғыстау облыстарына жем-шөп жөнелтілетін болады. Осы игі іске үлес қосып, сынақты сәттерді бастан кешіп отырған отандастарымызға қол үшын созуға шақырамын.&nbsp;
Хақ Тағала кәсіптеріңізге береке, игі істеріңізге мол сауаптан жазғай! Әмин!

Бас мүфти Құрбан айт қарсаңында үндеу жасады

<a href="https://kyzylorda-news.kz/">Kyzylorda-news.kz</a> Қызылорда облысы әкімінің баспасөз хатшысы қызметіне Тағыберген Абай Тағыбергенұлы тағайындалды.
Тағыберген Абай 1994 жылы Қызылорда облысы, Қазалы ауданында туған. Білімі жоғары. Журналистика мамандығы бойынша бітірген.
Еңбек жолын республикалық «Әлімсақ», «Ұстаз мәртебесі» басылымдарында журналист, жауапты хатшы қызметтерін атқарған. Қызылорда қалалық «Қоғам» телеарнасында авторлық бағдарлама редакторы.
«Өңірлік коммуникациялар» қызметінің SMM маманы, «Нақты ақпарат» интернет порталының бас редакторы. «Bugin.kz» порталының меншікті тілшісі. Осы кезге дейін Қызылорда облыстық білім басқармасының баспасөз хатшысы, Қызылорда облысы әкімі баспасөз қызметінің маманы қызметтерін атқарған.
ҚР Журналистер Одағының мүшесі. «Сыр үміті», «Самғау» сыйлығының иегері.

Қызылорда облысы әкімінің баспасөз хатшысы тағайындалды

<a href="https://kyzylorda-news.kz/">Kyzylorda-news.kz</a>. Премьер-министр орынбасары Ералы Тоғжановтың төрағалығымен ел аумағында коронавирус инфекциясының таралуына жол бермеу жөніндегі ведомствоаралық комиссияның отырысы өтті.
Президент Қасым-Жомарт Тоқаев үкіметтің кеңейтілген мәжілісінде коронавирус инфекциясына қарсы күрес бойынша шешімдер қабылдауды тапсырған болатын. Комиссия отырысында тапсырманы орындау барысы талқыланды.&nbsp;
Елдегі эпидемиологиялық жағдайдың ушығуына байланысты “қызыл” аймақтағы өңірлерде карантиндік шектеулерді күшейту туралы шешім қабылданды, деп хабарлады&nbsp;<a href="https://primeminister.kz/kz/news/vak-koronavirus-infekciyasynyn-taraluyna-zhol-bermeu-zhonindegi-sharalar-toptamasyn-kabyldady-1261221">Primeminister.kz</a>.
“Ashyq” жобасына қатысатын нысандарды қоспағанда, қалааралық, облысішілік, қалалық тұрақты және тұрақты емес (туристік) автобус және шағын автобус тасымалдары, жабық жағажайлар мен аквапарктардың қызметі&nbsp;тоқтатылады.
<h3 id="">Демалыс және мереке күндері жұмысына тыйым салынады</h3>
<ul>
<li>қоғамдық көліктің;</li>
<li>“Ashyq” жобасына қатысушыларын қоспағанда, қоғамдық тамақтану нысандарының;</li>
<li>“Ashyq” жобасына қатысатындарын қоспағанда, фитнес орталықтардың, фитнес клубтардың, йога орталықтарының, спорттық-сауықтыру орындары, сауналардың, СПА-орталықтардың, бассейндердің;</li>
<li>“Ashyq” жобасына қатысатындарын қоспағанда, кинотеатрлардың, театрлардың, концерт залдарының, филармониялардың, компьютерлік клубтардың, боулингтердің, бильярдтардың, караокелердің, көрмелердің;</li>
<li>“Ashyq” жобасына қатысушыларды, ашық базарларды, жәрмеңкелерді қоспағанда, ауданы 2000 м2 дейінгі азық-түлік емес тауарларды өткізу объектілерінің;</li>
<li>“Ashyq” жобасына қатысатындарын қоспағанда, спорт объектілерінің (спорт кешендері, спорт мектептері, спорт клубтары, жаттығу залдары);</li>
<li>білім беру орталықтарының, балалар мен ересектерге арналған үйірмелердің, балаларды дамыту орталықтарының;</li>
<li>“Ashyq”&nbsp; жобасына қатысатындарын қоспағанда, фудкорттардың жұмысына.</li>
</ul>
<h3 id="nbsp">&nbsp;Жұмыс күндері қызметі шектеледі</h3>
<ul>
<li>“Ashyq” жобасына қатысатын фитнес-орталықтардың, фитнес-клубтардың, йога-орталықтардың, спорттық-сауықтыру объектілерінің, сауналардың, СПА-орталықтардың, спорт объектілерінің, бассейндердің жұмысы сағат&nbsp;20.00-ге&nbsp;дейін ;</li>
<li>“Ashyq” жобасына қатысуына қарамастан, сауда ойын-сауық орталығы, сауда үйлерінің, сауда желілерінің сағат&nbsp;18.00-ге&nbsp;дейін; “Ashyq”&nbsp; жүйесіне қатысатын қоғамдық тамақтану нысандарының, фудкорттардың жұмысы – сағат&nbsp;20.00-ге&nbsp;дейін, “Ashyq” жүйесіне қатыспайтындардың жұмысы – сағат&nbsp;18.00-ге&nbsp;дейін.</li>
</ul>
Отырыс соңында вице-премьер мемлекеттік органдар мен өңір әкімдеріне түсіндіру жұмыстарын күшейтуді, сондай-ақ халықты коронавирусқа қарсы вакциналаумен қамтуды арттыруды тапсырды.

Қазақстанда карантин күшейтіледі

<a href="https://kyzylorda-news.kz/">Kyzylorda-news.kz</a>. Бүгінде мемлекет тарапынан қар­жылай қолдау көріп, шаруа­сын дөңгелетіп отырған жас кә­сіп­керлер қатары артып келеді. Міне, осындай жас кәсіпкерлердің қа­тарында Қызылорда облысы бойынша ҚАЖ департаментінің пробация қызметінің &nbsp;есебінде тұратын азаматтар да бар.
&nbsp;Пробация қызметіне басшылық жасау тобының бас маманы әділет майоры Ө.Сейдахметовтің айтуынша 2021 жылдың 6 айында пробация есебіндегі 10 қызылордалық жеке кәсібін ашқан. Олар жеке кәсіп ашу үшін өтініш білдірген. Пробация инспекторлары одан әрі олармен жұмыс жасап, қажетті құжаттарды тиісті органға өткізген. Соның нәтижесінде, бүгінде 10 сотталған&nbsp; «Атамекен» ұлттық кәсіпкерлер палатасының «Бастау Бизнес» жобасы бойынша бір айлық «кәсіпкерлік негіздері» курсын аяқтап, сертификат алып, жаңадан бастаған кәсіпті қолдау мақсатындағы Нәтижелі жұмыспен қам­туды және жаппай кәсіпкерлікті да­мы­ту­дың 2017-2021 жылдарға ар­налған мемлекеттік бағдарламасы аясында 583 400 теңге қайтарымсыз грант ұтып алды.
<blockquote>
 «Қазіргі таңда тағы жеке кәсіп ашуға бет бұрған 14есептегі азамат «кәсіпкерлік негіздері» бір айлық курсын оқып жатыр. Бітірген азаматтарға курсты аяқтағаны туралы сертификат табысталады. Одан соң ол азаматтар өз бизнес-жоспарларын комиссияға ұсынып, қолдаған жағдайда мемлекеттен грант алуға мүмкіндігі бар», – дейді Ө.Сейдахметов. &nbsp;
</blockquote>
Он кәсіпкер де &nbsp;жеке кәсібін ашты. Екеуі тауық өсірумен айналысып жатса, қал­ған алтауы мал басын көбейтіп отыр,есептегі әйел азаматша ағылшын тілін үйрету орталығын ашса, енді бірі баспахана ашып, жеке кәсібін дөңгелетіп отыр.
<blockquote>
 «Дана жұртымызда «Мал баққанға бітеді» деген аталы сөз бар. Кәсіп қыламын, мал бағамын деуші жандарға мемлекет тарапынан да үлкен қолдау көрсетілуде. Елімізде мұндай мүмкіндіктердің барына дән ризамыз. Мал басын көбейтіп жатырмын. Ерінбей еңбек еткен жанға Алла несібесін молынан береді, – дейді есептегі азамат.
</blockquote>

Есепте тұрған 10 қызылордалық  жеке кәсібін ашты

<a href="https://kyzylorda-news.kz/">Kyzylorda-news.kz</a>. ҚР Парламенті депутаттары облыс тұрғындарымен кездесіп, ауыл аралап, елмен жүздесуде. Ауыл кәсіпкерлерімен де кездесу ұйымдастырылуда. Бұл туралы бүгін Өңірлік коммуникациялар қызметінде өткен баспасөз конференциясында ҚР Парламенті Мәжілісінің депутаты, «Ақ жол» ҚДП фракциясының мүшесі Берік Дүйсембинов мәлімдеді.
«Алдымен Арал ауданында болып, алыс ауылдарды араладық. Қызылорда өңіріндегі табиғат қолайсыздығына байланысты орын алып жатқан су тапшылығы, мал азығының азаюы бүгінде өзекті мәселе болып отыр. Бұл орайда жергілікті билік қол қусырып отырмағанын көрдік. Қолдарында нақты жоспар бар екенін білдік. Алдағы уақытта мал азығын жеткізу, субсидияны тездетіп бергізу, малдың қырылып қалмауын болдырмауды қолға алу керек. Су тоғанандарына барып, салынып жатқан бөгеттерді көзбен көрдік. Қолдарына шалғы ұстаған жастардың бастамасына қуандық. Қарапайым халықпен жүздестік. Ауыл кәсіпкерлерімен де жолығып, мәселелерін тыңдадық. Енді елдің аманатын арқалап барамыз», – деді ҚР Парламенті Мәжілісінің депутаты, «Ақ жол» ҚДП фракциясының мүшесі Берік Дүйсембинов.
Айта кету керек, 25 шілдеде өтетін ауыл әкімдері сайлауына «Ақжол» партиясы атынан 4 кандидат тіркеуден өтті.

Әкім сайлауына «Ақжол» партиясы атынан 4 кандидат тіркеуден өтті

<a href="https://kyzylorda-news.kz/">Kyzylorda-news.kz</a>. Бүгін ҚР Парламенті Мәжілісінің депутаттары Б.Смағұл мен Ғ.Әмреев Сырдария ауданында болып, аудан әкімдігінде облыстық және аудандық мәслихат депутаттарымен, жергілікті кәсіпкерлермен кездесті.
Халық қалаулысы Б.Смағұл өңірлерді аралап, тұрғындармен кездесіп, ұсыныс-пікір жинақтап жүргендерін айтты. Парламент қабырғасында талқыланған және қабылданған заң жобалары жөнінде қысқаша ақпарат берді. Өз кезегінде Мәжіліс депутаты Ғ.Әмреев кәсіпкерлік саласын дамыту, баға өсімінің алдын алу мен болдырмау бағытында пікір білдірді. Депутат азық-түлік өнімдерін сақтау қоймаларының жұмысын ретке келтіру, кәсіпкерлерге берілетін несиелерді жеңілдету, кәсібін жаңадан бастағандар үшін әкімшілік кедергілерді болдырмау жөнінде нақты мысалдар келтірді. Сондай-ақ жиналысқа қатысушылар тарапынан қойылған сұрақтарға жауап берді.
Жиналысқа қатысушылар ауданның ерекшелігіне сәйкес депутаттар назарына бірқатар ұсыныстар енгізді. Мысалы аудандық мәслихат депутаттары және кәсіпкерлері халық көп тұтынатын заттардың бағасы соңғы екі айда күрт қымбаттағанын, несие ұйымдарының талаптарын, ауданның Айдарлы, Аманкелді, Жетікөл ауылдарында дәрігер жоқ екенін, кәсіпкерлікті дамыту мәселелері мен жем-шөпке берілетін субсидия мерзімі жайлы өз ұсыныстарын айтты. Айтылған пікірлер мен сұрақтарға депутаттар толыққанды жауап берді. 
Осылайша, Халық қалаулылары қатысушылар тарапынан айтылған ұсыныс-пікірлерді жинақтап, Мәжіліс қабырғасында көтеретіндерін жеткізді.
Кездесуден кейін Мәжіліс депутаттары әлеуметтік және кәсіпкерлік нысандарды аралады. Ең алдымен «Углесбыт» ЖШС-нің күріш ақтау зауытының жұмысымен танысты. Сондай-ақ тойхана ғимаратын қазіргі уақыттың талабына сәйкес «Бақнұр» бөбек балабақшасы ретінде қайта бағытталып, толық жабдықталған нысанға барды. Халық қалаулылары сапар барысында Тереңөзек кентінен салынып жатқан 10 отбасыға арналған 10 тұрғын үй құрылысымен танысып, құрылысшылармен пікірлесті. Депутаттар сонымен бірге «Аңсар» дәріханасын аралап, дәрілердің бағасын бағамдады.
Әр нысанда тұрғындармен еркін форматта пікірлесіп, сұрақтарына жауап берді.
<img src="https://kyzylorda-news.kz/wp-content/uploads/2021/07/217528331_937008610195365_8891495323019045421_n.jpg" alt="" />
<img src="https://kyzylorda-news.kz/wp-content/uploads/2021/07/217540714_937008526862040_5654587316676390344_n.jpg" alt="" />
<img src="https://kyzylorda-news.kz/wp-content/uploads/2021/07/217558817_937008590195367_8835552676655487481_n.jpg" alt="" />

Мәжілісмендер сырдариялықтармен кездесті

<a href="https://kyzylorda-news.kz/">Kyzylorda-news.kz</a>.&nbsp;&nbsp;Елімізде құрылыс материалдары бағасының 15%-ға арзандауы күтілуде. Бұл туралы ҚР Индустрия және инфрақұрылымдық даму бірінші вице-министрі Қайырбек Өскенбаев айтты, деп хабарлайды ҚазАқпарат.
<blockquote>
 «Құрылыс материалдары бағасының негізсіз өсуін төмендету мақсатында «Маркетплейс» атты арнайы ақпараттық алаң құру көзделіп отыр. Яғни, отандық құрылыс материалдарын онлайн сату алаңы. Мемлекеттің қолдауымен құрылыс материалдарын сатуға арналған онлайн сауда алаңы белгіленген бағаны ұстап тұруға мүмкіндік береді. Бұл өз кезегінде бағаның 15 пайызға арзандауына және құрылыс материалдары нарығының ашықтығын қамтамасыз етеді», – деді Қ. Өскенбаев ОКҚ-де өткен баспасөз мәслихатында.
</blockquote>
Вице-министрдің мәлімдеуінше, өткен жылы «Нұрлы жер» мемлекеттік бағдарламасы аясында құрылыс материалдарын өндірушілер мен құрылыс компанияларына арналған www.stroimaterial.kz сайты іске қосылды.
<blockquote>
 «Аталған сайт «Нұрлы жер» мемлекеттік бағдарламасы аясында жүзеге асырылған бірінші жоба, ал енді қолға алынған «Маркетплейс» соның жалғасы, екінші кезең деуге болады. Бұл онлайн сауда алаңында өндірушілер өз өнімдерін ұсына алады. Онда барлық процесс онлайн түрде жүргізіледі, яғни келісімшарттар ЭЦҚ (электронды цифрлық қолтаңба) көмегімен жасалады. Сондай-ақ, логистикалық компаниялардың тауарды жеткізуін бақылайтын арнайы функция іске қосылатын болады», – дейді ол.
</blockquote>

Президент тапсырмасы: Құрылыс материалдары 15%-ға арзандайды

<a href="https://kyzylorda-news.kz/">Kyzylorda-news.kz</a>. Қызылорда облысы кәсіпкерлер палатасының алаңында мемлекеттік орган өкілдері кәсіпкерлерге онлайн түсіндірме жұмыстарын жүргізді.
Кездесуге Қызылорда қалалық санитариялық-эпидемиологиялық бақылау басқармасының және облыстық ішкі саясат басқармасының жауапты қызметкерлері, бірқатар кәсіпкерлер қатысып, қоғамдық тамақтану объектілеріне қойылатын санитариялық-эпидемиологиялық талаптар мен тіл туралы заңнаманың кәсіпкерлік саласында қолданылуы талқыланды.
Қызылорда қалалық санитариялық-эпидемиологиялық бақылау басқармасының маманы Жанар Әбдірахман жаз мезгілінде қоғамдық тамақтану саласында тиісті нормалардың сақталмауы салдарынан өзге өңірлерде тұтынушылардың тамақтан улану жағдайлары кездесіп жатқанын, сол үшін мекеме тарапынан кеңінен түсіндірме жүргізіліп жатқандығын жеткізді.
Ол үшін қоғамдық тамақтану саласында қызмет көрсететін кәсіпкерлер Денсаулық сақтау министрінің 2018 жылғы 23 сәуірдегі № 186 «Қоғамдық тамақтану объектілеріне қойылатын санитариялық-эпидемиологиялық талаптар» санитариялық қағидаларын басшылыққа алып жұмыс жасауы қажет екен.
Шараға қатысқан жуырда ғана Қызылорда облысында құрылған қоғамдық тамақтану және қызмет саласы Қауымдастығының басшылары Әбдіразақов Ақмарал мен Мәдина Сәрсенбай саладағы проблемаларды да айтып өтті.
&nbsp;Атап айтқанда, кәсіпкерлерді бүгінде электр жарығының жиі сөндірілуі, беріліп отырған ауыз судың сапасы алаңдатуда. Кәсіпкерлер кездесуде бұл жайттардың қызмет сапасына айтарлықтай зиянын тигізетіндігін айта келе, өз тиісті нормативтік құжаттарға өзгеріс енгізу үшін ұсыныстарын жеткізді.
Кездесуге келген келесі спикер – облыстық ішкі саясат басқармасының бөлім басшысы Ләззат Есімова кәсіпкерлік нысандардағы көрнекі ақпараттарда «Тіл туралы» Заң талаптарының сақталу барысына тоқталды. Кей нысандардың норманы сақтамай, бір тілде ғана беру немесе кей ақпараттардың өзге тілде ұсынылу жағдайлары жиілегендігіне тоқталды. Тілдің дұрыс қолданылу жолдарын нормативтік талаптар, сондай-ақ оның қолданылу барысын мысалға келтіре отырып, түсіндіріп өтті.
Шарада кәсіпкерлер аталмыш заң талаптарына өзгерістер енгізуге қатысты ұсыныстарын берді, сондай-ақ мемлекеттік орган өкілінен қоғамдық тамақтану нысандарында ұсынылатын ас мәзірін қазақ тілінде сапалы аударуға көмек сұрады.
Өз кезегінде облыстық ішкі саясат басқармасының бөлім басшысы Ләззат Есімова ұсынысқа оң бағасын беріп, бірге жұмыс жасауға әзір екендігін жеткізіп, қоғамдық тамақтану және қызмет саласы Қауымдастығының мүшелерімен бірге жұмыс жасайтын болып келісті. Кәсіпкерлік саласына қатысты сұрақтар туындаған жағдайда Қызылорда облысының кәсіпкерлер палатасына хабарласа аласыздар. Мекен-жайы: Қызылорда қаласы, Қорқыт ата 123, «Бизнеске арналған Үкімет» ғимараты. Тел.: 8 /7242/ 40-09-81.
<img src="https://kyzylorda-news.kz/wp-content/uploads/2021/07/img_2333-1-scaled.jpg" alt="" />

Қазақстан және Қызылорда облысының жаңалықтары: Қоғам