<a href="https://kyzylorda-news.kz/">Kyzylorda-news.kz</a>. Қазақстан Президенті Қасым-Жомарт Тоқаев полиция қызметкерлерін кәсіби мерекесімен құттықтады.
<blockquote>
 «Полиция қызметкерлерін кәсіби мерекесімен құттықтаймын! Қоғамымыз сіздерге жауапты міндет – заңдылық пен құқықтық тәртіпті қамтамасыз етуді жүктеп отыр. Ішкі істер органдарының әрбір қызметкері әділ, ашық және адал болуы керек. Қиын да қатерлі қызметтеріңізге табыс тілеймін!», деп жазды Мемлекет басшысы&nbsp;<a href="https://twitter.com/TokayevKZ?ref_src=twsrc%5Egoogle%7Ctwcamp%5Eserp%7Ctwgr%5Eauthor">Twitter</a>&nbsp;парақшасында.
</blockquote>

Мемлекет басшысы полиция қызметкерлерін кәсіби мерекесімен құттықтады

<a href="https://kyzylorda-news.kz/">Kyzylorda-news.kz</a>. Бүгін А.Тоқмағамбетов атындағы мәдениет үйінде 23 маусым – Мемлекеттік қызметші кәсіби мерекесіне орай салтанатты шара өтіп, бірқатар мемлекеттік қызметшілер марапатталды.
Шарада облыс әкімі аппаратының басшысы Ерлан Райғаниев, мемлекеттік қызметшілерді кәсіби мерекесімен құттықтап, екі азаматқа «Үздік мемлекеттік қызметкер» төс белгісін және бес мемлекеттік қызметшіге облыс әкімінің Алғыс хатын табыстады.
<blockquote>
 «Бүгінгі күні облысымызда 3 мыңнан астам мемлекеттік қызметші бар. Мемлекетіміздің тыныштығы мен халқымыздың бейбіт өмірі бәрінен қымбат. Билікке деген сенім қазіргі қоғамның талаптарына сай қызмет ететін мемлекеттік қызметшіден басталады. Аймағымыздың барлық мемлекеттік қызметшілеріне жұмыстарына жеміс, мақсатқа жетуде жігер, шешімдер қабылдауда парасаттылық, кәсіби еңбекте табыс тілеймін. Мерекелеріңіз құтты болсын», – деді Ерлан Райғаниев.
</blockquote>
Сондай-ақ, салтанатты шарада ҚР Мемлекеттік қызмет істері агенттігінің Қызылорда облысы бойынша департаменті басшысы Рафхат Бисенов үш азаматқа алғаш рет Мемлекеттік қызметтің дамуына қосқан үлесі үшін төс белігісін және әр саладағы алты мемлекеттік қызметшіге ҚР Мемлекеттік қызмет істері агенттігі төрағасының Грамотасы мен Алғыс хатын табыстады.
Сонымен қатар шарада екі мемлекеттік қызметші «Қызмет» Мемлекеттік, банк мекемелері және қоғамдық қызмет көрсету қызметкерлерінің салалық кәсіподағы төрағасының Алғыс хатымен марапатталды. Алғыс хатты «Қызмет» Мемлекеттік, банк мекемелері және қоғамдық қызмет көрсету қызметкерлерінің салалық кәсіподағы» ҚБ Қызылорда облыстық филиалының төрайымы Сауле Тұрсынбаева табыстады.
<img src="https://kyzylorda-news.kz/wp-content/uploads/2021/06/202760234_3472170732885971_7410322098217863864_n.jpg" alt="" />
<img src="https://kyzylorda-news.kz/wp-content/uploads/2021/06/205263107_3472168882886156_6335474880340824203_n.jpg" alt="" />
<img src="https://kyzylorda-news.kz/wp-content/uploads/2021/06/202443369_3472169229552788_1754948109807485958_n.jpg" alt="" />
<img src="https://kyzylorda-news.kz/wp-content/uploads/2021/06/202731677_3472169522886092_150549501489099714_n.jpg" alt="" />
<img src="https://kyzylorda-news.kz/wp-content/uploads/2021/06/205220677_3472169882886056_8438018785176928127_n.jpg" alt="" />

Қызылордада мемлекеттік қызметшілер марапатталды

<a href="https://kyzylorda-news.kz/">Kyzylorda-news.kz</a>. Былтыр Байқоңыр қалалық сотының үкімімен 3 &nbsp;жыл мерзімге бас бостандығын шектеу жазасына сотталған қала тұрғыны жаза өтеу тәртібін бірнеше рет бұзғаны үшін қалалық сотқа бас бостандығынан айыру жазасына ауыстыру туралы ұсыныс жолданған.
Сотталған байқоңырлық жыл басынан бері бірнеше рет қоғамдық тәртіп пен құқық бұзғаны үшін әкімшілік жауапкершілікке тартылған. Соған қарамастан қасақана тәртіп бұзып, құқық қорғау қызметкерлеріне бағынбаған.
<blockquote>
 «Қазақстан Республикасы ҚАК-нің талаптары бойынша бас бостандығын шектеу түріндегі жазаға сотталған адамның бір жыл ішінде екі және одан да көп рет қоғамдық тәртіп пен имандылыққа қол сұғатын әкімшілік құқық бұзушылықтар жасағаны үшін әкімшілік жауапкершіліктерге тартылуы – жаза өтеу тәртібін қаскөйлікпен бұзушылық болып табылады. Пробация қызметкерлері&nbsp; аталған сотталғанға қатысты ұсынымды Байқоңыр қалалық сотына жолдады», – дейді Байқоңыр қалалық пробация қызметінің бастығы әділет капитаны&nbsp;А. Танбаев.
</blockquote>

Тәртіп бұзған есептегі байқоңырлық тұрғын абақтыға қамалады

<a href="https://kyzylorda-news.kz/">Kyzylorda-news.kz</a>. Қазгидромет 24-26 маусымға арналған ауа райы болжамын жариялады.
Атмосфералық фронталды бөліктердің әсерінен еліміздің басым бөлігінде найзағай ойнап, бұршақ жауады, 24 мамырда Павлодар облысында, 24-25 мамырда Шығыс Қазақстан облысында, 25 мамырда Алматы облысында нөсер жаңбыр жауады. Тек еліміздің батысында жауын-шашынсыз ыстық ауа райы сақталады.
Республика бойынша желдің күшейіп, оңтүстік өңірлерде шаңды дауыл тұруы мүмкін. Күндіз солтүстікте 17-28 жылыға дейін, орталықта 20-35 жылыға дейін, солтүстік-батыста 25-40 жылыға дейін ауа температурасының біртіндеп көтерілуі күтіледі.

Алдағы күндері ауа райы қандай болады?

Гүлшара Әбдіқалықованың қатысуымен интернет-конференция өтеді

<a href="https://kyzylorda-news.kz/">Kyzylorda-news.kz</a>. 23 маусым – Қазақстан полициясы күні. Осы кәсіби мерекеге орай Қызылорда облысының әкімі Гүлшара Әбдіқалықова Сыр өңірінің тәртіп сақшыларын кәсіби мерекемен құттықтады.
Құрметті полиция органдарының ардагерлері, тәртіп сақшылары! Сіздерді кәсіби мерекелеріңіз –23 маусым – Қазақстан полициясы күнімен шын жүректен құттықтаймын!
Бұл күн Елбасымыз Нұрсұлтан Әбішұлы Нaзарбаевтың Жарлығымен 2007 жылы ресми түрде бекітiлді. Мемлекетіміздің тыныштығы мен халқымыздың бейбіт өмірі бәрінен қымбат. Сондықтан, мемлекеттік биліктің қоғамда құқық тәртібін, азаматтардың қауіпсіздігін қамтамасыз ететін маңызды құрылым – Ішкі істер органдарының алар орны ерекше болмақ. Сіздер тәуелсіздігіміздің 30 жылы ішінде ел іргесінің сөгілмей, бүтіндігіміздің сақталуына барынша тынымсыз қызмет етіп келесіздер.
Қазіргі таңда Мемлекет басшысы Қасым-Жомарт Кемелұлы Тоқаевтың тапсырмасымен «Халық үніне құлақ асатын мемлекет» тұжырымдамасы аясында жергілікті полиция қызметі «Полиция қадамдық қолжетімділікте» қағидаты бойынша реформалануда. Құқық бұзушылықтың алдын алу саласындағы негізгі буын болып табылатын учаскелік полиция инспекторларының мәртебесін арттыру бойынша заңнамалық сипаттағы шаралардың әзірленуі үлкен жауаптылықты талап етеді.
Осы ретте, тәуелсіздігіміздің тұғырының нық, іргетасының берік болуына, елде қоғамдық келісім мен бірліктің, тыныштықтың нығаюына күресіп жүрген Сіздерге облыс әкімдігі тарапынан қажетті көңіл бөлініп, тиісінше көмек көрсетілуде. Соңғы жылдары ішкі істер органдарының материалдық-техникалық базасы нығайып, заманауи құрал-жабдықтармен қамтамасыз етіліп келеді. Полиция қызметкері болу, әрине, күрделі де жауапты жұмыс. Бұндай маңызды жұмысты алға апаруда сіздерден білім мен білік, жігерлі жүрек пен қажырлы күш-қайрат, сабырлық талап етіледі. Өйткені, халық сенімін ақтау – полиция қызметіне берілетін жоғары баға!
Пандемия індетімен күрес кезінде өзіне төнген қауіп-қатерге қарамастан, аянбай еңбек еткен ішкі істер органдарының барша қызметкеріне Сыр жұртшылығы атынан ризашылығымызды білдіреміз! Қызметтік міндетін адал атқарып, қоғамдық тәртіпті қамтамасыз етуге, құқық бұзушылықтың алдын алып, мемлекет тыныштығының сақталуына тынбай үлес қосып жүрген ел қорғандарының қатары көбейе берсін! Дендеріңізге саулық, қызметтеріңізге абырой, отбастарыңызға амандық тілеймін. Ел бірлігіне сызат түспесін! Тәуелсіз еліміз тыныш, халқымыз аман болсын!

Гүлшара Әбдіқалықова: Халық сенімін ақтау – полиция қызметіне берілетін жоғары баға

<a href="https://kyzylorda-news.kz/">Kyzylorda-news.kz</a>. «MEGA Silk Way» СОО «Астана Моторс» ҚМК және Нұр-Сұлтан әкімдігі бірлесіп «Вакцина ал — машина ұтып ал» акциясын бастайды. 23 маусым мен 31 тамыз аралығында «MEGA Silk Way» СОО-да COVID-19 вакцинасының бірінші компонентін алатын қазақстандықтар «Астана Моторс» компаниясынан Hyundai Accent автокөлігін ұтып ала алады. Акцияның бас серіктесі — «Астана Моторс» ҚМК.
Финалдық ұтыс ойынын 5 қыркүйек күні «MEGA Silk Way» СОО Instagram арқылы тікелей эфирде өткізеді. Сонымен қатар, апта сайын 23 маусымнан 31 тамызға дейін аралық сыйлықтар ойнатылады — тұрмыстық техника, түрлі сертификаттар және тағы басқалар.
«Астана Моторс» автокөлігінің ұтыс ойынына 18 жастан асқан және 23 маусым мен 31 тамыз аралығында COVID-19 вакцинасының бірінші компонентін алған қазақстандықтар қатыса алады.
Бұл акцияның мақсаты — Қазақстанда вакцинация қарқынын ынталандыру. Вакцина — COVID-19-дан қорғанудың жалғыз, тиімді жолы. Мұндай акциялар түрлі елдерде сәтті өтіп жатыр. Жақында Польша, Таиланд, АҚШ, Ресей, Моңғолия, Сербия, Индонезия, Қытай, Венгрия, Израиль және т.б. үкіметтері вакцинацияланғандар арасында автокөлік ұтыс ойынын өткізуді қолға алған болатын.
«Вакцина ал — машина ұтып ал» акциясы туралы толық ақпаратты mega.kz сайтынан және MEGA-ның әлеуметтік желілердегі ресми аккаунттарынан алуға болады.
Бұдан басқа, “Азия Парк”, “Mega Silk Way”, “Сарыарқа”, “Абу-Даби Плаза”, “Керуен”, “Еуразия” СОО-да тұрмыстық және компьютерлік техника түріндегі бағалы сыйлықтар ойнатылады, сол сияқты жеңілдік купондары беріледі. Сондай-ақ, бұл акцияға “Мечта” электроника және тұрмыстық техника дүкендерінің сауда желісі қосылатын болады.

Вакцина салдырғандар арасында автокөлік ұтысы өтеді

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова қызылордалық мемлекеттік қызметшілерді бүгінгі кәсіби мерекемен құттықтады.
Құрметті мемлекеттік қызметшілер! Сіздерді кәсіби мерекелеріңіз – Мемлекеттік қызметші күнімен шын жүректен құттықтаймын!
Мемлекет пен қоғамға қызмет ету – әрбір азамат үшін абыройлы іс. Қоғамымыздың гүлденуі мен экономикамыздың дамуы жолында мемлекеттік қызметтің қосар үлесі ерекше. Осы орайда, Елбасымыз Нұрсұлтан Әбішұлы Назарбаев 2013 жылы 20 желтоқсанда23 маусымды Мемлекеттік қызметші күні ретінде белгілеу туралы қабылдаған шешімі – мемлекеттік қызметшілердің тынымсыз еңбегінің жемісі.
Бүгінгі таңда облыстағы мемлекеттік қызметкерлердің нақты саны – 3471.Саяси мемлекеттік қызметші саны –14 болса, 1-уі «А» корпусының мемлекеттік әкімшілік қызметшісі. 1588-і – әйелдер. Аймақта 496 мемлекеттік қызметші 29 жасқа дейінгі жастар.
Мемлекеттік қызметшілер жан-жақты, елдің мүддесін бірінші орынға қоятын, тез әрі дұрыс шешім қабылдай алуы керек. Себебі, қоғамдық-саяси, әлеуметтік-экономикалық ахуалдың тұрақтылығы тікелей мемлекеттік қызметке байланысты. Бұл күнді арнайы атап өту арқылы қоғамымыздағы мемлекеттік қызметшілердің мәртебесін арттырып, мемлекеттік органдар рөлінің маңыздылығын одан әрі нақтылай түсеміз. Елге қызмет ету – қашан да абыройлы міндет!
Алаштың көрнекті қайраткері Әлихан Бөкейханов «Ұлтқа қызмет ету білімнен емес, мінезден» деген екен.Осы орайда, мемлекеттік қызметкер жан-жақты білімді ғана емес, өз жұмысына жауапкершілігі мықты, тиянақты, халықпен тығыз қарым-қатынас жасай білетін білікті де кәсіби маман болуы тиіс.
Біз қазіргі таңда мемлекеттік қызметті жүйелеу, реттеу, тұрақты да тартымды ету мақсатында меритократия қағидасын сақтап, Мемлекет басшысы Қасым-Жомарт Кемелұлы Тоқаев айтқандай, ашықтық пен жариялылықты, көрсетілетін қызметтерді цифрландыруды қамтамасыз ету бағытын ұстанудамыз.
Тәуелсіздігіне 30 жыл толған еліміздің алға қарай өркендеп, дамыған іргелі мемлекеттердің қатарында болуында мемлекеттік қызметшілердің қосар үлесі аса зор екені сөзсіз.
Мерейлі мерекеде отбастарыңызға амандық, дендеріңізге саулық, еңбектеріңізге жеміс тілеймін! Тәуелсіз еліміз жасап, жайнай берсін!

Қызылорда облысының әкімі мемлекеттік қызметшілерді кәсіби мерекемен құттықтады

<a href="https://kyzylorda-news.kz/">Kyzylorda-news.kz</a>. «Covid-19» вирусының көбеюіне байланысты Қызылорда облысының әкімі Гүлшара Әбдіқалықова Сыр халқына үндеу жариялады.
Қымбатты жерлестер! Адамзат баласы жаралғалы бері талай қатерлі індетті бастан кешіп келеді. Олардың әрбірі адам өміріне қандай қайғы-қасірет әкелгені тарихтан белгілі. Былтырдан басталған COVID-19 коронавирус індетімен әлемде үздіксіз күрес жүргізіліп жатқанымен, бұл қауіпті вирус мутацияланып, қатерін қайта төгуде.
Мәселен, Ресейде коронавирус инфекциясын жұқтыру жағдайы тым көбейіп барады. Санкт-Петербургте жағдайдың күрделілігі сонша, инфекциялық ауруханаларда орын тапшылық етіп, науқастар тіпті еденге жатқызылуда. Жағдайдың асқынуына үндістандық Дельта штаммы, сондай-ақ, тұрғындардың вакцина салдырудан бас тартуы және карантин шектеулерінің сақталмауы себеп болып отыр.
Үндістанның Махараштра штатында «Дельта плюс» деген атауға ие болған жаңа мутация туралы Үндістанның бүкіл медициналық ғылымдар иститутының жетекшісі Рандип Гулерия бұл штаммның болашақта алаңдаушылық тудыруы мүмкін екенін ескертті.
Еліміздің Денсаулық сақтау министрлігі де “Үнді” штаммының айналымы ықтималдығын анықтап отыр. Нұр-Сұлтан қаласында коронавирустық инфекциямен сырқаттанушылық деңгейінің күрт өсуіне байланысты министрлік науқастардан алынған оң зертханалық үлгілердің ПТР скринингін өткізді. Нәтижесінде үнділік «Дельта» штаммына тән мутация ықтималдығы байқалды.«Дельта» коронавирус штаммы басқа штаммдарға қарағанда аса жұқпалы, жұққыштығы – 60%, орта есеппен 1 адамнан 5-6 адам жұқтырады, ол 7 күнге дейінгі қысқа инкубациялық кезеңмен ерекшеленеді.
Дүниежүзілік денсаулық сақтау ұйымының 2021 жылғы 20 маусымдағы деректері бойынша SARS-CoV-2 «Дельта» штаммы әлемнің 74 елінде анықталған.
Осыған байланысты, қадірлі жерлестер, Сіздерді өзіңіздің ғана емес, отбасыңыз бен жақындарыңыздың, айналадағы адамдардың денсаулығын сақтауға шақырамын. Өкінішке қарай, пандемия азайды деп босаңсып кеттік. Ас-су, жиын-тойлар көбейді, қарапайым қажет талаптарды сақтауды қойдық. Бұлай жүре берсек, індет ұзап кетуі мүмкін. Ал, біз бұрынғыша өмірге қайта оралғымыз келе ме, онда әлеммен бірге инфекциядан қорғанудың жалғыз тиімді тәсілі COVID-19 вакцинасының аяқталған курсын алайық.
Осы ретте, вакциналауға медициналық қарсы көрсеткіші жоқ әрбір адамның қысқа мерзімде КВИ-ге қарсы екпе салдырғаны жөн болар еді. Сондай-ақ, вирустың таралу қаупін азайту үшін барлық алдын алу шараларын қатаң сақтау қажет: маска кию, арақашықтықты сақтау, қолды жуу, үй-жайларды желдетіп отыру, т.б. Өз денсаулығымыз өз қолымызда, ағайын!

Гүлшара Әбдіқалықова: Бұлай жүре берсек, індет ұзап кетуі мүмкін

<a href="https://kyzylorda-news.kz/">Kyzylorda-news.kz</a>.&nbsp;&nbsp;Бүгін Қазақстанда Мемлекеттік қызметші күні аталып өтеді. Бұл атаулы күннің тарихы Біріккен Ұлттар Ұйымынан бастау алады. 2002 жылдың 20 желтоқсанында Біріккен Ұлттар Ұйымының Бас Ассамблеясы 23 маусымды БҰҰ-ның мемлекеттік қызметшісі күні деп жариялау қарарын қабылдап, оған мүше әр мемлекетті де осыған байланысты бір күнді белгілеуге шақырды.
2013 жылдың 20 желтоқсанында Қазақстан Республикасы Президентінің №716 Қаулысымен 23 маусым – Мемлекеттік қызметші күні болып бекітілді. Бүгінгі таңда елімізде &nbsp;97 мыңға жуық мемлекеттік қызметші табысты еңбек етіп жүр. Экономикалық ынтымақтастық және даму ұйымы сарапшыларының бағалауы бойынша, Қазақстанның мемлекеттік қызмет жүйесі жаһандық стандарттарға сай келеді, ал мемлекеттік аппараттың «қартаюы» және гендерлік теңсіздік көрсеткіштері жөнінен ілгерілеушілік байқалады.&nbsp;
Былтыр мемлекеттік қызметшілердің штат саны біраз азайтылды. Жекелеген мемлекеттік органдардың құрылымын қайта ұйымдастыру және оңтайландыру есебінен штат саны 493 бірлікке кеміген болатын.
Нақтырақ айтсақ, «Б» корпусының лауазымдары 524 бірлікке қысқарса, саяси лауазымдар мен «А» корпусының лауазымдары тиісінше 24 және 7-ге ұлғайған.

Бүгін – Мемлекеттік қызметші күні

Kyzylorda-news.kz. Бүгін облыс әкімінің орынбасары Серік Ахмет ел ішіндегі өзекті мәселелерді талқылау үшін БАҚ өкілдерімен кездесу өткізді. Жиынға жергілікті БАҚ басшылары, республикалық БАҚ-тың меншікті тілшілері, тәуелсіз журналистер, облыстық басқарма басшылары қатысты. Кездесудің күн тәртібінде өңіріміздің күретамыры, негізі тіршілік көзі Сырдария өзенінің су тапшылығы мен егін шаруашылығындағы су, ауылшаруашылық саласындағы субсидия мәселелері болды.
Жиынды Серік Ахмет су мәселесіне қатысты бірқатар мәселелер мен атқарылып жатқан шараларға тоқталды.
<blockquote>
 “Өздеріңіз білетіндей, Алаштың анасы саналатын өңіріміздің күретамыры, негізі тіршілік көзі Сырдария өзенінде су тапшылығы сезілуде. Бұл Арал аймағындағы мал өлімі, күріштікке судың жетіспеуі, қысқа мал-азығына қажетті жем-шөп әзірлеу мен ауыл шаруашылығын субсидияландыруда кездесіп жатқан күрделі мәселелерге тікелей әкеліп тіреуде. Жылдан-жылға судың азаю қаупін сезінгендіктен әртараптандыруға басымдық бердік”, – деді Серік Ахмет.
</blockquote>
Облыстық ауыл шаруашылығы басқармасының басшысы Талғат Дүйсебаев өңірдің егін шаруашылығындағы су мәселесі бойынша атқарылып жатқан шаралар туралы және ауылшаруашылық саласын субсидияландыруда кездесетін түйткілді мәселелер туралы баяндаса, облыстық табиғи ресурстар және табиғат пайдалануды реттеу басқармасының басшысы Бауыржан Шәменов пен ҚР экология, геология және табиғи ресурстар министрлігінің су ресурстары комитетінің су ресурстарын пайдалануды реттеу және қорғау жөніндегі Арал-Сырдария бассейндік инспекциясының басшысы Сейілбек Нұрымбетов Сырдария өзеніндегі су тапшылығының алдын алу бойынша жұмыстар туралы хабарлады.
Жыл сайын көрсетілетін мемлекеттік қолдаулардың нәтижесінде ауыл шаруашылығы дақылдарының егіс көлемдері ұлғайып келеді.
Атап айтқанда, ағымдағы жылы облыс бойынша 188,2 мың гектарға ауыл шаруашылығы дақылдарын орналастыру жоспарланса, оның ішінде күріш егісінің көлемі өткен жылмен салыстырғанда 5,1 мың гектарға қысқартылып, 84,4 мың гектарға егу межеленді. Облыс бойынша 187,6 мың га ауыл шаруашылық дақылдары орналастырылып, өткен жылмен салыстырғанда 3,4 мың гектарға артық егілді.
Жалпыға мәлім, биылғы жылғы өңірдегі су тапшылығы мәселесі салдарынан күріш егісінің межеленген 84,4 мың гектар көлемі 1,5 мың гектарға дейін қысқартылып, 82,9 мың гектарға орналастырылды. Бұл көрсеткіш өткен жылдан 6,6 мың гектарға азайған.
Жыл сайын саланы дамыту және ауыл шаруашылығы тауарөндірушілерін қолдау үшін мемлекет тарапынан10 млрд.теңгеден астам қаражат бөлініп отыр.
Биылғы жылға 11,4 млрд.теңге қарастырылды. Бөлінген қаражат егіншілік саласы өнімнің шығымдылығы мен сапасын, экспорттық әлеуетін арттыратын болады.
Сондай-ақ, мал шаруашылығы бағытына биылғы жылы 2,6 млрд.теңге қаражат бөлініп отыр.
Осы бағытта жүргізілген мемлекеттік қолдаудың нәтижесінде, өткен жылдың өзінде селекциялық және асыл тұқымды жұмыспен қамтылған МІҚ саны 12,4%, қойлар 6%, сатып алынған асыл тұқымды МІҚ 14,5 %, асыл тұқымды жылқы саны 1,1% ұлғайды.
Осы орайда, ауыл шаруашылығы дақылдарын орналастыру барысында қысқартылған күріш егісінің орнына рентабельдігі және экспорттық әлеуеті жоғары дақылдардың көлемін арттыра отырып, егіс алқаптарын әртараптандыру жұмыстары қолға алынды. Нақты айтқанда, көкөніс, бақша, майлы және мал азықтық дақылдарын өткен жылмен салыстырғанда 11,1 мың гектарға артық орналастырылды. 
Сырдарияның 93% суы Қырғызстан, Тәжікістан және Өзбекстан аймақтарында қалыптасады. Сырдария өзені – «Тоқтағұл» су қоймасында жиналған су көлеміне тікелей тәуелді. Мәселен, аталған қоймада жылына 15 млрд. текше метр су жиналу керек болса, қазір бар болғаны 7-8 млрд.текше метрді құрап тұр.
Су тапшылығын алдын алу үшін облыстық бюджеттен елді мекендерге 43 дана насос қондырғыларын сатып алу және 92 шақырым болатын 18 каналға тазалау жұмыстары жүргізілуде. Сонымен бірге, шаруашылық құрылымдары 47 насос қондырғыларын дайындады. Айта кету керек, қосымша 41 дана насос алынатын болады.
Өткен жылы басталған Қызылорда және Әйтек су тораптарын қайта жаңғырту жұмыстары бүгінгі күні жалғасуда. Облыста суармалы жерлерді қалпына келтіру және айналымға қосу бойынша 161 млрд.теңгеге 3 жоба әзірленген.
Басқосуда БАҚ өкілдері ойларын ортаға салып, келелі ұсыныстарын жеткізді. Атап айтсақ, Сырдария өзеніндегі судың тартылуы, дария арнасын тазартуы, Арал ауданындағы малдардың қырылуы, шаруаларға субсидия беру, азық-түлік, жанар-жағармай бағаларын тұрақтандыру мәселелерін қозғады. Өзекті сұрақтарға салалық басқарма басшылары жауап берді. 
Облыс әкімінің орынбасары шараны қорытындылай келе, ақпарат кеңістігінің аясын кеңейтіп ауқымды шараларды бірге атқаруға дайын екенін білдірді. Сонымен қатар тұрғындарға вакцина алудың маңыздылығын насихаттап, алдағы ауыл әкімдерінің сайлауы мен халық санағы науқанына ақпараттық қолдау көрсетуге шақырды.
<img src="https://kyzylorda-news.kz/wp-content/uploads/2021/06/fb_img_1624376398969.jpg" alt="" />
<hr />

Облыс әкімінің орынбасары Серік Ахмет БАҚ өкілдерімен кездесті

<a href="https://kyzylorda-news.kz/">Kyzylorda-news.kz</a>. Соңғы тәулікте Қызылорда облысында коронавирус инфекциясының 30 жағдайы анықталды. Басым көпшілігі қарым-қатынас арқылы жұққан. Оның ішінде 11-і 14 жасқа дейінгі балалар. Бұл туралы Өңірлік коммуникациялар қызметінің ақпараттық алаңында өткен брифингте облыстық санитариялық-эпидемиологиялық бақылау департаментінің бөлім басшысы Әлия Идрисова баяндады.
<blockquote>
 «Өңірде эпидахуал тұрақты деп бағаланғанымен, Нұр-Сұлтан қаласында «үнділік» штамның болу ықтималдылығы анықталды. «Дельта» коронавирус штамы аса контагиозды және анықталған штамдарға қарағанда жұқпалылығы 60 пайызға жоғары. Қазіргі айналымдағы штамдар 1 адамнан орта есеппен 3-4 адамға таралатын болса, бұл штамм 5-6 адамға бірден жұғады және 7 күнге созылатын қысқа инкубациялық кезеңмен сипатталады. Сонымен қатар, індетті жұқтырғандар буындар мен іштің қатты ауырсынуын сезінеді. Жүрек айнып, лоқсиды, ауру салдарынан адам саңырау болып қалуы әбден мүмкін және аяқтардың микротромбозына әкеледі. Індеттің таралуының алдын алу мақсатында барлық профилактикалық шараларды қатаң орындау қажет: маска тағу, әлеуметік арақашықтықты сақтау, қол гигиенасы, үй-жайларды желдету, адам көп жиналатын жерлерге бармау, шетелдік сапарларды кейінге шегеруге кеңес береміз», – деді Әлия Нұрмағамбетқызы.
</blockquote>
Мамыр айынан бастап коронавирус инфекциясы бойынша көрсеткіштің төмендеу тенденциясы байқалды. Әйткенмен соңғы 3-4 күнде орта есеппен 15-25 дерек анықталуда. Облыста тіркелген ошақтарда залалсыздандыру жұмыстары жүргізіліп, індетке қарсы, профилактикалық шаралар ұйымдастырылуда.

Қазақстан және Қызылорда облысының жаңалықтары: Қоғам