<a href="https://kyzylorda-news.kz/">Kyzylorda-news.kz</a>. Қызылорда қалалық полиция басқармасына жергілікті тұрғынның арызы бойынша, 27 жастағы азаматқа қатысты Қазақстан Республикасының Қылмыстық кодексінің 190 – бабы (Алаяқтық) бойынша сотқа дейінгі тергеп-тексеру амалдары бастады.
Ол мемлекетік қызметке орналасуға көмектесуге уәде&nbsp; беріп, 672 мың теңге көлемінде 2 дана ұялы телефондарын несие арқылы рәсімдетіп алып, алдап кеткен.
<blockquote>
 «Күдіктіге қатысты ешқайда кетпеу туралы қолхат түрінде бұлтартпау шарасы қолданылды. Қызылорда қалалық Полиция басқармасына азаматтарды алаяқтық жағдайларының жиілеп кетуіне байланысты сақ болуға шақырады», – делінген полиция департаментінің хабарламасында.
</blockquote>

Мемлекеттік қызметке тұрғызуға уәде берген алаяқ ұсталды

<a href="https://kyzylorda-news.kz/">Kyzylorda-news.kz</a>. ҚР Парламенті Сенатының депутаты Ақмарал Әлназарова мен қала әкімі Ғанибек Қазантаев тұрмыстық қатты қалдықтарды қайта өңдеу полигоны мен модульді жұқпалы аурулар стационарының жұмысына барды.
Алдымен қала іргесіндегі яғни, Белкөл кенті аумағында орналасқан жалпы жер көлемі 20 га құрайтын ескі тұрмыстық қатты қалдықтарды жинайтын полигонға барды. Бүгінде ескі қатты тұрмыстық қалдықтар полигоны қоршалмаған, санитарлық-экологиялық талаптарға сәйкес келмейді және қалдықтарды сұрыптау кешенімен жабдықталмаған. Арнайы қоршау болмауына байланысты ескі полигон аумағына бөгде адамдардың кіріп, түрлі металл қалдықтарын қазып соңынан өртеп кетуінен полигонда өртену оқиғалары жиі орын алады.
<blockquote>
 «Алдағы уақытта ескі полигон аумағына арнайы қоршау жүргізілуі және ескі полигон ауданының 20 гектар жеріне көму, қайта қалпына келтіру жұмыстары жүргізілуі қажет. Осы жұмыстар толық атқарылған жағдайда ескі қатты тұрмыстық қалдықтар полигонының қоршаған ортаға және адам денсаулығына тигізетін кері әсерлері толық жойылады. Полигон аумағындағы жинақталған тұрмыстық қатты қалдықтарды рекультивациялау мақсатында жоба-сметалық құжаттарын әзірлеу яғни қажетті қаражатты анықтау үшін тиісті есептеме жұмыстары жүргізіліп жатыр. Бұл аймақты толығымен залалсыздандырып, қалыпты жағдайға келтіру үшін республикалық бюджеттен қаржы бөліну қажет», – деді қала әкімі Ғанибек Қазантаев.
</blockquote>
Осы орайда Сенат депутаты Ақмарал Әлназарова қала тұрғындарына экологиялық зиян келтірмеу үшін тиісті жұмыстарды бірлесіп атқаратындығын жеткізді.
Одан әрі Сенатор өткен жылы өз жұмысын бастаған қала іргесіндегі қатты қалдықтарды қайта өңдеу полигонына барды. Жаңадан салынған қатты тұрмыстық қалдықтар полигоны 2020 жылы 65 000 тонна қатты тұрмыстық қалдықтарды қабылдаған. Осы қалдықтарды сұрыптау арқылы екінші қайтара пайдалануға жарамды 115 тонна (картон,түсті металл, шыны, пластмасса, т.б.) заттар алынды. Ағымдағы жылдың маусым айына дейін жаңа қатты тұрмыстық қалдықтар полигонына барлығы 26771 тонна қалдықтар қабылданды. Қалдықтардың 9637 тоннасы азық-түлік қалдықтары, 8566 тоннасы жарамсыз қағаз қалдықтары осы қалдықтар полигон аумағында шірітілуде. Шірітілген қалдықтарды полигон аумағын тыңайтуға пайдалану көзделуде.
Қызылорда қаласынан күніне орта есеппен 180 тонна көлемінде қалдықтар тасымалданады. Қазіргі уақытта қалдықтарды сұрыптау кешенінен орта есеппен күніне 30 тонна қалдықтар сұрыптаудан өткізілуде, бұл жұмыстарды 30 адам атқаруда. Осы 30 тонна сұрыптаудан өткен қалдықтардан 3-4 тонна көлемінде екінші қайтара пайдалануға жарамды шикізаттар алынады.
Одан әрі Сенатор мен қала әкімі облыс орталығындағы салынған 200 орындық модульді жұқпалы аурулар ауруханасында болды. Облыстық денсаулық сақтау басқармасының басшысы Сабит Пазилов мұндағы замануи ғимараттың жұмыстарымен таныстырды. Басқарма басшысының айтуынша, модульдік жұқпалы аурулар ауруханасының құрылысы аяқталған, мемлекеттік қабылдау жұмыстары жүргізілуде. Онда науқастарды емдеу үшін барлық жағдай жасалаған. Ендігі мәселе мемлекеттік сараптамадан өту жұмыстары тоқтап тұрғанын айтты. Өз кезегінде Ақмарал Шәріпбайқызы қазіргі кезде эпидемиологиялық ахуалдың ушығып тұрған шағында бұл жұмыстарды жеделдету керектігін айтты.
ҚР Парламенті Сенатының депутаты Ақмарал Әлназарова қала басшысына жоғарыда аталған нысандардың тиісті жұмыстарын бірлесіп атқаратындығын жеткізді.

Сенат депутаты Ақмарал Әлназарова Қызылордаға келді

<a href="https://kyzylorda-news.kz/">Kyzylorda-news.kz</a>. Сауда және интеграция министрі Бақыт Сұлтанов сатушы қандай жағдайда тауар немесе қызмет ақысын төлем картасы арқылы алудан бас тартуы мүмкін екенін айтты.
Министрдің сөзінше, Қазақстан заңнамасында сатып алушыға картамен төлеу мүмкіндігін ұсынуы тиіс кәсіпкерлік қызметтің 14 түрі бар.&nbsp;Олар POS-терминалды қолдануға міндетті. Норманы бұзғаны үшін тиісті әкімшілік жауапкершілік бар.&nbsp;
<blockquote>
 “Сатып алушы карта арқылы төлем жасағысы келсе, сатушы бас тартпауы керек. Ол өзге төлем жүйесін ұсынбауы тиіс. Әрине, техникалық ақау болуы мүмкін, бірақ жүйелі түрде олай болмауы қажет. Мұндай жағдайлар анықталған кезде дер кезінде әрекет етуге тырысамыз”, – деді Сұлтанов брифингте.
</blockquote>
Ол тұтынушылардың құқығын қорғау министрлік қызметі бағыттарының бірі екенін айтты.
Айта кетейік, тұтынушылардың құқығын қорғау комитеті сауда министрлігінің құрамына кіреді.
<a href="https://sputnik.kz/economy/20210713/17594044/karta-tolem.html">Sputnik Қазақстан</a>

Картамен төлем жасау орнына ақша аударуды талап ету заңды ма?

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықованың төрағалығымен 2021 жылғы Ұлттық халық санағының дайындық барысы және мемлекеттік органдарға жобалық басқаруды енгізу туралы туралы жиын өтті.
Күн тәртібіндегі бірінші мәселе бойынша ҚР Стратегиялық жоспарлау және реформалар агенттігі Ұлттық статистика бюросының Қызылорда облысы бойынша департаментінің басшысы Мариям Баекеева баяндама жасады.
Облыста халық санағына байланысты жұмыстар кезең кезеңімен атқарылуда. 1-30 маусым аралығындағы ұлттық халық санағының I кезеңіндегі Тұрғынжайлар, тұрғын үйлер (тұрғын ғимараттар) және тұрғын емес үй-жайлар тізімдерін жасау жұмыстары толығымен аяқталды.
Санақтың I кезең жұмыстарына ағымдағы жылдың 4 мамырынан 42 нұсқаушы, 25 мамырдан бастап 24 нұсқаушы-бақылаушылар және 1 маусымынан 164 сұқбатшылар уақытша жұмысқа тартылды.
2021 жылғы Ұлттық халық санағының I-кезеңін өткізу қажеттілігі мен маңыздылығы туралы өңірлік телеарналардан ақпараттық видеороликтер көрсетілуде. Санақ жұмыстарына облыстық «Жастар ресурстық орталығында» жұмыссыз тіркелген жастар мен студенттер тартылды.
Санақтың II-кезеңі 1қыркүйектен – 30 қазан аралығында жүргізіледі. 1 қыркүйектен 15 қазан аралығында онлайн режимінде, 1-30 қазан аралығында планшет құрылғысымен ұйымдастырылады. Облыс көлеміндегі барлық мемлекеттік органдарды онлайн-санақтан қалай өту керектігі туралы оқыту семинарлары да жүргізілетін болады.
Аймақ басшысы Гүлшара Әбдіқалықова Ұлттық халық санағын өткізу іс-шара жоспарынан туындайтын жұмыстарды ұйымдастыруды қамтамасыз етуді, 2021 жылғы 1 қарашаға дейін медиа-жоспарға сәйкес, бұқаралық ақпарат құралдары арқылы халық арасында түсіндірме жұмыстарын жүргізуді, 2021 жылдың 1 қазанға дейін жұмыспен қамту орталықтары арқылы санақ персоналын жасақтауды және барлық ауылдық округтердің мемлекеттік органдардың бірыңғай транспорттық орталығының арнайы қорғалған каналдармен, байланыс жүйесімен, санақ учаскелерін қажетті құрал жабдықтармен қамтамасыз етуді тапсырды. Сонымен қатар, 2021 жылдың 1 қарашаға дейін шет ел азаматтарымен санақ жүргізу барысында оларды қажетті аудармашылармен қамтамасыз ету қажет екенін айтып, жасақталған санақ персоналдарын вакцинациялау және оларды жеке қорғаныс құралдарымен қамтамасыз етуді үйлестіруді жүктеді. Мұнымен қоса, облыс әкімі Санақтың 2-ші кезеңін тиісті деңгйде ұйымдастыру қажет екенін баса айтты.
Жиында облыстық экономика және бюджетті жоспарлау басқармасының басшысы Нұрғали Қордабай мемлекеттік органдарға жобалық басқаруды енгізу бойынша атқарылып жатқан жұмыстарды тізбектеді.
Жобалық басқару аясындағы қызметті реттейтін нормативтік-құқықтық актілер қабылданды. Осыған байланысты өңірде жобалық басқару тәсілін мемлекеттік органдарға ендіру жұмыстары жүргізілуде. Бүгінгі таңда барлық мемлекеттік органдар Ұлттық жобалық кеңсе ұсынған «Easyproject» ақпараттық жүйесін қолдануда.
Күн сайын ақпараттық жүйеде жобаларды қамтудағы өңірлердің белсенділігі және оларға мониторинг жүргізу мен бақылаудың дұрыстығы көрсетілетін дашборд түріндегі кестелер ұсынылады. Бүгінгі таңда жобаларды қамту және мониторинг нәтижесіне сәйкес Қызылорда облысы республика бойынша үшінші орында. Ағымдағы жылдың 2 шілдесінде Үкіметтің жобалау орталығы мен Республикалық жобалау офисінің ұйымдастырған семинар-кеңесінде Қызылорда облысының өңірлік жобалау офисі сапалы жұмысын көрсетті.
Облыс әкімі Үкімет мемлекеттік органдарға жобалық басқару жүйесін енгізу және дамыту міндетін қойғанын назарға салып, ағымдағы жылдың 15 шілдесіне дейін өңірдің жобалық басқару регламентін бекіту үшін базалық бағыттарды іске асыру тобының басшыларын бекітуді, жетекшілік ететін базалық бағыттағы жобалар топтары басшыларының, бас менеджерлердің және әкімшілердің тиісті базалық бағытты іске асыру тобымен скрам-кездесулер кестесіне сәйкес аптасына кемінде 1 (бір) рет қатысуын қамтамасыз етуді жүктеді. Сондай-ақ, ағымдағы жылдың 15 шілдесіне дейін бас менеджер рөлінде бір қызметкерден, базалық бағыт бойынша әкімші ретінде 6 қызметкерді бекітіп, жобалық басқарудың қазақстандық стандарты бойынша сертификаттауға оқыту міндетін қойды. Ұлттық Конкурсқа қатысу үшін барлық тиісті құжаттарды Қызылорда облысы әкімдігінің жобалау офисіне ұсынуды тапсырды.
Жиынды қорытындылай келе, аймақ басшысы Гүлшара Әбдіқалықова жиында айтылған тапсырмалардың орындалуын бақылауды орынбасары Нұрлан Тілешевке жүктеді.
<img src="https://kyzylorda-news.kz/wp-content/uploads/2021/07/perepis.jpg" alt="" />

Қызылордада Ұлттық халық санағына дайындық қалай?

<a href="https://kyzylorda-news.kz/">Kyzylorda-news.kz</a>. Облыс әкімі Гүлшара Әбдіқалықованың төрағалығымен төтенше жағдайлардың алдын алу және оларды жою жөніндегі облыстық комиссияның кезектен тыс отырысы өтті. Жиында Арал ауданы аумағындағы қуаңшылық жағдай жариялау мәселесі қаралды.
Аймақ басшысы күн тәртібіндегі жағдайдың маңыздылығын және осыған дейін жасалған жұмыстарды ескере отырып, бірқатар мәселелерде шұғыл шешім қабылдау қажеттігін атап өтті.
<blockquote>
 «Ағымдағы жылы Арал ауданында құрғақшылық жағдайы орын алып, 559 мал басының өліміне себеп болды. Қызылорда және Маңғыстау облысындағы қуаңшылық жағдайға байланысты Президент Қасым-Жомарт Кемелұлы Тоқаев қажетті шараларды қабылдау жөнінде Үкіметке тапсырма берді. Бірінші кезекте мал басын аман алып қалу үшін су ұңғымаларын қазу, жайылымдық және шабындық жерлерді суландыруға каналдар тазаланып, су тоспалары салынуы керек. Бұл жобалар толық жүзеге асуы үшін Сырдария өзенінің Бұрмаұлақ арнасын бөгеп, Аспай суағытқысын іске қосу арқылы, Ақшатау-Қамбаш көлдер жүйесін суландыру жұмыстары жүргізілуі тиіс. Жоғарыда аталған жұмыстардың ірі көлемдегі қаржыны қажет етуіне байланысты республика бюджетінен қаржы бөлу жөнінде Үкіметке хат жолданды», – деді Гүлшара Әбдіқалықова.
</blockquote>
Еске салайық, бүгінде қуаңшылық жағдайдағы ауылдық округтер «қызыл», «сары» және «жасыл» болып 3 аймаққа бөлініп, тізбесі әзірленген. Оның ішінде қызыл аймаққа 13 ауылдық округ, сары аймаққа 6 ауылдық округ және жасыл аймаққа 4 ауылдық округ енгізілді. Аудан бойынша 205 822 бас малға қажетті азық көлемі 184 640 тоннаны құраса, бүгінгі күнге ауданға 2190 тонна жеткізілді. Бұдан бөлек ауданнан ерікті жастардан 14 жасақ құрылып, шөп ору науқанына өз үлестерін қосуда. Аталған жасақтар қазіргі таңда Қазалы ауданының Қарашеңгел, Көларық округінен, Қармақшы ауданының Жаңажол ауылынан және Сырдария ауданы Н.Ілиясов және Шіркейлі ауылдарынан шабындық жерлерін шабуға жұмылдырылуда. Сонымен бірге, 11 шілде күні көршілес Ақтөбе облысы, Ырғыз ауданына барып, жергілікті шаруашылықтармен кездесіп, шөп бағасын қол жетімді етумен қатар шабындық жерлерді оруға келісім жасалды. Қазіргі таңда аралдық 5 бригада шөп орымын бастап кетті.
Комиссия отырысында Арал ауданының әкімі Серік Сермағамбетов қабылданған шаралар туралы баяндап, мәселені шешу үшін қажетті іс-шараларды ұсынды. Ауданда мал өлімінің алдын алу, қауіпсіздік шараларын күшейту мақсатында суаттар мен көл жиектеріне ауыл тұрғындарының көмегімен кезекшілік жұмыстары ұйымдастырылып, жағдай бақылауға алынды. Сонымен қатар, әр елді мекен бойынша пада мәселесі күшейтіліп арнайы CALL-орталығы іске қосылды. Қазіргі таңда мал өлімінің тіркелуі тоқтады.
Қалыптасқан жағдайды саралаған аймақ басшысы Арал ауданының әкіміне облыстық ауыл шаруашылығы, табиғи ресурстар және табиғат пайдалануды реттеу басқармаларымен бірлесіп, тиісті министрліктермен жұмыс жасау қажеттігін еске салды. Сондай-ақ, облыстық жұмылдыру дайындығы басқармасына табиғи ресурстар және табиғат пайдалануды реттеу басқармасымен бірлесіп, облыстық жергілікті атқарушы органның төтенше резервінен қаржы бөлу үшін тиісті құжаттар тізбесін әзірлеп, облыстық қаржы басқармасына ұсынуды тапсырды. Мұнан бөлек, облыстық қаржы басқармасына жергілікті атқарушы органның төтенше резервінен қаржы бөлуді қарастыру қажеттігін қаперге салды.
Облыс әкімі облыстық жұмылдыру дайындығы басқармасына шұғыл түрде ауданға қарасты елді мекендер малдарын суару үшін бірінші кезекте қажетті 3 су ұңғымасын қазу жұмыстарын ұйымдастыруды міндеттеді. Бұл ретте «Бұрмақұлақ» су арнасын уақытша бөгеу және Бектау каналын тазарту және тоспа салу, жайылымдық және шабындық жерлерді суландыру мақсатында сыр беткейінде орналасқан елді мекендердегі 7 каналдың арнасын тазалау және су тоспаларын салу жұмыстарының жоба-сметалық құжаттарын әзірлеуді міндетті. Егер республикалық бюджеттен қолдау тапқан жағдайда каналдың арнасын тазалау және су тоспаларының құрылысын салу, 12 ұңғыманы іске қосуды ұйымдастыру керектігін тілге тиек етті.
Аймақ басшысы табиғи ресурстар және табиғат пайдалануды реттеу басқармасына «Нұралы жарма» каналының арнасын тазалау және су тоспасын салу жұмысына әзірленген жоба-сметалық құжаттаманы мемлекеттік сараптамадан өткізуді, облыстық ауыл шаруашылығы басқармасына Арал ауданы әкімдігімен бірлесіп, ауыл шаруашылығы жануарларын жем-шөппен қамтамасыз ету мақсатында тасымалдауға қажетті жанар-жағармай шығынын өтеу үшін облыстың төтенше резервінен қаржы бөлуді ұсыну және облыстық кәсіпкерлер палатасымен бірлесіп, жем-шөп бағаларын тұрақтандыру бойынша жұмыстарды ұйымдастырып, осы саладағы кәсіпкерлердің бірінші кезекте өңірдегі шаруашылықтарды қамтамасыз етуін бақылауға алуды тапсырды. Ал, Арал ауданының әкіміне аудан бюджетінен Аспай суағытқысын іске қосу және 49 су ұңғымасының төлқұжатын әзірлеу жұмыстарын ұйымдастыруды, республикалық бюджеттен қолдау тапқан жағдайда су насостары мен арнайы техникаларды сатып алуды қамтамасыз ету міндеттерін жүктеді.
Айта кетейік, бүгіннен бастап Арал өңіріне төтенше жағдай енгізілді.

Аралда төтенше жағдай: Гүлшара Әбдіқалықова жиын өткізді

<a href="https://kyzylorda-news.kz/">Kyzylorda-news.kz</a> Қазгидромет 14 шілдеге арналған ауа райы болжамын жариялады.
Оңтүстік Каспий циклоны бүгін де республиканың көп бөлігіне өз әсерін тигізеді, сондықтан құбылмалы ауа райы сақталады, жаңбыр жауып, найзағай ойнайды. Елдің солтүстігінде, солтүстік-шығысында және шығысында нөсер жаңбыр жауады. Тек оңтүстік-батыс пен батыста күн ашық. Республиканың кей жерлерде дауыл, бұршақ, желдің күшеюі, оңтүстік пен оңтүстік-батысында шаңды дауыл, солтүстікте тұман күтіледі.
Қызылорда облысының басым бөлігінде өрт қаупі сақталады.

14 шілдеге арналған ауа райы болжамы

<a href="https://kyzylorda-news.kz/">Kyzylorda-news.kz</a> Арал ауданындағы қуаңшылық жағдайынан 559 мал басының өлімі тіркелді. Осыған орай, 23-маусымда аудандық комиссияның кезектен тыс отырысында төтенше жағдай жариялау туралы ұсыныс енгізілген. Мәселе оң шешімін тауып, 12 шілдеде ҚР Әділет министрлігінен тіркеуден өтті. Бұл туралы бүгін Өңірлік коммуникациялар қызметінде өткен баспасөз конференциясында Арал ауданының әкімі Серік Сермағанбетов мәлімдеді.
Орын алған жағдайларға жан-жақты зерделеу жұмыстары жүргізілді. Шөп шығымына байланысты ауылдық округтер, «қызыл», «сары», «жасыл» аймаққа бөлінді. Оның ішінде қызыл аймаққа 13 ауылдық округ, сары аймаққа 6, жасыл аймаққа 4 ауылдық округ енгізілді. Ауданда жалпы, 200 мыңнан аса төрт түлік бар. Оған қажетті жем-шөп көлемі 184 мың тоннаны құрап отыр. Ауданнан 35 мың тоннадан аса шөп жинау көзделсе, өзге өңірлерден 146 мың тонна мал азығын алдыру қарастырылуда. Сондай-ақ, Арал қаласынан және 12 елді мекеннен ерікті азаматтардан жасақтар құрылды. Бүгінде олар Қазалы ауданының Қарашеңгел, Көларық округінен, Қармақшы ауданының Жаңажол ауылындағы және Сырдария ауданы Н.Ілиясов және Шіркейлі ауылдарының шабындық жерлерін шабуға жұмылдырылды. Сонымен бірге, көршілес Ақтөбе облысы, Ырғыз ауданынағы жергілікті шаруашылықтармен кездесіп, шөп бағасын қол жетімді етумен қатар шабындық жерлерді оруға келісімдер жасалды.
<blockquote>
 «Алдағы уақытта Сырдария өзенінің бойындағы жайылымдық, шабындық, егістік және Ақшатау, Қамыстыбас көлдерін суландыратын 8 канал тазаланбақ. 49 ұңғыманың 15-ін іске қосу жоспарланып отыр. Шөп тасымалына кететін жанар-жағар май шығындары да есепке алынды. Ауданда ауа райының жаз мезгілінде қатты ыстық болуымен шөптің шықпауынан құмды дауылардың күшейіп, құм көшкіндерінің әсерінен жолдардың жабылуы, әлеуметтік нысандардың құм астында қалу фактілері 6 елді мекенде орын алған. Бұл да іс шара жоспарына енгізілді», – дейді Серік Сағитжанұлы.
</blockquote>
Төтенше жағдайға 1 млрд 936 млн тг бөлінбек. Оның бір бөлігі облыстық бюджеттің резервінен қалғаны республикалық бюджеттен қаралады.
Айта кету керек, мал өлімінің алдын алу, қауіпсіздік шараларын күшейту үшін суаттар мен көл жиектеріне еріктілер көмегімен кезекшілік жұмыстары ұйымдастырылып, САLL-орталығы іске қосылды. Сондай-ақ, пада мәселесі күшейтіліп ветеринариялық топтармен ауру малдарға тегін емдеу жүргізілді. Бұл өз кезегінде мал өлімін тоқтатуға септігін тигізді.

Арал ауданында төтенше жағдай жарияланды

<h4 id="kyzylordanewskzhttpskyzylordanewskz15tengrinewskz"><a href="https://kyzylorda-news.kz/">Kyzylorda-news.kz</a> 15 шілдеден бастап жұмыс берушілер мен қызметкерлер вакцинация мәртебесін тексермейді. Бұл ақпаратты Денсаулық сақтау министрлігі Санитарлық-эпидемиологиялық бақылау комитетінің ресми өкілі Ержан Байтанаев растады, деп хабарлайды Tengrinews.kz.</h4>
Оның айтуынша, Президенттің тапсырмасына және ВАК хаттамалық тапсырмасына байланысты мемлекеттік органдар 19 шілдеге дейін міндетті вакцинациялау мерзімін ұзарту туралы мәселені қарайтын болады.
<blockquote>
 19 шілдеден кейін қызмет көрсету саласы үшін мерзімді ұзартудың жаңа алгоритмі белгілі болады. Кеше ВАК міндетті вакцинация мерзімін ұзарту туралы шешім қабылдады. Мемлекеттік органдар мәселені қарайды және қызмет көрсету саласының қызметкерлері үшін ұсыныстар енгізеді. 15 шілдеден кейін вакцинация мәртебесіне ешқандай тексеру жүргізілмейді,&nbsp;15 шілдеден кейін аталмыш нысандарға қызметкерлері вакцина алмағаны үшін ешқандай шара қолданылмайды, – деп қорытындылады Байтанаев.
</blockquote>

Міндетті вакцинация: 15 шілдеден бастап тексеру болмайды

<a href="https://kyzylorda-news.kz/">Kyzylorda-news.kz</a> Қызылорда облысы бойынша Мемлекеттік кірістер департаменті салық төлеушілерге 2022 жылдың 1 қаңтарынан бастап бастап жаңа төлем – «цифрлық майнинг үшін төлем» енгізілетінін хабарлайды.
Өзгерістерге сәйкес Салық кодексінің 606-1-606-5-баптары 2022 жылғы 1 қаңтардан бастап қолданысқа енеді.
Цифрлық майнинг үшін төлем төлеушілер цифрлық майнинг (криптовалюта өндіру) жүзеге асыратын заңды және жеке тұлғалар болып табылады.
Төлем объектісі цифрлық майнинг (криптовалюта өндіру) кезінде тұтынылатын электр энергиясының көлемі болып табылады.
Цифрлық майнинг үшін төлемақы ставкасы цифрлық майнингті жүзеге асыру кезінде (криптовалютаны өндіру) тұтынылған электр энергиясы қуатының 1 киловаты үшін 1 теңге мөлшерінде болады.
Цифрлық майнинг үшін төлем есептеу үшін салық кезеңі тоқсан болып табылады, салық есептілігі көзделмеген.
Төлеушілер өз қызметінің нәтижелері туралы Қазақстан Республикасының цифрлық даму, инновациялар және аэроғарыш өнеркәсібі министрлігінің Ақпараттық қауіпсіздік комитеті болып табылатын майнинг мәселелері жөніндегі уәкілетті органға хабарлайтын болады.

Келесі жылдан бастап салық төлеушілер үшін жаңа төлем енгізіледі

<a href="https://kyzylorda-news.kz/">Kyzylorda-news.kz</a>&nbsp; Аэроғарыш саласындағы республикалық мемлекеттік кәсіпорын басшысына қатысты қылмыстық іс қозғалды. Белгілі болғандай кәсіпорын басшысы 600 мың теңге көлемінде пара алған.
Бұл туралы Қызылорда облысының сыбайлас жемқорлыққа қарсы қызметі хабарлады.
<blockquote>
 «Қызылорда облысының сыбайлас жемқорлыққа қарсы қызметі «Байқоңыр» ғарыш айлағы алаңының аумағынан қараметалды кедергісіз әкеткені үшін жалпы сомасы 600 мың теңге пара алу фактісі бойынша аэроғарыш саласындағы республикалық мемлекеттік кәсіпорын басшысына қатысты қылмыстық істі тергеуде», – делінген хабарламада.
</blockquote>
Күдіктіге қатысты сот қамауға алу түріндегі бұлтартпау шарасына санкция берілген.

Қызылордада пара алған кәсіпорын басшысы тергелуде

<a href="https://kyzylorda-news.kz/">Kyzylorda-news.kz</a> Бүгін Жаңақорған ауданының әкімі Руслан Рүстемов өңірдегі мал азығындық егіспен айналысушы шаруа қожалықтың төрағаларын жинап, Арал ауданы малшыларын қолдау мақсатында шөппен қамтамасыз ету шарасына атсалысуға шақырды.
<blockquote>
 «Қазіргі табиғаттың қатал мезгілін, қуаншылықты жеңу тек біз бен сіздің қолдауымыз арқылы ғана мүмкіндік бар. Сондықтан барынша атсалысқанымыз абзал. Бұл бірліктің де белгісі, тірлікті түзеудің де тетігі» – деді аудан әкімі.
</blockquote>
Басқосуға жиналған «Бесарық», «Ислам», «Нұрбол И» шаруа қожалықтары мен «Түгіскен ТШ» ЖШС директорлары аралдықтарға көмегін аямайтынын жеткізді.
<blockquote>
 «Аралдық ағайынның ауыртпалығына ара түсу үшін қамқорлық арқау іс қажет-ақ. Біз бұған бей-жай қарай алмаймыз. Сол себепті «Сұңқар» шаруа қожалығы атынан 1 мың прес шөпті арзан бағада беремін», – деді Құлмағамбет Исаханов.
</blockquote>
Енді көлік мәселесі шешілсе Арал ауданы малшыларына арқау көмек Жаңақорғаннан жөнелтіледі.

Аралға Жаңақорғаннан көмек жіберіледі

<h4 id="kyzylordanewskzhttpskyzylordanewskz25740151"><a href="https://kyzylorda-news.kz/">Kyzylorda-news.kz</a> Биыл 25 шілдеде ауыл әкімдерінің сайлауы өтеді. Қызылорда облысындағы 7 ауданында 40 ауылдық округ әкімінің сайлауына 151 кандидат ұсынылған. Бұған дейін тек жергілікті мәслихат депутаттары сайлап келген ауыл әкімдерін халық тікелей сайлайтын саяси науқандағы дайындық барысын Қызылорда облыстық сайлау комиссиясы төрағасының орынбасары Болат Накиповтан сұрап білдік.</h4>
– Болат Нұржігітұлы елімізде алғаш рет өтіп жатқан ауыл әкімдерінің сайлауының халыққа пайдасы бар ма? Артықшылықтары қандай?
– Ауыл әкімдерін тікелей сайлау ең алдымен халық үшін маңызды екенін атап өткім келеді. Біріншіден, әкімдердің тұрғындар алдындағы жауапкершілігі артады, өйткені оларды жергілікті халық тікелей таңдайтын болады. Екіншіден, тұрғындар өздерінің туған ауылдарының өміріне белсенді қатыса алады.
Жалпы, ауылдық деңгейдегі әкімдердің сайлауын жанама сайлау жүйесінен тікелей сайлау жүйесіне өзгертілуінің басты себебі жергілікті халықтың басқару жүйесіндегі белсенділігін арттыру және еліміздің демократиялық процестерді одан әрі дамыту болып табылады.
– Біздің облыста қалай ұйымдастырылып жатыр?
– Қазір дайындық – ең маңызды сәт. Әкімдердің сайлауын ұйымдастыру және өткізу жөніндегі бекітілген күнтізбелік жоспарға сәйкес 26 маусымда үміткерлерді ұсыну басталып, 9 шілде күні жергілікті уақыт бойынша сағат 18.00-де аяқталды. Ұсынылған кандидаттарды тіркеу 14 шілде күні жергілікті уақыт бойынша сағат 18.00-ге дейін жүргізіліп, әрі қарай тіркелген кандидаттардың үгіт жұмысы 24 шілдеде сағат 00.00-ге дейін жүргізіледі.
Жергілікті атқарушы органдар сайлау өтетін ауылдық округтер бойынша әрбір сайлау учаскесі кесінінде сайлаушылардың тізімін а.ж. 5 шілдеде сайлау учаскелеріне сайлау учаскелеріне табыс етті. 10 шілдеден бастап, яғни бұгінгі күннен бастап әрбір сайлаушы сайлау учаскесіне барып, өзін сайлаушылар тізімінен тексеруіне болады. Аталған 40 ауылдық округте 36 мыңнан астам сайлаушы тіркелген.
Ұсынылған 151 кандидаттың 98-і өзін-өзі ұсынған болса, 53-і саяси партиялармен ұсынылғандар.
Осы ретте айта кету керек, өзін-өзі ұсынған екі кандидаттың өз өтініштеріне сәйкес кандидатуралары алынып тасталды.
– Саяси партиялардың үлесі қанша?
– Саяси партиялардың ішінен жоғары белсенділік танытқан «Nur Otan» партиясы. Бұл партиядан 32 кандидат, «Ауыл» партиясынан – 7 кандидат, &nbsp;«Ақ жол» партиясынан – 5 кандидат, «Адал» партиясынан – 4 кандидат, «ҚХП» – 5 кандидат ұсынылды.
Қазіргі таңға ұсынылған 151 кандидаттың 113-нің мемлекеттік қызмет заңнамасымен қойылған біліктілік талаптарға сәйкестігі анықталған болса, 6 үміткердің біліктілік деңгейі заңнамаға сай келмеді. Қалған кандидаттар анықталуда.&nbsp;
Әзірге біліктілік талаптарға сәйкестігі анықталған 113 кандидаттың 67-і (59,3%) тіркелді, оның 41-і саяси партиялар ұсынған кандидаттар.
Аудандар бойынша бөлетін болсақ: Арал – 34, Қазалыда – 3, Қармақшыда – 3, Жалағашта – 4, Сырдарияда – 3, Шиеліде – 5, Жаңақорғанда – 15 кандидат тіркелді.
– Үміткерлердің жас ерекшеліктеріне тоқталсаңыз.
– Ұсынылған кандидаттардың арасында 8 (5,2%) әйел, ең жас кандидат 25 жаста, ең үлкені 62 жаста. Кандидаттардың орташа жасы 41 жасты құрап отыр.&nbsp;&nbsp;
– Оларға қойылатын талап қандай?
– Қазақстан «Республикасындағы жергілікті мемлекеттік басқару және өзін-өзі басқару туралы» ҚР заңының 36-бабына сәйкес, сайлауға 25 жасқа толған ҚР азаматы кандидат ретінде қатыса алады. Сонымен қатар, ауылдық округ әкімінің лауазымы Е-R-1 санатындағы «Б» корпусының мемлекеттік әкімшілік қызметші лауазымына жатқызылуына байланысты мемлекеттік қызмет саласындағы заңнамамен белгіленген біліктілік талаптарға сәйкес келуі шарт. Ауылдық округтің әкімі болуы үшін аталған кандидатта жоғары немесе жоғары оқу орнынан кейінгі білімі мен жұмыс тәжірибесі бойынша қаралған біліктілік талаптардың 9 нұсқасының ең болмағанда біріне сәйкес келуі тиіс.
– Бір мандатқа қанша үміткерден келеді? Қай ауданда бәсекелестік жоғары?
– Орташа 1 мандатқа бәсекелестік 3,8 кандидаттан келеді. Аудандар бойынша ең жоғары бәсекелестік Арал, Қармақшы, Жаңақорған аудандарында байқалады. Ал, ауылдық округтер бойынша ең жоғары бәсекелестік Шиелі ауданындағы Майлытоғай және Жаңақорған ауданындағы Кейден ауылдық округтерінде, бұл округтерде 1 мандатқа 6 кандидаттан түсіп отыр.
– Сұхбатыңызға рақмет.
<a href="https://baq.kz/">BAQ.KZ</a>

Қазақстан және Қызылорда облысының жаңалықтары: Қоғам