<a href="https://kyzylorda-news.kz/">Kyzylorda-news.kz</a>. Облыс аумағында мотоциклмен жол-көлік оқиғаларының алдын алу және жол қозғалысы ережелерін өрескел бұзушылықтардың жолын кесу, оның ішінде мас жүргізушілерді анықтау мақсатында «Мотоцикл» жедел-профилактикалық іс-шарасы өткізілді.
Іс-шара барысында барлығы мотокөлік құралдарының жүргізушілері тарапынан жол қозғалысы ережесін бұзған 308 дерек тіркелді. 13 мотокөлік түнгі тыныштықты бұзған. техникалық ақауы бар 19 мотокөлік анықталды. 13 заңсыз қайта жабдықтау, 30 міндетті техникалық қарап-тексеруден өтпеген, 65 жүргізуші мотошлем пайдалану жөніндегі талаптар, 22 жүргізуші маневр жасау қағидаларын бұзған. 3 жүргізуші авариялық жағдай туғызып, 56 жүргізуші тиісті құжатсыз мотокөлік басқарған. 2 тұрғын мас күйінде мотокөлік басқарып, 2 қызылордалық көлік құралдарын басқару құқығынан айырылған және алкогольдік, есірткілік және уытқұмарлық масаң күйдегі адамның көлік құралын басқарғаны анықталды. 62 мотокөлік айып алаңдарына қойылды.
<blockquote>
 «Қазіргі таңда мотокөлік жүргізушісінің іс-әрекеті бойынша Қазақстан Республикасы Қылмыстық кодексінің 346-бабына сәйкес қылмыстық теріс қылық ісі қозғалып, сотқа дейінгі тергеп тексеру амалдары жүргізілуде», – делінген полиция департаментінің хабарламасында.
</blockquote>

«Мотоцикл»: Қызылордада жүргізушілер 308 рет құқық бұзған

<a href="https://kyzylorda-news.kz/">Kyzylorda-news.kz</a>.&nbsp; Арапа сөзі тілімізге арабтың «ъарафа» етістігінен енген. Мағынасы білу, түсіну дегенге саяды. Бұл күннің «арапа» деп аталуының себебі, зүлхиджа айының сегізі күні Ибраһим пайғамбар (ғ.с.) түсінде құрбандыққа баласын Исмайылды шалғанын &nbsp;көреді. Алғашқыда көрген түсін «жәй түс пе,&nbsp;әлде аян ба» деп ойлаған ол ертесіне (айдың тоғызына) тағы көреді. Осыдан кейін оның Алладан келген аян екенін біледі. Осы себепті бұл күнді «арафа (арапа)» деп атап кеткен деседі.
Биылғы 10-тамыз Ислам дінінде арапа күні болып саналады. Арапа дініміздегі қадір-қасиеті мол күндердің бірі. Осы күні жасаған амалдарымыздың сауабы мол болатыны көптеген хадистерде дәлел келтірілген:
Дұға жасау
Ардақты Пайғамбарымыздың (с.ғ.с.) білдіруінше, арапа – артықшылығы мол күн.&nbsp;Ол артықшылығы жағынан жұма күніне ұқсас. Ол жұмадан басқа күні жасалған жетпіс қажылықтан артық. Дұғалардың ең жақсысы да – арапа күні жасалған дұға<a href="http://www.muslim.kz/article/arapa-kuninin-artyqshylyqtary#_ftn1">[1]</a>. Ендеше, арапа күні барынша көбірек және шын ықыласпен дұға жасаған жөн. Әсіресе, дұғаларымызда тек өзіміздің бақытымызды тілеумен шектелмей, елдің амандығын, жұрттың тыныштығын, жастардың иманды болып өсуін, т.б. бүгінгі қоғамдағы өзекті мәселелердің де оң шешімін тілеп, жалбарынған жөн дер едік.
Алладан кешірім, тәубе тілеу
Арапа күні Алладан көбірек кешірім тілеп, біліп және білмей жасап қойған күнә-қателіктеріміз үшін тәубе етудің де маңызы зор. Өйткені, әзірет Әли (р.а.): «Алла Тағала дәл арапа күніндегідей еш уақытта көп адамды тозақ отынан азат етпейді», – деп жеткізгені мәлім. Сондай-ақ, тағы бір хадисінде сүйікті Пайғамбарымыз (с.ғ.с): «Арапа күнін құрметтеңдер. Өйткені, арапа – Алла қадірлі еткен күн», – деген. Алланың өзі қадірлі еткен болса, ол күні қандай құлшылық немесе жақсылық жасасақ та, қарымтасыз қалмайтыны анық. Осы мүмкіндікті пайдаланып елдегі жетім-жесірлерге қол ұшын созып, ауру-сырқаулардың көңілін сұрап, көршілермен, туыстармен қарым-қатынас жасап, мол сауапқа кенелуімізге болады.
Ораза ұстау
Арапа күні жасалатын ең ізгі істердің бірі – ораза ұстау. Бұл күні ораза тұту, бір жағынан, нәпсі тәрбиесі үшін маңызды болса, екінші жағынан, сауабы да ұшан-теңіз. Сүйікті Пайғамбарымыз (с.ғ.с.) бұл туралы былай деген: «Арапа күні ораза тұтушыға Адам пайғамбардан (яғни алғашқы адамнан) Қиямет сырнайы үрленгенге дейін өмір сүрген бүкіл адамдар санының екі есесіндей сауап жазылады».
Арапа күнін қадірлеп, қастерлеу
Әзірет Омар ибн Хаттаб (р.а.) өз заманындағы яһудилердің (еврейлердің) бірімен әңгімелесу барысында Арапа күнінің маңызын білдіреді. Яһудий оған: «Уа, Омар! Сендер бір аят оқисыңдар. Егер сол аят бізге түскенде, біз оның түскен күнін мереке етер едік», – дейді. Ол аят «Мәйда» сүресінің үшінші аяты еді. Онда былай делінеді: «Міне, бүгін сендердің діндеріңді кемеліне жеткіздім және өздеріңе арнаған нығметімді тұтас етіп толықтырдым. Сондай-ақ, Исламның сендерге дін болуына разы болдым». Бұл аят һижраның 10-жылы ардақты пайғамбарымыздың (с.ғ.с.) қоштасу құтбасы кезінде, қасиетті жұма әрі осы арапа күні түсірілді. Аят түсіп жатқанда Пайғамбарымыз (с.ғ.с.) Адба дейтін түйесінің үстінде Арафа тауында тұрған болатын. Алладан түскен уахидың салмағына шыдай алмай түйе шөгіп кетті.
Міне, осының бәрін білетін әзірет Омар (р.а.): «Біз ол күнді және сол күні осы аяттың Пайғамбарымызға (с.ғ.с.) түсірілген жерін де білеміз», – деп жауап қайырды. Бұл сөздің астарында арапа күнінің қадір-қасиетін де анық аңғарамыз.
Арапа күнінен бастап тәкбір тәшриқ айтылады
Арапа күні таң намазынан бастап, Құрбан айтынынан кейінгі төртінші күні екінті намазы біткенге дейін оқылатын 23 намаздың парыздарынан кейін «Аллаһу әкбар, Аллаһу әкбар. Лә иләһа иллаллаһ, уаллаһу әкбар. Аллаһу әкбар уә лилләһи хамд»&nbsp;деп тәкбир тәшриқ айтылады. Ханафи мәзһабы бойынша басы азат, тұрғылықты және ер адамдар үшін бұл күні тәкбір тәшриқ айтудың үкімі – уәжіп<a href="http://www.muslim.kz/article/arapa-kuninin-artyqshylyqtary#_ftn2">[2]</a>. Күнделікті дағды болмағандықтан, мешіт имамы тәкбір айтуды ұмытып кеткен жағдайда да жамағат өздері бастап айта береді.
Бауырсақ пісіріп, дайындық жасау
Бауырсақ – қазақ халқының ұлттық тағамдарының бірі. Қонақ күтуге дайындық жасалғанда, бауырсақ, шелпек пісіру ең алдымен аталады. Әрине, бұл шариғатымызда тыйым салынбаған тамаша үрдіс. Ардақты Пайғамбарымыздың (с.ғ.с.) «Кімде-кім Аллаға және ақырет күніне иман келтірсе, қонағын қадірлесін» деген хадисі белгілі. Ендеше, әр ұлт немесе халық өз қонағын әр түрлі қадірлейді. Ал, қонақжайлығы және меймандостығымен әлемге танылып үлгерген қазақ елінің бұл жағынан ешкімге ұқсай бермейтін өзіндік салты болуы заңды. Келген қонақтың астына мамық көрпеше төсеп, қолтығына жастық беріп, алдына кең дастархан жайып, оған еттен, төрт түлік мал сүтінен, ұннан жасалатын алуан түрлі тағамдарды қою, келген қонаққа ас-ауқаттан бұрын пейілімізді беру – біздің ұлттық дәстүріміз. Бұдан ешқашан айырылуға болмайды. Мұндай ерекшеліктерден ажырай бастасақ, бірте-бірте іргелі ұлт болудан да қаламыз. Алла Тағаланың адамдарды ұлттарға бөліп жаратуының да мәні осындай ұлттық ерекшеліктерімізбен байланысты болса керек.
Міне, арапа күні бауырсақ пісірудің, өзге де дайындық жасаудың бір себебі осында. Сөз соңында тілеріміз, шариғаттан қылдай ауытқымайтын ұлтымызға тән небір адал астарымыз дастарханымыздан үзілмегей. Келе жатқан Құрбан айт мерекесі барша мұсылмандарға құтты, берекелі, ырысты болғай!
Асылбек Әуезханұлы

Арапа күні жайында не білесіз?

<a href="https://kyzylorda-news.kz/">Kyzylorda-news.kz</a>.&nbsp; «Қазатомөнеркәсіп» ҰАК» АҚ «Байкен-U» ЖШС сатып алу департаментінің басшысы пара алу ісі бойынша ұсталды, деп хабарлайды сыбайлас жемқорлыққа қарсы іс-қимыл агенттігі.
<blockquote>
 «Қазақстан Республикасы сыбайлас жемқорлыққа қарсы іс-қимыл агенттігінің Қызылорда облысы бойынша департаменті мердігер ұйым өкілінен 2,2 миллион теңге көлемінде пара алғаны үшін «Қазатомөнеркәсіп» ҰАК» АҚ «Байкен-U» ЖШС сатып алу департаментінің басшысын ұстады», – делінген ақпаратта.
</blockquote>
Лауазымды тұлға орындалған жұмыстардың актілеріне кедергісіз қол қою және қызмет көрсету шарты бойынша аудару үшін ақша алған.
Өзге ақпарат жарияланбайды. Тергеу жалғасып жатыр.
«Қазатомөнеркәсіп» ҰАК” АҚ – дүниежүзіндегі ауқымды ресурстық базаның бірін игеру басымдығына ие әлемдегі ең ірі табиғи уран өндіруші.
Қазақстанның бес аймағында орналасқан компанияның 40 өндірістік нысанында 20 мыңға жуық қызметкер жұмыс істейді.

«Байкен-U» ЖШС сатып алу департаментінің басшысы пара алу ісі бойынша ұсталды

<a href="https://kyzylorda-news.kz/">Kyzylorda-news.kz</a>. Ақпарат құралдарында биылғы Құрбан айтта малды жөн-жосықсыз соймай, бар малды сақтап қалу және жиналған қаражатты қуаңшылық болып жатқан Маңғыстау мен Қызылорда облыстарына көмек ретінде беру туралы пікір айтылуда. Осыған байланысты біз де пікір білдіруді жөн көрдік.
Әуелі айтып кетер жайт, Құрбан айт намазынан кейін үш күн ішінде материалдық мүмкіндігі бар, жағдайы жақсы мұсылман адамға құрбандық шалу – міндет. Бұл – Алланың мұсылман баласына жіберген әмірі. Бұған қатысты қасиетті Құранда Алла Тағала:&nbsp;«Раббыңның разылығы үшін намаз оқы және құрбан шал»&nbsp;(«Кәусар» сүресі, 2-аят) деп бұйырған. Алланың бұйырған амалын өзгертуге, оны бұрмалауға әсте болмайды.
Ал Пайғамбарымыз Мұхаммедтің (оған Алланың салауаты мен сәлемі болсын) өміріне зер салсақ, Алла елшісі (оған Алланың салауаты мен сәлемі болсын) құрбандыққа екі ақ қошқарды сойған. Екі ақ қошқарды жатқызып, оны аяғымен тіреп, бисмилләні және тәкбірді айтып бауыздаған Пайғамбарымыз Мұхаммед (оған Алланың салауаты мен сәлемі болсын) өзінің өсиетті хадистерінің бірінде:&nbsp;«Адам баласы құрбан айт күні (құрбан шалып) қан ағызудан да сүйікті басқа іспен Алла Тағалаға жақындаған емес. Қаны ағызылған мал қиямет күні мүйіздері, тұяқтары және жүндерімен келеді. Ағызылған қан жерге тамбай жатып, Алла Тағаланың құзырында үлкен мақамға жетеді. Сондықтан құрбандарыңды көңіл ризашылығымен шалыңдар»&nbsp;деген.
Құрбандық шалу адам баласын тақуалыққа жетелейді. Өйткені, мұсылман адам құрбандығын шынайы ниетпен, Алла разылығы үшін шалады. Алла Тағала адамның амалына емес, ниетіне қарайды. Сондықтан Ислам дінінде орындалатын кез келген амалдың сыртқы формасына емес, ішкі мазмұнына, яғни ниетке мән беріледі. Ниетті түзетудің мәні осында. Шын мәнінде бүкіл әлемнің Жаратушысы болған Раббымыз адамның шалған құрбандығына мұқтаж емес. Алла тек шынайы ниетпен жасалған құлшылықты қабыл етеді. Сондықтан Құранда мынадай аяттар келтірілген:&nbsp;«Аллаға олардың еттері де, қандары да жетпейді. Алайда Оған сендердің тақуалықтарың ғана жетеді»&nbsp;(«Хаж» сүресі, 37-аят).
Құрбан айт күндері жабырқаған жандарды, қамкөңіл адамдарды, мүгедектер мен жетімдерді, жесір әйелдер мен қараусыз қалған қарттарды қуандырудың сауабы мол. Құрбандық етінің мұқтаж жандарға таратылуының мәні үлкен. Бай мұсылман құрбандық шалғаннан кейін оның етін көмекке зәру адамдарға тарату арқылы бойындағы қатыгездік, тәкаппарлық секілді жағымсыз сипаттардан арыла бастайды. Өйткені, садақа беру – мұсылмандардың арасына мейірімдік сынды сезімді ұялататын сауабы мол іс. Құрбан шалу – байға міндет, кедейге көмек болатыны сондықтан деп білеміз.
<img src="https://imgs.muftyat.kz/orig/1c7937f0-d548-4607-bb5a-b6b2574432ff.jpeg" alt="" />
Ақпарат құралдарында тарап жатқан пікір арасында құрбандық шалудың орнына садақа берген дұрыс деген көзқарастар айтылып жатыр. Бұған қатысты Қазақстан мұсылмандары діни басқармасының Шариғат және пәтуа бөлімі мынадай жауап жазды: «Құрбандық шалуға міндетті болған адам белгілі малды бауыздап, қан шығаруы тиіс. Біздің мәзһабта құрбан айт күндері құрбандықты бауыздамай, ақшасын садақа ете салу дұрыс емес. Өйткені, шариғат бойынша құрбандық малын бауыздап, қан ағызу – міндет. Алайда, сатып алған құрбандығын айт күндері шала алмаса, оны тірідей садақа етеді. Ал егер құрбандықты сойып қойған болса, оның барлық етін мұқтаждарға таратады, өзі одан ештеңе жемейді. Өйткені, уақыты өтумен құрбандық міндеті садақа міндетіне ауысады. Егер құрбандықты әлі сатып алмаған болса, құрбандық құны мөлшерінде садақа етеді».
Қазақстан мұсылмандары діни басқармасының төрағасы, Бас мүфти Наурызбай қажы Тағанұлы еліміздегі барша мұсылман жамағаты мен кәсіпкерлерге жолдаған Үндеуінде: «Сүйікті Пайғамбарымыз Мұхаммед (оған Алланың салауаты мен сәлемі болсын):&nbsp;«…Кімде-кім мұсылман бауырының қажетіне жараса, Алла Тағала да оның қажетін өтейді…»&nbsp;деген сүйінші хабар жеткізген. Қазақстан мұсылмандары діни басқармасы қуаңшылықтан зардап шеккен өңірлердегі шаруаларға қолдау көрсету мақсатында «Қиындықта ел бірге» атты қайырымдылық акциясын бастады. Акция аясында Қызылорда, Маңғыстау облыстарына жем-шөп жөнелтілетін болады. Осы игі іске үлес қосып, сынақты сәттерді бастан кешіп отырған отандастарымызға қол үшын созуға шақырамын» деді.
Адамға жақсылық жасау үшін Алланың әмірін «өзгерту» шарт емес. Алла Тағала адам баласы үшін қайыр-жақсылығы болғаны үшін белгілі амалдарды парыз етеді. Ал оны орындамау немесе адамдарды сол парызды орындамауға шақыру – өте өрескел қателік әрі сұрауы жоғары болатын іс. Мұндай амал-әрекетке барудың өзі қорқынышты.&nbsp;&nbsp;&nbsp;
Алла Тағала еліміз бен жерімізге жақсылығын жаудырып, шалған құрбандығымыз бен берген садақамызды қабыл етіп, мол сауаптан жазғай. Әмин!&nbsp;
<a href="https://www.muftyat.kz/kk/articles/kurban-ait/2021-07-13/36950-kurban-shalu-baiga-mindet-kedeige-komek/">Бақдәулет НҰРМАТҰЛЫ</a>

Құрбан шалу – байға міндет, кедейге көмек&#8230;

<a href="https://kyzylorda-news.kz/">Kyzylorda-news.kz</a>. 19 шілде күні таңғы сағат 7.20-да Қызылорда қаласындағы балаларға арналған «Пумба» ойын-сауық орталығында газ бен ауа қоспасының <a href="https://www.instagram.com/p/CRfjwmaAzEJ/?utm_medium=share_sheet">жарылысы болды</a>. Бұл туралы облыстық өрт сөндіру және авариялық құтқару жұмыстары қызметінің баспасөз қызметі хабарлады.
<blockquote>
 «Тілсіз жау ғимараттың бірінші қабатын түгел шарпыған. Өрт сағат 7-ден 44 минут өткенде оқшауланып, 8.15-те ауыздықталды. Жарылыс нәтижесінде ағаш ағаш сарай мен шатыры құлады. Сондай-ақ Жеңіс көшесі, 20-үйдің терезелеріне зақым келді. Қайтыс болғандар мен жарақат алғандар жоқ», – делінген хабарламада.
</blockquote>
Өрттің шығу себебі табиғи газдың кемуінен делініп отыр.
<img src="https://kyzylorda-news.kz/wp-content/uploads/2021/07/pwmba.jpg" alt="" />

Қызылордадағы «Пумба» ойын-сауық орталығында жарылыс болды

<a href="https://kyzylorda-news.kz/">Kyzylorda-news.kz</a>. Бүгін Президент Қасым-Жомарт Тоқаев еліміздегі санитарлық-эпидемиологиялық ахуал жөнінде жұмыс кеңесін өткізеді, деп хабарлайды ҚазАқпарат.
Жиынға Премьер-Министр, ведомстволардың басшылары, қалалар мен облыстардың әкімдері қатысады.
Мемлекет басшысы коронавирус індетіне қарсы күрес жөніндегі шаралар туралы Үкіметтің есебін тыңдайды. Кеңес барысында өңірлердегі жалпы жағдайды жақсартуға және Қазақстан азаматтарының денсаулығын сақтауға бағытталған үйлесімді іс-қимыл жоспары қабылданбақ.

Бүгін Мемлекет басшысы коронавирусқа қарсы күрес бойынша кеңес өткізеді

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 5317 адамда коронавирус індеті ПТР арқылы расталып ауырғаны белгілі болды. Бұл туралы www.coronavirus2020.kz хабарлайды.
Аймақтар бойынша:
Нұр-Сұлтан қаласы – 1367,
Алматы қаласы – 798,
Шымкент қаласы – 470,
Ақмола облысы – 178,
Ақтөбе облысы – 159,
Алматы облысы – 126,
Атырау облысы – 293,
Шығыс Қазақстан облысы – 87,
Жамбыл облысы – 53,
Батыс Қазақстан облысы – 204,
Қарағанды облысы – 689,
Қостанай облысы – 126,
Қызылорда облысы – 127,
Маңғыстау облысы – 203,
Павлодар облысы – 170,
Солтүстік Қазақстан облысы – 91,
Түркістан облысы – 176.
Жалпы ел бойынша ауырғандар саны 494222.

COVID-19: Өткен тәуліктегі мәлімет жарияланды

<a href="https://kyzylorda-news.kz/">Kyzylorda-news.kz</a>. Дүйсенбіде еліміздің солтүстігі мен орталығында жел күшейіп, жаңбыр жауады, оңтүстігі мен батысында ыстық болады, деп хабарлайды Қазгидромет.
19 шілдеде циклонға әкелген атмосфералық ағынға байланысты Қазақстан аумағының басым бөлігінде құбылмалы ауа райы сақталады – жаңбыр жауып, найзағай ойнайды, кей жерлерде бұршақ жауады, тек елдің оңтүстігі мен батысында күн райы ашық болады. Кей жерлерде жел күшейеді, оңтүстікте шаңды дауыл соғады, солтүстікте және орталықта түнде және таңға жақын тұман түсуі мүмкін.
Қызылорда облысының кей жерлерінде күндіз жел 15-20 м/с күшейіп, шаңды дауыл соғады.

19 шілдеге арналған ауа райы болжамы

Kyzylorda-news.kz. Алла қаласа, ертең, 19 шілде&nbsp;– Арапа күні. Бұл күні орындалатын ең ізгі амал&nbsp;– ораза тұту. Әрбір мұсылман баласы шама келгенше осы күнді оразамен өткізгені абзал.&nbsp;
Қазақстан мұсылмандары діни басқармасы ірі қалалар мен облыс орталықтарының Арапа күнгі ораза және намаз кестесін ұсынып отыр. Алла Тағала ниеттеріңізді қабыл етсін!
<img src="https://kyzylorda-news.kz/wp-content/uploads/2021/07/whatsapp_image_2021-07-18_at_20.00.43.jpeg.jpg" alt="" />

Арапа күнінің ораза кестесі

<a href="https://kyzylorda-news.kz/">Kyzylorda-news.kz</a>. **Әрбір ата-ана аласын жөргектен бастап қадағалауда ұстап, «мінсіз адам» тәрбиелеуге тырысады. Түрлі жағдайларға тыйым салып, бала сарбаз секілді күн кешеді. Оған теледидар, телефонды ұзақ қарауға, ата-ана қауіпті деп санаған ойындарды ойнауға, өз бетінше іс-әркет жасауға тыйым салынады. Әрине, тәрбиеде қаталдыққата керек, дегенмен кейде баланың әрекеті бұзықтық секілді көрінсе де тыйып тастамай, керісінше қолдап жіберуге болатын сәттері де бар. 
** 
**Шашып-төгіп өз бетінше тамақтануына БОЛАДЫ 
** 
Кейбір аналар артық іс-қимылдан, яғни үй жинау, сүртіп алу, кір жуу секілді дүниелерді қосымша істеуден қашқақтап, 4-5 жасар болып қалған балаларын өздері тамақтандырып жатады. Мұндайда бір жағынан, бітпейтін үй тірлігінен жалығатын қыз-келіншектерді де түсінуге болады. Алайда ертең мектеп немесе балабақшаға барған бала өз бетінше дұрыстап қасық ұстап тамақтана алмаса, бұл өкінішті жағдай болмақ. Сондықтан ата-ананың балаға шашып-төгіп жатса да өз бетінше тамақтануына мүмкіндік бергені абзал. Тіпті мұны ерте жастан бастаған дұрыс. Біріншіден, мұндай жағдайда баланың іс-қимылы ширайды, екіншіден – бала ерте бастан тәуелсіз болуға ұмтылады.
**Өзге балаларға есесін қайтаруға БОЛАДЫ 
** 
Негізі дұрыс тәрбие берген әрбір ата-ана баласын «жұдырықтасу» дұрыс емес, ондайдан алыс жүр деп тәрбиелейді. Ал ақылды ата-аналар «сенің есе қайтаруға құқың бар» деп үйретеді. Әрине, бұл жерде мәселе баланы төбелеске жақындыққа үйрету емес, тек өз есесін жібермеу. 3-5 жастағы балалар мәселені мәмілемен шеше алмайтыны анық. Сондықтан бала өзіне өзге біреу тиіссе оған соған жауап қайтаруға толықтай негіз бар екенін білуі тиіс. Бірден “төбелесе кет” деп ешбір ата-ана айта қоймасы анық. Алғашқыда «ойыншығың өзіңе керек болса, “өзім ойнаймын” де, тартып алма» деген секілді сөздерді бала құлағына құйып отырған жөн. Ал егер өзі бірінші бастап ұрып, тиісіп жатса, қарап қалмауды да үйреткен дұрыс.
**Ойдан шығарылған достарымен ойнауға рұқсат етуге БОЛАДЫ 
** 
Негізі балалардың 40 пайызының ойдан шығарылған достары болады екен. Бірақ көптеген ата-аналар өз қиялындағы досымен ойнаған баласын көргенде психикасында ауытқушылық бар деп түсінеді. Алайда мектеп жасына дейінгі балалардың мұндай әрекеті қалыпты жағдай саналады. Сондықтан өз-өзімен сөйлесіп ойнап жүрген балаға ұрсып немесе «бұлай істеуге болмайды» деп түсіндіріп қажеті жоқ. Психолог мамандардың пайымынша ойынан шығарған достармен ойынға берілетін мұндай балалардың ойлау қабілеті өте жоғары болады екен. Келешекте ол бала әлем таныған ғалым болуы мүмкін.
**Киімін былғап кірлетуіне БОЛАДЫ 
** 
Негізі бала ойыннан тап-таза болып, үстін былғамай келсе, демек оның ойыны дұрыс болмаған, жақсы ойнай алмаған. Сондықтан ойнауға немесе ойын алаңына бара жатқан балаға әдемі киімдерін кигізіп алып шығудың қажеті жоқ. Себебі үстін шамалы бүлдірсе, ұрыса жөнелесіз немесе үстіңді кір етесің деп еркін ойнауға мүмкіндік бермейсіз. Бала деген ең бір шаршамайтын зерттеушілер. Олар барлық нәрсеге қызығып, айналасының бәрін танып білгісі келіп тұрады. Сондықтан оларға айналасын танып, сұрақтарына жауап табу үшін жаңа көйлек пен былғанған шалбарды уайымдамай барлық нәрсені ұстап көруге мүмкіндік берген дұрыс.
**Өз заттарын сындырып қоюына БОЛАДЫ 
** 
Егер балаға бір зат, ойыншық әперсеңіз, демек ол сол заттың толыққанды егесі. Яғни, ол заттың келешегі жас егесінің қолында. Ол оны мұқият, ұқыптап ұстаса да, қызықтап бөлшектеп шашып тастаса да өзі біледі. Сондықтан бала ойыншықтарын шашып, бөлшектеп тастаса ұрыспаған дұрыс. Балалар бәрін ашып көріп білгісі кеп тұрады. Қайта мүмкіндікті пайдалана отырып, пайдалы сабақ берген жөн. Яғни өз ісіне, өз заттарына өзі жауапты екенін айтып түсіндіре кету керек. Егер бала өз ойыншығын сындырып тастап басқасы керек деп қиғылық салатын болса, бірден дүкенге жүгіріп айтқанын орындаудың қажеті жоқ. Сонда ғана бала өз іс-әрекетінің салдарын түсінетін болады.
**Өзгенің ісімен айналысуға рұқсат беруге БОЛАДЫ 
** 
Баланың қызығушылығын еш уақытта басуға болмайды. Ғалымдардың зерттеуінше шектен тыс сыншыл ата-ана психологиялық тұрғыдан тұрақсыз балаларды тәрбиелейді екен. Үнемі ата-анасының «олай жасауға болмайды, ол балалардың ісі немесе қыздардың тірлігі қайшыны ұстама» деген секілді сөздерді естіп өскен бала келешекте өзін-өзі төмендетіп, қызығушылығынан бас тартып, өмірдегі жолынан жаңылып жатады екен. Сондықтан ұлыңыз қолына қайшы алып мата қырқып, қуыршақтарды киіндіріп ойнап жүрсе немесе қызыңыздың қолынан машина түспесе, абдырмаңыз, ол ұл-қыздан келешек дизайнер, машина құрастырушы т.б маман шығуы мүмкін.
Дереккөз:&nbsp;<a href="http://www.matritca.kz/engine/go.php?url=aHR0cDovL2VybnVyLmt6">ernur.kz</a>

Балаға кейде бұзықтық жасауға рұқсат берген дұрыс

<a href="https://kyzylorda-news.kz/">Kyzylorda-news.kz</a>. Қазалылық тұрғын Нұрлыбек Нұрқожаев тамшылатып суару арқылы 3,5 гектар жерге қарбыз егіп, өнімдерін аудан тұрғындарына қолжетімді бағада сатып отыр.
Қарбыздың алғашқы өнімдері 2 шілде күні піскен. Оның себебін бақша егуші азамат былайша түсіндірді.
<blockquote>
 «Біріншіден бұл қарбыздың 55 күнде пісетін «Бомбикс F1» дейтін сорты. Екіншіден тамшылатып суарудың көмегі. Судың тапшылығы кезінде бұл әдістің тиімдігі көп. Суды үнемдеп қана қоймай, тыңайтқышты да арнайы түтік бойымен жібереміз», – деді бақша еккен азамат.
</blockquote>
Нұрлыбек Нұрқожаевтың тамшылатып суаруға қажетті құрал-жабдықтарының жалпы құны 3,7 млн теңгені құрайды. Оның 2 млн теңгесін «Бизнезтің жол картасы 2020-2025» мемлекеттік бағдарламасы арқылы қол жеткізген. Бағдарлама аясында өзінің инновациялық идеясын қорғап, 2 млн теңге грант қаражатын ұтып алған. 
Ерте піскен қарбызды аудан тұрғындарымен қатар, көршілес Арал және Қармақшы аудандарынан да келіп сатып алуда.
Қарбыздың «Бомбикс F1» деп аталатын сорты бүгінгі таңда екінші рет өнім беріп жатыр. Одан бөлек, жақында «Продюсер» деп аталатын сорты піседі.
Нұрлыбек Нұрқожаев қарбыздан бөлек, 1 гектар жерге асқабақ пен қияр да еккен.
Бүгін аудан әкімі Мұхтар Оразбаев «Шақкөз» учаскесіндегі орналасқан бақшаға арнайы барып, еңбекқор азаматтың жұмысымен танысты.
Бақша басына арнайы келген аудан басшысына Нұрлыбек Нұрқожаев өзінің ұсыныс-пікірлерін айтып, ойларымен бөлісті. Ауданымыздағы топырақтың сор болуына байланысты бақша егетін шағын шаруаларға жер тегістейтін техниканың ауадай қажет екендігін жеткізді. Себебі бақшадан мол өнім алу үшін міндетті түрде жер тегіс болып, сумен бірнеше қайтара шайып алу маңызды.
Аудан әкімі Мұхтар Оразбаев қолынан іс келетін азаматтарды әрдайым қолдайтынын айтып, бұл мәселені алдымен зерттеп алу қажеттігін жеткізді.

Қазалылық дихан тамшылатып суару арқылы қарбыз екті

Kyzylorda-news.kz. Жексенбіде елімізде жаңбыр жауып, тұман түседі, жел күшейеді. Батыс өңірлерле қатты ыстық болады, деп хабарлайды Қазгидромет.
18 шілдеде циклонға байланысты Қазақстанның басым бөлігінде ауа райы құбылмалы болады, жаңбыр жауады, найзағай ойнайды, кей жерлерде бұршақ жаууы мүмкін.
Тек еліміздің оңтүстігінде, оңтүстік-батысында және шығысында күн райы ашық болуы ықтимал. Кей жерлерде жел күшейіп, солтүстікте тұман түседі.

Қазақстан және Қызылорда облысының жаңалықтары: Қоғам

«Мотоцикл»: Қызылордада жүргізушілер 308 рет құқық бұзған

Арапа күні жайында не білесіз?

«Байкен-U» ЖШС сатып алу департаментінің басшысы пара алу ісі бойынша ұсталды

Құрбан шалу – байға міндет, кедейге көмек…

Қызылордадағы «Пумба» ойын-сауық орталығында жарылыс болды

Бүгін Мемлекет басшысы коронавирусқа қарсы күрес бойынша кеңес өткізеді

COVID-19: Өткен тәуліктегі мәлімет жарияланды

19 шілдеге арналған ауа райы болжамы

Арапа күнінің ораза кестесі

Балаға кейде бұзықтық жасауға рұқсат берген дұрыс

Қазалылық дихан тамшылатып суару арқылы қарбыз екті

Жексенбіге арналған ауа райы болжамы

Қазақстан және Қызылорда облысының жаңалықтары: Қоғам

«Мотоцикл»: Қызылордада жүргізушілер 308 рет құқық бұзған

Арапа күні жайында не білесіз?

«Байкен-U» ЖШС сатып алу департаментінің басшысы пара алу ісі бойынша ұсталды

Құрбан шалу – байға міндет, кедейге көмек&#8230;

Қызылордадағы «Пумба» ойын-сауық орталығында жарылыс болды

Бүгін Мемлекет басшысы коронавирусқа қарсы күрес бойынша кеңес өткізеді

COVID-19: Өткен тәуліктегі мәлімет жарияланды

19 шілдеге арналған ауа райы болжамы

Арапа күнінің ораза кестесі

Балаға кейде бұзықтық жасауға рұқсат берген дұрыс

Қазалылық дихан тамшылатып суару арқылы қарбыз екті

Жексенбіге арналған ауа райы болжамы

Құрбан шалу – байға міндет, кедейге көмек…