<a href="https://kyzylorda-news.kz/">Kyzylorda-news.kz</a> Қармақшы ауданы әкімдігінің мәжіліс залында құқық бұзушылықтың алдын алу бағытында белсенділік танытқан бірқатар азаматтарды марапаттау шарасы өтті.Іс-шараға аудан әкімі Жандос Еркінбек қатысып, Мемлекет басшысы Қасым-Жомарт Тоқаевтың Қазақстан халқына Жолдауында айқындалған «Заң мен тәртіп» қағидатының маңызына тоқталды.<blockquote>-Қоғамдық тәртіп пен азаматтардың қауіпсіздігін қамтамасыз ету – бәріміздің ортақ жауапкершілігіміз. Сондықтан «Заң мен Тәртіп» қағидатын сақтауды алдымен өзімізден бастап, қоғамдық қаупсіздікті қамтамасыз етуіміз қажет, – деді Жандос Еркінбек.</blockquote>Аудан әкімі сондай-ақ «Қылмыссыз өңір – кемел келешек кепілі» жобасының аудан тұрғындары арасында құқықтық мәдениетті қалыптастыруға, жастар тәрбиесіне және қоғамдық тәртіпті нығайтуға оң ықпал етіп отырғанын атап өтті.Іс-шара барысында аудан прокуроры Нұрбек Қаратаев заң талаптарын сақтау арқылы қоғамда тәртіп және жауапкершілік орнайтындығын атап өтіп, құқық бұзушылықтың алдын алу бағытында жемісті еңбек еткен бірқатар үздік қызметкерлерді «Алғыс хатымен» марапаттады.Сонымен қатар салтанатты жиында аудандық қоғамдық кеңес төрағасы Әбдірахман Құлдүйсенов және аудандық полиция бөлімі бастығының орынбасары Оспан Ешжанов қатысып, сала мамандарына ізгі тілектерін білдірді.Жиын соңында аудан әкімі «Заң және тәртіп» идеологиясын ілгерілету жөніндегі 2025–2030 жылдарға арналған тұжырымдама аясында ауданда атқарылып жатқан жұмыстар алдағы уақытта да жалғасатынын атап өтті.Фото: Қармақшы ауданы әкімінің баспасөз қызметі

 «Қылмыссыз өңір – кемел келешек кепілі» аясында қабылдау өткізілді

<a href="https://kyzylorda-news.kz/">Kyzylorda-news.kz</a>&nbsp; Жалағаш ауданының әкімінің тапсырмасына сәйкес аудан әкімінің орынбасары Әнуарбек Дәрмағанбетов, аудандық кәсіпкерлік және өнеркәсіп бөлімінің басшысы Қайрат Жапбасбаев және тиісті сала мамандары ауылдық округ тұрғындарымен кездесу өткізді.Кездесу барысында «Ауыл аманаты» жобасы аясында кәсіп бастау және қолданыстағы кәсіпті кеңейту бағытындағы тиімді шарттар жан-жақты түсіндірілді.Ауылдық жерлерде кәсіпкерлікті дамытуға бағытталған «Ауыл аманаты» бағдарламасы аясында тұрғындарға жеңілдетілген несиелер ұсынылуда. Атап айтқанда, несие мөлшерлемесі жылдық 2,5 пайызды құрайды. Микрокредиттің мерзімі 5 жылға дейін, ал мал шаруашылығы бағытындағы жобалар үшін 7 жылға дейін беріледі.Сонымен қатар, жоба қатысушыларына өз кәсібін ашу немесе кеңейту, жаңа жұмыс орындарын құру, ауыл тұрғындарының табысын арттыруға бағытталған мүмкіндіктер туралы кеңінен ақпарат беріліп, тұрғындар жоба аясында өздерінің ұсыныс-пікірлерін ортаға салды.Фото:&nbsp;Жалағаш ауданы әкімінің баспасөз қызметі

«Ауыл аманаты» жобасының тиімді шарттары түсіндірілді

<a href="https://kyzylorda-news.kz/">Kyzylorda-news.kz</a> Қасым-Жомарт ТОҚАЕВ:<blockquote>– Жаңа жыл қарсаңында дәстүрге айналған Петербургтегі кездесуіміз мазмұнды өтті. Біз ЕАЭО қызметіне қатысты бірқатар мәселені қарастырып, шешімдер қабылдадық. ТМД форматы аясындағы ықпалдастықтың аса маңызды, өзекті мәселелері талқыланды. ТМД – беделді әрі заман талабына сай халықаралық ұйым. Биыл өзара ынтымақтастығымыз табысты болғаны сөзсіз. Екіжақты қарым-қатынас қарқынды дамып келеді. 12 қарашада Ресейге жасаған мемлекеттік сапарым өте нәтижелі өтті. Сол сапар барысында қонақжайлық танытқаныңыз үшін Сізге ризашылығымды білдіремін. Қазақстан Ресеймен стратегиялық серіктестік және одақтастық байланыстарға ерекше мән береді. Біз Қазақстан мен Ресей азаматтарының күнделікті тұрмыс-тіршілігіне қатысты мәселелерде бірге әрекет етуіміз қажет. Ынтымақтастығымыз бен стратегиялық серіктестігімізді нығайтуға бағытталған ортақ жұмысымыз қос халықтың түпкі мүддесіне сай келеді. – деді Мемлекет басшысы.</blockquote>Владимир ПУТИН:<blockquote>– Біз кешеден бері біраз жұмыс атқардық. Бүгінгі бейресми кездесу барысында ҰҚШҰ, ТМД аясындағы қызметімізді және екіжақты ынтымақтастық жағдайын талқыладық. Дегенмен Сізбен Қазақстан және Ресей арасындағы өзара байланыстардың басым бағыттарын дамыту үшін арнайы кездескеніме қуаныштымын. Менің ойымша, барлық сала оң қарқынмен алға ілгерілеп келеді. Екі ел арасында шешілмеген немесе түйткілді мәселе жоқ. – деді Ресей Президенті.</blockquote>t.me/aqorda_resmi

Мемлекет басшысы Ресей Федерациясының Президентімен кездесті

<a href="https://kyzylorda-news.kz/">Kyzylorda-news.kz</a> Тәуелсіз мемлекеттер достастығына мүше елдер басшыларының кездесуіне Қазақстан Президенті Қасым-Жомарт Тоқаевпен бірге Ресей Президенті Владимир Путин, Армения Премьер-министрі Никол Пашинян, Беларусь Президенті Александр Лукашенко, Қырғызстан Президенті Садыр Жапаров, Тәжікстан Президенті Эмомали Рахмон, Түрікменстан Президенті Сердар Бердімұхамедов, Өзбекстан Президенті Шавкат Мирзиёев қатысты.ТМД басшылары өзара ынтымақтастықтың негізгі даму бағдары мен қадамдарын талқылады.Сондай-ақ Ұйым аясындағы ықпалдастықтың өзекті мәселелері жөнінде пікір алмасты.t.me/aqorda_resmi

Қасым-Жомарт Тоқаев ТМД-ға мүше мемлекеттер басшыларының бейресми кездесуіне қатысты

<a href="https://kyzylorda-news.kz/">Kyzylorda-news.kz</a> Ақпарат алмасу, жаңалықтан қалыс қалмау, уақытпен бірге қадам басу – барлығы да телекоммуникация саласының арқасында жүзеге асып отыр. Қазіргі цифрлы дәуірде интернетсіз, яғни желілік байланыссыз өмірді елестету мүмкін емес. Осы үлкен саланың Қазақстандағы басты тірегі, байланыс саласының көшбасшысы – «Қазақтелеком» акционерлік қоғамы екені баршаға мәлім.Жуырда ғана жұмысын бастаған «Caspian Services Asia» ЖШС-на қарасты бірнеше нысанның өткен апта соңында ресми түрде лентасы қиылды. Облыс әкімінің орынбасары Ардақ Зебешов пен облыстық мәслихат төрағасы Мұрат Тілеумбетов және зиялы қауым өкілдері арнайы іс-сапармен келіп, жаңа ғимараттардың ашылу салтанатына қатысты. Сонымен қатар инвестор салған асфальт зауыты да жұмысын бастады.Қазақтелеком – еліміздің түкпір-түкпірін бір желіге тоғыстыратын алып құрылым. Қала мен ауылдың арасын жалғап, тұтас бір ұлттың өмір сапасын арттырып отырған стратегиялық маңызы бар сала. Интернет, телефон, теледидар, цифрлық технологиялар, түрлі ақпараттық сервистер – бәрі де осы компания арқылы халық игілігіне ұсынылуда. Бүгінде ел экономикасының дамуы, кәсіпкерлік бағыт пен мемлекеттік қызметтердің қолжетімділігі – тікелей байланыс саласына тәуелді.Білім – білігін осындай жауапты да күрделі салаға арнап, ел игілігі жолында табанды еңбек етіп жүрген жандар аз емес. Солардың қатарында «Қазақтелеком» мекемесінің Жаңақорған аудандық бөлімінде 20 жылдан аса қызмет етіп келе жатқан білікті маман Бағдат Кадыров жөнінде айрықша тоқталуымыздың жөні жоқ емес. Бағдат бұл салаға 2002 жылы келді. Ол жылдары елдімекендер түгілі, аудан орталығының өзінде интернет пен байланыс бүгінгідей кең көлемде дамымаған, мүмкіндігі де шектеулі болатын. Ұялы байланыс толық қолжетімді еместін, қарапайым телефон желісінің өзі тұрақсыз еді. Сол уақытта байланыс саласында қызмет ету – үлкен жауапкершілік пен төзімділікті талап ететін ауыр мехнат болатын. Қыстың қақаған аязында, жаздың аптап ыстығында айдалаға сым тарту, істен шыққан желіні қалпына келтіру, апатты жағдайларды қалыпқа келтіру – саланың бейнетке толы машақатын көсе-көлденеңдеді.Жиырма үш жылға жуық уақыт ішінде ол қарапайым маманнан тәжірибесі кемелденген, аудан аумағындағы байланыс жүйесінің сенімді тірегіне айналды. Бүгінгі таңда интернет – адам өміріне аса қажет өмірлік ресурс. Онлайн білім, қашықтан жұмыс істеу, электронды қызмет, банк операциялары, сауда, медицина, мемлекеттік қызмет – барлығы интернет арқылы жүзеге асады. Қазіргі қоғамда интернетсіз жүйе – дамудан шет қалмақ. Осы тұрғыда ауыл-аймақты интернетпен қамту – әлеуметтік тұрғыдан аса маңызды міндет.Бағдат Қадыров ауылдардың байланыс жүйесін дамыту ісіне де тікелей атсалысып келеді. Атқарылған жұмыстардың нәтижесінде бүгінде көптеген ауыл тұрғындары интернет игілігін көріп отыр. Бұрын қалаға барып қана шешілетін мәселелер қазір ауылдан шықпай-ақ онлайн түрде орындалады. Оқушылар қашықтан білім алып, ынталы жастар заманауи кәсіппен айналысып, ал ауыл тұрғындары жақын-жуықтарымен бейнеқоңырау арқылы еркін сөйлесіп отыр. Шалғай ауылдарға талшықты-оптикалық желі жеткізу – аса ауыр, күрделі жұмыс. Жер бедері, ауа райы, техникалық қауіпсіздік, ұзақ қашықтық – бәрі де кедергі. Қыс-жаз демей, белгіленген аймаққа бетон бағаналар орнатылады, жүздеген шақырым сым тартылады, жүйелер тексеріліп, ретке келтіріледі. Мұның барлығы нақты есеп, жоғары дәлдік, үлкен тәжірибе мен жауапкершілікті талап етеді. Осы міндеттердің үнемі басы қасында жүрген – Бағдат Қадыров әріптестері арасында да үлкен беделге ие.&nbsp;Маман желінің дұрыс тартылып, әр жүйенің қауіпсіз іске қосылуын қадағалап отырады. Ауыл тұрғындарының интернетке қосылып, әлеммен байланысқа шығуы – осы тынымсыз еңбектің нәтижесі. Қазіргі таңда Жаңақорған кентіндегі «Саяжай» мөлтекауданына талшықты интернет желісі тартылуда. Бұл – аудан үшін маңызды әрі ауқымды жобалардың бірі.&nbsp;Бүгінде 512 үйге желілік жұмыстар жүргізіліп, жыл соңына дейін толықтай аяқтау жоспарланып отыр. Бұл ауыл тұрғындары үшін үлкен қуаныш, әрі жаңа мүмкіндіктердің бастауы. Талшықты интернет – жылдамдығы жоғары, тұрақты әрі сапалы байланыс. Оның көмегімен онлайн оқу, бейнебайланыс, кәсіпкерлік, цифрлы қызмет түрлері толық іске асады. Бұл тек тұрмыстық қолайлылық емес, аудан экономикасының дамуына да оң әсерін тигізетін маңызды қадам.Осы жобаның әрбір кезеңін бақылап, құрылысшылардың жұмысын үйлестіріп, техникалық стандарттың толық сақталуына жауапты болып жүрген Бағдат аға тұрғындардың ұсыныс-тілегін тыңдап, жұмыстың сапалы атқарылуына бас-көз болып келеді.ҮНДЕМЕЙ БІТЕТІН ҮЛКЕН ІСБайланыс саласының мамандары көбіне халыққа көріне бермейді. Бірақ олардың еңбегі – қоғам үшін аса маңызды. Олар апат болған сәтте де, төтенше жағдайда да, боран мен дауылда, күн-түн демей, желінің үзілмеуі үшін тынымсыз еңбек етеді. Көпшілік жайлы интернетті пайдаланып отырған сәтте, сол игіліктің артында қандай еңбек жатқанын пайымдай бермейді.Біздің бүгінгі кейіпкеріміз – осындай көзге көрінбейтін, бірақ күрделі еңбектің иесі. Атақ арттыруды емес, елдің алғысын алуды – ең үлкен марапат санайтын қарапайым да қажырлы маман. Оның басты мұраты – халыққа сапалы қызмет көрсету, байланыстың үзілмеуін қамтамасыз ету.&nbsp;Бүгінде Жаңақорған ауданында мыңдаған отбасы интернет арқылы білім алып, кәсіп жүргізіп, елмен және әлеммен байланыс орнатып отыр. Кәсіпкерлер онлайн саудаға көшті, мемлекеттік қызметтер электронды форматта көрсетілуде. Мұның барлығы – телекоммуникация саласының, оның ішінде Бағдат сынды мамандардың тынымсыз еңбегінің арқасында жүзеге асып жатыр.Қазақтелеком – ел дамуының күретамыры. Ал оның тынысын бірқалыпты ұстап тұрған қарапайым еңбек адамдарына құрметіміз ешқашан төмендемек емес.Жәмила ЕРМАХАНФото: автордікі

Байланыс саласының білгірі

<a href="https://kyzylorda-news.kz/">Kyzylorda-news.kz</a> &nbsp;40 жыл. Аз емес. Осынша уақыт шахтада кен қазған оның мақтанышы – Отанға адал қызмет еткені. Шахта астында әр күні қауіпті болса да нағыз жанкештілікпен руда қазатын әр бригаданың еңбегін айтып тауыса алмаспыз. Осындай 20-ға жуық шахтерге бас болып, кәсіпорын шаруасын дөңгеленткен еңбек адамы жайлы сөз етеміз. Ол – жаңақорғандық Асылхан Әшімов.Аудан орталығынан 20 шақырым қа­шықтықтағы «Тау-Кен Самұрық» ұлттық тау-кен компаниясына қарасты «ШалқияЦинк» ЛТД» АҚ кәсіпорнына аялдадық. Біздің ке­йіпкеріміз осында еңбек етеді. Мамандығы – тау-кен инженері. 61 жасты толтырған Асылхан ағаның мұндағы лауазымы – тау-кен өндірісінің шебері.<blockquote>– Осы ауданға қарасты «Қыраш» ауылының азаматымын. 1986 жылдан бастап осын­дағы шахтаға түстім. Алғашқы жұмыс орным «Южный ШахтаСтрой» деп аталатын. Жер астын бұрғыладық, яғни кен қаздық. Кейін біртіндеп шахта шебері, одан соң учаске бастығы сияқты қызметтерді атқардым. Арасында техникалық қауіпсіздік инженері болып та жұмыс істедік. Қазір қарамағымда 20 шақты шахтер бар. Өзімнің жетекшілігіммен 200 метрден төмен жер астына түсіп, кен өндіреміз, – дейді ол.</blockquote>Асылхан Әшімовтің айтуынша, кен өн­діру оңай емес. Шахтерлар өзіне бекітілген аумаққа алдымен әр жерден бұрғылау жұ­мысын жүргізеді. Ал сол бұрғыланған ойық­­тарды «оқтайды». Дұрысы, әр ойыққа жа­рылғыш зат қойылады. Жару жұмыстары біткен соң жер астындағы жарылғыштан кейінгі газды сейілту, желдету, су себу сияқты тазалық жұмысы жүреді. Шахтерлар кейбір төбедегі тас сынықтарын түсіріп, барынша қауіпсіздік жұмыстарын атқарады. Бірақ рудаға жету үшін осылай бірнеше қабатты аршуға тура келеді.<blockquote>– Нағыз кен қабатына жеткенде дәл осындай жұмыс әдісі жүреді. Одан соң арнайы техникамен жарылған тастың барлығы тиеліп, жүк көлігімен сыртқа шығарылады. Жерас­ты шахтасында мұндай көліктерге арналған жол бар. Ал сыртқа шыққан тастың жарамсыз бөлігі жол салу құрылысында пайдаға асса, рудалық тастардан қорғасын, мырыш өндіріледі. Бұдан басқа, қосымша күміс, кремний, литий сынды элементтер де бар, – дейді Асылхан аға.</blockquote>Бүгінде 485 адам қызмет ететін кәсіпорын өз жұмысшыларын әлеуметтік қолдауды аяған емес. Мұны осындағы шахтерлар да, өзге техникалық қызметті игерген азаматтар да растап отыр.<blockquote>– Мемлекет басшысы Қасым-Жомарт Тоқаевтың биылғы жылды «Жұмысшы мамандықтар жылы» деп жариялағаны барлық әріптестерімді қуантты. Қазір кәсіпорын тарапынан жұмысшы өкілдеріне қолдау көп. Мерекелік сыйақылар, жұмысшыларға тегін тасымал, асхана, маусымдық арнайы жұмыс киімі өз уақытында беріліп отыр. Бастысы – жалақы тұрақты. Қызметкерлердің 40, 50, 60 жасқа толу мерейтойына бөлек сыйақы тағайындалады. Ал өзіне бекітілген жоспарды уақытылы орындаған шахтерлар жалақыдан бөлек, қосымша қомақты сыйақыдан құр қалған емес, – деді ол.</blockquote>Айтпақшы, біздің кейіпкеріміздің үш ұлы осы кәсіпорында. Бірі көлік жүргізсе, қалған екеуі әке жолымен кен қазып жүр. Сондай-ақ ол өзінің үздік шәкірттері барын да айтып қалды. Мысалы, олардың қатарында бүгінде кәсіпорынның бас инженері қызметіндегі Серік Адаев пен учаске бастығының орынбасары Іңкәрбек Пурманов бар.Жалпы өндіріс пен ауыл шаруашылығын қатар дамытқан Жаңақорғанда алдағы жылдары ірі жобаларды іске асыру жоспарланған. Дәлірек айтсақ, 2028 жылы құны 477 млрд теңгені құрайтын 2 жоба бар. &nbsp;Соның бірі – өзіміз арнайы барған «ШалқияЦинк ЛТД» АҚ-ның «Шалқия полиметалдық кен орнын өнеркәсіптік байыту және кен-байыту фабрикасының құрылысы» жобасы. Қазір мұнда жерасты шахтасының құрылысы жүруде. Ал тау-кен байыту комбинатының құрылысын жүргізетін компанияны анықтау үшін мемлекеттік сатып алу жұмысы жыл аяғына дейін өтпек. Тіпті жобаны қаржы­ландыруға шетелдік ірі компаниялармен келіссөз жүргізіліп жатыр.Екінші жобаны айтар болсақ, ол – аудан аума­ғындағы «Бурабай-Жалғызағаш» қор­ғасын-мырыш кен орнынан байыту фабри­касының құрылысы. Мұндағы мақсат – 60 мың тонна қорғасын мен мырыш концентратын өндіру. Жоба іске асса, жергілікті жерден 350 адам жұмыспен қамтылатын болады.Ержан ҚОЖАС,«Сыр бойы»Фото: автордікі

Еңселі еңбектің арқасында шыңдалған азамат

<a href="https://kyzylorda-news.kz/">Kyzylorda-news.kz</a> Кейінгі үш жылда Жаңақорған ауданында 200 млрд теңгеге жуық қаржыға инвестиция тартылды. Ал 2025-2028 жылдар аралығында ауданда 15 инвестициялық жобаны жүзеге асыру жоспарланған. Бұлар толық іске қосылған кезде 2 мыңнан аса жұмыс орны ашылмақ. Оның ішіндегі бірнеше жоба биыл іске қосылуда.Нақтырақ айтсақ, осы жылы «Шалқия Тас» серіктестігі темір-бетон зауытын іске қосса, «Нұрболат» шаруа қожалығы 2 мың тонна ет өнімдерін дайындайтын мал сою пунктін Қожамберді ауылынан ашты. «Бекарыс Агрофуд» ЖШС жылына 500 тонна ет өнімдерін шығаруды мамыр айында бастап кетті.&nbsp;Жаңақорғанға сапар кезінде осындай ірі инвестициялық жобаның бірі – «Жаңақорған» қыз¬мет көрсету кешенінде болдық. «В» санатындағы кешен «Батыс Еуропа – Батыс Қытай» көлік дәлізінде орна¬ласқан. Жоба «Caspian Services Asia» ЖШС-ның 1 млрд теңге жеке қаржысымен бой көтерді. &nbsp;Қазір мұнда қонақүй, қоғамдық тамақтандыру орны, монша, жанар-жағармай және жолаушыларға қызмет көрсету (автовокзал) бекеті салынған.<blockquote>– Бұл кешенді ашпас бұрын біз осы үлкен жол бо¬йы¬нан мешіт салдық. Айқожа ишан атындағы имандылық үйінің жанынан қосымша медресе де тұрғыздық. Қазір 30-ға жуық бала осында білім алады. Мешіт пен медресеге, онда оқитын балалардың қажетті заттарын қамтуға, азық-түлікке, ғимараттардың коммуналдық ақысын тө¬леуге, қызметкерлер жалақысына 3-4 млн теңгедей қаржы жұмсаймыз. Бұл – бір айдағы шығын есебі. Ал қазіргі жол бойы кешеніне арнайы 2,5 гектар жер алып, құрылысын екі жыл бұрын бастап кеткенбіз. Жергілікті әкімдік бұған қолдауын аяған жоқ. Инвестициялық жобаға жер бөліп берді. Өзіңіз көргендей, қазір жолда жүретін көлік жүргізушілер мен жолаушыларға сапалы қызмет көрсетудеміз, – дейді инвестор Болат Әшімов.</blockquote>Кәсіпкердің сөзінше, қазір мұнда 30-дан аса адам жұмыс істейді. Кешендегі өзге нысандар толық іске қосылса, жергілікті халықтан тағы көптеген тұрғын жұмысқа қабылданбақ.<blockquote>– Қонақүй бөлмелерінің бағасы қолжетімді. 110 орындық асхана жолаушыларға сапалы қызмет көрсетуде. Тіпті бұл жақтан дайын тамақтарға тапсырыс беретіндер жеткілікті. Өзге қонақ күту шараларын осында өткізуге ықыластылар да бар. Сондай-ақ біздің қызметкерлердің барлығы аудан орталығында тұрады. Ал оларды тасымалдауға жеке көлік қарастырылған. Серіктестік қаражатымен бұған дейін аудан орталығынан «Мың бір бала» жеке балабақшасын ашып, пайдалануға бердік. Қазір онда 100 бүлдіршін тәрбиеленуде. Жалпы барлық кәсіптік нысандар жеке қаражат есебінен бой көтерді, – дейді компанияның бас экономисі Нұргүл Сыздықова.</blockquote>«Caspian Services Asia» ЖШС басшылығы келешекте Жаңақорған кентінен үлкен ойын-сауық орталығын салу жоспарда барын жасырмады. Үлкен қалаларда кездесетін мұндай орталық ішінде кинотеатр, супермаркет, брендтік киім дүкендері, тамақтану орындары болатыны белгілі.Айта кетейік, алдағы жылы Жаңақорғанда жалпы құны 12,2 млрд теңгені құрайтын 5 жоба жоспарланған. Олар – «Абдулла» шаруа қожалығының жылына 5,5 мың тонна құс етін өндіретін фабрикасы, «Нұр Әділ» дене-шынықтыру-сауықтыру кешені, «Qaratau Fruits» шаруа қожалығының жол бойынан сыйымдылығы 5450 тонна жеміс (алма) және көкөніс сақтау қоймасы.Сондай-ақ «Алаш метан» ЖШС «Батыс Еуропа – Батыс Қытай» көлік дәлізінен метан бекетін тұрғызса, «Комхоз Жаңақорған» серіктестігі қалдықтарды сұрыптау кешенін іске қоспақ.<img src="https://knadmin.beoblood.kz/uploads/Zha_a_or_an_kesheni_2_a330d62666.jpg" alt="Жаңақорған кешені 2.jpg">Ержан ҚОЖАС,«Сыр бойы»&nbsp;Фото: автордікі

Жаңа кешен халық игілігі үшін қызмет етуде

<a href="https://kyzylorda-news.kz/">Kyzylorda-news.kz</a>&nbsp; Соңғы жылдары елімізде еңбек адамдарының мәртебесін арттыру, қоғамда құрмет көзін қалыптастыруға мән беріліп, оларды насихаттауға басымдық берілуде. Сол мақсатта бүгінде&nbsp;жұмысшы мамандықтардың маңыздылығын арттыру, техникалық және кәсіптік білім беру жүйесін реформалау бағытында ауқымды жұмыстар&nbsp;жүргізілуде.&nbsp;Жұмысшы мамандықтарға деген жастардың қызығушылығын арттыру, мектеп бітіруші балаларды осы салаға тартуда кәсіптік-техникалық білім беру орындарының үлесі зор. Бұл ретте кәсіптік-техникалық білім беруді трансформациялаудың 2025-2027 жылдарға арналған жол картасы бекітілген.&nbsp;Онда өңірлік ерекшеліктерге сәйкес жаңа мамандықтар атласын әзірлеу, кәсіптік бағдар беру тұжырымдамасын жүзеге асыру, кәсіби білікті кадрлар даярлау, сапалы жұмыс орындарын құру, жұмысшы кадрлардың мәртебесін көтеру сияқты бағыттар қамтылған.&nbsp; &nbsp; Ресми мәліметтерге үңілсек, қазіргі таңда елімізде кәсіптік-техникалық бағытта білім беретін колледждердің саны 700-ден асады екен. Бүгінде колледж ұжымдарына артылған жауапкершілік жоғары. Болашақта қажетті маман иесін даярлауды олар бүгіннен бастауы керек. Арал ауданында да бұл бағытта Арал көпсалалы колледжі еңбек етуде.&nbsp;Аталған оқу орны 1959 жылы 23 желтоқсанда ауданның «Сульфат» поселкесінде №169 селолық кәсіптік-техникалық училище болып жұмысын бастаған. 1973 жылы Арал қаласында училище филиалы ашылып, одан кейінгі жылы толығымен соған көшіріледі. Оқу-тәрбие және өндіріс бағытындағы жетістіктері үшін атауы 1989 жылы экспериментальді тірек училищесі болып ауысады. Ал 1993 жылы №16 Арал жоғары кәсіптік-техникалық лицейі дәрежесін алады. 1998 жылы №2 кәсіптік-техникалық лицей, 2002 жылы №2 кәсіптік-лицей аталады. Ал 12 жылдан бері Арал көпсалалы колледжі болып өзгерген. Бүгінде кәсіби білім мен өмірлік дағдыларды меңгерудің берік негізін қалайтын іргелі білім ошағына айналған. Онда кәсіби құзыретті мамандар даярлауға&nbsp;мүмкіндік бар.&nbsp;Қазір&nbsp;білім ошағында 300-ге жуық өрен &nbsp;11 мамандық, 26 біліктілік бойынша білім&nbsp;алуда. Оқу ордасы мемлекеттік лицензияға ие және техникалық, кәсіптік бағыттағы заманауи маман даярлауға толық мүмкіндік беретін материалдық-техникалық базамен&nbsp;толықтай қамтылған.&nbsp; Білім ордасының басшысы&nbsp;Нұралы Әбішов, колледждің басты миссиясы – кәсіби білім беру арқылы тұрақты әлеуметтік-экономикалық өсуді қамтамасыз ететін техникалық және кәсіптік білімі бар бәсекеге қабілетті мамандар даярлау екенін айтады. Оның сөзінше,&nbsp;дуальді оқыту жүйесі бойынша биыл білім алушылардың 33 проценті немесе 100-ге жуық студент техникалық және кәсіптік білім беру ісіне тартылған. Олар дуальді оқыту бойынша аудандағы өндіріс, шаруашылық серіктестіктері мен мекемелерде өндірістік тәжірибеден өтіп, теориялық білімін тәжірибе жүзінде шың­дауға мүмкіндік алған.&nbsp;Оқушылар&nbsp;«Аралтұз» зауыты, «Арал құрылыс» серіктестігі, «Қызылорда электр тарату тораптары компаниясы», өзге де жеке кә­сіпкерлермен өндірістік тәжірибеден өту туралы келісімшарт жасаған.&nbsp; Колледж ғимараты осыдан 5 жыл бұрын күрделі жөндеуден өткен.&nbsp;Жылу қазандығы&nbsp;көгілдір отынға&nbsp;қосылған.&nbsp;Ғимаратта қауіпсіздікті сақтау мақсатында іші-сыртына 60 бейнебақылау камерасы қойылған екен. Бсонджай-ақ барлық мамандық бойынша оқу кабинеттері, зертханалар мен шеберханалар&nbsp;қажетті құралдармен&nbsp;жабдықталған.&nbsp;Ал тәжі­рибе жи­нақтау сабақтары автомобильге тех­ни­калық қызмет көрсету орталық­тарында&nbsp;өткізіледі.&nbsp;Ұжымда студенттерді білімді де білікті ұстаздар қауымы білім нәрімен сусындатып жүр. Өздерінің біліктілігін дәлелдеген ұстазда, білімін дәлелдеген студенттерде жетерлік. Мәселен, өткен оқу жылында арнайы пән оқытушысы М.Аралбекқызы «Жылдың үздік педагогі» атты республикалық бай­қауда І дәрежелі диплом иеленсе, өн­ді­рістік оқу шебері Н.Сарбөпеев «ҚР үздік еңбек адамы» республикалық байқа­уында жеңімпаз, «WorldSkills Kazakh­stan-2024» республикалық чемпионатында «Кірпіш қалау» құзыреттілігі бойынша Дархан­бек Жұманов ұстазы Ғ.Назаровтың жетек­шілігімен «Үздік шебер» атанған.&nbsp;Бүгінде колледж түлектері аймақтың түрлі өндірістік кәсіп­орындарында, мекемелерінде, жеке секторда табысты еңбек етуде.&nbsp; Аудандағы тағы бір кәсіптік-техникалық білім беру мекемесі бар. Ол жүз жылдық тарихын қалыптастырған&nbsp;Арал индустриалды-техникалық колледжі. Бұл білім ошағы – уақыт талабына сай бәсекеге қабілетті, кәсіби маман даярлауды мақ­сат еткен жұмысшы мамандықтардың ұс­та­ханасы. Ол 1927 жылы балық аулау артелі болып құрылып, жергілікті тұрғындарды балықшылар бригадирі, ау құралдарын септеп-тоқу ісіне үйреткен. Ал 1955 жылы ағаш, темір ұсталарын, қайықтың матрос, мотористерін даярлайтын&nbsp;қолөнер училищесі болып қайтадан құрылған. Осылайша әртүрлі даму сатысынан өткен оқу орны 2012 жылы Арал индустриалды-техникалық колледжі&nbsp;деген атауға ие болған. Қазіргі таңда колледж қабырғасында 300-дей студент білім алуда. Оларға мемлекеттік талапқа сәйкес 6 мамандық, 7 біліктілік бойынша дәріс беріледі. Студенттердің алған білімін тәжірибемен ұштастыруда&nbsp;23 жеке әлеуметтік серіктестікпен келісімшарт жасалған. «Жұ­­мысшы мамандықтар жылына» орай техникалық және кәсіптік білім бе­руді трансформациялаудың 2025-2027 жыл­дарға арналған «Жол картасы» аясында республика көлемінде 11 техни­калық жә­не кәсіптік білім беру орнымен ынты­мақ­тастық меморандумы қабыл­данған.Білім ордасының директоры Рақым Айназаровтың айтуынша,&nbsp;«Жас маман» жобасы аясында іске қосылған дәнекерлеу тренажері, тігін ма­шиналары сияқты инновациялық технологиялармен жабдықталған оқу шеберханалары студенттерге теориялық білімді тәжірибемен ұштастыруға, кәсіптік құзы­реттілікті қалыптастыруға мүмкіндік бе­реді. Колледж әкімшілігі алдағы уақыт­та халықаралық стандарттарға сәйкес оқы­ту бағдарламаларын дайындап, инженер-пе­дагогтердің біліктілігін арттырып, сұра­нысқа ие мамандықтарға жаңа оқу үлгісін ұсынуды жоспарлауда.&nbsp;Материалдық базаны жаңғырту не­гізінде кадр даярлау және қайта даярлау үшін құзыреттілік орталығын құруды&nbsp;көздеген ұжым&nbsp;2022 жылы алғаш&nbsp;«Сән технологиясы» және «Дәнекерлеу технологиясы» құзыреттілігін&nbsp;ашқан. Осындай жаңа оқу технологиялары мен заманауи техникалық құрылғылардың ар­қасында колледждің оқу-материалдық ба­засы нығайтып, колледж базасының то­лыққандылығы, білім ордасындағы білім мен білік дағдысының тең болуына, соңғы үлгідегі құрал-жабдықтарды пайдалана отырып, мамандардың ой-өрісін техникаға бағыттау олардың құштарлығын арттыруға мүмкіндік жасаған.&nbsp;Елімізде&nbsp;«Жұмысшы мамандықтар жы­лын» өткізудің кешенді іс-шаралар жос­пары бойынша атқарылған&nbsp;жұмыстар жастардың кәсіби бағдарын айқындауға, кәсіби біліктілігін дамытып, қоғамда жұмысшы мамандығының беделін арттыруға жол ашып отыр. Білім ордасы студенттердің қолайлы білім алуына жағдай жасау мақсатында&nbsp;өндіріс орындарымен&nbsp;байланыс жасап, олардың қолдауын сезініп келеді. Биыл «Арал-Құры­лыс» ЖШС-ның&nbsp;демеушілігімен колледж ғимара­ты­ның кіреберіс аумағы асфальтталса, қала әкімі Батыржан Ұзақовтың және «То­ғыс-Аралотын» ЖШС-ның директоры Мейрамбек Жұмашевтың қолдауымен жаз­дық спорт алаңы салынып, жасанды көгал төселген. Автокөлікке техникалық қыз­мет көрсету шеберханасы да өндірістік табыс есебінен жөнделіп, студенттердің тә­жірибелік дағ­дысын қалыптастыруға қо­лайлы жағдай жасалған.Биыл колледж базасында жас мамандардың кәсіби біліктілігін арттыруға негізделген «WorldSkills -2025» чемпионатының аймақтық кезеңі өткізілген. Мұндай маңызды іс-шараның бұл оқу орнында өтуі ұжым үшін үлкен маңызға ие. Сондай-ақ байқауға қатысқан оқушылары да олжасыз болмаған. Ал байқау нәти­жесінде&nbsp;колледж студенті&nbsp;«Дәнекерлеу технологиясы» құзірет­тілігі бойынша Т.Әбдібақыт 1-орынды еншілеген. Чемпионаттың аймақтық іріктеу кезеңінде студенттер 6 құзыреттілік бойынша бақ сынап, 5 құзыреттіліктен жүлделі орындарға ие болған. Бұл да студенттердің біліммен тәжірибені ұштастыра отырып, сапалы білім алуының көрсеткіші болса керек.Кәсіптік-техникалық білім беру, жастарды сол бағытқа икемдеу бүгінгі заман талабына айналып отыр. Аталған колледж ұжымдары еліміздің дамуына орасан зор үлес қосатын, бәсекеге қабілетті маман даярлауда үлкен жауапкершілікпен еңбек етуде. Ал студенттердің сапалы білім алып, оны әрі қарай ел игілігі жолында жұмсауы жарқын болашақтың кепілі болары сөзсіз.&nbsp;

«Жұмысшы мамандық»: Аралдық студенттер білім мен тәжірибені қатар игеруде

<a href="https://kyzylorda-news.kz/">Kyzylorda-news.kz</a> Қазақтың қыран қанаты талатын сайын даласы жайқала өскен өсімдік атаулыға ғана емес, сол даланы емін-еркін кезетін тұяқты жануарларға да өлшеусіз бай. Табиғи жайылымдардың кеңдігімен мақтанғанымызбен, сол мекендерде жабайы жануарлардың кейбіріне қауіп басым келеді. Сондықтан оларды «Қызыл кітапқа» енгізіп, қорғауға алғанын білеміз. Солардың көшінде сиреп бара жатқан жануардың бірі – қарақұйрық.Бұл қуысмүйізділер тұқымдас жануар сексеуіл, жыңғыл, теріскен, жүзгін өсетін шөлді аймақтарды мекендейді. Біздің Жаңақорған аумағында да бұлардың саны баршылық. Оларды бақылау, қауіптің алдын алу үшін, жалпы түз тіршілік иелеріне қамқорлық ететін арнайы мекеме бар. Ол – «ҚР Экология және табиғи ресурстар министрлігінің орман шаруашылығы және жануарлар дүниесі комитеті» «Охотзоопром ӨБ» республикалық қазыналық кәсіпорны.Мекеменің арнайы бекітілген штат құрамы ауысым бойынша аудан аумағында қызметте жүреді. Олардың Апанғақ аймағында арнайы базасы орналасқан. Таңнан түнге дейін қоян мен өзге де жануарларды заңсыз аулағандарды, қарақұйрық пен балыққа тұзақ сала- тындарды торуылдайды. Қысқаша айтқанда, дала табиғатын баладай қорғаштап келеді. Біз арнайы мекеме инспекторы Бақытжан Исмаиловпен байланысып, бір күндік жұмыстарымен танысып көрдік.<blockquote>– Біз қазір Жаңақорған аумағында арнайы бекітілген іс-шара бойынша қызметте жүрміз. Негізінен қызметіміз осы, бірақ белгілі мерзімге қатаңдатылған режим бойынша келдік. Қазір заңсыз аң аулаудың маусымы, әсіресе, құны жоғары жануарларға броконьерлер қырғидай тиеді. Қоян, қарақұйрық және таудағы арқарды бақылауға алып, күні-түні қадағалау үстіндеміз, – дейді инспектор.</blockquote>Арнайы жасақ құрамында топ жетекшісі Ерлан Ұзақов бастаған инспекторлар Ержан Махан, Жеңісхан Ысқақов және Саттар Сәбеков бар. Олардың мақсаты – дала тағысына бақылау жасап, оларды аңшылардан аман алып қалу. Нақты саны белгілі болмаса да Жаңақорғанның құмды аймағында қарақұйрықтардың тобы бар. Олардың нарықтағы құны ақбөкендерден едәуір қымбат екен. Сондықтан аңшылар әуестігі басым келеді. Алайда, айыппұлы барын ұмытпауымыз керек.<blockquote>– Аңшылар көбіне түнде шам жарығымен жүреді, оларды құрықтауға біз бар күш-жігерімізді саламыз. Қылмыстары әшкере болған жағдайда ҚР Қылмыстық Кодексінің 337,339 бабы бойынша кінәлі саналып, айыппұл төлейді. Сондай-ақ 3 жылдан 7 жылға дейін бас бостандығынан айырылуы мүмкін. Бұл – заң талабы. Сондықтан бұл киелі жануарға жоламауға шақырамыз. Табиғат байлығын қолдан құрдымға жібермейік дегіміз келеді, – дейді инспектор.</blockquote>Дала жануарларының әрбірінің өз ерекшелігі бар. Біз сөз етіп отырған тұяқты жануардың қасиеті – суға төзімділігі. Табиғат-ана оны шөлге соншалықты шыдамды етіп жаратыпты. Шөптің ылғалы немесе жаңбырдың суын қанағат тұтатын қарақұйрықтың табиғатқа етенелігі осыдан-ақ байқалатындай. Сондықтан қарақұйрық көбіне еліміздің құрғақ далалы, шөлейтті және шөлді алқаптарында таралған. Ол сексеуіл, жыңғыл, тораңғыл өскен бұйратты жал құмдардың арасында да кездеседі.Кейде шағын тау бөктерінде теңіз деңгейінен 2500-3000 метр биіктікте жүреді. Қыс және күз мезгілдерінде қар аз түсетін жерлерге қоныс аударады. Топырағы құмды жұмсақ жерді тұяғымен тарпып қазып, уақытша жатақ жасап, жасырынып жатады. Ғалымдардың зерттеуі бойынша, қарақұйрықтың 70- тен астам шөптесін және бұталармен қоректенетіндігі анықталған. Ол орташа есеппен тәулігіне 6-7 келі қоректі пайдаланады. Ащы, тұщы және қақ суларын іше береді. Суатқа кешкілік қараңғылық түскенде және таңертеңгілік мезгілде келеді. Көбіне таңертеңгілік салқында және кешке қарай жайылады. Есту және көру мүшелері жақсы дамыған өте сақ жануар. Олардың қазақ даласындағы санының азаюына түрлі себеп барын білеміз. Сарапшылар оған алдымен броконьерлердің кесірі тиеді деп отыр.Сондай-ақ мал жайылымдарының кеңейіп, жер игеру мен инфрақұрылымның артуы қарақұйрықтардың табиғи ортасын тарылтып отыр деуге негіз бар. Қарақұйрықты қорғап, санын көбейту үшін жергілікті тұрғындар арасында үгіт-насихат жұмыстары кеңінен жүргізілуі керек. Өйткені, қарақұйрық еліміздің сымбатты аңдарының бірі болып саналады. Оны қорғаудың эстетикалық мәні де зор екенін ешуақытта естен шығармауға тиіспіз. Ен даланың еркесіне айналған бұл тіршілік иесін келешек ұрпаққа аманат ету әрбір азаматтың парызы болуы керек, ол үшін аңшылардың жолын кесу керекпіз дейді жауапты тұлғалар.<img src="https://knadmin.beoblood.kz/uploads/Whats_App_Image_2025_12_23_at_11_20_38_f83abee14d.jpeg" alt="WhatsApp Image 2025-12-23 at 11.20.38.jpeg">Әли ТЕМІРБЕКФото: gov.kz

Түз тағысы – қарақұйрық

<a href="https://kyzylorda-news.kz/">Kyzylorda-news.kz</a>&nbsp; «AMANAT» партиясының «Бақытты отбасы», «Кедергісіз келешек» жобалары аясында партияның облыстық филиалының төрағасы Жандос Базартай Талсуат елді мекенінде орналасқан Ұлттық балаларды оңалту орталығында болып, онда ем қабылдап жатқан ерекше білім беру қажеттіліктері бар балғындарды Жаңа жыл мерекесімен құттықтады.Филиал төрағасы алдымен орталықтағы балаларға жасалған жағдаймен, медициналық және әлеуметтік оңалту үдерісімен танысты. Сондай-ақ «Жастар рухы» жастар қанатының ұйымдастыруымен ерекше балаларға арналған Жаңа жылдық кешті тамашалады.Құттықтау сөз сөйлеген филиал төрағасы Жандос Базартай елімізде және өңірде балалардың, оның ішінде ерекше қажеттіліктері бар балалардың сапалы өмір сүруі, толыққанды дамуы мен қоғамға бейімделуі үшін атқарылып жатқан жұмыстарға тоқталды. Елдің болашағы әрі әрбір отбасының бақыты саналатын бүлдіршіндерге жан-жақты қолдау көрсету «AMANAT» партиясының негізгі басым бағыттарының бірі екенін атап өтіп, олардың құқықтарын қорғау, қолжетімді орта қалыптастыру және бақытты балалық шаққа жағдай жасау бағытындағы жұмыстар алдағы уақытта да жалғасын табатынын жеткізді.Іс-шара аясында «Жастар рухы» жастар қанатының еріктілері ерекше балаларға арналған мерекелік концерт ұйымдастырып, бағдарлама барысында балаларға арналған театрландырылған қойылымдар, ән-би ұсынылып, бүлдіршіндерге көтеріңкі көңіл күй сыйлады. Сондай-ақ балаларға партия атынан Жаңа жылдық сыйлықтар табысталды. Шара балғындардың жүзіне қуаныш сыйлап, жылы әсерге толы мерекелік көңіл күйде өтті.

 Қамқорлық пен мейірімге толы жаңа жылдық кеш

<a href="https://kyzylorda-news.kz/">Kyzylorda-news.kz</a> Сырдария ауданы әкімінің Берік Сәрменбаевтың қатысуымен Орталық алаңда жаңа жылдық бас шыршаның шамын жағу рәсімі өтті.Іс-шарада аудан әкімі сырдариялықтарды келе жатқан Жаңа жыл мерекесімен құттықтады.&nbsp;<blockquote>– Халқымызда «Өткен жылға өкпе жоқ, келер жылдан үміт көп» деген жақсы сөз бар. Біз де Жаңа жылға үлкен үмітпен қарап, берекелі іс пен баянды бақыт күтеміз. Өтіп бара жатқан 2025 жыл өңіріміз үшін аса маңызды оқиғаларға толы болды. Мемлекет басшысы Қасым-Жомарт Кемелұлының Сыр өңірін ерекше қолдауының арқасында бүгінгі күні облысымыз қарқынды даму үстінде. Аймағымыз барлық негізгі макроэкономикалық көрсеткіштер бойынша республикада алғашқы орында. Аймақ бюджеті 851 млрд. 300 млн. теңге болып, 2021 жылдан бері 246 пайыз өсті. Оның 56 пайызы әлеуметтік салаға бағытталған. Даму бюджетінің көлемі 2021 жылы 47 млрд. теңге болса, биыл 207 млрд. теңгеге жетіп, 4,4 есе артты.Ауданымызда да жыл көлемінде ауқымды жұмыстар атқарылды. Жыл басында аудан бюджеті 10 млрд. теңгені құраса, бүгінде 13,2 млрд. теңгеге жетті. Мемлекет басшысы халықтың тұрмысын жақсарту үшін ең алдымен инфрақұрылымдық жұмыстарды атқаруды тапсырды. Бүгінде ауданда Тереңөзек кенті мен 5 елді мекен көгілдір отынмен қамтылып, 62 пайызды құрап отыр. Биыл газдандыру жобаларын жүзеге асыруға 2,1 млрд. теңге қаржы бөлініп, Нағи Ілиясов және Шаған ауылдары табиғи газға қосылды. Жоба құны 1,8 млрд. теңгені құрайтын Ақжарма елді мекенін газдандыру жұмыстары биыл басталып, бүгінде газ құбырларын тарту жұмыстары жүргізілуде. Аудан тұрғындары орталықтандырылған ауыз сумен 100 пайыз қамтамасыз етілген. Биыл «Ауыл – ел бесігі» бағдарламасы аясында жоба құны 490,5 млн. теңгеге Қалжан ахун елді мекенін электрмен жабдықтау жұмыстары жүргізілуде. Биыл ауданда 1,3 млрд. теңгеге 25,5 шақырымнан аса автомобиль жолдары жөндеуден өтті. Қазіргі кезде жолдардың жақсы және қанағаттанарлық жағдайдағы үлесі 99 пайызға жетті. Аудандағы үлгілі елді мекен – Нағи Ілиясов ауылы «Үздік туристік ауыл – 2025» ұлттық байқауында жеңімпаз атанып, Қазақстандағы үздік 5 туристік ауылдың қатарына енді. Біздің жеткен жетістіктеріміз – аудан халқының бірлігі мен қажырлы еңбегінің нәтижесі. Жаңа 2026 жылға үлкен үміт артамыз, – деді Берік Әбдіғаппарұлы.</blockquote><img src="https://knadmin.beoblood.kz/uploads/shyrsha_1_6c6ef079a3.jpg" alt="шырша 1.jpg">Мұнан соң шырша шамы жағылып, аудан өнерпаздары концерттік бағдарлама ұсынып, мерекелік көңіл-күй сыйлады.Фото: Сырдария ауданы әкімінің баспасөз қызметі

Сырдария: Ауданның бас шыршасы жағылды

<a href="https://kyzylorda-news.kz/">Kyzylorda-news.kz</a> Халықтың күнделікті тұрмысында жарық пен жылу төлемі әжептәуір мәселеге айналды. Әсіресе биылғы коммуналдық қызметтер құнының күрт өсуі жұрттың қалтасына ғана емес, жүйкесіне де салмақ салып тұрғандай.Тарифтердің кезең-кезеңімен көтерілуі – бүгінгі күннің ең өзекті тақырыбының бірі. Халықтың табысы айтарлықтай өзгермей тұрған шақта жарық пен жылудың қымбаттауы қарапайым отбасыларға ғана емес, кәсіпкерлерге, әлеуметтік нысандарға, ауыл-аймақтарға да елеулі салмақ салып отыр. «Тариф өссе – сапа арта ма?», «Қымбаттату қандай негізге сүйенеді?», «Халық есебінен саланың шығынын жапқан дұрыс па?» деген сынды көптің көкейінде қордаланған сауалға жан-жақты жауап іздеп, тиісті азаматтардың пікірін тыңдап көрдік. Жаңақорған аудандық электр торабының басшысы Ізбасхан Әбілтанов тарифтердің қымбаттауының нақты себептеріне тоқталды.<blockquote>– 2025 жылдың 23 шілдесінен бастап электр энергиясының тұтыну тарифінің шекті бағасы 31,696 теңге/кВт. Жеке тұлғалар үшін шекті баға – 28,5264 теңге/кВт. Жеке тұлғалар үшін орташа босату тарифі 28,5264 теңге болып отыр. Бұған дейін шекті баға 25,9056 теңге/кВт. Ал, жеке тұлғалар үшін шекті баға 25,9056 теңге/кВт еді. Тұрғындар тек тұтынған электр энергиясы үшін төлеуге міндетті. Егер бір айда төлем тым көбейіп кетсе, алдымен есептегіш көрсеткішті салыстырып, түбіртекті тексеру қажет. Қыс мезгілінде жарықтың көп жұмсалуы табиғи нәрсе: таңның кеш атуы, ерте қараңғылық, жылыту құрылғыларын жиі қолдану – бәрі тұтынуды арттырады. Сондықтан халық үнемдеуге де дағдылануы тиіс, – дейді ол.</blockquote>Демек, мәселенің бір ұшы – халықтың коммуналдық есепті дұрыс жүргізбеуінен туындауы мүмкін. Ал электр энергиясын үнемдеу дегеніміз тек ақша үнемдеу емес, ресурсты тиімді пайдалану мәдениеті. Мамандардың айтуынша, көпшілік артық жарықты, қуат көзі көп қажет ететін құрылғыларды жүйесіз қолданады. Жарықты артық жақпау, қуатты құрылғыларды минималды қолдану, лампаларды экономикалық түрлеріне ауыстыру, үйдегі электр желісін тексертіп тұру керектігін мамандар баса айтты. Егер осы ескертпелерді тұрмыста іске асырсақ, ай сайынғы төлемді 15-25 пайызға дейін азайтуға болады екен.Газ бағасы да едәуір өсті. Бұл жөнінде «QazaqGaz Aimaq» АҚ ҚӨФ Жаңақорған газ шаруашылығы директоры Сұлтан Сәрсеновтен білген едік.<blockquote>– Бүгінгі күнге дейін өңірімізде 7967 абонент бар. Биыл газ бағасы 24,2 тиын болып белгіленді. Өзге облыстарға қарағанда едәуір арзан деуге болады. Қазіргі уақытта 800 абоненттен 12 962 832 теңге қарыз қордаланған. Бұл өткен жылмен салыстырғанда едәуір азайып отыр. Қарызы бар әрбір тұрғынның үйіне барып, түсіндірме жұмыстарын жүргізіп, ескертіп жатырмыз. Ал одан нәтиже шықпаған жағдайда газдан ажыратуға тура келеді. Сондықтан тұрғындар берешегін толық өтесе деген өтінішіміз бар, – дейді ол.</blockquote>Кент тұрғыны, көпбалалы әке Оңдас Асановтың да өз айтары бар.<blockquote>– Айына 10-12 мың теңге жарыққа, 16-18 мың теңге газға төлейміз. Кейде бұдан да жоғары болып кетеді. Сонда айына 25-30 мың теңге тек коммуналдық төлемдерге жұмсап отырмыз ғой. Бұл нарық заманында бір отбасына үлкен шығын, ауыртпалық деп есептеймін. Жауапты сала мамандары халықтың үніне құлақ асса жақсы болар еді, – деп көңілінде қатталған мұң-мұқтажын жасырып қалмады.</blockquote>Расымен де, қымбатшылық қамытын кигелі біраз болды. Кедейшілік – ел экономикасын кері тартатын кесел. Осындай отбасыларды кедейшілік құрсауынан алып шығуға нақты бағдарланған бағдарламалар мен көмек арқасында бүгінде Еуро одақтың 11 елінде кедейшілік жоқ. Басқа еуропалық елдерде кедейшілік көрсеткіші 1-3 процент қана. Бізге оларды өзімізбен салыстырудың қажеті жоқ. Өйткені, бізде алатын айлығы ішер асынан артылмайтын отбасылар көп. Бізде өзге елдермен салыстырғанда ұялы байланыс қызметін тұтынудың бағасы қымбаттап кеткені жасырын емес. Қазір кемінде бір айға 5990-12000 мың теңгелік болып өзгеріп кеткен. Тіпті одан да жоғарылары бар, қалауыңызға қарай. Осындай бағаның өсуіне қарапайым халықтан бөлек, шенеуніктердің де өкпесі қара қазандай. Еліміздегі ұялы байланыс оперторларының ауыз толтырып айтатын интернет қызметі жылдамдығының тым әлсіздігі, ғаламторға емін-еркін кіру мүмкіндігі жоқтығын да айта кеткен жөн. Халыққа адал, сапалы қызметтен бұрын тарифті қымбаттауға әуес ұялы байланыс операторларының қызметі жақсартуды жауапты мамандар қолға алуы керек-ақ. Бұған қатысты Мәжіліс депутаттарының біразы ұялы телефонның бағасына, желі ішіндегі сөйлесу сапасының әлсіздігіне сын айтып жүргелі біраз болды. Міне, осындай әрекеттері арқылы санаулы адамдар байлыққа кенеліп отырса, қарапайым халықтың қалтасы жұқарып барады. Жалпы алғанда коммуналдық қызмет түрлерінің қымбаттауының бір көрінісі – осы.ТҮЙІН. Жарық пен жылу – жай ғана қызмет емес, халықтың өмір сүру сапасын анықтайтын негізгі фактор. Тарифтің өсуі – қарапайым адамға салмағы ауыр, мемлекет үшін де жауапкершілігі зор қадам. Қоғам үшін ең маңыздысы – бағаның өсуіне дәлел, ашықтық және сапаның артуы. Елдің ертеңі үшін энергетика саласы дамуы керек, бірақ оның құнын халықтың мойнына толық іліп қою – әділдікке жатпайды. Тариф мәселесі халықтың тұрмысын емес, жағдайын жақсартуға жұмыс істеуі тиіс. Қымбаттаған жарық пен жылу – халықтың үніне құлақ асуды талап ететін әлеуметтік дабыл десек артық емес.Асел РЗАЕВАФото: freepik.com

Қазақстан және Қызылорда облысының жаңалықтары: Қоғам