<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Биылғы жылдың сегіз айында облыстық еңбек саласын бақылау басқармасы әр түрлі меншектегі 104 мекеме мен кәсіпорындарға тексеріс жұмыстарын жүргізген. Нәтижесінде 8 кәсіпорынның 1911 жұмыскеріне 209,6 млн.теңге жалақы қарызы төленген. Сондай-ақ жұмыскерлердің еңбек құқықтарын қорғау және жалақы бойынша берешекті өндіріп алу мақсатында жауапты органдармен бірлесіп, апта сайын салыстырмалы акті жасалған.
Бұл туралы Өңірлік коммуникациялар қызметінде өткен баспасөз конференциясында облыстық еңбек саласын бақылау басқармасының басшысы Төреахмет Жолымбетов мәлімдеді.
<blockquote>
 «Облыс бойынша қазіргі таңда үш айдан астам жалақыдан қарызы бар мекемелер тіркелмеген. Жыл басынан бері басқармалармен жеке және заңды тұлғалардың 539 өтініштері қаралып, белгіленген тәртіппен тиісті жауаптар алынды. Кәсіпорындар мен мекемелерде жалақы төлемін кешіктіру фактілері анықталған жағдайда, дереу әрекет ету шаралары қолданылады. Бұл кәсіпорындардағы мәселелер мемлекеттік кірістер департаментінің бақылауында. Жоспардан тыс тексерулер мен жазатайым оқиғаларды арнайы тергеп – тексеру барысында 20 кәсіпорында 1230 – ге жуық жұмыскерлермен ақпарттық-түсіндірме жұмыстары жүзеге асырылды. Аймақта басқа мемлекеттің жұмыс күші тартылған 3 кәсіпорында 9 заң бұзушылық анықталып, оларды жою бойынша 2 нұсқама берілген. Сондай-ақ, облыстағы басқармамен өндірістік жарақаттану жағдайлары мен еңбек қауіпсіздігінің жай-күйіне тоқсан сайын талдау жүргізілуде. Есепті кезеңде 7 кәсіпорында 1007 жұмыс орындары еңбек жағдайлары бойынша аттестаттаудан өткізілген», -деді Төрахмет Сайлаубайұлы.
</blockquote>
Басқармамен жұмыс берушілерге «Цифрлық Қазақстан» кешенді бағдарламасы аясында қабылданған «Еңбек шарттары есебінің бірыңғай жүйесі» атты автоматтандырылған ақпараттық жүйесіне жұмыскерлердің еңбек шарттарының электронды түрде тіркеу жұмыстарын жүргізу қажеттігі кеңінен насихатталуда. Нәтижесінде, биылғы жылы аталған жүйеге облыстағы 2066 субъектілердің 23 746 жұмыскерлерінің еңбек шарттары тіркелген

Қызылордалық жұмысшылар жалақысын уақытылы алып жүр ме?

Kyzylorda-news. kz. Синоптиктер 24 қыркүйекке арналған ауа райы болжамын ұсынды, деп хабарлайды «Қазгидромет» РМК.
Қазақстанның батысында, орталығында және шығысында фронттардың ықпалымен тұрақсыз ауа райы сақталады. Осыған байланысты жаңбыр жауады.
Елдің орталығында және шығысында аздаған жауын-шашын жауады. Республиканың қалған аумағында жаңбыр жаумайды, күн ашық болады.
Елдің батысында, оңтүстігінде, оңтүстік-батысында және шығысында жел күшейеді. Оңтүстікте және оңтүстік-батыста шаңды дауыл соғады.
Республиканың солтүстігінде және солтүстік-батысында тұман түседі.

Жұмаға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Қазақстандық кәсіпкерлер мобильді аударымдар үшін енді бөлек шот ашады. Бұл туралы қаржы министрі Ерұлан Жамаубаев мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
Айтуынша, қаржы министрлігі мүдделі мемлекеттік органдармен, бизнес қауымдастығымен және қаржыгерлер қауымдастығымен бірлесіп, мобильді аударымдарды реттеу туралы заң нормаларын әзірледі. Қазір ол парламенттің қарауында жатыр.
“Оның негізгі мәні мынада: қазір жеке кәсіпкерлер кәсіпкерлік қызметпен айналысқанда да, жеке аударымдар жасағанда да, ақша бір шотта араласып кетіп жатыр. Бұл салықтық әкімшілендіруге мүмкіндік бермейді. Сондықтан біз заң аясында кәсіпкерлерден кәсібі үшін жеке шот ашуын талап етеміз. Ал жеке аударымдарды өзінің шоты арқылы жүргізе беруіне болады”, – деді Жамаубаев үкімет үйінде өткен баспасөз мәслихатында.
Бұл ретте министр&nbsp;қарапайым халықтың аударымдарына&nbsp;ешкім тиіспейтінін айтты.
“Халық тарапынан алаңдаушылық болмауы керек. Себебі азаматтардың қолданып жүрген карта шоттары сақталады, күнделікті өзара ақша аударымдарына ешқандай нұқсан келмейді. Яғни, бүкіл процесс сол күйі қалады. Біз мобильді аударымдарды фискализациялау үшін ғана жаңа өзгерісті біртіндеп енгіземіз”, – деді ол.
Жамаубаевтың айтуынша, Қазақстанда сегіз айда мобильді және интернет арқылы жүргізілген аударымдар мен төлемдер жалпы сомасы 36 триллион теңгені құраған.

Министр мобильді аударымдарға қатысты қандай өзгеріс болатынын айтты

<a href="https://kyzylorda-news.kz/">Kyzylorda-news.kz.</a> Мемлекет басшысының биылғы Жолдауында жер кодексі бойынша шетелдік тұлғаларға ауыл шаруашылығы жерлерінің берілмейтіні айтылған болатын. Сондай-ақ, тұрғындардың қосалқы шаруашылығындағы мал басын жайылыммен қамтамасыз ету және жем-шөп дайындауға керекті жерлер көлемін ұлғайтуға басымдық беруді тапсырды. Өңірлік коммуникациялар қызметінде өткен брифингте облыстық жер қатынастары басқармасының басшысы Медет Усаин биылғы жылы орын алған қуаншылыққа байланысты атқарылып жатқан жұмыстарды баяндады.
<blockquote>
 “Биылғы қуаңшылық Арал ауданын айналып өтпеді. Ел Президенті белгілеген бағыттағы мақсаттарға жету үшін қала және аудан әкімдері уәкілетті органдармен бірлесе отырып, бірнеше бағытта шаралар жүргізілуде. Атап айтсақ, орталық уәкілетті органдармен әзірленетін «Жеке қосалқы шаруашылық туралы» Заң жобасына әзірленді. Аталған жоба аумағымыздың жергілікті ерекшеліктерін ескере отырып, тиісті ұсыныстар берілетін болады. Сондай-ақ, елді мекендер маңындағы жайылымдар мен шабындықтардың сапалық жағдайы сарапталып, оларды суландыру және қалпына келтіру өз кезеңімен ұйымдастырылмақ. Бұл ретте, әр ауылдағы жайылымдарды жақсартудың жолдары қарастырылды. Соңғы жылдары су тапшылығына байланысты жарамсыз шабындықтарды суландыру мүмкіндіктері қарастырылуда. Осы орайда, пайдаланылмай отырған жайылымдарды анықтау мен ол учаскелерді мемлекет меншігіне қайтарып алу жұмыстары жалғасын табады”, -деді Медет Усаин.
</blockquote>
Мемлекет басшысының Халқына Жолдауында жер саласындағы ашықтық пен жер кадастрлық ақпараттарға қолжетімділікті қамтамасыз ету керектігін мәлімдеген болатын. Жүктелген міндет бойынша жер қоры және жылжымайтын мүлік нысандары туралы деректердің бірыңғай ұлттық базасын құру тапсырылды.
<blockquote>
 “Бүгінгі күні ҚР Президентінің тапсырмасына сәйкес, жер қатынастары саласын цифрландыру мәселесі бойынша Үкіметпен арнайы заң жобасы әзірленуде. Бүгінде Ауыл шаруашылығы министрлігінің арнайы «Qoldau.kz» сайтында әр шаруашылықтың жер көлемі мен мал басы саны туралы ақпараттар қоры жинақталған. Онда жайылым алқаптарын пайдаланбай отырған шаруашылық атауы мен жайылым жүктемесінің сақталуы туралы ақпараттар жергілікті әкімдік пен уәкілетті органға ұсынылуда. Ұсынылған учаске саны – 1848 құрады. Әрі қарай, шаруашылықтарға ескертулер беріліп, нәтиже болмаған жағдайда учаскесі қайтарылып алынады. Бұған қоса пайдаланбаған учаскіге салық нормасын 10 еселенген көлемде төлеу міндеттеледі”,- деді облыстық жер қатынастары басқармасының басшысы Медет Усаин.
</blockquote>
Облыста өңірлік геоақпараттық жүйесін құру бағытында 2021-2022 жылдарға арналған іргелес елді-мекендер мен ауылдық округтердің жер учаскелеріне түгендеу жұмыстары жалғасын табуда. Түгендеу жұмыстары барысында бірқатар мәселелер қамтылатын болады.

Жер мақсатты пайдаланылмаса, бірнеше есе салық салынады

<a href="https://kyzylorda-news.kz/ru/obshestvo/">Kyzylorda-news.kz</a>. Белгілі қазақстандық әнші Димаш Құдайберген “Азияның ең сымбатты 100 жігіті”&nbsp;King Choice рейтингісінде бірінші орынға шықты.&nbsp;
Байқау сайтындағы мәліметке сәйкес, қазақстандық әншіге 5 834 405 рет дауыс берілген.
Екінші орында оңтүстіккореялық BTS тобының солисі Ким Сокджин (Kim Seokjin). Ол 5 804 655 дауыс жинады.
Үшінші орында 1 455 784 дауыспен тай актері Вин Метавин (Win Metawin) тұр.
Дауыс беру бір аптадан соң, 30 қыркүйекте аяқталады. Димашқа&nbsp;<a href="https://kingchoice.me/">мына сілтеме</a>&nbsp;бойынша дауыс беруге болады.
Бұған дейін Jas Otan жастар қанатының белсенділері әлеуметтік желіде&nbsp;Димаш Құдайбергенге дауыс беруді қолдау үшін #JasOtanQoldaidy акциясын бастаған болатын.
Айта кетері, Димаш түрлі наградаға ие. Ең маңыздылары арасында – Қытайдың&nbsp;Top Chinese Music Awards премиясында “Азиядағы ең танымал әнші” номинациясы, MTV Global Chinese Music Awards-та “Жылдың үздік шетелдік шығармашылық тұлғасы” номинациясы,&nbsp; Қытай мен Қазақстан “Достық елшісі” наградасы.
<a href="https://sputnik.kz/world/20210923/18215275/Aziya-symbat-Dimash.html">Sputnik Қазақстан</a>

Азияның ең сымбатты жігіті рейтингісінде Димаш 1-орында тұр

*<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласы әкімінің өкімімен Әзірбек Нұрбек Әзірбекұлы қалалық ауылшаруашылығы бөлімінің басшысы қызметіне тағайындалды.*
Нұрбек Әзірбекұлы 1981 жылы дүниеге келген. Жоғары білімді. 
2002 жылы Қожа Ахмет Яссауи атындағы Халықаралық Қазақ-Түрік университетін «құқықтану», 2010 жылы Қорқыт Ата атындағы Қызылорда мемлекеттік университетін «мемлекеттік және жергілікті басқару» мамандықтары бойынша бітірген.
Еңбек жолын 2004 жылы Сырдария ауданы, Ақжарма ауылдық округі әкімі аппаратының маманы қызметінен бастаған. 
2008-2009 жылдары Ақжарма ауылдық округі әкімі аппаратының жетекші маманы; 
2009-2015 жылдары Сырдария ауданы, Ақжарма ауылдық округінің әкімі, аудандық кәсіпкерлік, өнеркәсіп және туризм бөлімінің басшысы; 
2015 жылдың қазан айынан бастап осы кезге дейін аудандық ауылшаруашылығы бөлімінің басшысы қызметін абыроймен атқарып келді.

Қалалық ауылшаруашылығы бөлімінің басшысы тағайындалды

*<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Халықаралық ымдау тілдері күні. Бұл күн 1951 жылы бекітілген. Жалпы облыс бойынша 30 мыңнан аса мүгедектігі бар адам тіркелген. Оның ішінде, бес мыңнан астамы ерекше қажеттілігі бар балалар. Өңірлік коммуникациялар қызметінде өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Айгүл Ибраева мүмкіндігі шектеулі жандарға жасалынып жатқан шараларды баяндады.*
<blockquote>
 «Биыл оңалтудың жеке бағдарламасына сәйкес 300 ден астам есту қабілеті бойынша мүгедектігі бар азаматтар әлеуметтік қызметтер порталы арқылы сурдотехникалық құралдармен қамтылды. Атап айтқанда, веб камерасы бар ноутбук, есту аппараттары, естімейтін және нашар естейтін жандарға арналған сағаттар және көп функциялы сигнал жүйелері берілді. Сонымен қатар мүмкіндігі шектеулі жандарға телебағдарламалар трансляциялауда сурдоаудармамен сүймелдеу үшін арнайы қаражат қарастырылған болатын. Аталған қызметті облыстық “Qyzylorda” телеарнасы жүзеге асырып келеді. Осы жылы 258 нысанға бейімдеу жұмыстарын жүргізу жоспарланған болатын. Оның 73,6 пайызы толық орындалды. Қалған нысандарға бейімдеу жұмыстары жыл аяғына дейін жүргізіледі”, – деді Айгүл Болатқызы.
</blockquote>
Жалпы ымдау тілі мамандарының негізгі қызметі − еститін және естімейтін адамдардың арасындағы делдалдық қызметті көрсету. Бүгінде бұл бағытта облыс бойынша 277 жанға тілінің мамандары әлеуметтік қызметтерді көрсетіп келеді.
Баспасөз конференциясында №6 есту қабілеті бұзылған балаларды арнайы түзету мектеп-интернатының дефектолог маманы, сурдоаудармашы Айткүл Садықова сурдоаударма саласының қыр-сырын баяндап, өз пікірін білдірді.
<blockquote>
 «Негізінен ымдау тілі − есту қабілеті қалыптаспаған жандарға арналған тіл. Өзім істейтін мектеп-интернатында 67 ерекше қажеттілігі бар бала тәрбиеленуде. Көбінесе арнайы түзету мектеп-интернатына 5-6 жастан бастап келеді. Бұл аталған мектеп-интернаты Қызылорда қаласында 2002 жылы ашылған болатын. Содан бері мүмкіндігі шектеулі балалармен жұмыс істеп келеді. Ымдау тілі басқа облыстарда орыс тілінде жүргізіліп тұрды. Қазіргі таңда балаларға өз ана тілінде үйретіледі. Саусақ әліппесі дайындық сыныбынан бастап үйретіледі. Ал ымдау, қимыл-ишара сабақтары 4 сыныптан бастап жүргізіледі. Сондай-ақ, балалардың диагноздарына қарай әртүрлі деңгейде сабақтар өтеді. Мүгедектігі бар азаматтар қоғамда өз орнын тапса екен дейміз. Өйткені мектеп-интернатын бітірген балалардың жоғары оқу орнында оқуы әрі қарай жұмыс істеуіне барынша жағдай жасалынуы керек деген пікірдемін”, – деді Айткүл Көпбайқызы.
</blockquote>
<img src="https://kyzylorda-news.kz/wp-content/uploads/2021/09/242502452_1377369749325200_2698267317312180988_n.jpg" alt="" />

Қызылордада есту қабілеті төмен 300 азамат сурдотехникалық құралдармен қамтылды

<a href="https://kyzylorda-news.kz/ru/obshestvo/">Kyzylorda-news.kz</a>. ҚР Президенті Қасым-Жомарт Тоқаев Маңғыстау облысының әлеуметтік-экономикалық дамуы&nbsp;жөніндегі кеңесте&nbsp;Алматыдағы атысқа байланысты пікір білдірді, деп хабарлайды ҚазАқпарат.
«Қоғамда резонанс тудырған Алматыда таяуда орын алған қайғылы оқиғаға жеке тоқталғым келеді. Қаза тапқандардың туған-туыстары мен жақындарына тағы да көңіл айтамын. Полиция қызметкерлері мен сот орындаушысы өздерінің қызметтік борышын атқарды. Өкінішке орай өздеріне шабуыл салдарынан қаза тапты. Адам өлтіруді оның қандай да бір себебі болса да ақтауға болмайды. Өркениетті қоғамды мұндай сипаттағы кез келген дау мен проблема тек қана құқықтық алаңда шешілуі тиіс. Бұған қоса, орын алған қайғылы жайттың мән-жайын тыңғылықты ашу керек. Мұндай жайт неліктен орын алғанын анықтау қажет. Кредиторлар мен проблемалы заемщылар арасындағы әсіресе тұрғын үйге қатысты қарым-қатынас өте нәзік. Мұны білеміз әрі заңдық жетілдіруді талап етеді», – деді Мемлекет басшысы Маңғыстау облысының әлеуметтік-экономикалық дамуы жөніндегі кеңес барысында.
ҚР Президенті мұның банктердің кепіл саясатына, бағалау қызметін жетілдіруге, жеке сот орындаушылардың жүмысына және өзге де аспектілерге қатысты екендігін атап өтті. Бұл мәселеде ашық және бірыңғай сот тәжірибесін қамтамасыз ету маңызды екендігіне баса назар аудартты.
«Үкіметке, Ұлттық банкке және Қаржылық реттеу агенттігіне бір ай мерзімнің ішінде заңнамалық және нормативтік түзетілер топтамасын дайындау тиіс. Тағы да қайталап айтамын, егер оған қажеттілік болса. Дегенмен, мен мұндай қажеттілік туындап отыр деп санаймын. Бірақ, мамандар бұл проблеманы тағы да бір мәрте тыңғылықты зерделеуі тиіс. Сонымен қатар Үкімет пен Алматы әкімдігі қайғылы оқиғадан зардап шеккендердің барлығына, бірінші кезекте балаларға қолдау көрсетуі қажет»,- деді Қасым-Жомарт Тоқаев.
Еске салсақ, Алматыда атыс болып, 5 адамның қаза тапқанын&nbsp;<a href="https://www.inform.kz/kz/almaty-ortalygyndagy-atys-bes-adam-kaza-tapty_a3838742">хабарлаған болатынбыз.</a>Аталған жағдай бойынша сотқа дейінгі тергеу амалдары басталды. Кінәлі адам 20 жылға дейін немесе өмір бойына бас бостандығынан&nbsp;<a href="https://www.kazinform.kz/kz/almatydagy-atys-kylmystyk-is-kozgaldy_a3838781">айырылуы мүмкін.</a>

Президент Алматыдағы атысқа қатысты пікір білдірді

<a href="https://kyzylorda-news.kz/ru/obshestvo/">Kyzylorda-news.kz</a>. Жыл басынан бері ҚР Сыбайлас жемқорлыққа қарсы іс-қимыл агенттігінің облыс бойынша департаменті сыбайлас жемқорлық тәуекелдерінің алдын алу бағытында 7 сыртқы талдау жұмыстарын жүргізген. Талдау нәтижесімен сыбайлас жемқорлық тәуекелдерін азайту мақсатында 70 ұсыным енгізілген. Қазіргі таңда 52 ұсыным орындалып, қалғаны орындалу сатысында. Бұл туралы Өңірлік коммуникациялар қызметінің ақпарат алаңында ҚР Сыбайлас жемқорлыққа қарсы іс-қимыл Агенттігі Қызылорда облысы бойынша департаменті басшысының бірінші орынбасары Ғалия Әлімқұлова мәлімдеп, департаменттің ағымдағы жылдың 8 айында атқарған жұмыстарын баяндады.
<blockquote>
 «Мониторинг барысында 2021 жылға арналған мемлекеттік сатып алу жоспарында сатып алынатын тауар бағасы ішінара нарық бағасына күмән туғызған 70-ден аса ұйымдар мен мекемелерге бірқатар ұсынымдар берілді. Нәтижесінде ағымдағы жылдың 8 айында сатып алуға жоспарланған тауарларды зерделей келе 3,2 млрд. теңге үнемдеу мүмкін болды», – деді Ғалия Ұбайдуллақызы.
</blockquote>
Брифингте департамент жанынан құрылған ақпараттық-ағартушылық штаб жетекшісі Ақзада Мадалиева штаб құрамының жаңартылып жатқандығын атап өтті. Штаб негізінен консультативтік-кеңесші орган ретінде 18 мүшеден құралады. Мәдениет, білім, денсаулық сақтау саласының мамандары мен журналистер, ғалымдар мен ұстаздар, заңгерлер штаб мүшелері бола алады. Кеңесші органның басты мақсаты – қоғамда сыбайлас жемқорлыққа қарсы мәдениетті қалыптастыра отырып, парасат қағидаларын ілгерілету болып табылады. Жыл басынан бері бұл мақсатта штаб арқылы 495 іс-шара ұйымдастырылған.
Ал арнайы мониторинг топ және «Ақмешіт – адалдық алаңы» жобасы мүшелерінің қатыстырылуымен сыбайлас жемқорлыққа қарсы 5 мониторинг жүргізілген. Мониторинг қорытындысымен 18 ұсыным берілген.
<blockquote>
 «Ақмешіт – адалдық алаңы» жобалық кеңсесінің жетекшісі Жандос Тұсмағамбетов бұл жұмыстардың жалғасын табатындығын жеткізіп «Маусым айында барлық ауданда кездесу өткіздік. Халық көп тұтынатын мемлекеттік қызметтер саласына арнайы зерделеу жұмыстарын жүргіздік. Мемлекеттік мекемелерге ұсыныстар берілді. Халықпен тұрмыстық сыбайлас жемқорлықтың алдын алу бағытында түрлі кездесулер, қабылдаулар өткіздік. Алдағы уақытта жаңа формада жұмыс жасамақпыз», – деді.
</blockquote>
<img src="https://kyzylorda-news.kz/wp-content/uploads/2021/09/242526581_1377394159322759_4767485874514054979_n.jpg" alt="" />

Қызылордада сыбайлас жемқорлықпен күрес қалай жүріп жатыр?

<a href="https://kyzylorda-news.kz/">Kyzylorda-news.kz.</a> Қала әкімінің орынбасары Бектас Нуридинов аулаларды абаттандыру, көгалдандыру ісі бойынша үздік атанған байқау жеңімпаздарын құттықтады.
Қызылорда қаласын жасыл-желекке айналдыру бағытындағы жұмыстарға қаланың жанашыр және белсенді азаматтары үлестерін қосып келеді.
&nbsp;Оларды ынталандыру үшін Қызылорда қаласы әкімдігі «Қала күні» мерекесіне орайластырып әлеуметтік желілердегі парақшасында 16 тамыз бен 10 қыркүйек аралығында «Үздік аула-2021» байқауын ұйымдастырды.
Байқауға қатысуға 8 аула өтінім білдіріп, нәтижесі бойынша «Шұғыла» мөлтек ауданы №15 үй 28 пәтер тұрғындары Голиков Анатолий Иванович пен Голикова Людмила Васильевнаның ауласы басым дауысқа ие болып, жеңімпаз атанды.
Қаланың көркеюіне үлес қосып, жанашырлық танытқан аула бағбанына Бектас Балғабайұлы қала әкімінің арнайы дипломын табыстады.&nbsp;
Сонымен қатар, ауланы көркейту-көгалдандыруға қажетті құрал-саймандар жинағы беріліп, тұрғын үй ауласына «Үздік аула – 2021» тақтайшасы ілінді.
Байқаудың бір ерекшелігі қала тұрғындары үздік ауланы өздері таңдайды. Дәстүрге айналған «Үздік аулалар» байқауы биыл&nbsp; 4-ші мәрте ұйымдастырылды.
Жеңімпаз атанған тұрғындар Қызылорда қаласының тұрғындарын аулаларын күтіп-баптауға, қаламызды жасыл-желекке айналдыруға өз үлестерін қосуға шақырды.
<img src="https://kyzylorda-news.kz/wp-content/uploads/2021/09/baha0163-scaled.jpg" alt="" />
<img src="https://kyzylorda-news.kz/wp-content/uploads/2021/09/baha0201-scaled.jpg" alt="" />

Желі қолданушылары Қызылорда қаласының «Үздік ауласын» таңдады

<a href="https://kyzylorda-news.kz/ru/obshestvo/">Kyzylorda-news.kz</a>. Ауа райына байланысты көпқабатты үйлерге жылу жылдағыдан ерте берілуі мүмкін. Дайындық жұмыстары бекітілген іс-шаралар жоспарына сәйкес атқарылуда. Бұл туралы бүгін Өңірлік коммуникациялар қызметінде өткен баспасөз конференциясында облыстық энергетика және тұрғын үй-коммуналдық шаруашылық басқармасы басшысының орынбасары Ерлан Жаңабаев мәлімдеді.
Бүгінде аймақтағы 1064 әлеуметтік нысанға және 708 бу қазандығына жөндеу жұмыстары жасалды. Сонымен қатар, «Қызылордажылуэлектрорталығы» кәсіпорны бойынша 17 дана автономды-блокты модульдік қазандықтарға да ағымдағы жөндеу жүргізілді. Бұдан бөлек 4,3 шақырым кварталішілік жылу желілері жаңартылды. Кәсіпорын резервуарларында 4,6 мың тонна мазуттың авариялық қоры бар.
<blockquote>
 «Сондай-ақ, ауа райы күрт өзгерсе, 9 градустан төмендесе, көпқабатты үйлерге жылу беріле бастайды. Біз оған дайынбыз. Мәселен, былтыр ауа райының салқындауына байланысты 10 қазан күні жылу берілген болатын», – дейді Е.Жаңабаев.
</blockquote>
Айта кету керек, жалпы тұрғын үй-коммуналдық шаруашылық және әлеуметтік сала нысандарының 2021-2022 жылдардағы жылыту маусымына дайындық жұмыстары кестеге сәйкес жүргізілуде және облыстық штабтың тұрақты бақылауында.

Қызылордада жылу ерте берілуі мүмкін

<a href="https://kyzylorda-news.kz/ru/obshestvo/">Kyzylorda-news.kz</a>. 15 қыркүйектен бастап медициналық-санитариялық көмек ұйымындарына еркін таңдау науқаны басталды. Бұл науқан екі айға жалғаспақ. Бүгінгі таңда облыс бойынша қордың денсаулық сақтау субъектілерінің деректер базасында 21 емхана тіркелген. Оның 62 пайызы мемлекеттік болса, 38 пайызы жеке меншік. Тұрғындар үшін тіркеу науқаны мен емхананы еркін таңдау мүмкіндігі консультациялық-диагностикалық қызметтерге, ауруханаларда емделуге және кез келген жоспарлы медициналық қызметтерді пайдалануға құқық береді. Бұл жөнінде “Әлеуметтік медициналық сақтандыру қоры” КЕАҚ Қызылорда облысы бойынша филиалының директоры Бақыт Исмаханбетов мәлімдеді.
<blockquote>
 “Бұл науқанның басты мақсаты − халыққа қызмет көрсететін медициналық ұйымның тиімді әрі сапалы болуын қамтамасыз ету. Егер медициналық ұйымның қызметі қанағаттандырмаған жағдайда тұрғындарға таңдау құқығы беріледі. Өткен жылғы емханаларда тіркеу науқанының қорытындысы бойынша, өңірдің екі мыңнан аса тұрғыны БМСК ұйымын еркін таңдау қызметін пайдаланды. Олардың көпшілігі өтініш беру арқылы тіркелсе, қалған азаматтар egov.kz порталы арқылы онлайн қызметті таңдаған. Сондай-ақ, азаматтар емхананы еркін таңдау құқығын пайдаланбаған болса, қазіргі таңда тіркеліп тұрған БМСК ұйымында қала береді”, – деді Бақыт Торғайбайұлы.
</blockquote>
Бастапқы медициналық-санитариялық көмек ұйымына үш тәсіл арқылы тіркелуге болады. Олар: тікелей таңдалған медициналық ұйымға жүгіну арқылы және электронды үкімет порталы көмегімен онлайн түрде тіркелу. Сондай-ақ, халыққа қызмет көрсету орталықтарында өтініш беруге мүмкіндік қарастырылған. Тіркеу науқаны − емхананы ауыстырудың жалғыз мүмкіндігі болып табылмайды. Бұл рәсімді жылына бір рет еркін таңдау құқығымен жасауға болады.
<blockquote>
 “Егер азамат тұрғылықты жерін және жұмыс пен оқу орнын ауыстырған жағдайда да емхананы қайта таңдауға құқылы екенің айтқым келеді. Азаматтардың кейбір жекелеген санаттары тікелей емханаға бекітіле алады. Ол үшін еркін нысандағы өтініш пен жеке басты куәландыратын құжатты қоса беру қажет. Аталмыш санаттарға зейнеткерлер, мүмкіндігі шектеулі жандар, заң бойынша тағайындалған қорғаншылар немесе қамқоршылар, сондай-ақ патронат тәрбиешілер мен басқа да азаматтар жатады. Жыл сайынғы бекіту науқанын өткізуге жауапкершілік аумақтық денсаулық сақтау басқармаларына жүктелгендігін атап өткен жөн», – деді Бақыт Исмаханбетов.
</blockquote>

Қазақстан және Қызылорда облысының жаңалықтары: Қоғам