Kyzylorda-news.kz. Дүниежүзілік денсаулық сақтау ұйымы келесі жылы ғаламда шприц тапшылығы басталатынын мәлімдеді. Дүниежүзі халқын вакцинамен қамту үшін 2 млрд шприц жетпей қалуы мүмкін.
Денсаулық сақтау ұйымының хабарлауынша, биыл жаппай вакцина салуға 7 млрд 250 млн дана шприц қолданылған. Бұл жыл сайынғы орташа статистикалық көрсеткіштен екі есе көп. Содан екі жылда қолданылатын шприц бір жылда іске асырылып, келесі жылға жетпей қалды.
Ал шприцті шығару өндірісі сол күйде, әлі ұлғайған жоқ. Кейбір елдер шприцтің жетпей қалатынын біліп, қаптап сатып алып жатыр.
Ұйымның есебінше, дефициттің алдын алу үшін өндіріс иелері қазірден бастап шприц өндірісін көбейтіп, ғаламдық ажиотаждың алдын алуға тырысу қажет.
<blockquote>
 “Пандемия басталған 2020 жылдың алғашқы кезінде әлемде медициналық бетперде жетпей, біршама қиындық туғаны белгілі. Бірақ өндірісті ұлғайту арқылы мұның орнын толтыра алдық. Енді шприц өндірісіне де сондай тәсілді қолдануымыз қажет”, – деп хабарлады ДДҰ.
</blockquote>
<a href="https://massaget.kz/layfstayl/Zdorove/66654/">Massaget.kz</a>

ДДҰ: Шприц тапшылығы басталды

Kyzylorda-news.kz. Бүгін ақын, халықаралық «Алаш» әдеби сыйлығының иегері Қатира Жәленова 70 жасқа толды. Осыған орай Н.Бекежанов атындағы қазақ академиялық музыкалық драма театрында мерейтой иесінің «Сезімнің нәзік сырлары» атты шығармашылық кеші ұйымдастырылды.
Облыс әкімі Гүлшара Әбдіқалықова қатысқан кешке ақын, Қазақстанның еңбек сіңірген қайраткері, Қазақстан Жазушылар одағының төрағасы Ұлықбек Есдәулет, журналист-сықақшы Көпен Әмірбек, ақын, халықаралық «Алаш» әдеби сыйлығының иегері Шәмшия Жұбатова, жазушы, Қазақстан Жазушылар одағының мүшесі Серік Байхонов және Қазақстан Жазушылар одағының секретариат меңгерушісі Қайырниса Жұмашова шақырылды.Шара барысында аймақ басшысы мерейтой иесін туған күнімен құттықтап, ілтипатын көрсетті.
Өңіріміздегі ақын қыздардың көшбасында тұрған Қатира Сыздыққызы – өзінің өміршең шығармаларымен Сыр елінің рухани-мәдени өміріне зор үлес қосып, туған жердің атын алысқа танытқан талант иесі. Ақынның «Аңсаған менің әнімсің», «Ақ гүлдер» аталатын жыр жинақтары мен ән мәтіндері өлеңсүйер қауымның сүйікті шығармаларына айналды. Сондай-ақ, ақын өлеңдері орыс тіліндегі жинақтарда жарық көріп, өзінің де аударма ісімен айналысқаны баршаға мәлім. Қазақтың аяулы ақын қызын мерейлі мерекесімен құттықтап, осы тойға Қазақстан Жазушылар одағының төрағасы Ұлықбек Оразбайұлы Есдәулеттің өзі бастап, халқымызға танымал өнер өкілдерінің ат басын бұрып келуі де Қатира апайдың поэзиядағы өзіндік орнын танытса керек.
<blockquote>
 “Құрметті Қатира Сыздыққызы,өзімнің атымнан және Сыр елінің жырсүйер жұртшылығы атынан Сізді бүгінгі мерейлі жасыңызбен шын жүректен құттықтаймын. Сізге зор денсаулық, шығармашылық табыс тілеймін. Біз Сізді, шығармашылығыңызды әрқашан биік бағалаймыз”, – деді облыс әкімі.
</blockquote>
Мұнан соң, өңір басшысы мерейтой иесін облыс әкімінің Құрмет грамотасымен марапаттап, дәстүрге сай иығына бешпент жауып, құрметін көрсетті.
Қалалық жастар театрының әртістері сахналанған қойылым қойып, кешке келгендердің көңілін көтерді. Ақын Ұлықбек Есдәулет бастаған делегат Қатира Сыздыққызын мерейлі жасымен құттықтап, ақжарма тілектерін айтты. Сондай-ақ, шара барысында аймақтың бірқатар ақын-жазушыларына Қазақстан Жазушылар одағының куәлігі салтанатты түрде тапсырылды.
Айта кетейік, Қатира Жәленова 1951 жылы Шиелі ауданы, Ақмая ауылында дүниеге келген. 1978 жылы «Қызғалдық көктем» атты тұңғыш кітабы жарық көрді. Әр жылдары ақынның туындылары жинақ болып басылған. Тағы бір топ өлеңдері «Разбег», «Мадонны Турана» атты орыс тіліндегі антологияға енді.
Тәжік ақыны Г.Сүлейменованың «Қырық бұрым» өлеңдер жинағын қазақ тіліне тәжімалап, «Алақандағы ұя» әңгімесі әлемнің бес тіліне аударылған.
Облыс әкімінің екі мәрте стипендианты. Халықаралық «Алаш» әдеби сыйлығының, республикалық «Жігер» фестивалінің лауреаты.
<img src="https://kyzylorda-news.kz/wp-content/uploads/2021/11/fb_img_1636794941105.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636794943781.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636794958671.jpg" alt="" />
<img src="https://kyzylorda-news.kz/wp-content/uploads/2021/11/fb_img_1636794962665.jpg" alt="" />

Қызылордада ақын Қатира Жәленованың шығармашылық кеші өтті

Kyzylorda-news.kz. Қызылорда облысында өткен жылмен салыстырғанда қант диабетімен ауырғандар саны 2,6 пайызға өскен. Дәрігерлердің айтуынша қант диабеті жастар арасында да көбейгенін мәлімдеді. Бұл туралы Өңірлік коммуникациялар қызметінде өткен брифингте облыстық денсаулық сақтау басқармасының штаттан тыс эндокринолог дәрігері Гүлнара Уразова хабарлады.
Дәрігердің айтуынша, жыл сайын әлемде 2 типті қант диабетімен ауыратын науқастардың саны артып келеді. Статистикалық мәліметтерге сүйенсек, бүкіл әлемде қант диабетімен ауыратын 400 миллионға жуық адам бар екен. Қант диабеті жүрек-қан тамыр ауруларынан кейінгі екінші орында. Бүгінде ауруға шалдыққан науқастардың жалпы саны – 14 700 құрайды. Бұл өткен жылмен салыстырғанда 2,6 пайызға артқан. 2011 жылдан бастап қант диабетін анықтау үшін скрининг жүргізіліп, барлық емханалар осы бағдарламамен жұмыс істеуде.
<blockquote>
 «Қант диабеті әсер ете алатын және әсер ете алмайтын болып екіге бөлінеді. Біз әсер ете алмайтын факторлардың бірі – адамның жасы. Яғни адам жасы ұлғайған сайын қант диабетіне шалдығу мүмкіндігі жоғарылай бастайды. Екінші фактор – бұл тұқым қуалаушылық факторы. Яғни сырқат адамға ген арқылы беріледі. Сондай-ақ, қимыл қозғалыстың аз болуы, дұрыс тамақтанбау, зиянды әдеттердің барлығы қант диабеті ауруына әкеп соқтыруы мүмкін», – деді өз сөзінде №6 қалалық емхананың эндокринолог дәрігері Гүлжан Абсатова.
</blockquote>

Қызылордада қант диабетіне шалдыққандар саны артып барады

<a href="https://kyzylorda-news.kz/ru/obshestvo/">Kyzylorda-news.kz</a>. Белгілі антрополог Алексей Невчалода Ақтөбе облысындағы Құмсай қорымынан табылған қазақтардың бабасының келбетін жаңғыртты. Бұл арийлер немесе андроновиттер деп аталады, деп хабарлайды <a href="https://sn.kz/sn-akparat-agyny/85780-belgili-antropolog-kazaktyn-argy-atasynyn-kelbetin-kalpyna-keltirdi?fbclid=IwAR05WN8fPHyWM_Zc6C07ou-rM1q4qpii5xu7CG46V7F0zC08_0TjXvtl6wg">orda.kz</a>.
<img src="https://kyzylorda-news.kz/wp-content/uploads/2021/11/adam.jpg" alt="" />
Бір қызығы, адамның сыртқы келбеті кеңес ғалымдары ойлап тапқан технологияның арқасында жүз пайыздық дәлдікпен қайта жасалады.
Көптеген зерттеушілер оны атты алғаш қолға үйретіп, күйме ойлап тапқан өркениетпен байланыстырады. Сонымен қатар, ол Үндістаннан Германияға дейін бүкіл әлемге үнді-еуропалық сөздерді (ана, әпке, аға, т.б.) таратқан.
Көшбасшы отырған күйінде жерленген, жасы 50 шамалас. Ол шамамен бес мың жыл бұрын өмір сүрген. Бұл қорымға жүргізілген радиокөміртекті талдау арқылы дәлелденді.
Бойы екі метрге дейін жетеді. Құмсайдан шыққан «қазақтың арғы атасы» аталық тізбегі арқылы таралатын Y хромосома Q1a2b2 гаплотобына жатады. Қазір Солтүстік және Батыс Еуропада кең таралған. Ал оның ұрпақтарының біразы қазір түркі халықтарының арасында өмір сүріп жатыр.

Белгілі антрополог қазақтың арғы атасының келбетін қалпына келтірді (ФОТО)

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстандықтар студенттік жатақханалар құрылысына инвестиция сала алады, деп хабарлайды&nbsp;<a href="https://stan.kz/">Stan.kz</a>.
Жатақханадағы орын тапшылығы мәселесі барлық өңірлер үшін өзекті. Статистикалық мәліметтерге сүйенсек, республика бойынша жатақханаға мұқтаж студенттер саны 62 мыңнан асады. Жатақханаға негізгі сұраныс Алматыда – 22 мың орын және Нұр-Сұлтанда – 17 мың орын.
ҚР БҒМ «Қаржы орталығы» АҚ баспасөз қызметінің мәліметінше, 2021 жылдан бастап мектеп бітірушілер санының айтарлықтай өскені байқалады. Мәселен, биыл 163 мыңнан астам адам мектеп бітірсе, 2025 жылға қарай бұл көрсеткіш 302 жетуі мүмкін.
Бұл мәселені шешу үшін әрбір заңды тұлға (мемлекеттік мекемелерді қоспағанда) студенттерге арналған жатақхана салып, табыс ала алатын механизм әзірленді.
Мәселен, жобаға қатысуға ниет білдірген құрылыс салушы өз қаражатына нысан салып, 8 жыл ішінде пайдалануға берілгеннен кейін әрбір нақты алған төсек орын үшін мемлекеттен төлем алады.
Мемлекеттік тапсырыс бойынша төлемдерден бөлек, инвестордың өзі әрбір студент тұру үшін орташа есеппен 15-20 мың теңге төлем алады (құны өз бетінше анықталады).
Сондай-ақ инвестор үшін «Қарапайым заттар экономикасы» және «Бизнестің жол картасы 2020-2025» («Даму» қоры) шеңберінде 9%-ға дейінгі банктік несиені субсидиялау және дайын жобалық-сметалық құжаттаманы ұсыну (стандартты және жеке жобалар) сияқты қосымша мүмкіндіктер қарастырылған.
Сондай-ақ инвестор коммерциялық кеңістіктен қосымша табыс ала алады, яғни жатақхана базасында асхана, шаштараз және басқа да шаруашылық нысандарын ашуға болады.
Жобаға қатысу мүмкіндіктері мен талаптары туралы толығырақ 8 800 080 28 28 телефоны арқылы біле аласыз.

Қазақстандықтар студенттік жатақханалар құрылысына инвестиция сала алады

Kyzylorda-news.kz. Қазақстанда өткен тәулікте 2365 адам коронавирус инфекциясынан жазылып шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 175,
Алматы қаласы – 188,
Шымкент қаласы – 35,
Ақмола облысы – 133,
Ақтөбе облысы – 41,
Алматы облысы – 46,
Атырау облысы – 44,
Шығыс Қазақстан облысы – 364,
Жамбыл облысы – 15,
Батыс Қазақстан облысы – 420,
Қарағанды облысы – 137,
Қостанай облысы – 312,
Қызылорда облысы – 24,
Маңғыстау облысы – 4,
Павлодар облысы – 254,
Солтүстік Қазақстан облысы – 131,
Түркістан облысы – 42.
Қазақстан бойынша жазылғандар саны – 912611.

24 қызылордалық індеттен айықты

Kyzylorda-news.kz. Қазақстанда өткен тәулікте 1220 адамнан коронавирус инфекциясы ПТР арқылы анықталды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 103
Алматы қаласы – 149
Шымкент қаласы – 31
Ақмола облысы – 88
Ақтөбе облысы – 22
Алматы облысы – 66
Атырау облысы – 27
Шығыс Қазақстан облысы – 88
Жамбыл облысы – 14
Батыс Қазақстан облысы – 36
Қарағанды облысы – 110
Қостанай облысы – 118
Қызылорда облысы – 31
Маңғыстау облысы – 13
Павлодар облысы – 134
Солтүстік Қазақстан облысы – 169
Түркістан облысы – 21.
Жалпы ел бойынша ауырғандар саны 955366.

Қызылордада 31 адамнан коронавирус анықталды

Kyzylorda-news.kz. 13 қараша күні еліміздің оңтүстік өңірлерінде жауын-шашынсыз ауа райы күтіледі, деп хабарлайды Қазгидромет.
Республиканың қалған бөлігінде жауын-шашын болады, солтүстікте көбіне қар түрінде жауады. Қазақстан аумағының басым бөлігінде тұман, көктайғақ, желдің күшеюі, жаяу бұрқасын болжанады.
Атап айтқанда, Ақмола облысының солтүстік-батысында, оңтүстік-шығысында көктайғақ, жаяу бұрқасын, 15-20 м/с екпінде жел, түнде және таңертең облыстың оңтүстік-шығысында тұман күтіледі.
Күндіз Солтүстік Қазақстан облысының солтүстігінде, батысында көктайғақ, жаяу бұрқасын, түнде және таңертең батыста тұман болжанады.
Шығыс Қазақстан облысында түнде таулы аудандарда, күндіз солтүстік бөлігінде және оңтүстігінде тұман, көктайғақ, жаяу бұрқасын күтіледі, басым бөлігінде жел 15-20 м/с күшейеді.
Қарағанды облысының солтүстік-батысында көктайғақ, жаяу бұрқасын, түнде және таңертең облыстың оңтүстігінде тұман күтіледі, күндіз облыстың солтүстігінде жел 15-20 м/с күшейеді.
Түнде Павлодар облысының шығысында, күндіз солтүстігінде көктайғақ, тұман болады. Күндіз облыстың оңтүстігінде жел 15-20 м/с күшейеді.
Батыс Қазақстан облысының солтүстігінде, солтүстік-батысында, шығысында көктайғақ, бұрқасын болып, 15-20 м/с жылдамдықта жел тұрады.
Ақтөбе, Қостанай облыстарының солтүстігінде көктайғақ, бұрқасын күтіледі, Ақтөбе облысының солтүстігінде, Қостанай облысының шығысында жел 15-20 м/с күшейеді.
Атырау облысының солтүстігінде, шығысында желдің күші 15-20 м/с жетеді.
Күндіз Маңғыстау облысының солтүстігінде 15-20 м/с жылдамдықта жел болады.
Күндіз Қызылорда облысының солтүстік-батысында жел 15-20 м/с күшейеді.
Жамбыл облысының таулы аудандарында тұман, желдің екпіні 15-20 м/с артады.

13 қарашаға арналған ауа райы болжамы

<a href="https://kyzylorda-news.kz/ru/obshestvo/">Kyzylorda-news.kz</a>. «Nur Otan» партиясы Жалағаш аудандық филиалының қоғамдық қабылдау бөлмесінде бектілген кестеге сәйкес партияның депутаттық фракциясы мүшесі Бисенов Қылышбай Алдабергенұлы жеке қоғамдық қабылдау өткізді.
Қабылдауға келген тұрғындар мектеп бітіруші түлектерге бөлінетін облыс әкімінің гранттары, оқушыларға арналған көлік тасымалы, жұмыссыздық және шет ел көліктерінің оның ішінде Ресей мемлекетінің көліктерінің қозғалыстары туралы мәселелерін қозғалды.
Қызылорда облыстық маслихатының депутаты Қылышбай Алдабергенұлы әрбір тұрғынның мәселесін мұқият тыңдап, тиісті құқықтық кеңестер беріп, түсіндірме жұмыстарын жүргізді.
<img src="https://kyzylorda-news.kz/wp-content/uploads/2021/11/255618045_3147129995611913_5473624378266385115_n.jpg" alt="" />

Қылышбай Бисенов аудан тұрғындарын қабылдады

<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданы бойынша жылу маусымына 20000 тн қатты отын және 2400 тн сұйық отын қажеттілігі жоспарланды. Бұл 4000 әлеуметтік нысан мен 16000 халықтың сұранысы. Бүгінде әлеуметтік нысандарға 3400 тонна қатты отын толық таратылса, қалған 600 тонна көмір денсаулық саласымен жасалынған шартқа сәйкес жылу маусымының екінші кезеңінде жеткізілетін болады.
<blockquote>
 «Халық тұтынуы үшін 16000 тонна қатты отын жоспарланып, жеке тұрғын үйлер бойынша өткен маусымнан 3500 тонна көлемінде резервтік отын қоры қалыптасқан. Бүгінгі күнге дейін ауданға 15540 тонна яғни 222 вагон қатты отын жеткізілсе, 2940 тонна яғни 42 вагон қатты отын жолда келе жатыр. Көмір қоймаларында 1000 тоннадан астам қор қалыптасқан. Бұл ретте, Қазалы ауданы көршілес Арал ауданының 11 елді мекенін қатты отынмен қамтып отырғандығын ескеру қажет», – деді Қазалы ауданы әкімінің орынбасары Жалғас Оңғарұлы.
</blockquote>
Сондай-ақ, әлеуметтік нысандарға жоспарланған 2400 тонна сұйық отын резервуар сыйымдылықтарына және берілген тапсырысқа сәйкес, аудан орталығынан жеткізушілер тарапынан тасымалдануда.
Көмір бағасын тұрақты ұстау мақсатында жеткізуші 3 кәсіпкермен аудан әкімдігі арасында меморандум жасалынған. Ағаш көмір тоннасы – 18 мың, тас көмір – 14 мың теңгеден сатылымда.
Сонымен қатар, ауданда барлығы 14514 тұрғын үй болса, оның 7839 (54 %) газ отынымен жылытылады. Жыл соңына дейін Қазалы қаласын газ отынына көшіру жоспарлануда. Қазіргі уақытта қаладағы 1558 үйдің 100-ден астамы газ желісіне қосылуға дайын болса, жоспарға сәйкес тағы 400-ге жуық үй құрылыс-монтаж жұмыстарын жүргізетін болады.

Қазалы ауданына 222 вагон көмір жеткізілді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Егер сіз жүргізуші куәлігін алғыңыз келсе, емтиханды сәтті тапсыру үшін бірнеше қадамдарды білгеніңіз абзал. Қиын ештеңе жоқ. Төмендегі бастапқы жүргізуші куәлігін алу бойынша қадамдық нұсқауларды оқыңыз.
1-қадам
Білім алу үшін жақсы оқу курсын таңдаңыз таңдаңыз. Жол қозғалысы ережелерінің теориясын өз бетіңізше де меңгеруге болады. Бірақ көлікті жүргізу сабақтарын міндетті түрде нұсқаушымен өтіңіз.
2-қадам
Құжаттар жинау. Қажетті құжаттар: жеке куәлік, 073 үлгісіндегі меданықтама, автокурсты бітіргені туралы куәлік (болған жағдайда) және мемлекеттік баж салығын төлегеніңіз туралы түбіртек. Мемлекеттік баждың мөлшері 1,25 АЕК құрайды.
3-қадам
Теориялық емтихан. 40 минут ішінде 40 сұрақтың 32-сіне дұрыс жауап берсеңіз, емтиханды сәтті өткеніңіз.
4-қадам
Автодромда практикалық емтихан өту. Мұнда арнайы көлікпен 12 жаттығуды орындауға 20 минут уақыт беріледі.
5-қадам
Дайын құжатты алу. Екі емтиханды да сәтті тапсырсаңыз, сізге жүргізуші куәлігі беріледі.

Жүргізуші куәлігін алудың 5 қадамы

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласында 368 жай серіктестік, 12 меншік иелерінің бірлестігі құрылды. Бұл туралы бүгін қалалық тұрғын үй инспекциясы бөлімінің басшысы Абзал Рысбек баспасөз орталығында өткен баспасөз конференциясында мәлімдеді.
Қала аумағында 815 көпқабатты тұрғын үй болса, оның 684-не көпқабатты тұрғын үйге 17 басқару органы (ПИК/КСК) күтіп-ұстау қызметін көрсетіп келеді. Келер жылдың шілде айында ПИК жұмысы толық тоқтайды.
Жаңа заңнамаға сәйкес, тұрғындар заңды тұлға ретінде меншік иелерінің бірлестігін немесе барлық тұрғындар бірлесіп басқаратын жай серіктестік құруы қажет. “Бір үй – бір бірлестік – бір шот” қағидасы негізінде әр үйдің тұрғындары ортақ қаржысын өздері басқарып, пайдалана алады.
Ағымдағы жылдың 6 қазанына дейін қала аумағында 368 жай серіктестік, 12 меншік иелерінің бірлестігі құрылды. атап айтар болсақ, Сәулет №8,10,11,12, Бегім ана №7, Бөкейхан №66, Жеңіс №104, Амангелді №109, Айтбаев көшелері №29, «Шұғыла» мөлтек ауданы №19.
Бұл бағыттағы жұмысты жандандыру үшін жұмысшы топпен 566 рет жиналыс өткізіліп, 580 көпқабатты тұрғын үйдің тұрғындарына сауалнама парақтары мен түсіндірме ақпараттар таратылды.
ҚР «Тұрғын үй қатынастары туралы» Заңының 74 бабының 2-тармағына сәйкес, Қызылорда қаласы бойынша тұрғын үйге мұқтаж адамдардың 5 санаты бойынша 25 538 отбасы кезекте тұр.
2020 жылдың қаңтар айынан 2021 жылдың мамыр айы аралығында тұрғын үй алу кезегінде тұрған адамдардың тізімін өзектендіру мақсатында кезектілік тізіміне түгендеу жұмыстары жүргізіліп, ҚР «Тұрғын үй қатынастары туралы» Заңының 73 бабына сәйкес, 2876 адам кезектен шығарылды.
Тұрғын үй алу кезек реттілігіне сәйкес, 2020-2021 жылдар аралығында мемлекеттік тұрғын үй қорынан 800 отбасына сатып алу құқығынсыз пәтерлер табысталды. 2021 жылы “Нұрлы жер” бағдарламасы аясында «Отбасы банкі» АҚ Қызылорда облыстық филиалы арқылы Қызылорда қаласы, Сол Жағалау тұрғын ауданынан 830 пәтер несиеге сатылды.
Айта кету керек, жекешелендіру процесі толықтай автоматтандырылған, www.gosreestr.kz веб-порталында электрондық цифрлық қолтаңбаны қолдану арқылы жүзеге асырылуда.

Қазақстан және Қызылорда облысының жаңалықтары: Қоғам