*<a href="https://kyzylorda-news.kz/ru/obshestvo/">Kyzylorda-news.kz</a>. Бүгін «Атамекен» Ұлттық кəсіпкерлер палатасы «Бастау Бизнес» жобасының 5 жылдағы жұмысын қорытындылады. Нұр-Сұлтан қаласында жоба түлектерінің өнімдерінен көрме ұйымдастырылды жəне онлайн-форум өтті. Оның аясында кəсіпкерлер мен олардың бизнес- тренерлері шеберлік сабағын өткізді. Осы уақыт ішінде 185 мыңға жуық қазақстандық кəсіпкерлік негіздерін оқыды.*
Елбасы «Бастау Бизнес» бағдарламасына жоғары баға берді. Нұрсұлтан Назарбаев бейнеүндеу жолдап, жобаны Қазақстан бойынша жалғастыру қажеттігін атап өтті.
<blockquote>
 «Оқу аяқталғаннан кейін бизнес-тренерлер жыл бойы кəсіпкерлердің жобаларына жетекшілік етеді. Ісін жаңа бастаған кəсіпкердің проблемасын шешуге көмектеседі. Бұл, əсіресе, бизнеске жаһандық пандемияға байланысты қатты қысым түскен кезде өте қажет. Еліміздің гүлденуі азаматтардың əл-ауқатына тікелей байланысты, сондықтан мен жоғары бағалайтын «Бастау Бизнес» бағдарламасының барлық қатысушысына сəттілік тілеймін. Ел бойынша бұл бағдарламаны жалғастыру керек», – деді Нұрсұлтан Назарбаев.
</blockquote>
Шара барысында Қызылорда облысынан жобаның 2020 жылғы түлегі Лаура Рамазанова сөз сөйледі.
Лаураның негізгі мамандығы аудармашы. Балалармен жұмыс істеуді ұнататын ол төрт жыл нәрестелер массажисті және фитнес-тренер болып жұмыс істейді.
<blockquote>
 «Қызығушылығымды кәсіпке айналдыру үшін 2020 жылы «Бастау Бизнес» жобасына келдім. Жобаны сәтті аяқтап, 555 мың теңге гранттық қаржыға жаңа туған сәбилерге арналған массаж орталығын аштым. Кәсібімді ашу пандемиямен қатар келіп, көптеген қиындықтарға кездестім. Уайымнан ұйықтамаған кездерім де болды. Бірақ жобада алған білімім мен бизнес-тренердің қолдауының арқасында кәсібімді дұрыс жолға бағыттай алдым. Қазір көрсететін қызметіме сұраныс жоғары. Несие алып, қосымша үш жасқа дейінгі балаларға арналған акватерапия, бассейн, төрт жастан асқан балаларға гимнастика, ересектерге арналған массаж және хиджама кабинеттерін іске қостым. Хоббиімді кәсіпке айналдыруға мүмкіндік берген «Бастау Бизнес» жобасына алғысым шексіз. Жоба ғұмырлы болсын», – деді форумда Лаура Рамазанова.
</blockquote>
Кәсіпкер бүгінде 6 адамды жұмыспен қамтып отыр. Ендігі жоспары педиатор кабинетін, жүкті әйелдерге арналған курстар ашу.
Айта кетейік, Қызылорда облысы кәсіпкерлер палатасының мәліметінше, өңірде бес жылда 11670 азамат «Бастау Бизнес» жобасы бойынша оқып, 6723 жоба мемлекет тарапынан&nbsp; қаржыландырылған.
Бастаулықтарды несиемен қамту мақсатында облыс әкімдігі мен Ұлттық кәсіпкерлер палатасы бірлесе «Аtameken Qyzylorda» микроқаржы ұйымын құрды. Биыл аталған микроқаржы ұйымы арқылы 291 жобаны қаржыландыру жоспарлануда.
Қазір микроқаржы ұйымына облыс бойынша 102 азамат несиеге өтінім беріп, құжаттары қаралып жатыр. Жобалардың басым бөлігі ауыл шаруашылығы саласын дамытуға бағытталған.
<img src="https://kyzylorda-news.kz/wp-content/uploads/2021/09/2c6ad5ba-a857-45a3-bce7-37758aa6f1cc.jpg" alt="" />
<img src="https://kyzylorda-news.kz/wp-content/uploads/2021/09/9cc229db-d261-40de-867d-0e4e2d9b72f5.jpg" alt="" />

«Бастау Бизнеске»: Қызылорда облысында 6732 адам кәсібін ашты

*<a href="https://kyzylorda-news.kz/ru/obshestvo/">Kyzylorda-news.kz</a>. Қазақстан Республикасының Бас Прокуратурасының бұйрығымен Кемалов Асқар Жаметұлы Сырдария ауданының прокуроры лауазымына тағайындалды. Ауданның жаңа прокурорын аудан әкімі Мұрат Ергешбаев пен облыс прокурорының орынбасары Дамир Катаев таныстырды.*
Кадрлық өзгеріске байланысты ұйымдастырылған жиынға аудандық сот төрағасы Р.Алдамбергенов, облыстық мәслихат депутаты Р.Есенов, аудандық мәслихат депутаттары, аудан әкімінің орынбасарлары, мекеме, бөлім басшылары, аудандық ардагерлер кеңесі мен қоғамдық кеңес төрағалары қатысты.
Жиналыста аудан әкімі Мемлекет басшысы тарапынан прокуратура органдарына жүктелген міндет ауқымды екенін атап өтіп, жаңа қызметке тағайындалған А.Кемаловтың саладағы кәсіби тәжірибесі жоғары екеніне тоқталды. Облыс прокурорының орынбасары Д.Катаев қызметке тағайындау жөніндегі бұйрықпен және аудан прокурорының өмірбаянымен таныстырды. Сонымен қатар аудандық ардагерлер кеңесінің төрағасы М.Келдібаев сөз сөйлеп, жауапкершілігі жоғары қызметте абыройлы болуына тілектестігін білдірді. Өз кезегінде А.Кемалов артылған сенімді ақтауға, ел мүддесі үшін адал қызмет етуге, заң үстемдігін қамтамасыз ету бағытындағы жұмыстарды сапалы үйлестіруге күш салатынын атап өтті.
Айта кету керек, А.Кемалов 1970 жылы Қызылорда қаласында дүниеге келген. Әл-Фараби атындағы Қазақ мемлекеттік университетін «Құқықтану» мамандығы бойынша бітірген. Еңбек жолын 1990 жылы Қызылорда қаласындағы тігін фабрикасында заң кеңесшісі қызметінен бастап, әр жылдары Қызылорда облыстық тұтыну одағының заң кеңесшісі, Қызылорда облыстық сотының аға кеңесшісі және бас кеңесшісі қызметтерін атқарған. Сондай-ақ Қызылорда қаласы прокурорының көмекшісі, Қызылорда облысы прокуратурасының қылмыстық істер бойынша сот қаулыларының заңдылығын қадағалау бөлімінің прокуроры және аға прокуроры, Сырдария ауданы прокурорының орынбасары, Қызылорда облысы прокурорының халықаралық шарттардың қолданылуын қадағалау жөніндегі аға көмекшісі болып еңбек еткен. Мұнан бөлек Қызылорда облысы прокуратурасының қылмыстық істер бойынша сот қаулыларының заңдылығын қадағалау бөлімінің басшысы, Қызылорда облысы прокурорының кадр жұмыстары жөніндегі аға көмекшісі, Жаңақорған ауданының прокуроры, Қызылорда қаласы прокурорының ұйымдастыру-бақылау жұмыстары бойынша аға көмекшісі, Қызылорда облысы прокуратурасының сот алдында мемлекет мүддесін білдіру жөніндегі басқармасының аға прокуроры, Қызылорда облысы прокурорының атқарушылық іс жүргізудің заңдылығын қадағалау жөніндегі аға көмекшісі ретінде прокуратура саласында мол тәжірибе жинақтаған. Асқар Жаметұлы бұған дейін облыс прокурорының аға көмекшісі–топ жетекшісі лауазымын атқарып келген.
<img src="https://kyzylorda-news.kz/wp-content/uploads/2021/09/242582396_2911490842436961_3606742426993113540_n.jpg" alt="" />

Сырдария ауданына жаңа прокурор тағайындалды

<a href="https://kyzylorda-news.kz/ru/obshestvo/">Kyzylorda-news.kz</a>. “2022–2024 жылдарға арналған республикалық бюджет туралы” заң жобасы жария талқылауға шығарылды. Құжатта&nbsp;2022 жылы зейнетақы мен ең төменгі жалақының болжамды мөлшері анықталған.
Еңбек және халықты әлеуметтік қорғау министрлігінің түсіндірмесінде өзгеріске ең төменгі жалақы мөлшерінің 42 500 теңгеден 60 мың теңгеге артуы себеп болғаны жазылған.
2022 жылдың 1 қаңтарынан бастап:&nbsp;&nbsp;&nbsp;&nbsp;&nbsp;
<ul>
<li>жалақының ең төмен мөлшерi – 60 000 теңге;</li>
<li>мемлекеттік базалық зейнетақы төлемінің ең төмен мөлшері – 19 450 теңге;</li>
<li>зейнетақының ең төмен мөлшерi – 46 302 теңге;</li>
<li>жәрдемақыларды және өзге де әлеуметтiк төлемдердi есептеу, сондай-ақ заңнамаға сәйкес айыппұл санкциялары, салық және басқа да төлемдердi қолдану үшiн айлық есептiк көрсеткiш – 3 063 теңге;</li>
<li>базалық әлеуметтiк төлем мөлшерiн есептеу үшiн ең төмен күнкөрiс деңгейiнiң шамасы – 36 018 теңге болып белгiленсiн, деп жазылған құжатта.</li>
</ul>
Заң жобасы “Ашық НҚА”&nbsp;<a href="https://legalacts.egov.kz/npa/view?id=11652025">сайтында</a>&nbsp;жарияланды. 6 қазанға дейін талқыланады.
Әрі қарай оқу:&nbsp;<a href="https://sputnik.kz/economy/20210922/18198917/2022-jyl-zeynetaqy-jalaqy.html">https://sputnik.kz/economy/20210922/18198917/2022-jyl-zeynetaqy-jalaqy.html</a>

2022 жылы зейнетақы мен ең төменгі жалақы қанша болады?

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Салқын атлантикалық антициклон шығысқа қарай баяу жылжып, елдің басым бөлігінде өзінің ықпалын сақтап қалады, деп хабарлады Қазгидромет.
<blockquote>
 “Түнде еліміздің солтүстігінде, шығысында және орталығында сынап бағанасы 1-9 градусқа дейін төмендейді. Батыста атмосфералық фронттар әсерінен жаңбыр жауып, жел күшейеді”, – делінген хабарламада.
</blockquote>
Бейсенбі күні&nbsp;астанада&nbsp;түнде +3, күндіз +8 градус болады. 24 қыркүйекте түнде плюс екі градус, күндіз +8 градусты көрсетеді. Сенбі күні таңертең -2°C, күндіз +12°C.
23 қыркүйекте&nbsp;Алматыда&nbsp;сынап бағанасы түнде +14, күндіз +22 градусты көрсетеді. Ал жұмада түнде +11, күндіз +19°C, күн ашық. 25 қыркүйекте де дәл осындай ауа райы сақталады.

Алдағы күндерге арналған ауа райы болжамы

*<a href="https://kyzylorda-news.kz/ru/obshestvo/">Kyzylorda-news.kz</a>. Оқу-жаттығу 21-22 қыркүйек күндеріне жоспарланған. Оған шет мемлекеттердің Төтенше жағдайлар министрліктерінің өкілдері де қатыстырулуда. Атап айтқанда Қырғыстан Републикасынан 14, Өзбекстан Республикасынан 13, АҚШ-тан 3 өкіл арнайы келген. Өңірлік коммуникациялар қызметінде өткен баспасөз конференциясында облыстық төтенше жағдай департаменті бастығының орынбасары Бауыржан Ізбасаров халықаралық оқу-жаттығу жиыны туралы ақпаратпен бөлісті.*
Оқу-жаттығу Алматы облысындағы жойқын жер сілкінісі салдарынан туындаған төтенше жағдайларды жою кезіндегі іс-қимылдарды ұйымдастыру тақырыбымен азаматтық қорғау мемлекеттік жүйесінің басқару органдарын, күштер мен құралдарын дайындау мақсатында өткізілуде.
Алматы облысы, Қарасай ауданы, Елтай ауылдық округі, Көкөзек елді мекенінде жойқын жер сілкінісі зардаптарын жоюға Қызылорда облысы азаматтық қорғау қызметтерінен барлығы 67 құрылым, 1494 жеке құрам және 471 техника жоғары дайындыққа жіберілген.
Авариялық құтқару және кезек күттірмейтін жұмыстарды жүргізу үшін төтенше жағдай орын алған аумаққа 1 – эшелонмен Қызылода облысының азаматтық қорғаудың мемлекеттік кіші жүйесінің басқару органдары мен күштерінен құрылған жедел топ 36 адам, 8 бірлік техника және құтқару құрал-жабдықтары бар қалыптастырылған лектерді Полиция департаментінің арнайы көліктерімен ілесіп алып жүру арқылы жөнелтілді.
<blockquote>
 «Оқу-жаттығу жоспарына сәйкес Қызылорда облысының Төтенше жағдайлар департаментіне 2021 жылғы 21 қыркүйекте сағ. 07.00-де Алматы облысында жойқын жер сілкінісінің қаупі бар туралы «Апат-999» дабылы түскеннен кейін облыстық төтенше жағдайлардың алдын алу және жою жөніндегі комиссиясының жедел отырысы өткізілді. Оқу жаттығудың басшысы облыс әкімінің орынбасары Серік Ахмет және штаб басшысы Төтенше жағдайлар департаментінің бастығы Руслан Қайрақбаев тағайындалды», – деді Б.Ізбасаров.
</blockquote>
Алдағы уақытта да мұнан өзге де оқу-жаттығулар өткізіледі. Ол «Қыс-2021» республикалық командалық-штабтық жаттығуы Шығыс Қазақстан облысында қараша айында өтеді деп жоспарланып отыр.

«Жер-2021» командалық-штабтық оқу-жаттығуы жиыны өткізілуде

*<a href="https://kyzylorda-news.kz/ru/obshestvo/">Kyzylorda-news.kz</a>. Облыс әкімінің өкімімен Қызылорда облысының мәдениет, архивтер және құжаттама басқармасының басшысы лауазымына Есжанов Асқарбек Темірбекұлы тағайындалды.*
Асқарбек Есжанов 1978 жылы туған. Қызылорда мемлекеттік университетін «Тарих және құқық пәнінің мұғалімі», Қызылорда гуманитарлық университетін «заңгер» мамандықтары бойынша бітірген.
Еңбек жолын 1999 жылы Қызылорда экология және құқық колледжінде оқытушы болып бастап, 2002-2005 жылдары – Қызылорда облысының мәдениет басқармасының кітапхана, музей, тарихи және мәдени ескерткіштерді қорғау бөлімінде маман, бас маман.
2005-2007 жылдары – Қызылорда облыстық сотында, 2007 – 2010 жылдары Қызылорда қаласы әкімі аппаратында жауапты қызметтер атқарған. 2010-2013 жылдары облыс әкімі аппаратының ұйымдастыру-инспекторлық жұмыс және аймақтық даму бөлімінің бас инспекторы, бөлім басшысы.2013-2019 жылдар аралағында Қызылорда қаласы әкімі аппаратының басшысы, Қызылорда қалалық білім бөлімінің басшысы, қалалық мәслихатының аппарат басшысы;
2019-2020 жылдары Қызылорда қалалық мәдениет және тілдерді дамыту бөлімін басқарып, 2020 жылдан осы кезге дейін Қызылорда қаласы әкімінің орынбасары лауазымын атқарып келді.

Асқарбек Есжанов жаңа қызметке тағайындалды

<h2 id="kyzylordanewskzhttpskyzylordanewskzruobshestvo"><a href="https://kyzylorda-news.kz/ru/obshestvo/">Kyzylorda-news.kz</a>. Нарықты тағы қымбатшылық күтіп тұр. Бұл жолы дүкендерде ұн, макарон мен нан секілді астық өнімдерінің бағасы өседі. Астық өндірісі саласының мамандарының айтуынша, оған себеп жетерлік.</h2>
“Азық-түлік келісім-шарт корпорациясы” диқандардан бидай сатып алу бағасын көтеріп жіберген. Ал жеке компаниялар нарықты жаулап алу үшін диқандарға одан да жоғары ұсынып жатыр. Оның бәрі айналып келіп дүкендегі ұн мен нанның бағасын өсірері сөзсіз дейді мамандар.
Солтүстік Қазақстан облысының диқаны Марат Қарымсақов биылғы өнімін жылдағыдан қымбатырақ сатқысы келеді. Өйткені биылғы өнімі былтырғыдан 25 пайыз кем.&nbsp;
“110-115 мыңнан сатып аламыз деп жатыр. Керек десе өздері келіп алып кетпекші. Менің астық алқабымның әлі 60 пайыздан астамы жиналған жоқ. Ауа райы астықтың толық жетіліп пісуіне мүмкіндік беріп тұр. Оған дейін баға да тағы өсе түссе бізге жақсы болар еді”, – дейді Марат Қарымсақов.
Қазақстан астығының негізгі операторы “Азық-түлік келісім-шарт корпорациясы” былтыр бидай тоннасын 83 мың теңгеден алса, биыл 103 мыңға дейін көтеріп тастады. Ол шаруалардың банк алдындағы қарызын жабуға немесе техникалық жарақтарын қамдап алуға жеткілікті. Бірақ ол ақша дүкендердегі азық бағасына барып қосылады дейді мамандар.
<blockquote>
 “Біздің Үкіметтің шаруалардың қаржылық шығынын өтейтін мүмкіндігі жоқ. Жалғыз жолы – әлеуметтік маңызы бар азық түрлерінің бағасын барынша қалтаға қолайлы деңгейде ұстап тұру. Оның үстіне бағаның өсуіне келсек, ол астық бағасының өсуіне ғана байланысты емес. Көлік ақысы, жанармай, электр жарығы, жалақы және басқа да толып жатқан жанама әсерлер бар”, – дейді Қазақстан астық одағының өкілі Евгений Карабанов.
</blockquote>
Министрліктің мәлімдеуінше, бидай биыл әлем бойынша аз жиналып жатыр. Мысалы, Канадада өнім биыл 8 млн тоннаға, Ресейде 13 миллион тоннаға, АҚШ-та шамамен 4 миллион тоннадай азайып қалуы мүмкін. Мамандар біздің елде де биылғы қуаңшылық салдарынан қамбаларға астық шамамен 25 пайыз кем түсуі мүмкін дейді. Ал мал азығы тіпті 30-дан 50 пайызға дейін кемуі ғажап емес.
Астыққа қатысты тағы бір мәселе – биыл аз түссе де, ішкі нарықты толтыруға жеткілікті. Былтырғыдан қалғанын қоса алғанда тағы 6 жарым миллион тоннасын сыртқа сатуға болады. Біздің бидайымыз бен ұнымыздың негізгі тұтынушысы Өзбекстан, Тәжікстан, Ауғанстан болып келген еді. Ауған нарығы ондағы жағдайға байланысты жабылып қалды. Енді біздің диқандар 3 миллион тонна астықты қайда жіберерін білмей дағдарып отыр.
<a href="https://www.ktk.kz/kz/news/video/2021/09/21/191110/">“КТК”</a>

Қазақстанда енді ұн, нан және макарон қымбаттайды

<a href="https://kyzylorda-news.kz/ru/obshestvo/">Kyzylorda-news.kz</a>. Салықтық тексеру жүргізу барысында жиі орын алатын заң бұзушылықтың бірі-сенімсіз салық төлеушілермен өзара есеп айырысу.
Мүліктік пайда алу мақсатында нақты жұмыс жасамай, қызметтер көрсетпестен, тауарлар жеткізіп бермей шот-фактураны рәсімдеу, яғни &nbsp;өзара келісім арқылы бухгалтерлік және салық есептіліктеріне бұрмаланған мәліметтер енгізіп, салық төлеуден жалтару жайттары салық төлеушілер тарапынан жиі кездеседі.
Егер салықтық тексеру нәтижесімен бюджетке төленетін төлемдерді төлеуден жалтару фактілері анықталса, (бұл жерде бұзушылық сомасы заңды тұлғалар үшін 50&nbsp;000 айлық есептік көрсеткіштен, ал жеке кәсіпкерлер үшін 20&nbsp;000 айлық есептік көрсеткіштен асса) онда салық органдары тарапынанҚазақстан Республикасының заңдарына сәйкес, процесстік шешімді қабылдау үшінматериалдар тиісті құқық қорғау органдарына ұсынылып,қылмыстық іс қозғалады.
Қызылорда облыстық кірістер департаментінің дерегінше жыл басынан бері салықтарды төлеуден жалтару жайттары бойынша 5 cалық төлеушінің жалпы сомасы 1,1 млрд.теңгені құрайтын материалдары экономикалық тергеп-тексеру қызметіне жолданған. Нәтижесінде, 5 салық төлеушіге қатысты қылмыстық іс қозғалып, оның 3-і бойынша тиісті процессуалдық шешімдер қабылданды. Қалған 2 қылмыстық іс өндірісте.
Сондай-ақ, құқықтық салдарлар жасау ниетінсіз, тек алдау үшін жасалған мәмілені (жалған мәмілені) сот мүдделі тұлғаның, тиісті мемлекеттік органның немесе прокурордың талап-арызы бойынша жарамсыз деп таниды. Ағымдағы жыл ішінде мәмілені жарамсыз деп тану туралы сотқа 49 өтініш беріліп, сотпен 17 азаматтық іс қаралып мәміле жарамсыз деп танылды. Қалған істер сотпен қаралуда.
Осындай заңсыз жасалған&nbsp; мәмілелер «көлеңкелі экономиканың» бір бөлігі болып табылады, бұл елдің экономикалық қауіпсіздігіне&nbsp; зиян келтіретіндіктен, сәйкесінше &nbsp;мемлекеттік кірістер органдарының бастыназарында болады.

Қызылордада салық төлеуден жалтару дерегі азаймай отыр

&nbsp;<a href="https://kyzylorda-news.kz/ru/obshestvo/">Kyzylorda-news.kz</a>. Синоптиктердің болжауынша, сәрсенбіде елімізде жаңбыр жауып, найзағай жарқылдайды, жел күшейеді, тұман түсіп, түнде кей өңірлерді үсік жүреді, деп хабарлайды Қазгидромет.
22 қыркүйекте Қазақстанның басым бөлігінде фронтальдық ағындардың ықпалымен ауа райы құбылмалы болады, соған байланысты жаңбыр жауады, еліміздің оңтүстік таулы аудандарында және оңтүстік-шығысында күн бұлттап, найзағай жарқылдайды, солтүстігінде аздаған жаңбыр, қар жауады. Тек еліміздің орталығында, шығысында, солтүстік-батысында және оңтүстік-батысында күн райы ашық болад. Еліміздің солтүстігінде, батысында, оңтүстік-батысында және оңтүстіктің таулы аудандарында және оңтүстік-шығысында жел күшейеді, оңтүстік-батысында шаңды дауыл соғып, солтүстігінде, солтүстік-батысында тұман түсуі ықтимал.

Сәрсенбіге арналған ауа райы болжамы

<a href="https://kyzylorda-news.kz/ru/obshestvo/">Kyzylorda-news.kz</a>. Мемлекет басшысының Жолдауы еліміздің алдағы әлеуметтік-экономикалық дамуының басым бағыттарын айқындап бергендей болды. Онда пандемиямен күрес жолдарын, оның елімізге алып келген зардабы мен өзгерістерін, еліміздің әлеуметтік дамуына, ел тұрғындарының табысы мен жұмыс орындарының сақталуын, халқымыздың денсаулығы мен өмірін сақтау жолындағы жұмыстарға басты назар аудару керектігін айтты. Осы ретте, мемлекеттік сатып алу саласы да тәуелсіздігімізбен бірге жаңарып, дамып, жетілдіріліп келеді дейді облыстық мемлекеттік сатып алу басқармасының басшысы Ғалым Едігеев Өңірлік коммуникациялар қызметінде өткен баспасөз конференциясында.
<blockquote>
 «Бүгінде толықтай автоматтандырылып, барлығы дерлік электронды сипатта жүргізілетін сатып алулардың ашықтығы мен жариялылығы қамтамасыз етілген. Облыста бұгінгі күнге 76 млрд. теңгенің 2808 конкурсы жарияланып, оның аяқталған 51 млрд. теңге болатын 1363-нің қорытындысымен 5 млрд. теңге үнемделді. Мұнымен бірге, Жолдауда «Қарапайым заттар экономикасы» бағдарламасы өзінің тиімділігін дәлелдегені айтыла келіп, оны жүзеге асыру барысында 3,5 мыңнан астам жоба іске қосылып, өндірілген өнім мен көрсетілген қызметтің жалпы құны 3,5 триллион теңге болғаны нақтыланды.
 Яғни, 2022 жылға дейін ұзартылған аталған бағдарлама шеңберінде мемлекеттік сатып алу басқармасымен арнайы конкурстар ұйымдастырылып, құрылыс-монтаждау жұмыстарындағы жергілікті қамту үлесі бақылануда», – деді басқарма басшысы.
</blockquote>
Бұл ретте, мердігер компаниялармен құрылыс жұмыстарын жүргізуде шетелдік емес, елімізде өндірілетін құрылыс материалдарының пайдаланылуы назарда. Ол кәсіпкерлер палатасынан отандық өнімге берілетін СТ КЗ сертификаттары арқылы расталып отыр.
Бұл отандық тауар өндірушілерді қолдауға арналған бірден-бір қолдау шарасы болып отыр. 
Биылға осындай шаралармен жалпы құны 42 млрд. теңгені құрайтын 62 жоба, «Жұмыспен қамту жол картасы» бағдарламасы аясында 7 млрд. теңгенің 8 жобасы қамтылып отыр.
Жалпы Мемлекет басшысының Қазақстан халқына Жолдауы аясында берген барлық тапсырмаларын уақытылы және сапалы орындау үшін облыстық мемлекеттік сатып алу басқармасы тарапынан тиісіті шаралар қабылданатын болады.

Қызылорда: Мемлекеттік сатып алу саласында қандай өзгеріс бар?

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысы кәсіпкерлер палатасынан көмек сұрап келген қызылордалық кәсіпкерлердің маман тапшылығына қатысты мәселесі Өңірлік кеңестің адами капиталды дамыту комитетінде қаралды.
Отырысқа комитет мүшелері мен облыстық білім басқармасы өкілдері, колледж басшылары, кәсіпкерлер қатысты.
«Квант» механикалық заводының директоры Жаңабай Бекішев кадрға қатысты сұранысты қазір шешпесе, алдағы уақытта завод ішіндегі темір жону цехының жұмысы тоқтап қалуы мүмкін екенін айтты.
<blockquote>
 «Қазір біздің заводтағы темір жону цехында 22 станок бар. Алайда цех толық қуаттылыққа жұмыс істеп тұрған жоқ. Себебі маман жоқ. Қазіргі мамандарымыз да –зейнет жасындағылар. Ертең олар кетсе, цехтың жұмысы тоқтап қалуы мүмкін. Бізге қазір темір жону станогында жұмыс істей алатын, электр қозғалтқыштарының тілін білетін мамандар керек. Қалада олар саусақпен санарлық, тіпті кей мамандық бойынша жоқ та», – деді кездесуде кәсіпкер Жаңабай Бекішев.
</blockquote>
«Қызылорда жылу электр орталығы» МҚК өкілі Бақытжан Молдиманов та бұл мәселені растап отыр.
<blockquote>
 «Қазір жастардың техникалық мамандықтарға деген қызығушылығы жоқ. Біздің салада маман тұрақтамайтын болды. Оған жалақының аздығы себеп болып отыр. Бұрын бос орынға іріктеу жасайтынбыз. Қазір келген маманды таңдамай-ақ алатын дәрежеге жеттік. 10 адамды жұмысқа алсақ, 2-3 айдан кейін оның ең азы жетеуі түрлі себептерін айтып жұмыстан шығып кетіп жатыр. Бұрын жұмысшы мамандықтарына дайындау мектеп қабырғасында-ақ басталатын. Осыған орай, оқу-өндірістік комбинаттың тәжірибесін қайта енгізуді ұсынамын», – дейді Бақытжан Молдиманов.
</blockquote>
Кәсіпкерлер маман даярлау процесіне өздері де араласуға, тіпті оқытқан мамандарын жұмыспен қамтуға дайын екенін жеткізді.
Кездесуде тараптар мәселені жан-жақты талқылап, нәтижесінде шешу механизмдеріне қол жеткізді.
<blockquote>
 «Бұл мәселені кәсіпкерлеріміз бұрын да көтеріп келді. Дегенмен осы жолғы кездесудің жөні ерекше. «Білім берудің барлық деңгейінің мемлекеттік жалпыға міндетті білім беру стандарттарына» биыл өзгерістер енді. Аталған құжатқа сәйкес кәсіпкерлердің сұранысы бойынша кәсіптік және техникалық білім беру ұйымдары негізгі мамандыққа қосымша модуль енгізу арқылы жаңа біліктілікті игеруге мүмкіндік бере алады. Мәселен, дәнекерлеуші мамандығының білім бағдарламасы оқу жоспарына қосымша темір жонушы модулін қосу арқылы студентке екі біліктілікті қатар алуға немесе соңғысын таңдауға жағдай жасалып отыр. Біз осы механизмді кездесудегі кәсіпкерлердің сұранысы бойынша жақын күндері экспермименттік режимде өңірдегі кәсіптік және техникалық білім беру ұйымдарына енгізіп көргіміз келіп отыр. Ол үшін заңнамалық тұрғыда кедергі жоқ», – деді Кәсіпкерлер палатасының бөлім бастығы Гүлмира Әлназарова.
</blockquote>
Кездесуде көтерілген бұдан басқа мәселелер бойынша ұсыныстар «Атамекеннің» орталық аппараты арқылы Білім және ғылым министрлігіне ұсынылатын болды.

Қызылорданың кәсіпкерлер палатасы бизнесмендердің мәселесін шешіп берді

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін экономика ғылымдарының докторы, профессор, ҚР ҰҒА корреспондент-мүшесі, «Болашақ» университетінің ғылыми жетекшісі Бақберген Досманбетов 76 жасқа толды.
Мемлекет қайраткерінің мерейлі жасына ел Президенті Қасым-Жомарт Тоқаевтың құрметі жеткізілді. Сонымен бірге облыс әкімі Гүлшара Әбдіқалықованың құттықтау хаты ұсынылды. Ерекше құрметті облыс әкімінің орынбасары Бақыт Жаханов табыстап, профессорды мерейлі жасымен құттықтап, арнайы лебізін жеткізді.
Бақберген Сәрсенұлы 1945 жылы 21 қыркүйекте Қармақшы ауданы, Диірментөбе стансасында дүниеге келген. 1971 жылы Мәскеу мемлекеттік басқару институтын бітірген. Экономика ғылымдарының докторы, профессор. Макроэкономика, аймақтық экономика, статистика, демография салаларының маманы.Ресей жаратылыстану ғылымдары Академиясының, Халықаралық жоғары мектеп Академиясының, Қазақстан әлеуметтік ғылымдар Академиясының, Қазақстан инженерлер академиясының Академигі, Сеул Ұлттық университетінің құрметті профессоры.
1991-96 жылдары Қызылорда педагогикалық институтының, Гуманитарлық Университетінің ректоры. 1996-1999 жылдары Қызылорда қаласының әкімі, арнайы экономикалық аймақ Әкімшілік кеңесінің төрағасы. 1994-1996 жылдары Облыстық мәслихаттың екі мәрте депутаты.
1999-2011 жылдары ҚР Парламенті Сенатының депутаты, экономика, бюджет және қаржы комитетінің хатшысы. 
Бірнеше монографиялар мен ғылыми еңбектердің авторы. «Население Казахстана», «Сүйем сені Сыр елі», «Ұстаным», «Демографическое развитие Казахстана», «Түркі халықтары» атты монографиялары жарыққа шыққан.
2 ғылым докторы және 10-ға жуық ғылым кандидаттарын тәрбиелеп шығарған ұстаз-ғалым. 2005 жылы «Құрмет», 2010 жылы «Парасат» орденімен, 4 медальмен марапатталған. 
2011-2014 жылдары «Қазақстан темір жолы» ұлттық компаниясы» АҚ Президентінің кеңесшісі. 1995 жылдан бастап «Болашақ» университетінің ғылыми жетекшісі.
<img src="https://kyzylorda-news.kz/wp-content/uploads/2021/09/242375960_3728523327250709_7273543099853630686_n.jpg" alt="" />
<img src="https://kyzylorda-news.kz/wp-content/uploads/2021/09/242450752_3728523360584039_5577317228386885943_n.jpg" alt="" />

Қазақстан және Қызылорда облысының жаңалықтары: Қоғам