<a href="https://kyzylorda-news.kz/">Kyzylorda-news.kz.</a>&nbsp; Нұр-Сұлтан қаласында өткен бизнестің әлеуметтік жауапкершілігі «Парыз» республикалық конкурсы мен ҚР Президентінің «Алтын сапа» сыйлығын иеленген қызылордалық кәсіпкерлер Өңірлік коммуникациялар қызметінде өткен баспасөз конференциясына қатысып, журналистермен қуанышты сәттерін бөлісті.
Биылғы конкурста «Абай Дәулет» ЖШС және «Алтын Орда» ЖШС «Алтын сапа» сыйлығының лауреаттары атанды.
«Абай-Дәулет» ЖШС «Азық-түлік тауарларын және ауылшаруашылық өнім шығаратын үздік кәсіпорын» номинациясында үздік атанды. Компания директоры Мұрат Сәрсенбаевтың айтуынша, 2019 жылы «Іскер номинациясын» алса, биыл міне «Алтын сапаға» қол жеткізген. 
Компания өз жұмысында Сапа менеджменті жүйесіне, Тамақ өнімдері қауіпсіздігі менеджментіне сәйкестік сертификаттарын басшылыққа алады және осы стандарттардың барлық сапалық талаптарын орындап келеді. «SYR DANI» брендімен күріш жармасы ел ішінде жоғары сұранысқа ие және Ресей, Өзбекстан, Моңғолия, Украина, Тәжікстан елдеріне экспортталады. 
«Алтын орда» ЖШС-гі де «Халыққа арналған тауарларды шығаратын үздік кәсіпорын» номинациясында «Шағын кәсіпкерлік субъектісі» санатында «Алтын Сапа» сыйлығын алды.
<blockquote>
 «Мекеме 1997 жылы ашылды. 2016 жылы ас тұзын өндіретін желі сатып алдық, сол жылдан бастап нарыққа «Ассоль» және «Сафия» брендтерімен йодталған ас тұзы өндіріліп, сатылымға шықты. Шет елдерге экспортталуда. Биыл соңғы технологияларға сай үлкен тұз өндіретін зауыт салынды. Қуаттылығы өте жоғары, соған орай әлі де нарықта жақсы жұмыс жасайтынымызға сенеміз және тұтынушыларымызға қол жетімді бағамен жоғары сапалы өнімдер ұсынамыз», – деді «Алтын Орда» ЖШС директорының орынбасары Абзал Қанатұлы.
</blockquote>
Ал, «Еңбекті қорғау жөніндегі үздік кәсіпорын» номинациясы бойынша қызылордалық «KAP Technology» ЖШС «Парыз» сыйлығының күміс мүсінімен марапатталды.
«KAP Technology» ЖШС-нің негізгі қызметі кәсіпорынның бизнес-процестеріне заманауи технологияларды енгізе отырып, «Қазатомөнеркәсіп» ҰАК» АҚ холдингінің негізгі қызметін автоматтандыру, роботтандыру және цифрландыру болып табылады. Серіктестік құрамында Нұр-Сұлтан, Алматы, Өскемен қалаларында және Таукент, Қыземшек, Шиелі елді мекендерінде орналасқан алты аумақтық бөлімше бар.
«KAP Technology» ЖШС Шиелі бөлімшесінің бастығы Диларам Құрманаеваның айтуынша, серіктестік өзі орналасқан елді мекендерде жеке тұлғаларға қызмет көрсетумен айналысады. Яғни, телефон байланысы, интернет желісіне қолжетімділік және ID TV қызметі.

Үздік атанған компаниялардың әлеуеті жоғары

<a href="https://kyzylorda-news.kz/">Kyzylorda-news.kz.</a>&nbsp; Қазалы ауданындағы іргелі ауылдардың бірі Бекарыстан би елді мекенінде жеке кәсіпкер Болат Сансызбаев 100 орындық балабақша салып жатыр.
Аудан әкімі Мұхтар Оразбаев пен аудандық мәслихат хатшысы Бақытжан Жарылқап Майдакөл ауылдық округіне барып, балабақша құрылысымен танысты.
Қазіргі таңда балабақшаның құрылыс жұмыстары аяқталуға жақын қалды. Бүгінде құрылысшылар ғимараттың ішкі әрлеу жұмыстарын жүргізіп, ауласын абаттандыруға кіріскен. Балабақшаға қажетті жатын орындар мен ыдыс-аяқтар толық алынған.
Ақтөбе қаласында тұратын жерлесіміз «Туған жерге тағзым» акциясы аясында салынып жатқан балабақшаны ел тәуелсіздігінің 30 жылдығына тарту ретінде жыл соңына дейін пайдалануға беруді жоспарлап отыр.
Мұнан соң аудан әкімі Мұхтар Оразбаев пен аудандық мәслихат хатшысы Бақытжан Жарылқап Ақжона ауылдық округіне қарасты Жалпақ елді мекеніне барып, медициналық бекеттің құрылысымен танысты.
Қазіргі таңда мердігер мекеме «Ахат+ГС» ЖШС нысан бойынша атқарылатын жұмыстардың 80 пайыздан астамын орындап, абаттандыру жұмыстарын жүргізуде. Құрылыс басында 10 адам тынымсыз еңбек етуде.
Мердігер мекеменің жауапты қызметкері мән-жайды баяндаған соң аудан басшысы ең бірінші кезекте құрылыстың сапасына мән беру қажеттігін айтты. Сондай-ақ, құрылыс жұмыстарын мерзімінде аяқтау үшін жұмысты қарқынды жүргізуді тапсырды.
<img src="https://kyzylorda-news.kz/wp-content/uploads/2021/12/264383543_3225298974357694_1368988018057687900_n.jpg" alt="" />
<img src="https://kyzylorda-news.kz/wp-content/uploads/2021/12/264540397_3225298914357700_6399199162216159772_n.jpg" alt="" />
<img src="https://kyzylorda-news.kz/wp-content/uploads/2021/12/264395085_3225298831024375_4837950208792446907_n-1-1.jpg" alt="" />

Қазалы ауданында құрылыс қарқынды

<a href="https://kyzylorda-news.kz/">Kyzylorda-news.kz.</a>&nbsp; Шыны өңдеу зауыты – жаңа технологияларды пайдаланып, бәсекеге қабілетті өнім шығаратын, еліміздің және өңір экономикасын дамуына тың серпін беретін ауқымды жоба. Зауыт толық қуаттылығына шыққанда 226 жаңа жұмыс орны ашылады. Ал қосалқы өндірістерде 300-ге жуық адам қызмет етеді. Жергілікті мамандарға басымдық беріліп, кәсіби түрде шыңдалмақ. Бұл туралы Өңірлік коммуникациялар қызметінде өткен брифингте облыстық индустриялық-инновациялық даму басқармасының басшысы Ринат Сұлтангереев мәлімдеді.
<blockquote>
 «Ел Тәуелсіздігінің 30 жылдығына орай облыс тұрғындары табақша шыны зауытының күйдіру пешін іске қосу рәсіміне куә болды. Жоба аясында өңірге 42 млрд. теңгеден аса инвестиция тартылған болатын. Жылына 197 мың тоннадан аса өнім шығаратын кәсіпорын – ел нарығын шынымен қамтамасыз етіп, шет мемлекеттерге экспортталады. Шыны зауытының іске қосылуымен шикізаттық емес секторды дамытып, ілеспе өндірістерді құруды көздеп отырмыз. Бүгінде инвесторлармен бірлесіп екі жобаны бастадық. Бұл – композиттік материалдар мен айна өндірісі. Атап өту қажет, тек 2020 жылдың қорытындысымен елге құны шамамен 65 млн. АҚШ долларын құрайтын тұрмысқа қажетті шыныларды Қытай, Германия, Өзбекстан және Түркиядан импортталған. Біз зауыт өндірісінің іске қосылуымен капиталдың басқа елдерге жіберілуін тоқтатамыз және елді өзіміз әйнекпен қамтамасыз ететін боламыз», – деді басқарма басшысы Ринат Қалдыбекұлы.
</blockquote>
«Orda Glass Ltd» серіктестігі мен қытайлық « China Triumph» компаниялары бірлесіп жүзеге асырылған шыны зауыты – индустрияландыру бағдарламасының негізгі жобасы болып табылады. Шыны өндіру барысында 90 пайыз жергілікті шикізат өнімі қолданылмақ.
<blockquote>
 «Зауытта әлемнің жетекші елдері – АҚШ, Италия, Бельгия, Финляндия, Қытайда шығарылған замауи үлгідегі технологиялар қолданылады. Негізі зауыттан шығарылған өнімнің 70 пайызы ішкі нарықта пайдаланады. Ал 30 пайызы шет елге жөнелтіледі. Қазірдің өзінде Өзбекстан, Ресей, Түрікменстан, Тәжікстан, Ауғанстан, Индиядан тапсырыстар түсуде. Тағы бір ерекшелігі үлкен көлемді және ауыр салмақты шыны табақшаларын кесуге және тасымалдауға роботтар қолданылмақ. 3 ай ішінде балқыту пеші 1600 градус температураға дейін қызып, тұрақты әрі үздіксіз газбен жабдықтауды талап етеді. Қазіргі кезде импортталып келген 1 тонна шыны 300-350 долларды құраса, біздің зауыттан шығатын өнімнің бағасы 200-250 доллардың көлемінде болады», – деді «Orda Glass Ltd» ЖШС басқарма төрағасы Ержан Сағынбаев.
</blockquote>

Шыныға шетелден тапсырыстар түсуде

<a href="https://kyzylorda-news.kz/">Kyzylorda-news.kz.</a>&nbsp; ҚР Тәулсіздігінің 30 жылдығы қарсаңында Қызылорда облысындағы шыны зауытының күйдіру пеші іске қосылды.
Аймақтағы ауқымды жобалардың ашылу салтанатына ҚР Парламенті Сенатының Төрағасы Мәулен Әшімбаев пен облыс әкімі Гүлшара Әбдіқалықова қатысып, зауыттың жұмысына сәттілік тіледі.
<blockquote>
 Ең алдымен, бұл&nbsp;–&nbsp;Елбасымыз Нұрсұлтан Назарбаевтың ерен еңбегнің жемісі. Осы 30 жылдың ішінде барлық салада көптеген жұмыс істелді. Қай облыс болмасын ауыз толтырып айтарлықтай жеткен жетістігіміз бар. Қызылорда облысының инфрақұрылымы, экономикасы, өндірісі дамыды. Міне, соның нәтижесі ретінде жаңа кәсіпорынның ашылуының куәсі болып отырмыз. Бұл кәсіпорын осыдан бірнеше жыл бұрын қолға алынды. Бірақ әртүрлі себептерге байланысты құрылыс созылып кеткен еді. Дегенмен алға қойған мақсаттың арқасында керемет іс-шараға жиналып отырмыз. Шыны зауытта шығарылатын өнімнің 30 пайызы экспортқа жіберіледі деп жоспарлануда. Бұл облыстың ғана емес, еліміздің экономикасының дамуына үлес қосатыны сөзсіз. Және де Орта Азиядағы көшбасшы үлкен өндірістердің бірі болады деп сенеміз,&nbsp;– деді Қазақстан Республикасы Парламенті Сенатының төрағасы Мәулен Сағатханұлы.
</blockquote>
Құны 42,01 млрд. теңгені құрайтын жоба 226 адамды жұмыспен қамтитын болады.
<blockquote>
 Тәуелсіздігіміздің 30 жылдық мерейтойы қарсаңында жаңа технологияларды пайдаланып, бәсекеге қабілетті өнім шығаратын, еліміздің және өңір экономикасын дамытуға тың серпін беретін жоба шыны өңдеу зауытын іске қостық. Шыны өндіру барысында 90% жергілікті шикізат пайдаланылады. Шыны бағасының 80%-ын құрайтын негізгі компонент&nbsp;–&nbsp;кальцийленген сода. Сондықтан, Аралда салынатын сода зауытының негізгі тұтынушысы осы зауытымыз болмақ. Зауыт толық қуаттылыққа шыққанда 226 жаңа жұмыс орны, қосалқы өндірістерде 300-ге жуық тұрақты жұмыс орны құрылады, бірінші кезекте жергілікті мамандарға басымдық беріледі,&nbsp;– деді Гүлшара Әбдіқалықова.
</blockquote>
«Орда Гласс ЛТД» мамандарының айтуынша, бірінші шыны 2022 жылдың сәуір айында өндіріледі деп жоспарлануда.
Айта кетейік, алдағы уақытта зауыт жылына 197,1 мың тонна, тәулігіне 600 тонна өнім шығара алады. Кәсіпорында табақ шыны, энергия үнемдейтін шыны, айна, ламинатталған шыны, күйдірілген шыны тәрізді өнім түрлері өндіріледі деп күтілуде.

Қызылордада шыны зауытының күйдіру пеші іске қосылды

<a href="https://kyzylorda-news.kz/">Kyzylorda-news.kz.</a> Қазалы ауданында құрылысы қарқынды жүріп жатқан нысанның бірі – Әйтеке би кентіндегі ауысымына 250 келушіге арналған емхана ғимараты.
Бүгін аудан әкімі Мұхтар Оразбаев тұрғындар үшін маңызы зор нысанға арнайы барып, құрылыс жұмыстарының барысымен танысты.
Қазіргі таңда мердігер мекеме нысанның «А» блогы бойынша жылу жүйесін жүргізу және вентиляция орнату жұмыстарын аяқтауға жақын. Ғимараттың төбесіне шатыр жабу жұмыстары да аяқталып, кафель жабыстыру, электр желісін жүргізу, ішкі есіктерін орнату жұмыстары және лифт монтаждау жұмыстары жүргізілуде.
Сонымен қатар, «А,Б,В» блоктары бойынша ғимараттың ауа желдеткішіне құрал-жабдықтарын орнату және ауланы абаттандыру жұмыстары да қарқынды жүріп жатыр.
Аудан әкімі Мұхтар Оразбаев ғимаратты мердігер мекеменің жауапты қызметкерлерімен бірге аралап болған соң, құрылыс жұмыстарын сапалы жүргізу қажеттігін айтты.
<img src="https://kyzylorda-news.kz/wp-content/uploads/2021/12/264545605_3223661361188122_3735311438769760645_n.jpg" alt="" />
<img src="https://kyzylorda-news.kz/wp-content/uploads/2021/12/264965704_3223661224521469_4444970785631163992_n.jpg" alt="" />

Қазалыда емхана құрылысы аяқталуға жақын қалды

<a href="https://kyzylorda-news.kz/">Kyzylorda-news.kz.</a> Ақпарат және қоғамдық даму министрлігінің қолдауымен «Қазақстан» телерадиокорпорациясы ұйымдастырған «30 жыл 30 есім» ұлттық байқауының жеңімпаздары анықталды.
**Жеңімпаздар: 
**– «Медицина және денсаулық сақтау саласына қосқан үлесі үшін» – Серік Ақшолақов, Юрий Пя, Надежда Петухова 
– «Қоғамдық белсенділігі үшін» Асылы Осман, Олеся Баимова, Айман Омарова 
– «Мәдениет саласына сіңірген еңбегі үшін» Димаш Құдайберген, Секен Тұрысбеков, Ерболат Төлепбай 
– «Кино саласына сіңірген еңбегі үшін» Болат Әбділманов, Асанәлі Әшімов, Досхан Жолжақсынов 
– «Спорт саласындағы жетістіктері үшін» Дәулет Тұрлыханов, Қанат Ислам, Илья Ильин 
– «Ғылымның дамуына қосқан үлесі үшін» Асқар Жұмаділдаев, Күнсұлу Закарья, Зейнолла Самашев 
– «Білім саласының дамуына қосқан үлесі үшін» Муаммер Гүль, Аятжан Ахметжанұлы, Аягүл Миразова 
– «Ауыл шаруашылығы және агроөндіріс саласына қосқан үлесі үшін» Нұрислам Ыбраев, Иван Сауэр, Сыдық Дәулетов 
– «Дәстүрлі өнердің дамуына қосқан үлесі үшін» Айгүл Үлкенбаева, Рамазан Стамғазиев, Елмұра Жаңабергенова 
– «Әдебиет» аталымы бойынша Дулат Исабеков, Светқали Нұржан, Ұлықбек Есдәулет марапатталды.

«30 ЖЫЛ 30 ЕСІМ» ұлттық жүлдесінің иегерлері анықталды

<a href="https://kyzylorda-news.kz/">Kyzylorda-news.kz.</a>&nbsp; Мемлекет басшысы Қазақстан Республикасы Президентінің «Алтын сапа» және «Парыз» сыйлықтарының иегерлерін салтанатты түрде марапаттау рәсімінде бейнебайланыс режимінде сөз сөйледі, деп хабарлайды&nbsp;<a href="https://www.akorda.kz/kz/kasym-zhomart-tokaev-altyn-sapa-zhane-paryz-syylyktarynyn-iegerlerin-marapattau-rasimine-katysty-7114756">Ақорда</a>.
Қасым-Жомарт Тоқаев өз сөзінде «Алтын сапа» байқауы 15 жылдан бері өткізіліп келе жатқанын және бүгінге дейін 150-ден астам компания Президент сыйлығының иегері атанғанына назар аударды.
<blockquote>
 – Биылғы салтанатты жиын Тәуелсіздіктің 30 жылдық мерейтойымен тұспа-тұс келіп отыр. Мұның зор символдық мәні бар. Егемендік кезеңінде Қазақстанда бизнестің дамуына жан-жақты жағдай жасалды. Соның нәтижесінде жаңа заманға сай кәсіпкерлер шоғыры қалыптасты. Олар ұлттық экономиканың басты қозғаушы күшіне айналуда, – деді Мемлекет басшысы.
</blockquote>
<img src="https://www.inform.kz/radmin/fotofiles/2021/12/07/2112071207356553g.jpg" alt="" />
Президент отандық бизнестің елімізді индустрияландыру үдерісіндегі үлесі туралы айта келе, соңғы 10 жылда өңдеу өнеркәсібінің экономикадағы үлесі тау-кен саласының көрсеткішінен асып, 13 пайызға жеткенін атап өтті.
<img src="https://www.inform.kz/radmin/fotofiles/2021/12/07/2112071207372764g.jpg" alt="" />
<blockquote>
 – Бүкіл еліміз бойынша 1500 жаңа өндіріс іске қосылды. Бұл мақсатқа 9 триллион теңгеден астам инвестиция жұмсалды. 220 мыңнан астам тұрақты жұмыс орны ашылды. Былтыр өңдеу өнеркәсібінің экспорты 3 есе өсіп, 15,4 миллиард долларға жетті. Қазақстанда өңделген өнімдер бүгінде 131 мемлекетке экспортталады, – Қасым-Жомарт Тоқаев.
</blockquote>
Мемлекет басшысы отандық өнеркәсіпті, медицина ғылымын цифрландыру ісіндегі жетістіктерге тоқталды.
Президент өз Жолдауында 2025 жылға қарай өңдеу өнеркәсібінің экспортын 1,5 есеге, еңбек өнімділігін 30 пайызға арттыру міндетін жүктегенін еске салды. Оның пікірінше, бұл аса маңызды мақсат. Оған қол жеткізу үшін барлық мүмкіндік бар және қажетті жағдайлар жасалуда.
Осы ретте, Қасым-Жомарт Тоқаев отандық өңдеу өнеркәсібінің шикізатқа қол жетімділігін қамтамасыз ететін «Өнеркәсіп саясаты туралы» Заңды тезірек қабылдаудың маңызды екенін атап өтті.
Сонымен қатар Мемлекет басшысы отандық бизнестің көрші елдердің нарығына шығуы үшін заманауи инфрақұрылымды дамыту қажеттігі жөнінде айтты.
<blockquote>
 – «Қорғас» шекара маңы ынтымақтастығының халықаралық орталығы табысты жұмыс істеп тұр. Сонымен қатар тағы төрт трансшекаралық хаб: оның екеуін Ресеймен шекарада, Өзбекстанмен және Қырғызстанмен шекарада бір-бірден салу жоспарлануда. Бұл транзакциялық шығындарды азайтуға, көлік логистикасының тиімділігін арттыруға және нәтижесінде экспортымызды ұлғайтуға мүмкіндік береді, – деді Президент.
</blockquote>
Мемлекет басшысы елімізде өндірілетін тауарлардың бәсекеге қабілеттілігін арттырудың және сапаны бақылаудың заманауи жүйесін енгізудің маңызына назар аударды.
<blockquote>
 – Кәсіпорындардың бизнес-процестеріне жасалатын диагностика осы саладағы жаһандық үрдістерге сай болуға тиіс. Бұл жерде, ең алдымен, цифрландыру және Индустрия 4.0 элементтерін пайдалану туралы сөз болып отыр. Осыған байланысты «Алтын сапа» конкурсының талаптарын Сапаны басқарудың еуропалық қорының (EFQM) жаңа моделіне біртіндеп сәйкестендіру керек. Біз үздік халықаралық үлгілер мен тәжірибелерге сай болуымыз қажет, – деді Қасым-Жомарт Тоқаев.
</blockquote>
Сонымен қатар Мемлекет басшысы өнеркәсіп саласында білікті мамандардың жетіспейтініне ерекше назар аударды. Бұл – индустрияландыру үдерісін тежейтін факторлардың бірі.
– 2025 жылға қарай 500-ге жуық индустриялық жобаны іске қосуды жоспарлап отырмыз. Үкімет аталған өндіріс орындарында жұмыс істейтін білікті кадрларды осы бастан дайындауы керек. Бүгінде мемлекет жұмыс берушілерге нақты қолдау көрсетіп отыр. Жұмыс орнында оқыту, «Ұрпақтар келісімшарты» және «Алғашқы жұмыс орны» сияқты жас мамандарға қолдау көрсету шаралары іске асырылуда. Мемлекет тарапынан тиісті субсидиялар қарастырылған. Дегенмен, әлі де жеткіліксіз. Үкімет «Атамекен» ұлттық кәсіпкерлер палатасымен бірлесе отырып, жұмыспен қамтуды және қызметкерлердің біліктілігін арттыруды ынталандыруға бағытталған қосымша шараларды пысықтауы қажет, – деді Президент.
<img src="https://www.inform.kz/radmin/fotofiles/2021/12/07/2112071207397378g.jpg" alt="" />
Қасым-Жомарт Тоқаев індет кезінде еліміздің денсаулық сақтау жүйесіне зор қолдау көрсеткен отандық кәсіпкерлер мен Қазақстандағы халықаралық компаниялар әлеуметтік жауапкершілік қағидасын әрдайым берік ұстанатынын атап өтті.
Бұдан бөлек биылғы «Парыз» байқауына қатысушылардың әлеуметтік жобаларға және қайырымдылық шараларға 20 миллиард теңгеге жуық қаржы жұмсағаны атап өтілді. Олар 7 мың жаңа жұмыс орнын ашқан.
<blockquote>
 – Елімізді өркендетуге және халықтың әл-ауқатын арттыруға бизнес өкілдері барынша атсалысуда. Осы орайда мен барша кәсіпкерлерге шынайы ризашылығымды білдіремін. Сондай-ақ осы байқауларға қатысқан кәсіпорындарға арнайы алғыс айтамын. Әсіресе, еңбек ұжымдарын бөлек атап өткім келеді. Бұл марапаттар – көп жылғы қажырлы еңбектің жемісі, – деді Мемлекет басшысы.
</blockquote>
Президент конкурс жеңімпаздарын жариялап, шын жүректен құттықтады. Сондай-ақ бүгінгі марапат олардың жұмыстарының одан әрі табысты болуына тың серпін беретініне сенім білдірді.
Биыл «Алтын сапа» конкурсының «Үздік индустриялық жоба» номинациясын «YDD Corporation» жауапкершілігі шектеулі серіктестігі (Қарағанды облысы) иеленді, «Үздік инновациялық жоба» номинациясы бойынша ««Агрофирма TNK» (Ақмола облысы) жауапкершілігі шектеулі серіктестігі үздік атанды. «ПО Глобал-Спецодежда» жауапкершілігі шектеулі серіктестігі (Ақтөбе облысы) мен «Karachaganak Petroleum Operating B.V.» жауапкершілігі шектеулі серіктестігінің қазақстандық филиалы (Батыс Қазақстан облысы) «Парыз» конкурсының бас жүлдесін иеленді. Жеңімпаздарға жүлделерді Премьер-Министр Асқар Мамин табыстады.

Президент «Алтын сапа» және «Парыз» сыйлықтарының иегерлерін марапаттау рәсіміне қатысты

Kyzylorda-news.kz. Бүгін Нұр-Сұлтан қаласында аймақ басшысы Гүлшара Әбдіқалықова мен Навои облысының әкімі Нормат Тұрсунов қос өңірдің әріптестік аясын дамыту жөніндегі Жол картасына қол қойды. Кездесуге ҚР Парламенті Сенатының депутаты Ақмарал Әлназарова, Мәжіліс депутаты Ғалым Әміреев және Навои облысы әкімінің орынбасары Камолиддин Хасанов қатысты.
Екіжақты кездесу барысында Гүлшара Әбдіқалықова өңіраралық ынтымақтастықты нығайтуға және одан әрі өзара тиімді дамытуға бағытталған осындай іс-шараны өткізу бүгінгі кездесуімізге ерекше мән беретінін атап өтті.
<blockquote>
 «Бұл кездесу өзекті тақырыптарды талқылауға, бiрлесiп жұмыс жасау мүмкіндіктерін зерттеуге және шекара маңы өңірлерінің неғұрлым тығыз ынтымақтастығының перспективаларын анықтауға мүмкіндік береді. Бұл біздің облыстарымыздың арасындағы екіжақты қарым-қатынастар мен достық байланыстарды тереңдетудің тағы бір қадамы екені сөзсіз. 
 Біз ынтымақтастыққа қызығушылық танытқан барлық бизнес өкілдерін бірге және тиімді жұмыс істеуге шақырамыз және барлық конструктивтік ұсыныстарын қабылдауға әркез дайынбыз. Бауырлас өзбек халқына бейбітшілік, ынтымақ және биік асулар тілеймін», – деді облыс әкімі.
</blockquote>
Аймақ басшысы әрі қарай дамыту перспективасы бар бағыттарды айта отырып, туризм саласындағы әлеуетті жобаларды атап өтті. “Ұлы Жібек жолы” тұжырымдамасы аясында бірлескен халықаралық туристік өнімді құрудың үлкен мүмкіндіктері бар екенін жеткізіп, «Байқоңыр» ғарыш айлағы мен өңірдегі Қорқыт Ата мемориалдық кешені, Жанкент, Сығанақ, Шірік-Рабат секілді көне қалашықтарға танымдық сапарларды ұйымдастыруға шақырды. 
Өз кезегінде Навои облысының әкімі Нормат Тұрсунов көрсетілген құрмет үшін ризашылығын білдіріп, өзаға әріптестік аясын кеңейтуге мүдделі екенін жеткізді.
Кездесу соңында қос тарап облыстар арасындағы ынтымақтастықты одан әрі кеңейту бойынша әзірленген Жол картасына қол қойды. Бұл құжат сауда-экономикалық даму, ауыл шаруашылығы, білім және ғылым, мәдениет, спорт және туризм салаларындағы ынтымақтастық мәселелерін қамтиды. 
Айта кетейік, соңғы 5 жылда аймақ Өзбекстан Республикасымен екіжақты ынтымақтастықты дамыту мақсатында 13 роуд-шоу, оның ішінде Самарқанд, Навои және Ташкент қалаларында сапарларды ұйымдастырды. Қызылорда облысы Навои өңірімен сауда-саттық, өнеркәсіп және агроөнеркәсіп салаларында әріптестік орнатқан. Атап айтқанда, биылғы жылдың 9 айында тауар айналымының көлемі өткен жылдың сәйкес кезеңімен салыстырғанда 3,1 есе артып, 26,8 млн. АҚШ долл. құрады. Сыр өңірі негізінен Өзбекстанға цемент, күріш, ұн, кебек экспорттаса, Өзбекстан Республикасынан тоқыма тауарлары, құрылыс материалдары, кондитерлік өнімдер, жемістер мен көкөністер импортталады. 
Облыстағы «Гежуба Шиелі цемент» ЖШС тампонажды цемент зауытының ағымдағы жылдың 9 айында зауыт Өзбекстанға жалпы құны 14,3 млн. АҚШ долл.құрайтын 278,8 мың тонна цемент экспорттады. Сондай-ақ, ауыл шаруашылығы саласында 2021 жылдың басынан бері облыс Өзбекстанға 5,7 млн. АҚШ долл. сомасына 20 мың тонна күрiш экспорттады.

Қызылорда мен Навои облыстары арасындағы әріптестік нығая түспек

Kyzylorda-news.kz. Ел Тәуелсіздігінің 30 жылдық мерейтойы аясында бүгін Шиелідегі Тұран елді мекені көгілдір отынға қосылды. Облыс әкімі Гүлшара Әбдіқалықова шегендіктердің қуанышына ортақтасып, салтанатты шараға қатысты.
Аймақ басшысы «Ауыл-Ел бесігі» бағдарламасы аясында Шеген Қодаманов елді мекенінде жүргізілген газ құбыры және кварталішілік газ тарату желісі жұмыстарының тұрғындар үшін маңыздылығына тоқталып, Бейнеу-Бозой-Шымкент магистралды газ құбырының сәтті жоба болғанын тілге тиек етіп, тұрғындарды көгілдір отынмен қамту жұмыстарының одан әрі жалғасатынын айтты.
<blockquote>
 Баршаңызды Тұңғыш Президент күні мен Тәуелсіздігіміздің 30 жылдығы мерекесімен тұстас келген, ауыл тіршілігіне тың тыныс берер, халықтың тұрмыс сапасының артуына септігі мол серпінді жобаның бірі – Тұран ауылдық округінің көгілдір отынға қосылуымен шын жүректен құттықтаймын. 
 Жыл сайын халықтың сұранысын қанағаттандыру мақсатында аудан тұрғындарының жайлы тұрмыс кешуіне ең қажетті ауыз су, газ тарту, жол салу секілді мәселелер кезең-кезеңімен шешімін табуда. Біз аудан орталығына жақын елді мекендерді көгілдір отынмен қамтамасыз ету арқылы халықтың тұрмыс жағдайын ғана емес, аудандағы өндірістің өрге басуының, кәсіптің одан әрі кең қанат жаюына мүмкіндік аламыз. 
 Бүгін Тұран ауылдық округінің тұрғындары көгілдір отынға қол жеткізіп отыр. Құрылыс жұмыстарын жүргізген бас мердігер компания «Строй Газ Компани» мекемесіне және құрылысшыларға барша ауыл тұрғындарының атынан және Өз атымнан алғысымды айтамын, – деді Гүлшара Әбдіқалықова.
</blockquote>
Алау оты жағылған қуанышты мерекеде ауыл ақсақалы Әбітхан Мизамбаев ақ батасын беріп, тұрғындарды мерекемен құттықтады. 
Жоба бойынша жоғары қысымды газ құбырының ұзындығы – 3,2 шақырым, төменгі қысымды газ құбырының ұзындығы – 30,24 шақырым. Сәйкесінше, ауылға 2 шкафты газ реттегіш пункті орнатылған.
Қазіргі таңда Шиелі кенті мен Байтерек, Жаңатұрмыс, Бидайкөл, Керделі ауылдық округтері көгілдір отынға қосылса, бүгіннен бастап Шеген Қодаманов ауылының тұрғындары көгілдір отынның игілігін көріп, 525 үйге газ кірді. 
Еске салайық, жыл басынан бері 3 аудан орталығына яғни Жосалы, Жалағаш, Тереңөзек кенттеріне, Шиелі ауданындағы Бекежанов және Қодаманов ауылдарына табиғи газ берілсе, жыл соңына дейін Қазалы қаласын газға қосу жоспарлануда. Нәтижесінде биыл 50 мыңнан астам тұрғын көгілдір отынның игілігін көретін болады.
Айта кетейік, бүгінгі күні қала мен аудан орталықтарына газ толық тартылды. Бүгінде облыс тұрғындарының 65 пайызы көгілдір отын пайдалану мүмкіндігіне ие.

Шиелідегі Тұран ауылы көгілдір отынға қосылды

Kyzylorda-news.kz. Бүгін облыс әкімі Гүлшара Әбдіқалықова ел Тәуелсіздігінің 30 жылдығы қарсаңында Жаңақорған ауданындағы бірқатар әлеуметтік нысандарды ашты.
Аймақ басшысы алдымен Төменарық ауылдық округіндегі мемлекеттік-жекешелік әріптестік аясында салынған спорт кешенінде болды. Жаңа ғимарат құрылысын «Айару» дара кәсіпкерлігі жүргізген. 12 адамды жұмыспен қамтыған спорт кешенінде қазір 170-ке жуық бала еркін күреспен айналысып, дзюдо және баскетболмен жаттығуда. 
Облыс әкімі балалардың спортпен машықтануына жағдай жасаған кәсіпкермен пікірлесіп, спортзалда шынығып жатқан жасөспірімдермен тілдесті. Сондай-ақ, ауылдық округтегі ақсақалдармен кездесіп, ауылды дамытуға қажетті ұсыныстарын тыңдады.
Әрі қарай облыс әкімі Келінтөбе ауылдық округіне барды. 4 мыңға жуық тұрғыны бар елді-мекенде кәсіпкерлікке ден қойған азаматтар көп. Мәселен, биыл ауылдың 12 тұрғыны «Бастау бизнес» бағдарламасы арқылы кәсіпкерліктің қыр-сырын үйренсе, 8 адам кәсібін дамыту үшін грант иегері атанған. Мұнда өңір басшысы жаңадан салынған әкім аппаратының ғимаратымен танысты. Нысан тамыз айында пайдалануға берілген. Ғимаратта халыққа қызметке көрсету бұрышы жұмыс істейді. 
Гүлшара Әбдіқалықова Қандөз елді мекенінде мемлекеттік-жекешелік әріптестік аясында салынған спорт кешенінің жұмысымен де танысты. Өткен жылдың наурыз айында пайдалануға берілген нысанда бүгін 126 бала спорттың 3 түрі бойынша жаттығады. Спорт кешені арқылы 11 ауыл тұрғыны тұрақты жұмыспен қамтылған.
Мұнда да облыс әкімі ауыл тұрғындарымен кездесіп, инфрақұрылым мәселелеріне қатысты ұсыныс-пікірлерін тыңдап, мәселелерді кезең-кезеңімен шешілетінін қаперге салды. 
Өңір басшысы Президент тапсырмасына сәйкес өңірдегі 2156 баланы қамтитын мемлекеттік спорттық тапсырысты қаржыландыруды 2021 жылғы 212 млн. теңгеден, келер жылы 638 млн. теңгеге ұлғайту жоспарда бар екенін және осы арқылы 4312 баланы бұқаралық спортқа тарту көзделгенін алға тартты. Сондай-ақ, ауыл спортын көтеруге атсалысып, жеке қаражаты есебінен нысан салып мүдделестік танытқан кәсіпкерлерге алғысын білдірді.
Мұнан соң аймақ басшысы ауданға қарасты Жаңарық елді-мекеніндегі мемлекеттік-жекешелік әріптестік аясында салынған ауылдық дәрігерлік амбулаторияның ашылу рәсіміне қатысты. Салтанатты шарада өңір басшысы ұлт денсаулығын нығайту мемлекеттік саясаттың басым бағыттарының бірі екенін, дәрігерлік амбулаторияның ашылуы ауыл тұрғындарына медициналық көмекті қолжетімді етуге мүмкіндік беретінін тілге тиек етті.
<blockquote>
 Мемлекет басшысының өткен жылғы Жолдауында денсаулық сақтау ісінің тиімді моделін құру арқылы 3 жыл ішінде барлық ауылдық елді мекенді фельдшерлік-акушерлік пункттермен және дәрігерлік амбулаториялармен қамтамасыз ету қажеттігін айтты. Аймақтың барлық аудандарында медициналық объектілер жаңадан салынуда. 
 Былтыр Жалағаш ауданында 100 төсектік заманауи орталық ауруханыны пайдалануға берсек, осы жылы тамыз айында облыс орталығынан Модульді жұқпалы аурулар ауруханасын пайдалануға бердік. Жыл соңына дейін Қазалы ауданынан 250 келушіге арналған емхананы ел игілігіне табыстайтын боламыз. 
 Міне, бүгін Жаңарық ауылындағы ауылдық дәрігерлік амбулаторияның ашылуының куәсі болып тұрмыз. Жаңа амбулаторияны мемлекеттік-жекешелік әріптестік негізінде «Ныш-Ер» құрылыс компаниясы қысқа мерзімде салып, Сіздердің игіліктеріңізге пайдалануға беріп отыр. Жаңа нысан ауыл тұрғындарының дертіне шипа табатын орынға айналуына шын жүректен тілектеспін,-деді Гүлшара Әбдіқалықова.
</blockquote>
Айта кетейік, ауданда 3 дәрігерлік амбулатория салынуда. Ал, жаңа дәрігерлік амбулаторияда егу бөлмесі, дәрігерлерге дейінгі қабылдау және күндізгі жатын бөлмелері бар.
<img src="https://kyzylorda-news.kz/wp-content/uploads/2021/12/fb_img_1638444678586.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638444695848.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638444688945.jpg" alt="" />
<img src="https://kyzylorda-news.kz/wp-content/uploads/2021/12/fb_img_1638444684890.jpg" alt="" />

Облыс әкімі Жаңақорған ауданындағы бірқатар әлеуметтік нысандарды ашты

<a href="https://kyzylorda-news.kz/">Kyzylorda-news.kz.</a> Қызылорда облысына қарасты Жалағаш ауданында 10 айда жалпы құны 1,6 млрд теңгені құрайтын кәсіпкерлік мақсаттағы 202 жоба қаржыландырылды. Бұл туралы Қызылорда облысы кәсіпкерлер палатасы Өңірлік кеңесі мүшелерінің алдында онлайн есеп берген аудандық филиал директоры Самат Карипов айтты.
Статистикалық дерекке сай ауданда 2514 кәсіпкерлік субъектісі тіркелген. Оның 2316-сы бүгінде халыққа тұрақты қызмет көрсетуде.
Самат Карипов есебінде биыл ауданда «Бизнеске арналған Үкімет» орталығы ашылғанын, орталықта Палатаның аудандық филиалымен қоса, аудандық кәсіпкерлік, өнеркәсіп және туризм бөлімі, Кәсіпкерлерге қолдау орталығы орналасқанын жеткізді.&nbsp;
Орталықта ісін жаңа бастаушы, сондай-ақ жұмыс жасап жүрген кәсіпкерлер&nbsp; оқытылып, несие алуға сүйемелдеу жүргізіледі, сондай-ақ кеңестер беріліп, тегін сервистік қызметтер көрсетіледі.
&nbsp;Жыл басынан бері Палатаның аудандық филиалы 764 азаматқа кеңес беріп, 271 бизнес-жоспар әзірлеген.
«Бастау Бизнес» жобасы бойынша Жалағаш ауданында 120 азаматты оқыту жоспарланған. Жоспар 27,5 пайызға артығымен орындалып, 153 жалағаштық жобаның түлегі атанды.
Аудандық филиал директоры «Бизнестің жол картасы – 2025», «Еңбек» мемлекеттік бағдарламалары мен «Қарапайым заттар экономикасы» бағдарламасы аясында биыл ауданда жалпы құны 1,6 млрд теңгені құрайтын 202 жоба қаржыландырылғанын атап өтті. Аталмыш жобалардың 114-і «Еңбек» мемлекеттік бағдарламасы арқылы грант алғандар.
&nbsp; Палатаның аудандық филиал директоры Самат Карипов Өңірлік кеңес мүшелеріне саладағы мәселені де айтты. Ол «Бизнестің жол картасы 2025» және «Қарапайым заттар экономикасы» мемлекеттік бағдарламалары арқылы алынған несиелердің субсидиясы дер кезінде түспей кәсіпкерлерге қиындық тудырып жатқандығын жеткізді.

Жалағаш ауданында 10 айда 202 жоба қаржыландырылған

Kyzylorda-news.kz. Облыс әкімі Гүлшара Әбдіқалықова Біріккен Ұлттар Ұйымы Даму Бағдарламасының (БҰҰДБ) тұрақты өкілі Якуп Беришпен кездесті. Жиынға облыс әкімінің орынбасары Балжан Шәменова, облыс әкімі аппаратының басшысы Ерлан Райғаниев және БҰҰДБ өкілдері қатысты.
Отырыста тараптар БҰҰДБ арқылы Қызылорда облысында маңызды жобаларды жүзеге асыру және адам дамуының индикаторларын жоғарылату үшін аймақ әлеуетін қалай пайдалану керектігін талқылады.
Аймақ басшысы елімізде осыған дейін Біріккен Ұлттар Ұйымының Даму бағдарламасы арқылы гендерлік теңдік пен адами капиталды дамыту мәселесінде жан-жақты талдау жасалып, бірқатар жобалардың жүзеге асырылғанын, оның ішінде екі заңның қабылданғанын айтты.
БҰҰ Даму бағдарламасының тұрақты өкілі Якуп Бериш жергілікті даму аса маңызды сала екенін, осы мәселелерді шешуде бірлескен жұмыстарды аса қажет екеніне тоқталды. Бұл ретте Сыр өңірімен серіктестікті қайта жаңғыртуға мүдделі екендерін, нақты қажеттіліктерге көмектесу үшін жергілікті әкімдіктермен тікелей жұмыс істеуді назарға алғандарын жеткізді. Тұрақты өкіл өңірді дамыту жоспары мен мемлекеттік бағдарламалардан бөлек, жеке жобаларды қолдауға дайын екендігін айтты. Оң нәтижеге тезірек қол жеткізу үшін әлеуметтік қорғау мәселелеріне ерекше көңіл бөлуді ұсынды.
Айта кетейік, БҰҰДБ мен ҚР Еңбек және халықты әлеуметтік қорғау министрлігі мүгедектігі бар адамдарға бейімделген модельдік пәтер құру бойынша пилоттық жобаны іске қосты. Бірлескен жоба шеңберінде аймақтағы оңалту орталығының базасында мүгедектігі бар адамдарға қолжетімді модельдік пәтер ашылды. Ерекше күтімді қажет ететін адамдардың өмір сапасын арттыруға бағытталған арнайы пәтерде арбамен қозғалатын адамдар үшін барлық жағдай жасалған. 
Басқосуды қорытындылаған облыс әкімі өңірдегі өзекті мәселелерді БҰҰДБ-мен бірлесе шешуді ұсынды.
<blockquote>
 Ортақ мәселелер аясында Сіздермен кездесіп отырмыз. Әрине, БҰҰДБ арқылы жергілікті мәселелерге назар аудара отырып, ынтымақтастықты одан әрі нығайтуға мүдделіміз. Сіздердің ұсыныстарыңыз негізінде бірқатар бағыттарда жұмыс істеуге әзірміз. Әсіресе, экология, білім беру мәселелерінде жан-жақты жобаларды іске асыруымыз қажет. Мүгедектігі бар адамдарға қолайлы орта жасау ісінде министрлікпен бірге іске асырған пилоттық жобаларыңыздың да маңызы зор, – деді Гүлшара Әбдіқалықова.
</blockquote>
Айта кетейік, 2000 жылдан бастап БҰҰ басқа агенттіктерімен бірлесіп БҰҰДБ-сы Министрлікке кедейлікті төмендетуге, арнайы әлеуметтік қызметтер жүйесін құруға, халықтың осал топтарын әлеуметтік қолдаудың тиімді моделін жасауға және мүгедектерге ерекше назар аудара отырып, жұмыспен қамтуға бағытталған стратегиялық құжаттар мен бағдарламаларды іске асыруда қолдау көрсетіп келеді.

Қазақстан және Қызылорда облысының жаңалықтары: Экономика