<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Тәуелсіздіктің 30 жыл ішінде Қызылорда облысында 8 млн. шаршы метрге жуық тұрғын үй пайдалануға берілді. Бұл туралы бүгін Қызылорда облысының әкімі Гүлшара Әбдіқалықова елордада өткен брифингте мәлімдеді.
<blockquote>
 «Берілген тұрғын үйлердің көлемі 1991 жылғы 260 мың шаршы метрден бүгінде 600 мың шаршы метрге дейін жетті. Сонымен қатар халықтың 97 пайызы орталықтандырылған ауыз сумен қамтылған. Өңіріміз бүгінде жоғарғы көрсеткіштердің бірін көрсетуде. Жақсы жағдайдағы жолдардың үлесі 2,5 есеге артқан, яғни, 31%-дан 75%-ға дейін көтерілген», – дейді облыс әкімі.
</blockquote>
Осы уақытқа дейін аймақта жүздеген әлеуметтік нысан бой көтерді. Оның ішінде облыстық медициналық, диагностикалық, перинаталдық, мүгедектерді оңалту және тағы басқа орталықтар бар.
Спорт инфрақұрылымы нысандарының саны 3 есеге, ал денешынықтыру және спортпен шұғылданатындар саны 6 есеге артты.
30 жыл ішінде 500 мыңнан астам бала дүниеге келсе, халықтың саны 592 мыңнан 824 мыңға дейін көбейіп, ал өмір сүру ұзақтығы 8 жылға артқан. Яғни, 64,4 жастан 72,79 жасқа дейін ұзарды.
<blockquote>
 «Экономикамен қатар, азаматтық қоғамда ілгері дамып келді. Еліміз Тәуелсіздік алған жылдары облыста 15-тен аса қоғамдық ұйымдар тіркелсе, бүгінгі таңда олардың саны 994-ке жетті. Сондай-ақ 2016 жылы мемлекеттік әлеуметтік тапсырысқа 450 млн. теңге бөлінсе, биылғы жылы 125 жобаға 1 млрд-тан аса қаржы бөлінді. Бұл көрсеткіш 48 пайызға көп», -дейді Гүлшара Әбдіқалықова.
</blockquote>
Аймақта тұрақты әлеуметтік-экономикалық дамыту жұмыстары жалғасуда.

Қызылордада тұрақты әлеуметтік-экономикалық дамыту жұмыстары жалғасуда

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысында өнеркәсіп өнімі өндірісі&nbsp; оның ішінде өңдеу саласы сондай-ақ, ауыл шаруашылығы өнімдерінің өндірісі көбейген. Жұмыс істеп тұрған шағын және орта бизнес субъектілерінің саны өсіп, құрылыс жұмыстары мен пайдалануға берілген тұрғын үйлер көлемі де артқан. Бұл туралы ҚР Президентінің жанындағы Орталық коммуникация қызметінде Қызылорда облысының әкімі Гүлшара Әбдіқалықова айтты.
Аймақ басшысының айтуынша биыл 2408 пәтерлік 110 тұрғын үйдің &nbsp;құрылысы жүргізіліп жатыр. Оның ішінде Байқоңыр қаласында 250 пәтерлік 5 тұрғын үй бар. Жыл аяғына дейін 1608 пәтерлік 94 тұрғын үй пайдалануға берілетін болады.
<blockquote>
 «Облыс экономикасына оның ішінде өңдеу өнеркәсібіне тартылған инвестиция көлемі артты. Жұмыс істеп тұрған кен орындарының сарқылуына байланысты мұнай өндіру көлемі қысқаруда. 2007 жылы өңірде ең жоғары өндіру көлемі 11,7 млн. тоннаны құрады. Ағымдағы жылы болжам бойынша 4,2 млн.тонна мұнай өндіріледі. Жаңа кен орындарын іздеу мақсатында биыл Арал теңізі акваториясының «Батыс» және «Шығыс» учаскелерін, сондай-ақ, Сырдария шөгінді бассейні аумағының бір бөлігін сейсмикалық барлау бойынша жоба-сметалық құжаттама әзірлеу аяқталады. 2022 жылы сейсмикалық барлау жұмыстары басталатын болады», – деді Гүлшара Наушақызы.
</blockquote>

Қызылорда облысында өндіріс көлемі артты

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін жергілікті уақыт 11-30-да ҚР Президентінің жанындағы Орталық коммуникация қызметінде Қызылорда облысының әкімі Гүлшара Әбдіқалықованың қатысуымен брифинг өтеді.
Аймақ басшысы брифингте Мемлекет басшысының Қазақстан халқына Жолдауынан туындайтын негізгі міндеттерді орындау аясында Қызылорда облысының әлеуметтік-экономикалық дамуы туралы айтады.

Елордада Қызылорда облысы әкімінің қатысуымен брифинг өтеді

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Роза Бағланова атындағы мәдениет орталығында ұлттық валюта – теңге күні және қаржы саласы қызметкерлері мерекесіне орай салтанатты шара өтті. Салтанатты шараға аудан әкімі Мұхтар Оразбаев, аудандық мәслихат хатшысы Бақытжан Жарылқап және қаржы саласының қызметкерлері мен ардагерлері қатысты.
Мерекелік шарада құттықтау сөз сөйлеген аудан әкімі Мұхтар Оразбаев биыл Қазалы ауданы қаржыгерлері үшін ерекше жыл екенін атап өтті.
<blockquote>
 «Ел Тәуелсіздігінің 30 жылдығы қарсаңында аудандық қаржы бөлімінің құрылғанына 95 жыл толып отыр. 1926 жылы өз жұмысын бастаған бөлімде көптеген азаматтар еңбек етті. Олар экономикалық өсуді қамтамасыз етуге және әлеуметтік проблемаларды шешуге бағытталған жұмыстарды үздіксіз жүргізді. Нәтижесінде экономикада тұрақты өсім қалыптасып, ауданымыздың даму көрсеткіштері артты.
 Қаржы саласы қызметкерлерінің жемісті еңбегінің маңызды көрсеткіштерінің бірі – бюджет кірістерінің тұрақты өсімін қамтамасыз ету. Мемлекеттік жүйенің маңызды бөлігін дамыту мақсатында аянбай еңбек етіп, Сіздер алға қойған жоспарларды іске асыруға атсалыстыңыздар. Бұл көз қуантарлық көрсеткіштер саланы дамыту бағытында қолға алынған жұмыстар мен қаржыгерлердің қажырлы еңбегінің нәтижесі. Ортақ табысқа сіздердің әрбіріңіздің елеулі үлестеріңіз бар екендігін айрықша атап өткім келеді», – деді Мұхтар Әуесұлы.
</blockquote>
Сондай-ақ, Қазалы ауданының құрметті азаматы, қаржы саласының ардагері Талайлы Бөріқұлақов, аудандық мәслихат хатшысы Бақытжан Жарылқап та құттықтау сөз сөйлеп, ізгі тілектерін жеткізді.
Салтанатты шарада ауданның әлеуметтік-экономикалық дамуына елеулі үлес қосып жүрген бір топ қаржы саласының қызметкерлері «Алғыс хатпен» марапатталып, құрмет көрсетілді.
Бұл күні ауданның экономикалық көрсеткіштерінің артуына талмай еңбек етіп, табыстың берекесін тасытқан ардагерлер де назардан тыс қалмай, сый-сияпатқа ие болды.
Қаржы саласы қызметкерлері мен сала ардагерлерінің құрметіне аудандық мәдениет орталығының өнерпаздары әннен шашу шашып, көтеріңкі көңіл күй сыйлады.
Бұл күні аудандық өлкетану мұражайынан «Қаржыгерлер бұрышы» ашылды. Қаржы саласына арналған музей экспозициясымен танысқан аудан әкімі Мұхтар Оразбаев құттықтау сөз сөйлеп, мұражай қорына мерекелік кітапты табыс етті.
<img src="https://kyzylorda-news.kz/wp-content/uploads/2021/11/255507031_3206318189589106_8508073063742375848_n.jpg" alt="" />
<img src="https://kyzylorda-news.kz/wp-content/uploads/2021/11/257554005_3206316736255918_7028465399689934976_n.jpg" alt="" />
<img src="https://kyzylorda-news.kz/wp-content/uploads/2021/11/255535412_3206318652922393_1500366737377817218_n.jpg" alt="" />

Қазалылық қаржыгерлер 95 жылдығын тойлады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін – ҚР Ұлттық валюта күні. 1993 жылы 15 қарашада Елбасының Жарлығымен Ұлттық валюта – теңге енгізілді. Бұл күн Тәуелсіз ел үшін маңызды оқиға болып, мемлекеттің беріктігі мен егемендігінің символына айналды. Өңірлік коммуникациялар қызметінде өткен баспасөз конференциясында облыстық қаржы басқармасының басшысы Елена Шаврова атаулы күнге орай қаржы саласының өсім динамикасын тізбектеді.
<blockquote>
 «1993 жылы Ұлттық валюта енгізілгеннен кейін облыс бюджеті бар болғаны 135 млн.теңгені құрады. 1995 жылға қарай 5,4 млрд. теңгеге, 2010 жылы – 105,9 млрд. теңгеге жетті. Ал биыл өңір қазынасы 398 млрд. теңгені құрады. Алынатын субсицидиялар мен трансферттердің көлемі соңғы он жылда 211 млрд.теңгеге өсті. Бұл ретте бюджеттің 60 пайызы әлеуметтік-мәдени салаға бағытталады. Биылғы жылы бұл шығыстарға 238,7 млрд.теңге бөлінді. Бұл 2010 жылғы шығыстардан 3,6 есеге артық. Ал объектілер құрылысына бағытталатын қаражат соңғы он жылда 22 млрд.теңгеге өсіп, биыл 49,2 млрд. теңгені құрады. Осы орайда, қаржы саласының барлық қызметкерлерін кәсіби мерекемізбен құттықтаймын», – деді басқарма басшысы Елена Шаврова.
</blockquote>
<img src="https://kyzylorda-news.kz/wp-content/uploads/2021/11/257364642_1413188485743326_2445609767810173809_n.jpg" alt="" />

Елена Шаврова: Биыл Қызылорданың қазынасы 398 млрд. теңгені құрады

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықованың төрағалығымен биылғы жылдың 10 айындағы әлеуметтік-экономикалық даму қорытындысы мен бюджеттің орындалуы бойынша мәжіліс өтті. Жиында облыстық қаржы басқармасының басшысы Елена Шаврова мен облыстық экономика және бюджеттік жоспарлау басқармасының міндетін атқарушы Ринат Құдайбергенов атқарылған жұмыстарды баяндады.
Облыстық қаржы басқармасының басшысы Елена Шаврованың айтуынша, 2021 жылғы 1 қарашадағы жағдай бойынша облыс бюджеті түсімдер бойынша ағымдағы кезеңге арналған болжам 101,8%, оның ішінде меншікті кірістер – 109,4% орындалып, облыс бюджетіне 5,4 млрд. теңге артығымен түскен. Сондай-ақ, негізгі капиталды сатудан түсетін түсімдер 958 млрд. теңгеге орындалған. Бұл көрсеткіш те межеден асып тұр.
2021 жылдың 10 айында облыс бюджеті шығыстар бойынша 98,4% орындалды. Оның ішінде үнемделген қаржы 731 млн. теңгені құрады.
Облыстық экономика және бюджеттік жоспарлау басқармасының м.а. Ринат Құдайбергенов ағымдағы жылдың қаңтар-қазан айларында облыс әкімінің іс-шаралар жоспарын орындау және облыстың әлеуметтік-экономикалық дамуы бағытында атқарылған жұмыстарды тізбектеді.
Атап айтқанда, 2021 жылғы қаңтар-қазан айларында 620,5 млрд. теңгеге өнеркәсіп өнімі өндірілді, бұл 2020 жылдың осы кезеңімен салыстырғанда 0,3% артық. Өнеркәсіптің өңдеуші секторы бойынша негізгі капиталға инвестиция көлемі 218,8 млрд.теңгені құрады.
Биылғы жылдың қаңтар-қазан айларында облыста жұмыс істеп тұрған ШОБ субъектілерінің саны 5,8% – ға артып, 50 492 бірлікті құрады. 2021 жылдың 1 қарашасына 14 114 жаңа жұмыс орны құрылды.
Облыс дамуының қорытындысын саралаған аймақ басшысы облыстық басқармаларға жұмыс қарқынын күшейтіп, жыл соңына дейін бюджет қаржысын толық игеруін қамтамасыз етуді және жоспарланған жұмыстарды уақытылы әрі сапалы орындауды тапсырды.
<img src="https://kyzylorda-news.kz/wp-content/uploads/2021/11/257567777_186546716999914_4696053361696499396_n.jpg" alt="" />
<img src="https://kyzylorda-news.kz/wp-content/uploads/2021/11/257731283_186546740333245_2328670413481200071_n.jpg" alt="" />
<img src="https://kyzylorda-news.kz/wp-content/uploads/2021/11/257759186_186546713666581_6114159431458868212_n.jpg" alt="" />

Қызылордада жыл басынан бері 731 млн. теңге қаржы үнемделген

<a href="https://kyzylorda-news.kz/ru/obshestvo/">Kyzylorda-news.kz</a>. Еліміздің экономикасының дамуы мен әл-ауқатының артуында қаржыэкономика саласы қызметкерлерінің еңбегі өте зор. Себебі, бұл салада қызмет жасап жүрген барлық азаматтар ел тағдырын шешетін жоспарлау, есеп-қисапқа аса жауапкершілікпен қарау оңай шаруа емес екені белгілі. Дегенмен, сала қызметкерлері өздеріне жүктелген зор жауапкершілікті сезінеді.Ел Тәуелсіздігінің 30 жылдығы қарсаңына тұспа-тұс келген Қазақстанның қаржы-экономикасы жүйесінің құрылғанына да биыл 100 жыл толып отыр. Қаржы органдары 1920 жылғы 11 қазандағы Орынборда өткен жалпы Қазақ кеңесінің жарғылық съезінің, ондағы қаржы халық комиссариатын құру және автономиялы республика халық комиссарлар кеңесінің 1921 жылғы 20 тамыздағы қаржы халық комиссариаты туралы ережесін бекітумен басталады.
Қаржы-экономика саласының іргетасын қалап, ел экономикасын дамытуға өз үлесін қосқан белгілі тұлғалар өшпес қолтаңба қалдырды. Дегенмен, осы 100 жылдық тарихтың ішінде, кеңестік кезеңді еске алмау және оны сызып тастау мүмкін емес. Сол кездегі сала майталмандарын және басқарған тұлғаларды үлкен ілтипатпен еске аламыз.
Соғыс және оның зардабынан айығу жылдары аудандық қаржы бөлімінің меңгерушісі қызметін Таңдыбаев (1939-1940 жж), Б.Мусин (1940-1941 жж), Сауырбаев (19421943 жж), Б.Қисықов (1944-1946 жж), Ә.Шахаманов (1947-1950 жж), Н.Шанкибаев (1951-1954 жж), Е.Урмағанбетов (1955 ж), Т.Есетов (1956-1957 жж) кейіннен Арал аудандық партия комиссиясы бірінші хатшы, Қызылорда облыстық партия комитетінің бірінші хатшысы болған, Н.Мамышев (19581962 жж) атқарған.
1962 жылдан 1984 жылға дейін 22 жыл қатарынан ұзақ жылдар бойы басқарған белгілі қаржыгер, Ұлы Отан соғысының және еңбек ардагері Құлан Сахиев ағамыздың есімдерін арнайы атап өткен жөн. Одан кейінгі жылдар А.Оразымбетов (1984-1997 жж), Т.Оразбаев (1997-2001 жж), М.Көлдеев (2002-2004 жж), К.Егізбаев (2004-2006 жж), М.Көлдеев (2006-2013 жж), К.Қыздарбеков (2013-2019 жж), басқарса 2019 жылдан осы кезге дейін мен басқарып келемін.
Бір ғасырлық кезеңде аудан экономикасының бірқалыпты жұмыс істеуіне қаржыгерлер мен экономистердің қажырлы еңбек етуі арқасында қол жеткізіп отырды. Осы кезеңде қаржы саласының басшылық қызметтерінде болған А.Оразымбетов және меңгерушінің орынбасарлары болып көп жыл қызмет атқарған КСРО қаржы саласының үздіктері С.Қанатовтың, Қ.Жиенбаевтың есімдерін атап өткен жөн. Сонымен қатар, қаржы саласының майталмандары болған, бүгінде арамызда жоқ ардагерлеріміз Қ.Әбілғазиев, І.Кәриев, Ы.Ержанов, Ә.Кірбасов, М.Ерімбетов, Т.Қожаев және Ж.Құдайбергеновтің еңбегі ерекше.
Арал аудандық қаржы бөлімі сонау тарихи кезеңнен бастап, республика бойынша жылдың қорытындысымен жақсы көрсеткіштерге ие болып, әр жылдары қатарынан Социалистік жарыстың жеңімпаздары атанды. 2001 жылы Көптілеу Егізбаев, 2002 жылы Амангелді Дарібаев ағаларымыз облыстық қаржы басқармасының «Құрмет кітабына» енгізілсе, қаржы саласының ардагері Б.Жасақбаев облыс әкімінің Құрмет грамотасымен, бөлімнің бас маманы Ж.Қайров облыс әкімінің алғыс хатымен, сондай-ақ бөлімнің қызметкерлері А.Асанбаев, Ш.Баймұратовалар облыс әкімінің орынбасарының алғыс хатына ие болды. Бүкіл саналы өмірін ауданның қаржы саласын өркендетуге арнаған, бүгінде сол еңбегінің жемісін жеп отырған Т.Оразбаев, К.Егізбаев, А.Дарібаев, Б.Жасақбаев, М.Исаев және Қ. Сәрсееваларды зор құрметпен атап өткім келеді.
Қаржы саласының қаржыгерлер қатарынан ұшып шыққан Арал өңірінің түлектері бүгінде басқа өңірлерде лауазым иелері болып қызмет жасап жатқан қаржыгерлерді С.Қанатов, Б.Мусаев, А.Қанатов, Б.Ділмағанбетова, Ә.Махатоваларды аса зор мақтанышпен айтуға болады. Сонымен қатар, қаржы саласында тарыдай болып келіп, таудай болып өмір жолына жолдама алған, еңбек жолдарын қаржы органынан бастап, облысымыздың және ауданымыздың басқа салаларында абыроймен қызмет атқарып жүрген жас буын түлектерімізді Т.Әлсейтов, Е.Әбдіразақов, Ж.Бекжанова, А.Орынбасарова, М.Лекерова, Н.Зағатов, Ж.Жұбанов тағы басқаларды айтуға болады.
Қаржы-экономика органдарының 100 жылдығына орай, облыста 100 белгілі сала ардагерлері мен қазіргі таңда қызмет атқарып жүрген 100 майталман үздіктері туралы мәлімет жинақталып, арнайы мерекелік кітап дайындалуда. Сонымен қатар осы кітапта Ұлы Отан соғысына қатысқан сала ардагерлері, облыста, министрліктерде басшылық қызмет атқарған азаматтар мен Парламент депутаттары, республикаға еңбегі сіңген тұлғалар да бар.
Аудан экономикасының дамуы мен әлауқатының артуында қаржы-экономика саласы қызметкерлерінің еңбегі аса зор. Үстіміздегі жылдың 15 қараша Ұлттық валюта – теңге күні және Қаржыгерлер мерекесі күніне орай, экономиканың қаржы секторының қызметкерлерін кәсіби мерекесімен және Ұлттық валюта күнімен құттықтаймын.
Мақпалбай КӨЛДЕЕВ,
Аудандық қаржы бөлімінің басшысы

Қаржыгерлердің еңбегі ерекше

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Ұлттық валюта – теңгенің айналымға енген күні және ҚР қаржы саласы қызметкерлерінің кәсіби мерекесі, деп хабарлайды ҚазАқпарат.
Төл валютамызды дайындау жұмыстары 1992 жылы қолға алынып, сол жылдың 27 тамызында Ұлттық банк теңге купюрасының үлгілерін бекіткен еді. Содан кейін қазақ валютасын салған суретшілер Тимур Сүлейменов, Меңдібай Алин, Ағымсалы Дүзелханов, Қайролла Әбжәлеловтер Англияға аттанды.
Ұлттық валютаны «теңге» деп атауды ұсынған Халықаралық Инженерлер академиясының академигі, Қазақстанның белгілі ғалымы, КСРО Мемлекеттік сыйлығының лауреаты, «Құрмет» орденінің иегері Сауық Тәкежанов еді. «Теңге» сөзі – түркі халқының орта ғасырда есеп айырысқан күміс монеталарының атынан пайда болған. Осылайша теңге атауының қайта оралуы – XIII ғасырда өз монеталары соғыла бастаған еліміздің Отырар мен Тараз сияқты ірі қаласының дәстүрін жалғастырды.
1992 жылы теңге дизайнындағы портреттер бекітілді. Ал 1993 жылы алғашқы теңге партиясы Англияның ең көне және әйгілі «Харрисон және ұлдары» фабрикасында басылып шықты.
Бұл жайында ҚР Тұңғыш Президенті Нұрсұлтан Назарбаев былай деп еске алған еді: «Ил-76» төрт ұшағын жалдап алып, ақшамыздың 60 пайызын тасып әкелдік. Бұл өте құпия операция еді. Құжаттарға: «Мемлекет басшысының салынып жатқан резиденциясына керекті мүлік» деп жазылды. Оған дейін облыстарда жерасты қойма жасатып қойдық. Төрт ұшақ аптасына Лондон-Орал, одан облыстарға дейін әрлі-берлі он сегіз рейс жасап тұрды. 12 қарашаны мен ақшаны енгізу күні деп жарияладым. Жиырма күнге жетер жетпес уақыт қалды. ҰҚК басшыларының бәрін операцияны өткізуге жұмылдырдым. Ең қиыны ақшаны барлық аудандарға, барлық банкілерге жеткізу. Ол сегіз күннің ішінде атқарылып шықты. Бәлкім дүниежүзінде жаңа ақшаны енгізу тап осындай тез әрі табысты жүзеге асырылған жоқ шығар»…
1993 жылдың қазан-қараша айларында Қазақстан рубль аймағынан толықтай шығып, 15 қараша күні теңге ресми айналымға енді. Ескі ақшаны қазақстандық теңгеге айырбастау сол жылдың 15 қарашасы таңғы 8.00-де басталып, 20 қараша күні 20.00-де аяқталған еді.
1994 жылы қағаз тиындардың орнына жезден жасалынған 2,5,10, 20 және 50 номиналды монеталар шықты. 2006 жылы 15 қарашада 200, 500, 1000, 2000, 5000 және 10000 теңгелік банкноттар жаңа дизайнда жарыққа шықты. Қазіргі уақытта банкноттар Ұлттық банктің Алматы қаласындағы Банкнот фабрикасында, ал монета – Өскемендегі Монета сарайында шығарылады.
Теңгенің алғашқы банкноттарында Сүйінбай Аронұлы, Құрманғазы, Абай, Шоқан Уәлиханов, Әбілқайыр хан, Абылай хан, әл-Фараби сынды белгілі тарихи тұлғалардың портреттері, Алатау мен Көкшетау көріністері, Қожа Ахмет Яссауи кесенесінің бейнесі, Маңғыстаудан табылған тастағы таңбалар пайдаланылды. Бір теңгелік банкнотқа Әбу Насыр әл-Фараби, үш теңгелікте Сүйінбай, бес теңгелікте Құрманғазы, он теңгелікте Шоқан, жиырма теңгелікте Абай, елу теңгелікте Әбілқайыр хан, жүз теңгелікте Абылай хан бейнесі сомдалды.
Кейіннен теңгедегі тарихи тұлғалардың бейнелері алынып тасталды, дизайндары өзгертілді. Бірақ Қазақстан теңгесі өз тарихында үш жыл қатарынан «Үздік банкнот» атағын алған валюта ретінде тарихта қалды.
Жыл сайын халықаралық банкнот қоғамдастығы интернет-дауыс беру арқылы жылдың ең үздік банкнотын анықтайды. Дәл осы қоғамдастық «2011 жылғы ең үздік банкнот» атағын Қазақстан Республикасы Тәуелсіздігінің 20 жылдығына арналған 10 000 теңгелік естелік банкнотына берген болатын. Келесі жылы да ҚР Ұлттық Банкінің «Қазақ Елі» сериясынан 5 000 теңгелік банкноты екінші рет «2012 жылғы ең үздік банкнот» атағын иеленді. Ал Түркі жазба ескерткішіне арналған, 1 000 теңгелік «Kүлтегін» ескерткіш банкнотына үшінші «2013 жылғы ең үздік банкнот» атағы берілген.
Ұлттық банк алғашқыда 1 теңгені сол кездегі 1000 рубльге бағалаған болатын. Алайда, кейін еліміздің саяси және әлеуметтік, мемлекетаралық қатынастары ескеріліп, 1 теңге 500 рубль бағамында белгіленді. Сондай-ақ, теңге бірінші айналымға кірген күні 1 доллар 4,75 теңге болып бекітілді. Қазіргі уақытта – 1 рубль – 5,96 теңге, 1 АҚШ доллары – 429,59 теңге.
Мемлекет басшысының Жарлығымен 1997 жылдан бері 15 қараша – төл валютамыздың туған күні әрі қаржыгерлер күні болып белгіленді.

15 қараша – теңгенің айналымға енген күні

Сөз бен істің сабақтастығы

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Қармақшы ауданында әлеуметтік-экономикалық даму бағытында оң динамика байқалады. Биыл өнеркәсіп саласының кәсіпорындары 2 млрд 577 млн теңгенің өнімін өндірді. Оның ішінде өңдеу өнеркәсібінде 1 млрд 952 млн теңгенің өнімі шығарылды.
Сонымен қатар, ауыл шаруашылығы өнімдерінің жалпы көлемі 12 млрд 63,8 млн. теңге болып, өткен жылдың тиісті кезеңімен салыстырғанда өсім 5,1 пайызды құрады. Ауданға 6 млрд 525 млн теңгеге инвестиция тартылып, 2 млрд 236 млн. теңгеге құрылыс жұмыстары жүргізілді.
<blockquote>
 «Жалпы, ауданда шағын және орта кәсіпкерлік субъектілерінің саны 3913, ал жұмыспен қамтылғандар саны 5676 адам. Кәсіпкерлік субъектілермен 4 млрд 935 млн теңгенің өнімі шығарылды. Мемлекеттік бағдарламалар шеңберінде 369 жоба 1 млрд 133 млн теңгеге қаржыландырылды. Өткен жылдың тиісті кезеңімен салыстырғанда қаржыландырылған сомасы 1,8 есеге артты. Оның ішінде: «Бизнестің жол картасы – 2025» мемлекеттік бағдарламасы шеңберінде 114 жоба 642,2 млн теңгеге несиелендірілді. Бағдарлама шеңберінде ісін жаңа бастаған 5 жас кәсіпкерге 11,2 млн теңгенің гранты берілді», – деді аудан әкімі Қайрат Нұртай.
</blockquote>
Сондай-ақ, канал мәселесі де қозғалды. Егіске пайдаланылатын суармалы судың тапшылығына байланысты «Батыс Қармақшы» қашыртқысынан «Қурайлы» каналының П309 пикетіне қосымша су салу үшін ұзындығы 11 шақырымды құрайтын канал қазылды. 8,5 шақырым ескі арнаға механикалық тазалау жүргізілсе, 2,5 шақырым тыңнан канал қазылды. Бұдан бөлек Қармақшы ауылдық округінде Қараөзек арнасының «Қожантай» учаскесіндегі су тоспасының құрылысын қайта қалпына келтіру жұмыстары жүргізілді.
<img src="https://kyzylorda-news.kz/wp-content/uploads/2021/11/255953313_1410571816004993_1418847146805460114_n.jpg" alt="" />

Қармақшы ауданында тұрақты экономикалық даму бар

<a href="https://kyzylorda-news.kz/ru/obshestvo/">Kyzylorda-news.kz</a>. Қай кезде де табиғи газдың берілуі экономикалық өсу мен әлеуметтік дамудың маңызды бөлігі болып саналады. Қазіргі таңда Қармақшы ауданында атқарылып жатқан басты жұмыстардың бірі әрі жаңалығы – бұл аудан орталығы Жосалы кентінің көгілдір газға қосылуы дейді Өңірлік коммуникациялар қызметінде өткен баспасөз конференциясында Қармақшы ауданының әкімі Қайрат Нұртай.
Аудан басшысының айтуынша, қазір Жосалы кентінде табиғи газды әлеуметтік нысандар мен жеке тұрғын үйлерге орнатып, құрып беруде 7 қызмет көрсету орталығы жұмыс істеп тұр. Одан бөлек, олардың арасында тұрғындарға қолайлы болу үшін несиеге бөліп төлеу жолдарын қарастырғандары да кездеседі.
Бүгінгі күнге дейін Жосалы кентіндегі 4360 тұрғын үйдің газ желісін қосуға 1266 өтінім тапсырып , 864 тұрғын үй табиғи газге қосылған. Айта кету керек, күніне 20 тұрғын үйге көгілдір отын қосылуда.

Қармақшыда күніне 20 тұрғын үйге көгілдір отын қосылуда

<h4 id="kyzylordanewskzhttpskyzylordanewskzruobshestvo200422i"><a href="https://kyzylorda-news.kz/ru/obshestvo/">Kyzylorda-news.kz</a>. Депутаттар Сенаттың жалпы отырысында Цифрлық даму, инновациялар және аэроғарыш өнеркәсібі министрі Бағдат Мусин «2004 жылғы 22 желтоқсандағы Қазақстан Республикасының Үкіметі мен Ресей Федерациясының Үкіметі арасындағы «Байқоңыр» ғарыш айлағында «Бәйтерек» ғарыш зымыран кешенiн құру туралы келісімге өзгерістер мен толықтырулар енгізу туралы хаттаманы ратификациялау туралы» заңның жобасын қабылдады.</h4>
<blockquote>
 Қаралып отырған хаттама «Бәйтерек» Қазақстан-Ресей бірлескен қәсіпорны» акционерлық қоғамын бюджеттік кредиттен босату және «Бәйтерек» ғарыш зымыран кешенін жүктеу кепілдіктерімен қамтамасыз ету тәртібін реттейді. Хаттамада тараптардың 2023 жылы орта класты тасымалдағыш зымыранмен «Бәйтерек» ғарыш зымыран кешенінің ұшу сынақтарының басталуын қамтамасыз ету жөніндегі міндеттемелері нақты жазылған, – деді сенатор Талғат Мұсабаев.
</blockquote>
Сенатор атап өткендей, хаттаманы ратификациялау «Бәйтерек» бірлескен қәсіпорны» акционерлық қоғамының кредиттік міндеттемелерден босатылуына және «Бәйтерек» мемлекетаралық жобасын іске асыруды жалғастыруға мүмкіндік береді.
<blockquote>
 Заң жобасын қабылдау республикалық және жергілікті бюджеттерден қосымша шығыстарға алып келмейді, әлеуметтік-экономикалық және құқықтық теріс әсер туғызбайды. Сенаттың тұрақты комитеттері оң қорытындыларын берді. Жұмыс тобында заң жобасы жан-жақты қаралды және зерттелді, – деп атап өтті Талғат Мұсабаев.
</blockquote>
<a href="https://baq.kz/">Baq.kz</a>

Қазақстан және Қызылорда облысының жаңалықтары: Экономика